LaoNews, Vientiane (2025)

11/10/2024

ອຸດົມໄຊ ຈູດທຳລາຍຢາເສບຕິດຫລາຍປະເພດ
==========
+ ວັນທີ 11 ຕຸລາ 2024, ແຂວງອຸດົມໄຊ ໄດ້ຈັດພິທີຈູດທຳລາຍຢາເສບຕິດ ເນື່ອງໃນໂອກາດ ວັນແຫ່ງຊາດຕ້ານຢາເສບຕິດ ຄົບຮອບ 23 ປີ (12 ຕຸລາ 2001–12 ຕຸລາ 2024). ມີ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ປະທານຄະນະກຳມະການຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນແຂວ,ງ ເຈົ້າໜ້າທີ່ ປກຊ-ປກສ ແລະ ພາກສ່ວນກ່ຽວຂ້ອງເຂົ້າຮ່ວມ.
+ ພັທ ບຸນຮັກ ໄຊຍະຕິ ຫົວຫນ້າຫ້ອງຕຳຫລວດ ປກສ ແຂວງ ລາຍງານວ່າ: ຢາເສບຕິດທີ່ນຳມາຈູດທຳລາຍຄັ້ງນີ້ ແມ່ນຢາເສບຕິດທີ່ສານປະຊາຊົນໄດ້ຕັດສິນສຳເລັດແລ້ວ ໃນນັ້ນ ມີ ເຮໂຣອິນ 752,3 ກຣາມ; ຢາບ້າຫຼາຍກວ່າ 10 ລ້ານເມັດ, ນໍ້າໜັກ 1.190 ກິໂລກຣາມ; ແປ້ງຝຸ່ນ 7,1 ກິໂລກຣາມ; ກາເຟອິນ 5,8 ກິໂລກຣາມ; ຢາຝິ່ນ 354,5 ກຣາມ; ຢາສູບໄຟຟ້າ 25 ກອກ.
+ ພ້ອມນີ້ ທ່ານໄດ້ຍົກໃຫ້ເຫັນສະພາບການລະບາດຂອງຢາເສບຕິດທີ່ແຜ່ລາມຢ່າງກວ້າງຂວາງຈາກຕົວເມືອງສູ່ຊົນນະບົດ ໃນລະດັບທີ່ແຕກຕ່າງກັນ ກາຍເປັນໄພອັນຕະລາຍຄຸກຄາມເຖິງຄວາມໝັ້ນຄົງຂອງຊາດ, ບ້ານ, ເມືອງ ແລະ ສັງຄົມ ທັງເປັນອຸປະສັກ ກົດໜ່ວງ ຖ່ວງດຶງການສ້າງສາພັດທະນາປະເທດຊາດ ນຳຄວາມເສຍ ຫາຍມາສູ່ຄອບຄົວ, ຄົນຮຸ່ນສືບທອດ ແລະ ປະຊາຊົນລາວບັນດາເຜົ່າ.

cr ຄວາມສະຫງົບ Lao Security News

11/10/2024

ກໍ່ສ້າງນະຄອນຫຼວງຮ່າໂນ້ຍ ໃຫ້ກາຍເປັນນະຄອນເຊື່ອມຕໍ່ທົ່ວໂລກ
-------------
ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 10 ຕຸລາ ຜ່ານມາຢູ່ສູນປະຊຸມແຫ່ງຊາດ ນະຄອນຫຼວງຮ່າໂນ້ຍ, ຄະນະບໍລິຫານງານສູນກາງພັກກອມມູນິດ ຫວຽດນາມ, ສະພາແຫ່ງຊາດ, ປະທານປະເທດ, ລັດຖະບານແຫ່ງ ສສຫວຽດນາມ, ຄະນະກຳມະການສູນກາງແນວໂຮມປະເທດຊາດ ຫວຽດນາມ ແລະ ນະຄອນຮ່າໂນ້ຍ ໄດ້ຈັດພິທີສະເຫຼີມສະຫຼອງລະດັບຊາດ 70 ປີແຫ່ງວັນປົດປ່ອຍນະຄອນຫຼວງ (10 ຕຸລາ 1954 – 10 ຕຸລາ 2024) ຂຶ້ນຢ່າງສົມກຽດ. ນີ້ແມ່ນເຫດການທີ່ມີຄວາມໝາຍສຳຄັນທີ່ສຸດໃນບັນດາການເຄື່ອນໄຫວສະເຫຼີມສະຫຼອງ 70 ປີແຫ່ງວັນປົດປ່ອຍນະຄອນຫຼວງຮ່າໂນ້ຍ. ໂດຍເຂົ້າຮ່ວມມີທ່ານ ໂຕເລິມ ເລຂາທິການໃຫຍ່ປະທານປະເທດ ຫວຽດນາມ, ທ່ານ ເຈິນແທັງເໝິນ ປະທານສະພາແຫ່ງຊາດການນຳນະຄອນຮ່າໂນ້ຍ, ພ້ອມກັບຜູ້ຕາງໜ້ານັກຮຽນຮູ້, ປັນຍາຊົນ, ສາສະໜາ, ປະຊາຊົນທຸກຊັ້ນວັນນະ ແລະ ກຳລັງປະກອບອາວຸດນະຄອນຫຼວງ.
ທ່ານ ໂຕເລິມ ກ່າວຄຳເຫັນໃນພິທີວ່າ: ໃນພາລະກິດອັນສະຫງ່າລາສີຂອງພັກ, ຂອງຊາດ, ນະຄອນຫຼວງ ຮ່າໂນ້ຍ ຍາມໃດກໍມີບົດບາດ, ທີ່ຕັ້ງສຳຄັນພິເສດ, ຕິດພັນກັບບັນດາຂີດໝາຍຮຸ່ງເຮືອງເຫຼືອງເຫຼື້ອມທີ່ເຕັມໄປດ້ວຍຄວາມເປັນກຽດ ແລະຄວາມເອກອ້າງທະນົງໃຈ. ຈາກນະຄອນມີຂອບຂະໜາດ, ເນື້ອທີ່, ພົນລະເມືອງຂ້ອນຂ້າງໜ້ອຍ, ພື້ນຖານໂຄງລ່າງ ແລະ ເສດຖະກິດຫຼ້າຫຼັງ, ຖືກສົງຄາມທຳລາຍຢ່າງໜັກໜ່ວງນັ້ນ, ປັດຈຸບັນ, ຮ່າໂນ້ຍ ໄດ້ກາຍເປັນສູນກາງການເມືອງ - ການບໍລິຫານແຫ່ງຊາດ, ສູນກາງໃຫຍ່ກ່ຽວກັບວັດທະນະທຳ, ວິທະຍາສາດ, ການສຶກສາ, ເສດຖະກິດ ແລະ ການເຊື່ອມໂຍງເຂົ້າກັບສາກົນ; ແມ່ນໜຶ່ງໃນຈຳນວນ 17 ເຂດຕົວເມືອງໃຫຍ່ທີ່ສຸດຂອງໂລກ. ນະຄອນຫຼວງຮ່າໂນ້ຍ ມີຄວາມໝັ້ນຄົງ, ປອດໄພ ແລະ ເຕັມໄປດ້ວຍພະລັງຊີວິດທີ່ດຶງດູດໃຈນັກທ່ອງທ່ຽວຢູ່ພາຍໃນ, ຕ່າງປະເທດ ແລະ ບັນດານັກລົງທຶນສາກົນ. ປັດຈຸບັນ, ຮ່າໂນ້ຍ ມີການພົວພັນມິດຕະພາບ, ຮ່ວມມືກັບນະຄອນຫຼວງຂອງບັນດາປະເທດຫຼາຍກວ່າ 100 ນະຄອນ, ມີການພົວພັນດ້ານເສດຖະກິດການຄ້າກັບເກືອບ 200 ປະເທດ ແລະ ເຂດແຄ້ວນ; ຮ່າໂນ້ຍ ເຂົ້າຮ່ວມ ແລະ ຮັບດຳລົງຕຳແໜ່ງສຳຄັນຢູ່ຫຼາຍເວທີປາໄສສາກົນ, ປະກອບສ່ວນຍົກສູງບົດບາດ, ທີ່ຕັ້ງ, ອິດທິພົນຊື່ສຽງຂອງນະຄອນຫຼວງ, ຂອງປະເທດຊາດບົນເວທີສາກົນ.
ທ່ານ ໂຕເລິມ ເນັ້ນໜັກວ່າ: ດ້ວຍທ່າແຮງພາຍຫຼັງໄລຍະ 40 ປີແຫ່ງການປ່ຽນແປງໃໝ່, ຫວຽດນາມ ພວມຢືນຕໍ່ໜ້າກາລະໂອກາດຄັ້ງປະຫວັດສາດ ເພື່ອນຳປະເທດຊາດກ້າວເຂົ້າສູ່ສັງກາດໃໝ່, ສັງກາດບືນຕົວຂຶ້ນຂອງຊາດ.

