Sashrika

Sashrika We are thrilled to share our knowledge, discoveries, and innovations with you through this platform.
(1)

🌱Welcome to the official page of "Sashrika Magazine"! 📚

We are the faculty of agricultural sciences at Sabaragamuwa University, Sri Lanka, and we are thrilled to share our knowledge, discoveries, and innovations with you through this platform. Join us on our journey as we bridge the gap between academia and society, bringing the latest insights and advancements in agriculture to f

armers, enthusiasts, and the wider community. From groundbreaking research to sustainable practices, we aim to empower and inspire positive change in the agricultural landscape. Stay tuned for engaging articles, informative updates, and exciting events related to agriculture, farming, and rural development. Connect with us to be a part of our mission to transfer knowledge and contribute to a more sustainable future. Follow our page and explore the fascinating world of agriculture with "Sashrika Magazine"!

08/01/2025

🌱 *"සශ්‍රීක සඟරාව 2025 – පීඩිත මනසට නව අරුතක් !"* 🌱

🔬 ශ්‍රී ලංකා සබරගමුව විශ්වවිද්‍යාලයේ කෘෂි විද්‍යා පීඨයේ මෙවර *සශ්‍රීක සඟරාව 2025* සඳහා ඔබගේ නිර්මාණශීලී අදහස් වලට අනගි අවස්ථාවක් . 🌾

💡 ඔබගේ නවතම ගවේෂණ, අධ්‍යාපනික හා නිදහස් චින්තනික අදහස් වලට නවමු වටිනාකමක් එක් කිරීමට කෘෂි විද්‍යා පීඨ ශිෂ්‍ය සංගමය විසින් ඉදිරිපත් කරන *"සශ්‍රීක"* සඟරාවෙහි, තෙවන කලාපය සඳහා නවමු ලිපි කැඳවීම ආරම්භ කර ඇත.

🗓️ *ලිපි භාර ගැනීමේ අවසන් දිනය* :- _2025/01/14

👉 *සබැඳිය*:- https://forms.gle/HV5zSVWp4ZtzMMPa6
(ඉහත සඳහන් සබැඳිය ඔස්සේ Word Document ගොනු එවීම වඩා සුදුසුවේ)

🔗*Facebook* :-https://www.facebook.com/sashrikamagazine?mibextid=wwXIfr&mibextid=wwXIfr

26/12/2024

🌱 *"සශ්‍රීක සඟරාව 2025 – පීඩිත මනසට නව අරුතක් !"* 🌱

🔬 ශ්‍රී ලංකා සබරගමුව විශ්වවිද්‍යාලයේ කෘෂි විද්‍යා පීඨයේ මෙවර *සශ්‍රීක සඟරාව 2025* සඳහා ඔබගේ නිර්මාණශීලී අදහස් වලට අනගි අවස්ථාවක් . 🌾

💡 ඔබගේ නවතම ගවේෂණ, අධ්‍යාපනික හා නිදහස් චින්තනික අදහස් වලට නවමු වටිනාකමක් එක් කිරීමට කෘෂි විද්‍යා පීඨ ශිෂ්‍ය සංගමය විසින් ඉදිරිපත් කරන *"සශ්‍රීක"* සඟරාවෙහි, තෙවන කලාපය සඳහා නවමු ලිපි කැඳවීම ආරම්භ කර ඇත.

🗓️ *ලිපි භාර ගැනීමේ අවසන් දිනය* :- _2025/01/06_

👉 *සබැඳිය*:- https://forms.gle/HV5zSVWp4ZtzMMPa6
(ඉහත සඳහන් සබැඳිය ඔස්සේ Word Document ගොනු එවීම වඩා සුදුසුවේ)

🔗*Facebook* :-https://www.facebook.com/sashrikamagazine?mibextid=wwXIfr&mibextid=wwXIfr

25/10/2023

ඔබත් කෘෂිකාර්මික ක්ෂේත්‍රය ඔස්සේ දැනුම සොයා යන්නෙකු නම් මේ අවස්ථාව ඔබට යි.

කෘෂි විද්‍යා පීඨ ශිෂ්‍ය සංගමය විසින් ඉදිරිපත් කරන "සශ්‍රීක" ත්‍රෛමාසික සඟරාවෙහි, තෙවන කලාපය සඳහා නවමු ලිපි කැඳවීම ආරම්භ කර ඇත.

පහත නිර්ණායකයන් යටතේ වන ඔබගේ ලිපි නොවැම්බර් මස 06 වන දිනට ප්‍රථම අප වෙත යොමු කරන්න.

17/10/2023

ජෛව සොරකම, ජෛව මංකොල්ලය සහ ශ්‍රී ලංකාව

ශ්‍රී ලංකාව, ලොව ජෛව විවිධත්වය අතින් කැපී පෙනෙන ස්ථානයක් උසුලන දකුණු ආසියාතික නිවර්තන කලාපීය රටකි. දිවයිනේ හමුවන ශාක විශේෂ අතුරින් 23% ක් සහ සත්ත්ව විශේෂ අතුරින් 16% ක් පමණ ශ්‍රී ලංකාවට ආවේණික විශේෂ වේ. එපමණක් නොව, මෙරට තුල ඖෂධීය ශාක විශේෂ 1432 ක් පමණ හඳුනාගෙන ඇත. එබැවින් වර්තමානය වන විට ශ්‍රී ලංකාව ලොව හොඳම ජෛව විවිධත්වය පවතින කලාප 34 තුලට අන්තර්ගතව ඇත. තවද ආසියාතික රටවල් අතුරින් භෞමික පාරිසරික ඒකක සඳහා ඉහළම ජෛව විවිධත්වයක් පවතින රට වන්නේ ද ශ්‍රී ලංකාවයි.
මේ ආකාරයෙන් ඉහල ජෛව විවිධත්වයක් පවතින රටවල් කෙරෙහි ලොව සංවර්ධිත රටවල අවධානය නිරන්තරයෙන් යොමු ව පවතී. සංවර්ධිත රටවල විශාල පර්යේෂණාගාර හා සමාගම්, වර්තමානය වන විට ජෛව නිෂ්පාදන සදහා වඩාත් නැඹුරුව ඇත. මෙම බහුජාතික සමාගම් ජීවී ජාන අමුද්‍රව්‍ය ලෙස භාවිතා කරන අතර "ජීන් රෂ්" නම් සංකල්පය මගින් ජාන අවභාවිතයට මඟ පාදාගෙන තිබේ. "ජීන් රෂ්" යනු ජීවී ජීවීන්ගෙන් නිශ්චිත ජාන ලබාගෙන ඒවා නිස්සාරණය කිරීමයි. මෙය ලාභය අරමුණු කරගෙන සිදුකරන අතර ඒ සඳහා ජානමය සම්පත් සෙවීම මෙම සමාගම් වල ප්‍රධාන අරමුණයි. නීතිවිරෝධී ලෙස ජෛව මංකොල්ලකෑම් සහ ජෛව සොරකම් පිළිබදව නිරතුරුවම ලොව විවිධ රටවල් වලින් අසන්නට ලැබෙන්නේ මේ නිසාවෙනි.
"ජෛව සොරකමක් යනු ශ්‍රී ලංකාවේ හමුවන ශාක හෝ සතුන් හෝ ශාක හා සත්ත්ව කොටස් නීති විරෝධීව රටින් පිටතට ගෙනයාම හෝ ගෙනයාමට උත්සාහ කිරීමයි"
"ජෛව මංකොල්ලයක් යනු ශ්‍රී ලංකාවේ හමුවන ජීවීන්ගේ හෝ ඔවුන්ගේ කොටස් ආශ්‍රිතව සිදුකල නිෂ්පාදන, නිස්සාරණ, හෝ ඔවුන්ගෙන් ලබා ගන්නා ප්‍රවේණික ද්‍රව්‍ය හා ජෛව රසායනික ද්‍රව්‍ය භාවිතයට මෙරට සතු අයිතිවාසිකම් අහිමි කිරීම, සීමා කිරීම හෝ බාධා වන අන්දමට, වෙනත් රටක පවත්නා බුද්ධිමය දේපල හා නීති උපයෝගී කරගැනීමයි"
(නීතීඥ ජගත් ගුණවර්ධන)

ජෛව සොරකම හා ජෛව මංකොල්ලය එකිනෙක හා බැදී පවතින ක්‍රියාදාම දෙකකි. ප්‍රථමයෙන්ම ජෛව සොරකම මඟින් ජීවියා හෝ ජිවී කොටස් රටින් පිටතට ගෙන යනු ලබන අතර, පසුව ජෛව මංකොල්ලය මඟින් එම රට තුල පවතින බුද්ධිමය දේපල භාවිතයෙන් ජෛව සොරකම ආවරණය කරනු ලබයි.
ශ්‍රී ලංකාව පිළිබද සලකා බලන කල්හි, මෙරට පවතින ශාක, සතුන් හා පටක කොටස් නීති විරෝධීව අපනයන කිරීම කලක පටන් සිදුවන සංසිද්ධියකි. අප දිවයින ජෛව විවිධත්වය අතින් ඉතා පොහොසත් බැවින් සංවර්ධිත රටවලින් සහ බහු ජාතික සමාගම් වලින් රටට ආවේණික වෘක්ෂලතා සහ සත්ත්ව විශේෂ ආරක්ෂා කරගැනීමට ශ්‍රී ලංකාවට දැඩි පරිශ්‍රමයක් දැරීමට සිදුව ඇත.
මෙලෙස දේශීය ශාක හා සත්ත්ව විශේෂ ශ්‍රී ලංකාවෙන් පිටතට ගෙන ගොස් විදේශීය සමාගම් විසින් ඒවාට පේටන්ට් බලපත්‍ර රාශියක් ලබාගෙන තිබේ. ප්‍රධාන වශයෙන්ම මෙරට වල්ලපට්ටා, සුදු හදුන්, අරළු, බුලු වැනි ඖෂධීය ශාක විශේෂ මෙන්ම, මත්ස්‍ය විශේෂ, පක්ෂි විශේෂ සහ තාරකා ඉබ්බන්, දිවි මකුළු විශේෂ සහ සමනල් විශේෂ ද ජෛව සොරකමේ ගොදුරු බවට පත්ව ඇත.

