Pyi Thu Khit

06/04/2024

သင်္ဃန်းညီနောင်ဗျူဟာမှ အရာရှိ ၆၇ဦး အပါဝင် ၆၂၀ ခန့် လက်နက်ချဟု KNU ထုတ်ပြန်

▪︎လက်နက်ခဲယမ်းများစွာသိမ်းဆည်းရရှိဟုထုတ်ဖော်ပြသ
Pyi Thu Khit
Khit Ta Media

ကရင်ပြည်နယ် မြ၀တီမြို့နယ်၊ သင်္ဃန်းညီနောင် စစ်ဗျူဟာမှ အရာရှိ ၊ စစ်သည်နှင့် တပ်မိသားစုဝင် စုစုပေါင်း ၆၁၇ ဦး လက်နက်ချ အလင်းဝင်လာကြောင်း ကရင်အမျိုးသားအစည်းအရုံး(KNU)က သတင်းထုတ်ပြန်လိုက်သည်။

စစ်ကောင်စီလက်အောက်ခံ စစ်ဗျူဟာအခြေချ (သင်္ဃန်းညီနောင်) စခန်းကို ကရင်အမျိုးသားလွှတ်မြောက်ရေးတပ်မတော်နှင့် တော်လှန်ရေးပူးပေါင်းတပ်ဖွဲ့တို့မှ ဧပြီ ၅ ရက်တွင် တိုက်ခိုက်သိမ်းပိုက်နိုင်ခဲ့သည်။

အရှေ့တောင်တိုင်းစစ်ဌာနချုပ်လက်အောက်ခံ စစ်ဗျူဟာအခြေချ (သင်္ဃန်းညီနောင်) စခန်း သိမ်းပိုက်မှုတွင် အရာရှိအဆင့်(၆၇) ဦး၊ အခြားနှင့်တပ်သားအဆင့် (၄၁၀) ဦး၊ စုစုပေါင်း (၄၇၇) ဦး လက်နက်ချ အညံ့ခံခဲ့​ကြောင်းအသိ​ပေးထား သည်။ထို့ပြင် ရဲမေ(၅၉)ဦးနှင့် တပ်မိသားစုဝင် (၈၁)ဦး စုစုပေါင်း (၁၄၀)ဦး လက်နက်ချ ဝင်ရောက်လာခဲ့သည်ဟု ဖော်ပြသည်။


ထို့ကြောင့် လက်နက်ချအလင်းဝင်ရောက်လာသူ အရာရှိအဆင့်၊ တပ်သားများ၊ ရဲမေများနှင့် တပ်မိသားစုဝင်များ စုစုပေါင်း (၆၁၇)ဦး ရှိသည်။

အဆိုပါ ဗျူဟာ သိမ်းပိုက်မှု ဖြစ်စဉ်အတွင်း လက်နက်ကြီး၊ လက်နက်ငယ်များနှင့် ခဲယမ်းမီးကျောက်မြောက်များစွာကို သိမ်းပိုက်ရရှိခဲ့ကြောင်း ဓာတ်ပုံမှတ်တမ်းများနှင့်အတူ ထုတ်ပြန်သည်။

ကရင်အမျိုးသားလွတ်မြောက်ရေးတပ်မတော်နှင့် တော်လှန်
ရေးပူးပေါင်းတပ်ဖွဲ့များမှ (သင်္ဃန်းညီနောင်) စစ်ဗျူဟာအခြေချ စခန်းကို တိုက်ခိုက်သိမ်းပိုက်ရခြင်းမှာ အရှေ့
တောင်တိုင်းစစ်ဌာနချုပ်လက်အောက်ခံ (သင်္ဃန်းညီနောင်) စစ်ဗျူဟာအခြေချ စခန်းရှိခြင်းကြောင့် နယ်မြေတွင်းနေထိုင်ကြသော ကရင်လူမျိုးနှင့် အခြားလူမျိုးများ၏ စီးပွားရေး၊ ပညာရေး၊ လူမှုရေးများကို ထိခိုက်ကျဆင်းစေသည့် အပြင် ရိုးရာယဉ်ကျေးမှုများလည်း ပျက်စီးပျောက်ကွယ်စေခဲ့သောကြောင့်ဖြစ်သည်ဟု ဖော်ပြသည်။

အထူးသဖြင့် အကြောက်တရားနှင့်နေထိုင်နေရသော လူသားများ၏ဘဝလုံခြုံမှုကင်းမဲ့ရခြင်းကို ဖြစ်ပေါ်စေခဲ့သောကြောင့်ဖြစ်ကြောင်း KNUက ရှင်းလင်းသည်။

“၃၅၇ တော့ အလံဖြူထောင်ပြီ။ မိသားစု အပါအဝင် ၄၀၀ ဝန်းကျင်ပါတယ် အလံဖြူထောင်ပြီး အလင်းဝင်လာတယ်။ ၂၇၅ ပဲကျန်တယ်။ သူ့လည်း အလံဖြူထောင်ခိုင်းမယ် ညနေကျရင်။ မထောင်ရင် နောက်မနက်ကျရင် သူများဝင်သိမ်းမှာပဲ။ မြ၀တီ အခြေအနေက အခုက သူတို့ စကစ ဘက်က စစ်တပ်အနေနဲ့ ထိန်းလို့မရတဲ့ သဘောပေါ့” ဟု KNU သတင်းရင်းမြစ်ကယ​နေ့ (ဧပြီ ၆) ​နေ့ခင်းပိုင်းတွင် လူထု​နွေဦးသို့ ပြောသည်။

အရှေ့တောင်တိုင်းစစ်ဌာနချုပ်လက်အောက်ခံ (သင်္ဃန်းညီနောင်) စစ်ဗျူဟာအခြေချ စခန်းသည် (၁၉၆၈) ခုနှစ်မှ အခြေချခဲ့ ဗျူဟာခန်းဖြစ်သည်။

မြဝတီ မြို့ အ​ခြေအ​နေမှာ တည်ငြိမ်​နေဆဲ ဖြစ်ပြီး ​တော်လှန်​ရေး တပ်ဖွဲ့များသိမ်းပိုက်ခဲ့​​သော ဗျူဟာကုန်း အနီးဝန်းကျင်ရှိ​ကျေးရွာများအပါအဝင် မြို့​ပေါ်တွင် ပြည်သူများ တည်တည်ငြိမ်ငြိမ် ရှိ​နေကြဆဲ​ဖြစ်​ကြောင်း ​ဒေသခံ ပြည်သူ အချို့က​ပြောသည်။

(သင်္ဃန်းညီနောင် စစ်ဗျူဟာမှ သိမ်းဆည်းရရှိသော လက်နက်ခဲယမ်းများနှင့် အလင်းဝင် ရောက်လာသူများအား တွေ့ရစဉ်။ ဓာတ်ပုံ - KNU)

Khit Ta Media သည် Pyi Thu Khit ၏ မဟာမိတ်ဖြစ်သည်။>>> https://www.facebook.com/share/p/FL5QbAJjdyp2z3W3/?mibextid=Nif5oz

06/04/2024

ခမရ ၅၆၄ ဌာနချုပ်၊ ခမရ ၅၅၂ နှင့် တောင်ဘဇာစခန်းတို့ကို AA သိမ်းပိုက်လိုက်ပြီး စစ်ကောင်စီ ၈၀ ကျော်သေဆုံး

Pyi Thu Khit

ရခိုင်ပြည်၊ ဘူးသီးတောင်မြို့နယ်ရှိ ခမရ ၅၆၄ တပ်ရင်းဌာနချုပ်၊ ခမရ ၅၅၂ နှင့် တောင်ဘဇာစခန်းတို့ကို AA က တိုက်ခိုက်သိမ်းပိုက်လိုက်ပြီး စစ်ကောင်စီတပ်ဖွဲ့ဝင် ၈၀ ကျော်သေဆုံးကြောင်း AA က တရားဝင်သတင်းထုတ်ပြန်သည်။

