http://www.gossiplankanews.com/

Gossip Lanka News, 31/1 A, Old Kottawa Road, Mirihana, Nugegoda (2024)

24/01/2024

ඩුබායි රාජ්‍යයේ සිට මෙරට මත්ද්‍රව්‍ය ජාවාරම මෙහෙයවන “පෑලියගොඩ කලණ” නමැත්තාගේ, මත්ද්‍රව්‍ය ජාලයේ ගෝලයකු වන “බොරලැස්ගමුවේ ඛෙන්සි” නමැත්තා රුපියල් ලක්ෂ 30 කට ආසන්න වටිනා කොකේන් සහ අයිස් මත්ද්‍රව්‍ය සමඟ අත්අඩංගුවට ගත් බව පිළියන්දල පොලිසිය කියයි. සැකකරුගේ මත්ද්‍රව්‍ය ජාවාරමට ආධාර අනුබල දුන් බව කියන පුද්ගලයකු අයිස් මත්ද්‍රව්‍ය පැකට්ටුවක් සමග අත්අඩංගුවට ගෙන ඇත.

ප්‍රධාන සැකකරු සමඟ කොකේන් මත්ද්‍රව්‍ය ග්‍රෑම් 50 ක් අයිස් මත්ද්‍රව්‍ය ග්‍රෑම් 5 ක් ස්මාට් වර්ගයේ ජංගම දුරකථන 6 ක් ඇතුළු දුරකථන 9 ක්, විද්‍යුත් තරාදියක්, අයිස් මත්ද්‍රව්‍ය පැකට් කිරීමට ගන්නා ඉටි කවර රෝලක්, ගම්සැප් රෝලක් පොලිස් බාරයට ගෙන ඇත.පිළියන්දල ගැඩබුවාන අලුත් පාර ප්‍රදේශයේ බෝඩිම් කාමරයක රැඳී සිටින පුද්ගලයකු මහා පරිමාණයෙන් මත්ද්‍රව්‍ය ජාවාරමක් සිදුකරන බවට පිළියන්දල පොලිසියේ දූෂණ මර්දන අංශයේ ස්ථානාධිපති පොලිස් පරීක්ෂක මුදිත තිලකරත්න මහතාට ලද තොරතුරකට අනුව

සැකකරු එම කාමරය තුළදී කොකේන් මත්ද්‍රව්‍ය ග්‍රෑම් 25ක පැකට්ටුවක් සමඟ අත්අඩංගුවට ගැනීමට හැකි වූ බව පොලිසිය කියයි.

එම ස්ථානය වටලන අවස්ථාවේදී ඊට යාබද කාමරයේ නවාතැන්ගෙන සිටි පුද්ගලයාද අයිස් මත්ද්‍රව්‍ය පානය කරමින් සිටියදී තවත් අයිස් මත්ද්‍රව්‍ය පැකට්ටුවක් සමඟ අත්අඩංගුවට ගැනීමට හැකි වූ බව පොලිසිය කියයි.ප්‍රධාන සැකකරු පොලිසියට රැගෙන ඒ මෙන් අනතුරුව සිදු කළ දීර්ඝ ප්‍රශ්න කිරීමේදී අනාවරණය වූ තොරතුරු අනුව සැකකරුගේ සැකකරුගේ මග පෙන්වීම මත තවත් කොකේන් ග්‍රෑම් 25ක් සහ අයිස් මත්ද්‍රව්‍ය ග්‍රෑම් 5 ක් සැකකරු නවාතැන් ගෙන සිටින කාමරයේ පිටුපස නාන කාමරයේ සඟවා තිබියදී සොයා ගැනීමට හැකිවූ බව පොලිසිය සඳහන් කරයි.

ඩුබායි රාජ්‍යයේ සිටින කලණ නමැත්තා වම්සැප් තාක්ෂණය ඔස්සේ ලබා දෙන උපදෙස් අනුව ක

ොකේන් මත්ද්‍රව්‍ය පමණක් ඔහු නම් කරන පුද්ගලයන්ට පමණක් ලබා දෙන බවත් සෙසු මත්ද්‍රව්‍ය සාමාන්‍ය පරිදි අලෙවි කරන බවත් සැකකරු පාපෝච්චාරණය කර ඇත. කොකේන් මත්ද්‍රව්‍ය මිලදී ගන්නා බහුතරයක් පුද්ගලයන් සමාජ ශාලාවලට යන එන්නන් බවද ඒවායේ මුදල් පරිපාලනය ද කලණ නැමැත්තා විසින්ම කරනු ඇතැයි සැකකරු පවසා ඇත.මෙම මත්ද්‍රව්‍ය සියල්ලම නාඳුනන තරුණියන් වත්තල ප්‍රදේශයට රැගෙනවිත් තමන් වෙත ලබාදෙන බවත් ඒ බව කල්තියා කලණ නමැත්තා තමන්ට දැනුම් දෙන බවත් සැකකරු වැඩිදුරටත් පවසා ඇත. සැකකරු කැස්බෑව මහේස්ත්‍රාත් අධිකරණය වෙත ඉදිරිපත් කර දින හතක කාලයකට රැඳවුම් නියෝග වැඩිදුර විමර්ශන ලබා ගෙන සිදුකිරීමට නියමිතය.
බිමල් ජයසිංහ

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

මාතර නිල්වලා ගඟ හරස් කොට ඉදි කර ඇති ලවණ බාධකය නිවැරදි කර දෙන්නැයි ඉල්ලා මාතර දිස්ත්‍රික් ගොවි සංවිධාන බල මණ්ඩලය ඊයේ (23දා) උදෑසන ආරම්භ කළ විරෝධතාවක් හේතුවෙන් මාතර නගරයෙහි දැඩි උණුසුම් තත්ත්වයක් ඇති විය.

දහසකට ආසන්න ගොවීන් පිරිසක් පළමුව මාතර ඓතිහාසික බෝධීන් වහන්සේ අභියස පැමිණ අධිෂ්ඨාන පූජාවක් පවත්වා ඉන් අනතුරුව පෙළපාළියකින් මාතර සනත් ජයසූරිය ක්‍රීඩාංගණය ඉදිරිපිටට පැමිණියහ.

මේ නිසා මාතර කොළඹ ප්‍රධාන මාර්ගයේ එක් මංතීරුවක් අවහිර වී වාහන ගමනාගමනයට බාධා එල්ල වූ අතර අනෙක් මංතීරුවෙන් වාහන ධාවනය කිරීමට පොලීසිය විසින් කටයුතු කරන ලදී.

කෙසේ වෙතත් එම නිසා මාතර නගරයේ දැඩි රථ වාහන තදබදයක් ඇති වී තිබිණි.

නිල්වලා ලවණ බාධකය නිවැරදි කර දෙන්නැයි බල කරමින් ගොවීහු මාතර සනත් ජයසූරිය ක්‍රීඩාංගණය ඉදිරිපිට අඛණ්ඩ උපවාසයක් ද ආරම්භ කළහ.

තම ගැටලුවට විසඳුමක් ලබා දෙන තුරු එම උපවාසය අත් නොහරින බවට ඔවුහු ප්‍රතිඥාවක් ද දුන්හ.

මෙහිදී අදහස් දැක්වූ ශ්‍යාමෝපාලි මහා නිකායේ ශ්‍රී රෝහණ පාර්ශ්වයේ ජ්‍යෙෂ්ඨ අනුනායක ඕමාරේ කස්සප මහ නාහිමියෝ මෙසේ කීහ. “බුද්ධිමත් යයි කියා ගන්න මෝඩ ඉංජිනේරුවන් පිරිසක් දේශපාලඥයන් සමග එකතු වී PAI කොමිස් කට්ටියට යට වී සිදු කළ මේ අමනෝඥ ව්‍යාපෘතිය හේතුවෙන් මාස හතරකට වැඩි කාලයක් අපේ ජනතාව දුක් විඳිනවා. මේ ලවණ බාධකය මහ පොළොව නුහුලන අපරාධයක්. සුදුසු තැන සුදුසු විදියට නිවැරදිව ස්ථාපිත කරලා නෑ. ඒ නිසා පහත් බිම්වල කුඹුරු අක්කර දහස් ගණනක් පුරන් වෙලා. අද ගොවියාට යන එන මං නැති වෙලා. ඒ නිසා වහා මේක නිවැරදි කළ යුතුයි.”

