Leseli La Bokamoso Commercial Radio
15/03/2025
15 March 2025
BA TLISA NTOA LESOTHO
Raboshane Ramoloko (30) oa Ha Motlalep**a Khubelu, Khotsofalang Ramoloko (29) oa Ha Maputsoe Khubelu, Boikano Ramoloko (20) oa Ha Motlalep**a Khubelu, Khothatso Tjotjoane (23) oa Majakaneng Mapholaneng, Lekhanya Letjama (23) oa Lilimala Popa, Retetse Ramoloko (27) oa Ha Maputsoe, Khubelu ba Seterekeng sa Mokhotlong le Matsie Mphunyetsane (35) oa Ha Mphunyetsane Leribe, ba hlahile Lekhotleng la ’Maseterata Mokhotlong, ka La Hlano Tlhakubele Monongoaha, ka pel’a ‘Maseterata Chonela, bochochising ba Mochochisi Lefisa, ba qosoa ka teko ea polao, tšenyo ea thepa le lithunya tse seng molaong.
Puisanong le Detective Sergeant (D/Sgt) Lebohang Letlema oa Ofising ea Mafokisi Tlokoeng, o bontša h**e bosiung ba La 24 Hlakola Monongoaha, ba ile ba fumana tlaleho ea h**e ho na le batho ba hlasetseng lelapa le leng motseng oa Ha Motlalep**a Khubelu ka lithunya.
O re ke moo ka letsatsi le hlahlamang ka La 25 Hlakola Selemong sena, sechaba se ileng sa tšoara baqosuoa, sa nehelana ka bona sepoleseng hammoho le lithunya tse peli le likulo tse 15.
A re ba ile ba thakhola liphuputso tse utulotseng ha baqosuoa ba hlasetse lelapa la Ramoloko le amahanngoang le mokhatlo oa likobo o thibetsoeng ka molao o bitsoang Khang Kholo. A re baqosuoa le bona, pelaelo ke h**e ke ba mokhatlo o tšoanang.
O re lipatlisiso li supa ha qabang e qalile Afrika Boroa, moo ho bileng ho nang le batho ba babeli ba timeletseng teng. A re liqabang li bonahala li keketse ho tla fihla koano, sesosa ha se e so tsejoe; sepolesa se ntse se etsa lipatlisiso.
Baqosuoa ba ile ba tšoaroa ba nt’o hlahisoa lekhotleng ka letsatsi le boletsoeng, 'me ba emetse ho hlaha khotla hape ka La 19 Tlhakubele Monongoaha, ba le ka Setsing sa Tlhabollo ea Batšoaruoa. ‘Melaelloa e mong o ntse a le kokelong, ‘me o tla hlahisoa khotla ha ngaka e mo lokolla.
D/Sgt Letlema o ipelelitse ho beng ba lintoa tsena ho emisa lipolaeano tse sooto, ka ha li siea bana e le likhutsana le ho beha naha tlasa tsitsipano.