cr ປະຊາຊົນ

11/10/2024

ສິດໃນການເຂົ້າເຖິງອາຫານ ເພື່ອຊີວິດ ແລະ ອະນາຄົດທີ່ດີຂຶ້ນ ເພື່ອໃຫ້ພວກເຮົາພ້ອມກັນກ້າວໄປ
-------------
ທ່ານ ລິນຄໍາ ດວງສະຫວັນລັດຖະມົນຕີກະຊວງກະສີກໍາ ແລະ ປ່າໄມ້ໄດ້ຖະແຫຼງຂ່າວຕໍ່ສື່ມວນຊົນໃນໂອກາດ ວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ປີ 2024ໃນຕອນເຊົ້າວັນທີ11ຕຸລານີ້ ວ່າ:
ຄວາມທຸກຍາກ ແລະ ໄພອຶດຫີວ ໄດ້ເປັນບັນຫາໃຫຍ່ຂອງໂລກ ມາເປັນເວລາຫຼາຍສະຕະວັດແລ້ວ ຊຶ່ງ ອົງການອາຫານ ແລະ ການກະເສດ ຂອງ ສະຫະປະຊາຊາດ ໄດ້ກຳນົດເອົາ ວັນທີ 16 ຕຸລາ ຂອງທຸກໆປີ ເປັນວັນອາຫານໂລກ ເລີ່ມແຕ່ປີ 1980 ແລະ ໄດ້ກໍານົດເອົາ ວັນທີ 17 ຕຸລາ ເປັນວັນສາກົນ ເພື່ອລຶບລ້າງຄວາມທຸກຍາກ ເລີ່ມແຕ່ປີ 1992 ເປັນຕົ້ນມາ. ລັດຖະບານ ແຫ່ງ ສປປ ລາວ ເຫັນໄດ້ຄວາມສຳຄັນ ຂອງວຽກງານ ດັ່ງກ່າວ, ກໍໄດ້ກຳນົດເອົາ ວັນທີ 17-24 ຕຸລາ ຂອງທຸກໆປີ ເປັນ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ເລີ່ມແຕ່ ປີ 2003 ເປັນຕົ້ນມາ.
ດັ່ງນັ້ນ, ການໂຮມຊຸມນຸມ ແລະ ລະລຶກເຖິງ 2 ວັນດັ່ງກ່າວ ແມ່ນມີຄວາມໝາຍ ຄວາມສຳຄັນ ບໍ່ສະເພາະແຕ່ ແນໃສ່ປູກຈິດສຳນຶກ ແລະ ສ້າງຄວາມຮັບຮູ້ ໃຫ້ປະຊາຊົນໃນທົ່ວໂລກ ໄດ້ເຂົ້າໃຈເຖິງຄວາມທຸກຍາກ ແລະ ໄພອຶດຫີວ, ແຕ່ຍັງແມ່ນເພື່ອໃຫ້ມີກຳລັງໃຈ, ມີຄວາມກ້າຫານ ແລະ ມີຄວາມສາມາດບືນຕົວອອກຈາກຄວາມທຸກຍາກ ແລະ ໄພອຶດຫີວ, ພ້ອມທັງ ຮຽກຮ້ອງໃຫ້ທຸກພາກສ່ວນ ມີສ່ວນຮ່ວມໃນການຜະລິດສະບຽງອາຫານໃຫ້ຫຼາກຫຼາຍ, ມີປະສິດທິພາບ ແລະ ຍືນຍົງ.
ດັ່ງນັ້ນ, ໃນໂອກາດທີ່ມີຄວາມໝາຍຄວາມສຳຄັນນີ້ ຂ້າພະເຈົ້າຕາງໜ້າໃຫ້ກະຊວງກະສິກໍາ ແລະ ປ່າໄມ້ຂໍແຈ້ງຂ່າວກ່ຽວກັບການສະເຫຼີມສະຫຼອງວັນອາຫານໂລກທີ່ໄດ້ບັນຈົບຄົບຮອບ 44 ປີ ໃນປີ2024ນີ້, ລະນຶກເຖິງ ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ດັ່ງກ່າວຊຶ່ງພິທີສະເຫຼີມສະຫຼອງ ແລະ ລະລຶກເຖິງ ຢ່າງເປັນທາງການຈະໄດ້ຈັດຂຶ້ນໃນວັນທີ 23 ຕຸລາ 2024 ທີ່ ນະຄອນຫຼວງວຽງຈັນ, ພາຍໃຕ້ຄໍາຂວັນ:
“ສິດໃນການເຂົ້າເຖິງອາຫານ ເພື່ອຊີວິດ ແລະ ອະນາຄົດທີ່ດີຂຶ້ນ ເພື່ອໃຫ້ພວກເຮົາພ້ອມກັນກ້າວໄປ”
ຂ້າພະເຈົ້າຂໍຕາງໜ້າໃຫ້ ກະຊວງກະສິກຳ ແລະ ປ່າໄມ້ ໃນນາມເປັນເຈົ້າພາບ ຈັດພິທີສະເຫຼີມສະຫຼອງຢ່າງເປັນທາງການໃນປີນີ້ ກໍຄື ຄະນະຮັບຜິດຊອບຈັດງານທັງໝົດ ຂໍຖືໂອກາດນີ້ຮຽກຮ້ອງມາຍັງບັນດາທ່ານ ທົ່ວພັກທົ່ວລັດທົ່ວປວງຊົນລາວທັງຊາດ ຕະຫຼອດຮອດບັນດາຄູ່ຮ່ວມພັດທະນາຕ່າງໆຢູ່ ສປປ ລາວ ຈົ່ງພ້ອມກັນເປັນເຈົ້າການສະເຫຼີມສະຫຼອງ ວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກໃນປີນີ້ ໃຫ້ເປັນຂະບວນຟົດຟື້ນ, ມີຄວາມເປັນລະບຽບຮຽບຮ້ອຍ ແລະ ໃຫ້ປະສົບຜົນສໍາເລັດຕາມລະດັບຄາດໝາຍ ກໍຄືການຮ່ວມກັນ ຈັດຕັ້ງປະຕິບັດວຽກງານ ການຜະລິດສະບຽງອາຫານ ເພື່ອຄໍ້າປະກັນດ້ານສະບຽງອາຫານ ແລະ ເພື່ອເປົ້າໝາຍການຫຼຸດພົ້ນອອກຈາກຄວາມທຸກຍາກ ແລະ ຮັບປະກັນໃຫ້ທຸກຄົນສາມາດເຂົ້າເຖິງອາຫານທີ່ມີໂພຊະນາການ ຢ່າງມີປະສິດທິພາບ ແລະ ຍືນຍົງ.
ຂ່າວ-ພາບ:ພູວຽງຄຳ

21/09/2024

ປະເທດ ກໍາປູເຈຍ ປະກາດວ່າ ຈະຖອນອອກຈາກ ໂຄງການເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ (CLV-DTA)
---------------------------------------
ວັນທີ 20 ກັນຍາ 2024, ທ່ານ ຊົກເຈນດາ ໂຊຟີ ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ແລະ ການຮ່ວມມືສາກົນ ແຫ່ງຣາຊະອານາຈັກ ກຳປູເຈຍ ໄດ້ສົ່ງຈົດໝາຍໃຫ້ ລັດຖະມົນຕີຕ່າງປະເທດ ລາວ ແລະ ຫວຽດນານ ເຊິ່ງໄດ້ແຈ້ງໃຫ້ສອງປະເທດຮັບຊາບວ່າ ປະເທດກໍາປູເຈຍໄດ້ຕົກລົງຈະຖອນຕົວອອກຈາກໂຄງການ ລະຫວ່າງ ສາມປະເທດ ກໍຄືໂຄງການເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ (CLV-DTA).
ໂຄງການດັ່ງກ່າວ ໄດ້ສ້າງຕັ້ງຂຶ້ນໃນ ປີ 1999 ມີຈຸປະສົງເພີ່ມທະວີການຮ່ວມມື ໃນຂອບເຂດຄົມມະນາຄົມ, ໂທລະຄົມ, ພະລັງງານ, ການຄ້າ-ການລົງທຶນ, ກະສິກໍາ, ວັດທະນາທໍາ, ການສອນ-ການສຶກສາ ແລະ ການເພດ ລະຫວ່າງສາມປະເທດ ເພື່ອຮັກສາຄວາມສະຫງົບ ແລະ ຄວາມປອດໄພຂອງສາມປະເທດ, ຊຸກຍູ້ວຽກງານລົບລ້າງຄວາມທຸກຍາກ ແລະ ການພັດທະນາຂອງເສດຖະກິດ-ສັງຄົມໃນຂອບເຂດ CLV-DTA, ໄດ້ສົ່ງຜົນປະໂຫຍດທີ່ແທດຈິງໃຫ້ແກ່ປະຊາຊົນສາມປະເທດ.
ທ່ານ ຮຸນ ເຊນ ອະດີດນາຍົກກໍາປຸເຈຍ ໄດ້ສະແດງຄໍາເຫັນວ່າ: ໂຄງການ CLV-DTA ໄດ້ດໍາເນີນໄປ 25 ປີແລ້ວ, ໄດ້ຮັບຜົນສໍາເລັດອັນຫຼວງຫຼາຍໃຫ້ແກ່ ກໍາປູເຈຍ ແຕ່ວ່າກຸ່ມບໍ່ຫວັງດີໄດ້ຖືເອົາໂຄງການດັ່ງກ່າວ ເປັນເຄື່ອງມືໃນການດຳເນີນການປະຕິຫວັດສີໃນກໍາປູເຈຍ ເພື່ອໃສ່ຮ້າຍປ້າຍສີວ່າລັດຖະບານຈະເສຍທີ່ດິນໃຫ້ແກ່ປະເທດຫວຽດນາມ ແລະ ເຮັດໃຫ້ມີປະຊາຊົນເຂົ້າໃຈຜິດ ຕໍ່ ລັດກໍາປູເຈຍ. ນອກຈາກນີ້ ກຸ່ມບໍ່ຫວັງດີຍັງມີຄວາມພະຍາຍາມຢາກ ທຳລາຍສະຖຽນລະພາບຂອງສັງຄົມກໍາປູເຈຍ ແລະ ຍຸແຫຍ່ປະຊາຊົນເຂົ້າຮ່ວມກິດຈະກໍາທີ່ເກີດຂຶ້ນໃນວັນທີ 8 ສິງຫາ ປີ 2024.
ທ່ານ ຮຸນ ເຊນຍັງໄດ້ຊາບວ່າ ເຖິງວ່າລັດຖະບານກໍາປູເຈຍໄດ້ທັບມ້າງ ກົນອຸບາຍຂອງສັດຕູ ແຕ່ໄດ້ຄິດເຖິງຄວາມເປັນຫ່ວງຂອງປະຊາຊົນ, ລັດຖະບານກໍາປູເຈຍໄດ້ຕົກລົງວ່າ ຈະຖອນອອກຈາກໂຄງການ CLV-DTA.

12/09/2024

ກະຊວງ ປກສ ມອບເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມໃຫ້ສອງແຂວງ
===========
>>>ໃນວັນທີ 12 ກັນຍາ 2024, ຄະນະຕິດຕາມກວດກາໄພພິບັດທາງທຳມະຊາດ ກະຊວງປ້ອງກັນຄວາມສະຫງົບ ນຳພາໂດຍ ພົຈວ ເຄນທະວີໄຊ ເພັດພະນາ ຮອງຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ, ພົຈວ ສີສຸວັນ ທອງປະເສີດ ຮອງຫົວໜ້າກົມໃຫຍ່ພະລາທິການ ປກສ ພ້ອມດ້ວຍຄະນະ ໄດ້ນຳເອົາເຄື່ອງຊ່ວຍເຫຼືອໄປມອບໃຫ້ ປກສ ແຂວງຫຼວງນໍ້າທາ ແລະ ແຂວງອຸດົມໄຊ.
>>>ພົຈວ ເຄນທະວີໄຊ ເພັດພະນາ ໄດ້ສະແດງຄວາມເຫັນໃຈ ແລະ ຄວາມຫ່ວງໄຍຕໍ່ປະຊາຊົນທັງສອງແຂວງທີ່ກຳລັງປະສົບໄພນໍ້າຖ້ວມໃນຄັ້ງນີ້ ຂໍໃຫ້ຜ່ານພົ້ນວິກິດຄັ້ງນີ້ໄປໂດຍໄວ; ພ້ອມທັງກ່າວວ່າ: ເຄື່ອງທີ່ກະຊວງ ປກສ ນໍາມາມອບໃຫ້ເປັນເຄື່ອງຊ່ວຍເຫຼືອບັນເທົາທຸກຂັ້ນພື້ນຖານ ໃນນີ້ມີ: ອາຫານແຫ້ງ, ເຄື່ອງນຸ່ງຫົ່ມ ແລະ ຢາປົວພະຍາດ ຈຳນວນໜຶ່ງ ເພື່ອມອບໃຫ້ ປກສ ແຂວງຫຼວງນໍ້າ ແລະ ແຂວງອຸດົມໄຊ ນຳໄປແຈກຍ້າຍຊ່ວຍເຫຼືອຜູ້ປະສົບໄພພິບັດນໍ້າຖ້ວມ.
>>>ພົຈວ ອິນສົມ ທຳລະສິນ ຫົວໜ້າ ປກສ ແຂວງຫຼວງນໍ້າທາ ຕາງໜ້າຮັບເຄື່ອງຊ່ວຍເຫຼືອດັ່ງກ່າວ ໄດ້ກ່າວ ຂອບໃຈຢ່າງສູງມາຍັງຄະນະພັກ-ຄະນະນຳ ກະຊວງ ປກສ ທີ່ຍາມໃດກໍເປັນຫ່ວງເປັນໄຍປະຊາຊົນ ໂດຍສະເພາະຜູ້ປະສົບໄພໃນຄັ້ງນີ້ ແລະ ຈະນຳເອົາເຄື່ອງດັ່ງກ່າວນີ້ໄປແຈກຍ້າຍຊ່ວຍເຫຼືອຜູ້ໄດ້ຮັບຜົນກະທົບໂດຍໄວ.
ພາບ-ຂ່າວ: ພັຕ ຄຳແສງ ປັນຍາ

