06/05/2024
كيف تعمل حالك إنك مثقف و خبير سيارات قدام صحابك؟؟
- إقتباسات من كلام جيرمي كلاركسون و كريس هاريس كل ما حدا يسألك عن سيارة.
- بتسمي السيارات بكودات الشاصي مش بإسمها الحقيقي. مثلا E30 بدل بوز النمر، و W123 بدل المرسيدس لف.
- ظلك كرر هاي الكلمات: ستيج 2 ، داون بايب، لينك، كامبر.
- سيارة أحلامك هي لانسيا دلتا HF انتغرالي
- الطليان هم افضل صانعي السيارات لان سياراتهم فيها روح و احساس ( و احكيها هيك مع تنهيدة و نظرة تأمل بالسماء)
- المرسيدس و البي ام سيارات حديثي النعمة و اللي ما بفهمو كثير بالسيارات.
- كرر جملة ( if you didn't own an Alfa, you are not a petrolhead)
- لأنه ما عندنا بالاردن الفاروميو كثير فبتقدر تستبدل كلمة Own في الجملة اللي فوق بكلمة Like.... بتمشي امورك
- كريس بانغل تصاميمه رائعة و مميزة بس الناس ظلموه.
- اسمه مش اكزوزت، اسمه مفلر
- الأوفرستير ( او انت بتسميه opposite Look )احسن من الاندرستير
- اللانسيا 037 افضل من اودي كواترو
- سيارتك بتكون من نوع ساب 93 موديل 2005 و سبب اختيارك الها كان بشكل رئيسي لأجل ( مزايا الامان فيها).
- لويس هاملتون لو احرز 20 بطولة عالم ما راح يوصل لمستوى مايكل شوماخر الاعظم في التاريخ.
- طول نهارك تحكي عن جروب B و بطولة DTM في فترة الثمانينيات.
- كرر مصطلح ( German Engineering)
- أفضل سيارة سوبر كار بالتاريخ هي فيراري F40
- هوندا سيفيك احسن من تويوتا كورولا.
- رغم ان سيارة احلامك هي لانسيا دلتا، لكن افضل سيارة رالي بنظرك هي ميتسوبيشي ايفو 6 تومي ماكينين اديشين
- مازدا MX5 افضل من بورشه بوكستر. لكن البورشه 911 هي السيارة الاعظم.
- فيراري احسن من لامبرغيني.
- اسمه مش بوري، اسمه Intake
- بتحب سيارات ال Sleepers و بتكره ال Ricers
- احفظ كل كودات و ارقام المحركات، زي مثلا نيسان SR20 او RB26, و تويوتا 2JZ و مرسيدس M156 و BMW N52. و لا تنسى الفاروميو بوزو اللي بالنسبة الك افضل محرك بالتاريخ مع انك بحياتك ما شفته ولا شفت سيارة راكب عليها هذا الماتور.
- تكره التويوتا و اللكزس و الهيونداي و الكيا، و تحترم الجاكوار و المازيراتي و الفولفو و الشكودا.
- السيارات الامريكية الاصلية انتهت من بعد سنة ١٩٧٣.
- فتاة احلامك هي الراحلة سابينا شميت أو الختيارة ميشيل موتون.
- نفسك تشتري سيارة ستيشن زي فولفو، او انك تشتري جيب XJ و تركب عليه ماتور LS1.
- عرب GT قناة اطفال و مراهقين.
- حافظ ال 0-60 لكل السيارات الرياضية
- حافظ كل الاصدارات الحصرية للسيارات الرياضية زي شيلبي سوبر سنيك، و لامبرغيني غالاردو سوبر ليجيرا، و M3 CSL Competition.
- مثلك الاعلى جيرمي كلاركسون. و نفسك تصير زي مات واطسون او دوغ ديموريو ( بس بدون الشورت اللي لابسه)
- أي واحد بسألك عن سيارة سيات، بتحكيله انها كويسة لأنه بالاصل فولكسفاغن.
- السيارات الصينية تطورت، لكن بحياتك ما راح تفكر تشتريها.
- السيارات الكهربائية كخة، و ريحة البنزين احلى من كل سيارات الكهرباء.
- برجع بكرر، سيارة احلامك لانسيا دلتا HF انتغرالي... لا تنسى.
- اوعك تحكي جملة ( فخامة الاسم تكفي).... هذا كلام الجهلة بالسيارات.