ဧပြီလ ၅ ရက်နေ့ နံနက် ၈နာရီအချိန်တွင် ရခိုင်ပြည်၊ ဘူးသီးတောင်အခြေစိုက် ခမရ ၅၆၄ တပ်ရင်းဌာနချုပ်ကို အပြီးသတ်သိမ်းပိုက်ရရှိခဲ့ကြောင်း၊ အဆိုပါ စခန်းကို ဧပြီလ ၁ ရက်နေ့မှစတင်ကာ ထိုးစစ်ဆင်တိုက်ခိုက်ခဲ့ပြီး ဧပြီလ ၅ ရက်၊ နံနက် ၈ နာရီအချိန်တွင် တပ်ရင်းဌာနချုပ်တစ်ခုလုံးအား အပြီးသတ်သိမ်းပိုက် ရယူနိုင်ခဲ့ခြင်း ဖြစ်ကြောင်း၊ စစ်ကောင်စီက ခမရ ၅၆၄ စခန်း မကျဆုံးစေရေး ကြည်းတပ်၊ လေတပ်တို့ဖြင့် အသည်းအသန် ပူးပေါင်းခုခံကာကွယ်နေခဲ့သော်လည်း ရက္ခိုင့်တပ်တော်၏ ဗျူဟာမြောက်ထိုးစစ်ကို မည်သို့မျှ ယှဉ်နိုင်ခြင်းမရှိဘဲ ၅ ရက်အကြာတွင် စခန်းကို သိမ်းပိုက်နိုင်ခြင်းဖြစ်ကြောင်း၊ တိုက်ပွဲအတွင်း အကြမ်းဖက်စစ်ကောင်စီ အရေအတွက် ၈၀ ကျော်အား သုတ်သင်ရှင်းလင်းနိုင်ခဲ့ကြောင်း သိရှိရသည်။

ခမရ ၅၆၄ တပ်ရင်းဌာနချုပ် သိမ်းပိုက်ခဲ့သော တိုက်ပွဲအတွင်း စစ်သားအလောင်း များစွာနှင့် လက်နက်ခဲယမ်းများ၊ စစ်အသုံးအဆောင်ပစ္စည်းအများအပြားကို သိမ်းဆည်းရရှိခဲ့ကြောင်း၊ ထို့အတူ မတ်လ ၂၅ ရက်၊ မွန်းတည့် ၁၂ နာရီအချိန်တွင် အကြမ်းဖက်စစ်ကောင်စီ၏ ဘူးသီးတောင်အခြေစိုက် ခမရ ၅၅၂ တပ်ရင်းကိုလည်း ၃၂ ရက်အကြာတွင် ရက္ခိုင့်တပ်တော်မှ အပြီးသတ် သိမ်းပိုက်နိုင်ခဲ့ကြောင်း၊ မတ်လ ၂၅ ရက်နေ့တွင်ပင် ဘူးသီးတောင်မြို့နယ်၊ တောင်ဘဇာစခန်းကိုလည်း ထပ်မံသိမ်းပိုက်ရရှိခဲ့ကြောင်း သိရှိရသည်။

05/04/2024

ပေါက်မြို့နယ်မှ ထွက်လာသော စစ်ယာဉ်တန်းကို အကြိမ်ကြိမ် တိုက်ခိုက် စစ်ကောင်စီ ၂၂ ဦး သေဆုံး

ပြည်သူ့ခေတ်

မကွေးတိုင်း၊ ပေါက်မြို့နယ်၊ ရေပြာရဲစခန်းမှ ထွက်လာသော အကြမ်းဖက် စစ်တပ် ယာဉ်တန်းကို အကြိမ်ကြိမ် ကြားဖြတ် တိုက်ခိုက်ရာ အကြမ်းဖက် စစ်ကောင်စီ တပ်သား ၂၂ ဦး သေဆုံးခဲ့ကြောင်း မြိုင်ပကဖမှ သိရသည်။

ယနေ့ ဧပြီလ ၅ ရက်နေ့ ညနေ ၄ နာရီ ၁၀ မိနစ်ခန့်တွင် ပေါက်မြို့နယ်၊ ရေပြာရဲစခန်း မှ ကုက္ကိုစုပျူစောထီးကျေးရွာဘက်ကို ထွက်လာသော အင်အား ၂၀၀ ကျော်ပါ အကြမ်းဖက် စစ်ယာဉ်တန်းကို ပေပါ ပဒေသာမိုင်း ၃ လုံးဖြင့် စတင် တိုက်ခိုက်ခဲ့ရာ အကြမ်းဖက်စစ်သား ၇ ဦး ပွဲချင်းပြီး သေဆုံးခဲ့ပြီး ၄ ဦးခန့် ထိခိုက် ဒဏ်ရာ ရရှိခဲ့ကြောင်း သိရသည်။

မိုင်းဆွဲ တိုက်ခိုက်ခံရပြီးနောက် ရှေ့ပြေးပွိုင့်အဖြစ် ဆက်လက် ထွက်ခွာလာခဲ့သော အကြမ်းဖက် စစ်သားများကို အသင့် ထောင်ထားသည့် မိုင်းပွိုင့်ဖြင့် ထပ်မံ ဖောက်ခွဲ တိုက်ခိုက်ခဲ့ရာ အကြမ်းဖက် စစ်သား ၅ ဦး ထပ်မံ ပွဲချင်းပြီး သေဆုံးကာ ၄ ဦးမှာ နားစည်များကွဲ၍ ကြောက်လန့်အော်ဟစ်ကာ ယာခင်းများအတွင်း လှည့်ပတ် ပြေးလွှားနေခဲ့ကြောင်း သိရှိရသည်။

ထို့နောက် အကြမ်းဖက် စစ်ယာဉ်တန်းနှင့် စစ်သားများကို လက်နက်ကြီး၊ လက်နက်ငယ်များဖြင့် ပစ်ခတ် တိုက်ခိုက်ခဲ့ရာ အကြမ်းဖက် စစ်သား ၇ ဦး ထပ်မံ လဲကျ သေဆုံးခဲ့ပြီး ဒဏ်ရာရရှိမှု အရေအတွက်ကို အတည်ပြုနိုင်ခြင်းမရှိသေးကြောင်း သိရသည်။

ထို့ပြင် ယင်းအကြမ်းဖက် စစ်တပ် စစ်ကြောင်းကို ဒရုန်းဖြင့် ထပ်မံ ဗုံးကျဲ တိုက်ခိုက်ခဲ့ရာ အကြမ်းဖက် စစ်သား ၃ ဦး ထိခိုက်ဒဏ်ရာရရှိခဲ့ ကြောင်း၊ ညနေ ၄ နာရီ ၄၈ မိနစ်အချိန်တွင် ရေပြာရဲစခန်းမှ မောင်းနှင်လာသည့် Jammer ကားပါ မော်တော်ယဥ် ၄ စီးသည် နင်းမိုင်းထိပြီး အကြမ်းဖက် စစ်သား ၃ ဦး ပင်ပွဲချင်းပြီး သေဆုံးကာ ၄ ဦးခန့် အပြင်းအထန် ဒဏ်ရာရရှိခဲ့ကြောင်း သိရသည်။

အဆိုပါ တိုက်ခိုက်မှုများကို မြိုင်ပကဖ တပ်ရင်း ၁ ၊ ပေါက်ပကဖ နှင့် ဗိုလ်လရောင်အဖွဲ့များ၊ ဗိုလ်ရိုးမ အဖွဲ့များ၊ ပခုက္ကူခရိုင် တပ်ရင်း ၁၆ ၊ တပ်ခွဲ ၂ - FRG တပ်ဖွဲ့တို့ ပူးပေါင်းကာ စနစ်တကျ အစီအစဥ် ဆွဲပြီး တိုက်ခိုက်ခဲ့ခြင်းဖြစ်ကြောင်း သိရသည်။

ယင်း အကြမ်းဖက် စစ်တပ် စစ်ကြောင်းသည် ပခုက္ကူမြို့ တပ်မ ၁၀၁ မှ ရိက္ခာပို့ယာဉ် ၁၂၀ ကျော်ဖြင့် ထွက်ခွာလာခြင်းဖြစ်ပြီး ပေါက်မြို့သို့ ပင်ရောက်ရှိခြင်းမရှိဘဲ လမ်းခရီးတလျှောက် ပြည်သူ့ကာကွယ် ရေးတပ်ဖွဲ့များ၏ မိုင်းဆွဲတိုက်ခိုက်ခြင်း၊ ဒရုန်းဖြင့် တိုက်ခိုက်ခြင်း၊ ရင်ဆိုင်တိုက်ပွဲ ဆင်နွှဲခံရခြင်းကြောင့် အထိနာကာ မော်တော်ယာဉ်များကို မီးရှို့ဖျက်ဆီးခြင်း၊ လက်နက်နှင့်တကွ ထွက်ပြေးခြင်းတို့ ရှိကြောင်း၊ အချို့သော စစ်ကောင်စီတပ်ဖွဲ့ဝင်များမှာ မြိုင်ပကဖထံသို့ လက်နက်နှင့်တကွ အလင်း ဝင်ရောက်လာမှုရှိကြောင်း မြိုင်ပကဖမှ တာဝန်ရှိသူတစ်ဦးက ပြောဆိုသည်။

04/04/2024

နေပြည်တော်ကို ဒရုန်းများဖြင့် တိုက်ခိုက်မှုအပြီး ပစ်မှတ်တိုင်းကို မှတ်ပုံတင်ထားလို့ရပြီဟု NUG ကာကွယ်ရေးဝန်ကြီး ထုတ်ဖော်ပြောဆို

