Radio Mabingwa

07/11/2024

Taasisi ya Wakaguzi wa Mizani na Vipimo yaani Masoroveya nchini Kenya(ISK) imetangaza kwamba itawashughulikia vilivyo matapeli wanaojifanya kuwa ni masoroveya kwa kuwalaghai Wakenya huku wakiathiri pakubwa sekta ya ardhi nchini humo.
Rais wa Taasisi hiyo ya Masoroveya nchini Kenya(ISK) Eric Nyadimo alisema kwamba taasisi ya ISK inashirikiana na wadau mbalimbali katika jitihada za kutokomeza kabisa shughuli za masoroveya bandia nchini humo.
Rais Nyadimo alitoa kauli hiyo wakati wa ufunguzi wa Kongamano la Tisa la Kimataifa linalokutanisha Wakaguzi wa Mizani na Vipimo yaani Masoroveya kutoka mataifa mbalimbali barani Afrika, lililoanza siku ya Alhamisi ya Novemba 7, 2024.
Kongamano hilo limeandaliwa kwa dhamira ya kuja na mbinu za kisasa na endelevu za kuboresha utumizi wa ardhi, kuhifadhi mazingira na kukabilina na mabadiliko ya tabianchi.
“Tunafanya kazi pamoja na wadau wote wa Bodi za usajili kuhakikisha kuwa tumewakabili vilivyo matapeli. Tunahimiza umma kutoa taarifa za ulaghai kwa taasisi zetu za ISK, kwa Idara ya Upepelelezi na Makosa ya Jinai(DCI) ama tume ya madili na kupambana na ufisadi nchini Kenya(EACC) kuhusu visa vya wanakandarasi kukosa kutoa huduma halali kwa mujibu wa mkataba wa maafikiano ili hatua za haraka za kisheria zichukuliwe kukabili na kutatua masuala hayo.” Nyadimo alikariri.
Kongamano hilo la siku mbili linakamilika rasmi Ijumaa ya Novemba 8, 2024.

01/11/2024

HII NDIO SABABU YA VINICIUS JR. WA REAL MADRID KUKOSA TUZO YA BALLON D'OR YA 2024.

21/10/2024

21/10/2024

Cyrus Barmasai na Grace Mwangi waliibuka washindi wa mbio za kilomita 21 za Marathon za Standard Chartered Mombasa Satellite Run zilizofanyika mapema asubuhi ya Jumatatu ya Oktoba 21, 2024 Jijini Mombasa nchini Kenya.
Barmasai alitangazwa mshindi upande wa wanaume baada ya kutimka mbio hizo kwa muda wa saa moja, dakika 16 na Sekunde 52 akiwazidi Bonface Kiprotich na Eric Shikuku waliomaliza wa pili na wa tatu mtawalia.
Na upande wa wanawake Grace Mwangi alitumia muda wa saa mbili, dakika 24 na sekunde tatu na kutwaa ubingwa huo akiwatambia Tamnai Miriam aliyek**ata nafasi ya pili huku Molly Yanda akiishia katika nafasi ya tatu bora.
Na kwenye mbio za kilomita 10 upande wa wanaume Michael Bett ndiye aliyekuwa bingwa akimshinda Abiud Barasa aliyekuwa wa pili huku Michael Ambole akiwa wa tatu.
Naye Martha Akendo alishinda katika kitengo cha wanawake akimzidi Joan Audrey aliyemaliza wa pili mbele ya Janet Mutimbia aliyekuwa wa tatu.
Pia kulikuwa na kitengo cha mbio za kilomita tano iliyowashirikisha wanafamilia ambapo Joseph Kilito alishinda mbele ya Eliud Ngari aliyemaliza wa pili huku Kennedy Mbogo akiridhika katika nafasi ya tatu.
Naye Sheilla Shem alifanikiwa kutwaa ubingwa upande wa wanawake baada ya kuwashinda Stella Machuka na Marion Zaitun waliomaliza kwenye nafasi ya pili na ya tatu, mtawalia.
Wakimbiaji hao walianzia mbio hizo kwenye eneo la Treasury Square katikati mwa Jiji la Mombasa na wak**alizia katika eneo hilo huku wanariadha zaidi ya 650 wakivutiwa katika mbio hizo. Standard Chartered Mombasa marathon Satellite Run ni msururu wa mbio kuu za Standard Chartered Nairobi Marathon zitakazofanyika kwenye bustan la Uhuru Jumapili ya Oktoba 27, 2024 Jijini Nairobi ambayo yatakuwa ni mashindano ya Makala ya 21.
Mbio hizo za Mombasa ndio msururu wa mwisho na wa tatu baada ya kukamilika kwa mbio za misururu iliyoandaliwa Kisumu na Kakamega.