ຂໍ້ມູນຈາກ ຄວາມສະຫງົບ Lao Security News

12/09/2024

ກວາງນິງ ພິຈາລະນາສິນເຊື່ອໃຫ້ແກ່ລູກຄ້າທີ່ໄດ້ຮັບຄວາມເສຍຫາຍຈາກພາຍຸຢາກິ.......
ຂ່າວສານຫວຽດນາມລາຍງານວ່າ: ໃນວັນທີ 11 ກັນຍາ ຜ່ານມາ, ທ່ານປະທານຄະນະກຳມະການປະຊາຊົນແຂວງກວາງນິງ ຫວຽດນາມ ໄດ້ເປັນປະທານການພົບປະກັບບັນດາສະຖາບັນການເງິນ ເພື່ອປຶກສາຫາລືກ່ຽວກັບບັນດາມາດຕະການໜູນຊ່ວຍດ້ານສິນເຊື່ອໃຫ້ແກ່ລູກຄ້າທີ່ໄດ້ຮັບຄວາມເສຍຫາຍຈາກພະຍຸເລກ 3 (ຢາກິ).
ຂ່າວລະບຸວ່າ: ທ່ານ ກາວ ເຕືອງ ຮຸຍ ປະທານຄະນະກຳມະການປະຊາຊົນແຂວງກວາງນິງ ເນັ້ນໜັກວ່າ: ບັນດາອົງການສິນເຊື່ອ, ທະນາຄານ ຂອງແຂວງຕ້ອງປະຕິບັດບັນດານະໂຍບາຍທີ່ມີຢູ່ຢ່າງຄ່ອງຕົວ, ມີນະໂຍບາຍບໍ່ເຄັ່ງຄັດເກີນໄປຕໍ່ຜູ້ທີ່ໄດ້ຮັບຜົນກະທົບຈາກພາຍຸ, ພ້ອມກັນນັ້ນຕ້ອງຜັນຂະຫຍາຍບັນດານະໂຍບາຍສະເພາະຂອງອຳນາດການປົກຄອງ ໂດຍຖືວ່າພາຍຸເບີ 3 ແມ່ນໄພພິບັດ, ໃນນັ້ນຕ້ອງສຸມໃສ່ບັນດາເນື້ອໃນຄື: ການປັບໂຄງສ້າງໄລຍະເວລາກູ້ຢືມ, ການຮັກສາກຸ່ມໜີ້ສິນໃນປັດຈຸບັນ; ພິຈາລະນາການຍົກເວັ້ນ ຫຼື ຫຼຸດສິນເຊື່ອຍັງຄົງເຫຼືອ; ສືບຕໍ່ສະໜອງເງິນກູ້ໃໝ່ໃຫ້ແກ່ລູກຄ້າ, ລວມທັງຜູ້ທີ່ມີ ຫຼື ບໍ່ມີຫຼັກຊັບຄໍ້າປະກັນ; ຄົ້ນຄວ້າແກ້ໄຂການຊຳລະໜີ້ສິນ ແລະ ຈັດການຄວາມສ່ຽງຕາມລະບຽບ.
ຂະແໜງກະສິກຳ ແລະ ທະນາຄານແຫ່ງລັດ ສາຂາແຂວງກວາງນິງ, ພະແນກການ, ສາຂາທີ່ກ່ຽວຂ້ອງ ສະເໜີໃຫ້ແຂວງອອກເອກະສານແນະນຳປະຊາຊົນ ປະຕິບັດຂັ້ນຕອນການເລື່ອນ, ກຳນົດເວ ລາ, ຜ່ອນໜີ້ສິນ ແລະ ປ່ອຍເງິນກູ້ໃໝ່. ແຂວງກວາງນິງ ແມ່ນມີນະໂຍບາຍເພື່ອໜູນຊ່ວຍປະຊາຊົນທີ່ໄດ້ຮັບຜົນກະທົບຈາກພາຍຸເລກ 3 ໃນທຸກຂົງເຂດ.

ຂໍ້ມູນຈາກ ປະຊາຊົນ

12/09/2024

ສານປະຊາຊົນແຂວງຫຼວງນໍ້າທາ ຕັດສິນຄະດີພະນັກງານສໍ້ລາດບັງຫຼວງ ຈໍານວນ 13 ຄົນ............
ໃນຕອນເຊົ້າຂອງວັນທີ 3 ກັນຍາ 2024 ທີ່ຜ່ານມານີ້, ສານປະຊາຊົນແຂວງຫຼວງນໍ້າທາ ໄດ້ເປີດກອງປະຊຸມສານຂຶ້ນ ທີ່ສະໂມສອນກອງບັນຊາການທະຫານແຂວງຫຼວງນໍ້າທາ ເພື່ອພິຈາລະນາຄະດີອາຍາ ຕໍ່ຈໍາເລີຍ ເຊິ່ງເປັນອະດີດພະນັກງານລັດ ຢູ່ແຂວງຫຼວງນໍ້າທາ ແລະ ສ່ວນຫຼາຍແມ່ນນອນໃນຄະນະສະເພາະກິດຄວບຄຸມ, ແກ້ໄຂພະຍາດໂຄວິດ 19 ຂອງແຂວງ ທີ່ມີການກະທໍາຜິດ ຕິດພັນກັບການຈັດສົ່ງຄົນຕ່າງປະເທດກັບຄືນປະເທດ. ໃນກອງປະຊຸມພິຈາລະນາຄະດີດັ່ງກ່າວ, ສານໄດ້ເຊີນຜູ້ຕາງໜ້າຈາກອົງການຈັດຕັ້ງກ່ຽວຂ້ອງຂອງພັກ-ລັດ, ທະຫານ, ຕໍາຫຼວດ, ອົງການຈັດຕັ້ງມະຫາຊົນ, ຄອບຄົວຍາດພີ່ນ້ອງຂອງຈໍາເລີຍ ເຂົ້າຮ່ວມເປັນສັກຂີພິຍານ.
ສານໄດ້ດໍາເນີນກອງປະຊຸມຕາມກົດໝາຍ ແລະ ຂັ້ນຕອນທີ່ກໍານົດໄວ້ ເພື່ອພິຈາລະນາຄະດີຕໍ່ຈໍາເລີຍທັງໝົດ 13 ຄົນ, ຍິງ 1 ຄົນ ຕາມຄໍາສັ່ງຟ້ອງຜູ້ຖືກຫາຂຶ້ນສານ ແລະ ຄໍາຖະແຫຼງ ສະບັບເລກທີ 90/ອຍກຂ. ຫຼທ, ລົງວັນທີ 5 ສິງຫາ 2024 ຂອງຫົວໜ້າອົງການໄອຍະການປະຊາຊົນແຂວງຫຼວງນໍ້າທາ. ຜ່ານການໄຕ່ສວນຄະດີ ແລະ ການຄົ້ນຄວ້າພິຈາລະນາຂອງສານ ເຫັນວ່າ ຈໍາເລີຍທັງ 13 ຄົນ ມີຄວາມຜິດຄົບ 4 ອົງປະກອບຂອງການກະທໍາຜິດທາງອາຍາ ໃນການສໍ້ລາດບັງຫຼວງ ຕາມຄໍາຖະແຫຼງຂອງອົງການໄອຍະການປະຊາຊົນແຂວງຫຼວງນໍ້າທາ ແລະ ໄດ້ຕັດສິນລົງໂທດຕໍ່ຈໍາເລີຍ 13 ຄົນດັ່ງກ່າວ. ໃນນັ້ນ ມີໂທດຕັດອິດສະລະພາບຕະຫຼອດຊີວິດ 3 ຄົນ, ໂທດຕັດອິດສະລະພາບ 20 ປີ 1 ຄົນ, ໂທດຕັດອິດສະລະພາບ 10 ປີ 6 ຄົນ, ໂທດຕັດອິດສະລະພາບ 9 ປີ 6 ເດືອນ 1 ຄົນ, ໂທດຕັດອິດສະລະພາບ 8 ປີ 6 ເດືອນ 1 ຄົນ, ໂທດຕັດອິດສະລະພາບ 4 ປີ 6 ເດືອນ 1 ຄົນ. ພ້ອມນັ້ນ, ສານຍັງໄດ້ຕັດສິນໂທດປັບໃໝ ແລະ ຮິບຊັບທີ່ໄດ້ຈາກການກະທໍາຜິດທັງໝົດ.
ລາຍລະອຽດມີດັ່ງນີ້:
1.ທ້າວ ພົມມະສຸກ ວິໄລກຸນ (ຈໍາເລີຍ 1) ອະດີດຄະນະປະຈໍາພັກແຂວງ, ຮອງເຈົ້າແຂວງໆຫຼວງນໍ້າທາ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາຍັກຍອກຊັບຂອງລັດ ຫຼື ລວມໝູ່, ຮັບສິນບົນ, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ 826.212.626 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.
2.ທ້າວ ຄໍາຈັນ ອິນທອງໄຊ (ຈໍາເລີຍ 2) ອະດີດກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ 20 ປີ ແລະ ປັບໃໝ 311.363.170 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
3.ທ້າວ ຄໍາພັດ ພົມພິທັກ (ຈໍາເລີຍ 3) ພະນັກງານບໍານານ, ອະດີດຮອງຫົວໜ້າກອງບັນຊາການ ປກສ ແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 5.220.280 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
4.ທ້າວ ແກ້ວ ອິນທະວົງ (ຈໍາເລີຍ 4) ອະດີດຮອງຫົວໜ້າພະແນກສາທາລະນະສຸກແຂວງ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາຍັກຍອກຊັບຂອງລັດ ຫຼື ລວມໝູ່, ຮັບສິນບົນ, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ 765.489.002, 85 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.
5.ທ້າວ ພູຂົງ ແກ້ວກາງເພັງ (ຈໍາເລີຍ 5) ອະດີດຮອງຫົວໜ້າຫ້ອງວ່າການແຂວງ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາຍັກຍອກຊັບຂອງລັດ ຫຼື ລວມໝູ່, ຮັບສິນບົນ, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ ຕະຫຼອດຊີວິດ ແລະ ປັບໃໝ 776.303.476 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.
6.ທ້າວ ເພັດມະໂນຈິດ ໄຊຍະທີ (ຈໍາເລີຍ 6) ອະດີດຫົວໜ້າຂະແໜງພົວພັນຮ່ວມມືສາກົນ ພະແນກການຕ່າງ ປະເທດແຂວງ ມີຄວາມຜິດທາງອາຍາໃນການສໍ້ລາດບັງຫຼວງ ໃນຂໍ້ຫາ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 8 ປີ 6 ເດືອນ ແລະ ປັບໃໝ 3.198.523 ກີບ, ພ້ອມທັງ ຮິບຊັບທີ່ໄດ້ມາຈາກການກະທໍາຜິດ.
7.ທ້າວ ມານະຈິດ ຫຼວງລືໄຊ (ຈໍາເລີຍ 7) ອະດີດພະນັກງານວິຊາການ ພະແນກສາທາລະນະສຸກແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ ແລະ ຟອກເງິນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 306.538.878,5 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
8.ທ້າວ ວົງເພັດ ຊັນຊາຍ (ຈໍາເລີຍ 😎 ອະດີດພະນັກງານວິຊາການ ຫ້ອງວ່າການແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 7.313.895 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
9.ທ້າວ ຄໍາມອນ ດວງພະຈັນ (ຈໍາເລີຍ 9) ອະດີດຮອງຫົວໜ້າຂະແໜງຄວບຄຸມພະຍາດຕິດຕໍ່ ພະແນກ ສາທາລະນະສຸກແຂວງ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ, ປອມແປງເອກະສານ ຫຼື ນໍາໃຊ້ເອກະສານປອມ ແລະ ຟອກເງິນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 306.499.550 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
10.ທ້າວ ຄອນທອງ ເລື່ອງຄໍາມາ (ຈໍາເລີຍ 10) ອະດີດຫົວໜ້າຄະນະຄຸ້ມຄອງເຂດເສດຖະກິດພິເສດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ໃຫ້ສິນບົນ ແລະ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 5.813.998,86 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
11.ນາງ ປິ່ນແກ້ວ ວິວັນໄຊ (ຈໍາເລີຍ 11) ອະດີດຮອງຫົວໜ້າຄະນະຄຸ້ມຄອງເຂດເສດຖະກິດພິເສດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ໃຫ້ສິນບົນ ແລະ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 10 ປີ ແລະ ປັບໃໝ 5.113.428,6 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
12.ທ້າວ ແສງພາວັນ ແກ້ວມະນີວົງ (ຈໍາເລີຍ 12) ອະດີດຮອງຫົວໜ້າຄະນະຄຸ້ມຄອງເຂດເສດຖະກິດພິເສດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່, ສວຍໃຊ້ຖານະຕໍາ ແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 9 ປີ 6 ເດືອນ ແລະ ປັບໃໝ 2.025.630 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
13.ທ້າວ ພົງສັກ ວົງມະນີ (ຈໍາເລີຍ 13) ອະດີດຮອງຫົວໜ້າກອງບັນຊາການ ປກສ ເຂດບໍ່ເຕັນ ມີຄວາມຜິດທາງອາຍາ ໃນການສໍ້ລາດບັງຫຼວງ ໃນຂໍ້ຫາ ສວຍໃຊ້ຖານະຕໍາແໜ່ງ, ສິດອໍານາດ, ໜ້າທີ່ເອົາຊັບຂອງລັດ, ລວມໝູ່ ຫຼື ບຸກຄົນ. ຖືກລົງໂທດຕັດອິດສະລະພາບ 4 ປີ 6 ເດືອນ ແລະ ປັບໃໝ 920.540 ກີບ, ພ້ອມທັງຮິບຊັບທີ່ໄດ້ມາຈາກການກະທໍາຜິດ.
ການກະທໍາຜິດຂອງພວກກ່ຽວ ແມ່ນຜິດຕໍ່ກົດໝາຍວ່າດ້ວຍການຕ້ານການສໍ້ລາດບັງຫຼວງປີ 2012 ແລະ ປະມວນກົດໝາຍອາຍາ ປີ 2017.
ພາຍຫຼັງອ່ານຄໍາຕັດສິນແລ້ວ, ສານຍັງໄດ້ແຈ້ງໃຫ້ພວກກ່ຽວຊາບກ່ຽວກັບສິດ ແລະ ພັນທະຂອງພວກກ່ຽວຕາມທີ່ກົດໝາຍໄດ້ກໍານົດໄວ້.
ການຕັດສິນຄະດີດັ່ງກ່າວ ແມ່ນສືບເນື່ອງມາຈາກຜົນຂອງການກວດກາ ແລະ ດໍາເນີນຄະດີຕໍ່ພະນັກງານ, ຜູ້ປະກອບການ ຫຼື ບຸກຄົນ ທີ່ມີສ່ວນກ່ຽວຂ້ອງກັບການກະທໍາຜິດ ທີ່ຕິດພັນກັບການຈັດສົ່ງຄົນຕ່າງປະເທດກັບຄືນປະເທດ ໃນໄລຍະການເຄື່ອນໄຫວຄວບຄຸມ, ແກ້ໄຂການແພ່ລະບາດຂອງພະຍາດໂຄວິດ 19 ຢູ່ແຂວງຫຼວງນໍ້າທາ.
ແຫຼ່ງຂ່າວ:ອົງການກວດກາແຫ່ງລັດ