Pyi Thu Khit

ယနေ့ နေပြည်တော်ကို ဒရုန်းများဖြင့် တိုက်ခိုက်မှုအပြီး ပစ်မှတ်တိုင်းကို မှတ်ပုံတင်ထားလို့ရပြီဟု NUG ကာကွယ်ရေးဝန်ကြီး ဦးရည်မွန်က လူမှုကွန်ရက်မှတစ်ဆင့် ထုတ်ဖော်ပြောဆိုလိုက်သည်။

ယနေ့ ဧပြီလ ၄ ရက်နေ့ နံနက် ၁၀ နာရီ ၃၀ မိနစ်အချိန် နေပြည်တော် စစ်ရုံးချုပ်၊ အေလာလေတပ်နှင့် မင်းအောင်လှိုင်၏ နေအိမ်တို့ကို ဒရုန်း ၂၈ စင်းဖြင့် တိုက်ခိုက်ခဲ့ပြီးနောက် စစ်တပ်ဘက်မှ ၂ ဦးသေဆုံးကာ ၁၅ ဦးဒဏ်ရာရရှိခဲ့ကြောင်း သိရှိရသည်။

အဆိုပါ ဒရုန်းများသည် အလွန်ဖြတ်တောက်အားနှင့် အင်အားကောင်းမွန် Jammer ကွန်ရက်များကို ဖြတ်ကျော်ကာ အေလာလေတပ်၊ စစ်ရုံးချုပ်တို့အတွင်းသို့ ကျရောက်ပေါက်ကွဲခဲ့ခြင်းဖြစ်သည်။

NUG ကာကွယ်ရေးဝန်ကြီး ဦးရည်မွန်က ယနေ့ ဒရုန်းစစ်ဆင်ရေးသည် ခရီးရှည်၏ ပထမဆုံးအတွေ့အကြုံဖြစ်ပြီး ဒရုန်းတွင်ပါသည့် ပြင်းအားနှင့်ပေါက်ကွဲအားသည် ၁၀၇ မမ ရှော့တိုက်ဒုံးထက် ၂၀ ရာခိုင်နှုန်းပိုပြင်းကြောင်း ရေးသားထုတ်ဖော်ထားသည်။

"ဒီ​နေ့ ​နေပြည်​တော်............................

ခရီးရှည်ဒရုန်းများရဲ့ ပထမဆုံးအ​တွေ့အကြုံပါပဲ။
ဒရုန်းတစ်စင်းပါ ယမ်း​ပေါက်ကွဲအားက 107တစ်စင်းထက် ၂၀%ပိုပြင်းပြီး အနက်​ဖောက်ထွင်းအားလည်း ပို​ကောင်းပါတယ်။
ပစ်မှတ်တိုင်းကို မှတ်ပုံတင်ထားလို့ ရပါပြီ"ဟု NUG ကာကွယ်ရေးဝန်ကြီး ဦးရည်မွန်က သူ၏ လူမှုကွန်ရက်စာမျက်နှာများမှတစ်ဆင့် ပြည်သူများသို့ အသိပေး ရေးသား ထုတ်ဖော်ထားသည်။

04/04/2024

နေပြည်တော် အေလာလေတပ်စခန်းနှင့် စစ်ရုံးချုပ်ကို ဒရုန်းဖြင့် တိုက်ခိုက် စစ်ကောင်စီထုတ်ပြန်

ပြည်သူ့ခေတ်
Khit Ta Media

နေပြည်တော် အေလာလေတပ်စခန်းနှင့် စစ်ရုံးချုပ်ကို ဒရုန်းဖြင့် တိုက်ခိုက်မှု စစ်သား ၂ ဦး သေဆုံးပြီး ၁၅ ဦးဒဏ်ရာရရှိကြောင်း သိရှိရသည်။

ယနေ့ နံနက် ၁၀ နာရီ ၃၀ မိနစ်အချိန် နေပြည်တော်စစ်ရုံးချုပ်နှင့် အေလာ လေတပ်စခန်းအတွင်းသို့ ဒရုန်းများ ဝင်ရောက်လာပြီး နေပြည်တော်စစ်ရုံးချုပ်နှင့် အေလာလေတပ်အတွင်း ကျရောက်ပေါက်ကွဲခဲ့ကြောင်း၊ ပေါက်ကွဲမှုများကြောင့် အေလာလေတပ်အတွင်း စစ်သား ၂ ဦးသေဆုံးခဲ့ပြီး ၄ ဦး ဒဏ်ရာရရှိကြောင်း၊ စစ်ရုံးချုပ်အတွင်း ကျရောက်ပေါက်ကွဲမှုတွင် စစ်သည်နှင့်အရာရှိ ၁၁ ဦးဒဏ်ရာရရှိပြီး ခန်းမဆောင်၏ ခေါင်မိုး ပျက်စီးခဲ့ကြောင်း သိရှိရသည်။

"အေလာလေတပ်စခန်းမှာ စစ်သား ၂ ဦးသေဆုံးတယ်။ အရာရှိနဲ့ စစ်သား ၄ ဦးဒဏ်ရာပြင်းထန်ပါတယ်။ စစ်ရုံးမှာတော့ အရာရှိ ၃ ဦးနဲ့ စစ်သည် ၈ ဦး ဒဏ်ရာရရှိပါတယ်" ဟု နေပြည်တော် သတင်းရင်းမြစ်က ပြောဆိုသည်။

အကြမ်းဖက်စစ်ကောင်စီတပ်ကမူ ဒရုန်းများဖြင့် တိုက်ခိုက်မှုကြောင့် ထုတ်ပြန်ပြီး လူနှင့်အဆောက်အအုံထိခိုက်မှု မရှိဘဲ ဒရုန်းများကို ပစ်ချနိုင်ခဲ့ကြောင်း လိမ်လည် သတင်းထုတ်ပြန်ထားသည်။

ဓာတ်ပုံ- နေပြည်တော်လေဆိပ်တွင် ကျရောက်ပေါက်ကွဲခဲ့သည့် PDF ဒရုန်းတစ်စီး။

03/04/2024

တာချီလိတ်နဂါးနှစ်ကောင်ဆရာတော်ဈာပနသို့ စစ်ခေါင်းဆောင် မင်းအောင်လှိုင်ရောက်ရှိ

Pyi Thu Khit
Khit Ta Media -KTM

တာချီလိတ်မြို့ ဆန်ကိုင်း (က) ရပ်ကွက်ရှိ နဂါးနှစ်ကောင်ကျောင်းတိုက် ဓမ္မရုံတော်ကြီးတွင် ကျင်းပပြုလုပ်နေသည့် နဂါးနှစ်ကောင်ဆရာတော်ဈာပနသို့ စစ်ခေါင်းဆောင် မင်းအောင်လှိုင် ရောက်ရှိနေကြောင်း စုံစမ်းသိရသည်။

ယနေ့ (ဧပြီလ ၃) ရက် ညပိုင်းတွင် စစ်ခေါင်းဆောင် မင်းအောင်လှိုင်ကိုးကွယ်သည့် သီတဂူဆရာတော် ဘဒ္ဒန္တဉာဏိဿရ တရားဟောကြားမည်ဖြစ်ပြီး မင်းအောင်လှိုင်လည်း ရောက်ရှိနေကြောင်း တာချီလိတ်မြို့ ဒေသခံတစ်ဦးက ပြောသည်။

“တာချီလိတ်မှာ မင်းအောင်လှိုင်ရောက်နေတယ်။ နဂါးနှစ်ကောင်ဆရာတော် စျာပနပွဲလာတာ။ မနေ့ညကလည်း သူတို့အစမ်းလှည့်တယ်ဆိုလားပဲ။ သျှမ်းဝတ်စုံတွေနဲ့ ကျောင်းသူတွေရော၊ လူနာတင်ကားတွေရော၊ စစ်သားတွေရော၊ ရဲတွေရောပြည့်နေတယ်။ အဲ့မှာရပ်ကြည့်နေတဲ့လူကို ဖုန်းသိမ်းခိုင်းတယ်၊ မသိမ်းရင် သိမ်းမယ်ပြောနေတာ” ဟု ၎င်းကပြောသည်။

ထို့အပြင် နဂါးနှစ်ကောင်ဆရာတော်ဈာပနာသို့ တက်ရောက်ရန်အတွက် လူစာရင်းသွင်းရသည့်အပြင် မှတ်ပုံတင် မိတ္ထူပါ ယူဆောင်သွားရကြောင်း ဒေသခံများက ပြောသည်။

ယင်းကဲ့သို့ စစ်ခေါင်းဆောင် မင်းအောင်လှိုင်ရောက်ရှိနေသဖြင့် လမ်းဘေးပျံကျစျေးဆိုင်ခန်းများကို ဧပြီလ ၅ ရက်နှင့် ၆ ရက်တွင် ပိတ်ခိုင်းမည်ဖြစ်ကြောင်း သိရသည်။

