مدينة جنزور Janzour City

08/06/2023

من المفترض انه فرح في جنزور هكى المفروض يسفر عن سقوط صاروخ اس بي جي في السياح سبب اضرار مادية فقط وربي سلم ملا فوضي وملا غابة 😞😞😞😞فرح وصاروخ مافهمتش وين العلاقة بينهم ، لو لقدر مات حد كان تكون مجزرة في جنزور الليلة .

14/04/2023

السلام عليكم ربي يحفظكم جميعا
تلاوة للقارئ الصغير بمسجد شهداء عبد الجليل بالشركة التركية حفظه الله ورعاه.

17/02/2023

الثورة كرهونا فيها مع الاسف بضياع هيبه الدولة و بالفوضى والحروب والقتل والسرقة لما طلعنا في 17 فبراير 2011 نبوا التغيير كنا لقينا روحنا يسطربوا علينا بالمصفح

04/02/2023

نأمل من اللجنة الفرعية جنزور ان تقدم لنا كأهالي جنزور تفسيرا منطقيا لعدم وجود اسماء شباب جنزور من ضمن القوائم المنشورة لقروض الشباب !!!!!

31/01/2023

خوتنا القحوص الجدد لما تسوقوا السيارات المصفحة متع الدولة يلي شاريينها بفلوس الشعب معليش خلونا معاكم بندى في الطرق رانا زينا زيكم معليش رانا عايشين معاكم و نسوقوا معاكم ، اذا مافيهاش ازعاج طبعا في النهاية نسوقوا في رزقنا .

05/01/2023

لان الخيل قلت فتحلت حمير الحي بالسرج الانيق فإن رأيت حمارا بزي خيلا تكشف امره عند النهيق .

03/01/2023

تابعنا اليوم ماحدث من انهاء مهام او استقالة او اقالة او سميها ما شئت للمجلس البلدي جنزور لتحل محله لجنة هجينه دخليه لانعلم من نصبها ولا من اختارها ولا كيف تم اختيارها ولا على اي اساس ستعمل !!!!!
المهم انه من خلال الاطلاع على التشريعات المنظمة ذات الصلة فإن قانون الادارة المحلية رقم 59 لسنة 2012 بشأن نظام الادارة المحلية لم يشر لا من قريب ولا من بعيد لشيء يسمى لجنه تسييرية تحل محل مجلس منتخب حتى ولو اختلفنا مع عمل هذا المجلس المنتخب الا انه يظل منتخب وينظمه تشريع ويحكمه قانون ويضبطه لوائح ولكن اللجنة التسييرية كيف ستعمل وعلى اي اساس كونها لم ترد في القانون !!!!!!!! وعملها كيف سيكون وعلى ماذا سيحتكم !!!!!

02/01/2023

علاش في تونس تعرفوا ان الاولوية لمن دخل جزيرة الدوران اولا اي للقادم من اليسار علاش هنا في ليبيا ما تطبقوش فيها ولا لان هنا سائبه وغادي فيه الحاكم

30/12/2022

خلاص ياسر من الشحاحة والفقفة فهذه التصرفات اصبحت نتنه😔😔😔

24/12/2022

لما الفروخ يكونوا ادمنز في صفحات الاندية هكى تكون النتيجة ، اندماج واحد الاندية ، والله ما عندهم علاقة لا بالرياضة لا بالروح الرياضية .

06/12/2022

حكيمي والشباب الشوط الاول رفعوا الاسبان وراء مصنع الكراسي و الشوط الثاني ربطوهم في الثور متعهم وروحوا 😂😂😂

02/12/2022

لما تشوف العالم وشن صاير فيه تدرك ان حنا خارج المنظومة اصلا

16/11/2022

خودوها بروح رياضية جيرنا في بلدية السراج الناشئة 😄😄

12/11/2022

علاش زعلانين من ان السراج بلدية بروحها عادي والله احسن و اقل صداع يلي ينقص ينقص حتى النجيلة وخله الفاندي كان يديروا بلدية بروحهم احسن ، كل ما تنقص المساحة تقدر تخدم افضل خدمات لسكان البلدية المهم ميزانيتك تكون كافية ان تقدم الخدمة لسكانك والباقي حتى بيخلوها جنزور من كوبري الغيران شرقا الى كوبري ال17 غرب وجنوبا من اربع شوارع البواخرى لسيمافرو النجيلة عادي تحط حتى بلوكة تبان ولا شن رايكم ويلي زعلان لازم يفهم ان الموضوع ياقدم خدمة للناس ياخلي الناس تشوف روحها .

22/10/2022

!!!
من خلال تواصلنا مع العديد من الكفاءات من ابناء جنزور لخوض معترك الانتخابات البلدية وفيما بعد الانتخابات البرلمانية خدمة للمنطقة واهلها ولكن مع الاسف الشديد اغلبهم يرفض بحجة اننى لا ارغب في العمل ولا استطيع تقديم الاضافة !!!!!!! لماذا جنزور في الاوانة الاخيرة ابتعد عنها ابناءها من ذوى الكفاءات واصبحوا حتى يعملون ضمن دواين بلديات اخرى ويقدمون الاضافة وجنزور في حاجة ماسة لكفاءاتهم وخبراتهم ولكن اصبح العديد من ابناء جنزور يتعاملون مع جنزور نظام هوتيل (دوش و نوم ويشد الطريق ) لذلك لابد لكى ترى هذه المنطقة النور وتزدهر ان تعتمد على كفاءاتها !!!! لماذا هذا العزوف

20/10/2022

خوتنا في بلدية جنزور فيه بلديات يبنوا في مدارس وحتى هما في ليبيا عايشين وبدون ميزانيات ومفلسين لكن يعرفوا من اين يؤكل الكتف ويعرفوا من وين يطلعوا المواضيع .

