10/04/2024
Тұяқты жануарлар табиғатта маңызды рөл атқарады: олар жыртқыш жануарлардың популяциясына ғана емес, өсімдіктердің де биоәралуандығына тікелей ықпал етеді. Кейбір тұяқты жануарлардың кәсіптік мәні бар, кейбіреуінің қазіргі таңда саны азайып кеткені соншалық, еркінен тыс қамауда ұстап, қорғауға алуға мәжбүрміз.
Қазақстанда тұяқты сүтқоректілердің 12 түрі таралған. Әрқайсына қысқаша тоқтала кетейік.
🐴🫏 Керқұлан мен құлан — Қазақстан даласының экожүйесінің маңызды құрамдас бөлігі. Керқұлан (лошадь Пржевальского) бұрын қазақ даласында үйір-үйір боп өріп жүрген. Уақыт өте керқұлан жер бетінен мүлде жойылып кетті. Бүгінгі таңда «Алтынемел» мемлекеттік ұлттық табиғи паркінде керқұланның бірнеше басы бар. Айта кетері, керқұлан — әлемде жабайы жылқыдан қалған жалғыз түр. Ал құланға келсек, өкінішке қарай, қазақ құланы ХХ ғасырда жойылып кеткен, алайда оның түркімен түршесі қазақ даласына қайта жерсіндіріліп, бүгінде бас саны 4000-ға жетті.
🐗 Доңыз (кабан) — мүшелік жыл санаудағы 12-жыл. Қолда өсірілетін үй шошқаларының арғы тегі — жабайы шошқа. Қазақстанның Алтай ормандарында құдыр (кабарга) деген жануар кездеседі.
🦌 Елік, марал, бұлан (косуля, олень, лось) таулы алқаптардағы орманды, өзен, көл жағалауындағы бұталар мен ағаштардың арасын мекендейді. Маралдың Алтай маралы және тоғай маралы деген екі түршесі бар. Тоғай маралын кейде «хангүл» деп те атайды.
Қарақұйрық, ақбөкен, таутеке, арқар, Үстірт арқары қуысмүйізділер тұқымдасына жатады. Ақбөкенді (сайга) киік деп те, жезкиік деп те, ақкиік деп атай береді. Қарақұйрық (джейран) — өте сымбатты аң, бірақ саны аз болғандықтан, қорғауға алынып, Қазақстанның Қызыл кітабына енген.
🐏🐐 Арқар мен таутекелерді (архар и Сибирский горный козёл) Қазақстанда таулардың биігінде ғана кездестіруге болады. Қойдың арғы тегі — арқар болса, ешкінің арғы тегі — таутеке.
©️ сурет авторлары: Альберт Салемгареев, Лина Вальдшмит, Олег Лукановский, Артём Хроков, Олег Белялов, Алексей Тимошенко, Георгий Тимошенко, Пётр Троценко, Рустам Хабибрахманов, АСБК фототұзағы және Getty Images.