ယမန်နေ့ ဧပြီလ ၂ ရက်တွင်လည်း ဝစီပိတ်ဆရာတော်နှင့်တာဝန်ရှိသူများမှ ဈာပနကွင်းအတွင်း ကြည့်ရှု့စစ်ဆေးခြင်း၊ သီတဂူဆရာတော်အား တချီလိတ်လေဆိပ်၌ ကြိုဆိုခြင်း ပြုလုပ်ခဲ့ပြီး

လာမည့် သင်္ကြန်ကာလ ဧပြီလ ၆ ရက်တွင် အန္တိမအဂ္ဂိဈာပန ကျင်းပသွားမည်ဖြစ်ကြောင်း ဂေါပကအဖွဲ့များထံမှ သိရသည်။

ပြီးခဲ့သည့် ၂၀၂၁ ခုနှစ် စစ်အာဏာသိမ်းခါစတွင် စစ်ကောင်စီခေါင်းဆောင် မင်းအောင်လှိုင် ကိုယ်တိုင် နဂါးနှစ်ကောင်ကျောင်းတိုက် ဆရာတော်ထံသို့ “အဘိဓဇမဟာရဋ္ဌဂုရု”ဘွဲ့တံဆိပ်တော်ကို တာချီလိတ်မြို့အထိ လာရောက်ဆက်ကပ်လှူဒါန်းခဲ့သည်။

02/04/2024

စစ်ကောင်စီမှ သိမ်းဆည်းရရှိသည့် လက်နက် ခဲယမ်းများကို တိုက်ပွဲတွင် အသုံးပြာနေဟု ကော်ဘရာ စစ်ကြောင်းက အသိပေး

Pyi Thu Khit

အကြမ်းဖက် စစ်ကောင်စီထံမှ သိမ်းဆည်းရရှိသည့် လက်နက် ခဲယမ်းများကို စစ်ကောင်စီကို တိုက်ထုတ်ရာတွင် ကောင်းစွာ အသုံးပြုနေကြောင်း ကော်ဘရာ စစ်ကြောင်းက ပြည်သူများကို အသိပေး ထားသည်။

02/04/2024

ကြို့ကုန်းတွင် "ကြောက်တတ်ရင် အုပ်ချုပ်ရေးမှူးမလုပ်ဘူး" ခြိမ်းခြောက် လာဘ်စားပြီး မဲလိမ် ဆွဲထည့်သွား

ပြည်သူ့ခေတ်
ဧပြီး ၂

ရန်ကုန်တိုင်း အင်းစိန်မြို့နယ် အနောက်ကြို့ကုန်းတွင် စစ်မှုထမ်းရန်အတွက် မဲဖောက်ရာတွင် ရာအိမ်မှူး (ရုံးပိုင်) သိန်းဇော်မင်းက ခြိမ်ခြောက် ကျိန်းဝါး စိန်ခေါ်ပြီး မဲကို ကလိမ်ကကျစ် ပြုလုပ်သွားကြောင်း သိရှိရသည်။

မီးရထားဝန်ထမ်းရှိသော မိသားစုများနှင့် အုပ်ကြီးနေ့တဲ့လမ်းကို မဲ ဟန်ပြလုပ်ပြီး CDM လုပ်သူမိသားစု အိမ်ငှားနေသူတို့နှင့် သာမန်ပြည်သူများကို မဲကလိမ်ကကျစ်လုပ်ပြီး စစ်တပ်ခေါ် ခြိမ်းခြောက်ကာ အတင်းအဓမ္မ ဖောင်ဖြည့်ခိုင်းပြီး ဆွဲခေါ်သွားကြောင်း အနောက်ကြို့ကုန်းနေ ပြည်သူများထံမှ သိရှိရသည်။

" ယ္ခု လုပ်ရပ်ကို ကျေနပ်မှု မရှိပါက ကြိုက်တဲ့နေရာ သွားတိုင်နိုင်တယ် မကြောက်တတ်လို့ အုပ်ချုပ်ရေးမှူးလုပ်တာ ကြောက်တတ်ရင် အုပ်ချုပ်ရေးမှူးမလုပ်ဘူး အထက် ညွန်ကြားချက်အတိုင်လုပ်တာ ဘယ်သူမှ ကျေနပ်စရာမလိုဘူး မကျေနပ်လို့ လက်မခံသူကို အရေးယူမယ် ဟု ရာအိမ်မှူး သိန်းဇော်မင်း (ရုံးပိုင်) က ရပ်ကွက်တွင် ခြိမ်းခြောက် ကျိန်းဝါးသွားတယ် လို့ ပြည်သူတစ်ဦးက ပြောဆိုသည်။

မဲကို တစ်လမ်းတစ်ယောက် တစ်လိုင်း တစ်ယောက်ယူမယ်ပြောပြီး အုပ်ကြီးရှိတဲ့လမ်း စပါယ်လမ်း စကာဝါလမ်း နှင်းဆီလမ်း ညောင်ပင်လမ်း ရွက်လှလမ်း စသည့် လမ်းအချို့ကို စစ်မှုထမ်းကင်းလွှတ် မဲမနှိုက်ခဲရဘူးလို့ ၄င်းလမ်းတွင် နေသူကိုယ်တိုင် ပြောဆိုသည်။

မီးရထား ဝန်ထမ်း တိုက်အမှတ် ၁* ၂* ၃* ၅ တို့မှ လာဘ်စားပြီး ပေါက်မဲမပါပဲ ဟန်ပြလုပ်ခဲကြောင်း၊ ၁ လမ်းချင်း ၁ လိုင်းချင်း သွားမည်ပြောပြီး မဲသာကုန်သွားပြီး ဘယ်သူမှ မဲမပေါက်ကြောင်း၊ လာဘ်ပေးလာဘ်ယူလုပ်ထားတဲ့ မှန်လုံတိုက်မှာ ပေါက်မဲမှားထည့်မိလို့ မဲပေါက်သူကို ပယ်ဖျက်လိုက်ကြောင်း၊တိုက်အမှတ် ၄ တွင် ဝန်ထမ်းလည်း မရှိ ငွေကြွေးလည်းမတတ်နိုင်သည့် ဦးတန်မြ၏သား ဇော်ထက်အောင်ကို မဲပေါက်တယ်ဆိုပြီး ကလိမ်ကျစ်လုပ်ကာ စစ်တပ်ခေါ် ခြိမ်းခြောက်ပြီး အတင်း အဓမ္မ ဖောင်ဖြည့်ခိုင်း ကြောင်း အနောက်ကြို့ကုန်းနေ ပြည်သူများက ပြောဆိုကြသည်။

"ဦးတန်မြသားက အလုပ်သွားနေတာ အိမ်မှာမရှိဘူး မဲဖောက်မယ်လို့လည်း ကြိုပြောထားတာမရှိဘူး တိုက်၄ မှာ ဘယ်သူမှ မဲမနှိုက်ခဲရဘူး မဲနှိုက်ဖို့ စာရင်းကောက်တယ် ပြီးတော့ အားချင်းပဲ တန်မြသား မဲပေါက်သွားတယ်ပြောတာ"ဟု ဆိုသည်။

" ပထမတော ၅ လပိုင်း ၂၀ ရက်နေ့ ဆေးစစ်ပြီး ဆေးအောင်မှ သင်တန်းတက်ရမယ်ပြောတယ် ခုတော အဲလိုမဟုတ်ဘူး မတ်လ ၂၈ ရက် မနက် ၇နာရှိအချိန် ဆေးစစ်ဖို့ဆိုကာ ခေါ်ယူသွားတယ် ဆေးမစစ်ပါဘူး သင်တန်းကို တခါတည်းပို့လိုက်တယ် " ဟု အုပ်ချပ်ရေးမှူးနဲ့ နီးစပ်သူနှင့် အနောက်ကြို့ကုန်းနေ ပြည်သူတစ်ဦးက ပြောဆိုသည်။

21/01/2024

16/01/2024

31/10/2023

ကန်တော်ယန် စစ်ကောင်စီစခန်းသိမ်းတိုက်ပွဲ တပ်ရင်းမှူး ဖမ်းမိဟု KIA စစ်ရေးသတင်းရင်းမြစ်ပြော

အောက်တိုဘာ ၃၁

ကချင်ပြည်နယ် ဝိုင်းမော်မြို့နယ် ကန်တော်ယန် စစ်ကောင်စီစခန်းကို ကချင်လွတ်လပ်ရေးတပ်မတော်(KIA)က ယနေ့နံနက်တွင် တိုက်ခိုက်သိမ်းပိုက်နိုင်ခဲ့ကြောင်း စစ်ရေးသတင်းရင်းမြစ်က ပြောသည်။