මාතර දිස්ත්‍රික් ගොවි සංවිධාන බල මණ්ඩලයේ නියෝජිතයන් වන බන්දුල කෝමංගොඩ හා එරන්ද මැද්දේගොඩ යන මහත්වරු මෙසේ පැවසූහ.

“ලවණ බාධකය නිවැරදි කර දිය යුතුයි. එය කරන තෙක් අතුරු ඇළ මාර්ගය අඩි 150ක් දක්වා පුළුල් කළ යුතුයි. බණ්ඩත්තර පාලම අසල වැලි වැටිය සම්පූර්ණයෙන් ඉවත් කරන්න ඕන. නූපේ ඇළ ජලය බැස යන පරිදි ශුද්ධ කළ යුතුයි. මේ ඉල්ලීම් වලට සාධනීය පිළිතුරක් ලැබෙන තෙක් අපි මේ උපවාසය නිර්පාක්ෂික අඛණ්ඩව පවත්වා ගෙන යනවා. මාස හතරක් අපි මේ වතුර ගොඩකට වැටිලා බැට කනවා. අද අපේ පැති වලින් විවාහයක් කර ගන්නවත් අකමැති තත්ත්වයක් ඇති වෙලා. අපේ කුඹුරු හා භෝග වගාව සම්පූර්ණයෙන්ම විනාශ වෙලා. ඒ නිසා මේ දුක හා වේදනාව දැනෙන්නේ අපේ ගොවි ජනතාවට විතරයි.පාලකයින්ට නෑ."

මාතර, මාලිම්බඩ, කඹුරුපිටිය, තිහගොඩ, අකුරැස්ස, වැලිගම ආදී ප්‍රාදේශීය ලේකම් කොට්ඨාස නියෝජනය කරමින් ගොවි සංවිධාන 65ක නියෝජිතයන් හා ගොවීහු මෙම උද්ඝෝෂණයට සහභාගි වී සිටියහ.

විසඳුමක් ලබා දෙන තෙක් උපවාසය කණ්ඩායම් වශයෙන් සිදු කිරීමට සැලසුම් ඔවුන් විසින් සැලසුම් කර තිබේ.

ක්‍රිෂාන් ජීවක ජයරුක්

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

සී. අයි. ඩී නිලධාරීන් බව පවසා පිටකොටුව හෙට්ටි වීදියේදී රුපියල් එක්කෝටි පනස් ලක්ෂයකට ආසන්න වටිනා රත්තරන් සහ විදේශීය මුදල් අඩංගු පාර්සලයක් රැගෙන යමින් සිටි පුද්ගලයෙකු ත්‍රි රෝද රථයකින් පැහැරගෙන ගොස් එම දේපළ කොල්ලකෑ සිව් දෙනාගේ කල්ලිය අත්අඩංගුවට ගත් බව පිටකොටුව පොලීසිය කියයි.

අත්අඩංගුවට ගත් සැකකරුවන් අතර කොල්ලය සැලසුම් කළ ත්‍රිරෝද රථ රියදුරෙකු, ඔහුගේ බෑනා, යුද්ධ හමුදාවේ විශ්‍රාමික සෙබළුකු හා තවත් පුද්ගලයෙකුද වන බව පොලීසිය කියයි.

කොල්ලයේ සැලසුම්කරුවන සැකකාර වසර 25කට අධික කාලයක් හෙට්ටි වීදියේම රාත්‍රී කුලී ගමන් යන ත්‍රිරෝද රථ රියදුරකු ලෙස සේවය කළ අයෙකු බව පොලීසිය සදහන් කරයි.

සැකකරුවන් සියලු දෙනාම ඔරුගොඩවත්ත 13 වත්ත ප්‍රදේශයේ පදිංචිකරුවෝ වෙති.

සැකකරුවන් විසින් කොල්ල කන ලද කැරට් 21-22 ප්‍රමාණයේ රත්තරන් ග්‍රෑම් 432ක්, කැරට් 24 ප්‍රමාණයේ රත්තරන් ග්‍රෑම් 92ක් මෙන්ම රුපියල් ලක්ෂ 19ක විදේශීය මුදල් තොගයෙන් ලක්ෂ 5ක විදේශීය මුදල් සොයාගත් බව පොලීසිය සදහන් කරයි.

පිටකොටුව,හෙට්ටි වීදියේ රන් ආභරණ වෙළෙඳ සැලක් හිමි ව්‍යාපාරිකයෙකුට කාත්තන්කුඩි සහ මඩකලපුව යන ප්‍රදේශවල රන් භාණ්ඩ අලෙවි සැල් දෙකක් තිබෙන අතර එම වෙළෙඳ සැල්වල සිට උණු කරන ලද රත්තරන් කැබලි අලුතින් රන් භාණ්ඩ සැකසීම සඳහා හෙට්ටි වීදිය රන් ආභරණ වෙළෙදසැලට, කාත්තන්කුඩි සිට කොළඹ දක්වා රාත්‍රී පැමිණෙන දන්නා හඳුනන බස් රථයකින් ඉකුත් 11 වැනි දින ඒවා තිබූ බව පොලීසිය කියයි.

බස් රථයෙන් පාර්සලය ලබාගත් සේවකයා එය ඉනෙහි සඟවාගෙන රන් ආභරණ වෙළෙද සැල ආසන්නයට පැමිණීමත් සමගම ඔහුගේ පිටුපසින් පැමිණ තිබූ ත්‍රිරෝද රියකින් බැස තිබූ පුද්ගලයකු ඔහුගේ ගෙල ප්‍රදේශයෙන් අල්ලා අපි සී.අයි.ඩී. බව පවසමින් එම සේවකයා ත්‍රිරෝද රථයට බලහත්කාරයෙන් නංවාගෙන රන් අඩංගු පාර්සලය කොල්ලකෑමෙන් අනතුරුව

සේවකයා කොච්චිකඩේ පල්ලිය අසලින් බස්සවා ත්‍රිරෝද රථයේ සිටි පුද්ගලයන් පලා ගොස් තිබිණ.

කොල්ලය සම්බන්ධයෙන් පිටකොටුව පොලීසියේ අපරාධ විමර්ශන අංශයේ ස්ථානාධිපති පොලිස් පරීක්ෂක එස්. කේ. අනුරජිත් මහතා ඇතුළු කණ්ඩායම කොල්ලකරුවන් අත්අඩංගුවට ගැනීමේ මෙහෙයුම ආරම්භ කරමින් සීසීටීවී දර්ශන එකින් එක පරීක්ෂා කිරීමේදී කොල්ලකරුවන් පැමිණි ත්‍රිරෝද රථය ඔරුගොඩවත්ත දෙසට ගමන් කරන අයුරු දර්ශනය වී තිබූ බව පොලිස් නිලධාරියෙක් පැවසීය.

ඒ අනුව සීසීටීවී දර්ශන 40කට අධික ප්‍රමාණයක දර්ශන පරික්ෂා කිරීමෙන් අනතුරුව ඔරුගොඩවත්ත 13 වත්ත ප්‍රදේශයේදී කොල්ලය සදහා සැකකරුවන් පැමිණි ත්‍රිරෝද රථය හඳුනාගත් බව පොලීසිය කියයි.

අනතුරුව ත්‍රිරෝද රථයේ හිමිකරු අත්අඩංගුවට ගෙන සිදු කළ ප්‍රශ්න කිරීමේදී කොල්ලයේ සුල මුල මෙන්ම කොල්ලයේ සැලසුම්කරු සම්බන්ධයෙන්ද තොරතුරු අනාවරණය කරගත් පොලීසිය ඊට සම්බන්ධ සැකකරුවන් සිව්දෙනාම අත්අඩංගුවට ගත් බව කියයි.

සැකකරුවන්ගෙන් සිදු කළ ප්‍රශ්න කිරීමේදී ත්‍රිරෝද රථ රියදුරුගෙන් වසර 25කට ආසන්න කාලයක් සේවය කරන ත්‍රිරෝද රථ ගාලේ සිට මෙම රන් ආභරණ වෙළෙඳ සැලේ සේවකයන්ගේ ගමන් පිළිබද දැඩි අවධානයෙන් පසු වී ඔවුන් අලුයම් කාලයේ වෙළෙද සැලෙන් පිටතට ගොස් මඳ වේලාවකින් ඉනෙහි පාර්සල් සඟවාගෙන පැමිණෙන්නේ යම් වටිනා කමක් ඇති දෙයක් බවට අවබෝධ කර ගැනීමෙන් අනතුරුව සිය බෑණාට ඒ බව පවසා මෙම කොල්ලය සැලසුම් කළ බව පාපෝච්චාරණය කර ඇත.