මෑතකදී මෙරට වාර්තා වූ මේ ආශ්‍රිත සිදුවීම් කීපයකි.

1. 2016 වසරේ දී සිංහරාජ රක්ෂිතයෙන් පර්ණාංග (මී වන) ශාක කොටස් එකතු කරමින් සිටියදී, ජර්මන් ජාතිකයන් කණ්ඩායමක් අත්අඩංගුවට ගන්නා ලදී.

2. 2020 වසරේදී හෝර්ටන් තැන්න වන රක්ෂිතයේ දී ශ්‍රී ලංකාවේ විවිධ ප්‍රදේශ වලින් එකතු කරගත් ශාක නියැදි 529 ක් සමග රුසියන් ජාතිකයන් තිදෙනෙකු අත්අඩංගුවට ගන්නා ලදී.

මීට අමතරව වාර්තා නොවන මුත්, බොහෝ අනවසර ජෛව අපනයනයන් දිවයිනේ සිදුවන බැව් නොරහසකි.
දේශපාලන වශයෙන් ශ්‍රි ලංකාවේ සිදුවන ජෛව සොරකම් හා මංකොල්ලකෑම් වලට එරෙහිව නීති හෝ ක්‍රියාමාර්ග ගෙන ඇත්තේ ඉතා සුළුවෙනි. මෙරට ජෛව නිෂ්පාදන නීතිවිරෝධී ලෙස පිටතට ගෙනයාම හා පේටන්ට් බලපත්‍ර ලබාගැනීම බහුතරව සිදු වූවත් ශ්‍රී ලාංකික පාලන අධිකාරිය ඇස් වසා සිටින බැව් පෙනී යයි. වෙනත් බොහෝ රටවල් මෙම නීතිවිරෝධී ක්‍රියා වලට එරෙහිව නැගී සිටියත් මෙරටට ඒ සදහා නැගී සිටීමට කිසිදු උනන්දුවක් නොමැත.
මෙයට ප්‍රධානම හේතුව වන්නේ, ශ්‍රී ලාංකික මහජනතාව තුළ මෙරට ජීව විද්‍යාත්මක වත්කම් වල වටිනාකම පිළිබදව ඇති නොදැනුවත්භාවයයි.
මෙරට සිදුවන ජෛව සොරකම් සහ මංකොල්ලකෑම් වලට එරෙහිව නැගී සිටිමට නම් ප්‍රථමයෙන්ම මේ සම්බන්ධව මහජනතාව අතර උනන්දුවක් ඇති කිරීම හා ලාංකික සම්පත් පිළිබදව මනා අවබෝධයක් ලබා දීම කල යුතුය. තවද, වන සත්ත්ව හා වෘක්ෂ ලතා ආරක්‍ෂා කිරීමේ ආඥා පනත, වන සංරක්‍ෂණ ආඥා පනත, ධීවර හා ජලජ සම්පත් පනත යන පනත් ඉතා ඉහල මට්ටමින් ක්‍රියාත්මක කිරීම ද කල යුතුය. අපනයන සිදුකරන ගුවන් තොටුපළ හා වරායවල් ආශ්‍රිතව දැඩි නීතී හා ආරක්ෂක ක්‍රියාමාර්ග පැනවීම ද ඉතා වැදගත්‍ ය. එසේම මෙරටදී ජෛව මංකොල්ලකෑම් සඳහා සහයෝගය දක්වන පිරිස් සොයා නීතිය ක්‍රියාත්මක විය යුතුය. තවත් විශේෂ ක්‍රියාමාර්ගයක් වන්නේ විදේශ රටවල් මඟින් ශ්‍රී ලංකාවේ දැනටමත් සිදුකර ඇති ජෛව සොරකම් හා මංකොල්ලකෑම් පිළිබඳ සොයා බලා එම ජෛව කොටස් මෙරටට ගෙන්වා ගැනීමට රාජ්‍ය මට්ටමින් කටයුතු කිරීමයි.
රටක් වශයෙන් ශ්‍රී ලාංකික ජෛව සම්පත් ආරක්ෂා කරගැනීම වත්මන් පරපුරට මෙන්ම අනාගත පරපුර වෙනුවෙන් සිදුකරන මහත් ආයෝජනයකි. එබැවින් මෙරට සිදුවන ජෛව සොරකම් හා ජෛව මංකොල්ලකෑම් පිළිබද නිරන්තර විමසිලිමත්භාවය ඉතා වැදගත් ය.

වයි.ඒ.හෂිනි අනූපමා

03/10/2023

ආදාහනය කළ කිරි මාෆියාවෙන් දැන්වත් ගැලවෙමු ද...?

නැවුම් එළකිරි යනු බොහෝ පෝෂක ප්‍රමාණයකින් සහ සෞඛ්‍ය සම්පන්න බවින් අනූන ස්වාභාවික පානයක් ලෙස අපට හැදින්විය හැකිය. මෙනිසාම මෙම නැවුම් එළකිරි ලොව පුරා සිටින මිනිසුන් විසින් පානය කරන ප්‍රධාන පාන වර්ග යටතට අයත් වේ. තවද එළකිරි අපගේ දෛනික ආහාර වේලෙහි අත්‍යවශ්‍ය අංගයක් බවට මේ වන විට පත් ව ඇත.

නැවුම් එළකිරිවල අඩංගු පෝෂක ප්‍රමාණය:
ජලය - 87%
සම්පූර්ණ ඝන ද්‍රව්‍ය - 13%
මේද නොවන ඝන ද්‍රව්‍ය - 8.9%
මේදය - 3.4%
ප්‍රෝටීන් - 3.3%
ලැක්ටෝස් - 4.8%
කැල්සියම් - 0.12%
පොස්පරස් - 0.09%
යකඩ - 0.2%
විටමින් A (IU/100g) - 180
විටමින් B12 (mg/100g) - 0.05
රයිබොෆ්ලේවින් (mg/100g) - 0.2
විටමින් C (mg/100g) - 1.6

අප පිටි කිරි වෙනුවට නැවුම් එළකිරි පරිභෝජනය කල යුත්තේ ඇයි...?

1. වෙනස් නොකළ පෝෂණ සංයුතිය:

නැවුම් එළකිරි යනු ප්‍රෝටීන්, කැල්සියම්, විටමින් සහ ඛනිජ ඇතුළු අත්‍යවශ්‍ය පෝෂ්‍ය පදාර්ථවලින් අනූන ස්වාභාවික පානයකි. සාමාන්‍යයෙන් එළකිරිවල පෝෂණ සංයුතිය නොවෙනස්ව පවතී. මන්ද දෙනුන්ගෙන් දොවාගන්නා එළකිරි එහි ස්වභාවික තත්වයෙන්ම පරිභෝජනය කරන බැවිනි. නමුත් පිටි කිරි සැකසීමට ලක් වන අතර, තාප පිරියම් කිරීම සහ වියළීමේ ක්‍රියාවලීන්හි දී සියලූ ම පෝෂක පාහේ හානි විය හැක. තවත් විශේෂ කරුණක් වන්නේ පෝෂණ ගුණය අතින් අනූන නැවුම් එළකිරි පානය නිසා අපට අවශ්‍ය පෝෂ්‍ය පදාර්ථ ඒවායේ ස්වභාවික ස්වරූපයෙන් ලබා ගැනීමට හැකිවීමයි.

2. ප්‍රශස්ත පෝෂණ අගය:

නැවුම් එළකිරි, පිටි කිරිවලට සාපේක්ෂ ව ඉහළ පෝෂණ අගයක් ගනී. නැවුම් එළකිරිවල ඇති ප්‍රෝටීන පහසුවෙන් ජීර්ණය කළ හැකි අතර මිනිස් සිරුරට අවශ්‍ය සියලු ම ඇමයිනෝ අම්ල සපයයි. මෙම ප්‍රෝටීන මාංශ පේශි වර්ධනයට හා පවත්වාගෙන යාම සදහා දායක වේ. නමුත් කිරිපිටි සැකසීමේ දී ප්‍රෝටීනවල ජීව විද්‍යාත්මක අගය විනාශ වී යාමට හැකි ය. මීට අමතර ව, නැවුම් එළකිරිවල කැල්සියම් වැනි පෝෂ්‍ය පදාර්ථවල ස්වාභාවික ජෛව උපයෝගීතාව ශරීරයට ප්‍රශස්ත මට්ටමින් පවතී. මෙනිසා පහසුවෙන් ශරීරයට අවශෝෂණය කරගත හැකි වේ.

3. ස්වාභාවික නැවුම් රසය:

නැවුම් එළකිරි, පිටි කිරිවලින් අසමසම වූ පොහොසත් සහ ක්‍රීම් රසයක් ලබා දෙයි. කිරි පිටි නිෂ්පාදනය කිරීමේ දී සැකසීම සහ විජලනය වීම නිසා එහි රසය වෙනස් වීමක් සිදු වන අතර මෙනිසා පාරිභෝගිකයාට අඩු තෘප්තියක් ලැබේ. නැවුම් එළකිරිවල නැවුම් බව සහ ස්වභාවික පැණි රස ප්‍රියජනක අත්දැකීමක් නිර්මාණය කරයි. එය සෑම වයස් කාණ්ඩයක ම පුද්ගලයන් සඳහා වඩාත් ප්‍රියජනක බවක් ඇති කරයි.

