07/09/2021
ក្រុមការងារប្រតិបត្តិការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋចាប់ពីអាយុ១៨ឆ្នាំឡើង របស់កងពលតូចថ្មើរជើងលេខ៤១ ត្រូវបានប្រជុំបិទបញ្ចប់ជំហានទី២ នៃម្ជុលទី១.…...…..…..…….....….........................
នៅរសៀលថ្ងៃទី០៧ ខែកញ្ញា ឆ្នាំ២០២១ ក្រុមការងារប្រតិបត្តិការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋនៅឃុំស្នួល និងឃុំក្រូចគរ ស្រុកក្រឡាញ់ ខេត្តសៀមរាប ត្រូវបានប្រជុំបូកសរុបលទ្ធផល និងបញ្ចប់បេសកកម្មជំហានទី២ នៃម្ជុលទី១ ក្រោមវត្តមាន ឧត្តមសេនីយ៍ត្រី ផៃ សុផាត មេបញ្ជាការរង នាយសេនាធិការ និងជាប្រធានក្រុមការងារចាក់វ៉ាក់សាំងបង្ការជំងឺកូវីដ-១៩ កងពលតូចថ្មើរជើងលេខ៤១ ។
ក្នុងកិច្ចប្រជុំនេះយើងសង្កេតឃើញមានវត្តមាន ក្រុមការងារប្រតិបត្តិការចាក់វ៉ាកសាំងបង្ការជំងឺកូវីដ-១៩ កងពលតូចថ្មើរជើងលេខ៤១ អាជ្ញាធរឃុំស្នួល ឃុំក្រូចគរ និងអាជ្ញាធរស្រុកពាក់ព័ន្ធជាច្រើនរូបទៀត។
ឧត្តមសេនីយ៍ត្រី ផៃ សុផាត ប្រធានអង្គប្រជុំបានធ្វើការកត់សម្គាល់ វាយតម្លៃខ្ពស់ និងកោតសរសើរដល់ក្រុមការងារដៃគូពាក់ព័ន្ធទាំងអស់ ដែលបានសហការគ្នាយ៉ាងជិតស្និទ្ធប្រកបដោយស្មារតីទទួលខុសត្រូវនិងលះបង់ខ្ពស់ ដោយមិនគិតពីការនឿយហត់ ក្តៅ ឬភ្លៀងផ្គរអ្វីឡើយ រហូតធ្វើឲ្យយើងទទួលបានលទ្ធផលល្អប្រសើរ។
គួររំលឹកថា ក្រុមការងារប្រតិបត្តិការចាក់វ៉ាក់សាំងបង្ការជំងឺកូវីដ-១៩ កងពលតូចថ្មើរជើងលេខ៤១ បានដំណើរការចាក់វ៉ាក់សាំងជូនប្រជាពលរដ្ឋដែលមានអាយុចាប់ពី១៨ឆ្នាំឡើង នៅឃុំស្នួល និងឃុំក្រូចគរ ស្រុកក្រឡាញ់ ខេត្តសៀមរាប នៅមណ្ឌលសាលាបឋមសិក្សាស្នួលចាប់ពីថ្ងៃទី០៤ ដល់ថ្ងៃទី៧ ខែកញ្ញា ឆ្នាំ២០២១។
តាមរបាយការណ៍អាជ្ញាធរឃុំស្នួល និងឃុំក្រូចគរបាឲ្យដឹងថា មានប្រជាពលរដ្ឋដែលមានអាយុចាប់ពី១៨ឆ្នាំឡើងត្រូវមកទទួលយកការចាក់វ៉ាក់សាំងមានចំនួនសរុប៥,៦៣៦នាក់(ស្រី២,៦៦៥នាក់) បានមកចាក់វ៉ាក់សាំងពេលនេះចំនួន២,៤២៩នាក់(ស្រី១,៣៥២នាក់) មន្ត្រីរាជការ គ្រួសារកងទ័ព