කොල්ලය සිදු කිරීමෙන් අනතුරුව සැකකරුවන් සිව්දෙනා රුපියල් ලක්ෂ 19ක විදේශීය මුදල් සම සමව බෙදාගෙන ඇති අතර, විශ්‍රාමික හමුදා සෙබළා කොල්ල කන ලද කැරට් 24 රත්තරන් ග්‍රෑම් 92 ප්‍රමාණයක් ලබාගෙන තිබියදී පොලීසිය මගින් සොයාගෙන ඇත.

සෙසු රත්තරන් තොගයම ත්‍රිරෝද රථ රියදුරුගේ බෑනාගේ නිවසේ වහලයේ සඟවා තිබියදී සොයා ගත් බව පොලීසිය කියයි.

ත්‍රිරෝද රථ රියදුරු හැරෙන්නට අනෙක් දෙදෙන කොල්ලකෑමෙන් ලබාගත් විදේශීය මුදල් මෙරට මුදල් බවට පරිවර්තනය කර අයිස් මත්ද්‍රව්‍ය පානය සදහා වැය කර ඇති බව පොලිස් විමර්ශනවලදී අනාවරණය වී ඇත.

සැකකරුවන් සිව් දෙනා අධිකරණය වෙත ඉදිරිපත් කිරීමට නියමිතය.

බණ්ඩාරගම -බිමල් ශ්‍යාමන් ජයසිංහ

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

වයස අවුරුදු නවයක පමණ පාසල් සිසුවකු අවස්ථා දෙකකදී බරපතළ ලිංගික අපයෝජනයකට ලක්කිරීමේ සිද්ධියක් සම්බන්ධයෙන් අධිචෝදනා ලබා සිටි හිටපු පොලිස් කොස්තාපල්වරයකු එම අධිචෝදනා දෙකටම වරදකරු බවට තීන්දු කළ මහනුවර මහාධිකරණ විනිසුරු ඩබ්ලිව්. දර්ශිකා විමලසිරි මෙනෙවිය ඔහුට වසර හතළිහක බරපතළ වැඩ සහිත සිර දඬුවමක් ඊයේ (23) නියම කළාය.

එක් අධි චෝදනාවකට වසර විස්ස බැගින් චෝදනා දෙකට හතළිස් වසරක සිර දඬුවමක් මෙසේ නියම කෙරිණි. හතළිස් වසරක සිර දඬුවම වසර විස්සකදී එකවර ගෙවී යා යුතු බවට ද නියෝග කළ මහාධිකරණ විනිසුරුවරිය පැමිණිලිකාර වින්දිත දරුවාට රුපියල් ලක්ෂ පහක මුදලක් වන්දි වශයෙන් ගෙවන ලෙසටද විත්තිකාර හිටපු පොලිස් කොස්තාපල්ට නියම කළාය. එම වන්දි මුදල ගෙවීම පැහැර හැරියහොත් විත්තිකරුට තවත් දෙවසරක බරපතළ වැඩ සහිත සිර දඬුවමක්ද නියම කළ අතර රුපියල් විසිපන් දහසක දඩ මුදලක්ද නියම කළාය.මෙම දඬුවම නියම වූයේ මහනුවර උඩුදුම්බර ගංගොඩ පදිංචි රාජපක්ෂ විජය මුනිලාගේ නිශාන්ත වීරසූරිය නමැති අවිවාහක හිටපු පොලිස් කොස්තාපල් කෙනෙකුටය.නඩුවේ තීන්දුව දෙමින් මහාධිකරණ විනිසුරු දර්ශිකා විමල සිරි මෙන විය පැවසුවේ විත්තිකරුට එරෙහිව පැමිණිල්ල නගා ඇති චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශ්වය සමත්ව ඇති බවයි.

2017 වසරේ ජනවාරි මස 01 දින හෝ ඊට ආසන්න දිනයක මහනුවර මහාධිකරණ බල ප්‍රදේශයට අයත් උඩුදුම්බරදී මෙම වරද සිදු කර ඇති බවට නීතිපතිවරයා විසින් ලංකා දණ්ඩ නීති සංග්‍රහයේ 365 ආ (2) ආ වගන්තිය යටතේ මෙම විත්තිකරුට එරෙහිව මහනුවර මහාධිකරණය හමුවේ වෙන් වෙන් වශයෙන් අධි චෝදනා දෙකක් ගොනු කරනු ලැබ තිබිණි.මෙම නඩුවේ ලඝු නොවන මූලික විභාගය මහනුවර මහේස්ත්‍රාත් අධිකරණයේ පැවැති අතර නීතිපතිවරයා විසින් 2019 වර්ෂයේදී විත්තිකරුට අධි චෝදනා ගොනු කිරීමෙන් අනතුරුව වැඩිදුර විභාගය මහනුවර මහාධිකරණයට යොමු කෙරිණි.පැමිණිල්ල වෙනුවෙන් රජයේ නීතිඥ තාරකා කෝදාගොඩ මෙනෙවිය පෙනී සිටි අතර විත්තිකරු වෙනුවෙන් නීතිඥ ජගත් ඩයස් මහතා පෙනී සිටියේය.

මහනුවර ශික්ෂණ රෝහලේ විශේෂඥ අධිකරණ වෛද්‍ය එම්.එම්. සිවසුබ්‍රමනියම් මහතා ඇතුළු හත් දෙනෙක් මෙම නඩුවේ සාක්ෂිකරුවෝ ලෙස නම් කරනු ලැබ සිටියහ.තෙල්දෙණිය පොලිසිය සිද්ධිය සම්බන්ධයෙන් විමර්ශන මෙහෙයවීය. විත්තිකාර පොලිස් කොස්තාපල් නව හැවිරිදි පාසල් සිසුවා බරපතළ ලෙස ලිංගික අපයෝජනයකට ලක්කර ඇත්තේ එම සිසුවා පාසලේ හතරවැනි ශ්‍රේණියේ සිටියදී බව අධිකරණ නඩු විභාගයේදී අනාවරණය විය.
උපාලි ආනන්ද

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

අභියෝග සහ චෝදනා කොතරම් ආවත් පාක්‍ෂිකයොත් සමඟ ගම්මට්ටමින් ශ්‍රී ලංකා පොදුජන පෙරමුණ ක්‍රියාත්මක වන බවත් ‘හූ’ කියන දේශපාලන පක්‍ෂවල අරමුණ වී ඇත්තේ පොදුජන පෙරමුණ ගමට ඒම නැවැත්වීම බවද එම පෙරමුණේ පාර්ලිමේන්තු මන්ත්‍රී නාමල් රාජපක්‍ෂ මහතා ඊයේ (23) පැවසීය.

ශ්‍රී ලංකා පොදුජන පෙරමුණ පැහැදිලිවම ගමට යන බව කී රාජපක්‍ෂ මහතා ප්‍රතිපත්තියක් නැති සමහර දේශපාලන පක්‍ෂවලට ‛හූ' තියෙන එක හැර වෙනත් විකල්පයක් නොමැති බව ද සඳහන් කළේය.ක්‍රීඩා කරපු අය හැටියට රග්බි නම් ‘රෙෆ්රිට’ බනිනවා ක්‍රිකට් නම් අම්පයර්ට බනිනවා එසේත් නැත්නම් පරදින හෝ දිනන පැත්තට ප්‍රේක්‍ෂකයො ‛හූ' කියනවා දැක ඇති බවත් සමහර දේශපලාන පක්‍ෂ බංකොළොත් වුණාම ප්‍රතිත්පතියක් නැති වුණාම මේ උපක්‍රම භාවිතා කරන බවද ඒ මහතා කීය.

ශ්‍රී ලංකා පොදුජන පෙරමුණ ගමට ඒම වැළැක්වීමට ඒ උපක්‍රම භාවිතා කරන බව කී ඒ මහතා ඉන්පසුව ගමට එන්නෙ නැති වුණාම පොදුජන පෙරමුණ ගමට එන්නේ නෑ කියලත් කියන බවද පැවසීය.