4. සෞඛ්‍ය ප්‍රතිලාභ:

නැවුම් එළකිරි සෞඛ්‍ය ප්‍රතිලාභ රාශියක් සපයන බව දන්නා කරුණකි. එහි ඉහළ කැල්සියම් අන්තර්ගතය අස්ථි හා දත් ශක්තිමත් කිරීමට සහාය වන අතර ඔස්ටියෝපොරෝසිස් සහ දන්ත ගැටළු ඇතිවීමේ අවදානම ද අඩු කරයි. නැවුම් එළකිරිවල ඇති විටමින් D, විටමින් A, පොස්පරස් සහ පොටෑසියම් වැනි ස්වභාවික ව ඇති විටමින් සහ ඛනිජ ලවණ ප්‍රතිශක්තිකරණ ක්‍රියාකාරිත්වය වැඩි දියුණු කිරීමට සහ ඇතැම් පිළිකා වර්ග වල අවදානම අඩු කිරීමට දායක වේ. පිටි කිරි ද පෝෂණ ප්‍රභවයකි. නමුත් සෞඛ්‍ය ප්‍රතිලාභ රැසක් ලබා දෙන නැවුම් එළකිරිවල ඇති සමහර ජෛව ක්‍රියාකාරී සංරචක සහ එන්සයිම පිටි කළ කිරිවල අන්තර්ගත නොවේ.

5. විශ්වාසදායක තත්ත්වය සහ ආරක්ෂාව:

නැවුම් එළකිරි නිශ්පාදනයේ දී ඉතා අඩු සැකසුම් පියවර ප්‍රමාණයකින් වෙළඳපොළට ඉදිරිපත් කළ හැකි ය. මෙනිසා නැවුම් එළකිරිවලට හානි වීමට ඇති හැකියාව අඩු ය. එළකිරි සඳහා වන සැපයුම් දාමය එහි අඛණ්ඩතාව සහ නැවුම් බව පවත්වා ගැනීම සඳහා කිරි ගොවිපලේ සිට සිල්ලර වෙළෙන්දා දක්වා සමීප ව නිරීක්ෂණය කරනු ලැබේ. ඊට ප්‍රතිවිරුද්ධ ව, කිරිපිටි නිෂ්පාදන ක්‍රියාවලිය සැකසුම් පියවර රාශියකින් සමන්විත අතර, මෙහිදී හානි වීමේ හැකියාව වැඩි ය. ප්‍රධාන වශයෙන් ගබඩා කිරීමේ දී තත්ත්ව පාලනය සම්බන්ධයෙන් අභියෝගවලට මුහුණ දිය හැකි ය.

6. ආර්ථික ව ලාභදායී වීම:

පිටි කළ කිරි නිෂ්පාදන වැඩි සැකසුම් පියවර ගණනකින් සමන්විත වන බැවින් එය මිලෙන් අධික වේ. තව ද ඇසුරුම් සහ ප්‍රවාහනය සඳහා යන වියදම් ද පාරිභෝගිකයාට ගෙවීමට සිදු වේ. නමුත් නැවුම් එළකිරි ඉතා අඩු සැකසුම් පියවර ප්‍රමාණයකින් පාරිභෝගිකයා වෙත ළඟා කළ හැකි ය. තව ද ඇසුරුම් සහ ප්‍රවාහනය සඳහා ද යන වියදම අවම ය. මෙනිසා පිටිකිරි පරිභෝජනයට වඩා නැවුම් එළකිරි පරිභෝජනයෙන් ආර්ථික වාසියක් ලබාගත හැකි ය.
නැවුම් එළකිරි හා සසදනවිට පිටිකල කිරි අධික තාප පිරියමකට ලක් කිරීම නිසා එහි අන්තර්ගතය ප්‍රෝටීන, මේදය සහ ඇතැම් විටමින හානි වීමකට ලක්වේ. උදාහරණයක් ලෙස පිටිකල කිරි වල විටමින් C සහ ඇතැම් විටමින් B වර්ග සාපේක්ෂව අඩු අගයක් ගනී. තවද පිටිකල කිරි වල නැවුම් එළකිරි වල රසයට හාත්පසින්ම වෙනස් වූ කෘතිම රසයක් ඇත.
මෙවැනි හේතූන් රාශියක් නිසා පිටිකල කිරි වලට සාපේක්ෂව නැවුම් එළකිරි පානය වඩා ගුණදායක වේ.
ඔබ පෝෂ්‍ය පදාර්ථ වලින් පරිපූර්ණ ස්වාභාවික එළකිරි පරිභෝජනය කරනවා ද...?
එසේත් නොමැති නම් අදික තාපයට ලක්වීම නිසා ආදාහනයට පත්වුනු පිටි කළ කිරි පරිභෝජනය කරනවා ද...?
තීරණය ඔබ සතුය...!

ඩී.කේ.එන්.ගමගේ
පශු සම්පත් නිෂ්පාදන අධ්‍යනාංශය
කෘෂි විද්‍යා පීඨය
ශ්‍රී ලංකා සබරගමුව විශ්වවිද්‍යාලය.

23/09/2023

වාණිජ බඩඉරිඟු වගාව

කෘෂිකාර්මික ආර්ථිකයක් මත යැපෙන ශ්‍රී ලංකාවේ වගා කරන ප්‍රධානම බෝගයක් ලෙස බඩඉරිඟු හැඳින්විය හැකිය. ප්‍රධාන වශයෙන් වර්ෂා ජලයෙන් වගා කරන මෙම බෝගය තනි වගාවක් ලෙස හෝ මිශ්‍ර බෝග වගාවක් ලෙස ප්‍රධාන වශයෙන් වගා පද්ධතියට දායක වේ. මූලිකවම වියළි කලාපීය බෝගයක් ලෙස හඳුනාගත්තත් බඩඉරිඟු බෝගය උඩරට භෝග වගාවන්වල ද මූලික තැනක් උසුලයි. එසේම ශ්‍රී ලංකාවට ආවේණික වගා ක්‍රමයක් වන හේන් ගොවිතැනේ දී යොදාගන්නා ප්‍රධාන බෝගයක් ලෙස ද බඩඉරිඟු හැඳින්විය හැකිය.
ග්‍රාමීය වශයෙන් බඩඉරිඟු පරිභෝජනය ඉහළ ප්‍රතිශතයක් ගන්නා අතර කරල් සහ පිටි ලෙස බඩඉරිඟු පරිභෝජනයට එක් වේ. මිනිස් පරිභෝජනයට අමතරව ප්‍රධාන වශයෙන් සත්ත්ව ආහාර නිෂ්පාදනයට බඩඉරිඟු යොදාගන්නා අතර ශ්‍රී ලංකාවේ නිෂ්පාදනය කරන බඩඉරිඟු වලින් 25% පමණ ප්‍රතිශතයක් යොදා ගන්නේ සත්ත්ව ආහාර නිෂ්පාදන අමුද්‍රව්‍යයක් ලෙසයි.

වාණිජ බඩඉරිඟු වගාව තුළින් රටේ සමස්ත කෘෂි ආර්ථිකයට කැපී පෙනෙන දායකත්වයක් දැක්විය හැකි වූව ද ශ්‍රී ලංකාව තුළ බඩඉරිඟු වගාවේ දී යොදාගන්න තාක්ෂණය ඉතා අල්පය. ඒ අතර අවම යෙදවුම් (පොහොර) ප්‍රමාණයක් යොදා ගැනීම, එක් ප්‍රභේදයක් පමණක් භාවිතා නොකිරීම, දුර්වල ශෂ්‍ය විද්‍යාත්මක කටයුතු සහ පසු කළමනාකරණය කටයුතුවලට අවධානය යොමු නොකිරීම මූලික තැනක් ගනියි. එම හේතුන් නිසා බඩඉරිඟු සඳහා හොඳ වෙළඳපලක් සහ ඉහළ වෙළඳපොල වටිනාකමක් ලබා ගැනීමට ඇති ඉඩහසර අවහිර වී ඇත. මෙම ගැටළු හා වැරදි පිළිවෙත් මඟහරවා ගැනීම තුළින් ඉහළ ආදායමක් ලබා ගත හැකි බෝගයක් ලෙස බඩඉරිඟු හඳුනාගෙන ඇති අතර මෙම බෝගය පිළිබඳව ගොවියාගේ ඇති දැනුම, අවබෝධය, පාරිසරික තත්ත්ව පිළිබඳව ඇති දැනුවත්භාවය ඉහළ නැංවීම මගින් බඩඉරිඟු බෝගයෙන් උපරිම අස්වැන්නක් ලබා ගැනීමට හැකිවේ.

ශ්‍රී ලංකාවේ ඕනෑ ම ප්‍රදේශයක වගා කළ හැකි බෝගයක් වන බඩඉරිඟු වර්තමානය වන විට ප්‍රධාන වශයෙන් අනුරාධපුර, අම්පාර, බදුල්ල, මොණරාගල, මාතලේ සහ මඩකලපුව යන ප්‍රදේශවල වගා කරයි.

පුළුල් වපසරියක වගා කළ හැකි වූවත්, වාණිජ වගාවන් සඳහා වඩාත් උචිත වන්නේ අතරමැදි කලාපය සහ වියළි කලාපයයි. හිරුඑළියට වැඩි කැමැත්තක් දක්වන බඩඉරිඟු බෝගය 25 – 30 0C උෂ්ණත්ව පරාසයේ දී වැඩි වර්ධන වේගයක් පෙන්වයි. වර්ෂාපතන ව්‍යාප්තිය බඩඉරිඟු බෝගයේ වර්ධනයට ඉතා වැදගත් වන අතර වාර්ෂික වර්ෂාපතන පරාසය 600 – 1000 mm වීම උචිත වේ. අධික ආම්ලික හා අධික භාෂ්මික පස බඩඉරිඟු බෝගයේ වර්ධනයට අහිතකරව බලපාන අතර 5.8 – 7.0 pH පරාසය ප්‍රශස්ත වර්ධනයක් පෙන්වයි. බඩඉරිඟු බෝගයේ යහපත් වර්ධනයට වාස භූමියේ මනා ජලවහන තත්ත්වයක් තිබීම වැදගත් වේ. ප්‍රධාන වශයෙන් වර්ෂාපෝෂිතව මහ කන්නයේ වගා කරන අතර ජල සම්පාදනය මගින් ඕනෑ ම කන්නයක වගා කළ හැක.