အောက်တိုဘာ ၃၁ရက် နံနက် ၆နာရီမှစ၍ စခန်းသိမ်းတိုက်ခိုက်ခဲ့ရာ ၂နာရီခွဲကျော်အကြာတွင် စခန်းကို သိမ်းနိုင်ခဲ့သည်ဟု ဆိုသည်။

"ဝိုင်းမော်မြို့နယ် ကန်ဒေါ်ယန် စကစ တပ်အထိုင်စခန်း KIA သိမ်းပိုက်။ဒီမနက် ၆နာရီစ စတိုက် တာ။ ၈နာရီ ၄၀မှာ စခန်းကို အပြီးသိမ်းနိုင်တယ်။စစ်ကောင်စီတပ် သေဆုံးမှုများတယ်။ တပ်ရင်းမှူး အဖမ်းခံရတယ်"ဟု စစ်ရေးသတင်းရင်းမြစ်က ပြောသည်။ အဆိုပါတပ်စခန်းတွင် စစ်ကောင်စီ၏ ခလရ(၃၈၇)တပ်က နေရာယူထားခြင်းဖြစ်သည်ဟုဆိုသည်။

အဆိုပါ တပ်စခန်းသည် မြစ်ကြီးနား- ဝိုင်းမော်လမ်း၌ ရှိပြီး နမ်ဆန်အနီးတွင်ရှိသည်ဟု ဆိုသည်။

KIA အနေဖြင့် အောက်တိုဘာ ၁၈ရက်မှစ၍ ကချင်နှင့် ရှမ်းမြောက်ရှိ စစ်ကောင်စီတပ်စခန်းများကို စခန်းသိမ်းတိုက်ခိုက်မှုများ လုပ်ဆောင်ခဲ့ရာ ယနေ့အထိ စစ်ကောင်စီတပ်၏ အရေးပါသည့် အထိုင်စခန်း ၄ခုအပါအဝင် တပ်စခန်း ၆ခုထက်မနည်းကိုသိမ်းပိုက်ထားနိုင်ပြီး ဖြစ်သည်။

စစ်ကောင်စီတပ် သေဆုံးထိခိုက်များပြီး လက်နက်ခဲယမ်းများစွာ သိမ်းဆည်းရရှိခဲ့သည်။

၁၀၂၇ စစ်ဆင်ရေးဆင်နွှဲနေသည့် မြောက်ပိုင်း ညီနောင်သုံးဖွဲ့ကလည်း ကန်တော်ယန်စခန်းတိုက်ပွဲအခြေအနေကို ယနေ့မနက်တွင် သတင်းထုတ်ပြန်ခဲ့ရာ မြစ်ကြီးနား- ဗန်းမော်ကားလမ်းမပေါ်ရှိ၊ ရန့်သူစခန်းတစ်ခုဖြစ်သော ကန်တောင်ယန် (ဂန်တောင်ယန်) စခန်းအနီးတွင် တိုက်ပွဲများပြင်းထန်လျက်ရှိကြောင်း၊ စစ်ကောင်စီတပ်က KIA ဌာနချုပ် လိုင်ဇာနယ်မြေကို လက်နက်ကြီးများဖြင့် ပစ်ခတ်နေကြောင်း အသိပေးထားသည်။

(စစ်ကောင်စီတပ်အား တိုက်ခိုက်နေသာ KIA/PDF ပူးပေါင်းတပ်မှ ရဲဘော်များအား တွေ့ရစဉ်။ ဓာတ်ပုံ - Myu Tsaw Kasa)

30/10/2023

ဖောင်းဆိုင် စစ်ကောင်စီတပ်စခန်း MNDAA သိမ်းပိုက်ရာ သံချပ်ကာယာဉ် နှစ်စီးထပ်မံရရှိ

အောက်တိုဘာ ၃၀

ရှမ်းပြည်နယ် မြောက်ပိုင်း မုံးကိုးဒေသ ဖောင်းဆိုင် စစ်ကောင်စီတပ်စခန်းကို ကိုးကန့်တပ်မတော် (MNDAA)က ယနေ့ တိုက်ခိုက်သိမ်းပိုက်ခဲ့ရာ စစ်ကောင်စီ၏သံချပ်ကာယာဉ် နှစ်စီးကိုထပ်မံ ရရှိခဲ့ ကြောင်း စစ်ရေးသတင်းရင်းမြစ်က ပြောသည်။

"Tank ကား ၂စီးရရှိ။ မုံးကိုး ဖောင်းဆိုင်မှာ။ ဒီနေ့ ၂စီးထပ်ရတာ။ ဖောင်းဆိုင် စစ်ကောင်စီ စခန်းကို MNDAA သိမ်းလိုက်ပြီ"ဟု စစ်ရေးသတင်းရင်းမြစ်က ပြောသည်။

ယခု သံချပ်ကာယာဉ် ၂စီး ထပ်မံရရှိခဲ့၍ '၁၀၂၇ စစ်ဆင်ရေး'ကာလအတွင်း စစ်ကောင်စီထံမှ တင့်ကားနှင့် သံချပ်ကာယာဉ် ၄ စီးကို မဟာမိတ်တပ်များကသိမ်းပိုက်ထားနိုင်ပြီးဖြစ်သည်။

ထို့ပြင် စစ်ကောင်စီ၏ လက်နက်ကြီးများ၊ စက်သေနတ်ကြီး၊ငယ်နှင့်လက်နက်ငယ်အများအပြားကိုလည်း မဟာမိတ်တပ်များက သိမ်းဆည်းရရှိထားသည်။

ညီနောင်မဟာမိတ် သုံးဖွဲ့ကလည်း ဖောင်းဆိုင်မြို့ကို ယနေ့ ည ၆နာရီတွင် အောင်မြင်စွာသိမ်းပိုက်ရရှိလိုက်ပြီဖြစ်ကြောင်း အသိပေးထားသည်။

29/10/2023

၂၄နာရီအတွင်း စစ်ကောင်စီစခန်း ၄၀ကျော် နှင့်သံချပ်ကာကားကို AAနှင့်မဟာမိတ်များ သိမ်းပိုက်ရယူနိုင်ဟု ထုတ်ပြန်

▪️စစ်ဆင်ရေး ဒုတိယနေ့တွင်လည်း သံချပ်ကာယာဉ်များထားရာ တပ်စခန်းအပါအဝင် စစ်ကောင်စီတပ်စခန်းများ ထပ်မံသိမ်းပိုက်

ပြည်သူ့ခေတ်
အောက်တိုဘာ ၃၀

ကိုးကန့်တပ်မတော်(MNDAA)၊ တအာင်းတပ်မတော်(TNLA)၊ ရက္ခိုင်တပ်မတော်(AA) ညီနောင်သုံးဖွဲ့၏ '၁၀၂၇ စစ်ဆင်ရေး'စတင်ပြီး ၂၄နာရီ အတွင်း ရန်သူစစ်ကောင်စီ၏ စခန်းကြီး၊ စခန်းငယ် ၄၀ကျော်ကို သိမ်းပိုက်ရယူနိုင်ခဲ့သည်ဟု ညီနောင်သုံးဖွဲ့က အသိပေးထုတ်ပြန်သည်။

စစ်ဆင်ရေး ဒုတိယနေ့တိုက်ပွဲ သတင်းများကို အောက်တိုဘာ ၂၈ရက်၊ ည ၁၀နာရီခွဲအချိန်တွင် ထုတ်ပြန်ခဲ့ခြင်းဖြစ်သည်။

Operation 2017 (၁၀၂၇ စစ်ဆင်ရေး) ပထမနေ့တွင် မိမိတို့ ညီနောင်မဟာမိတ် (၃) ဖွဲ့အပါအဝင် နွေဦးတော်လှန်ရေးမှ ပေါက်ဖွားလာသော မိတ်ဖက်တော်လှန်ရေးအဖွဲ့များနှင့်အတူ ၁၀၂၇-စစ်ဆင်ရေးကို တစ်ပြိုင်နက်တည်း ဟန်ချက်ညီ တိုက်ပွဲဝင်နိုင်ခဲ့ကြသောကြောင် ရန့်သူ့စခန်းကြီး၊ စခန်းငယ် ၄၀ကျော်ကို တစ်ရက်တည်း ၂၄ နာရီအတွင်း သိမ်းပိုက်ရယူနိုင်ခဲ့ကြောင်း ဖော်ပြခဲ့သည်။

ရန်သူ့စခန်း ၄၀ကျော်ကို တိုက်ခိုက်သိမ်းပိုက်ရယူရာတွင် သတ္တိရှိရှိ၊ ရဲရဲဝံ့ဝံ့၊ စွန့်စွန့်စားစား တိုက်ပွဲဝင်ခဲ့ကြသော မိမိတို့ ရဲဘော်များအားလုံးနှင့် အခြားသောအဖွဲ့အစည်းအသီးသီးမှ ရဲဘော်တစ်ယောက်ချင်းစီကို လေးနက်စွာ တန်ဖိုးထားဂုဏ်ပြုကြောင်း ထုတ်ပြန်သည်။

