13/03/2024
ඉංග්‍රීසිකාරයෙකු වූ බ්‍රැන්ඩන් ග්‍රිම්ෂෝව් ඩොලර් දහතුන්දහසක් ගෙවා ෂීෂෙල්ස්හී ජනාවාසයෙන් තොර කුඩා දිවයිනක් මිලට ගෙන සදහටම එහි පදිංචියට ගියේය. එකල ඔහුට වයස අවුරුදු 40ක්වත් සම්පූර්ණ නොවී තිබූ අතර පුවත්පත් කතුවරයෙකු ලෙස කරමින් සිටි රස්සාව අතහැර මෙසේ නව ජීවිතයක් ආරම්භ කළේය.
මෙම අවදිය වන විට අඩුම තරමේ අවුරුදු පනහකින්වත් දූපතේ මිනිස් පාපහසක් තැවරී තිබුණේ නැත. හැබෑ රොබින්සන් කෲසෝ කතාවේ වාගේම බ්‍රැන්ඩන් යාබද දූපත් වැසියන් අතරෙන් සහායකයෙකු සොයා ගත්තේය. ඔහුගේ ෆ්‍රයිඩේ (රොබින්සන් කෲසෝ හී සහායකයාගේ නම) රේනේ ලැෆෝර්ටින් නම් විය.
බ්‍රැන්ඩන් රේනේ හා එක් ව සිය නව නිවහන සුන්දර කිරීම ඇරඹුවේය. රේනේ දිවයිනට ඉඳහිට එද්දිත් එකදු අවස්ථාවක් හෝ එය හැර නොයමින් බ්‍රැන්ඩන් දශක ගණනාවක් එහි වාසය කළේය.
වසර 39 ක් තිස්සේ බ්‍රැන්ඩන් හා රේනේ සිය දෑත්වලින් දූපතේ ගස් 16000ක් සිට වූ අතර ඇවිදින්නට පෙත් මං කිලෝමීටර් 05ක් තැනූහ. 2007 දී රේනේ ලැෆොර්ටීන් මිය ගිය අතර බ්‍රැන්ඩන් සියල්ල සමග දූපතේ තනි විය.
ඔහුට වයස අවුරුදු 81 ලැබුවේය. මේ කාලයේදී ඔහු පක්ෂි විශේෂ 2000ක් දිවයිනට කැඳවා ගත් අතර ෂීෂෙල්ස්හී සහ ලොව වෙනත් රටවල දැනටමත් වඳවීමට ලක්ව සිටින යෝධ ඉබ්බන් 100ක්වත් හඳුන්වා දුන්නේය.
බ්‍රැන්ඩන්ගේ උත්සාහයට පින් සිදු වන්නට කලක් කතරක් සේ පැවති දිවයිනක් දැන් සමස්ත ෂීෂෙල්ස්හී සත්ව විශේෂවලින් තුනෙන් දෙකකට නිවහන වී ඇත. අතහැර දමා තිබූ බිම් කැබැල්ලක් පාරාදීසයක් බවට පත් ව ඇත.
වසර කිහිපයකට ඉහත දිවයින ඩොලර් මිලියන 50කට මිලට ගන්නට සවුදි රජකුමරු බ්‍රැන්ඩන් ග්‍රිම්ෂෝව්ට යෝජකා කළේය. අපේ කාලයේ රොබින්සන් කෲසෝ ඒ යෝජනාව ප්‍රතික්ෂේප කළේ, “මට දූපත සල්ලිකාරයින්ගෙ නිවාඩු තිප්පොලක් කරන්නට වුවමනා නැහැ. හොඳම දේ එය හැමට රස විඳින්නට පුලුවන් ජාතික උද්‍යානයක් වෙනවනම්” කියමිනි.
2008 දී ඔහුට ඒ ඉලක්කය සපුරා ගන්නට පුලුවන් වූ අතර විය යුතු පරිද්දෙන්ම දිවයින ජාතික උද්‍යානයක් ලෙස ප්‍රකාශ කෙරුණි.
පරිවර්තනය - ලසන්ත ද සිල්වා.
