Welovebuzz

02/02/2025

🇲🇦🏆 توج فوزي لقجع بجائزة الاتحاد العربي للثقافة الرياضية فقطر وهادشي تقدير لمجهوداتو فتطوير الكرة المغربية، وتسلم الجائزة نيابة عليه عبد اللطيف المتوكل، وفنفس الحفل تكرم المغربي هشام الكروج بجائزة « سفير الثقافة الرياضية » على إنجازاتو فألعاب القوى.

02/02/2025

🇲🇦📚 كشف تقرير دارو المجلس الاقتصادي والاجتماعي والبيئي بلي الإدمان على المحتوى الرقمي أثر بزاف على القراية و42% من الشباب نقصو فالنتائج ديالهم ، و43% كيهملو الأكل والنعاس ديالهم ، و36% عندهم مشاكل مع عائلتهم وصحابهم بسبابو.

02/02/2025

👫💍 نفات المغنية اللبنانية نانسي عجرم خبر طلاقها بعدما نشرات تصاور رومانسية مع راجلها فادي الهاشم فعيد ميلاد بنتهم ليا، باش تجاوب على الإشاعات ديال الطلاق وكانت هاد الإشاعات كثرات بعدما كانت نشرات جملة أنها طلقات بطريقة غير مباشرة ولي أكدات من بعد الجملة مرتبطة بفيديو كليب أغنيتها الجديدة.

📸 : nancyajram

02/02/2025

🇲🇦🇬🇧 دعاء (14 عام) و هدى (15 عام)، تلميذات مغربيات كانو اختفاو فلندن من 28 يناير، وتلاقاو بخيرعند شي قريب ليهم، وكانو مشاو فإطار برنامج تبادل طلابي ولكن كانو ناويين يبقاو فبريطانيا بطريقة غير قانونية. السلطات البريطانية فتحات تحقيق و تواصلت مع السفارة المغربية، و دابا البنات عند السلطات وباقي التحقيق مستمر معهم باش يعرفو الأسباب لي خلاتهم ياخدو هاد القرار.

01/02/2025

🚨🌧️ حذرات مديرية الأرصاد الجوية من تساقطات ثلجية وأمطار قوية ورعدية غدا الأحد وبعد غاد الاثنين فعدة أقاليم، والثلوج غتوصل لـ20 سم فوق المرتفعات لي كتفوت 1400 متر غدا من 6 الصباح لـ11 ديال الليل فأقاليم إفران، صفرو، بولمان، تازة وكرسيف، ونهار الاثنين غتوصل حتى لـ40 سم من منتصف الليل لـ11 الليل.

01/02/2025

🏆🇲🇦 توجات لينا بزا وأمين جمجي بلقب بطولة إفريقيا لأقل من 18 سنة فالقاهرة، ربحات لينا فالفينال على الجنوب إفريقية جاني فان زل، وتوجات ثاني بلقب الزوجي مع صوفيا هداب ضد ثنائي مصري، وأمين جمجي من جهتو، ربح الجنوب إفريقي كونور دويغ فالفينال، وهاذي هي المرة الثالثة على التوالي كيجي فيها المغرب الأول فبطولة إفريقيا تحت 18 سنة.

📸: frmtennis

01/02/2025

🥇🇲🇦 المغرب فاز بالمرتبة الأولى فالدورة الثانية ديال البطولة العربية لألعاب الرياضيات والمنطق ولي كانت عن بعد ففئة الأشبال 14 سنة، وتنظمات المسابقة تحت إشراف الألكسو فمقرها بتونس، الفريق المغربي ربح ثلاثة ميداليات ذهبية ونحاسية وحدة، إسماعيل عبقري، يحيى الوافي، ويحيى أجبار ربحو الميدالية الذهبية، ولينا لامان ربحات النحاسية.

01/02/2025

🗣️🇲🇦 كشف فوزي لقجع فـ حوار مع مجلة Olé الأرجنتينية على التطور الكبير ديال المنتخب المغربي والطموح ديالو فالبطولات الجاية، وأكد أن الهدف ماشي غير المنافسة ولكن ربح الألقاب وقال بلي نقدرو نربحو اللقب فكأس العالم 2026 و ماكنتسناوش حتى لمونديال 2030 اللي غاينظمو المغرب مع إسبانيا والبرتغال.

