10/12/2024
මම අතීතයේ එක් යුගයකදී දිගටම පොත් පරිවර්තනය කළෙමි. එහෙත් කුමක් හෝ හේතුවක් නිසා පරිවර්තන කාර්යයට මා තුළ වූ උද්යෝගය හීන වී ගියේය. කාලයකට පසුව නැවතත් පරිවර්තන කෘතියක් ලිවිය යුතුයයි අදහස මා තුළ පිළිසිඳිණි. ඉදින් ඔක්තෝබර් 25 දා මම මෙය ලියන්නට ඇරඹුවෙමි. මා අද මේ විඳිමින් සිටින්නේ එය ලියා අවසන් කිරීමේ තෘප්තියයි.
මා සාමාන්‍යයෙන් පරිගණකයෙන් මිස අතින් ලියන්නේ නැත. එහෙත් මෙය අතින්ම ලිවිය යුතුයයි මගේ සිත මට කීවේය. පිටු අසූවේ පොත් නවයක් පුරා පෑන් දහයක් පමණ අවසන් වන තුරුම මා ලීවේ ඒ අනුවය. අත බොහෝ රිදුම් දුන්නත්, ස්වතන්ත්‍ර නවකතාවක් ලිවීම මඟ හැරී ගියත් මෙය ලියා අවසන් වන තුරුම මම මගේ අදිටන බිඳ නොගතිමි. මා එසේය. යමක් කළ යුතුයයි අදිටන සිතට කා වැදුණොත් කෙසේ හෝ එය කර අවසන් වන තුරුම මම එහි එල්බගෙන ඉන්නෙමි. ඉතින් අද මගේ සිත ප්‍රීතියෙන් සහ සැහැල්ලුවෙන් පිරී ඇති මේ මොහොතේ
හැමදාමත් මට දිරිය ශක්තිය ලබා දෙන ආදරණීය ඔබ සැමට ස්තුති කරමි.
පරිවර්තන සාහිත්‍යය කෙරෙහි මා සිත යොමු කරවූ අර්නස්ට් වඩුගේ මහතා, කුමාර සිරිවර්ධන මහතා ඇතුළු හැම දෙනාටමත් ස්තුතියි .
-චන්දි කොඩිකාර-