1988 සිට ගෙවල් ගිනි තියපු පක්‍ෂ පාර්ලිමේන්තුවේ සිටින බවද ඔවුන්ගේ නායකත්වය පිළිබඳව අභියෝගයක් තියෙන අය ජනාධිපති අපේක්ෂකයා නම් යැයි කරගෙන දගලන බවත් රාජපක්‍ෂ මහතා වැඩි දුරටත් කීය.පාර්ලිමේන්තු මන්ත්‍රී නාමල් රාජපක්‍ෂ මහතා පාර්ලිමේන්තු සංකීර්ණයෙන් පිටතදී මාධ්‍යයට අදහස් දක්වමින් එසේ පැවසීය.

යොහාන් භාසුර

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

සක්‍රීය යුද හමුදා සේවයේ යෙදී සිටිමින් සංවිධානාත්මක අපරාධකරුවන් සමග සම්බන්ධතා පැවැත් වූ බවට තොරතුරු අනාවරණය වීමෙන් පසුව අයිස් මත්ද්‍රව්‍ය ග්‍රෑම් දහ අටයි මිලිග්‍රෑම් හාරසිය හැත්තෑවක් සමග අත්අඩංගුවට ගත් යුද හමුදා සෙබළකු ලබන (28) දා දක්වා රඳවාගෙන ප්‍රශ්න කිරීමට කැස්බෑව මහේස්ත්‍රාත් අධිකරණය පෙරේදා (22) නියෝග කළේය.

මෙම නියෝගය නිකුත් කළේ පොල්ගස්ඕවිට, කහතුඩුව, උස්වත්ත පාර, අංක 70 හි පදිංචි කංකානම්ගේ රසංග ලලිඳු කුමාර නමැති (37) හැවිරිදි ශ්‍රී ලංකා යුද හමුදා ලාන්ස් කෝප්‍රල්වරයෙකි. ඉකුත් 2023 වසරේ ජුනි මස 21 දින කොස්ගොඩ විජිත් මහේන්ද්‍ර ද සිල්වා නොහොත් රන්මල්ලි ඝාතනය සහ මෙම මස 18 වැනිදා බලපිටිය ප්‍රදේශයේ මාළු ව්‍යාපාරිකයෙකු ඝාතනයට තැත් කිරීමේ සිද්ධිය සම්බන්ධයෙන් පොලිස් විශේෂ කාර්ය බළකායේ අණදෙන නිලධාරී ජ්‍යෙෂ්ඨ නියෝජ්‍ය පොලිස්පති නීතිඥ වරුණ ජයසුන්දර මහතාගේ උපදෙස් මත නිලධාරී කණ්ඩායම් කිහිපයක් ඔස්සේ විමර්ශනයක් සිදුකර තිබුණි.

ඒ සම්බන්ධයෙන් විමර්ශන සිදුකළ විශේෂ කාර්ය බළකායේ උතුරු පළාත් විමර්ශන නිලධාරී කණ්ඩායමට තොරතුරු අනාවරණය වී තිබුණේ දැනට සක්‍රීය යුද හමුදා සේවයේ නිරත මෙම පුද්ගලයා එම ඝාතන සඳහා සෘජුවම සම්බන්ධතා පවත්වා ඇති බවයි.

ඒ අනුව විශේෂ කාර්යය බළකායේ නිලධාරී කණ්ඩායමක් කහතුඩුව උස්වත්ත ප්‍රදේශයේදී සැකකරු අයිස් මත්ද්‍රව්‍ය ග්‍රෑම් 18 මිලිග්‍රෑම් 470, යුද හමුදා නිල ඇඳුම් තොගයක් සමග (21) දා අත්අඩංගුවට ගෙන තිබුණී.

මොහු යුද හමුදාවේ සක්‍රීය සේවයේ යෙදී සිටිමින් මනුෂ්‍ය ඝාතන හා සංවිධානාත්මක අපරාධ කල්ලි නායකයකු වන කොස්ගොඩ ලොකු පැටී යන අය සමඟ සමීප සම්බන්ධතා පවත්වමින් මෙම ඝාතන සිදුකර ඇති බවට මූලික විමර්ශනවලදී අනාවරණය වී තිබුණි.

එසේම බලපිටිය ප්‍රදේශයේ මාළු ව්‍යාපාරිකයා ඝාතනය කිරීමේ සිද්ධියට යතුරු පැදියකින් යමින් සිටි යුද හමුදා සෙබළා මෙහෙයවා ඇත්තේ මෙම සැකකරු බවටත් කොස්ගොඩ රන් මල්ලි ඝාතනයේ වෙඩික්කරු ලෙසට කටයුතු කර ඇති බවට තොරතුරු අනාවරණය වී ඇති බවත් පොලිසිය කියයි.

ඒ අනුව අයිස් මත්ද්‍රව්‍ය ළඟ තබා ගැනීමේ චෝදනාව යටතේ සැකකරු පෙරේදා (22) කැස්බෑව අධිකරණයට ඉදිරිපත් කිරීමෙන් අනතුරුව වැඩිදුර විමර්ශන සඳහා රඳවාගෙන ප්‍රශ්න කිරීමට පොලිසිය අධිකරණයෙන් අවසර ඉල්ලා තිබුණි.

ඒ අනුව සැකකරු ලබන 28 දා දක්වා රඳවාගෙන ප්‍රශ්න කිරීමට කැස්බෑව මහේස්ත්‍රාත්වරයා පොලිසියට අවසර දී තිබේ. කහතුඩුව පොලිසියේ ස්ථානාධිපති ප්‍රධාන පොලිස් පරීක්ෂක ප්‍රියංකර මහතාගේ උපදෙස් මත පො.කො (92440) චාමර නිලධාරීහු පරීක්ෂණ මෙහෙය වූහ.
මත්තේගොඩ ශාන්ත ප්‍රදීප් කුමාර කුලරත්න

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

ලංකා බැංකුවේ පොදු ලෙජර් ගිණුමෙන් රුපියල් ලක්‍ෂ 66 1/2කට අධික මුදලක් වංචා සහගතව සිය ඥාතීන්ගේ ගිණුම්වලට බැර කරගත් බව කියමින් සැකපිට අත්අඩංගුවට ගෙන අධිකරණයට ඉදිරිපත් කළ ලංකා බැංකුවේ විද්‍යුත් බැංකුකරණ ඒකකයේ ප්‍රධාන කළමනාකාරවරයා ලබන මස 06වැනිදා තෙක් රිමාන්ඩ් භාරයේ රඳවා තැබීමට කොටුව මහේස්ත්‍රාත් තිළිණ ගමගේ මහතා ඊයේ (23දා) නියම කළේය.

මෙම වංචා සිද්ධිය සම්බන්ධයෙන් දීර්ඝ වශයෙන් විමර්ශනය කරන බව දැනුම් දෙමින් වංචා විමර්ශන අංශයේ නිලධාරීන් කළ ඉල්ලීමක් පිළිගත් මහේස්ත්‍රාත්වරයා සැකකාර ප්‍රධාන කළමනාකාරවරයා රිමාන්ඩ් භාරයට පත් කළේය.

මෙලෙස රිමාන්ඩ් භාරයට පත් කරන ලද්දේ ලංකා බැංකුවේ විද්‍යුත් බැංකුකරණ ඒකකයේ ප්‍රධාන කළමනාකාරවරයා වශයෙන් රාජකාරී කළ ඩිලාන් ජනක රත්නායක නමැත්තෙකි.

සිද්ධිය සම්බන්ධයෙන් කළ විමර්ශනවල ප්‍රගතිය දැක්වෙන වාර්තාවක් ඉදිරිපත් කළ වංචා විමර්ශන අංශයේ නිලධාරීන් ලංකා බැංකුවේ පොදු ලෙජර් ගිණුමෙන් මුදල් වංචා කරන බවට ලැබුණු පැමිණිල්ලකට අනුව සිද්ධිය සම්බන්ධයෙන් විමර්ශන ආරම්භ කළ බව දැනුම් දුන්නේය.