01/02/2025

🏥🚨 مصادر طبية أكدت أن عدد حالات الإصابات ببوحمرون فطنجة قربو لـ 2000 وسط رفض كبير للتلقيح هادشي لي كيشكل خطر على انتشار أكبر للوباء، ومستشفى محمد الخامس فطنجة كيستقبل كل يوم بين 20 و30 حالة، مع تزايد فالإصابات فأعمار مختلفة. والمصدر طلب من السكان يديرو التلقيح باش يمنعو انتشار المرض.

31/01/2025

🎶🎤 خرجات المغنية دنيا بطمة من سجن الأوداية فمراكش اليوم فسرية تامة مع 6 ديال الصباح، بعد عام ديال الحبس بسبب قضية « حمزة مون بيبي »، وكانت تحكمات دنيا بسنة حبس وغرامة 10 آلاف درهم بسبب التهم ديال الاحتيال ونشر صور وأقوال الناس بلا موافقتهم.

31/01/2025

🇲🇦🏆 توج إلياس المالكي بلقب أفضل مؤثر مغربي عام 2025 فأسبوع Les Impérials، ولي كيحتفل بالمتميزين فمجالات التواصل، التسويق، الإعلام فالمغرب و شكر إلياس الناس لي ساندوه و دعموه فرسالة تعرضات فالحفل بعدما ماقدرش يحضر حيت عندو التزامات.

31/01/2025

🏌️‍♂️Le Maroc accueille à nouveau l'élite du golf mondial !
Double tournoi = Double spectacle 🏆
Qui sera le champion cette année ? 👇

Golf 2025 : Plongez dans l'ambiance unique du Trophée Hassan II et de la Coupe Lalla Meryem. Deux tournois prestigieux à Rabat - Welovebuzz

31/01/2025

🇲🇦📱كشف رئيس المجلس الاقتصادي والاجتماعي والبيئي أحمد رضا الشامي، بلي تقريبا 90% من المغاربة كيستعملو مواقع التواصل الاجتماعي كل نهار، وفبداية 2024 وصل عدد القاصرين لي كيدخلو لهاد المنصات لـ97%،و بالأرقام 31 مليون مغربي كيستعمل فايسبوك و28 مليون اليوتوب.

30/01/2025

🌙🇲🇦 علنات وزارة الأوقاف والشؤون الإسلامية اليوم أن فاتح شهر شعبان 1446هجرية غادي يكون غدا الجمعة بعدما تبث رؤية الهلال اليوم الخميس بعد المغرب.

30/01/2025

🎬🎯 علنات نتفليكس على تاريخ الموسم الثالث والأخير ديال سكويد غايم ولي غيكون نهار 27 يونيو هاد العام، وغيكونو فيه ألعاب جديدة، وهاد المرة الانتظار كان غير 6 شهور عكس الموسم الثاني لي كان تعطل 3 سنين.

30/01/2025

🇲🇦⚽️ رسميا نادي الدحيل القطري علن على التعاقد ديالو مع حكيم زياش بعدما فسخ العقد ديالو مع نادي غلطة سراي التركي، وهادشي جا فالميركاتو الشتوي الحالي، الدحيل رحب باللاعب المغربي حكيم زياش و نشر صور الاعلان على التعاقد بتصميم جذاب وسماوه « الساحر » ودارو فيديو كيوريو فيه أهم اللحظات فالمسيرة ديالو.

30/01/2025

🇸🇪👨‍⚖️ علنات محكمة ستوكهولم على وفاة سلوان موميكا العراقي لي كان حرق القرآن الكريم بزاف دالمرات فالسويد. وسائل إعلام سويدية قالت أنه مات بعدما تضرب بالقرطاس، السلطات كانت كتتحقق معاه بتهم ديال التحريض ضد جماعات عرقية فالسويد والمحكمة قالت بلي أجلات الحكم فالقضية ديالو بسبب وفاتو.

30/01/2025

🚁✈️ وفاة كثر من 18 شخص فحادثة اصطدام طيارة تابعة للخطوط الجوية الأمريكية مع هليكوبتر عسكرية، وطاحو فنهر بوتوماك، كانو فالطيارة 64 واحد، من بينهم رياضيين من أمريكا وروسيا، وفالهليكوبتر كانو ثلاثة ديال العسكر، لحد الآن الإعلام الأمريكي قال بلي جبدو 18 جثة على الأقل من الماء، والأسباب باقي مامعروفاش.