"تۆڕێکی بێلایەنی سەربەخۆین"
05/03/2025
🔻ئەڵمانیا كارگەكانی ڤۆلكس واگن و مرسیدیس و پۆرش دەكات بە كارگەی دروستكردنی تانك و كەرەستەی سەربازی
🔻لەجەنگی جیهانی یەكەم و دووەمیشدا كارگەكانی ڤۆلكس واگن و ئۆپڵ و پۆرشی كردووە بە كارگەی سەربازی
🔻لە دوای گەڕانەوەی ترەمپ و هەڵكشانی مەترسی شەڕی روسیاو ناتۆ پەرەی بە دروستكردنی چەك داوە
🔻بەنیازی تەرخانكردنی بودجەیەكی كراوەیە بۆ خێراكردنی بەرهەمە سەربازییەكان
دەنگی پێشمەرگە:
كۆمپانیا زەبەلاحەكانی دروستكردنی ئۆتۆمبیل لە ئەڵمانیا، لە نمونەی، ڤۆلكس واگن و مەرسیدیس و پۆرش، بەنیازن لەبری دروستكردنی ئۆتۆمبیل، رووبكەنە دروستكردنی تانكی سەربازی.
كەناڵی"دۆیچە ڤیللە"ی ئەڵمانی، لە راپۆرتێكدا دەڵێت: لەگەڵ گەڕانەوەی دۆناڵد ترەمپ بۆ كۆشكی سپی و دروكەوتنەوەی لە هاوپەیمانە ئەوروپیەكانی و، هەڵكشانی هەڕەشەكانی پەیوەست بە ئەگەری هەڵگیرساندنی شەڕ لەنێوان هاوپەیمانی ناتۆو روسیا، دروستكردنی چەك لە ئەڵمانیا بازێكی نوێی داوە، لەكاتێكدا كۆمپانیا زەبەلاحەكانی دروستكردنی ئۆتۆمبیل بەدەست لاوازی خواستەوە دەناڵێنن، ئەوەش ناچاری كردوون پرۆگرامی سكهەڵگوشین و كەمكردنەوەی ژمارەی كارمەندەكانیان پیادە بكەن، كارخانەكانی تانك و تەقەمەنی و ئۆتۆمبێلی سەربازی لە هەوڵی زیادكردنی توانای بەرهەمهێناندایە بەشێوەیەكی خێراتر.
بەگوێرەی میدیاكانی ئەڵمانیا، هەندێك لەو كۆمپانیایانە دەستیان كردووە بە دامەزراندنی ئەو كارمەندانەی كە كۆمپانیاكانی ئۆتۆمبیل دەستبەرداریان بوون، یان گۆڕینی كارگەكانی دروستكردنی ئۆتۆمبیل بۆ كارگەری تایبەتمەند بە دروستكردنی چەك.
ئەم هەنگاوە هاوكاتە لەگەڵ راگەیاندنەكەی "فریدریش مێرتس" كە چاوەڕواندەكرێت ببێت بە راوێژكاری داهاتووی ئەڵمانیا، سەبارەت بە رێككەوتنێكی گەورە كە ئامادەكاری بۆ دەكرێت، بە راوێژكردن لەگەڵ هەندێك پارتی تر، رێككەوتنەكەش برتییە لە تەرخانكردنی بودجەیەكی كراوە، بۆ بەهێزكردنی تواناكانی بەرگری ئەڵمانیا، جگە لە تەرخانكردنی بڕی (500) ملیار یۆرۆ بۆ وەبەرهێنان لە ژێرخانی ئابوری وڵات و زیادكردنی بەرهەمهێنانی ناوخۆیی چەك، لە ئەنجامی ئەوەش پشكی كۆمپانیاكانی بواری بەرگری بە رێژەی زیاتر لە (20%) بەرزبووەتەوە .
ئەوە یەكەمجار نییە كە ئەڵمانیا ئەم ئاڕاستەیە دەگرێتەبەر، بەڵكو لە هەردوو جەنگی جیهانی یەكەم و دووەميشدا كۆمپانیا گەورەكانی دروستكردنی ئۆتۆمبیلی، وەك ڤۆلكس واگن و ئۆپڵ و پۆرشی كردووە بە كارخانەی بەرهەمهێنانی تانك و ئۆتۆمبیل گواستنەوەی سەربازو كەرەستەی سەربازی تر.
