29/04/2022
// SVÖRT MESSA //
Náungi nokkur, sem er nákominn einum af nágrönnum okkar, fór að velta fyrir sér hvað hefði orðið um náungakærleikann. Hvernig getur fólk verið svona skilningslaust og reitt yfir því að fá ekki að skemmta sér eins og það vill, enda þótt það valdi þeim sem eiga hér heima og vilja aðeins fá að sofa í friði ómældri vanlíðan, jafnvel þjáningu. Hvar er samkenndin? Hvar er tillitssemin við náungann? Hvernig getur fólk, sem virðist svo annt um að hjálpa þeim sem eiga um sárt að binda og standa höllum fæti – já, helst öllum heiminum eins og Jesú – verið svona gjörsamlega blint á angist íbúa miðbæjarins, sem þeir eiga þó margir sjálfir sök á að valda? Þetta sama fólk gerði ekkert á hlut flóttafólksins frá hinum og þessum löndum sem hingað hefur streymt, en samt vill það vera voðalega gott við það. Hvers vegna vill þetta góða fólk ekki líka vera gott við okkur íbúana þótt við stöndum þeim bókstaflega miklu nær?
Þessi náungi sagði málið flókið og erfitt að útskýra. Og þó, í hnotskurn er þetta bara gamla „góða“ sjálfselskan. Kannski gerir fjarlægðin ekki fjöllin blá og mennina mikla, eins og Jóhann Sigurjónsson hélt fram, heldur obbulitla og meinfýsna. Til að flokkast sem góð manneskja í dag er mikilvægara að sýna það í orði frekar en verki og láta sér þykja annt um „alls konar aumingja“ með sýndartilburðum (e. virtue signalling). Tilheyri fólk ekki þessum viðurkennda „aumingjahópi“ og er með eitthvað múður sem fellur ekki í kramið hjá góða fólkinu – einu sinni hét það tjáningarfrelsi – getur það bara „hoppað upp í rassg*tið á sér og drullað sér í burtu“.
Röksemdafærslan er yfirleitt eitthvað á þessum nótum hjá nettröllum góða fólksins þegar íbúarnir dirfast að kvarta á samfélagsmiðum undan því að geta ekki sofið vegna hávaða og láta frá næturklúbbunum, í stað þess að grjóthalda kjafti og hreinlega skammast sín. Biðjast afsökunar á því að hafa maldað í móinn. Láti „neikvæða fólkið“ ekki segjast er það rækilega tekið á beinið og faktískt úrskurðað réttdræpt. Þetta góða fólk er sjálft alveg að drepast úr góðmennsku og fórnfýsi.
Að móðgast á samfélagsmiðlum fyrir hönd fólks sem þú þekkir engin deili á, helst nógu langt í burtu frá þér, er ákaflega þægileg og fyrirhafnarlítil aðferð til að sýna öllum heiminum hvað þú ert stórkostlega góð manneskja. Sömuleiðis að hrauna fúkyrðum yfir þá sem eru skoðunum þínum og þinna nánustu viðhorfsvina ekki að skapi. Að hatast út í þetta „leiðindapakk“ og gera lítið því, helst í skjóli nætur undir nafnleynd, þykir bera vott um alveg ótrúlega mikinn siðferðisþroska. Slík framkoma telst vera hetjudáð, einstaklega lofsvert framtak. Hefndarþorsti góða fólksins á sér engin takmörk.
____________________
- Ekkert lamb að leika sér við -
Þið eruð greinilega að glíma við eldgamla forynju, þessa týpísku hjarðhugsun sem alltaf hefur fylgt mannkyninu, „hrútskýrði“ náunginn. Við hana verður engu tauti við komið. Einn daginn elskar hún þetta og hatar hitt og þann næsta hefur hún snúið því algjörlega við. Hún er meira að segja fær um að vera með tvö andstæð sjónarmið á sama tíma, ekkert mál. Gangi ykkur vel að rökræða við hana! Þetta góða fólk myndi vart depla auga þótt einn af nágrönnum ykkar væri kossfestur beint fyrir framan það, ekki frekar en fyrri daginn. Var ekki nýlega verið að krossfesta mann í Hallgrímskirkju? Góða fólkið talaði ekkert um það, fór bara út á djammið og djöflaðist fram til morguns á næturklúbbunum yfir alla páskana.
Eftir langan vinnudag í útrýmingarbúðunum fóru nasistaforingjarnir heim, klöppuðu gjarnan hundinum, kysstu konuna og eyddu kvöldinu í faðmi sinnar arísku fjölskyldu. Þeir sáu ekkert bogið við það, þeir voru aðeins háttsettir meindýraeyðar að þjóna sínum borgaralegu skyldum. Hannah Arendt kallaði þessa hugsanalausu samtryggingu kerfisins „lágkúru illskunnar“ („banility of evil“) í tengslum við réttarhöldin yfir Adolf Eichmann.