និងអតីតយុទ្ធជនចាក់កន្លែងផ្សេងចំនួន១,១៤៤នាក់(ស្រី៧៥៣នាក់) និងមិនបានចាក់ចំនួន២,០៦៧នាក់ (ស្រី៨៩០នាក់) ដោយមូលហេតុមួយចំនួនកំពុងស្ថិតក្នុងការព្យាបាលជំងឺកូវីដ-១៩ មួយចំនួនកំពុងធ្វើចត្តាឡីស័ក មួយចំនួនមានផ្ទៃពោះ មួយចំនួនស្ថិតក្នុងការបំបៅដោះកូន និងមួយចំនួនទៀតចាស់ជរាមានជំងឺប្រចាំកាយធ្ងន់ធ្ងរដែលក្រុមគ្រូពេទ្យមិនអាចចាក់ជូនបាន។
ជាមួយគ្នានោះផងដែរ ឧត្តមសេនីយ៍ត្រី ប្រធានអង្គប្រជុំបានស្នើឲ្យអាជ្ញាឃុំស្នួល និងឃុំក្រូចគរ ផ្សព្វផ្សាយឲ្យប្រជាពលរដ្ឋដែលបានមកទទួលយកការចាក់វ៉ាក់សាំងម្ជុលទី១នៅពេលនេះ ឲ្យមកទទួលយកការចាក់វ៉ាក់សាំងម្ជុលទី២តាមការណាត់របស់ក្រុមគ្រូពេទ្យឲ្យបានទៀងទាត់ក្នុង ចន្លោះរយៈពេល២១ថ្ងៃក្រោយចាក់ម្ជុលទី១ ឲ្យបានគ្រប់ៗគ្នា ដើម្បីឲ្យវ៉ាក់សាំងបង្កើតភាពស៊ាំ នៃប្រព័ន្ធការពាររឹងមាំប្រឆាំងវិរុសកូវីដ-១៩ ពិសេសវិរុសបំប្លែងខ្លួនថ្មី ដែលតា(Delta) ដែលបច្ចុប្បន្នកំពុងចរាចរនៅតាមបណ្តារាជធានី-ខេត្តមួយចំនួន ដែលមានការចម្លងរហ័សជាងវិរុសកូវីដ-១៩ធម្មតា។
ឧត្តមសេនីយ៍ត្រី ប្រធានអង្គប្រជុំក៏បានផ្តាំផ្ញើដល់អាជ្ញាធរឃុំ ស្រុកឲ្យបន្តផ្សព្វផ្សាយដល់ប្រជាពលរដ្ឋដែលបានមកទទួលចាក់វ៉ាក់សាំងរួចហើយ មិនត្រូវជិះសេះលែងដៃ ត្រូវបន្តអនុវត្តនូវវិធានការនានារបស់ក្រសួងសុខាភិបាលឲ្យបានម៉ឺងម៉ាត់បំផុត ពិសេស៣កុំ ៣ការពាររបស់ប្រមុខរាជរដ្ឋាភិបាល ព្រោះវ៉ាក់សាំង គឺជាវ៉ាក់សាំងបង្ការ ដែលធ្វើឲ្យយើងមានភាពស៊ាំក្នុងខ្លួនប្រឆាំងវិរុសកូវីដ-១៩ ប៉ុណ្ណោះ និងបើកើតហើយងាយព្យាបាលឆាប់ជា មិនវិវត្តទៅរកការស្លាប់ ដូចអ្នកពុំបានចាក់វ៉ាក់សាំងនោះឡើយ។
ក្នុងកិច្ចប្រជុំនេះផងដែរ លោកមេឃុំស្នួល និងលោកមេឃុំក្រូចគរ ក៏បានសំណូមពរដល់ក្រុមការងារប្រតិបត្តិការចាក់វ៉ាក់សាំងបង្ការជំងឺកូវីដ-១៩ របស់កងពលតូចថ្មើរជើងលេខ៤១ នៅពេលមកចាក់ម្ជុលទី២ជូនប្រជាពលរដ្ឋដែលបានមកចាក់ម្ជុលទី១ពេលនេះរួច សូមឲ្យក្រុមការងារជួយចាក់ជូនប្រជាពលរដ្ឋដែលមិនបានចាក់ម្ជុលទី១ពេលនេះ ដោយបញ្ហាសុខភាព និងបញ្ហាផ្សេងៗ ដើម្បីឲ្យពួកគាត់បានទទួលចាក់វ៉ាក់សាំងម្ជុលទី១ និងទី២ផងដែរ៕