සිද්ධියට අදාළව කළ විමර්ශනවලදී ලංකා බැංකුවේ පොදු ලෙජර් ගිණුමේ තිබූ මුදල් වෙනත් සැකකටයුතු ගිණුම් හතරකට බැර වී ඇති බව හෙළි වූ බවද, එම ගිණුම් හිමියන් සම්බන්ධයෙන් කළ විමර්ශනවලදී ඔවුන් සැකකරුගේ ඥාතීන් බවට හෙළි වූ බවද දැනුම් දුන් නිලධාරීන් සැකකරුට ලංකා බැංකුවේ පොදු ලෙජර් ගිණුමට ඇතුළු වීමට ඇති හැකියාව පාවිච්චි කරමින් පොදු ලෙජර් ගිණුමේ තිබූ මුදල් වංචනික අන්දමින් ඔහුගේ ඥාතීන්ගේ ගිණුම්වලට බැර කරගෙන ඇතැයිද දැනුම් දුන්නේය.

ලංකා බැංකුව සතු මුදල් මේ ආකාරයෙන් වංචා කර ඇද්දැයි හෙළි කර ගැනීම සඳහා තවදුරටත් විමර්ශනය කරන බව දැනුම් දුන් වංචා විමර්ශන අංශයේ නිලධාරීහු සැකකරු රිමාන්ඩ් භාරයට පත් කරන්නැයි අධිකරණයෙන් ඉල්ලා සිටියහ.

ඉදිරිපත් වූ කරුණු සලකා බැලීමෙන් අනතුරුව සැකකරු රිමාන්ඞ් භාරයට පත් කළ මහේස්ත්‍රාත්වරයා සිද්ධියට අදාළව කරන විමර්ශනවල ප්‍රගතිය එදින අධිකරණයට දැනුම් දෙන ලෙසද නියම කළේය.

බුද්ධිමාල් රුබේරු

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

ඖෂධ අධි මාත්‍රාවක් ගැනීමෙන් පසුමියගිය බව කියන පේරාදෙණිය විශ්වවිද්‍යාලයේ කෘෂිකර්ම පීඨයේ ජ්‍යෙෂ්ඨ කථිකාචාර්යවරයාගේ මරණය සම්බන්ධයෙන් තවදුරටත් විමර්ශන කරන බවත් ඔහුගේ ශරීරයේ කොටස් රජයේ රස පරීක්ෂකවරයාට යොමු කර ඇති බවත් පේරාදෙණිය විශ්ව විද්‍යාලයේ වෛද්‍ය පීඨයේ අධිකරණ වෛද්‍ය නිලධාරි එන්.පී. කුලතුංග මහත්මිය
හදිසි මරණ පරීක්ෂක අමල් ජයවර්ධන මහතාට කරුණු වාර්තා කර ඇත.

ඒ අනුව අවසන් පශ්චාත් මරණ පරීක්ෂණ වාර්තාව ලැබෙන තෙක් මරණ පරීක්ෂණය මරණ පරීක්ෂකවරයා විසින් පසුවට කල් තබනු ලැබීය. එම සිද්ධිය සම්බන්ධයෙන් පේරාදෙණිය විශ්ව විද්‍යාලයේ මහාචාර්යවරුන් තිදෙනකුගෙන් සහ මියගිය කථිකාචාර්වරයාගේ බිරියගෙන් ප්‍රකාශ ගැනීමෙන් පසු අවසන් කටයුතු කිරීම සඳහා මළ සිරුර බිරියට බාර දීමට පියවර ගෙන ඇත.

පේරාදෙණිය විශ්වවිද්‍යාලයේ කෘෂිකර්ම පීඨයේ භෝග විද්‍යා අංශයේ ජ්‍යෙෂ්ඨ කථිකාචාර්ය ආචාර්ය ජයනාත් පීරිස් මහතා මිය යෑමට පෙර තමන් ඖෂධ අධිමාත්‍රාවක් සහ කෘමිනාශක වර්ගයක් ද පානය කළේ යැයි ඔහුට ප්‍රතිකාර කළ පේරාදෙණිය ශික්ෂණ රෝහලේ වෛද්‍යවරුන්ට පවසා ඇති බව විමර්ශනවල දී තොරතුරු අනාවරණයවී ඇත.

කථිකාචාර්යවරයා ඔහුගේ බිරිය සමඟ නවාතැන් ගෙන සිටි පේරාදෙණිය විශ්ව විද්‍යාලයේ නිල නිවෙසේ අසාධ්‍ය තත්වයෙන් පසුවෙමින් සිටිය දී බිරිඳගේ දැනුම්දීම මත එහි පැමිණි මහාචාර්යවරුන් තිදෙනකු සහ විශ්ව විද්‍යාල ආරක්ෂක අංශයේ පිරිසක් විසින් ආරක්ෂක අංශයට අයත් වාහනයකින් කථිකාචාර්යවරයා රෝහලට ගෙන යනු ලැබීය.
ෂේන් සෙනෙවිරත්න

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

ජපානයේ නරුහිතෝ අධිරාජ්‍යයාගේ එකම දියණිය වන අයිකෝ කුමරිය වෙත ජපාන රතු කුරස සංවිධානයේ රැකියාවක් හිමිව ඇතැයි වාර්තාවෙයි. ඇය ලබා ගැනීමට නියමිතව ඇති උපාධියත් සමගින්ම මෙම රැකියාව හිමිව තිබේ. ඒ අනුව ලබන අප්‍රේල් මාසයේ පටන් ඇය මෙම රැකියාවට යොමු වනු ඇතැයි සඳහන් වෙයි. ඇය මේ වනවිට 22 හැවිරිදි වියේ පසුවෙයි. රැකියාවක නිරත වුවද ඇය සිය රාජකීය පවුලේ නිල රාජකාරී වෙත යොමු වනු ඇතැයි වාර්තා පවසා සිටියි.

නව රැකියාව සම්බන්ධයෙන් අදහස් දක්වා ඇති අයිකෝ කුමරිය, රතු කුරස සංවිධානයේ රැකියාවක් කිරීම සම්බන්ධයෙන් තමන් සැමවිටම කැමැත්තෙන් සිටි බව පවසා තිබේ. එසේම කුමරියට පහසු ආකාරයෙන් මෙම රැකියාවේ නිරතවීමේ අවස්ථාව සැලසීමටද රතු කුරුස සංවිධානය පියවර ගන්නා බව පැවසෙයි.

අයිකෝ කුමරිය මේ වනවිට එරට ගකුෂුයින් විශ්වවිද්‍යාලයේ ලියවිලි, ජපාන භාෂාව සහ සාහිත්‍ය පිළිබඳ විශ්වවිද්‍යාලයේ අවසන් වසරේ උපාධි අපේක්ෂිකාවක ලෙස කටයුතු කරයි.

ජපාන සමාජය තුළ අද වනවිට ඇය පිළිබඳව ඉහළ පිළිගැනීමක් පවතින අතර, ඇගේ මෙම නව රාජකාරිය සම්බන්ධයෙන්ද ඔවුන් සතුටට පත්ව සිටින බව පැවසෙයි.

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

මල්වතුහිරිපිටිය ප්‍රදේශයේ විහාරස්ථානයක හිමිනමකට සුඛෝපභෝගී මෝටර් රථයකින් පැමිණි නාඳුනන සිවු දෙනකු ඊයේ (23) දහවල් කළ වෙඩි තැබීමකින් බරපතළ තුවාල ලැබූ එම හිමිනම ගම්පහ මහ රෝහලට ඇතුළත් කිරීමෙන් අනතුරුව අපවත්වී ඇතැයි මල්වතුපිටිය පොලිසිය කියයි.මෙම වෙඩි තැබීමෙන් අපවත් වූයේ කලපලුවාවේ ධම්මරතන නමැති (45) හිමිනමක බවද පොලිසිය පවසයි.

මෙම හිමිනම හේනේගම ප්‍රදේශයේ විහාරස්ථානයක වැඩවාසය කර ඇති අතර එම විහාරස්ථානයේ කලක පටන් පැවැති ඉඩම් ආරවුලක් මත මෙම හිමිනම ඇතැම් දිනවල මල්වතුහිරිපිටිය විහාරස්ථානයට පැමිණ දානය වළඳා නැවත හේනෙගම විහාරස්ථානයට වැඩම කරන බවද පොලිසිය කළ විමර්ශනවල දී අනාවරණය වී ඇත.සිද්ධිය වූ ඊයේ (23) දිනයේ ද මෙම හිමිනම දහවල් 12.15 ට පමණ වි හාරස්ථානයේ දානය වළඳමින් සිටිය දී සුඛෝපභෝගී මෝටර් රථයකින් පැමිණි නාඳුනන පුද්ගලයන් 4 දෙනකු අපරාධ පරීක්ෂණ දෙපාර්තමේන්තුවේ නිලධාරීන් බව හඟවා විහාරස්ථානයට පැමිණි හිමිනම සතුව මත්කුඩු ඇති බවට ලද තොරතුරක් මත පරීක්ෂා කිරීමට ආ බව පවසා ඇත.