11/09/2024

ເຫດການ 11 ກັນຍາ ຂອງອາເມລິກາ 23ປີ
11.09.2001-11.09.2024

11/9/2001, ຊາຍໜຸ່ມ 19 ຄົນຈີ້ຍົນ 4 ລໍາ; ເອົາ 2 ລໍາ ຕໍາຕຶກ ຢູ່ ນິວຢອກ ສ. ອາເມລິກາ; ອີກລໍາໜຶ່ງຕໍາ ທໍານຽບຫ້າແຈ. ສ່ວນລໍາທີ4 ຕົກ ກ່ອນຈະເຖິງເປົ້າໝາຍ. ມີຜູ້ເສຍຊີວິດເຖິງ 2.977 ຄົນ. ວ່າແມ່ນ ແຜນປອງຮ້າຍ ຂອງບິນລາເດນ ຫົວໜ້າອານກໍອີດະ ແຕ່ຝ່າຍອາເມລິກາ ບໍ່ສາມາດເປີດເຜີຍ ຫຼັກຖານທີ່ໜ້າເຊື່ອຖືໄດ້ມາຮອດສູ່ມື້ນີ້.
ການຈູດເຮືອນຫຼາຍຫຼັງຫວັງຈັບໜູໂຕດຽວໄດ້ ດໍາເນີນໄປ 10 ປີເຕັມ.
ເປັນຫຍັງ ອາເມລິກາ ມີຖານທັບຢາຍທົ່ວໂລກ, ມີ ເຕັກໂລໂລຊີການທະຫານເປັນເລີດຈຶ່ງໃຊ້ເວລາຮອດ 10 ປີ ເພື່ອຈັບ ບິນລາເດນ ຄົນດຽວ? ສົມທົບໃສ່ຫຼັກຖານທີ່ບໍ່ໜັກແໜ້ນຄືເທິງນັ້ນ ໂລກຈຶ່ງຕັ້ງຂໍ້ສົງໃສເຖິງເຈດຕະນາທີ່ແທ້ຈິງຂອງໂຕແຫຼວກະຫາຍເລືອດແລະຊີ້ນມະນຸດ.
ເຮືອນຊານບ້ານຊ່ອງ, ຖານການຜະລິດຖືກທຳລາຍ, ປະຊາຊົນບາດເຈັບລົ້ມຕາຍ ນັບເປັນຫຼາຍແສນ.
ອົງການປົກຄອງອາເມລີກາ ໄດ້ໃຊ້ເຫດການນີ້ເປັນຂໍ້ອ້າງເປີດສາກລົງມືແກ້ແຄ້ນ ຕາມຈັບ ບິນລາເດນ ດ້ວຍ “ສົງຄາມຕ້ານຜູ້ກໍ່ການຮ້າຍ” ລາມມາໃສ່ “ໂຄ່ນລົ້ມຜະເດັດການ ເພື່ອປະຊາທິປະໄຕ” ຢູ່ເຂດອາຊີໄຕ້,ຕະເວັນອອກກາງແລະອາຟະລິກກາເໜືອທີ່ເປັນມຸດສະລິມ.
ທຸກບ່ອນທີ່ສົງໃສວ່າ ບິນລາເດນ ໄປເຄື່ອນໄຫວ ຫຼື ລີ້ຊ້ອນຢູ່ ລ້ວນແຕ່ຖືກນຳໄປບຸກໂຈມຕີ,
-7/10/2011 ສະຫະລັດ ບຸກໂຈມຕີ ອັຟະການິສະຖານ ໃນຖານຊຸກເຊື່ອງຕົວ ບິນລາເດນ ແລະຜູ້ກໍ່ການຮ້າຍແລະເຂົ້າຍຶດຄອງ 10 ປີ ຈຶ່ງຖອນອອກ ເພື່ອກໍ່ໄຟຢູ່ອູກະແຣນ.
-2003 ກໍ່ຖະຫຼົ່ມອີຣັກ ດ້ວຍຂໍ້ຕູ່ຫາວ່າ ມີອາວຸດທໍາລາຍລ້າງ. 30/12/2006 ທ່ານຊັດດໍາຮຸດເຊນຖືກປະຫານໂດຍທີ່ບໍ່ໄດ້ມີອາວຸດທໍາລາຍລ້າງຕາມຖືກຕູ່ຫາແຕ່ຢ່າງໃດ.
-12/2010, ພາຍຫຼັງທີ່ໄດ້ສ້າງເງື່ອນໄຂສຸກງອມພ້ອມແລ້ວ, ອາເມລິກາກໍ່ຊຸກຍູ້ເປີດສາກຂະບວນ”ການໂຄ່ນລົ້ມຜະເດັດການ ເພື່ອປະຊາທິປະໄຕ” ເອີ້ນວ່າ “ລະດູບານໃໝ່ອາຣັບ” ຢູ່ຕຸຍນີຊີ, ມາຣົກ, ຊີຣີ, ລີບີ, ເອຢິບ, ບາເຣນ...
ບັນດາປະເທດດັ່ງກ່າວ ເຄີຍຮົ່ມເຢັນ ຢູ່ດີກິນດີ ມີກຽດສັກສີ ເອກອ້າງທະນົງໃຈ ມັ່ງຄັ່ງເຂັ້ມແຂງ ພາຍໃຕ້ການປົກຄອງຂອງ ຜູ້ນໍາທີ່ເອີ້ນວ່າ “ຈອມຜະເດັດການ” ທີ່ຕໍ່ມາເມື່ອໄດ້ຖືກໂຄ່ນລົ້ມ, ປະເທດກໍ່ໄດ້ກ້າວເຂົ້າສູ່ ”ປະຊາທິປະໄຕ” ທີ່ມີຄວາມວຸ້ນວາຍດ້ານການເມືອງຄວາມໝັ້ນຄົງ, ເກີດເສິກສົງຄາມ ການຕົກຕໍ່າທາງດ້ານເສດຖະກິດ ຊີວິດການເປັນຢູ່ຝືດເຄືອງ ຊີວິດຂາດຄວາມໝັ້ນຄົງ ລົ້ມຕາຍ ອົບພະຍົບພັດພາກຖິ່ນຖານ ຂະໜາດໃຫຍ່ ເຂົ້າສູ່ ເອີຣົບ ກາຍເປັນບັນຫາພາກພື້ນແລະໂລກຮ້າຍກວ່າໃນສະໄໝສົງຄາມໂລກ.
-2/5/2011 ໜ່ວຍຕີພິເສດອາເມລິກາ ປິດລັບບິນຈາກຖານທັບຢູ່ອັຟະການິສະຖານ ເລັດລອດເຂົ້າເມືອງນ້ອຍ ອາບົດຕາບັບ ຢູ່ນະຄອນຫຼວງຂອງປາກິສະຖານ ສັງຫານ ບິນລາເດນ
ຈູດເຮືອນຫຼາຍຫຼັງວອດວາຍຫຼາຍບ້ານມາແລ້ວ ຈຶ່ງຈັບໜູ
23 ປີ ມາແລ້ວ ທີ່ຍົນຕໍາຕຶກ ແລະ 13 ມາແລ້ວທີ່ ບິນລາເດນຖືກສັງຫານ, ບັນດານັກວິເຄາະສ່ວນໃຫຍ່ເຫັນວ່າ ເປັນການສົມຮູ້ຮ່ວມຄິດແລະສ້າງຂໍ້ອ້າງເພື່ອກໍ່ສົງຄາມຂະຫຍາຍອິດທິພົນດ້ານການທະຫານ ແລະຍາດແຍ່ງຜົນປະໂຫຍດດ້ານເສດຖະກິດ ໂດຍມີ ນາຍທຶນຄ້າອາວຸດ ເປັນຜູ້ຢູ່ເບື້ອງຫຼັງ.
ຜົນກະທົບຂອງ ຍົນຕໍາຕຶກ ການລ້າງແຄ້ນ ຍັງຈະແກ່ຍາວ ເປັນໄຟໝົກໃໝ້ໝື້ກະຫາຍສົງຄາມທີ່ມີມາແຕ່ເດີມແລ້ວນັ້ນລຸກລາມໄປ ລະເບີດເປັນແປວໄຟກອງຮ້າເຜົາຜານບໍລິເວນອ່ອນແອ ຂາດຄວາມສາມັກຄີເອກະພາບ ເປັນປຶກແຜ່ນ ສະຕິລະວັງຕົວບໍ່ສູງ ມັກສະເຫວີຍສຸກ ທະເຍີທະຍານ ຖືຜົນປະໂຫຍດສ່ວນຕົວ ແລະພັກພວກກຸ່ມກ້ອນເໜືອກວ່າຜົນປະໂຫຍດຂອງຊາດ ສໍ້ລາດບັງຫຼວງ ຂາດຄວາມຮັບຜິດຊອບ ມັກງ່າຍ ຂີ້ຄ້ານລົງສ້າງຮາກຖານ ຂີ້ຄ້ານຮຽນຮູ້ອັນໃໝ່.
ໃນສະພາບການວິກິດການຊໍ້າຊ້ອນ ຄືປະຈຸບັນ, ປະເທດທີ່ມີຄວາມບອບບາງຍິ່ງມີຄວາມສ່ຽງສູງ ທີ່ຈະຖືກມ້າງເພໄດ້ງ່າຍ.
ໂຄວິດຜ່ານໄປ ໃນ3 ປີດ້ວຍການໃຊ້ເຕັກໂນໂລຊີສູງ, ແຕ່ການປະທະກັນທາງດ້ານການທະຫານທີ່ມີ ອາເມລິກາຢູ່ເບື້ອງຫຼັງ ພັດໃຊ້ເຕັກໂນໂລຊີ ແກ່ຍາວການເຂ່ນຂ້າມ້າງເພທໍາລາຍຊໍ້າຍັງແຜ່ຂະຫຍາຍ ອອກໄປ ຕາເວັນອອກກາງ ແລະ ຈົງໃຈປັດຖ່ານໄຟຮ້ອນເອີຣົບຕາເວັນອອກມາໃສ່ ເຂດອາຊີຕະເວັນອອກ ໃກ້ປະເທດເຮົາ.

