Vientiane Media

31/10/2023

ຜົນການແຂ່ງເຮືອປະເພນີປີ 2023 ທີ່ທ່າວັດຈັນ ນະຄອນຫຼວງວຽງຈັນ
----------------------------------------------------
ບຸນອອກພັນສາປະວໍລະນາ ແລະ ຊ່ວງເຮືອປະເພນີ ປີ 2023 ໄດ້ຈັດຂຶ້ນໃນວັນທີ 30 ຕຸລາ ນີ້, ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ, ເປັນປະທານໂດຍ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງ ຈັນ, ມີ ທ່ານ ດວງຕາ ສຸລິວົງ ເຈົ້າເມືອງ ຈັນທະບູລີ ປະ ທານຈັດງານບຸນອອກພັນສາປະວໍລະນາ ແລະ ຊ່ວງເຮືອທ່າວັດຈັນ, ມີບັນດາແຂກ ທາງພາກລັດ, ເອກະຊົນ, ພ້ອມດ້ວຍທູດ, ຕານຸທູດ, ແຂກພາຍໃນ-ແຂກຕ່າງປະເທດ ແລະ ມວນຊົນ ເຂົ້າຮ່ວມ.
ທ່ານ ດວງຕາ ສຸລິວົງ ໄດ້ກ່າວວ່າ: ບຸນອອກພັນສາປະວໍລະນາ ແລະ ຊ່ວງ ເຮືອປະເພນີທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ມີເຮືອ 55 ສີພາຍ ເຂົ້າແຂ່ງຂັນ10 ລຳ; ໃນນີ້, ເຮືອຍິງ 4 ລຳ ຜ່ານການແຂ່ງຂັນ ຜົນປະກົດວ່າ: ເຮືອປະເພນີຊາຍ ອັນດັບທີ 1 ແມ່ນເຮືອທະນາຄານພັດ ທະນາລາວ ( ນາວາສັກສິດ ) ໄດ້ຮັບຂັນເງິນ 1 ໜ່ວຍ, ຂັນໜູນວຽນມູນຄ່າ 60 ລ້ານກີບ ພ້ອມເງິນ 30 ລ້ານກີບ, ອັນດັບທີ 2 ເຮືອບໍລິສັດ ວຽງຈັນອຸດສາຫະກໍາເຫຼັກບ້ານຊຽງຄວນ ເມືອງຫາດຊາຍຟອງ ໄດ້ຮັບຂັນ 1 ໜ່ວຍ ພ້ອມເງິນ 25.000.000 ກີບ, ອັນດີບທີ 3 ແມ່ນ ເຮືອພອນພຣະແກ້ວ ບ້ານສີຖານໃຕ້ ໄດ້ຮັບຂັນ 1 ໜ່ວຍ ພ້ອມເງິນ 20.000. 000 ກີບ, ອັນດັບທີ 4 ເຮືອຂຸດຄົ້ນຫີນ-ຊາຍນ້ຳຟ້າບ້ານຫາດສວນ ເມືອງທຸລະຄົມ ໄດ້ຮັບເງິນ 15.000.000 ກີບ.
ສຳລັບເຮືອປະເພນີຍິງ ອັນດັບທີ 1 ແມ່ນເຮືອທິດາສາຍແວວ-ເຮືອນແພເມືອງຟ້າ ບ້ານຣັດຕະນະລັງສີ ນະຄອນໄກສອນ ພົມວິຫານ ໄດ້ຮັບຂັນເງິນ 1 ໜ່ວຍ ພ້ອມເງິນ 30 ລ້ານກີບ, ອັນດັບທີ 2 ແມ່ນເຮືອບໍລິສັດ ດວງຕາ ຫີນ-ຊາຍບ້ານຊຽງຄວນ ເມືອງຫາດຊາຍຟອງ ໄດ້ຮັບຂັນ 1 ໜ່ວຍ ພ້ອມເງິນ 25.000.000 ກີບ, ອັນດັບທີ 3 ແມ່ນເຮືອບໍລິ ສັດ 3B ບ້ານທ່າພຣະ ເມືອງຫາດຊາຍຟອງ ໄດ້ຮັບຂັນ 1 ໜ່ວຍ ພ້ອມເງິນ 20.000.000 ກີບ, ອັນດັບທີ 4 ແມ່ນເຮືອພອນພຣະແກ້ວ ບໍລິສັດຕະວັນ ໃຕ້ຟ້າຫີນ-ຊາຍ ບ້ານສີຖານໃຕ້ ໄດ້ຮັບເງິນ 15.000.000 ກີບ.

27/10/2023

ວັນທີ 25 ຕຸລາ 2023 ທີ່ວັດຊຽງທອງ ໄດ້ມີການເລີ່ມທົດລອງໄຕ້ໂຄມກາບ ໂຄມບັ້ງທີ່ຫ້ອຍຕາມອາຮາມແລະຫໍຕ່າງໆ ເພາະອີກບໍ່ຈັກມື້ຂ້າງຫນ້ານີ້ກໍ່ຈະຮອດມື້ໄຫລເຮືອໄຟກັນແລ້ວ.

Cr. ວັດຊຽງທອງ, Alounny Keovonglath

25/10/2023

ແຈ້ງປັບລາຄານ້ຳມັນ ເລິ່ມປະຕິບັດ 06:00 ໂມງຂອງວັນທີ 26/10/2023 ຕາມແຈ້ງການຈາກ ກຊ ອຸດສະຫະກຳແລະການຄ້າ ເລກທີ 1088/ກຄພນ ລົງວັນທີ 25 ຕລ 2023.

