K*m 1994 Feb kha TBA kumcin khawmpi Suangpi khua panin TBA makaiin Tedim kampau Tuiphum teng zolin Convention khat din ding meeting khensatna tawh kizui-in TBA Siapi te hongzin kawikawiin hong gen ciangun, TBA pen imuan isuanpen hi, Pa bang a kong neih uh ahih man un, no hoihsak ahih leh ko hong zui ding hi ung kici ciat hi.
2. K*m 1994 April sungin ZCLS meeting Kawlpi tuiphum pawlpi ah kinei
in nasia takin ZBC tawh kikhen ding vai kikum hi. Tu ni d**g bilkha ah agingging lai thangah huai mahmah khat in Rev. Kam K Thang in, “Naute aw, kei bel teek ta ing in, ngap nawn keng, no na ngap nak uh leh kipan ni, kipat hun ta hi,” hong cih teh tha kingah mahmah in, kikhen ding kisawm hi. Tua ZCLS meeting khit teh ZBC-EC Falam kipaisuak aa, tua lai ah zong nakpi talin kikupna om hi.
3. K*m 1995 April kha sungin Zozang ah ZCLS meeting om kikin tua pan thukimna a om khit teh Khuasak ZBC triennial ah panmun kiteel nitakin TBA zinpi ah kikhawm in ZBCM min kiphuak hi. TBA (Tedim), TTBA (Tonzang), KZBA(Kalay), TVBA (Tamu), ZBA(Zo) thukim a, SRBA in ko innteek ka hih uh teh hong hici om phot nung ci hi. Kuki Chin (KCBA) pen delegate hong kah zo lo ahih manin khentatna om thei lo hi. KVBA in ko pen minam kigawm khawm ka hih man un tu tadihin abuppiin hong pai thei nai lo hi ung ci hi.
4. TBA zong Tedim atunkik ciangun athu uh kituak nawn loin (atomin) ZBCM tawh ahi zongin ZBC tawh ahi zongin tawlkhat sung kipawlpih nei lo hi. Tawlkhat khit teh ZBC zomkik uh aa, MBC tungtawnin Convention ngah uh a, 2007 kumin TBA hi nawn lo in TBC ki cita hi.
5. Nidang a TBA sung panin Mualbem kuamlam leh Khuano kuallam pawlkhat ZBC tawh kizomsuak hi. TBA sung pan mahin Pawlpi tamkhop mah ZBCM ah om uh hi. A om laiteng Association 3 kikhen uh aa, tu lai takin Pawlpi 80 kim leh Association 3 pha-in Tedim Myone sungteng leh Yangon ah TBCY ahi uhi.
6. ZBCM pen iminambup a iphuah, thupha ipiak ahih mah bangin Pasian in thupha pia in, tu in, Kawlgam sung ah Pawlpi 130 val, Association 7 pha-in Kawlgam sung Zomite om na (atamzaw ah) leh Nyiphidaw nangawn ah Mission kinei hi. Gam pua ah zong Bangalore lehNew Delhi, India ahi zongin, UK, Malaysia leh Australia ah pawlpi sanna kinei a, USA ah zong Zomi Baptist Churches of America (ZBCA) om ta hi.
7. Khaktanna, langpanna leh zumkong mangkong nangawn ah makai masate thusitna bawlsiatna thuak uh a, alang alang ah mawhsakna mit tawh hong ki-en dimdiam laitakin USA ah ZCBA in NBF - N. American Baptist Federation ah Full member angah ciangin BWA in Full member dingin 2017 July kha sungin Bangkok, Thailand ah sanna nei a, ZBCA in ZBCM Zumpi, Kalaymyo ah BWA Full member ngahna Innpi hong tun uh ahih manin athupi thei pen dingin kibawl hi. Tua mun ah BWA GS angah thak Rev Dr Eleijah Mathhew Brown hong tonpih uh a, ZBCM dinmun atheih ciangin BWA luttheihna ding lampi hong sialsak hi. Hih pen ZBCA makaite vaihawmsiamna ahi hi. Tua hun panin hanciamin APBF leh BWA lutna dingin kivaihawm hi. Myanmar kumpi theihpihna ingahna dingin Chin state cabinet minister Pu Pau Lun Min Thang in hong hanciamin 2017 December 11 ni-in Biakna Mangpi Zum K*mpi theihpihna kingah a, APBF leh BWA ah zong kipulak hi. 2019 April kha sungin APBF in EC meeting hun hitakei leh hong san ciangin Online leh Email tawh APBF EC khempeuh kiang ah Lai leh kamdot tawh thukimpihna la-in hong sang uh a, alamdang Pasian nasepna ahi hi. APBF in hong sankhit ciangin BWA in 2019 July kha sungin Bahama khawmpi ah Full
member dingin hong sang uh a, ZBCM leh ZBCA makaite ahithei zahzah pai hi.
8. ZBCM pen 1995 kumin piang a, 2005 kumin Tin Jubilee kibawl hi. 2020 kumin Silver Jubilee acing ta hinapi, Covid natna hangin kibawl thei loin 2021 March kha sungin Online tawh kibawl hi.