පසුව හිමිනම පරීක්ෂා කරන මුවාවෙන් වෙඩි ප්‍රහාර දෙකක් එල්ල කර පලාගොස් ඇතැයි ද පොලිසිය සිදුකළ මූලික විමර්ශන වල දී අනාවරණය වී ඇත.

හිමිනමගේ වම් අතට සහ පපුව ප්‍රදේශයට වෙඩි වැදී තිබූ බවද පොලිසිය කියයි. එම වෙඩි තැබීමෙන් බරපතළ තුවාල ලැබූ හිමිනම ගම්පහ මහ රෝහලට ඇතුළත් කිරීමෙන් අනතුරුව අපවත්ව ඇති බව පොලිසිය පවසයි. මෙම වෙඩි තැබීමට සම්බන්ධ පුද්ගලයන් පැමිණි මෝටර් රථය හඳුනා ගැනීම සඳහා මල්වතුහිරිපිටිය පොලිසිය පරීක්ෂණ පවත්වයි.
ගයාන් සූරියආරච්චි

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

ඉන්දීය නිළි රශ්මිකා මන්දනාගේ සිරුරේ ප්‍රමාණය ඇති වෙනත් කාන්තාවක උඩුකය නිරාවරණය වන ලෙස ලබාගත් වීඩියෝවකට රශ්මිකාගේ මුහුණ බද්ධ කරතැනූ (ඩීප් ෆේක් තාක්ෂණය) වීඩියෝවක් පසුගිය කාලයේ ආන්දෝලනයක් ඇති කළේය. ඇය පොලිසියට ඒ ගැන පැමිණිලි කර තිබූ අතර වගකිව යුතු පුද්ගලයා අත්අඩංගුවට ගැනීමට පොලිසියට මාස කිහිපයකට පසු හැකි විය.

සිය සමාජ මාධ්‍ය ගිණුමේ මෙම අත්අඩංගුවයට ගැනීම ගැන රශ්මිකා සිය ප්‍රසාදය පළ කර ඇත.
අදාළ පුද්ගලයා මේ වන විට දිල්ලි පොලිසිය උසාවියට ඉද්රිපත්කිරීමට නියමිතය.

“මගේ හෘදයාංගම කෘතඥතාව ප්‍රකාශ කරමි. වගකිවයුත්තන් අත්අඩංගුවට ගැනීම ගැන ස්තුතියි. මාව ආදරයෙන්, සහයෝගයෙන් වැළඳ ගන්නා ප්‍රජාවට සැබවින්ම කෘතඥ වෙනවා. ගැහැණු ළමයින් සහ පිරිමි ළමයින් ඔබේ අනුරුව ඔබේ කැමැත්තෙන් තොරව ඕනෑම තැනක භාවිතා කර ඇත්නම් හෝ රූපකරණය කර ඇත්නම් එය වැරදියි.“ ලෙස ඇය තම ගිණුමේ සදහන් කර සිටියාය.

ආලියා භාත්, කත්‍රිනා කයිෆ්, ප්‍රියංකා චොප්රා සහ සචින් ටෙන්ඩුල්කාර් ඇතුළු තවත් අයගේ ඩීප් ෆේක් වීඩියෝ ද සමාජ මාධ්‍යවල පැතිරී ඇත.

මේ වන විට ව්‍යාජ ප්‍රවර්ධන වැඩසටහනක් සඳහා සචින් තෙන්ඩුල්කාර්ගේ වීඩියෝවක් සංස්කරණය කර ඇත.

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

පසුගිය 2022 මැයි 9 දා නීති විරෝධි රැස්වීමක සාමාජිකයන් වශයෙන් කටයුතු කරමින් හිටපු ඇමැති ජොන්ස්ටන් ප්‍රනාන්දු මහතාට අයත් කොම්පඤ්ඤවීදයේ පිහිටි හෝටලයකට ඇතුළු වී අයුතු ඇතුළු වීමක් අලාභයක් සිදු කරමින් දේපළවලට අලාබ හානි කළ බවට ඇති නඩුව විභාගයට ගන්නා අවස්ථාවේ අධිකරණයේ පෙනී නොසිටි සැකකරුවන් දෙදෙනකුට කොටුව මහේස්ත්‍රාත් තිළිණ ගමගේ මහතා ඊයේ (24) වරෙන්තු නිකුත් කළේය.

මෙසේ වරෙන්තු නිකුත් වූයේ මොහාමාමඩ් මර්ෂාඩ් සත්තාර් සහ එම්.අයි.එම්. ෆවුමි යන අයටය. ඒ අවස්ථාවේ අරගලකාරි තත්ත්වයක් පැවතීම හේතුවෙන් හෝටලය වසා දමා තුබූ බවත් එම කලහකාරි පිරිස පැමිණ කලහකාරිව හැසුරුණු අවස්ථාවේ එහි විදේශයන් පිරිසක් රැඳී සිටින බවට සැකකරුවන්ට දැනුම් දුන්නද ඔවුන් පසුව වැඩි පිරිසක් රැගෙන විත් බරපතළ ප්‍රහාරයක් එල්ල කළ බව එම හෝටලයේ කළමනාකරු වන මොහොමඩ් අබ්බල් අර්ෆත් යන අය කළ පැමිණිල්ලේ සඳහන් වේ. සැකකරුවන් 10 දෙනකුට එරෙහිව පවරා ඇති නඩුවේ 8 දෙනෙක් නඩුව කැඳවූ අවස්ථාවේ අධිකරණයේ පෙනී සිටියහ. නඩුවේ මහාධිකරණ නියෝගය ලැබෙන තෙක් නඩුව ලබන මාර්තු 18 දා තෙක් කල් තැබිණි.

සුභාෂිණී සේනානායක

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

තංගල්ල
මහේස්ත්‍රාත් අධිකරණයේ විභාගවන මිනිස් ඝාතන නඩුවකට පෙනී සිටීමට
යමින් සිටි අපේ ජනබල පක්ෂයේ නායක සමන් පෙරේරා නොහොත් රෝයල් බීජ් සමන්
ඇතුළු පස් දෙනකු ඝාතනය කරමින් දක්ෂිණ අධිවේගී මාර්ගයේ බෙලිඅත්ත
පිවිසුම ආසන්නයේදී පෙරේදා (21) උදෑසන එල්ලවුණු වෙඩි ප්‍රහාරය
සම්බන්ධීකරණය කළ බව කියන පුද්ගලයාව හඳුනාගෙන කොටු කර ගැනීමට
පොලිසිය සමත්ව ඇත.
වෙඩික්කරුවන් පැමිණි ජිප් රථයද මේ වනවිට පරිහරණය කරන
පුද්ගලයා කවුරුන්ද යන්නද හඳුනා ගැනීමට හැකියාව ලැබී තිබේ. ජිප් රථය ඊයේ
සවස් වන විටත් කඹුරුපිටිය ප්‍රදේශය ආශ්‍රිතව යම් ස්ථානයක නතර කර
තිබී ඇත.

එම ජිප් රථය සමඟ මෙම ප්‍රහාරය සම්බන්ධීකරණය කරන ලද
පුද්ගලයාව අත්අඩංගුවට ගැනීමට විශේෂ පොලිස්‌ මෙහෙයුමක් ඊයේ
රාත්‍රියේ දියත් කර තිබුණි.

මෙම ප්‍රහාරයට හමුදාවට සම්බන්ධ අයෙක්ද පැමිණ ඇති බව මේ වන විටත්
තහවුරු වී ඇත. එම පුද්ගලයාව අද හෙටම අත්අඩංගුවට ගැනීමට හැකි වෙතැයි
පොලිසිය විශ්වාස කරයි.