වර්තමානයේ ගොවීන් අතර ප්‍රචලිත බඩඉරිඟු ප්‍රධාන ආකාර 02 කි. එනම්, විවෘත පරාගික ප්‍රභේද සහ දෙමුහුම් ප්‍රභේදයි. භද්‍රා සහ රුවන් බහුලව භාවිතා වන විවෘත පරාගික ප්‍රභේද වන අතර, එම්. අයි. වේස් හයිබ්‍රිඩ් 01, එම්. අයි. වේස් හයිබ්‍රිඩ් 02, එම්. අයි. වේස් හයිබ්‍රිඩ් 03, එම්. අයි. වේස් හයිබ්‍රිඩ් 04, එම්. අයි. වේස් හයිබ්‍රිඩ් 05 බහුලව ශ්‍රී ලංකාව තුළ භාවිතා වන දෙමුහුම් ප්‍රභේදයි.

හෙක්ටයාරයක භූමි ප්‍රමාණයක් සඳහා බීජ 12 – 15 kg අවශ්‍ය වන අතර 60 x 30 cm පරතර (වලකට බීජ 01 බැඟින්) හෝ 60 x 60 cm (වලකට බීජ 02 බැඟින්) බීජ සිටුවයි. බඩඉරිඟු වගාවෙන් ඉහළ අස්වැන්නක් ලබා ගැනීම සඳහා වල්පැළ පාලනය, නියමිත පරිදි පෝෂක ලබා දීම, මනා ජල කළමනාකරණය සහ රෝග පළිබෝධ පාලනය අනිවාර්ය වේ.

බඩඉරිඟු බෝගයේ මූලික අවශ්‍යතාවලට අමතරව විවිධ ක්‍රම මගින් අස්වැන්න හා ඵලදායිතාව වැඩිකරගත හැකිය. ඒවා අතර පහත සඳහන් කරුණු පිළිබඳ අවධානය යොමුකිරීම මගින් ගොවියාට බඩඉරිඟු වගාවෙන් වැඩි වාසි අත්කරගත හැකිවේ.

• කාර්යක්ෂමව වර්ෂා ජලය භාවිත කිරීම සඳහා වර්ෂාවේ ආරම්භයත් සමඟ බිම් සැකසීම
• ජල වහනය දුර්වල භූමිවල උස් වූ පාත්ති යොදාගැනීම (බීජ සංස්ථාපනය සඳහා ඇලි වැටි ක්‍රමය හෝ වලවල් ක්‍රමය යොදා ගත හැක.)
• බඩඉරිඟු බීජ සිටුවීමෙන් පසු සන්හෙන්ප් බීජ හෙක්ටයාරයකට 50kg වනසේ ක්ෂේත්‍රයේ වපුරා එම පැළ වර්ධනය වන විට (සති 03ක් පමණ) උදලු ගා වසුනක් ලෙස යෙදීම.
• පෝෂක අපතේ යාම වළක්වාගැනිමට සහ උපරිම පොහොර කාර්යක්ෂමතාවයක් ලබාගැනීම සඳහා පොස්පරස් හා පොටෑසියම් පොහොර පාංශු පරික්ෂාවකින් පසුව යෙදීම.
• බීජ සිටුවන අවස්ථාවේ සිට කරල්වලට කිරි වදින තුරු නිසි ලෙස ජල සම්පාදනය සිදු කිරීම.
• බඩඉරිඟු සිටුවීමට මාස 1 ½ පමණ පෙර එළවළු හෝ කවුපි (අතරමැදි භෝගයක් ලෙස) සිටුවා දින 45 දී අස්වැන්න නෙලාගන්නා අතර ඉන් පසුව සී සා එම පැළ පසට එකතු කර බඩඉරිඟු සිටුවීමෙන් යූරියා පොහොර අවශ්‍යතාව 15% ක් අඩු කරගත හැක.
• බඩඉරිඟු බීජ සිටුවා සති 3-4 පමණ ක්ෂේත්‍රය වල් පැළවලින් තොරව පවත්වාගත යුතුය.ඒ සඳහා හොඳින් බිම් සැකසීම, බීජ සංස්ථාපනයෙන් පසු වසුනක් යෙදීම සහ බීජ සිටුවන අවස්ථාවේ සන්හෙන්ප් බීජ වැපිරීම කළ හැක.මෙම ක්‍රම අනුගමනය කිරීම මගින් වල් පැළ පාලනයට යන වියදම අවම කරගත හැකිය.

එසේම බඩඉරිඟු වගාව සාපේක්ෂව රෝග පළිබෝධ ප්‍රතිරෝධී වන නමුත් යම් රෝග හා පළිබෝධ බෝග වර්ධනයට බලපෑම කළ හැක. එවැනි රෝග පළිබෝධ පිළිබඳව මූලික අවබෝධය, එම රෝග පළිබෝධ වළක්වා ගැනීමට සහ මුල් අවධීන්වලදීම හඳුනාගැනීම මගිනුත් ඒවායේ බලපෑම අවමකර ගැනීමත් හැකිවන නිසා රෝග පළිබෝධ පිළිබඳ බඩඉරිඟු වගාකරුවාගේ මනා අවබෝධය අත්‍යාවශ්‍ය වේ.
බඩඉරිඟු වගාවට බලපෑම් ඇති කරන ප්‍රධාන රෝග කිහිපයක් ශ්‍රී ලංකාව තුල මේ වන විටත් හඳුනාගෙන ඇත. ඒ්වානම්,කොපු අංගමාරය,කොළ පාළුව,බැක්ටිරියා කඳ කුණුවීමේ රෝගය, දුඹුරු පුල්ලි රෝගය, මලකඩ රෝගය, පත්‍ර පුල්ලි රෝගය යන රෝගයි. බඩඉරිඟු වගාවට හානි කරන ප්‍රධාන පළිබෝධකයන් ලෙස කූඩිත්තා, කරල් විදින දළඹුවා, බඩඉරිඟු ගුල්ලා සහ සේනා දළඹුවා හඳුනාගෙන ඇත රෝග සහ පළිබෝධ පාලනය සඳහා සමෝදානිත පළිබෝධ සහ රෝග පාලන ක්‍රමවේදයක් යොදා ගැනීම වඩාත් සුදුසු වේ.

වාණිජමය වශයෙන් බඩඉරිඟු වගාවක් සිදුකරන විට නිසි වේලාවට නිසි ක්‍රමයකින් අස්වනු නෙළීම ඉතාම වැදගත් වේ. භෝග ක්ෂේත්‍රයේ සිදුවන හානි වළක්වා ගැනීමටත්, පසු අස්වනු හානිය අවම කරගැනීමටත් ඒ මගින් හැකියාව ලැබේ. බඩඉරිඟු අස්වනු නෙළීමට ඉතාම සුදුසු අවධිය පිළිබඳ බඩඉරිඟු වගාකරුවකු සතු අවබෝධය ඉතා වැදගත් වේ. ශ්‍රී ලංකාවේ සාමාන්‍යයෙන් වගාකරන ප්‍රභේද දින 105 – 115 ත් අතර කාලයේදී පරිණත වන අතර කිරිඉරිඟු ලෙස (බීජ අතේ ඇඟිලිවල තබා තද කල විට දියරයක් පිටතට පැමිණෙන අවස්ථාව) හෝ තරමක් මේරූ (බීජය සම්බන්ධ වන ස්ථානය කළු පැහැයට හැරී තිබීම ) යන ලක්ෂණ මූලික කොටගෙන අස්වනු නෙළන අවස්ථාව තීරණය කළ හැක.
වාණිජමය වශයෙන් බඩඉරිඟු බෝගය වගාකිරීමට අදහස් කරන ගොවිමහතෙකු එම බෝගය පිළිබඳ මනා දැනුවත්භාවයකින් යුක්ත වීම මගින් ඉහළ අස්වැන්නක් ලබාගැනීමට සහ ලාභය උපරිම කරගැනීමට හැකි වනු ඇත.

G A හර්ෂණ ගලහිටිගම
කථිකාචාර්ය
කෘෂි අපනයන අධ්‍යයනාංශය

30/08/2023

අඩු වියදම් වැඩි ආදායම් ඇති එළු පාලනය පටන් ගනිමු…

එළුවා "දුප්පතාගේ ගවයා"(poor man's cow) ලෙස හඳුන්වන අතර ශ්‍රී ලංකාවේ වියළි බිම් ගොවිතැන් ක්‍රමයේ ඉතා වැදගත් අංගයක් වේ. අප දන්නා පරිදි ආන්තික සහිත ඉඩම් වෙනත් පශු සම්පත් ව්‍යාපාර සඳහා සුදුසු නොවන අතර මෙම තත්වයන් තුළ හොඳම විකල්පය එළුවන් බව ඔප්පු වී ඇත. ශ්‍රී ලංකාවේ පාරිසරික සහ දේශගුණික තත්ත්වයන් වාණිජ හා ස්වාධීන එළුවන් ඇතිකිරීමේ ව්‍යාපාර සඳහා ඉතා හොඳින් ගැලපේ. ඉතා අඩු ආයෝජන සහ නිසි එළු ගොවිතැන් ව්‍යාපාර සැලැස්මක් සමඟින්, එළු ගොවිතැන ශ්‍රී ලංකාවේ සුළු හා ආන්තික ගොවීන් සඳහා ලාභදායී ව්‍යාපාරයක් බවට පත් කළ හැකිය. මෙම ව්‍යාපාරය ආර්ථිකයට විශාල දායකත්වයක් සපයන බැවින් ශ්‍රී ලංකාවේ එළු ගොවිතැන ජාතික වැදගත්කමක් දරයි. ශ්‍රී ලංකාවේ ග්‍රාමීය ප්‍රදේශවල එළු ගොවිතැන බැටළුවන් සහ ගවයන් වැනි අනෙකුත් පශු සම්පත් සමඟ ඇති කර ගත හැකිය. ශ්‍රී ලංකාවේ බොහෝ ගම්මාන සමාජ ආරක්‍ෂාව සඳහා යැපෙන්නේ එළු ගොවිතැනෙනි. ශ්‍රී ලංකාවේ වාණිජ එළු වගාව සඳහා එළු කළමනාකරණ කුසලතා අවශ්‍ය බව ඔබ දැන සිටිය යුතුය.
වැඩි වියදම් නොදරා අමතර ආදායම් ලබා ජීවන බර සැහැල්ලු කරගැනීමට, කුඩා භූමි ප්‍රමාණයකින් වැඩි ලාභ ලැබිය හැකි මාර්ගයක් ලෙස එළු පාලනය හඳුනාගත හැකිය. මේ සඳහා ඔබගේ විවේක කාලය වුවද යොදාගත හැකි බැවින් ගෘහණියන්ට වුවද පහසුවෙන් සිදුකළ හැකිය.