25/10/2023

ມອບລົດຫົວລາກພະລັງງານໄຟຟ້າ ສໍາລັບຂົນສົ່ງຫີນປູນ..............................................................
ບໍລິສັດ ໄຟຟ້າ ຫົງສາ ຈໍາກັດ ຮ່ວມກັບ ບໍລິສັດ ເມືອງເງິນ ເອັນເຕີໄພ ຈໍາກັດ ແລະ ບໍລິສັດ ໄທອີວີ ຈໍາກັດ ຈັດພິທີສົ່ງມອບລົດຫົວລາກພະລັງງານໄຟຟ້າ ສໍາລັບຂົນສົ່ງຫີນປູນ ພາຍໃນໂຄງການໂຮງໄຟຟ້າພະລັງງານຄວາມຮ້ອນຫົງສາ ເພື່ອຕອບສະໜອງນະໂຍບາຍທາງດ້ານການຮັກສາເບີ່ງແຍງສິ່ງແວດລ້ອມຂອງໂຄງການ ຂຶ້ນໃນວັນທີ 24 ຕຸລາ 2023 ທີ່ ອາຄານຫົງຄໍາໄຊຍາຄານ ບໍລິສັດ ໄຟຟ້າ ຫົງສາ ຈໍາກັດ ເມືອງຫົງສາ ແຂວງໄຊຍະບູລີ ລົງນາມມອບ-ຮັບລະຫວ່າງ ທ່ານ ໄພໂລດ ຕັນບັນຈົງ ຜູ້ອໍານວຍການໃຫຍ່ ບໍລິສັດ ເມືອງເງິນ ເອັນເຕີໄພ ຈໍາກັດ ແລະ ທ່ານ ພານຸວັດ ພາວະພູຕານ ຜູ້ອໍານວຍການຝ່າຍຂາຍ ແລະ ການຕະຫຼາດ ບໍລິສັດ ໄທອີວີ ຈໍາກັດ ມີທ່ານ ຄະທາຍຸດ ຊູພູນ ຜູ້ອໍານວຍການໃຫຍ່ ບໍລິສັດ ໄຟຟ້າ ຫົງສາ ຈໍາກັດ ທ່ານ ຄໍາຫຼ້າ ຜິວວັນນາ ເຈົ້າເມືອງຫົງສາ ແລະ ທ່ານ ທະວີສັກ ໄຊຍະວົງ ເຈົ້າເມືອງເງິນ ແລະ ຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມ.
ການຜະລິດກະແສໄຟຟ້າ ຖືເປັນພັນທະກິດຫຼັກຂອງ ບໍລິສັດ ໄຟຟ້າ ຫົງສາ ຈໍາກັດ ເຊິ່ງເປັນສ່ວນສໍາຄັນໃນການສ້າງຄວາມໝັ້ນຄົງທາງດ້ານພະລັງງານຂອງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລາດຊະອານາຈັກໄທ ດັ່ງທີ່ດໍາເນີນງານມາໂດຍຕະຫຼອດແລ້ວນັ້ນ ນອກຈາກນີ້ ບໍລິສັດຍັງໃຫ້ຄວາມສໍາຄັນກ່ຽວກັບນະໂຍບາຍທາງດ້ານສິ່ງແວດລ້ອມ ສັງຄົມ ແລະ ຄວາມເປັນທໍາໃນການປະຕິບັດງານ ໂດຍໄດ້ສຶກສາ ແລະ ເລີ່ມຕົ້ນໂຄງການຕ່າງໆ ທີ່ສອດຄ່ອງກັບນະໂຍບາຍດັ່ງກ່າວ ເພື່ອການດໍາເນີນງານທີ່ເປັນເລີດ ແລະ ມີປະສິດທະພາບໃນລະດັບສາກົນ ແລະ ເປັນທີ່ຮູ້ດີແລ້ວວ່າ ບໍລິສັດ ໄດ້ມີການດໍາເນີນງານຕາມມາດຕະຖານສາກົນ ຈົນໄດ້ຮັບການຮັບຮອງມາດຕະຖານດ້ານສິ່ງແວດລ້ອມສາກກົນ ຫຼື ISO 14001 ເວີຊັ່ນ 2015 ແລະ ມາດຕະຖານການຈັດການຄວາມປອດໄພ ອາຊີວະອະນາໄມ ແລະ ສະພາບແວດລ້ອມໃນການເຮັດວຽກ ຫຼື ISO 45001 ເວີຊັ່ນ 2018 ເປັນທີ່ຮຽບຮ້ອຍແລ້ວ ແລະ ຍັງໄດ້ຮັບໃບປະກາດຈາກ ກົມອຸດສາຫະກໍາ ແລະ ຫັດຖະກໍາ ກະຊວງອຸດສາຫະກໍາ ແລະ ການຄ້າ ໃຫ້ເປັນ Green Factory ແຫ່ງທໍາອິດໃນ ສປປ ລາວ ອີກດ້ວຍ ເຊິ່ງທັງໝົດນີ້ ເປັນສິ່ງທີີ່ຍໍ້າວ່າ ບໍລິສັດ ໄຟຟ້າ ຫົງສາ ຈໍາກັດ ໄດ້ຍຶດໝັ້ນ ແລະ ດໍາເນີນງານໂດຍເລັງເຫັນຄວາມສໍາຄັນໃນດ້ານສິ່ງແວດລ້ອມມາໂດຍຕະຫຼອດ.
ການນໍາໃຊ້ລົດຫົວລາກພະລັງງານໄຟຟ້າສໍາລັບຂົນສົ່ງຫີນປູນ 11 ຄັນ ໃນໄລຍະເລີ່ມຕົ້ນນີ້ ຈະເປັນການເລີ່ມຕົ້ນເພື່ອການສຶກສາການນໍາລົດພະລັງງານໄຟຟ້າມາທົດແທນ ແລະ ນໍາໃຊ້ພາຍໃນໂຄງການຕໍ່ໄປໃນອະນາຄົດ ແລະ ເປັນການມຸ່ງສູ່ສັງຄົມຄາບອນຕໍ່າ ທີ່ເປັນມິດກັບສິ່ງແວດລ້ອມ ທັງນີ້ ເພື່ອໃຫ້ສອດຄ່ອງກັບວິໄສທັດຂອງອົງກອນ ຄື: “ຜູ້ຜະລິດພະລັງງານໄຟຟ້າທີ່ດີທີ່ສຸດ ໃນ ສປປ ລາວ ດ້ວຍການດໍາເນີນງານທີ່ດີເລີດ ນໍາຄວາມສຸກມາສູ່ທຸກຄົນ”
----------
ພາບ-ຂ່າວ: ພະແນກຝ່າຍສື່ສານອົງກອນບໍລິສັດ ໄຟຟ້າຫົງສາ ຈຳກັດ