22/09/2024

Serikali ya Kenya inafanya utafiti zaidi kuhusu madai kwamba dawa 262 za kuuwa wadudu mashambani zilizopo nchini humo, kuwa dawa hizo zinachangia maradhi ya saratani kwa binadamu.
Wizara ya Kilimo na Ustawi wa Mifugo iliyoandamana na Bodi ya Kitaifa ya Kudhibiti Dawa za Wadudu nchini humo kwenye kikao na Kamati ya Bunge la Kitaifa kuhusu ya kilimo, Waziri wa kilimo Dkt. Andrew Karanja alifafanua kwa kuiambia kikao hicho kwamba, baada ya utafiti huo kukamilika, serikali itatoa mwelekeo kikamilifu kuhusu suala hilo.
“Tunajua kuna dawa gushi kuna dawa nyingine watu wanatumia ambayo hazitakikani kwa hivyo huo utafiti unaendelea na madhumuni yake ni kufanya mwananchi asidhulumiwe na kitu kibaya na kulinda haki ya mwananchi ili apate dawa sahihi ya kuuwa wadudu.” Alisema waziri Karanja.
Dira ya kikao hicho ilikuwa ni kutekeleza mapendekezo ya uwezekano wa kutolewa kwa dawa za kuuwa wadudu zenye madhara kutoka nchini Kenya.
Kikao hicho kilifanyika Ijumaa ya Septemba 20, 2024 katika Kaunti ya Mombasa na kililenga kuhakikisha afya na usalama wa wananchi zinalindwa wakati wa ukuzaji wa kilimo endelevu nchini Kenya. Kamati ya bunge la kitaifa kuhusu kilimo imeitaka wizara ya kilimo pamoja na serikali za Kaunti kuwahamasisha wakulima kuhusu matumizi mwafaka ya dawa na madhara yake.

18/09/2024

Rais wa Shirikisho la Soka Afrika(CAF) Dkt. Patrice Motsepe amezihakikishia Kenya, Uganda na Tanzania kuwa watakuwa wenyeji wa michuano ya Kombe la CHAN ya mwakani 2025 na ile ya Kombe la Mataifa ya Afrika AFCON ya mwaka 2027.
Kombe la CHAN, ambayo inawashirikisha wachezaji wanaocheza ligi za soka barani Afrika, itaandaliwa kuanzia Jumamosi ya Februari Mosi hadi Ijumaa ya Februari 28, 2025 wakati mechi za raundi ya kwanza ya kuwania kufuzu AFCON zitapigwa kuanzia Oktoba 25 hadi 27 mwaka huu 2024.
Kombe la CHAN, ambayo ilikuwa ifanyike mwaka huu 2024, inaandaliwa kwa mara ya pili katika Jumuiya ya Afrika Mashariki na mara ya kwanza Rwanda ilikuwa mwenyeji mwaka 2016.
Mabingwa watetezi wa Kombe la CHAN ni Senegal ambayo ilitwaa taji baada ya kuwafunga Algeria mabao 5-4 kupitia mikwaju ya penalti kufuatia timu hizo kutoka suluhu baada ya dakika 120 katika fainali.
Rais Motsepe alikuwa Jijini Nairobi, Kenya kwa kikao cha Kamati ya Utendaji cha CAF.