ကိုယ်လက်အင်္ဂါ၊ အသက်၊ သွေး၊ ချွေး၊ ဘဝတို့ပေးဆပ်စွန့်လွှတ်ခဲ့ကြသော ရဲဘော်တစ်ယောက်ချင်းစီ၏ ပေးဆပ်စွန့်လွှတ်အနစ်နာခံမှုတို့ကိုလည်း မှတ်တမ်းတင်ဂုဏ်ပြုကြောင်း ဖော်ပြသည်။

စစ်ဆင်ရေးအတွင်း ကျရာနေရာနှင့် တာဝန်ပေးထားသောနေရာများမှ စစ်ဆင်ရေး တာဝန်များကို ကျေပွန်စွာဝင်ရောက်ထမ်းဆောင်ပေးခဲ့ကြသော သူများအားလုံးကိုလည်း အထူးလေးနက်စွာ ကျေးဇူးတင် ဂုဏ်ယူကြောင်း ထုတ်ပြန်ခဲ့သည်။

အောက်တိုဘာ ၂၈ရက်တွင်လည်း သတ်မှတ် ထားသော ရန်သူ့စခန်းများနှင့် ရန်သူ့ပစ်မှတ်များကို ဆက်လက် သိမ်းပိုက် ရယူနိုင်ရေးအတွက် စစ်ဆင်ရေးကို အတူတကွ ဆက်လက်ဆင်နွှဲခဲ့ကြရာ နောင်ချိုမြို့နယ် သံဘိုရွာ နတ်စင်ကုန်းစခန်း၊ မုံးကိုးဒေသ ဖောင်းဆိုင်ကျေးရွာအုပ်စု မန်ပင်စစ်ကောင်စီစခန်း၊ ကိုးကန့်၊ အထူးဒေသ (၁)၊ ရန်တော်ရှမ်းအိုင်လတွင်ရှိသော စစ်ကောင်စီတပ်စခန်း၊ ကိုးကန့်-အထူးဒေသ (၁) ၊တောင်ပိုင်းတိုက်နယ်အတွင်း (ချင်းရွှေဟော်အတွင်းရှိ) မာကျားတိပေါက်ပေါက် တောင်ကုန်းတွင် အခြေစိုက်ထားသော စစ်ကောင်စီ၏ စစ်ရေးအရ အရေးပါသော တပ်စခန်းတို့ကို သိမ်းပိုက်နိုင်ခဲ့ကြောင်း အသိပေးသည်။

မာကျားတိပေါက်ပေါက် တောင်ကုန်းရှိ စခန်းသည် ချင်းရွှေဟော်အတွင်းရှိ ရန်သူ့စခန်းများစွာအနက်မှ နောက်ဆုံးသိမ်းပိုက်ရယူနိုင်ခဲ့သော သံချပ်ကာကားများရှိရာ စခန်းဖြစ်သည်ဟု အသိပေးထားသည်။

စစ်ကောင်စီ လက်အောက်ခံ တပ်မ (၉၉) ၊ ခမရ (၄၁၉)နှင့် အလယ်ပိုင်းတိုင်းစစ်ဌာနချုပ် လက်အောက်ခံ ခလရ (၈၈)တို့ တပ်စွဲထားသော နောင်ချိုမြို့နယ်၊ သံဘိုကျေးရွာနတ်စင်ကုန်းစခန်းကို တိုက်ခိုက်ရာတွင် TNLAနှင့်အတူ မန္တလေး ပြည်သူ့ကာကွယ်ရေးတပ်(MDY PDF) လည်း ပူးပေါင်းပါဝင်တိုက်ခိုက်ခဲ့သည်။

ယမန်နေ့နေ့လယ်က မူဆယ်မြို့နယ်၊ ကောင်းဝိန်ကျေးရွာအနီးရှိ မန်နိမ်မှ မန်ခမ်းတံတားအနီးတွင် စစ်ကောင်စီ၏ ဒကစ၊ ခမရ (၂၆၁)နှင့် မိမိတို့ ရင်ဆိုင်တိုက်ပွဲဖြစ်ပွားခဲ့ရာ ရန်သူတပ်ဖွဲ့ဝင် အများအပြားကို သုတ်သင်ရှင်းလင်းနိုင်ခဲ့ကြောင်း ညီနောင်သုံးဖွဲ့က ထုတ်ပြန်သည်။

စစ်ကောင်စီအနေဖြင့်လည်း လေကြောင်းတိုက်ခိုက်မှုများပြုလုပ်ခဲ့ရာ တိုက်ပွဲဖြစ်ပွားမှုမရှိသည့် နေရာများကိုလည်း လေကြောင်းက ဗုံးကြဲလာကြောင်း အသိပေးထားသည်။

ယမန်နေ့ နေ့လယ်တွင် နမ္မတူမြို့နယ် မန်ပန်ကျေးရွာ ပတ်ဝန်းကျင်အနီးသို့ တိုက်လေယာဉ်ဖြင့် သုံးကြိမ် ဗုံးကြဲတိုက်ခိုက်ခဲ့ကြောင်း၊ ထို့ပြင် နမ္မတူမြို့နယ် ရွာသစ်ပါင်ဆာကျေးရွာ အတွင်းသို့လည်း တိုက်ပွဲမရှိဘဲ သုံးကြိမ် ဗုံးကြဲတိုက်ခိုက်ခဲ့ရာ အမျိုးသား နှစ်ဦး၊ အမျိုးသမီး တစ်ဦး ဗုံးစထိမှန်ဒဏ်ရာရခဲ့ပြီး နေအိမ် ငါးလုံး ထိမှန် ပျက်စီးခဲ့သည်ဟု ထုတ်ပြန်သည်။

စစ်ကောင်စီသည် ၎င်းတို့၏ စခန်းများတစ်ခုပြီး တစ်ခု ကျဆုံးလျက်ရှိသောကြောင့် ၎င်းတို့၏ အကျင့်ဝသီဗီဇအတိုင်း ပြည်သူများကို ပစ်မှတ်ထားတိုက်ခိုက်ပြီး စစ်ရာဇဝတ်မှုများကို မိုက်ရူးရဲစွာ ကျူးလွန်လျက်ရှိသည်ဟု ထုတ်ပြန်ခဲ့သည်။

(ချင်းရွှေဟော်အတွင်းရှိ စစ်ကောင်စီ​၏ အရေးပါသော မာကျားတိပေါက်ပေါက် တောင်ကုန်းစခန်းအား သိမ်းပိုက်ပြီးနောက် တွေ့ရစဉ်။ ဓာတ်ပုံ - The Kokang)

23/10/2023

ဗိုလ်ကြီး ၃ ဦးအပါအဝင် စစ်သား ၄၅ ဦးသေဆုံးခဲ့သည့် ရေး တံတားကြီးဂိတ်အနီးတဝှိုက်ကို စစ်ကောင်စီက စစ်ကြောင်းထိုးနေ

အောက်တိုဘာ ၂၃

မွန်ပြည်နယ်၊ရေးမြို့နယ်ရှိ ရေးတံတားကြီးဂိတ်စခန်းနှင့် ဆက်စပ်တိုက်ပွဲတွင် ဗိုလ်ကြီး၃ဦးအပါအဝင် စစ်သား၄၅ဦးသေဆုံးပြီးနောက် စစ်ကောင်စီတပ်က စစ်ကြောင်းထိုးနေကြောင်းသိရသည်။

အောက်တိုဘာလ ၂၂ ရက်နေ့ နံနက် ၇ နာရီဝန်းကျင်မှစတင်ကာ ရေးမြို့နယ်၊ ရွှေကျောက်တောင်ဘုရားမုခ်ဝအနီးရှိ ကားလမ်းတစ်လျှောက်ကို စစ်ကောင်စီတပ်က ခြေလျင်စစ်ကြောင်းထိုးကာ နယ်မြေရှင်းလင်းရေး လုပ်ဆောင်နေကြောင်း မြေပြင်သတင်းရင်းမြစ်များထံက သိရသည်။

အောက်တိုဘာလ ၂၀ရက်၊နံနက် ၆နာရီ၊ မိနစ် ၅၀ခန့်က ရေးမြို့နယ်အခြေစိုက် ခလ၇ - ၆၁နှင့် အမတ - ၃၁၆ တပ်ရင်းနှစ်ခုကြားရှိ ရေးတံတားကြီး စစ်ဆေးရေး ဂိတ်စခန်းကို ဒေသတွင်း မဟာမိတ် ပူးပေါင်းတပ်က တိုက်ခိုက်ခဲ့ခြင်းဖြစ်ကြောင်း မွန်ပြည်တော်လှန်ရေးတပ် (MSRF) မှထုတ်ပြန်ထားသည်။