Góða fólkið vill að sjálfsögðu ekki láta bendla sig við fasisma á nokkurn hátt. Það er svo líbó, frjálst og umburðarlynt, ekki satt? En illskan er lúmsk og á sér margar birtingarmyndir, bæði stórar og smáar. Hún býr í öllum mönnnum. Það þarf ekki heilt þjóðarmorð til að mannvonskan blasi við; hún bærist í hranalegum tilsvörum og smávægilegustu svipbrigðum (e. microaggression). Við erum ekki aðeins blind á það sem við viljum ekki sjá og skilja, við erum aðallega blind á eigin bresti. Vondi karlinn býr kannski í næsta húsi við þig, en aldrei í þér sjálfum.
____________________
- Eltum peningaslóðina -
Félagslegt stofnanaofbeldi (e. structural violence) er mjög áhugavert fyrirbæri, hélt náunginn áfram og gerðist nú ögn fræðilegri. Sú kenning gengur út á hvernig þær stofnanir og félagsfræðilegu strúktúrar, sem eiga að hjálpa okkur og vernda, geta þvert á móti unnið fólki mikinn skaða með því að sniðganga grundvallar þarfir þess. Mikið af þessu góða fólki vinnur hjá svona stofnunum og hefur af því lífsviðurværi.
„Enginn getur tekið nokkrum þeim rökum sem stangast á við tekjustreymi sitt“, fullyrti franski heimspekingurinn Descartes, sem einnig var braskari og fjárhættuspilari og þekkti vel til markaðarins. Snýst þetta ekki bara allt um peninga eins og vanalega? Sagði ekki uppljóstrarinn Deep Throat í kvikmyndinni All the President's Men (1976) að rannsóknarblaðamennirnir Woodward og Bernstein ættu að fylgja peningaslóðinni eftir? Ýmislegt kæmi eflaust upp úr kafinu ef það yrði gert hérna í einu óspilltasta landi í heimi, það sannar Íslandsbankasalan. Eða getur virkilega verið að „eitthvað sé rotið í Danaríki“?
Náunginn sagðist vera með þjóðráð fyrir okkur íbúana. Þið ættuð að mælast til þess að öll borgarstjórnin og æðstu yfirmenn lögreglu og heilbrigðiseftirlits færu reglulega út saman milli klukkan 2-4 á nóttunni um helgar til að sjá með eigin augum hvernig umhorfs er í kringum ykkur. Best væri auðvitað ef þið gætuð skipt á húsnæði við allt þetta góða fólk þannig að það geti betur áttað sig á hvers vegna þið eruð stöðugt að væla svona út af þessum hávaða og látum. En það er vitaskuld borin von. Þið eigið því miður við ofurefli að etja. „Vont er þeirra ránglæti, verra þeirra réttlæti,“ segir í Íslandsklukkunni. Það eru orð að sönnu.
____________________
- Kappar og tildurgosar -
Þið eru sannar hetjur, sagði náunginn hughreystandi, og minntist hvernig Hillary Clinton hefði kallað þá sem henni mislíkaði við „samansafn ömurlegra vitleysingja“ („basket of deplorables“). Góða fólkið telur sér trú um að það búi yfir yfirburða siðferðiskennd og geti þess vegna stimplað og rutt þeim úr vegi sem það fílar ekki. Þetta eru algjörir fýlupokar. Þeir halda að þeir séu svo hipp og kúl, en eru í raun forpokaðir og lúmmó, fastir í brengluðum hugsunarhætti. Þið íbúarnir eruð fórnarlömb stofnanaofbeldis, þið eruð aktívistar fyrir fallegu og heilbrigðu borgarumhverfi. Fyrir menningu, en ekki ómenningu. Einn góðan veðurdag munu allir hrista hausinn og ekki skilja hvernig í ósköpunum þetta g*t gerst.
Ekki hafa áhyggjur, sannleikurinn kemur alltaf í ljós að lokum, sagði okkar maður til að stappa stálinu í sitt fólk. Hann gerir sér fulla grein fyrir að það sé á brattann að sækja. Það er eitt af undrum okkar samtíma hvað „kampavínskommarnir“ hafa mikil ítök á íslenskum fjölmiðlamarkaði þótt hann sé að mestu leyti kostaður af auðvaldinu. Óþægileg mál á borð við þetta ástand í miðbænum, sem kemur sér illa fyrir ákveðna frambjóðendur í aðdraganda kosninganna, eru þögguð niður af fremsta megni á sama tíma og flokksgæðingarnir eru teknir í hvert drottningarviðtalið á fætur öðru.