එළු පාලනයෙන් ලැබෙන වාසි මොනවාදැයි ඔබ දන්නවාද?

01. එළු කිරි ගුණාත්මයෙන් ඉතා ඉහළය. එසේම ළමුන් සඳහා ඉතා හොඳ පෝෂණීය ආහාරයකි.

02. එළුවන් ඉතා ඉක්මනින් වර්ධනය වී කෙටි කලකින් පැටවුන් බිහිකරයි. දේශීය එළුවන් වසර 1 1/2 කදී පැටවුන් දැමීම ආරම්භ කරන අතර, මාස 9-10 දී නැවතත් අභිජනනය සඳහා සුදුසුවේ. මෙහිදී වැඩිපුර පැටවුන් බිහිවුවහොත් ඔවුන් විකිණීමෙන් අමතර ආදායමක් ලබා ගත හැක.

03. එළු මස්වල ඉතා ඉහළ ප්‍රෝටීන හා විටමින් ප්‍රමාණයක් පවතී. (ප්‍රෝටීන 21.4%, මේදය 3.6%, විටමින් 1.1%) එළු අක්මාවේ ඉතා ඉහළ විටමින් බී 12 ප්‍රමාණයක් පවතී. අනවශ්‍ය පිරිමි සතුන් විකිණීමට හෝ නිවසේ එදිනෙදා පරිභෝජනය සඳහා යොදා ගත හැක.

04. එළු පොහොර ඉතා සාර්ථක පොහොරකි. එළු පොහොර ඉතා ඉක්මනින් ජීර්ණය වන බැවින් බෝග වගාවන් සාර්ථක කරගැනීමෙන් ඵලදාව වැඩි කරගැනීමට යොදා ගත හැකිය. එක් එළුවකුගෙන් වසරකට පොහොර ටොන් 0.5-0.7 ප්‍රමාණයක් ලබාදේ. අතිරික්ත පොහොර විකිණීමෙන් අමතර ආදායමක් ලබාගත හැකිය.

05. පහසුවෙන් පාලනය සිදුකළ හැකි බැවින් තම විවේකී කාලයේදී මෙන්ම ගෘහණියන්ට වුවද පහසුවෙන් සිදුකළ හැකි සත්ව පාලනයක් වේ.

06. එළුවන් සඳහා ආහාර ලෙස විශේෂ අවශ්‍යතාවයන් නොමැති බැවින් පහසුවෙන් සපයාගත හැකි ශාක වර්ගයක් ආහාර ලෙස ලබාදිය හැකිය. ඒ සඳහා ඉතා ඉහළ වියදමක් දැරීමට ද සිදු නොවේ.

07. එළු කිරි බොහෝ රෝග සඳහා ඉතා යෝග්‍ය ඔසුවක් ලෙස භාවිතා වන බැවින් මෙම එළු කිරි විකිණීමෙන් අමතර ආදායමක් ලබාගත හැකිය.

08. එළු කිරි ඉතා ඉකිමනින් ජීර්ණය වන අතර හොඳින් උතුරුවා ගත් පසු ගබඩා කර තැබීමට ද හැක.

ඔබ එළුවන්ට ආහාර වශයෙන් ලබා දෙන්නේ මොනවාද?

එළුවන් පාලනය කරනු ලබන ක්‍රමය මත දෙනු ලබන ආහාර රඳා පවතී. එනම් නිදැල්ලේ උලා කෑමටත් අඩ සියුම් ක්‍රමයටත් දිගේලි ක්‍රමයටත් හා සියුම් ක්‍රමයටත් වශයෙන් එළුවන් පාලනය කළ හැකි අතර ඒ ඒ අවස්ථා අනුව ආහාර දීම වැදගත් වේ.
එළුවන් අඩු සංඛ්‍යාවක් ඇති කරන්නේ නම් දිගේලි ක්‍රමය යොදා ගත හැක. එහිදී ආහාර සෙවීමේ ප්‍රශ්නය තරමක් දුරට මඟහරවා ගත හැකි බැවින් කෘෂි අතුරු නිෂ්පාදන, නැවුම් තෘණ, සාන්ද්‍ර ආහාර ආදිය එළුවන්ට දෙන ආහාරවල අඩංගු කළ යුතුය.
දිය යුතු සම්පූර්ණ ආහාර ප්‍රමාණයත් සාන්ද්‍ර ආහාර ප්‍රමාණයත් එළුවාගේ වයස අනුව වෙනස් විය යුතුය. එසේම එළුවාගේ තත්ත්වය හා පාලනය කරනු ලබන අරමුණ අනුව ද ආහාර වෙනස් විය යුතුය.

මස් සහ කිරි සඳහා ශ්‍රී ලංකාවේ ඇති කළ හැකි එළු වර්ග -

• සානෙන්
• බීටල්
• ජමුනාපරි අභිජනනය සහ සානෙන් අභිජනනය (කොට්ටුකච්චිය අභිජනනය)
• තවදුරටත් විදේශීය එළු වර්ග ලෙස ඩැමස්කස්, ඇල්පයින්, ඇන්ග්ලෝ - නූබියන් එළු වර්ගද යොදා ගත හැකිය.

එළු පාලනයේදී සැලකිය යුතු වැදගත් කරුණු

01. ශීත දේශගුණයෙන් හා වර්ෂාවෙන් ආරක්ෂා කරගත යුතුය.

02. ප්‍රමාණවත් ඉඩ ප්‍රමාණයක් ලබාදිය යුතු අතරම එහි බිම වියළි විය යුතුය. ඔබ සතු බිම් ප්‍රමාණය හා පහසුකම් සලකා ඔබගේ පළාතේ පශු වෛද්‍යවරයාගේ උපදෙස් අනුව එළු නිවාස සකස් කර ගැනීම ඉතා වැදගත් වේ.

03. වැසි කාලයේදී තෙත් තෘණ වර්ග හෝ රනිල විශාල ප්‍රමාණයක් ලබා නොදිය යුතුය. වියලුනු කොළ වර්ග දීම වැදගත් වේ.

04. සුදුසු එළු වර්ගය තෝරා ගැනීමටත් පාලන ක්‍රම පිළිබඳවත් මුලින්ම පශු වෛද්‍යවරයාගෙන් හෝ සත්ව සංවර්ධන උපදේශකවරයාගෙන් උපදෙස් ලබාගන්න.

05. නිවසේ ඉතිරි වී ඇති බත්, එළුවන් සඳහා ආහාරයට දෙන්නේ නම් කුඩා ප්‍රමාණ වලින් ලබාදිය යුතුය.

06. ඔබ එළුවන් මහා පරිමාණයෙන් ඇති කරන්නේ නම්, සත්ව කාණ්ඩ අනුව ඔවුන් වෙන වෙනම කොටුවල ඇති කළ යුතුය.

07. ගවයන්ගේ පනු හැලීම නොකඩවා සිදු කරන්නේ නැතිනම් ගවයින් හා එළුවන් එකට හෝ එක ලඟ ඇති කිරීම සුදුසු නොවේ.

08. එක් ආහාර වර්ගයක සිට වෙනත් ආහාර වර්ගයකට මාරු කිරීමේදී ජීර්ණ ක්‍රියාවලිය කෙරෙහි බලපෑම් ඇති කෙරේ. එබැවින් ආහාර වෙනස් කිරීම ක්‍රම ක්‍රමයෙන් කළ යුතුය.

09. මයිටාවන් හා මැක්කන් ශරීරයේ සිටීනම් ඔවුන් සඳහා ප්‍රතිකාර කළ යුතුය.

10. එන්නත් කරන කාලය තුළ එළු රෝග සඳහා එන්නත් කිරීම් සිදු කල යුතුය.

11. තුවාල පවතී නම් ඒවා ඉතා ඉක්මනින් පිරිසිදු කර ඖෂධ ගැල්විය යුතුය. තුවාල වලට ඉක්මන් ප්‍රතිකාර නොකළහොත් පිට ගැස්ම සෑදී සතා මිය යා හැක.