ယင်း တိုက်ပွဲအတွင်း အမတ-၃၁၆ တပ်ရင်း နှင့် ခလရ-၆၁ တပ်ရင်းများက ၆၀( မမ)၊ ၈၁ (မမ) လက်နက်ကြီး နှင့် စက်လတ်(၃) လက်တို့ဖြင့် ပစ်ခတ်ခဲ့ခြင်းကြောင့် ပြန်ဆုတ်ခဲ့ရပြီး ၄၅ မိနစ်ခန့် တိုက်ပွဲဖြစ်ပွားခဲ့ကာ စစ်ကောင်စီစခန်းကုန်းအား သိမ်းပိုက်နိုင်ခြင်းမရှိကြောင်းသိရသည်။

ရေးမြို့နယ်၊ကျုံလောင်းရွာနှင့် ဝဲပေါင်ရွာကြား ရွှေကျောက်တောင်ဘုရားမုခ်ဝအနီး ကားလမ်းနားသို့ရောက်ရှိချိန်တွင် ပြန်လည်ဆုတ်ခွာလာသည့် ပူးပေါင်းတပ်များကို စစ်တပ်က ကင်းပုန်းချ တိုက်ခိုက်သဖြင့် တိုက်ပွဲထပ်မံဖြစ်ပွားခဲ့ပြီး လက်နက်ခဲယမ်းအချို့ သိမ်းဆည်းရမိခဲ့ကြောင်း သိရသည်။

ယင်းတိုက်ပွဲများအတွင်း ပူးပေါင်းတပ်ဖွဲ့မှ ရဲဘော် ၁၄ ဦးထိခိုက်ဒဏ်ရာရရှိပြီး ၃ ဦးအသက်အန္တရာယ်စိုးရိမ်ရကြောင်းသိရသည်

အဆိုပါတိုက်ပွဲကို ဒေါနစစ်ကြောင်း ၊ မွန်ပြည်တော်လှန်ရေးတပ် (MSRF) ၊ ABSDF တပ်ရင်း(၁)နှင့် YGF-ရေးပြောက်ကျားတပ်တို့ပူးပေါင်းတိုက်ခိုက်ခဲ့ခြင်းဖြစ်သည်။

21/10/2023

ရိက္ခာရှာထွက်လာတဲ့ အကြမ်းဖက်စစ်ကောင်စီရဲ ၂ ဦးကို စောင့်ကြိုတိုက်ခိုက်ခဲ့ရာ ၂ ဦးစလုံး ဇီဝိန်ချုပ်

ပြည်သူ့ခေတ်
အောက်တိုဘာ ၂၁

ချောင်းဦးမြို့နယ်၊ ကံဇီးပျူရွာမှ ရိက္ခာရှာထွက်လာတဲ့ အကြမ်းဖက်စစ်ကောင်စီရဲ ၂ ဦးကို မုံရွာခရိုင်တော်လှန်ရေးပူးပေါင်းတပ်ဖွဲ့တွေက အောက်တိုဘာ ၁၉ ရက်၊ မနက် ၇ နာရီမှာ တိုက်ခိုက်ခဲ့ရာ စကစရဲ ၁ ဦးမှာ နေရာတွင်ပဲ ဇီဝိန်ချုပ်ခဲ့ပြီး ကျန်တဦးမှာတော့ အရှင်ဖမ်းမိခဲ့ပေမဲ့ ပြင်းထန်ဒဏ်ရာနဲ့ ဇီဝိန်ချုပ်ခဲ့တယ်လို့ သိရပါတယ်။

အကြမ်းဖက်စစ်ကောင်စီရဲ့ ရဲတပ်ရင်း(၂၆)မှ ရဲတပ်သား -ထွန်းကျော်စွာ(ခ)ထွန်းထွန်းနှင့် ရဲတပ်သား အောင်ဆန်းမြင့် တို့ကြပြီး သူတို့ထံမှ G3 (၂)လက်၊ ကျည်အိမ်(၅)ခု၊ 7.62ကျည် (၁၅၀‌)၊ ကျည်ကာအင်္ကျီ (၁)ထည်၊ လက်ကိုင်ဖုန်း (၁)လုံး၊ ဆိုင်ကယ် (၁)စီး၊ ဘေးလွယ်အိတ်(၁)လုံး၊ ဓားရှည် (၁)လက်နဲ့ ဆက်စပ်ပစ္စည်းများကို သိမ်းဆည်းရရှိခဲ့တယ်လို့ ဆိုပါတယ်။

မုံရွာခရိုင်တပ်ရင်း(၅) Aung San Force A.S.F ၊ မုံရွာခရိုင်တပ်ရင်း(၇)၊ မုံရွာခရိုင်တပ်ရင်း(၂၅)သံမဏိ Force MPDF ၊ မုံရွာခရိုင်တပ်ရင်း(၂၈) တို့နဲ့အတူ We Must Win မီးတောက်တပ်ခွဲ(၄)တို့မှ ပူးပေါင်းတိုက်ခိုက်ခဲ့တာဖြစ်တယ်လို့ သတင်းထုတ်ပြန်ထားတာ တွေ့ရပါတယ်။

21/10/2023

ရေးမြို့နယ်တိုက်ပွဲ စစ်ကောင်စီ ၄၀ ခန့်သေပြီး နှစ်ဖက်ဒဏ်ရာရရှိသူတွေလည်း များကာ တိုက်ပွဲပြင်းထန်

အောက်တိုဘာ ၂၁

မွန်ပြည်နယ်၊ ရေးမြို့နယ်မှာ စစ်ကောင်စီနဲ့ တော်လှန်ရေးပူပေါင်းတပ်တို့ မနေ့ အောက်တိုဘာ ၂၀ ရက်နေ့မှာ တိုက်ပွဲပြင်းထန်ခဲ့ပြီး စစ်ကောင်စီဘက်က ၄၀ ခန့်သေဆုံးခဲ့သလို နှစ်ဖက်ဒဏ်ရာရရှိသူတွေလည်း များခဲ့တယ်လို့ ဒေါနစစ်ကြောင်းက ဒီနေ့ထုတ်ပြန်ပါတယ်။

ရေးမြို့နယ်၊ တံတားဂိတ်မှာ စစ်ကြောင်းထိုးဖို့ ပြင်နေတဲ့ စစ်ကောင်စီအင်အား ၁၀၀ ခန့်ကို ရေးမြို့နယ်အခြေစိုက် တော်လှန်ရေးအဖွဲ့တွေက သွားရောက်တိုက်ခိုက်ရာမှ နှစ်ဖက်တိုက်ပွဲပြင်းထန်ခဲ့တာပါ။

တော်လှန်ရေးပူးပေါင်းအဖွဲ့တွေဘက်က စနိုက်ပါ၊ လက်နက်ကြီးတွေနဲ့ ချေမှုန်းရေးတပ်ဖွဲ့တွေက စတင်တိုက်ခိုက်ချိန်မှာ စစ်ကောင်စီတပ်တွေဘက်ကလည်း ၆၀ မမ၊ ၄၀ မမ၊ ၈၁ မမ လက်နက်ကြီးတွေအပြင် စက်သေနတ်တွေနဲ့ပါ အပြန်အလှန်ပစ်တာကြောင့် တိုက်ပွဲပြင်းထန်ခဲ့တာလို့ ဒေါနစစ်ကြောင်းက ဆိုပါတယ်။

ပူးပေါင်းတပ်တွေဟာ ဒဏ်ရာရရှိသူတွေနဲ့ ပြန်လည်ဆုတ်ခွာပြီး ဒဏ်ရာရရှိသူတွေကို ဆေးရုံပို့စဉ် ကျုံလောင်းရွာနဲ့ ဝဲပေါင်ရွာကြား မှာ လူနာတင်ကားနဲ့ဆိုင်ကယ်တစ်စီးကို စစ်ကောင်စီဘက်က လက်ဦးမှုယူ တိုက်ခိုက်ခဲ့တာကြောင့် တော်လှန်ရေးအဖွဲ့တွေဘက်က ၁၁ ဦး ဒဏ်ရာရရှိခဲ့ပြီး ၂ ဦးစိုးရိမ်ရတယ်လို့ ဆိုပါတယ်။

အဲ့ဒီတိုက်ပွဲမှာလည်း စစ်ကောင်စီဘက်က ၂၀ ကျော်သေပြီး ထွက်ပြေးသူတွေရှိတယ်လို့ မြေပြင်သတင်းတွေကို အခြေခံပြီး ဒေါနစစ်ကြောင်းက ထုတ်ပြန်ချက်က ဆိုပါတယ်။

စစ်ကောင်စီရဲ့ ကင်းပုန်းနေရာကို တော်လှန်ရေးပူးပေါင်းအဖွဲ့တွေက RPG တွေနဲ့ပစ်ခတ်ပြီး ဝင်ရောက်စီးနင်းခဲ့တာကြောင့်လည်း စစ်ကောင်စီဘက်အသေများခဲ့ပြီး စစ်ကား ၃ စီးနဲ့ အလောင်းတွေလာသယ်တာတွေ့တယ်လို့ ဆိုပါတယ်။