11/09/2024

ສປປ ລາວ ຕົກເປັນເປົ້າໝາຍຂອງການປະຕິວັດສີ ຂອງມະຫາອຳນາດຕາເວັນຕົກ ຫຼືບໍ ?
---------------------------
ກ່ອນອື່ນ ເຮົາມາຮູ້ຈັກກັບຄຳວ່າ “ການປະຕິວັດສີ” Color revolutions ກັນກ່ອນ.
ການປະຕິວັດສີ ແມ່ນການໃຊ້ປະຊາຊົນປະເທດຕ່າງໆ ລົ້ມລ້າງລັດຖະບານ ແລະໂຄງສ້າງດ້ານການປົກຄອງ ເພື່ອຈັດຕັ້ງລັດຖະບານຫຸ່ນເຊີດ ຂອງພວກນັກລ່າອານານິຄົມ ເຮັດໜ້າທີ່ເປັນບໍລິວານ ຫຼືຫົວເມືອງຂຶ້ນແບບໃໝ່ຂອງເຂົາ.
ແນວຄິດຂອງການເຮັດການປະຕິວັດສີນີ້ ມີຂຶ້ນໂດຍກຸ່ມເຄືອຂ່າຍຄົນຮັ່ງມີໃນອເມຣິກາ ທີ່ມີອິດທິພົນແຊກຊ້ອນໃນສະພາຄວາມໝັ້ນຄົງລະຫວ່າງປະເທດ Council on Foreign Relations (CFR) “ສະໂມສອນນາຍທຶນແຫ່ງນິວຢອຣ໌ຄ” ຈັດຕັ້ງຂຶ້ນສຳລັບຊຸກຍູ້ນະໂຍບາຍການຕ່າງປະເທດຂອງສະຫະລັດ ເພື່ອຜົນປະໂຫຍດທາງການຄ້າ ແລະພູມີລັດຖະສາດຂອງຕົນ.
ເຮົາໄດ້ຍິນຄຳວ່າ “ການປະຕິວັດສີ” ຄັ້ງແຮກ ໃນປີ 2003 ຄື “ການປະຕິວັດດອກກຸຫຼາບ” ໃນປະເທດຈໍຣ໌ເຈຍ. ແຕ່ທີ່ໂດ່ງດັງ ແລະມີຄວາມສຳເລັດທີ່ສຸດ ຄື “ການປະຕິວັດສີສົ້ມ” ໃນປະເທດຢູເຄຣນ ໃນປີ 2014 ໂດຍການລຸກຮືຂຶ້ນຂອງປະຊາຊົນທີ່ໃສ່ສີສົ້ມ ເປັນສັນຍາລັກ ທີ່ໄດ້ຮັບການຍູ້ໜູນຢ່າງເປັນລະບົບຈາກມະຫາອຳນາດຕາເວັນຕົກ ທີ່ມີສະຫະລັດ ເປັນແກນນຳ. ມີການຈັດຕັ້ງກອງກຳລັງຝ່າຍຂົວຈັດ ແລະນີໂອນາຊີ ຢູ່ເບື້ອງຫຼັງຜູ້ປະທ້ວງ ຂັບໄລ່ ໂຄ່ນລົ້ມລັດຖະບານປະທານາທິບໍດີ ຍານູໂຄວິຊ ທີ່ມີຄວາມສຳພັນໜຽວແໜ້ນກັບຣັສເຊຍ ເພື່ອແຕ່ຕັ້ງ ວິຄຕໍຣ໌ ຍູເຊນໂກ ທີ່ໂປຣອເມຣິກາ ຂຶ້ນເປັນປະທານາທິບໍດີແທນ ຕໍ່ດ້ວຍວລາດີມີ ເຊເລນສກີ ດາວຕະຫຼົກ ທີ່ມີແນວຄິດນາຊີສຸດໂຕ່ງ ດຳເນີນການປາບປາມ ເຂັ່ນຂ້າຮາວີ ຊາວສລາຟ ຣັສເຊຍ ໃນພູມີພາກດອນບາສ ທີ່ຕ້ອງການແຍກຕົວເປັນເອກະລາດ ແລະຈະນຳເອົາປະເທດຢູເຄຣນ ເຂົ້າເປັນສະມາຊິກນາໂຕ ຈົນເກີດຄວາມຂັດແຍ້ງກັບຣັສເຊຍ ຢ່າງຮຸນແຮງ ກາຍເປັນເສິກສົງຄາມ ບ້ານເມືອງພັງພິນາດຢ່າງທຸກວັນນີ້.
ການປະຕິວັດສີ ຍັງດຳເນີນເພື່ອປ່ຽນແປງລັດຖະບານໃນປະເທດຕ່າງໆທົ່ວໂລກ ຢ່າງໃນທະວີບອາຟຣິກາ, ປະເທດແຖບຕາເວັນອອກກາງ, ປະເທດແຖບເອເຊຍແປຊີຟິກ ຫຼືແມ່ນແຕ່ປະເທດໃນກຸ່ມອາຊຽນອ້ອມຂ້າງພວກເຮົາ ດ້ວຍການແຊກຊຶມມາກັບອົງການຈັດຕັ້ງສາກົນຕ່າງໆ ເປັນຕົ້ນອົງການຊ່ວຍເຫຼືອລ້າທີ່ບໍ່ຂຶ້ນກັບລັດຖະບານ (NGO) ກອງທຶນຕ່າງໆ ຫຼືແມ່ນແຕ່ບາງສາສະນາ ກໍຖືກນຳໃຊ້ເປັນເຄື່ອງມືໂຄສະນາປຸກປັ່ນ ຍຸຍົງໃຫ້ເກີດຄວາມຂັດແຍ້ງ ເຜີຍແຜ່ແນວຄິດປະຊາທິປະໄຕໄຮ້ຂອບເຂດ ແລະສິດທິມະນຸດສຸດໂຕ່ງ.
ວິທີການຂອງພວກນີ້ ຄືຊອກຫາປະກົດການຫຍໍ້ທໍ້ຕ່າງໆໃນສັງຄົມ ທີ່ເປັນຊ່ອງຫວ່າງໃນການຕອກຫຼີ້ມຂະຫຍາຍຄວາມຄຽດແຄ້ນກຽດຊັງ ໂດຍການນຳໃຊ້ສື່ສັງຄົມອອນລາຍ ເປັນເຄື່ອງມືເພື່ອເຂົ້າເຖິງກຸ່ມເປົ້າໝາຍຕ່າງໆ ໂດຍສະເພາະກຸ່ມຄົນໜຸ່ມສາວ ທີ່ເປັນໄວລຸ້ນໄວຄະນອງ ທີ່ມີປະສົບການ ແລະຄວາມຮອບຮູ້ທາງສັງຄົມບໍ່ທັນສູງ, ຊັກຈູງງ່າຍ, ໃຈຮ້ອນ ແລະມີຄວາມຫ້າວຄະນອງ. ໃຫ້ດຳເນີນການເຄື່ອນໄຫວຕໍ່ຕ້ານລັດຖະບານ ຕໍ່ຕ້ານລະບອບການເມືອງໃນຮູບແບບຕ່າງໆ.
ໃນລາວເຮົາ ກໍມີປະກົດການນີ້ເປັນບາງຄັ້ງຄາວ ເຖິງແມ່ນວ່າຄົນໜຸ່ມສາວທີ່ເປັນກຸ່ມເປົ້າໝາຍສ່ວນໃຫຍ່ໄປຂາຍແຮງງານໃນຕ່າງປະເທດ ສ່ວນທີ່ເຫຼືອພາຍໃນກໍໝົກໝົ້ນຢູ່ກັບການທຳມາຫາກິນ ບໍ່ຄ່ອຍມີເວລາຈະມາໃສ່ໃຈບັນຫາບ້ານເມືອງ. ແຕ່ກໍຍັງມີບາງກຸ່ມ ບາງຄົນ ທີ່ເສບສື່ອອນລາຍ ແລະອິນໄປກັບເນື້ອໃນໂຄສະນາຂອງກຸ່ມຄົນບໍ່ຫວັງດີ ທີ່ຢີບຍົກເອົາປະກົດການຫຍໍ້ທໍ້ຕ່າງໆ ມາໂຈມຕີລັດຖະບານ ແລະລະບອບການເມືອງ ເຮັດໃຫ້ບາງຄົນໄດ້ຫຼົງຜິດ ກະທຳການເຄື່ອນໄຫວບາງຢ່າງທີ່ຜິດກົດໝາຍ ເຊິ່ງກໍຖືກເຈົ້າໜ້າທີ່ນຳໄປສຶກສາອົບຮົມໃຫ້ເຂົ້າໃຈ.
ບັນຫາຕ່າງໆທີ່ເກີດຂຶ້ນ ທາງລັດຖະບານ ກໍບໍ່ໄດ້ນິ້ງນອນໃຈ. ໄດ້ຮີບຮ້ອນແກ້ໄຂ ແລະຊີ້ແຈງຖະແຫຼງຂ່າວໃຫ້ສັງຄົມໄດ້ຮັບຮູ້ ພ້ອມທັງວາງມາດຕະການຕ່າງໆໃນການສະກັດກັ້ນແກ້ໄຂ ເຮັດໃຫ້ປະກົດການຫຍໍ້ທໍ້ໃນສັງຄົມເຫຼົ່ານັ້ນຫຼຸດນ້ອຍລົງ.
ບັນຫາປະກົດການຫຍໍ້ທໍ້ທີ່ມັກເກີດໃນລາວ ຕາມບົດລາຍງານປະຈຳປີຂອງລັດຖະບານ ແລະການປະກອບຄຳເຫັນຂອງສະມາຊິກສະພາ ສ່ວນຫຼາຍກໍແມ່ນບັນຫາຄວາມຂັດແຍ້ງກ່ຽວກັບທີ່ດິນ ການບຸກລຸກທີ່ດິນທຳການຜະລິດຂອງປະຊາຊົນ ຂອງບັນດາບໍລິສັດຜູ້ໄດ້ຮັບສຳປະທານ, ບັນຫາມົນລະພິດ ສິ່ງແວດລ້ອມ, ບັນຫາຢາເສບຕິດ, ຂີ້ລັກງັດແງະ, ບັນຫາເສດຖະກິດ ໄພເງິນເຟີ້, ບັນຫາຄໍລັບຊັນ ການສວຍໃຊ້ໜ້າທີ່ຕຳແໜ່ງໃນທາງທີ່ຜິດ ໃນໝູ່ພະນັກງານລັດ, ບັນຫາໂຄງການກໍ່ສ້າງພື້ນຖານຕ່າງໆທີ່ບໍ່ທ່ວງທັນກັບຄວາມຮຽກຮ້ອງຕ້ອງການ ແລະອື່ນໆ. ເຊິ່ງແຕ່ລະບັນຫາ ທາງລັດຖະບານກໍໄດ້ບັນຈຸເຂົ້າໃນວາລະສືບຕໍ່ແກ້ໄຂ ຕິດພັນກັບແຜນພັດທະນາເສດຖະກິດສັງຄົມ ໃນແຕ່ລະໄລຍະ ເພື່ອເຮັດໃຫ້ທຸກປະກົດການຫຍໍ້ທໍ້ເຫຼົ່ານັ້ນ ຫຼຸດນ້ອຍລົງ. ແຕ່ທັງນີ້ທັງນັ້ນ ພົນລະເມືອງລາວທຸກຄົນ ກໍຕ້ອງເປັນເຈົ້າການປະກອບສ່ວນປົກປັກຮັກສາ ແລະສ້າງສາພັດທະນາປະເທດຊາດ ມີສະຕິຊາດ-ສະຕິສັງຄົມສູງ ບໍ່ຕົກເປັນເຫຍື່ອຂອງກຸ່ມຄົນບໍ່ຫວັງດີ ກໍຄືອິດທິກຳລັງປໍລະປັກຈາກຕ່າງຊາດ. ຫາກລຳພັງປ່ອຍໃຫ້ຂະແໜງການກ່ຽວຂ້ອງແກ້ໄຂພຽງຝ່າຍດຽວ ໂດຍທີ່ທຸກຄົນໃນສັງຄົມບໍ່ມີສ່ວນຮ່ວມ ກໍເປັນໄປບໍ່ໄດ້ ດັ່ງທິດຊີ້ນຳຂອງພັກ ທີ່ວ່າ “ພັກນຳພາ, ລັດຄຸ້ມຄອງ, ປະຊາຊົນເປັນເຈົ້າ” ປະເທດຊາດຈິ່ງຈະເຂັ້ມແຂງ ໝັ້ນຄົງ ແລະສີວິໄລ.
(ກໍຄືເລື່ອງທີ່ເກີດຂຶ້ນໃນຮູບລຸ່ມນີ້ ກໍໄດ້ເປັນວິທີໜຶ່ງໃນການປະຕິວັດສີ)

