07/02/2020
မေတ္တာတရားဆိုတာ ဘာလဲ?
----------------------------
အားလုံးကတော့ အကြမ်းဖျဉ်း
နားလည်ထားကြပြီးသားပါ။
ဒါပေမယ့် မေတ္တာဆိုတဲ့ စကားလုံးလေးရဲ့
စကားလုံးလေးရဲ့ အဓိပ္ပာယ်ကို
လိုရင်းကျကျ ထိထိမိမိ သိဖို့ နားလည်ဖို့
လိုတယ်။
မေတ္တာဆိုတာ ဘာလဲလို့ မေးရင်…
"မေတ္တာဆိုတာ သတ္တဝါတွေရဲ့အပေါ်မှာ ချမ်းသာစေချင်တဲ့စိတ်ကို မေတ္တာ"လို့ ပြောတာ။
လိုရင်းက ဒါပဲနော်။
သတ္တဝါတွေရဲ့အပေါ်မှာ ချမ်းသာစေချင်တာ…
ဒါ မေတ္တာပဲ။
အဖွဲ့တွေ အနွဲ့တွေနဲ့ နားထောင်ကောင်းအောင်
ရွတ်ဆိုနေတာမျိုးကို အဓိက ထားလို့ မရဘူးနော်။
ကိုယ့်ရဲ့စိတ်ထဲက တကယ် လှိုက်လှိုက်လှဲလှဲ
သတ္တဝါအားလုံးရဲ့အပေါ်မှာ ချမ်းသာစေချင်တဲ့
စိတ် ထားတာ။
အဲဒီစိတ်ထားကို ထပ်ခါထပ်ခါဖြစ်အောင်
ကြိုးစား အဲဒါကို မေတ္တာဘာဝနာပေါ့။
မေတ္တာတရား ထားတဲ့နေရာမှာ မြတ်စွာဘုရားက
"ကိုယ်နဲ့ နှိုင်းစာပြီးတော့ မေတ္တာတရား ထားရမယ်"လို့ အဲသလို အခြေခံကျကျ ဟောတယ်။
ကိုယ်နဲ့ ဘယ်လို နှိုင်းစာရမှာတုန်း…
ကိုယ် ဘယ်လို သဘောထားရှိတုန်း။
ကိုယ့်ဆန္ဒတွေ ဘယ်လို ရှိတုန်းဆိုတာကို
အရင် စဉ်းစားပေါ့။
ဒါယကာ ဒါယိကာမတို့ ဦးဇင်းတို့တစ်တွေဟာ
ဘေးရန်ကင်းချင်ကြတယ်,ကျန်းမာရေး ကောင်း
ချင်ကြတယ်, နှလုံးစိတ်ဝမ်း ငြိမ်းချမ်းချင်ကြ တယ်, အစစအရာရာ ကျန်းကျန်းမာမာ ချမ်းချမ်း
သာသာ အဆင်ပြေပြေ ဘေးကင်းရန်ကင်း
နေလို ထိုင်လိုကြတယ်။
ဒါ သတ္တဝါတိုင်းရဲ့ ပင်မဆန္ဒကြီးပေါ့နော်။
အဲသလိုပဲ ကိုယ့်မှာလည်းပဲ အဲသလို လိုအင်ဆန္ဒ
တွေ ရှိတယ်ဆိုရင် တစ်ခြား သတ္တဝါတွေဟာ လည်း အဲသလို လိုအင်ဆန္ဒရှိကြတယ်ဆိုတာကို
နားလည်ရမယ်။ အဲသလို နားလည်ပြီးတော့ ကိုယ်နဲ့ နှိုင်းစာပြီးတော့ သတ္တဝါတွေ လိုလားတောင့်တကြတဲ့ အဲဒီ ကောင်းကျိုးနှင့် ချမ်းသာ ရကြပါစေလို့ စိတ်ထဲက သတ္တဝါတွေရဲ့
အပေါ်မှာ ကောင်းစားစေ ချင်တဲ့စိတ်
ဘေးရန်ကင်းစေချင်တဲ့စိတ်
ကျန်းမာရေး ကောင်းစေချင်တဲ့စိတ်
နှလုံးစိတ်ဝမ်း ငြိမ်းချမ်းစေချင်စိတ်
ဘာစိတ်ဆင်းရဲမူ ကိုယ်ဆင်းရဲမူမှ မတွေ့စေလိုဘူး,
မကြုံစေလိုဘူးဆိုတဲ့ ဒီမွန်မြတ်တဲ့စိတ်ထားလေး
ကို မေတ္တာစိတ်ထား။
အဲဒါကို ကိုယ်က ထပ်ခါထပ်ခါ ဖြစ်အောင်
ကြိုးစားရမှာ။ ကြိုးစားလို့ရှိရင် သူက ကျွမ်းကျင်လာတယ်။ အစုအပုံ ဖြစ်လာတယ်။
မေတ္တာတရားက ကိုယ့်သန္တာန်မှာ။
သစ္စာရွှေစည်ဆရာတော်
မေတ္တာဘာဝနာ(2017-4-30)တရားတော်မှ
ကောက်နူတ်ချက် ဖြစ်ပါသည်။