22/10/2023

ຮອງປະທານປະທານປະເທດ ຢ້ຽມຢາມບໍລິສັດຊີໂນອາກຣີ ໂປຕາສ ຈໍາກັດ.
===============000=============
ໃນໂອກາດທີ ທ່ານ ນາງ ປານີ ຢາທໍ່ຕູ້ ຮອງປະທານປະເທດແຫ່ງ ສປປ ລາວ ໄດ້ເຄື່ອນໄຫວຊຸກຍູ້ວຽກງານຢູ່ແຂວງຄໍາມ່ວນ ວັນທີ 21 ຕຸລາ 2023 ໂອກາດນີ້ ທ່ານ ຮອງປະທານປະເທດໄດ້ເຄື່ອນໄຫວຢ້ຽມຢາມ ແລະ ຊີ້ນໍາວຽກງານ ຢູ່ບໍລິສັດ ຊີໂນ-ອາກຣີ ໂປຕາສ ຈໍາກັດ, ຢູ່ທີ່ບ້ານດົງໄຕ້, ເມືອງ ທ່າແຂກ ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ພ້ອມດ້ວຍຄະນະນໍາຂອງແຂວງ ແລະ ພະແນກການກ່ຽວຂ້ອງ ຮ່ວມຕິດຕາມ.
ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ໂຖງຢົງເຫີງ ຜູ້ອໍານວຍການ ບໍລິສັດ ຊີໂນ-ອາກຣີ ໂປຕາສ ຈໍາກັດ, ພ້ອມທັງ ລາຍງານຫຍໍ້ກ່ຽວກັບສະພາບ ການເຄື່ອນໄຫວຂຸດຄົ້ນ ແລະ ຈໍາໜ່າຍຜະລິດຕະພັນ ຂອງບໍລິສັດ, ເຊິ່ງບໍລິສັດຊີໂນ-ອາກຣີ ໂປຕາສ ຈໍາກັດ ໄດ້ຈົດທະບຽນສ້າງຕັ້ງຂຶ້ນຢູ່ນະຄອນຫຼວງວຽງຈັນ ໃນເດືອນ ພຶດສະພາ 2009, ເປັນບໍລິສັດລະດັບສາກົນທີ່ດໍາເນີນການຂຸດຄົ້ນແຮ່ເກືອໂປຕາສ, ຜະລິດເກືອໂປຕາສ(ປຸ໋ຍໂປຕາສ) ແລະ ຈໍາໜ່າຍເກືອໂປຕາສ. ບໍລິສັດ ດັ່ງກ່າວ ມຸ້ງໝັ້ນທີ່ຈະກໍ່ສ້າງໂຄງການເກືອໂປຕາສຢູ່ລາວໃຫ້ເປັນໂຄງການສີຂຽວ, ເປັນມິດຕໍ່ສິ່ງແວດລ້ອມ ແລະ ພັດທະນາຢ່າງຍືນຍົງ. ພາຍໃຕ້ການສະໜັບສະໜູນອັນໃຫຍ່ຫລວງ ແລະ ນໍາພາ ຂອງລັດຖະບານທັງສອງປະເທດ, ຊີໂນ ໂປຕາສ ໄດ້ລົງເລິກພັດທະນາໃນຂົງເຂດເກືອໂປຕາສຢູ່ລາວເປັນເວລາ 10 ກວ່າປີແລ້ວ, ປະຈຸບັນພວມກໍ່ສ້າງກໍາລັງການຜະລິດຝຸ່ນໂປຕາສໃຫ້ບັນລຸ 3 ລ້ານໂຕນ/ປີ, ແຜນການໄລຍະກາງແມ່ນຈະສ້າງກໍາລັງການຜະລິດຝຸ່ນໂປຕາສໃຫ້ບັນລຸ 5 ລ້ານໂຕນ/ປີ, ແຜນການໄລຍະຍາວແມ່ນຈະສ້າງກໍາລັງການຜະລິດຝຸ່ນໂປຕາສໃຫ້ບັນລຸ 10 ລ້ານໂຕນ/ປີ, ເພື່ອປະກອບສ່ວນຊຸກຍູ້ເສດຖະກິດສັງຄົມຂອງລາວໃຫ້ພັດທະນາວ່ອງໄວຂື້ນ, ເພື່ອສ້າງເປັນສິນຄ້າຍີ່ຫໍ້ດັງຂອງລາວ, ກາຍເປັນຜູ້ຜະລິດ ແລະ ຜູ້ສະໜອງເກືອໂປຕາສລະດັບໂລກ, ເພື່ອປະກອບສ່ວນຢ່າງຕັ້ງໜ້າເຂົ້າໃນການຜະລິດກະສິກໍາຂອງໂລກ. ນອກນີ້ໃນເຂດດັ່ງກ່າວຍັງໄດ້ສ້າງເປັນສວນອຸດສາຫະກຳໝູນວຽນອັດສະລິຍະ ອາຊີ ໂປຕາສ ສາກົນ ໂດຍຈະແບ່ງອອກເປັນ 3 ພາກສ່ວນໃຫຍ່ຄື: ສວນອຸດສາຫະກໍາໂປຕາສ, ສວນອຸດສາຫະກຳອະໂປຕາສ ແລະ ເມືອງອັດສະລິຍະ ມີເນື້ອທີ່ທັງໝົດປະມານ 2.000 ເຮັກຕາ, ຄາດຄະເນການລົງທຶນທັງໝົດ 4,31 ຕື້ໂດລາສະຫະລັດ.