16/10/2022

بداية العام الدراسي الجديد 🥰🥰🥰

12/10/2022

بالله اختاروا الناس الصح فكونا ملينا

08/10/2022

بالله من توا بالضي تبييض وجه على حساب المنطقة وانبطاح لا السفارات يلي في تاجوراء مانبوهمش في جنزور ويلي يبيهم يجيبهم لحوشه هو حر اموره لكن جنزور مش ملك حد ملك ناسها فقط👌🏼👌🏼

07/10/2022

23/09/2022

حد يفهمها هذه ان الدبلوماسية و اظهار حسن النوايا والبرتوكولات والاتكيت الدبلوماسي مش بالاوفر هذا و مش بالطريقة هذه ابتسامة 24 ساعة رام تمثلي دولة مش موظفة عندهم في نهاية قطري يلي قدامك حشمتنا 😞😞😞😞😞

21/09/2022

من الاخير كرهتونا فيها ليبيا من كميه الوساخة اكرمكم الله يلي نشوفوا فيها كل يوم من القرف يلي عايشين فيه الله المستعان بلاد تقول هكى بالقصد يبوا ينتقموا منها كمشة سرايق لادين لامله 😷😷😷😷مال عام مستباح دولة مهتوكة نهب لمقدرات الدولة تدمير مصادر دخل الدولة بشرعة قوانين تغطى الفساد وتشرعنه 😷😷😷😷.

16/09/2022

فى اولى جولات دوري السلة اياب تحت 18
#اليرموك يتفوق على #الاتحاد بنتيجة 69-26

15/09/2022

إنخفاض الاسعار لم يؤثر
حتى في حلوة الصوف في #جنزور اسعار سياحية
شيء شيء مش عليهم الدوة بكل 😒😒😒

11/09/2022

لما تشوف صور و حفلات و بدالي عربية و انستقرام لواحد نجح اعدادي و لا ثانوي
تحس روحك عشت حياتك مجرد نبته
تكبر و تجتاز في مراحل في حياتك انت بروحك ما عطيتهاش اهمية ، انا لما تخرجت من الكلية وبعدها في الماجستير الموضوع عندنا يفوت عادي جدا نقوللهم نجحت وكذا يقولولي باهى كويس 😂😂😂😂😂😂😂 حتى انا بديت نقول ليش نكبر في الموضوع شن مانجحت الا انا حتى الفرح مانعرفوش نفرحوا 🤣🤣🤣والجماعة زكره ودبائح ودنيا نايضة

11/09/2022

شن موضوعهم هادم !!!!!

09/09/2022

الله يبارك الفرق في درجات الحرارة بين جنزور والبيضاء اجواء شتوية في البيضاء بحكم ارتفاعاتها على سطح البحر بحولي 630 متر .

08/09/2022

!!!!!!!
السادة الشؤون الاجتماعية جنزور شن صار في بطاقات الايفاء جنزور اخر حاجة في الموضوع هذا ع حسب صفحتكم كانت بتاريخ 27-7 وحنا اليوم قريب نص 9 البلديات الثانية ينزلوا ليه ليه اخرهم بلدية مزدة امس منزلين اسماء جديدة ياريت نعرفوا سبب التأخير لو مافيها ازعاج !!!!!!!!!!!!

07/09/2022

العديد في العائلات لديهم هذا الفرد المعاق بلا اعاقة فهو يعيش بدون ان يقدم اي اضافة يأكل يشرب وينام وان اكل لا يكلف نفسه حتى بوضع صحنه في المطبخ لان امه او اخته او الخادمة ستقوم بذلك وان غير ملابسه فتجدها على الارض في مكانها لان امه او اخته او الخامدة ستقوم بذلك وقس على ذلك كل باقى الامور الاخرى فإذا كانت بنت فهى لا تعرف تقلي حتى دحيه ولا ترغب حتى ان تحاول ان تتعلم وان كان شاب لا يعرف حتى يغير لامبه ولا يسقى حتى شجرة في جنان حوشهم عايشين عاله على اسرهم لا يفقهون شيء ولا يعرفون شيء ولا يريد حتى ان يفهم اي شيء اسهميهم بالمعاقين وحتى بعض المتزوجين يتصرفون بهذا الشكل لكن بنسبه بسيطة ليس كالشخص الاعزب ، امر هذه الفئة غريب رغم ان اغلبهم شباب طول وعرض ولكن شيء شيء صفر في كل شيء وتلقاه عادي هكى حتى ضميره مش واجعه خيرنى هكى ناكل ونشرب ونرقد زايد ناقص، نسأل الله العفو والعافية.

06/09/2022

#قفشات☺️☺️☺️

الاجنبية لما تصف خطيبها تقول ، وسيم وذكى وروحه مرحة ويعطينى طاقة ايجابية دائما .

الليبية تقول ، عنده حوش و سيارة ، امه متوفية ، وما عنداش اخوات.
😂😂😂