23/11/2024
کۆتاییهێنان بە توندوتیژی لەدژی ژنان، کاری چینی کرێکار و بزوتنەوەی یەکسانیخوازییە!
٢٥ی نۆڤێمبەر ڕۆژی جیهانی ڕاوەستانەوەیە بەرامبەر بە توندوتیژی لەدژی ژنان. بەم بۆنەیەوە هەموو ساڵێک لەلایەن ڕێکخراوەکانی ژنان، دەوڵەتان و دامەزراوە جیهانیەکانەوە، جارێکی تر پرسی ژنان و ئەو توندوتیژی و جیاکاریەی ڕووبەڕووییان بۆتەوە، دەکەنە جێگای باسی میدیاکان و ئەنجامدانی چالاکی جۆراوجۆر. بەڵام خودی ئەم ڕۆژە بەڵگەیەکی ئاشکرایە کە ژنان لەسایەی سیستمی سەرمایەداری و دەسەڵاتدارێتی چینی بۆرژوازی و یاسا و نەرێتە باڵادەستەکانیدا، لەگەڵ ئەوپەری ستەم و بێمافی و جیاکاری و ژێردەستەییدا، تائاستی کوشتن وکۆیلەیەتی بەرەوڕووە. سەرهەڵدانی قەیرانە ئابوریەکان، وەک بنەمایەک بۆ هێرش و پەلاماردانەکانی دەوڵەتانی دونیای ئەمڕۆ بۆ سەر ژیان و گوزەرانی خەڵکی زەحمەتکێش و پەیرەویکردن لە سیاسەتی سکهەڵگوشین و لێگرتنەوەی ئابوری، جگە لە سەپاندنی هەژاری و بێکاری و پایماڵکردنی ماف و ئازادیەکان، کە ژنان و کەسایەتییان دەکاتە نیشانە، هاوکات هەڵایاسانی جەنگ و توندبونەوەی میلیتاریستی و ئاوارەیی و کوشتاری بەکۆمەڵ و چالاکبونەوەی ڕەوتە ئیسلامی و ڕاسیستی و فاشیستیەکان، کردۆتە واقعیەتێكی تراژیدی و لەپێشەوە قوربانیەکانی خۆی لە ژنان و منداڵان دەسێنێ. جەنگ لە غەزە و لوبنان و ئۆکرانیا و سودان و.. کە تا ئێستا بەسەدان هەزار قوربانی لێکەوتۆتەوە و چەند ملیۆن ئینسانی ئاوارە و دەربەدەرکردووە، چەندیدن ماڵوحاڵ و گوند و شاری بەیەکجاری کاولکردووە، واقعیەتێكی تاڵی دونیای سەرمایەداری ئەمڕۆ و بەرهەمی کارنامەی ئینسانکوژی هەر ئەو دەوڵەتانە و هەر ئەو هێزە سیاسیە بۆرژوازیانەیە کە ئەمڕۆ دەم لە"ڕۆژی ڕاوەستانەوە بەرامبەر بەتوندوتیژی ژنان" دەکوتن.
لە کوردستان، ژنان لەسایەی دەسەڵاتی بۆرژوا-ناسیۆنالیستی کورد و حزبەکانیدا، بەدرێژایی چەندین دەیە، نەک هەر لەگەڵ بێمافی و جیاکاری و توندوتیژییەکی ڕێکخراو و پێشێلکردنی ئازادیەکانیاندا ڕووبه‌ڕووبوونەتەوە، بگرە کوشتن بە بەهانەی ناموس و ناچارکردنیان بەخۆسوتاندن بۆتە پەڵەیەکی ڕەش بە تەوێڵی سیستەمی حوکمڕانیەوە. سەرباری یاسا کۆنەپەرستە پیاوسالاریەکان، کە سەرچاوەی لە شەریعەتی ئیسلام وەرگرتوە، ژیانی کۆمەڵایەتی و یاسایی ژنانی کوردستانی لە دۆخێکی توندوتیژی بەردەواوم و ڕێکخراودا ڕاگرتووە و نەریت و کەلتوری کۆنەپەرستانە و دواکەوتوانەی جێماوی عەشیرەتی کوردایەتی لەلایەن حزبە دەسەڵاتدارەکانی کوردایەتیەوە بەسەر ژناندا سەپێنراوە و ڕۆژانە بەکەم زانین و ئەتکردکردن و بەکاڵا سەیرکردنی ژنان بەشێوەیەکی فراوان لە هەموو بوارەکانی ژیانی کۆمەلایەتیدا، خۆبەخۆ ڕەواجی پێدەدرێ. هاوکاتیش، دەست و دەمی ئیسلامی سیاسی و مەلا و بانگخوازە ئیسلامیە کۆنەپەرست و سەلەفیەکان دژی مافەکانی ژنان و کەسایەتی و کەرامەتی کۆمەڵایەتی و ئینسانیان کراوەتەوە