ໂອກາດດຽວກັນ ທ່ານ ຮອງປະທານປະເທດ ແຫ່ງ ສປປ ລາວ ຍັງໄດ້ມີຄໍາເຫັນຊີ້ນໍາ ແລະ ຕິລາຄາສູງຕໍ່ຜົນງານການເຄື່ອນໄຫວ ດໍາເນີນທຸລະກິດຂອງບໍລິສັດໃນໄລຍະຜ່ານມາ ແລະ ສະເໜີມາຍັງບໍລິສັດ ມີສ່ວນຮ່ວມຊ່ວຍເຫລືອໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ ຂອງ ສປປ ລາວ ໂດຍສະເພາະແມ່ນບັນຫາການສົ່ງອອກສິນຄ້າ, ບັນຫາການດຸ່ນດ່ຽງຊ່ວຍໜູນທາງດ້ານເງິນຕາຕ່າງປະເທດໃນການຄໍ້າຈູນເງິນກີບຂອງລາວ, ເຊິ່ງສະແດງອອກໃນການນໍາເຂົ້າ-ສົ່ງອອກ ໃຫ້ຜ່ານລະບົບທະນາຄານ ໃຫ້ລັດພວກເຮົາສາມາດຄຸ້ມຄອງບໍລິສັດ ກໍ່ຄືການຄຸ້ມຄອງເງິນຕາຕ່າງປະເທດ ເປັນສ່ວນຮ່ວມທີ່ຊ່ວຍເຫລືອເຊິ່ງກັນ ແລະ ກັນລະຫວ່າງພາກລັດ ແລະ ພາກທຸລະກິດ. ໃນເມື່ອຂຸດຄົ້ນສໍາເລັດຢູ່ແຕ່ລະຈຸດ ໃຫ້ບໍລິສັດນໍາໃຊ້ເຕັກນິກທີ່ທັນສະໄໝ ເພື່ອຈະຖົມຂຸມທີ່ຂຸດຄົ້ນແລ້ວ ເພື່ອໃຫ້ເຂດດັ່ງກ່າວກັບສູ່ສະພາບເດີ່ມ ໃຫ້ສາມາດນໍາໃຊ້ເຂົ້າສູ່ການຜະລິດຕໍ່ໄປ ເພື່ອອານາຄົດຂອງລູກຫລານໃນຕໍ່ໜ້າ. ເອົາໃຈໃສ່ສືບຕໍ່ໃນການປົກປັກຮັກສາສິ່ງແວດລ້ອມໃຫ້ດີຂຶ້ນກວ່າເກົ່າ ໂດຍສະເພາະການລະບາຍນໍ້າເຄັມ ແລະ ບໍາບັດນໍາເປື້ອນ ເພື່ອເປັນຕົວແບບໃຫ້ບັນດາບໍລິສັດຂຸດຄົ້ນບໍ່ແຮ່ ໃນລາວ ເວົ້າສະເພາະກໍ່ຄືຢູ່ແຂວງຄໍາມ່ວນ. ທັງສະເໜີໃຫ້ບໍລິສັດ ນໍາເອົາເຕັກນິກວິຊາການກ່ຽວກັບໂຄງການປູກເຂົ້າທົດລອງ 3 ລະດູ/ປີ ຢູ່ແຂວງຈໍາປາສັກ ໂດຍນໍາໃຊ້ແນວພັນເຂົ້າຈາກ ສປ ຈີນ ໃນການສົ່ງເສີມຜະລິດເຂົ້າເພື່ອຄໍ້າປະກັນສະບຽງອາຫານ ເພື່ອສົ່ງອອກ ເພື່ອຈະນໍາມາຂະຫຍາຍໃຫ້ບັນດາແຂວງທີ່ມີເງື່ອນໄຂ. ດ້ານການຊຸກຍູ້ສົ່ງເສີມແຮງງານລາວໃຫ້ບໍລິສັດຄົ້ນຄວ້າພິຈາລະນາສ້າງສູນຝຶກອົບຮົມຍົກລະດັບສີມືແຮງງານຂອງລາວ, ເພື່ອຊ່ວຍສ້າງບຸກຄະລາກອນ ແລະ ນັກວິຊາການເຕັກນິກທີ່ມີລະດັບສີມື, ມີຄວາມຮູ້ ເພື່ອຈະສືບຕໍ່ເຂົ້າມາເຮັດວຽກໃນບໍລິສັດໃຫ້ນັບມື້ນັບເພີ່ມຂຶ້ນ. ເອົາໃຈໃສ່ເພີ່ມທະວີປັບປຸງໃນເຂດໂຄງການແຫ່ງນີ້ໃຫ້ມີຄວາມສະອາດ, ສວຍງາມ, ມີຄວາມເປັນລະບຽບ ແລະ ສະຫງົບ, ພ້ອມນີ້ ຍັງໄດ້ສະແດງຄວາມຊົມເຊີນມາຍັງບໍລິສັດທີ່ຊ່ວຍພັດທະນາບ້ານທຸກຍາກ, ແກ້ໄຂຫລາຍບັນຫາໃນຊຸມຊົນ, ລວມເຖິງກິດຈະກໍາຕ່າງໆ ເພື່ອສ້າງລາຍຮັບທີ່ໝັ້ນຄົງໃຫ້ແກ່ປະຊາຊົນໃນເຂດໂຄງການ ແລະ ເຂດອື່ນໆ. ພ້ອມນັ້ນຍັງໄດ້ຍິນດີຮັບເອົາຄໍາສະເໜີຂອງບໍລິສັດໂດຍສະເພາະແມ່ນກ່ຽວກັບບັນຫາທີ່ຕິດພັນກັບນະໂຍບາຍ ໃນການສົ່ງອອກສິນຄ້າ ເພື່ອຈະໄດ້ນໍາໄປຄົ້ນຄວ້າ ສະເໜີຕໍ່ລັດຖະບານ ຊ່ວຍພິຈາລະນາແກ້ໄຂ. ໃນວັນດຽວກັນນັ້ນ ທ່ານຮອງປະທານປະເທດ ຍັງໄດ້ເດີນທາງໄປຢ້ຽມຢາມຈຸດບໍລິການຄ່ຽນຖ່າຍຂົນສົ່ງສິນຄ້າ ຜ່ານແດນ ຢູ່ທີ່ ສາງເກັບມ້ຽນສິນຄ້າ ຂອງດ່ານພາສີສາກົນຂົວມິດຕະພາບ 3 ແຂວງຄໍາມ່ວນ ຕື່ມອີກ.
#ແຂວງຄໍາມ່ວນ