17/09/2024

17/09/2024

Tazama bao la Majestic Sports Arena FC(waliovaa jezi nyeupe) lakataliwa baada ya waamuzi kuzembea wakati wa mechi dhidi ya Black Dragon FC(waliovaa jezi ya njano) ya Ligi ya Kaunti ya Mombasa ya FKF iliyochezwa kwenye Uwanja wa Kanisa Katoliki Mikindani siku ya Jumamosi ya Septemba 7, 2024. Majestic Sports Arena FC, ambao walikuwa nyumbani, walishinda mchezo huo mabao 5-0.

17/09/2024

Mwanariadha nyota Beatrice Chebet, mwenye umri wa miaka 24, ameshinda Tuzo ya LG/SJAK SPOM ya Mwanamichezo Bora wa mwezi Agosti 2024 nchini Kenya, ikiwa ni mara yake ya tano kushinda Tuzo hiyo.
Mkiambiaji huyo, ambaye ni bingwa mara mbili wa Mbio za Nyika za Dunia, alishinda Tuzo hiyo baada ya kutia fora wakati wa Michezo ya Olimpiki ya Majira ya Kiangazi ya Jijini Paris, Ufaransa 2024 kwa kuishindia Kenya medali mbili za dhahabu katika mbio za mita 5,000 na mita 10,000 upande wa wanawake.
Aliweka historia ya kuwa mwanariadha wa k**e wa kwanza kabisa kutoka Kenya kushinda medali mbili za dhahabu katika Mchezo mmoja wa Olimpiki akiwa anashiriki kwa mara ya kwanza katika Michezo hiyo.
Katika mbio za mita 5,000 Chebet alikuwa mwanariadha wa pili wa k**e kutoka Kenya kushinda mbio hizo baada ya Vivian Cheruiyot kuweka rekodi ya kuwa mwanariadha wa kwanza kuishindia Kenya medali ya dhahabu katika mbio hizo, upande wa wanawake, kwenye Michezo ya Olimpiki ya Rio 2016 nchini Brazil Games.

16/09/2024

Rais wa Shirikisho la Riadha la Dunia (WA) Lord Sebastian Coe, raia wa Uingereza mwenye umri wa miaka 67, ametajwa kuwa ni miongoni mwa wagombea saba walioidhinishwa wa wadhifa wa Urais wa Kamati ya Kimataifa ya Olimpiki IOC watakaomrithi Mjerumani Thomas Bach anayeondoka.
Bach, mwenye umri wa miaka 70 ambaye ni wakili, alitangaza mwezi uliopita wa Agosti 2024 wakati wa Michezo ya Olimpiki Jijini Paris, Ufaransa kuwa huenda akaachia ngazi baada ya kumaliza muhula wake wa pili mwaka ujao 2025 baada ya kuwa rais wa IOC tangu mwaka 2013.
Coe ambaye ni bingwa mara mbili wa mbio za mita 1500 katika Michezo ya Olimpiki atapata upinzani kutoka kwa wagombea wengine k**a vile Mhispania Juan Antonio Samaranch Jr, mwenye umri wa miaka 64, ambaye ni mmoja wa makamu wa rais wanne wa Kamati ya IOC.
Aliiongoza tume ya uratibu wa Michezo ya Olimpiki ya majira ya baridi ya Beijing, Uchina mwaka 2022. Babake mzazi alikuwa rais wa IOC kwa muda wa miaka 21 hadi mwaka 2001.
Waziri wa michezo wa Zimbabwe Kirsty Coventry, mwenye umri wa miaka 41, pia anawania ambaye ni mwanachama wa Kamati ya IOC na mshindi wa medali saba katika kuongelea kwenye Michezo ya Olimpiki, anataka kuwa mwanamke wa kwanza kabisa na mtu kutoka Afrika kuwahi kuwa rais wa IOC.
Wengine wanaowania wadhifa huo ni Feisal al Hussein ambaye ni mtoto wa mfalme wa Jordan, Msweden Johan Eliasch, Mfaransa David Lappartient na Mjapani Morinari Watanabe.
Wagombea hao wote watawasilisha wasifu-kazi zao mbele ya wanachama wa IOC katika mkutano wa faragha Jijini Lausanne, Uswizi ifikapo mwezi Januari 2025.
Rais mpya wa Kamati ya Kimataifa ya IOC atachaguliwa kwenye kikao cha Michezo ya Olimpiki ya Kale itakayofanyika kati ya Machi 18 hadi 21, 2025 na ataanza wadhifa wake huo mpya mwezi Juni, 2025.
Marais wote wa IOC wamekuwa wanaume, wanane wao kati ya tisa wakitoka Ulaya na mmoja akitokea Marekani.