و ڕۆژانە لە دەزگاکانی ڕاگەیاندن و میدیاکانی حزبە جۆرواجۆرە ناسیۆنالیستی و ئیسلامیەکانەوە ژەهری دژە ژن و بەسوك تەماشاکردنی ژنان و سەپاندنی فرەژنی و گەرمکردنی بازاڕی بازرگانی بە ژنانەوە بەناوی زواجی مسیار و موتعەو فرەژنی و تاد... دەڕێژرێت. بەڕادەیەک کە ئەم دۆخە بۆ ژنان به‌ئاستێک گەیشتووە، کە ژن بوون جگه بە مانای بوونەوەرێکی بێبایەخ و بێنرخی دروستکراو بۆ چێژوەرگرتنی سێکسی و خزمەتی پیاو، شتێکی تر نییە. هەر ژنێکیش له‌م پێوه‌ر و فه‌رهه‌نگه دواكه‌وتوانانه لابدات، ڕووبەڕووی کوشتن و توندوتیژی و سوکایەتی دەبێتەوە. ئەم ئاپارتایدە ڕەگەزی و یاسایی و کۆمەڵایەتیەی دژی ژنان لە کۆمەڵگای کوردستاندا بەڕێخراوە، بەشێکە لە جیاکاریی رێکخراو و بەئەنقەستی بۆرژوازی کورد، بە هەموو بزووتنەوە و ڕەوتەکانیەوە، بەمەبەستی لێکدابڕینی ڕیزەکانی چینی کرێکار و جەماوەری زەحمەتکێشی کوردستان، تا دەسەڵات و بەرژەوەندی سەرمایە و سەرمایەدارانی کورد و خاوەن کۆمپانیاکان لەسەر ڕەنج و زەحمەت و قوربانی و خوێنی ئەوان مسۆگەر بێت!
بێگومان وەستانەوە بەڕووی ئەم تاوانکاری و ستەمگەریەی کە ڕووبەڕووی ژنانە، چ لە جیهاندا و چ لە کوردستان، لەلایەن بزووتنەوەی یەکسانیخوازی ژنان و کۆمۆنیزمی کرێکاری و جوڵانەوە سکولاریستی و ئینساندۆستیەكانه‌وە، هەمیشە مەیدانێک بووە لەڕاستای بەرگریکردن لە کەسایەتی ئینسانی ژن و بەدەستهێنانی ماف و ئازادیەکانیان، گۆشەیەک بووە لە خەباتێکی چینایەتی بەرینتر، بۆ باشکردنی ژیان و پێکهێنانی گۆڕانکاری لە کۆمەڵگادا.
حزبی کۆمۆنیستی کرێکاریی کوردستان، لە ڕۆژی جیهانی ڕاوەستانەوە بەڕووی توندوتیژی ژناندا، بانگەوازی ڕێکخراوەکانی ژنان و بزوتنەوەی یەکسانیخوازی ژنان دەکات، ئەمڕۆژە لەڕاستای توندکردنەوەی خەبات بۆ لەگۆڕنانی ئاپارتایدی ڕەگەزی و بۆ یەکسانی هەمەلایەنەی یاسایی و کۆمەڵایەتی ژنان لەگەڵ پیاواندا، بەدەستەوەبگرن. هاوکات ڕادەگەیەنێت کە خەبات بۆ گێڕانەوەی حورمەتی ئینسانی و ماف و ئازادیەکانی ژنانی کوردستان، بەشێکە لە خەبات و ئەو ناڕەزایەتیە جەماوەریەی کە ڕۆژانە و به شێوازی جۆراوجۆر بۆ بەدەستهێنانی موچە و دامەزراندن و خزمەتگوزاریەکان، یەخەی دەسەلاتداران دەگرێ. حزبی کۆمۆنیستی کرێکاریی کوردستان ڕادەگەیەنێت کە هەروەکو چۆن مانەوەی ستەم و توندوتیژی و نایەکسانی و بێمافی ژنان لە بەرژەوەندی چینی سەرمایەدار و خاوەن سامانی کۆمەڵگای کوردستاندایە و حزب و لایەن و دەسەڵاتەکانی ئەوان بە چنگ و ددان دەیهێڵنەوە، ئاواش ڕزگاربوون لەو دۆخە پڕ لە سوکایەتی و بێمافیەی ژنان بەندە بە خەباتی ژنان و پیاوانی یەکسانیخوازەوە لەپاڵ بزوتنەوەی کرێکاری و کۆمۆنیستیدا بۆ هەڵتەکاندنی سیستمی سەرمایەداری و بنەما یاسایی و کۆمەڵایەتی و ئابوریەکانی چەوساندنەوەی چینایەتی..
حزبی کۆمۆنیستی کرێکاریی کوردستان
نۆڤەمبەری ٢٠٢٤
https://www.hkkurdistan.org/?p=13615