20/10/2023

ກຳປູເຈຍ ລາວ ແລະ ຫວຽດນາມ ຊຸກຍູ້ການເຊື່ອມຕໍ່ພື້ນຖານເສດຖະກິດ
------------------------------------
ຕາມຂ່າວຈາກວິທະຍຸສາກົນຫວຽດນາມ, ເມື່ອບໍ່ດົນມານີ້ ຢູ່ແຂວງຢາລາຍຂອງ ສສ ຫວຽດນາມ, ຄະນະຜູ້ແທນສະພາແຫ່ງຊາດ 3 ປະເທດ ລວມມີ ກຳປູເຈຍ, ສປປ ລາວ, ສສ ຫວຽດນາມ ໄດ້ເຮັດວຽກກັບບັນດາແຂວງນອນໃນເຂດສາມຫລ່ຽມພັດທະນາ ສສ ຫວຽດນາມ-ສປປ ລາວ-ກຳປູເຈຍ ຊຶ່ງເປັນ ກິດຈະກຳນອນໃນລາຍການໄປສຳຫລວດຕົວຈິງ ເພື່ອຮັບໃຊ້ກອງປະຊຸມຂັ້ນສູງສະພາແຫ່ງຊາດ 3 ປະເທດ ຄັ້ງທີ 1. ຄາດວ່າ ຈະດຳເນີນ ໃນຕົ້ນເດືອນທັນວາປີນີ້. ໂດຍມີການນຳບັນດາກະຊວງ, ຂະແໜງການ, ທ້ອງຖິ່ນ ນອນໃນເຂດສາມຫລ່ຽມພັດທະນາໄດ້ແລກປ່ຽນ, ປຶກສາຫາລືກ່ຽວກັບບັນດາເນື້ອໃນຮ່ວມມືຂອງພາກພື້ນໃນບັນດາຂົງເຂດ, ເຊິ່ງລວມມີ: ການພົວພັນຕ່າງປະເທດ, ເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ. ພ້ອມດຽວກັນນັ້ນ, ບັນດາທ້ອງຖິ່ນຂອງ ສສ ຫວຽດນາມທີ່ນອນໃນເຂດສາມຫລ່ຽມພັດທະນາ ຄື ຢາລາຍ, ກອນຕຸມ, ດັກນົງ, ດັກລັກ, ບິ່ງເຟືອກ ກໍ່ໄດ້ມີ ຂໍ້ສະເໜີແນະເພື່ອເພີ່ມທະວີ ບົດບາດຂອງລັດຖະສະພາ 3 ປະເທດ ໃນການຊຸກຍູ້ການພົວພັນຮ່ວມມື, ຄູ່ເຈລະຈາ, ສາມັກຄີ, ວັດທະນາຖາວອນ, ຊຸກຍູ້ການເຊື່ອມຕໍ່ສາມພື້ນຖານເສດຖະກິດມຸ່ງໄປເຖິງ ເປົ້າໝາຍພັດທະນາແບບຍືນຍົງ.

20/10/2023

ປະທານປະເທດແຫ່ງ ສປປ ລາວ ພົບປະກັບນາຍົກລັດຖະມົນຕີກຳປູເຈຍ ທີ່ປັກກິ່ງ
-------------------------------------
ໃນໂອກາດການເຂົ້າຮ່ວມກອງປະຊຸມເວທີສົນທະນາ ລະດັບສູງ ໜຶ່ງແລວໜຶ່ງເສັ້ນທາງ ຄັ້ງທີ 3 ທີ່ ນະຄອນຫລວງປັກກິ່ງ ສປ ຈີນ, ໃນຕອນເຊົ້າວັນທີ 19 ຕຸລາ 2023, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ຍັງໄດ້ພົບປະກັບ ສົມເດັດ ໂມຫາ ບໍວໍ ທິບໍດີ ຮຸນ ມາແນດ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ເຊິ່ງ ທ່ານປະທານປະເທດ ໄດ້ສະແດງຄວາມປິຕິຍິນດີໄດ້ພົບປະກັບສົມເດັດ ຮຸນ ມາແນດ ພາຍຫລັງທີ່ ໄດ້ຮັບຕຳແໜ່ງ ນາຍົກລັດຖະມົນຕີ ກຳປູເຈຍ.

ທ່ານ ປະທານປະເທດໄດ້ສະແດງຄວາມຊົມເຊີຍຕໍ່ຜົນສໍາເລັດ ໃນການເລືອກຕັ້ງສະມາຊິກສະພາແຫ່ງຊາດຊຸດທີ 7 ແລະ ການສ້າງຕັ້ງຄະນະລັດຖະບານຊຸດໃໝ່ຂອງ ກຳປູເຈຍ ໂດຍແມ່ນ ສົມເດັດ ໂມຫາ ບໍວໍ ທິບໍດີ ຮຸນ ມາແນດ ເປັນນາຍົກລັດຖະມົນຕີ ຄົນໃໝ່, ເຊື່ອໝັ້ນຢ່າງໜັກແໜ້ນວ່າ ດ້ວຍຄວາມຮູ້ຄວາມສາມາດ ແລະ ປະສົບການ ຂອງສົມເດັດ ຈະສືບຕໍ່ນຳພາ ຣາຊະອານາຈັກ ກຳປູເຈຍ ກ້າວສູ່ຄວາມຈະເລີນຮຸ່ງເຮືອງຂຶ້ນໄປເລື້ອຍໆ; ສະແດງຄວາມເຊື່ອໝັ້ນວ່າ ສົມເດັດ ນາຍົກ ຮຸນ ມາແນດ ຈະເປັນກຳລັງແຮງໃໝ່ ໃນການຊູກຍູ້ ແລະ ສົ່ງເສີມ ສາຍພົວພັນມິດຕະພາບ ແລະ ການຮ່ວມມືລະຫວ່າງ ລາວ ແລະ ກຳປູເຈຍ ທີ່ເປັນປະເທດເພື່ອນມິດ, ບ້ານໃກ້ເຮືອນຄຽງ, ບ້ານແກ່ວເມືອງດອງມາແຕ່ບູຮານນະການ, ທັງເປັນຄູ່ຍຸດຮ່ວມທະສາດຮອບດ້ານ, ໝັ້ນຄົງຍາວນານ ໃຫ້ນັບມື້ນັບແໜ້ນແຟ້ນຍິ່ງຂຶ້ນໃນອະນາຄົດ.