තවද,
සාමාන්‍යයෙන් එළුවෙකුගේ වටිනාකම රුපියල් ලක්ෂයක් පමණ වන බව ඇස්තමේන්තු කොට තිබේ.වාර්ෂිකව රුපියල් 400ක රක්ෂණ දායකත්වයක් මගින් එළුවන් රක්ෂණය කිරීමට අවස්ථාව සලසා දීමට මේ මගින් සැලසුම් කෙරේ.
එළුවන් සොරකම් කිරීමකදී හෝ හදිසි මරණයට පත් වූ විට උපරිම වන්දියක් ලබා දීමට මේ හරහා කටයුතු යොදා ඇත.එළුවන් නොමිලයේ ලබා දීමේ වැඩපිළිවෙළ සඳහා රජය මේ වසරට රුපියල් මිලියන 150ක මුදලක් ලබා දී ඇතැයි ද කෘෂිකර්ම අමාත්‍යාංශය පෙන්වා දුන්නේ ය.
එමෙන් ම, දැනට කෘෂිකාර්මික හා ගොවිජන රක්ෂණ මණ්ඩලය විසින් කෘෂිකාර්මික ක්‍ෂේත්‍රයට අදාළ අංශ ගණනාවක් සඳහා නව රක්ෂණාවරණ ලබා දීමේ වැඩපිළිවෙළක් ආරම්භ කර ඇත.
ග්‍රාමීය අංශයේ රැකියා විරහිත තරුණ තරුණියන් සහ එළු වගාවට උනන්දුවක් දක්වන තරුණ තරුණියන් සඳහා කෘෂිකර්ම අමාත්‍යාංශය මගින් එළුවන් 70,000ක් බෙදා දීමට කෘෂිකර්ම අමාත්‍යාංශය තීරණය කර තිබේ.
අවසාන වශයෙන්, ශ්‍රී ලංකාව තුළ එළුවන් පාලනය වඩාත් ප්‍රචලිත නොවුනත් වර්තමාන ආර්ථික අර්බුදය සහිතව අනාගතයට ආයෝජනයක් ලෙස එළුවන් ඇති කිරීම ඉතාම යෝග්‍ය සහ තිරසාර විසඳුමක් ලෙස දැක්විය හැකිය. එළුවන් කීප දෙනෙකුගෙන් ආරම්භ කළ කුඩා පරිමාණ ව්‍යාපාරයක් ලෙස ග්‍රාමීය අඩු ආදායම්ලාභී සහ එළු පාලනයට කැමැත්තෙන් සහ උවමනාවක් ඇති සියලු දෙනාටම මෙය ආරම්භ කළ හැකිය.

- ඩී. ඩී. ටී. එම්. හේමරත්න -
- පී. වී.ඒ. නවින් තවිෂ්ට -

'scow #එළුවන්

15/08/2023

"වීදුරු යට වත්තක්"

"වීදුරු යට වත්තක්" ලෙසින් හඳුන්වනු ලබන ටෙරාරියම්, ශාක-අභියෝගයක් ලෙස සලකන මිනිසුන්ට පවා පුදුම සහ ආකර්ෂණීය තෑගි ලබා දෙයි. ටෙරාරියම් යනු පැල රඳවා තබන ගෘහස්ථ ගෙවතු වගා බහාලුමකි. සාමාන්‍යයෙන් එය සම්පූර්ණයෙන්ම හෝ අර්ධ වශයෙන් ආවරණය කර ඇති වීදුරු වලින් සාදා ඇති අතර එය තාපය හා ආලෝකය ඇතුළු වීමට සහ තෙතමනය සීමා කිරීමට ඉඩ සලසයි. "terrarium" යන පදය "terra" (earth) සහ "arium" (place or receptacle) යන ලතින් වචන වලින් සමන්විත වේ. ටෙරාරියම් අලංකාර කිරීම, විද්‍යාත්මක නිරීක්ෂණ හෝ ශාක ප්‍රචාරණය සඳහා නිර්මාණය කළ හැකිය.

මුලින්ම ටෙරාරියම් නිර්මාණය කරන ලද්දේ 1842 දී Nathaniel Bagshaw Ward විසිනි. ඔහු කෘමීන්ගේ හැසිරීම පිිළිබද අධ්‍යනය උනන්දු වූ පුද්ගලයෙක් වන අතර අත්වැරදීමකින් වීදුරු භාජනයකට වැටුනු මීවන බීජ, ශාකයක් ලෙස වර්ධයනය වීම නිරීක්ශනය කර ඇත. එයින් පසුව ටෙරාරියම් බිහිවූ අතර මෙය බ්‍රිතාන්‍ය සමයේ ඉංග්‍රීසින් අතර ඉතා සීග්‍රයෙන් පැතිරුණි. මෙය ඔවුන් විසින් “Wardian case” (හිරකරන ලද පෙට්ටිය) ලෙස හඳුන්වන ලදී. මෙම ක්‍රමය බ්‍රිතාන්‍ය සමයේදී නැව් මඟින් ශාක රටකින් රටකට ප්‍රවාහනය කිරීමට භාවිතා කරන ලදී. පැලෑටියකට සීල් කරන ලද වීඳුරු භාජනයක වාතාශ්‍රය නොමැතිව සාර්ථක වර්ධනය විය හැකි බව මෙයින් තහවුරු විය.

ටෙරාරියම් ආකාර දෙකකට නිර්මාණය කල හැක.

විවෘත ආකාරය

මෙය කුඩා පතොක් සහ මාංශල ස්වභාවයක් ගන්නා කුඩා පැළෑටි වර්ධනය කිරීමට සුදුසු වේ. මෙවැනි පැළෑටි වියළි තත්ත්වයන් යටතේ හොඳින් වර්ධනය වේ.

සංවෘත ආකාරය

පාසි, ඕකිඩ්, මීවන වැනි නිවර්තන කලාපීය පැළෑටි අපට සංවෘත ටෙරාරියම් එකක වගා කිරීමට හැකිය. හේතුව එවැනි බඳුන් තුළ තත්ත්වය නිවර්තන පරිසරයකට සමාන වීමයි.

ටෙරාරියම් ප්රමාණය කුමක් වුවත්, එය බොරළු, පාසි, පස සහ ශාක ඇතුළු මට්ටම් හතරකින් සමන්විත වේ. ටෙරාරියම් වල ඇති ශාක සහ පස ජල වාෂ්ප නිකුත් කරයි. ජලය ප්‍රතිචක්‍රීකරණය කරයි. එවිට වාෂ්ප බඳුනේ බිත්ති මත එකතු කර පසට ගලා යයි. ටෙරාරියම් ස්වයංපෝෂිත වන අතර මුද්‍රා තැබුවහොත් ඒවාට සුළු නඩත්තුවක් අවශ්‍ය වන්නේ එබැවිනි.
ටෙරාරියම් වල සාමාන්‍යයෙන්, සෙමින් වැඩෙන ශාක පත්‍ර සහ ශාක වඩාත් හොඳින් ක්‍රියා කරයි.
උදාහරණ වශයෙන්:
පර්ණාංග,මාංශ භක්ෂක ශාක,පතොක්,පෙපෙරෝමියා, වාමන ශාක ආදිය.

ටෙරාරියම් සෑදීමට අවශ්‍ය ද්‍රව්‍ය:

• වීදුරු හෝ ප්ලාස්ටික් බහාලුමක්
• පාෂාණ
• පාසි
• පස (වර්ධන මාධ්‍යය)
• වැඩිපුර නොවැඩෙන ශාක (සාමාන්‍යයෙන් කුඩා හෝ වාමන ශාක)
• පස තැබීම සඳහා හැන්දක්

ටෙරාරියම් සාදා ගන්නේ කෙසේද?

1) ඔබේ ගෙවත්ත රඳවා තබා ගැනීමට විශේෂ ටෙරාරියම් බඳුනක් මිලදී ගන්න හෝ සෝඩා බෝතලයකින්, මාළු ටැංකියකින්, මාළු බඳුනකින් හෝ බඳුනකින් ඔබේම එකක් සාදා ගන්න.

2) ඉන්පසු ඔබ භාවිතා කිරීමට අදහස් කරන පස් තට්ටුවේ ප්‍රමාණයෙන් අඩක් ඔබේ කන්ටේනරයේ පතුල පුරවන්න. ඔබට ටෙරාරියම් තුළ ඔබේ පළමු ස්ථරය ලෙස ගල් තැබිය හැකිය, නමුත් මෙය පුද්ගලික අභිමතය පරිදි වේ.

3) ඔබ ඔබේ ගෙවත්තට ඇතුළත් කිරීමට කැමති විශාල පාෂාණ හෝ ප්ලාවිත ලී කැබලි එකතු කරන්න.

4) පසෙහි, ශාකවල මුල් විවේක ගැනීමට තරම් විශාල සිදුරක් සාදන්න.

5) ශාකය එහි කන්ටේනරයෙන් ඉවත් කරන්න - පසෙහි මුල් ලිහිල් කිරීම සඳහා ඔබට මුල් සැහැල්ලුවෙන් සම්බාහනය කිරීමට අවශ්‍ය විය හැකිය.

6) පස තුනී ස්ථරයක් තුළ පැළ ස්ථානගත කර, ශාක වටා පස දෙවන ස්ථරය එකතු කරන්න. තරමක් තදින් ඔබන්න - නව පාංශු මට්ටම ශාකයේ මුල් මූල බෝලයේ පසෙහි මට්ටමට සමාන විය යුතුය.

7) නිර්මාණශීලී වන්න සහ ශාක, වර්ණ සහ ප්‍රමාණ මිශ්‍ර කරන්න.

ටෙරාරියම් රැකබලා ගන්නේ කෙසේද?

• ටෙරාරියම් බොහෝ දුරට අඩු නඩත්තු වන නමුත් ඔබේ ටෙරාරියම් දිගු කල් පවතින සහ සෞඛ්‍ය සම්පන්නව තබා ගැනීමට අපට යෝජනා කිහිපයක් තිබේ.

• ඔබ පර්ණාංග වගා කිරීමට තෝරා ගන්නේ නම්, ඒවා වැඩීම වැළැක්වීම සඳහා කොළ කපා දමන්න.

• ඔබේ ටෙරාරියම් හි ඇති ඕනෑම ශාකයකින් කහ සහ දුඹුරු කොළ ඉවත් කිරීමට වග බලා ගන්න. මෙය සාමාන්‍යයෙන් රෝග හෝ පළිබෝධකයන්ගේ සංඥාවකි.

• ඔබට විවෘත ටෙරාරියම් තිබේ නම්, මදුරුවන් හෝ මීලි බග් වැනි පළිබෝධකයන් නිරීක්ෂණය කරන්න.

• ඔබට ටෙරාරියම් වසා තිබේ නම්, ඔබට නැවුම් වාතය තුළට යාමට වරින් වර පියන ඉවත් කිරීමට අවශ්‍ය විය හැකිය.

ටෙරාරියම් වල ප්‍රතිලාභ:

• වියළි වාතය තුළ වර්ධනය වීමට අපහසු ශාක වගා කිරීමට ඔවුන් උපකාර කරයි.