10/09/2024

ຮອງປະທານສະພາແຫ່ງຊາດ ເນັ້ນໃຫ້ການນໍາເມືອງອຸທຸມພອນເປັນເຈົ້າການແກ້ໄຂການສຶກສາ........
ໃນໂອກາດ ທີ່ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ລົງມາເຄື່ອນໄຫວເຮັດວຽກຢູ່ແຂວງສະຫວັນນະເຂດ, ທ່ານໄດ້ລົງພົບປະໂອ້ລົມການນໍາຂອງເມືອງອຸທຸມພອນ ໂດຍໄດ້ເນັ້ນໃຫ້ການນໍາຂອງເມືອງລົງເລິກກ່ຽວບກັບວຽກງານການສຶກສາ ໃຫ້ທຸກພາກສ່ວນພາຍໃນເມືອງຕ້ອງເປັນເຈົ້າການນໍາກັນໃນການແກ້ໄຂບັນການສຶກສາ ບໍ່ຖິ້ມໃຫ້ພາກສ່ວນໃດພາກສ່ວນໜຶ່ງ ທຸກການຈັດຕັ້ງຕ້ອງມີສ່ວນຮ່ວມ,ປຸກລະດົມຂົນຂວາຍ ແລະ ແບ່ງຄວາມຮັບຜິດຊອບຢ່າງຄັກແນ່. ນອກຈາກນີ້, ກໍ່ໃຫ້ກວດກາຄືນກ່ຽວກັບລະບົບການຈັດຕັ້ງຢູ່ຂັ້ນຮາກຖານ, ສືບຕໍ່ຄົ້ນຄວ້າປຶກສາຫາລືຫົວໜ່ວຍທຸລະກິດໃຫ້ຊ່ວຍແກ່ໄຂນັກຮຽນທີ່ຈົບຕ່າງໆ, ຊຶ່ງເລີ່ມແຕ່ຊັ້ນ ມ4 ຕ້ອງສ້າງອາຊີບເສີມໃຫ້ກັບເຂົາເຈົ້າ, ພ້ອມທັງສ້າງຄ່ານິຍົມ, ປູກຈິດສໍານຶກໃຫ້ສັງຄົມຮັບຮູ້, ເຂົ້າໃຈ ແລະ ໃຫ້ຄວາມສໍາຄັນຕໍ່ກັບວຽກງານການສຶກສາໃຫ້ຫຼາຍຂຶ້ນ.
ປັດຈຸບັນ ອັດຕາການປະລະການຮຽນມີລັກສະນະເພີ່ມຂຶ້ນ, ການເຂົ້າຮຽນຕໍ່ໃນຊັ້ນມັດທະຍົມ, ການສຶກສາຊັ້ນສູງມີຈໍານວນຫຼຸດລົງ (ສາຍສັງຄົມ), ອັນເນື່ອງມາຈາກຫຼາຍສາເຫດ ເປັນຕົ້ນແມ່ນບັນຫາການຂາດແຄນຄູສອນ, ສະພາບຄວາມຫຍຸ້ງຍາກທາງດ້ານເສດຖະກິດ, ສະພາບໂຄງລ່າງພື້ນຖານ, ອາຄານຮຽນ, ການສະໜອງດ້ານວັດຖຸອຸປະກອນການຮຽນ-ການສອນ ບໍ່ທັນຕອບສະໜອງຕາມຄວາມຮຽກຮ້ອງຕ້ອງການ, ຄວາມເຂົ້າໃຈການຊຸກຍູ້ຂອງຜູ້ປົກຄອງໃຫ້ລູກ-ຫຼານເຂົ້າຮຽນບໍ່ທັນເອົາໃຈໃສ່ຢ່າງຈິງຈັງ, ຜູ້ບໍລິຫານການສຶກສາຢູ່ຮາກຖານບ້ານຈໍານວນໜຶ່ງບໍ່ທັນປະຕິບັດໜ້າທີ່ຢ່າງຈິງຈັງ, ແຂງແຮງ, ການສະໜອງດ້ານງົບປະມານ, ປະຕິບັດນະໂຍບາຍໃຫ້ຄູສອນທີ່ເປັນລັດຖະກອນ, ພາລະກອນ ແລະ ອາສາສະໝັກຈໍານວນໜຶ່ງບໍ່ທັນໄດ້ຕາມແຜນທີ່ກໍານົດໄວ້ ເຮັດໃຫ້ຄູຈໍານວນໜຶ່ງຫັນປ່ຽນໄປປະກອບອາຊີບອື່ນແທນ.
ກ່ອນໜ້ານີ້, ທ່ານ ທອງໃສ ໄຊຍະວົງຄໍາດີ ເຈົ້າເມືອງອຸທຸມພອນ ຍັງໄດ້ສະຫຼຸບລາຍງານໂດຍຫຍໍ້ກ່ຽວກັບການພັດທະນາພື້ນຖານໂຄງລ່າງພາຍໃນເມືອງໃຫ້ທ່ານຮອງປະທານສະພາແຫ່ງຊາດໄດ້ຮັບຮູ້ແລ້ວ, ບັນດາທ່ານສະມາຊິກສະພາແຫ່ງຊາດ, ການນໍາຂອງເມືອງ ແລະ ຫ້ອງການທີ່ກ່ຽວຂ້ອງພາຍໃນເມືອງ ໄດ້ຕັ້ງຄໍາຖາມເຈາະຈີ້ມ ແລະ ຊອກຫາວິທີທາງແກ້ໄຂ ກ່ຽວກັບການສຶກສາພາຍໃນເມືອງຕື່ມອີກ.
ພິທີແມ່ນໄດ້ຈັດຂຶ້ນໃນຕອນເຊົ້າວັນທີ 10 ກັນຍາ 2024 ທີ່ສະໂມສອນຂອງເມືອງອຸທຸມພອນ.
(ຂ່າວ: ບຸນຊູ ພົມມະເທບ)