16/09/2024

Duka Kubwa la kuuza bidhaa jumla na rejareja na kuagiza bidhaa toka nje la Naivas Supermarket nchini Kenya bado linaendelea kuwahudumia wateja wake kwa kuwauzia bidhaa mpya na zilizo bora zaidi nchini humo.
Hatua hiyo inakuja wakati duka hilo likiendelea kupanua wigo wake wa kibiashara katika Kaunti ya Mombasa na eneo la Pwani ya taifa hilo kwa ujumla, kwa lengo la kuhakikisha kwamba biashara yake inastawi katika eneo hilo la kitalii.
Duka hilo liko katika harakati za kufungua matawi mengine ya maduka zaidi mkoani Pwani baada ya kufungua tawi jipya la duka lake lililopo kando ya barabara ya Fidel Odinga, wadi ya Kongowea, kwenye eneobunge la Nyali Kaunti ya Mombasa.
Sherehe ya ufunguzi ilikuwa Alhamisi ya Agosti 29, 2024 kwenye jengo lenye maduka la Nyali bazaar Mall likiwa ni duka la nane kufunguliwa katika Kaunti ya Mombasa na duka la 12 Mkoani Pwani. Duka hilo ni la 105 kufunguliwa na Naivas Supermarket nchini Kenya.
Mkuu wa masuala ya biashara na mauzo wa Naivas Supermarket Dennis Makori alisema duka hilo linalenga kutoa mauzo ya kipekee kwa wakaazi wa maeneo ya Kaunti ya Mombasa na Mkoani Pwani kwa ujumla ikifungamana na maudhui yake ya kuokoa pesa za mteja na thamani yake.
“Mojawapo ya dira kuu yetu katika biashara ni kuhakikisha tunawauzia wateja wetu bidhaa mpya na bora, jambo hili limetufanya kupiga hatua kubwa kutokana na uzoefu wa wateja. Tumewaekea dhamana kubwa wateja wetu wakati huu tunapoelekea msimu wa sherehe za sikukuu, na pia tumepiga hatua katika kuboresha uuzaji wa bidhaa za vyakula vipya na mandhari ya maduka.” Alisema Makori.
Matawi ya maduka nane ya Naivas Supermarket kwenye Kaunti ya Mombasa ni Nyali Mall, Likoni, Digo, Mwembe Tayari, Bamburi, Saba Saba, Bombolulu na Nyali Bazaar.
Hivi karibuni Naivas Supermarket inatarajiwa kufungua tawi lake jipya eneo la Mtwapa katika Kaunti ya Kilifi ambalo litakuwa ni duka la 106 kufunguliwa na kumilikiwa na Naivas Supermarket, nchini Kenya.
Miezi michache iliyopita duka la Naivas Supermarket lilifungua tawi la duka lake la 104 katika jengo la T Square Buruburu, Jijini Nairobi huku likipanga kufungua maduka mengine matano nchini Kenya kabla ya mwisho wa mwaka huu 2024.