• ඔවුන් උද්‍යානයක් සඳහා සීමිත ඉඩක් සපයයි - 'කුඩා උද්‍යානයක්'.

• ඔබට LED හෝ fluorescent වැනි කෘතිම ආලෝකය ඉතා කාර්යක්ෂමව භාවිතා කළ හැකිය.

• ටෙරාරියම් වලට නිතර වතුර දැමීම අවශ්‍ය නොවේ.

ආර්.ඒ.කේ.පී.ධර්මසිරි

02/08/2023

අදුරු ලෝකය ආලෝකමත් කරන්නෝ..!

මේ කියන්නේ මොකක්ද...?

ඔබටත් අඳුරේ ආලෝකය අල්ලා ගත හැකි නම්? නියම සුපිරි බලවතෙක් වගේ නේද? එවැනි බලයක් ඇති ජීවීන් මුහුදු පත්ලේ සිටින බව ඔබ දන්නවාද? අපි දැන් කතා කරන්න යන්නේ ඒ ගැන. මෙලෙස නිපදවන ආලෝකයට නිශ්චිත නමක් ඇත. ජීවය යන අරුත් දෙන "bios" යන ග්‍රීක වචනයෙන් සහ ආලෝකය යන අරුත දෙන "lumen" යන ලතින් වචනයෙන් එය bioluminescence ලෙස හැඳින්වේ. Bioluminescence යනු සමහර ජීවීන්ට තමන්ගේම ආලෝකය විමෝචනය කිරීමට ඇති හැකියාවයි. මෙන්න මේ ආලෝකය ගැඹුරු මුහුදේ අඳුර වළක්වමින් ජීවීන්ට සහ ඔවුන්ගේ පරිසරයට අපූරු සුන්දරත්වයක් ගෙන දෙනවා.

දැන් අපි බලමු කොහොමද මේ ආලෝකය නිපදවන්නේ කියලා...

Bioluminescence යනු ඇත්ත වශයෙන්ම රසායනික ප්‍රතික්‍රියාවකි (වඩා දිලිසීමක් වැනි). මෙම ප්‍රතික්‍රියාව ප්‍රථම වරට විස්තර කරන ලද්දේ 1887 දී ප්‍රංශ ජීව විද්‍යාඥ Raphael Dubois විසිනි. ජෛව විච්ඡේදක ප්‍රතික්‍රියාව සඳහා රසායනික ද්‍රව්‍ය දෙකක් අවශ්‍ය වේ, එකක් ලුසිෆෙරියානු රසායනිකයක් ලෙස හැඳින්වෙන අතර එය ජෛව විෂ්මක රසායනික ප්‍රතික්‍රියාවේදී ලුසිෆෙරේස් සමඟ ක්‍රියා කරයි. සහ අනෙක ජීව විදුළි රසායනික ප්‍රතික්‍රියාවට සම්බන්ධ ලුසිෆෙරේස් එන්සයිමයක් ලෙස හැඳින්වේ.මෙම රසායනික ද්‍රව්‍ය දෙක ඔක්සිජන් ස්වල්පයක් සමඟ එක්ව ප්‍රතික්‍රියා කර ආලෝකය නිපදවයි.

මෙම ආලෝකය ඇත්ත වශයෙන්ම නිපදවන්නේ ඇයි?
ඔබ සිටින්නේ අඳුරු කාමරයක යැයි සිතන්න. එවැනි ස්ථානයක ඔබ සන්නිවේදනය කරන්නේ කෙසේද? භාෂාව භාවිතයෙන් සන්නිවේදනය සිදු කරන බවට ඔබට පිළිතුරු දිය හැකිය. නමුත් මාළු එය කරන්නේ කෙසේද? ඔබට තවත් ප්‍රශ්නයක් තිබිය හැක. එනම් ඔවුන් සන්නිවේදනය කරන්නේ කා සමඟද? ඇත්ත වශයෙන්ම, මෙම ආලෝකය සන්නිවේදනයට වඩා ගොදුර අල්ලා ගැනීමට වඩා ප්‍රයෝජනවත් වේ. උදාහරණයක් ලෙස Angler මාළු ගැන කියන්නම්. මෙම මාළුවාගේ හිසෙහි ඇති දිලිසෙන ආකර්ෂණය කුඩා මසුන් ආකර්ෂණය කරයි. අඳුරේ ආලෝකය දුටු විට කුඩා මසුන් විශාල වශයෙන් ඒ වෙත ඇදී එයි. ඔළුවට එන පොඩි මාළුන්ට මේ එළිය දරාගන්න බැරි වෙනවා. එතකොට මේ ඇන්ග්ලර් මාළුවා පොඩි මාළු කනවා. මේක හරියට අපි අඳුරේ ඉන්නකොට ෆ්ලෑෂ් ලයිට් එකක් ඇහැට ෆෝකස් කරනවා වගේ වැඩක්.

තවත් උපකාරයක් වන්නේ විලෝපිකයන්ගෙන් ආරක්ෂා වීමයි. මේ තිරිසන් ලෝකය හරිම පුදුම විදිහට සිද්ධ වෙනවා. මම උදාහරණ කිහිපයක් ඉදිරිපත් කරමි. දැල්ලන් සහ සමහර පණුවන් කොල්ලකාරී තර්ජනයක් දැනෙන විට ඔවුන්ගේ ශරීරයේ ආලෝකමත් කොටසක් වෙන් කරයි. අඳුරේ සිටින විලෝපිකයා සිතන්නේ එය දැල්ලන් හෝ පණුවෙකු බවයි. විලෝපිකයා ඔවුන් පසුපස හඹා එන නිසා දැල්ලන් සහ පණුවන් ඉතා ඉක්මනින් පලා යා හැක

ආලෝකයේ අලංකාරය

ප්‍රධාන වශයෙන් මෙම Bioluminescence වර්ණ නිල්, දම්, කහ සහ රතු යන වර්ණවලින් දක්නට ලැබේ. මෙම ආලෝක ධාරාවන් ජීවියෙකුගෙන් ජීවියෙකුට වෙනස් වේ. නමුත් මෙම විදුලි පහන් වල කාලසීමාව තත්පර 1 සිට තත්පර 12 දක්වා වේ. අඛණ්ඩව වැඩ කිරීමෙන් මේවා ඒකාකාර ආලෝකයක් නිපදවයි. ඒ වගේම සොයා නොගත් ආලෝක රටා දස දහස් ගණනක් මුහුදු පත්ලේ සැඟවිලා තියෙනවා.

- ජේ.ඒ.පසන් මධුශංක -

24/07/2023

"වටු කුරුළු පාලනය: සම්ප්‍රදායෙන් බැහැරව නව විභවයන් සොයා............."

මෑතකාලීනව ඉදිරිපත් වූ දත්තයන්ට අනුව ලෝක ජනගහනය ඉතා ශීඝ්‍රයෙන් ඉහළ යමින් පවතී. මෙම අධික ජනගහන වර්ධනය අප රටෙහිද ඒ අයුරින්ම සිදු වෙමින් පවතින අතර මේ වන විටත් ශ්‍රී ලංකාවේ මානව ජනගහනය මිලියන 22 ඉක්මවා ගොස් අවසානය. මෙම වැඩි වන ජනගහනයත් සමඟම පැන නගින ගැටළු රාශියකි. ඉඩකඩ අවම වීම හේතුවෙන් කෘෂිකර්මාන්තය සහ සම්ප්‍රදායික සත්ත්ව පාලනය සඳහා ප්‍රමාණවත් ඉඩපහසුකම් නොමැති වීම සහ වැඩි වන ජනගහනය සඳහා ප්‍රමාණවත් ලෙස ආහාර ඇතුළු අනෙකුත් අවශ්‍යතාවයන් සැපයීමට අපහසුවීම යන කරුණු මින් ප්‍රධානය. මෙම ගැටළු නිසි ලෙස කළමනාකරණය නොකලහොත් අනාගත පරපුර ආහාර අනාරක්ෂිතභාවයට සහ පෝෂණ ගැටළු වලට ගොදුරු වීම වැළක්විය නොහැකි වනු ඇත. එබැවින් අඩු ඉඩ ප්‍රමාණයක් වැය කර වැඩි නිෂ්පාදනයක් ලබා ගත හැකි ආහාර ප්‍රභවයන් කෙරෙහි වැඩි අවධානයක් යොමු කිරීම කාලීන අවශ්‍යතාවයකි.

මෑත කාලයක් වන තුරුම කිකිළි බිත්තර සඳහා ශ්‍රී ලාංකීය ප්‍රජාවගේ වැඩි නැඹුරුවක් සහ ඉල්ලුමක් පැවතියේ එහි පෝෂ්‍ය ගුණය, ලාභදායී වීම සහ බහුලතාවය යන ආකර්ෂනීය කරුණු හේතු කොට ගෙනය. නමුත් අද වන විට ශ්‍රී ලංකාවේ කුකුළු කර්මාන්තය යම් තරමක අර්බූදකාරී තත්ත්වයකට මුහුණ දී ඇති බව නොරහසකි. කිකිළි බිත්තර නිෂ්පාදනය අඩු වීම මෙන්ම බිත්තර සහ කුකුළු මස් මිළ ඉහළ යාමද නිසා වර්තමාන පාරිභෝගිකයින් දැඩි ලෙස අපහසුතාවයන්ට පත්ව ඇති බව පෙනී යයි. දිනක් වයසැති පැටවුන් සැපයුම් අඩාල වීම, ආහාර සඳහා අධික මිළ ගණන් වැය කිරීමට සිදු වීම සහ අතරමැදියන් අනවශ්‍ය ලෙස ලාභ ඉපැයීමට තැත් කිරීම නිෂ්පාදකයින් මේ සඳහා හේතු ලෙස දක්වා සිටී. මෙම පවතින තත්වයන් පාරිභෝගිකයා මෙන්ම නිෂ්පාදකයාද පසුගාමී තත්වයකට ඇද දැමීමට හේතු වී ඇත. එබැවින් සම්ප්‍රදායෙන් බැහැර වූ ලාභදායී අනෙකුත් සත්ත්ව ප්‍රෝටීන ප්‍රභවයන් ගැන අවධානය යොමු කළ යුතු කාලය දැන් පැමිණ ඇත.