cr ປະຊາຊົນ

10/09/2024

ຝຶກຊ້ອມການຂັບຂີ່ລົດວິຊາສະເພາະ ປ້ອງກັນເປີດທາງກຽມພ້ອມຮັບໃຊ້ກອງປະຊຸມສຸດຍອດອາຊຽນ
=========
ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ໄດ້ຈັດພິທີເປີດການຝຶກຊ້ອມການຂັບຂີ່ລົດວິຊາສະເພາະ ປ້ອງກັນເປີດທາງ ໃຫ້ກໍາລັງກົມຕໍາຫຼວດຈະລາຈອນ ເພື່ອກຽມຄວາມພ້ອມປ້ອງກັນກອງປະຊຸມສຸດຍອດອາຊຽນ ຄັ້ງທີ 44-45 ໃນລະຫວ່າງວັນທີ 10-15 ກັນຍາ 2024 ໂດຍມີ ພົຈວ ປອ ວັນທອນ ສຸລິສັກ ຮອງຫົວໜ້າກົມໃຫຍ່ຕໍາຫຼວດ, ມີຄະນະພັກ-ຄະນະກົມ, ຄະນະຮັບຜິດຊອບຊີ້ນໍາ, ຄູຝຶກ ແລະ ຜູ້ຂັບຂີ່ຝຶກຊ້ອມ ເຂົ້າຮ່ວມ.
ພັອ ຄໍາສອນ ສີດາວົງ ຫົວໜ້າກົມຕໍາຫຼວດຈະລາຈອນ ກ່າວວ່າ: ການຝຶກຊ້ອມຄັ້ງນີ້ ເພື່ອເຮັດໃຫ້ພະນັກງານນັກ-ນັກຮົບ ຜູ້ທີ່ຂັບຂີ່ລົດປ້ອງກັນເປີດທາງ ໃຫ້ຂະບວນແຂກ, ການນໍາຂັ້ນສູງພາຍໃນ ແລະ ຕ່າງປະເທດ, ໃຫ້ມີຄວາມຊຳນິຊຳນານ, ຖືກຕ້ອງຕາມເຕັກນິກຂອງການຂັບຂີ່ ເພື່ອຮັບປະກັນໄດ້ຄວາມປອດໄພໃນການສັນຈອນ, ຮັບຮູ້ ແລະ ກໍາແໜ້ນບັນດາເສັ້ນທາງ, ເປັນຕົ້ນເສັ້ນທາງຫຼັກ, ເສັ້ນທາງສຳຮອງ ແລະ ເສັ້ນທາງສຸກເສີນ ເພື່ອແກ້ໄຂບັນຫາ ໃນກໍລະນີມີເຫດການສຸກເສີນເກີດຂຶ້ນ, ເພື່ອປະຕິບັດໜ້າທີ່ວຽກງານປ້ອງກັນເປີດທາງ ໃຫ້ຖືກຕ້ອງ ແລະ ສອດຄ່ອງຕາມເສັ້ນທາງເດີນລົດຂອງຂະບວນການນໍາ, ແຂກພາຍໃນ ແລະ ຕ່າງປະເທດ ຢ່າງລະອຽດ, ກ່ອນປະຕິບັດໜ້າທີ່ແຕ່ສະໜາມບິນສາກົນວັດໄຕ ຫາ ສະຖານທີ່ປະຊຸມ, ສະຖານທີ່ພັກເຊົາ, ໂຮງແຮມ, ສະຖານທູດ, ສຳນັກງານອົງການ ແລະ ຈຸດສະຖານທີ່ອື່ນໆ ທີ່ຂະບວນແຂກຈະເດີນທາງໄປ, ເຮັດໃຫ້ຮູ້ການປະສານສົມທົບກັບພາກສ່ວນທີ່ກ່ຽວຂ້ອງ ໃນກໍລະນີທີ່ມີລົດຕັດໜ້າທີ່ຂະບວນ ຫຼື ແລ່ນຕາມຫຼັງຂະບວນ, ທີ່ມີອຸບັດຕິເຫດ ແລະ ມີກໍລະນີສິ່ງກີດຂວາງເສັ້ນທາງເດີນລົດ ເພື່ອເຮັດໜ້າທີ່ແກ້ໄຂໃຫ້ທັນເຫດການ ແລະ ວ່ອງໄວ, ແນ່ໃສ່ເຮັດໃຫ້ການປ້ອງກັນເປີດທາງໃນຄັ້ງນີ້ໃຫ້ມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພ 100%.
ການຝຶກຊ້ອມຄັ້ງນີ້, ມີຈໍານວນພົນເຂົ້າຮ່ວມທັງໝົດ 180 ສະຫາຍ, ນໍາໃຊ້ພາຫະນະທັງໝົດເຂົ້າໃນການຝຶກຊ້ອມ ຈໍານວນ 50 ຄັນ. ໃນນີ້, ລົດເກັ່ງສະຫຼາມໄຟຟ້າ ຈໍານວນ 5 ຄັນ, ລົດເກັງສະຫຼາມ ຈໍານວນ 5 ຄັນ, ລົດໂມໂຕເປີດທາງ ຈໍານວນ 40 ຄັນ, ກໍານົດເວລາ ຈໍານວນ 6 ວັນ, ຂຶ້ນຜ່ານເອກະສານທາງດ້ານທິດສະດີ1 ວັນ, ຝຶກອົບຮົມຂັບຂີ່ຕົວຈິງ ຢູ່ເດີ່ນພຣະທາດຫຼວງ ເຕັກນິກລະບົບໄຟ, ການຂັບຂີ່ລົດຫຼົບຫຼີກສິ່ງກີດຂວາງ, ການຂັບຂີ່ລົດຊົງໂຕ ແລະ ອື່ນໆ ທີ່ພົວພັນໃນການຂັບຂີ່ 5 ວັນ ແລະ ຂັບຂີ່ທົດລອງຕາມເສັ້ນທາງຫຼັກ 1 ວັນ.
ພາບ-ຂ່າວ: ແກ້ວ ອຸເພັດ

cr ຄວາມສະຫງົບ Lao Security News

10/09/2024

ຂໍໃຫ້ທຸກຄົນປອດໄພ ແລະ ຜ່ານວິກິດນີ້ໄປໂດຍໄວ
🙏🙏🙏

09/09/2024

ລະດົມທຶນດອກເບ້ຍຕໍ່າ ເພື່ອເປັນສິນເຊື່ອສົ່ງເສີມການຜະລິດພາຍໃນ
ເພື່ອສືບຕໍ່ຈັດຕັ້ງຜັນຂະຫຍາຍມະຕິ ຂອງກົມການເມືອງສູນກາງພັກ ວ່າດ້ວຍເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່ ແລະ ທິດຊີ້ນຳ ຂອງທ່ານປະທານປະເທດ ຕໍ່ກອງປະຊຸມລັດຖະບານເປີດກວ້າງຄັ້ງທີ I ປີ 2024 ໃນກາງເດືອນກໍລະກົດທີ່ຜ່ານມາ ຕໍ່ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ໃນຕອນບ່າຍ ວັນທີ 6 ກັນຍາ 2024 ທີ່ສໍານັກງານນາຍົກລັດຖະມົນຕີ ໄດ້ຈັດກອງປະຊຸມລະດົມທຶນດອກເບ້ຍຕໍ່າ ເພື່ອເປັນສິນເຊື່ອ ສົ່ງເສີມການຜະລິດເປັນສິນຄ້າສົ່ງອອກ ແລະ ທົດແທນການນຳເຂົ້າ, ໂດຍການເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ມີທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານຮັກສາການຜູ້ວ່າການທະນາຄານ ແຫ່ງ ສປປ ລາວ, ບັນດາທ່ານຮອງລັດຖະມົນຕີກະຊວງທີ່ກ່ຽວຂ້ອງ, ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍຕາງໜ້າຜູ້ປະກອບການທຸລະກິດດ້ານຕ່າງໆ ເຂົ້າຮ່ວມ.
ກອງປະຊຸມ ໄດ້ຮັບຟັງ ການລາຍງານຫຍໍ້ ກ່ຽວກັບສະພາບການຈັດຕັ້ງປະຕິບັດກອງທຶນສົ່ງເສີມວິສາຫະກິດ ໃນໄລຍະຜ່ານມາ ແລະ ສະເໜີທິດທາງໃນຕໍ່ໜ້າ; ແລະ ສະພາບການສະໜອງສິນເຊື່ອ ເພື່ອສົ່ງເສີມການຜະລິດເປັນສິນຄ້າ ໄລຍະຜ່ານມາ. ຫຼັງຈາກນັ້ນ, ຕາງໜ້າຜູ້ປະກອບການທຸລະກິດດ້ານຕ່າງໆ ກໍ່ໄດ້ປະກອບຄຳຄິດເຫັນ ຕໍ່ສະພາບການຜະລິດພາຍໃນ, ການສະໜອງສິນເຊື່ອ, ລວມທັງ ທ່າແຮງ, ຂໍ້ຈຳກັດ ແລະ ສິ່ງທ້າທາຍ ໃນວຽກງານດັ່ງກ່າວ ຂອງ ສປປ ລາວ ກໍ່ຄືຂອງພາກທຸລະກິດ. ຜ່ານການປະກອບຄຳເຫັນຢ່າງຫຼາກຫຼາຍ ເຫັນວ່າ ຜູ້ເຂົ້າຮ່ວມ ໄດ້ໃຫ້ການສະໜູນ ຕໍ່ທິດໃນການສ້າງກອງທຶນດອກເບ້ຍຕໍ່າ ໂດຍການມີສ່ວນຮ່ວມ ຂອງພາກທຸລະກິດ ແລະ ຜູ້ປະກອບການ ທີ່ມີກຳລັງແຮງທາງດ້ານເສດຖະກິດ ເພື່ອສົ່ງເສີມການຜະລິດພາຍໃນ ໃຫ້ເປັນລະບົບ ແລະ ເຂັ້ມແຂງຂຶ້ນເປັນກ້າວໆ ບົນພື້ນຖານຮັບປະກັນຄວາມໂປ່ງໃສ, ຍຸຕິທຳ ແລະ ຍືນຍົງ.
ໃນຕອນທ້າຍ, ທ່ານ ນາຍົກລັດຖະມົນຕີ ໄດ້ສະຫຼູບສັງລວມເນື້ອໃນ ກໍ່ຄືຜົນຂອງການດຳເນີນກອງປະຊຸມຄັ້ງນີ້, ພ້ອມທັງ ໃຫ້ກຽດໂອ້ລົມ ແລະ ໃຫ້ທິດຊີ້ນຳ ຕໍ່ພາກສ່ວນທີ່ກ່ຽວຂ້ອງຕື່ມບາງດ້ານ ເປັນຕົ້ນ ໃຫ້ກະຊວງອຸດສາຫະ ກຳ ແລະ ການຄ້າ ແລະ ທະນາຄານແຫ່ງ ສປປ ລາວ ສົມທົບກັນປຶກສາຫາລື ແລະ ຖອດຖອນບົດຮຽນ ໃນການຄົ້ນ ຄວ້າສ້າງກອງທຶນສົ່ງເສີມການຜະລິດ ທີ່ມີດອກເບ້ຍຕ່ຳ ທີ່ເໝາະສົມ ສາມາດຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທິຜົນ ແນໃສ່ເພື່ອຊຸກຍູ້ສົ່ງເສີມຈຸນລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງ ຢ່າງແທ້ຈິງ; ໃຫ້ກະຊວງ, ຂະແໜງການກ່ຽວຂ້ອງ ຊຸກຍູ້ສົ່ງເສີມການຜະລິດເປັນສິນຄ້າ, ສົ່ງເສີມດຶງດູດການລົງທຶນຈາກຕ່າງປະເທດໃນຂົງເຂດການຜະລິດ, ເຈລະຈາຊອກຫາຕະຫຼາດໃຫ້ຜູ້ຜະລິດ ລວມທັງປັບປຸງລະບຽບການ, ຫຼຸດຜ່ອນຂັ້ນຂອດຕ່າງໆ ເພື່ອອຳນວຍຄວາມສະດວກໃຫ້ແກ່ພາກທຸລະກິດ, ພ້ອມກັນນີ້ ກໍ່ໃຫ້ນຳເອົາການສະເໜີຂອງພາກທຸລະກິດ ໄປຄົ້ນຄວ້າ ພິຈາລະນາ; ສືບຕໍ່ເອົາໃຈໃສ່ພັດທະນາຊັບພະຍາກອນມະນຸດ ໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງວຽກງານ ຢ່າງຕໍ່ເນື່ອງ ແລະ ຍາວນານ. ຕໍ່ພາກທຸລະກິດ ໄດ້ຊີ້ນຳສືບຕໍ່ພັດທະນາທຸລະກິດຂອງຕົນ ໃຫ້ສອດຄ່ອງກັບຍຸກສະໄໝ ໂດຍນຳໃຊ້ເຕັກໂນໂລຊີ ແລະ ນະວັດຕະກຳໃໝ່ ເພື່ອເພີ່ມສະມັດຕະພາບການຜະລິດ, ປະຢັດເວລາ ແລະ ຕົ້ນທຶນ ຄຽງຄູ່ກັບການສົ່ງເສີມ ຊ່ວຍເຫຼືອຂອງຂະແໜງການກ່ຽວຂ້ອງ ຕາມທິດຫັນເປັນທັນສະໄໝ ເປັນກ້າວໆ; ເພີ່ມທັກສະຄວາມຮູ້ດ້ານການບໍລິຫານ-ການບໍລິການ; ຮຽກຮ້ອງພາກທຸລະກິດ ເອົາໃຈໃສ່ປະຕິບັດພັນທະຂອງຕົນ ໃຫ້ຄົບຖ້ວນ ແລະ ເຄື່ອນໄຫວທຸລະກິດ ສອດຄ່ອງຕາມກົດໝາຍ ແລະ ລະບຽບການ ຢ່າງເຂັ້ມງວດ, ພ້ອມກັນປະກອບສ່ວນສຸດຄວາມສາມາດ ເຂົ້າໃນການສ້າງສາພັດທະນາປະເທດຊາດ ໂດຍສະເພາະ ການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ດ້ວຍຄວາມເສຍສະຫຼະ ຢ່າງແທ້ຈິງ ເຮັດໃຫ້ບັນຫາເຄັ່ງຮ້ອນຕ່າງໆ ຫຼຸດຜ່ອນລົງ.
ຂ່າວ ແລະ ພາບ: ກົມປະຊາສຳພັນ ຫສນຍ