ສອງຝ່າຍຕີລາຕາສູງຕໍ່ກັບການພົບປະກັນໃນຄັ້ງນີ້, ເຊິ່ງມີຄວາມໝາຍສໍາຄັນຫລາຍຕໍ່ການສົ່ງເສີມການພົວພັນ, ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງປະເທດ; ສອງຝ່າຍຈະສືບຕໍ່ຈັດຕັ້ງຜັນຂະຫຍາຍແຜນປະຕິບັດງານວ່າດ້ວຍການເປັນຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານໃຫ້ມີປະສິດທິຜົນ, ຜັນຂະຫຍາຍສົນທິສັນຍາ ວ່າດ້ວຍ ການກຳນົດເສັ້ນຊາຍແດນແຫ່ງຊາດລະຫວ່າງສອງປະເທດ ແລະ ມີຄວາມຍິນດີສືບຕໍ່ຊຸກຍູ້ຈັດຕັ້ງປະຕິບັດບັນດາສັນຍາ ແລະ ການຮ່ວມມືກັນທີ່ສອງປະເທດໄດ້ມີການຕົກລົງເຫັນດີເປັນເອກະພາບ ແລະ ໄດ້ລົງນາມຮ່ວມກັນ, ສືບຕໍ່ຊູກຍູ້ການລົງນາມໃນສັນຍາ ວ່າດ້ວຍ ການຫລີກລ່ຽງການເກັບພາສີຊໍ້າຊ້ອນ ລະຫວ່າງສອງຝ່າຍ, ການເປີດສາຍການບິນໂດຍກົງລະຫວ່າງ ລາວ ແລະ ກຳປູເຈຍ ຄືນໃໝ່ ໃຫ້ປົກກະຕິຄືກັບໄລຍະກ່ອນເກີດການລະບາດໂຄວິດ-19, ສົ່ງເສີມການທ່ອງທ່ຽວ ລາວ-ຫວຽດນາມ-ກຳປູເຈຍ ດ້ວຍແນວຄິດລິເລີ່ມ “ສາມປະເທດ, ໜຶ່ງຈຸດໝາຍ”, ການຮ່ວມມືໃນການພັດທະນາພະລັງງານ, ການຊື້-ຂາຍ ໄຟຟ້າ ລາວ-ກຳປູເຈຍ ແລະ ລາວ-ກຳປູເຈຍ-ສິງກະໂປ; ເຫັນດີເພີ່ມທະວີການຮ່ວມມືດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະແມ່ນການຈັດຝຶກແອບຮ່ວມ ລາວ-ຫວຽດນາມ-ກຳປູເຈຍ; ວຽກງານຊາຍແດນ, ການຄ້າ-ການລົງທຶນ ແລະ ການຮ່ວມມືດ້ານອື່ນໆ. ທ່ານປະທານປະເທດໄດ້ ສະເໜີໃຫ້ສອງນາຍົກ ລາວ ແລະ ກຳປູເຈຍ ສືບຕໍ່ປຶກສາຫາລື ໃນລາຍລະອຽດ ເພື່ອສືບຕໍ່ຊີ້ນຳຂະແໜງການຕ່າງໆຂອງສອງປະເທດໃນການຈັດຕັ້ງປະຕິບັດຕົວຈິງ ຢ່າງມີປະສິດທິຜົນ.

ສອງຝ່າຍສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ ໂດຍສະເພາະແມ່ນ ກຳປູເຈຍ ຍິນດີແລກປ່ຽນບົດຮຽນ ແລະ ສະໜັບສະໜູນ ສປປ ລາວ ໃນການເປັນປະທານອາຊຽນໃນປີ 2024 ໃຫ້ປະສົບຜົນສຳເລັດ.

ໃນໂອກາດນີ້ ທ່ານ ທອງລຸນ ສີສຸລິດ ປະທານປະເທດ ໄດ້ເຊື້ອເຊີນ ສົມເດັດ ຮູນ ມາແນດ ໄປຢ້ຽມຢາມ ສປປ ລາວ ໃນເວລາທີ່ເໝາະສົມ, ພ້ອມທັງໄດ້ຝາກຄວາມຢ້ຽມຢາມຖາມຂ່າວ, ຄວາມເຄົາລົບນັບຖື ແລະ ອວຍພອນໄຊເຖິງພະບາດສົມເດັດ ໂນໂຣດົມ ສີຫາໂມນີ, ສົມເດັດ ເຕໂຈ ຮຸນເຊນ ແລະ ບັນດາການນຳ ແລະ ອະດີດການນຳຂອງ ກຳປູເຈຍ.
-----------------------------------
ຂ່າວ-ພາບ: ກຕທ

20/10/2023

ຈີນ-ຣັດເຊຍ ເພີ່ມການຮ່ວມມືສ້າງ “ໜຶ່ງແລວ ໜຶ່ງເສັ້ນທາງ”
-----------------------------------
ຕາມຂ່າວຈາກວິທະຍຸສາກົນແຫ່ງ ສປ ຈີນ, ເມື່ອບໍ່ດົນມານີ້, ທ່ານ ສີ ຈິ້ນຜິງ, ປະທານ ປະເທດຈີນ ໄດ້ພົບປະກັບ ທ່ານ ວາລາດີເມຍ ປູຕິນ, ປະທານາທິບໍດີຣັດເຊຍ ທີ່ມາຢ້ຽມຢາມ ປະເທດຈີນ ເພື່ອເຂົ້າຮ່ວມກອງປະຊຸມເວທີປຶກສາຫາລື ສຸດຍອດການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 3.