Litli-Pútín og hans kónar hafa komið sér upp vel smurðri áróðursvél með endalausum bitlingum og hrossakaupum. Það mega þeir eiga. Þeir kunna þá list að bruðla með almannafé og sóa því eins og enginn sé morgundagurinn í alls konar gæluverkefni. Reikningar frá verkfræðingum, arkitektum og fjölda annarra sérfræðinga (raunverulegum og skálduðum), sem Ráðhúsbúar hafa velþóknun á, eru umsvifalaust greiddir sama hvað upphæðin er fáránlega mikil. Eða eru kannski allir búnir að gleyma Braggamálinu? Gleymskan er besti vinur stjórnmálamannanna. Svona bragga er að finna út um allt í stjórnsýslu borgarinnar, skyldi einhver hafa kjark og nennu til þess að rannsaka öll stráin. Já, það margborgar sig að vera í rétta liðinu.
____________________
- Ekki einn dag í viðbót! -
Vinstrimenn hafa aldrei farið vel með opinbera fjármuni, þeir kunna aðeins skreyta bókhaldið og eyða peningum annarra með sífellt hærri álögum. Þeir fá aldrei nóg. Borgin er á kúpunni, tæknilega gjaldþrota. En góða fólkið hjá borginni er með masterplan og ráð undir hverju rifi; sagan hermir að þeir vilji losna við sem flesta íbúa á þessu dýrmæta svæði og helst breyta öllum miðbænum í eina risastóra partíbúllu. Það er svo góð tekjulind. Fasteignahrægammarnir bíða spenntir á hliðarlínunni eftir að komast í feitt.
Okkar maður er mjög vökull og fylgist vel með öllu. Hann segist punkta hjá sér hvernig kaupin gerast á eyrinni og halda því vel til haga. Það góða, segir hann og glottir við tönn, er að svona þöggunartilburðir virka ekki á alnetinu. Þar er ekki hægt að skammta tjáningarfrelsinu dálksentimetrana. Margir af þessum „vókverjum“ í Ráðhúsinu hafa setið allt of lengi á valdastól og eru orðnir góðu vanir. Þeir elska að afhenda blóm og viðurkenningar og klippa á einhverja glansborða, skælbrosandi framan í myndavélina, en á bakvið tjöldin sýnir valdhrokinn og taumlaus frekjan sitt rétta andlit, svo rosaleg að halda mætti að sumir væru á spítti.
Vilja kjósendur virkilega allt þetta góða fólk yfir sig aftur næstu fjögur árin, enn eina ferðina? Margir myndu segja að einn dagur í viðbót væri of mikið. Áframhaldandi samvinna núverandi meirihluta þjónar aðallega þeim sem eru innvígðir og innmúraðir í hagsmunabandalag valdaklíkunnar: „Ég er búinn að fylgjast með þessu þjóðfélagi í 50 ár. Þetta er ógeðslegt þjóðfélag, þetta er allt ógeðslegt. Það eru engin prinsipp, það eru engar hugsjónir, það er ekki neitt. Það er bara tækifærismennska, valdabarátta“, lét þjóðþekktur íhaldsmaður hafa eftir sér fyrir mörgum árum. Hann þekkti stjórnmálin og atvinnulífið innan frá og marseraði ekki alltaf í takt við forystuna.
Góðir kapítalistar hugsa bara um rassg*tið á sér, þeir eru algjörir skíthælar, eða svo segir orðið á götunni. Færri vita að margt af þessu góða fólki á vinstri kanti stjórnmálanna er síst skárra, það er aðeins flinkara í því að klóra yfir „sitt skítlega eðli“ og óheilindi. Það skiptir ekki máli hvaða flokk þú kýst, „þetta er allt ógeðslegt“. Hins vegar hafa mikil völd í langan tíma oft í för með sér alvarlega spillingu. Þess vegna höfum við lýðræðislegar kosningar til að almenningur fái tækifæri til þess að skipta reglulega um fólk í brúnni. Það er löngu tímabært að nýir vendir komist að kjötkötlunum svo loksins sé hægt að byrja að hreinsa upp allan skítinn sem þetta góða fólk í borgarstjórn Reykjavíkur hefur skilið eftir sig í miðbænum.
Sunnudagur, 24. apríl 2022
____________________________
(Es. „Faðir, fyrirgef þeim, því þeir vita ekki hvað þeir gjöra“. Það er aðeins einn hængur á slíkri syndafyrirgefningu; allt of margir vita nákvæmlega hvað þeir eru að gera og stendur slétt á sama um þjáningar margra íbúa miðbæjarins. Hvað verður um þá er í höndum æðri máttarvalda.)