09/09/2024

ພາບຄວາມເສຍຫາຍຈາກພາຍຸໄຕ້ຝຸ່ນຢາກິ ໃນວັນທີ 7 ກັນຍາ 2024 ຢູ່ ຮາລອງ ສສ ຫວຽດນາມ. ຂໍສະແດງຄວາມເສຍໃຈກັບປະຊາຊົນຊາວຫວຽດນາມທີ່ຮັບຜົນກະທົບຈາກໄພພິບັດໃນຄັ້ງ ແລະ ຂໍສົ່ງກຳລັງໃຈໄປໃຫ້ ຂໍໃຫ້ຜ່ານພົ້ນວິກິດຄັ້ງນີ້ໄປໄດ້ໂດຍໄວ.
ພາບຈາກ: Hà Nội News

$"ກອງປະຊຸມໃຫຍ່ ຄັ້ງທີ V ຄະນະຊາວໜຸ່ມຮາກຖານ ກົມ 512"- -- - --- - -- \\- - - --- - -- -=:>>> ຄະນະຊາວໜຸ່ມຮາກຖານ ກົມຄົ້ນຄວ້າວິ...$

09/09/2024

"ກອງປະຊຸມໃຫຍ່ ຄັ້ງທີ V ຄະນະຊາວໜຸ່ມຮາກຖານ ກົມ 512"
- -- - --- - -- \\- - - --- - -- -
=:>>> ຄະນະຊາວໜຸ່ມຮາກຖານ ກົມຄົ້ນຄວ້າວິທະຍາສາດ ແລະ ປະຫວັດສາດ (ກົມ512) ກະຊວງ ປກສ ໄດ້ຈັດກອງປະຊຸມໃຫຍ່ ຄັ້ງທີ V ຂອງຕົນຂຶ້ນ ໃນວັນທີ 5 ກັນຍາ 2024, ເປັນປະທານໂດຍ ພັທ ວົງເພັດ ປະເສີດ ເລຂາຄະນະຊາວໜຸ່ມຮາກຖານ ກົມ 512, ມີ ພັອ ປອ ອຸ່ນເຮືອນ ອຸດົມສິດ ຮອງຫົວໜ້າກົມ 512, ມີບັນດາຄະນະຊາວໜຸ່ມກະຊວງ ປກສ, ຄະນະຊາວໜຸ່ມຮາກຖານກົມ, ແຂກຮັບເຊີນ ພ້ອມດ້ວຍສະມາຊິກຊາວໜຸ່ມພາຍໃນກົມ ເຂົ້າຮ່ວມ.
=:>>> ໃນກອງປະຊຸມ, ພັທ ວົງເພັດປະເສີດ ໄດ້ຜ່ານບົດລາຍງານການເມືອງ ໃຫ້ຮູ້ວ່າ: ຊຸມປີຜ່ານມາ, ຄະ ນະຊາວໜຸ່ມ ພ້ອມດ້ວຍສະມາຊິກ ໄດ້ປະກອບສ່ວນເປັນເສນາທິການໃນການຄົ້ນຄວ້າ, ວາງແຜນການ, ສະຫຼຸບສັງລວມ, ຮັບ ແລະ ສ່ອງແສງລາຍງານສະພາບການຮອບດ້ານຂອງກົມ. ນອກນັ້ນ, ຍັງໄດ້ຄົ້ນຄວ້າຂຽນປຶ້ມປະຫວັດສາດ 60 ປີ ຂອງກໍາລັງປ້ອງກັນຄວາມສະຫງົບປະຊາຊົນ, ຮ່ວມມືຄົ້ນຄວ້າສະຫຼຸບເຫດການປະຫວັດສາດ ຄະນະຊ່ຽວຊານ ກະຊວງປ້ອງກັນຄວາມສະຫງົບ ຫວຽດນາມ ປະຈຳຢູ່ລາວ (1961-2016), ຄົ້ນຄວ້າສະຫຼຸບເຫດການສະກັດກັ້ນການປຸ້ນສະດົມດ່ານວັງເຕົ່າ ເມືອງໂພນທອງ ແຂວງຈຳປາສັກ ປີ 2000; ຄົ້ນຄວ້າສະຫຼຸບເຫດການການດໍາເນີນແກ້ໄຂຄະດີປຸ່ນເງິນ 2 ລ້ານໂດລາສະຫະລັດ ຢູ່ກຳແພງນະຄອນວຽງຈັນ ປີ 1992.
=:>>> ປະກອບສ່ວນປັບປຸງເນື້ອໃນຈັດວາງສະແດງ, ບົດນໍາທ່ຽວຂອງຫໍພິພິທະພັນ ປກສ ໃຫ້ມີເນື້ອໃນສົມບູນ ເພື່ອຮັບໃຊ້ໃຫ້ແກ່ການສະເຫຼີມສະຫຼອງ ວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ ແລະ ຈັດວາງສະແດງຮູບພາບການເຄື່ອນໄຫວສະເຫຼີມສະຫຼອງສອງວັນປະຫວັດສາດ ກໍຄື ປີສາມັກຄີມິດຕະພາບ ລາວ-ຫວຽດນາມ (ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 65 ປີ ແລະ ວັນເຊັນສົນທິສັນຍາມິດຕະພາບ ລາວ-ຫວຽດນາມ ຄົບຮອບ 45 ປີ), ຮັບແຂກເຂົ້າຊົມຫໍພິພິທະພັນ ປກສ ເນື່ອງໃນວັນສໍາຄັນຕ່າງໆຂອງຊາດ, ຂອງພັກ ແລະ ຂອງກໍາລັງປ້ອງກັນຄວາມສະຫງົບ ໄດ້ 436 ຄະນະ ມີ 21.797 ຄົນ, ປະກອບສ່ວນຂົນຂວາຍປຶ້ມເຂົ້າຫ້ອງສະໝຸດ ໄດ້ທັງໝົດ 2.212 ຫົວ, ບໍລິການໃຫ້ຢືມປື້ມໄປຄົ້ນຄວ້າ ຈໍານວນ 2.867 ຫົວ ແລະ ມີຄົນເຂົ້າມາຄົ້ນຄວ້າຢູ່ຫ້ອງສະໝຸດ 3.286 ຄົນ.
=:>>> ຈາກຜົນງານດັ່ງກ່າວ ປີ 2018-2024 ຄະນະຊາວໜຸ່ມຮາກຖານ ກົມ 512 ມີໜ່ວຍຊາວໜຸ່ມປະເພດແຂງ 4 ໜ່ວຍ ຄື:
- ໜ່ວຍຊາວໜຸ່ມຫ້ອງການ ແລະ ພະແນກການເມືອງ
- ໜ່ວຍຊາວໜຸ່ມພະແນກຍຸດທະສາດ ແລະ ພະແນກພະລາທິການ
- ໜ່ວຍຊາວໜຸ່ມພະແນກປະຫວັດສາດ-ມູນເຊື້ອ ແລະ ຫໍພິພິທະພັນ ປກສ
- ໜ່ວຍຊາວໜຸ່ມພະແນກວິທະຍາສາດ ແລະ ພະແນກເຕັກໂນໂລຊີ ປກສ
+ ສະມາຊິກຊາວໜຸ່ມ ປະເພດແຂງ ມີ 69 ສະຫາຍ ຍິງ 30 ສະຫາຍ, ປະເພດກາງ ມີ 1 ສະຫາຍ ຍິງ 1 ສະຫາຍ
=:>>> ກອງປະຊຸມຄັ້ງນີ້ ຍັງໄດ້ປ່ອນບັດຄັດເລືອກເອົາ ຄະນະຊາວໜຸ່ມຮາກຖານ ກົມ 512 ຊຸດໃໝ່, ໃນນີ້ ມີຜູ້ລົງສະໝັກ 7 ສະຫາຍ, ເລືອກເອົາ 5 ສະຫາຍF ຜ່ານການປ່ອນບັດ ເລືອກໄດ້ດັ່ງນີ້:
- ພັທ ພອນສຸກ ລິນທະວົງສາ ເປັນເລຂາ
- ສະຫາຍພັທ ບົວສະຫວັນ ມະນີວົງ ເປັນຮອງ
- ພັຕ ນາງ ສັນຕິ ອ໋ອດຈັນ ເປັນປະທານກວດກາ
- ພັຕ ສຸຂັນແກ້ວ ຈັນທະວົງ ແລະ ພັຕ ຂຸນມີໄຊ ສິວິໄລຫົງ ເປັນຄະນະ

cr ຄວາມສະຫງົບ Lao Security News