ໃນໂອກາດນີ້ ທ່ານ ສີ ຈິ້ນຜິງ ໄດ້ຍົກໃຫ້ເຫັນວ່າ: ຣັດເຊຍ ແມ່ນຄູ່ຮ່ວມ ສຳຄັນ ຂອງ ສປ ຈີນ ທີ່ດຳເນີນ ການຮ່ວມມື ສາກົນ ເພື່ອຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ”. ສປ ຈີນ ຍິນດີຮ່ວມກັບ ຣັດເຊຍ ແລະ ປະເທດຕ່າງໆ ຂອງສະຫະພັນ ເສດຖະກິດ ເອີຣົບ-ອາຊີ, ຊຸກຍູ້ ໃຫ້ການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ” ເຊື່ອມຕໍ່ເຂົ້າກັບ ສະຫະພັນ ເສດຖະກິດ ເອີຣົບ-ອາຊີ, ດຳເນີນການ ຮ່ວມມື ໃນພາກພື້ນ ທີ່ມີລະດັບ ສູງກວ່າເກົ່າ ແລະ ເລິກເຊິ່ງ ກວ່າເກົ່າ, ຫວັງວ່າ ໂຄງການ ທໍ່ສົ່ງ ອາຍແກັສ ທຳມະຊາດ ຈີນ-ມົງໂກລີ-ຣັດເຊຍ ຈະໄດ້ຮັບ ຄວາມຄືບໜ້າ ໂດຍໄວ, ດຳເນີນ ການຮ່ວມມື ດ້ານທ່ອງທ່ຽວ ຂ້າມຊາດ ໃຫ້ດີ, ສ້າງແລວທາງ ເສດຖະກິດຈີນ-ມົງໂກລີ-ຣັດເຊຍ ເປັນເສັ້ນທາງ ແຫ່ງການ ພັດທະນາ ເຊື່ອມໂຍງ ເຊື່ອມຈອດ ທີ່ມີຄຸນນະພາບສູງ ສາຍໜຶ່ງ.ຂະນະທີ່ ສປ ຈີນ ສະໜັບ ສະໜູນ ປະຊາຊົນ ຣັດເຊຍ ເດີນຕາມເສັ້ນທາງ ຟື້ນຟູ ຄວາມຈະເລີນ ຮຸ່ງເຮືອງ ຂອງຊາດ ທີ່ເລືອກດ້ວຍ ຕົນເອງ, ປົກປັກຮັກສາ ອະທິປະໄຕ, ຄວາມໝັ້ນຄົງ ແລະ ຜົນປະໂຫຍດ ດ້ານການພັດ ທະນາແຫ່ງຊາດ.ຈາກນັ້ນ ທ່ານ ວາລາດີເມຍ ປູຕິນ ກ່າວວ່າ: ຂໍ້ລິເລິ່ມ ຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ” ທີ່ ທ່ານ ສີ ຈິ້ນຜິງ ໄດ້ສະເໜີອອກ ກ່ອນໜ້ານີ້ 10 ປີ ໄດ້ຮັບຜົນສຳເລັດ ອັນໃຫຍ່ຫລວງ, ໄດ້ກາຍເປັນ ຜະລິດ ຕະພັນ ສາທາ ລະນະສາກົນ ອັນສຳຄັນ ທີ່ທົ່ວໂລກ ເຫັນດີ ເຫັນພ້ອມນຳ ແລະ ຕີລາຄາສູງຕໍ່ ຄຳປາໄສ ຂອງ ທ່ານ ສີ ຈິ້ນຜິງ ໃນພິທີ ໄຂກອງປະຊຸມ ເວທີ ປຶກສາຫາລື ໃນສຸດຍອດ ຄັ້ງນີ້, ຍ້ອງຍໍ ຊົມເຊີຍ ທ່ານ ສີ ຈິ້ນຜິງ ທີ່ເບິ່ງກວ້າງ ມອງໄກ, ເຊື່ອໝັ້ນວ່າ ແລະ ອວຍພອນ ໃຫ້ພາລະກິດ ອັນຍິ່ງໃຫຍ່ ແຫ່ງການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ”ຈະໄດ້ຮັບ ຜົນງານໃໝ່ ໃຫຍ່ຫລວງກວ່າເກົ່າ.

20/10/2023

ທ່ານ ສອນໄຊ ສີພັນດອນ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດອາຊຽນ-ສະພາການຮ່ວມມືເຂດອ່າວ
--------------------------------
ໃນວັນທີ 20 ຕຸລາ 2023 ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນ-ສະພາການຮ່ວມມືເຂດອ່າວ (ອາຊຽນ-ຈີຊີຊີ) ທີ່ນະຄອນຫຼວງ ຣີຢາດ ຣາຊະອານາຈັກ ອາຣັບບີ ຊາອຸດິດ ພາຍໃຕ້ການເປັນປະທານຮ່ວມຂອງ ອິນໂດເນເຊຍ ແລະ ອາຣັບບີ ຊາອຸດິດ.

ບັນດາຜູ້ນໍາອາຊຽນ ແລະ ປະເທດສະມາຊິກ ຈີຊີຊີ (ບາເຣນ ກູເວດ ໂອມານ ກາຕາ ອາຣັບບີ ຊາອຸດິດ ແລະ ເອເມຣັດ ອາຣັບ) ໄດ້ສະແດງຄວາມຊົມເຊີຍຕໍ່ການຈັດກອງປະຊຸມສຸດຍອດອາຊຽນ-ຈີຊີຊີ ໃນຄັ້ງນີ້ ເຊິ່ງເປັນຂີດໝາຍອັນສໍາຄັນໃນການເພີ່ມທະວີການຮ່ວມມື ລະຫວ່າງສອງພາກພື້ນ ກອງປະຊຸມ ໄດ້ຊຸກຍູ້ໃຫ້ສອງພາກພື້ນຮັດແໜ້ນການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງ ເປັນຕົ້ນແມ່ນ ການສົ່ງເສີມການຮ່ວມມືດ້ານເສດຖະກິດ ໂດຍການຊອກຫາຊ່ອງທາງໃນການໃນການສົ່ງເສີມການຮ່ວມມືດ້ານການຄ້າ ແລະ ການລົງທຶນ ໂດຍສະເພາະດ້ານພະລັງງານ ພ້ອມນີ້ ກອງປະຊຸມ ຍັງໄດ້ເນັ້ນຢໍ້າເຖິງຄວາມສໍາຄັນໃນການສົ່ງເສີມການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນຂອງສອງພາກພື້ນ ໂດຍຜ່ານການແລກປ່ຽນທາງດ້ານວັດທະນະທໍາ ການຮ່ວມມືດ້ານການພັດທະນາຊັບພະ ຍາກອນມະນຸດ ການສຶກສາ ການເຝິກອົບຮົມວິຊາຊີບ ແລະ ໂຄງການສ້າງຂີດຄວາມສາມາດອື່ນໆ.

ໃນໂອກາດນີ້ ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຊຸກຍູ້ໃຫ້ອາຊຽນ ແລະ ຈີຊີຊີ ຊອກຊ່ອງທາງຮ່ວມມືກັນໃນດ້ານພະລັງງານ ກະສິກໍາ ການເຊື່ອມຈອດ ແລະ ການທ່ອງທ່ຽວ ແລະ ອື່ນໆ. ໃນນີ້, ທ່ານ ນາຍົກລັດຖະມົນຕີ ໄດ້ແຈ້ງໃຫ້ກອງປະຊຸມຊາບວ່າ ປີ 2024 ແມ່ນປີ ທ່ອງທ່ຽວລາວ ແລະ ໄດ້ເຊີນຊວນໃຫ້ນັກທ່ອງທ່ຽວຈາກບັນດາປະເທດອາຊຽນ ແລະ ຈີຊີຊີ ມາທ່ອງທ່ຽວ ໃນ ສປປ ລາວ. ພ້ອມນີ້ ທ່ານ ນາຍົກລັດຖະມົນຕີ ສອນໄຊ ສີພັນດອນ ຍັງໄດ້ແຈ້ງໃຫ້ກອງປະຊຸມຊາບ ກ່ຽວກັບການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ພ້ອມທັງໃຫ້ຄວາມໝາຍໝັ້ນຈະສືບຕໍ່ເຮັດວຽກກັບບັນດາປະເທດສະມາຊິກອາຊຽນ ແລະ ຈີຊີຊີ ເພື່ອເສີມຂະຫຍາຍການຮ່ວມມືອາຊຽນ-ຈີຊີຊີ ໃຫ້ແໜ້ນແຟ້ນຂຶ້ນກວ່າເກົ່າ ແລະ ນໍາຜົນປະໂຫຍດອັນແທ້ຈິງມາສູ່ປະຊາຊົນຂອງສອງພາກພື້ນ.