12/09/2024

Vijana wa Gunners Youth FC kutoka Jomvu waliwaduwaza Mombasa United FC kwa kuwadunga bao 1-0 katika mechi ya kupimana nguvu iliyochezwa Jumatano ya Septemba 11, 2024. Mchezo huo ulipigwa kwenye Uwanja wa Refinery Changamwe katika Kaunti ya Mombasa, nchini Kenya.
Bao hilo muhimu la Gunners Youth FC lilitumbukizwa kimiani na mshambuliaji wa pembeni kushoto Abdulkarim Maqbul. Mchezaji huyo wa zamani wa mabingwa wa Kihistoria wa Ligi Kuu ya Kenya K’Ogalo Gor Mahia, alifanikiwa kufunga bao hilo mnamo dakika ya 40 baada ya kuandaliwa pasi kutoka kwa Matano Yusuf.
Maqbul ambaye yuko nchini Kenya kwa mapumziko, anacheza soka yake katika klabu ya MCC Mogadishu inayocheza kwenye Ligi Kuu ya Somalia.
Timu ya Mombasa United FC (zamani Modern Coast FC), ambayo inasimamiwa na TM Gilbert Wesonga almaarufu k**a Coach Fabisch, ilitumia mechi hiyo kwa minajili ya maandalizi yake kabla ya msimu mpya 2024/25 wa SupaLigi ya Taifa ya FKF(NSL) kuanza. “Tulicheza vizuri, ni baadhi ya mechi za kirafiki tunazocheza ili tupata wachezaji wazuri tuwasajili, tunajiandaa kucheza msimu mpya wa Ligi ya NSL na hivi karibuni tunapanga kucheza mechi nyingine ya kirafiki kabla ya msimu wa NSL kuanza. Timu iko imara na tumejiandaa vyema kucheza katika ligi ya NSL.” Alisema TM Wesonga.
Msimu mpya wa NSL unatarajiwa kuanza rasmi mwishoni mwa mwezi huu ambapo Mombasa United FC wataanza msimu mpya kwa kucheza ugenini dhidi ya wenyeji wao timu ya askari wa APS Bomet FC itakayochezwa Bomet Stadium wikendi ya Septemba 21 na 22, 2024.

28/08/2024

Timu ya Maafande wa Kenya Police ya Kenya watakutana na Mabingwa watetezi Zamalek ya Misri katika mechi ya Hatua ya Kwanza ya Michuano ya Kombe la Shirikisho Afrika.
Kenya Police wataanzia nyumbani kwa kuwakaribisha Zamalek katika mechi ya mkondo wa Kwanza utakaofanyika Ijumaa ya Septemba 13, 2024 Jijini Nairobi kabla ya Zamalek kuwa mwenyeji kwenye mechi ya mkondo wa pili wiki mbili baadae, Jijini Cairo. Mshindi wa mchezo huo atatinga kwenye Hatua ya Makundi ya Michuano hiyo ya Kombe la Shirikisho Afrika. Kenya Police, ambao wanachuana katika michuano hiyo kwa mara ya kwanza katika historia ya kinyang’anyiro hicho, walifanikiwa kufuzu kwenye hatua hiyo baada ya kupata ushindi wa 1-0 ugenini dhidi ya Ethiopia Coffee ya Ethiopia katika mechi ya awali ya marudiano iliyochezwa Jumapili ya Agosti 25, 2024 kwenye Uwanja wa Abebe Bikila, wenye uwezo wa kuingiza mashabiki wapatao 25,000 Jijini Addis Ababa. Bao la Kenya Police liliwekwa kambani na kiungo raia wa Sudan Kusini Rashid Toha. Timu hizo zilitoka suluhu katika mchezo wa mkondo wa kwanza wa awali uliofanyika katika Uwanja wa Kitaifa wa Nyayo, Jijini Nairobi. Zamalek walitwaa taji hilo la Kombe la Shirikisho Afrika baada ya kuwashinda RSB Berkane ya Morocco katika mchezo wa fainali.