ဒီတိုက်ပွဲကို ဒေါနစစ်ကြောင်းနဲ့အတူ ရေးမြို့နယ်အခြေစိုက် မဟာမိတ်အင်အားစုများဖြစ်တဲ့ ရေးပြောက်ကျားတပ်ဖွဲ့ (YGF) ၊ မွန်ပြည်တော်လှန်ရေးတပ် (MSRF) ၊ ABSDF တပ်ရင်း(၁)တို့ ပူးပေါင်းတိုက်ခိုက်ခဲ့တာလို့ သိရပါတယ်။

အဲ့ဒီပူးပေါင်းတော်လှန်ရေးအဖွဲ့တွေဟာ အောက်တိုဘာ ၁၃ ရက်နေ့ကလည်း ရေးမြို့နယ်အခြေစိုက် အမှတ် (၁၉)၊ စစ်ဆင်ရေးကွပ်ကဲမှုဌာနချုပ် (ဒကစ-၁၉) မှာ အင်အား ၁၀၀ လောက်စုဝေးနေတဲ့ သတင်းရတာကြောင့် သွားရောက်တိုက်ခိုက်ခဲ့ပါသေးတယ်။

ဒေါနစစ်ကြောင်းဟာ ကရင်အမျိုးသားလွတ်မြောက်ရေးတပ်မတော် (KNLA) နဲ့လည်း ပူးပေါင်းပြီး မြဝတီ-ကော့ကရိတ် အာရှလမ်းမပေါ်မှာက စစ်ကောင်စီတပ်တွေကိုလည်း မကြာခဏတိုက်ခိုက်လေ့ရှိပါတယ်။

20/10/2023

လိုင်ဇာမြို့အနီးရှိ အောင်ဂျာ စစ်တပ်စခန်းသိမ်းတိုက်ပွဲတွင် စစ်သုံ့ပန်းတချို့ ဖမ်းဆီးရရှိပြီး လက်နက်များ သိမ်းဆည်းရရှိ၊ စစ်တပ်ဘက်မှ သေဆုံးမှုများပြား

ပြည်သူ့ခေတ်
အောက်တိုဘာ ၂၀

ကချင်ပြည်နယ်၊ မိုးမောက်မြို့နယ်၊ KIA ဌာနချုပ် လိုင်ဇာမြို့အနီးရှိ အောင်ဂျာ စစ်တပ်စခန်းကို KIA တပ်များက ယနေ့ တိုက်ခိုက်သိမ်းပိုက်လိုက်ပြီး စစ်သုံ့ပန်းတချို့ကိုလည်း ဖမ်းဆီးရရှိကြောင်း KIA ရှေ့တန်းသတင်းရင်းမြစ်များက အတည်ပြုပြောဆိုသည်။

ယနေ့ နံနက်ပိုင်းမှစတင်ပြီး တိုက်ပွဲများ အပြင်းအထန် ဖြစ်ပွားခဲ့ပြီး လိုင်ဇာမြို့ဘက်ပင် လက်နက်ကြီးကျည်သံများ ကြားရကြောင်း၊ ယင်းနောက် မွန်းလွဲပိုင်းတွင် အောင်ဂျာစစ်တပ်စခန်းကို KIA တပ်ဖွဲ့များက အပြီးသတ် တိုက်ခိုက် သိမ်းပိုက်နိုင်ခြင်းဖြစ်ကြောင်း သိရှိရသည်။

"ဒီနေ့ မနက်ပိုင်းတစ်ပိုင်းလုံး တိုက်ပွဲက အပြင်းအထန်ဖြစ်တာ။ လိုင်ဇာမြို့ဘက်ကတောင် လက်နက်ကြီးသံတွေကြားရတာ။ စစ်တပ်ဘက်က လေယာဉ်တွေနဲ့ ဗုံးကျဲတယ်။ လိုင်လွမ်အောင်ဂျာမှာ စစ်စခန်း ၃ ခု ရှိတဲ့အနက် ဒီနေ့ သိမ်းတာက နောက်ဆုံးစခန်းပဲ။ အရင်စခန်း ၂ ခုက အရင်လတွေထဲက သိမ်းထားတာ။ အခု ၃ ခုစလုံး KIA သိမ်းလိုက်ပြီ" ဟု KIA သတင်းရင်းမြစ်က ဆိုသည်။

အခြား KIA သတင်းရင်းမြစ်တစ်ခု၏ အဆိုအရ ယနေ့ သိမ်းပိုက်သော အောင်ဂျာစစ်တပ်စခန်းတွင် အင်အား ၇၀ ခန့်ရှိပြီး အခိုင်အမာ ကုတုတ်ကျင်းများ တူး ၍ ခုခံကြောင်း၊ နောက်ဆုံးတွင် စစ်ကောင်စီတပ်သားများ စခန်းကို စွန့်ခွာ ထွက်ပြေးကြကြောင်း၊ KIA တပ်များက စွန့်ခွာ ထွက်ပြေးသူများကို လိုက်လံ တိုက်ခိုက် ကြောင်း သိရှိရသည်။

အောင်ဂျာစစ်တပ်စခန်း သိမ်းပိုက်ရရှိမှုတွင် စစ်တပ်ဘက်မှ သေဆုံးသည့်အရေ အတွက်ကို မသိရှိရသေးဘဲ လက်နက်ခဲယမ်းများလည်း သိမ်းဆည်းရရှိကြောင်း ၊ သိမ်းဆည်းရရှိသည့် လက်နက်ခဲယမ်း အရေအတွက်လည်း မသိရှိရသေးကြောင်း သိရှိရသည်။

20/10/2023

ကမ္မမြို့တွင် စျေးလာဝယ်သော ရဲတစ်ဦး သေနက်နှင့်အတူ ဖမ်းဆီးရမိ

ပြည်သူ့ခေတ်

မကွေးတိုင်း၊ ပခုက္ကူမြို့နယ်၊ ကမ္မမြို့တွင် စျေးလာဝယ်သော ရဲတစ်ဦးအား G3 သေနက်တစ်လက်နှင့်အတူ ဖမ်းဆီးရမိခဲ့ကြောင်း ပခုက္ကူမြို့နယ်ပြည်သူ့ကာကွယ်ရေးတပ်ဖွဲ့(ပကဖ)က သတင်းထုတ်ပြန်သည်။

ပြိီးခဲ့သည့် စက်တင်ဘာ ၂၆ ရက် နေ့လယ် ၁ နာရီခန့်က ပခုက္ကူမြို့နယ် ကျထိုးရဲစခန်းမှ ကမ္မမြို့သို့စျေးဝယ်လာသော ရဲတစ်ဦးအား လမ်းခုလပ်တစ်နေရာ၌ G3 သေနတ်တစ်လက်နှင့်အတူ အရှင်ဖမ်းဆီးရမိခဲ့ကြောင်း ပခုက္ကူ(ပကဖ)က ယနေ့ (အောက်တိုဘာ ၂၀ ရက်)တွင် အသိပေးသည်။

ပခုက္ကူ(ပကဖ)၏ တပ်သားများက ဖမ်းဆီးခံရဲအား စစ်ဝတ်စည်းကမ်းများနှင့်အညီထားရှိပြီး လိုအပ်သည့်အရေးယူဆောင်ရွက်မှုများဆက်လက်ပြုလုပ်သွားမည်ဟု ထုတ်ပြန်ချက်တွင် ဖော်ပြသည်။

ထိုဖြစ်စဥ်နှင့်ပတ်သက်၍ ပခုက္ကူ(ပကဖ)အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။

ထို့ကြောင့် ရဲနှင့် စစ်သားများအနေဖြင့် နီးစပ်ရာမှတဆင့် ပြည်သူ့ရင်ခွင်ခိုလှုံ၍အမြန်ဆုံးအလင်းဝင်ရောက်ကြရန် ပခုက္ကူ(ပကဖ)က သတိပေးထားသည်။

ယမန်နေ့ (အောက်တိုဘာ ၁၉ ရက်) နံနက်ပိုင်းကလည်း စစ်ကိုင်းတိုင်း၊ ချောင်းဦးမြို့နယ်၊ကံဇီးပျူစောထီးကျေးရွာမှ ထွက်လာသော ရဲနှစ်ဦး ပစ်ခတ်ခံရပြီး သေဆုံးခဲ့သေးသည်။

(ဖမ်းဆီးခံရသော ရဲအား ၎င်းနှင့်အတူပါလာသည့် လက်နက်ခဲယမ်းများနှင့်အတူ တွေ့ရစဥ်။ ဓာတ်ပုံ-ပခုက္ကူပကဖ)