වටුවන් යනු එසේ පහසුවෙන් කිකිළියන් සහ කුකුළන් වෙනුවට ආදේශකයක් ලෙස යොදා ගත හැකි සහ ඇති කල හැකි කුරුළු විශේෂයකි. ඈත අතීතයේ වටුවන් ප්‍රචලිත වූයේ මිහිරි නාද පතුරුවන පක්ෂි විශේෂයක් ලෙසිනි. වැහි වටුවන්, ළය නිල් වටුවන් සහ කැළෑ පඳුරු වටුවන් වැනි විවිධ වටු විශේෂ අප රටෙහි හමු වුවද ශ්‍රී ලංකාවේ වඩාත් වානිජ ලෙස ප්‍රචලිතව ඇත්තේ ජපන් වටුවන් ලෙස හඳුන්වනු ලබන වටු විශේෂයයි. හොඳින් වැඩුනු ගැහැනු ජපන් වටුවකු ග්‍රෑම් 120-160 ක ජීව බරකින් යුක්ත වන අතර පිරිමි සතකු ග්‍රෑම් 100-140 ක පමණ බරින් යුතුය. ජපන් වටුවන්ගේ බීජෞෂණ කාලය දින 16-18ක් පමණ වේ. ඔවුන් බෲඩරයක් තුළ සති 2-3 ක් පමණ ගත කරන අතර සති 3-4 ක් පමණ වන විට ගැහැණු සහ පිරිමි සතුන් වෙන් කොට හඳුනා ගැනීමට හැකිය. වැඩුනු ගැහැනු සතුන්ගේ පපු පෙදෙසේ කළු පැහැති කුඩා ලප විසිරී ඇති අතර පිරිමි සතුන්ගේ පපු පෙදෙස තනි ලා දුඹුරු පැහැයක් ගනී.

වටු පාලනයෙහි වාසි රැසකි. එමෙන්ම අනාගතයේදී සාර්ථක කර්මාන්තයක් ලෙස ඉතා පහසුවෙන් දියුණු කිරීමේ හැකියාවක්ද පවතී. එබැවින් ඒ සඳහා මූලික වන කරුණු ගැන දැනුවත් කිරීම මෙම ලිපියෙහි ප්‍රධාන අරමුණයි.

වටු බිත්තර සහ වටු මස් පෝෂණ ගුණයෙන් අනූනය. සාමාන්‍ය වටු බිත්තරයක් බරින් ග්‍රෑම් 10-12 ක් පමණ වේ. කවචය එයටම ආවේනික වූ සුදු සහ දුඹුරු වර්ණයකින් යුක්තය. කිකිළි බිත්තර හා සැසඳීමේදී වටු බිත්තර ඉතා ඉහළ පෝෂණ ගුණයකින් යුක්තය. වටු බිත්තර වල දළ ප්‍රෝටීන ප්‍රමාණය 13% කි. කිකිළි බිත්තර වල මෙම අගය12% කි. එමෙන්ම එය ඉතා ශක්තිජනක ආහාරයකි. වටු බිත්තර කිකිළි බිත්තර වලට වඩා යකඩ සහ කැල්සියම් අනූන ආහාරයකි. එය විටමින් A සහ E වලින් පෝෂිත ආහාරයකි. වටු බිත්තර ආසාත්මිකතාවයන්ගෙන් තොර වන අතර ඇදුම, දියවැඩියාව, රක්තහීනතාවය, ආමාශගත වණ සහ වකුගඩු සහ පිත්තාශ ගල් වැනි රෝගී තත්වයන්ගෙන් පීඩා විඳින්නන් සඳහා කදිම ඔසුවක් බවද පැවසේ. වටු මස් ද එවැනිම ප්‍රෝටීන අධික, මේදය අඩු පෝෂ්‍ය ගුණයෙන් අනූන සත්ත්ව ප්‍රෝටීන ප්‍රභවයකි.

කුකුළු පාලනය සඳහා මෙන් නොව වටුවන් පාලනය සඳහා අවශ්‍ය වනුයේ ඉතා අඩු මූලික පිරිවැයකි. එබැවින් මූල්‍යමය තත්ත්වය සහ ඉඩකඩ ප්‍රමාණය අනුව ගොවි මහතුන්ට ඇති කල යුතු සතුන් ගණන තීරණය කිරීමට පුළුවන. වටුවන් ඉතා කුඩා ඉඩකඩක වුවද පහසුවෙන් ඇති කල හැකි වන අතර ඒ සඳහා කූඩු හෝ අතුරණු භාවිතා කිරීමට පුළුවන. විශාලත්වය අනුව ගත් කල සෙ.මී. 90 x සෙ.මී. 75 x සෙ.මී. 45 දිග පළල සහ උස ලෙස ගත් කල සැකසූ කූඩුවක සති 2 ක් දක්වා වන පැටවුන් 100 ක් ඇති කල හැකිය. සෙ.මී. 120 x සෙ.මී. 75 x සෙ.මී. 45 වන කූඩුවක් වැඩුනු සතුන් 50 කට ප්‍රමාණවත්ය.

වටුවන්ගේ ආහාර අවශ්‍යතාවය අවමය. හොඳින් වැඩුනු වටුවකු සඳහා දිනකට සාමාන්‍යයෙන් අවශ්‍යවනුයේ ග්‍රෑම් 25 ක් පමණි. එබැවින් වටුවන් ඇති කිරීම මගින් ආහාර සඳහා යන වියදම අවම කර ගත හැකිය. එමෙන්ම ගැහැණු වටුවන් ඉතා ඉක්මණට වැඩෙන අතර දින 35-42 වන විට බිත්තර දැමීම ආරම්භ කරයි. වැඩුනු කිකිළියක් මේ සඳහා ගන්නා කාලය සති 18-20 ක් පමණ වේ. පරිණත වටුවකු වසරකට බිත්තර 200-300 ක් පමණ දමන අතර මෙය කිකිළියන්ගේ නිෂ්පාදන ධාරිතාවයට සමානය. මස් සඳහා ඇති කරන්නේ නම් වටුවන් දින 35 දී මස් නිෂ්පාදය සඳහා භාවිතා කල හැකිය.

වටු පාලනය පූර්ණකාලීන ව්‍යාපාරයක් ලෙස හෝ පවුලේ අනෙකුත් සාමාජිකයින්ගේ උපකාරයෙන් අර්ධ කාලීන ලෙස හෝ පවත්වා ගෙන යාමට පුළුවන. වටුවන් ඇති කිරීමේදී අතිවිශේෂ අවධානයක් අවශ්‍ය නොවීම මීට හේතුවයි. වටු පාලනයෙහි අතුරු ඵල ලෙස ඉතිරිවන භාවිතා කරන ලද අතුරණු පොහොරක් ලෙස විකිනීමෙන් අමතර ආදායමක් උපයා ගැනීමටද හැකියාවක් පවතී.

ශ්‍රී ලාංකීය ජනයා අතර තවමත් වටු බිත්තර සහ මස් ජනප්‍රිය වූ බවක් නොපෙනේ. සම්ප්‍රදායික ආහාර සඳහා ඇති දැඩි නැඹුරුව මෙන්ම මෙන්ම වටු බිත්තර සහ මස් වල පෝෂ්‍යගුණය පිළිබඳ නිසි අවබෝධයක් නොමැතිවීම මෙයට හේතු විය හැකිය. නමුත් සංචාරක හෝටල් ආශ්‍රිතව වටු බිත්තර සහ මස් සඳහා සැළකිය යුතු ඉල්ලුමක් පවතී. කුකුළු පාලනය හා සැසඳු කල වටු පාලනය සඳහා ඇති පුද්ගල නැඹුරුවද ප්‍රමාණවත් නොවෙන බව පෙනී යයි. වටු පාලනය සඳහා අවශ්‍ය මූලික දැනුම ලබා ගැනීමට නිසි ක්‍රමවේදයක් නොමැති වීම, වටු නිෂ්පාදන සඳහා වෙළඳපොළෙහි ප්‍රමාණවත් ඉල්ලුමක් නොමැති වීම, වටුවන් සඳහා විශේෂයෙන් සකසන ලද ආහාර වෙළදපොලෙහි නොමැති වීම, ප්‍රාග්ධන ගැටළු මේ සඳහා හේතුවී ඇති බව සිතිය හැකිය. තත්ත්වය මෙසේ නමුදු වටු නිෂ්පාදන සඳහා මනා සැපයුම් ජාලයක් මෙන්ම මිළදී ගැනීමේ ජාලයක් අප රට තුල විධිමත් ලෙස ස්ථාපිත කිරීමට හැකි වන්නේ නම් එමඟින් විරැකියාව අවම කර ආහාර සුරක්ෂිතතාවය යම් පමණකින් හෝ තහවුරු කිරීමට හැකි වනවා පමණක් නොව ශ්‍රී ලාංකීය දුවා දරුවන් අතර ප්‍රෝටීන මන්දපෝෂණය යම් පමණකින් හෝ පහළ හෙලීමට උපකාරීවනු ඇත.

මහාචාර්ය රුවිනි මුතුකුමාරණ
පශු සම්පත් අධ්‍යයනාංශය
කෘෂි විද්‍යා පීඨය
ශ්‍රී ලංකා සබරගමුව විශ්වවිද්‍යාලය
බෙලිහුල්ඔය

Address

Faculty Of Agricultural Sciences, Sabaragamuwa University Of Sri Lanka, P. O. Box 02, Belihuloya
Belihul Oya
70140

Website

https://www.facebook.com/agriunion, https://www.facebook.com/agrisuslunion

Alerts

Be the first to know and let us send you an email when Sashrika posts news and promotions. Your email address will not be used for any other purpose, and you can unsubscribe at any time.