මෙම ප්‍රහාරය සම්බන්ධීකරණය කරන ලද පුද්ගලයා විවිධ
අපරාධවලට සම්බන්ධ අයෙකි. වසර හය හතක්ම ඔහු බන්ධනාගාරගතව සිටි
අයෙක් බවද සඳහන්ය.

බෙලිඅත්තේ සිදුවූ මෙම පංච පුද්ගල ඝාතනය සම්බන්ධයෙන් බොහෝ
තොරතුරු මෙම ප්‍රහාරය සම්බන්ධීකරණය කරන ලද සැකකරුගෙන් අද වන විට
අනාවරණය කර ගැනීමට හැකි වෙතැයි පොලිසිය විශ්වාස කරයි.

ඒ අනුව මෙම ප්‍රහාරයට සම්බන්ධ සෙසු සැකකරුවන් හඳුනාගෙන අත්අඩංගුවට ගැනීමට හැකි වනු ඇතැයි පොලිසිය අපේක්ෂා කරයි.

ජීප් රියෙන් බැසි සැකකරු පාසල් සිසුන් භාවිතකරනු ලබන කළු පැහැති
බෑගයක් කරේ එල්ලාගෙන මුව ආවරණයක්ද එම අවස්ථාවේ දී පැළද සිට ඇත.

සාමාන්‍ය ඇඳුමකින් සැරසී සිටි ඔහු වැඩි කලබලයකින් තොරව ජිප්
රථයෙන් බැස මාර්ගය දිගේ ඇවිදගෙන ගොස් මාතර බලා යන මගී බස් රථයකට
ගොඩවී තිබේ. ඒ අතර ජිප් රථය කඹුරුපිටිය නගරය පසුකර ගමන්කර ඇත.

මෙම කරුණු හෙළිවී ඇත්තේ වෙඩික්කරුවන් ගමන් කළ ජිප් රථය පළාගිය
මඟ දෙපස වෙළඳ සැල් හා නිවාසවල ඇති ආරක්ෂක කැමරා රැසක්
පරීක්ෂාකරමින් කළ විමර්ශනයකදීය.

මාතර බස් රථයට ගොඩවුණු වෙඩික්කරු බස් රථයෙන් බසින ලද්දේ කුමන
ප්‍රදේශයකදීදැයි සොයා ද මේ වන විට විමර්ශනයක් ආරම්භකර ඇති අතර
ජිප් රථයේ ගමන් මඟද මේ වන විට ආරක්ෂක කැමරා 100කට වැඩි ප්‍රමාණයක්
පිරිස්සමින් සොයා බලමින් සිටින බව උසස් පොලිස් නිලධාරියෙක් සඳහන්
කළේය.

වෙඩික්කරුවන් ගමන් ගත් මෙම ජිප් රථය වෙඩි ප්‍රහාරයෙන් පසු
පළාගියේ කඹුරුපිටිය නගරය ඔස්සේ මෙන්ම රථය මෙම ප්‍රහාරයට සූදානමින්
වෙඩික්කරුවන්ද රැගෙන පැමිණ ඇත්තේ කඹුරුපිටිය දෙස සිට බව පෙනී ගොස්
තිබේ.

විමර්ශනයේදී පෙනී ගොස් ඇති අකාරයට අනුව වෙඩික්කරුවන් පැමිණි
ජිප් රථයයේ සිටි වෙඩික්කරුවන් සිය ඉලක්කය ලබාගැනීමට අධිවේගී
මාර්ගයේ අන්තර් හුවමාරුව ආසන්නයේ බොහෝ වේලාවක් තිස්සේ රැඳී සිට ඇත.

සමන් පෙරේරා ඇතුළු පිරිස අධිවේගී මාර්ගය ඔස්සේ පැමිණෙන විට
වෙඩික්කරුවන්ට කල්තියා තොරතුරු ලැබී ඇති බව විශ්වාස කරන විමර්ශන
නිලධාරීන් එසේ අපරාධකරුවන් අතර තොරතුරු හුවමාරුවීම් සිදුවී
තිබේදැයි තහවුරුකර ගැනීමට දුරකථන ජාල පරීක්ෂාවක්ද මේ වන විට
සිදුකරමින් පවතී. එසේම වෙඩික්කරුවන් රැගත් ජිප් රථය ගමන්කළ මාර්ග
මේ වන විට හඳුනාගෙන සිටින බැවින් දුරකථන ජාල විමර්ශනයට එය මහත්
පහසුවක් වී ඇති බව ද පොලිස් තොරතුරු සඳහන් කළේය. හඳුනාගෙන ඇති
ආකාරයට අනුව වෙඩික්කරුවන් පැමිණි වාහනයේ සටහන්ව තිබී ඇත්තේ 65-2615
අංකයයි. එම අංකය එම වාහනයේ සැබෑ අංකය නොවන බවත් වෙනත් වාහනයක අංකයක්
බවත් විමර්ශනයේදී අනාවරණය වී තිබේ.

ආරක්ෂක කැමරා මගින් හඳුනාගත් කඹුරුපිටියෙන් බැස මාතර බස්
රථයට ගොඩ වූ පුද්ගලයාගේ රුව කඹුරුපිටිය නගරයේ ඇති ආරක්ෂක කැමරා
කිහිපයකම සටහන්ව තිබී ඇත. ඒ ඔස්සේ ඔහුගේ මුහුණේ තරමක් පැහැදිලි
ඡායාරූපයක්ද මතුකර ගැනීමට හැකියාව ලැබී ඇත. එම ඡායාරූපය
ගුවන්තොටුපල ස්වයංක්‍රීය මුහුණු හඳුනා ගැනීමේ පද්ධතිය (AFRS) වෙත මේ
වන විටත් යොමුකර ඇති බව පොලිස් තොරතුරු සඳහන් කළේය.

මෙම පස් පුද්ගල ඝාතනය මෙහෙයවා ඇත්තේ ඩුබායි හී රැඳී සිටින ප්‍රබල
පාතාලයේ අපරාධකරුවෙක් මෙන්ම මත්කුඩු ජාවාරම්කරුවෙක් වන කොස්ගොඩ
සුජී නමැති අය බවට තොරතුරු මේ වන විට පොලිසිය හඳුනාගෙන ඇත. කුළී
ඝාතකයන් පිරිසක් යොදා ඔහු මෙම වෙඩි ප්‍රහාරය එල්ලකර ඇති බව පෙනී යන්නේ
යැයි විමර්ශන භාර උසස් නිලධාරියෙක් සඳහන් කළේය. කොස්ගොඩ සුජීගේ කුලී
ඝාතකයන් අතර හමුදාවලින් පළාගිය පිරිස්ද එල්.ටී.ටී.ඊ.යේ හිටපු
වෙඩික්කරුවන්ද සිටින බව එම නිලධාරියා කීය. මෙම ප්‍රහාරය එල්ලකර
ඇත්තේ මනාවට ගිනි අවි පුහුණුව ලැබූවෙක් බව පෙනී යන බව ද එම නිලධාරියා
වැඩිදුරටත් පැවසුවේය.

කොස්ගොඩ සුජී විසින් මෙම ප්‍රහාරය මෙහෙයවා ඇති බව අනාවරණය
වීමත් සමඟ වැඩ බලන පොලිස්පති දේශබන්දු තෙන්නකෝන් මහතා අපරාධ වාර්තා
කොට්ඨාසයේ අධ්‍යක්ෂවරයාට ඊයේ උපදෙස් ලබා දී ඇත්තේ කොස්ගොඩ සුජීගේ
අපරාධ හා මත්ද්‍රව්‍ය ජාලයට සම්බන්ධ සියලුම සහයකයන්ගේ ජාල ගත
වාර්තාවක් වහාම ලබාදෙන ලෙසය.

මෙම වෙඩි තැබීම සම්බන්ධයෙන් කෙරන විමර්ශන ප්‍රගතිය විමසා දකුණ
පළාත භාර ජ්‍යෙෂ්ඨ නියෝජ්‍ය පොලිස්පතිවරයා ඇතුළු උසස් නිලධාරීන්
පිරිසක් සමඟ වැඩබලන පොලිස්පති දේශබන්දු තෙන්නකෝන් මහතා ඊයේ (23)
උදෑසන මාර්ගගත ක්‍රමවේදය (Online) පැවැති විශේෂ සාකච්ඡාවේදී මෙම
උපදෙස් ලබා දී තිබේ. මෙම මාර්ගගත සාකච්ඡාවට විශේෂ කාර්ය බලකායේ
නියෝජ්‍ය පොලිස්පති, අපරාධ පරීක්ෂණ දෙපාර්තමේන්තුව භාර නියෝජ්‍ය
පොලිස්පති ඇතුළු උසස් පොලිස් නිලධාරීන් පිරිසක් සහභාගි වී ඇත.