ໃນຕອນທ້າຍຂອງກອງປະຊຸມ ບັນດາຜູ້ນໍາອາຊຽນ ແລະ ຈີຊີຊີ ໄດ້ຮັບຮອງເອົາແຫຼງການຮ່ວມຂອງກອງປະຊຸມສຸດຍອດອາຊຽນ-ຈີຊີຊີ ແລະ ໄດ້ຮັບຊາບຂອບວຽກການຮ່ວມມືອາຊຽນ-ຈີຊີຊີ (2024-2028) ທີ່ ຮັບຮອງໂດຍລັດຖະມົນຕີຕ່າງປະເທດອາຊຽນ-ຈີຊີຊີ ເພື່ອເປັນທິດທາງໃຫ້ແກ່ການເສີມຂະຫຍາຍການຮ່ວມມື ລະຫວ່າງ ອາຊຽນ ແລະ ຈີຊີຊີ ໃນອະນາຄົດ.

20/10/2023

ເປີດນໍາໃຊ້ຢ່າງເປັນທາງການ ​ຂົວຂ້າມທາງຖະໜົນໄກສອນພົມວິຫານ
----------------------------------------
ວັນທີ 20 ຕຸລາ 2023 ເປີດນໍາໃຊ້ຢ່າງເປັນທາງການ​ແລ້ວ ຂົວຍ່າງຂ້າມທາງ ຖະໜົນໄກສອນພົມວິຫານ ເມືອງໄຊເສດຖາ ນະຄອນຫລວງວຽງຈັນ.​

ໃຊ້ເວລາ​ກໍ່ສ້າງ​ 8​ ເດືອນ​ ເລີ່ມແຕ່ 8/3/2023 ເບື້ອງຕົ້ນຈະໃຫ້ສຳເລັດພາຍໃນ​ 4 ເດືອນ​ ແຕ່ເນື່ອງຈາກພົບຂໍ້ຫຍຸ້ງຍາກຫລາຍຢ່າງ ຈຶ່ງເຮັດໃຫ້ການກໍ່ສ້າງຊັກຊ້າ ຫລຸດແຜນຄາດໝາຍ 4 ເດືອນ.​

ພາບ: Guru Lao, ລາຍການຂັບຂີ່ປອດໄພ

20/10/2023

20/10/2023

ລາຄານ້ຳມັນວັນນີ້! 19/10/2023

16/10/2023

ໂຊກແທ້ໂຊກວ່າ! ສາວລາວໄປເຮັດວຽກຢູ່ໄທ ດວງດີ! ຖືກຫວຍ 12 ລ້ານບາດ.

04/10/2023

ໃນຕອນເຊົ້າ ຂອງວັນທີ່ 04/10/2023 ລັດວິສາຫະກິດໄຟຟ້າສາຂາແຂວງ ບໍ່ແກ້ວ ໄດ້ຈັດພິທີປະກາດການຈັດຕັ້ງພະນັກງານນຳພາ, ຂັ້ນຄະນະຫ້ອງການ, ຄະນະສູນບໍລິການ ແລະ ຫົວໜ້າສະຖານີ, ເຊິ່ງໃຫ້ກຽດເປັນປະທານໂດຍທ່ານ ຄຳສິງ ມະນີຈັນ ຫົວໜ້າຝ່າຍຄຸ້ມຄອງລະບົບໄຟຟ້າພາກເໜືອ ແລະ ມີ ຫົວໜ້າ ພະແນກ ບໍລິຫານ ແລະ ສັງລວມ, ຄະນະໄຟຟ້າສາຂາແຂວງບໍ່ແກ້ວ, ຄະນະຫ້ອງການ, ຄະນະສູນບໍລິການ, ຄະນະສະຖານນີໄຟຟ້າ ແລະ ພະນັກງານ ພາຍໃນສາຂາແຂວງບໍ່ແກ້ວ ເຂົ້າຮ່ວມຢ່າງພ້ອມພຽງ.

ໃນການປະກາດການຈັດຕັ້ງໃນຄັ້ງນີ້ ທ່ານປະທານ ໄດ້ກ່າວເຖີ່ງຜົນງານໃນໄລຍະຜ່ານມາ ແລະ ການຈັດຕັ້ງປະຕິບັດວຽກງານໃນຕໍ່ໜ້າ ເຫັນວ່າສາມາດຍາດໄດ້ເຖີ່ງຜົນງານອັນດີເດັ່ນ ເປັນໄປຕາມແນວທາງຂອງຂັ້ນເທິງວາງອອກ, ພ້ອມດຽວກັນນັ້ນ ພະນັກງານນຳພາ ທີ່ໄດ້ຖືກແຕ່ງຕັ້ງ ກໍ່ໄດ້ຮັບຄຳປະຕິຍານຕົນຕໍ່ກັບການຈັດຕັ້ງ ຈະສຸມໃສຕໍ່ການພັດທະນາ ລັດວິສາຫະກິດໄຟຟ້າສາຂາແຂວງ ບໍ່ແກ້ວ ໃຫ້ມີຄວາມເຂັ້ມແຂງ ແລະ ເດີນໄປຕາມແນວທາງຂອງໄຟຟ້າລາວ ດ້ວຍບາດກ້າວອັນໃໝ່ ທີ່ໝັ້ນຄົງ.

ຂ່າວ: ຝ່າຍຄຸ້ມຄອງລະບົບໄຟຟ້າພາກເໜືອ

27/09/2023

15/07/2022

ລໍລຸ້ນນັດຊີງມື້ນີ້ 15/7/22 20:00 ໂມງ ລາວສູ້ໆ!

19/06/2022