ඝාතනය වූ සමන් පෙරේරාට එරෙහිව ඝාතන චෝදනා ඇති බවත් 2004
වර්ෂයේදී කොස්ගොඩ පොලිස් වසමේ දී කොස්ගොඩ සුජීගේ මාමා සහ සහෝදරයා
ඝාතනය කිරීම සම්බන්ධයෙන් ඔහුට චෝදනා එල්ලවී ඇති බවත් පොලිසිය කියයි.
2016 වර්ෂයේදී ගාල්ල පොලිස් වසමේ දී සුජීගේ ඥාතියකු ඝාතනය කිරීම
සම්බන්ධයෙන්ද සමන් පෙරේරාට චෝදනා එල්ලවී තිබී ඇත.

සමන් පෙරේරා ඉලක්කරගෙන කොස්ගොඩ සුජී විසින් 2018 වර්ෂයේ දී
ඉදුරුව ප්‍රදේශයේ දී ඔහු ගමන්කරමින් සිටි වාහනයට වෙඩි තබා තිබේ.
එහි දී ඔහු සමඟ සිටි විදේශකයකු බරපතළ තුවාල ලබා තිබුණි.

කොස්ගොඩ සුජී සහ සමන් පෙරේරා අතර දීර්ඝ කාලයක් තිස්සේ පැවැති
ආරවුලක ප්‍රතිඵලයක් නිසා බෙලිඅත්තේ ප්‍රහාරය සිදුව ඇති බව පෙනී ගොස්
තිබේ. දකුණ පළාත භාර ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතා
යටතේ විමර්ශන කණ්ඩායම් 06ක් පත් කර ඇති බව පොලිස් මාධ්‍ය ප්‍රකාශක
ජ්‍යෙෂ්ඨ පොලිස් අධිකාරී නීතීඥ නිහාල් තල්දූව මහතා සඳහන් කළේය. ඒ හැරුණු
කොට අපරාධ පරීක්ෂණ දෙපාර්තමේන්තුව, විශේෂ කාර්ය බලකාය, පොලිස්
විශේෂ කාර්යාංශය ඇතුළු විශේෂිත පොලිස් අංශ කිහිපයක්ම එම විමර්ශනයන්ට
සහාය ලබාදෙන බව සඳහන්ය.

මේ අතර ඝාතනය වූ පස්දෙනාගේ පශ්චාත් මරණ පරීක්ෂණ කටයුතු තංගල්ල රෝහලේ දී ඊයේ සවස සිදු කරන ලදී.

රථයේ රියදුරා ලෙස කටයුතු කළ රාජපක්ෂ නමැති අයගේ බෙල්ල
ප්‍රදේශයට වෙඩි වැදීමෙන් ඇතිවූ තුවාලයක් හේතුවෙන් අභ්‍යන්තර ලේ
වහනය නිසා ඔහුගේ මරණය සිදුවී ඇති බවත් සෙසු සිවු දෙනාගේ මරණ සිදුව
ඇත්තේ හිසට වෙඩි වැදීමෙන් මොලයට සිදුවූ හානි හේතුවෙන් බවත් තංගල්ල
රෝහලේ අධිකරණ වෛද්‍ය නිලධාරී ප්‍රසන්න සෙල්ලහේවා, අධිකරණ වෛද්‍ය
නිලධාරී ඒ, එස්, සෙනෙවිරත්න යන මහත්වරු විසින් සිදුකළ පශ්චාත් මරණ
පරීක්ෂණයේ දී අනාවරණය වී තිබේ.

හිසට අමතරව සිරුරේ ස්ථාන රැසකටද වෙඩි වැදීම් තිබී ඇතත් එම තුවාල මරණයට හේතුවී නැති බව සඳහන්ය.

(ගයාන් කුමාර වීරසිංහ/රක්ෂණ ශ්‍රියන්ත/රාහුල් සමන්ත හෙට්ටිආරච්චි)

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

24/01/2024

(වැඩි විස්තර හා ඡායාරූප සඳහා ක්ලික් කරන්න)

GOSSIP LANKA NEWS ශ්‍රී ලංකාවේ වැඩිම දෙනෙකු නරඹන සිංහල වෙබ් අඩවිය.

23/01/2024

සාර්ථක ශල්‍යකර්මයකින් පසු ප්‍රකට බොලිවුඩ් නළු සයිෆ් අලි ඛාන් මේ වන විට මුම්බායි හි කෝකිලාබෙන් රෝහලේ සුවය ලබමින් සිටින බව ඉන්දීය මාධ්‍ය වාර්තා කරයි. වාර්තාවන්ට අනුව බොලිවුඩ් නළු සයිෆ් අලි ඛාන් නුදුරේදී විකාශනය වීමට සුදානම්ව ඇති චිත්‍රපටයක් සඳහා ක්‍රියාදාම රංගනයක් සිදුකිරීම අතරතුර හටගත් අසනීප තත්වයක් මත රෝහල් ගත කොට ඇත.

ඉන් පසු ඔහුව මේ වන විට ට්‍රයිසෙප් සැත්කමකට භාජනය කර ඇත. උරහිස් තලයට සහ වැලමිට අස්ථියට ඉහළ අතේ පිටුපස පිහිටා ඇති ට්‍රයිසෙප්ස් මාංශ පේශි සම්බන්ධ කරන කණ්ඩරාවන්ට හානි වීම ඔහුට සිදුව තිබෙයි.

සයිෆ් මේ වන විට මුම්බායි හි කෝකිලාබෙන් රෝහලේ 'හොඳින් සුවය ලබමින් පසුවෙයි

ශල්‍යකර්මයෙන් පසු ඔහු පවසා ඇත්තේ මෙම තුවාලය සහ පසුව සිදු වූ ශල්‍යකර්මය ඔවුන් විසින් සිදුකරන ලදවිවිධ ක්‍රියාවන් හේතුවෙන් ඇතිවන බවත්,නමුත් ඒ සදහා ප්‍රතිකාර කල කාර්යමණ්ඩලයේ ආදරණිය බව තමා අගය කරන බවත්,මේ වෙනුවෙන් නොකඩවා තමන්ට ලැබෙන සුබ පැතුම් වලට ස්තුති වන්ත වන බවත් ය

වාර්තා වලට අනුව, සඳුදා උදෑසන රෝහලට පැමිණෙන විට ඔහුගේ බිරිඳ කරීනා කපූර් ඛාන්ද ඔහු අසලම සිට ඇත

සයිෆ් අලි ඛාන් අවසන් වරට රගපා ඇත්තේ ආදිපුරුෂ් චිත්‍රපටයේ ය

එයට ප්‍රභාස් සහ ක්‍රිටි සැනොන් ද රංගනයෙන් දායක වන අතර, චිත්‍රපටය අධ්‍යක්ෂණය කරන ලද්දේ Om Raut විසින් ය

අනාවැකි වල සදහන් වන ආකාරයට ඔහු මීළඟට Jr NTR සහ Janhvi Kapoor සමඟින් තෙළිඟු චිත්‍රපටියක් වන Devara හි ප්‍රේක්ෂකයන්ට දැකගත හැකිය.

දේවරා නිෂ්පාදකයින් විසින් චිත්‍රපටයේ පූර්ව ප්‍රචාරක පටය මෑතකදී නිකුත් කරන ලද අතර, ජූනියර් NTR ගේ avatarය ප්‍රේක්ෂක සිත් අද බැද තබා ඇත

ඔහු රංගනයෙන් දායකත්වය සපයන ඉදිරියේදී තිරගත වීමට නියමිත චිත්‍රපටය ,අධ්‍යක්ෂණය කරන්නේ Koratala Siva විසින් බව සදහන් වේ

එයටද බොහෝ ප්‍රේක්ෂක ප්‍රතිචාර ලැබෙනු ඇති බැව්නම් අවිවාදාත්මකය

(වැඩි විස්තර හා ඡායාරූප සඳහා ක්ලික් කරන්න)