03/01/2026
सोरेङ विन्टर फेस्टिभलमा लिम्बु परम्परागत स्टल आकर्षणको केन्द्र
------------------------------------------
सोरेङ:- भवानी पोखरेल
सोरेङ बस्तीको खेलमैदानमा भोलिदेखि सुरु हुन गइरहेको तीनदिवसीय सोरेङ विन्टर फेस्टले सम्पूर्ण क्षेत्रलाई उत्सवमय वातावरणले भरिएको छ। भोली ५ जनवरीदेखि ७ जनवरी २०२६ सम्म सञ्चालन हुने यस भव्य महोत्सवअन्तर्गत विभिन्न जातजातिका परम्परागत स्टलहरू स्थापना गरिएका छन्, जसले जातीय सद्भाव, सांस्कृतिक एकता र आपसी सम्मानको सुन्दर सन्देश प्रवाह गरेको छ।
उक्त स्टलहरूमध्ये लिम्बु जातिको परम्परागत स्टल विशेष आकर्षणको केन्द्र बनेको छ। लिम्बु समुदायको मौलिक संस्कृति, परम्परा, भेषभूषा र खानपानलाई जीवन्त रूपमा प्रस्तुत गरिएको यस स्टलले दर्शक तथा आगन्तुकहरूको मन छोएको देखिन्छ। परम्परागत खाद्यान्न सामग्री, मौलिक पहिरन, सांस्कृतिक सामग्री तथा ऐतिहासिक पहिचान झल्काउने सामग्रीहरूको प्रदर्शनले लिम्बु संस्कृतिको गहिराइ र गरिमा स्पष्ट रूपमा देखाएको छ।
सिक्किममा उल्लेख्य सङ्ख्यामा बसोबास गर्ने लिम्बु समुदायले पौराणिक कालदेखि हालसम्म आफ्ना सांस्कृतिक मूल्य, परम्परा र भेषभूषालाई संरक्षण गर्दै आइरहेका छन्। सांस्कृतिक चेतना, पहिचानको रक्षा र नयाँ पुस्तामा संस्कृतिप्रतिको चेतना जगाउने कार्यमा सिक्किममा बसोबास गर्ने लिम्बु समुदायको योगदान उल्लेखनीय रहेको स्थानीय बुद्धिजीवीहरूको भनाइ छ। नेपाल राष्ट्रमा जस्तै सिक्किममा पनि लिम्बु जातिको सांस्कृतिक संरक्षणप्रतिको प्रतिबद्धता कुनै रूपमा कम नभएको स्पष्ट देखिन्छ।
यस विन्टर फेस्टिभलको आयोजना सिक्किम सरकारको सम्माननीय मुख्यमन्त्रीको मार्गदर्शन तथा सोरेङ च्याखुङ निर्वाचन क्षेत्रका माननीय विधायक श्री आदित्य गोलेको विशेष पहलमा सम्पन्न हुन लागेको हो। कार्यक्रमको उद्देश्य सम्पूर्ण जातजाति, भाषा र संस्कृतिलाई एउटै डोरीमा बाँध्दै एकता, सहअस्तित्व र सद्भावलाई अझ सुदृढ बनाउनु रहेको विधायक आदित्य गोलेले बताउनुभएको छ। सबै जाति संस्कृतिलाई एउटै बाटोमा अघि बढाउँदै सामूहिक विकास र सांस्कृतिक मेलमिलाप नै हाम्रो मुख्य उद्देश्य हो उहाँले उल्लेख गर्नुभयो।
कार्यक्रममा सिक्किम राज्यका विभिन्न जिल्लाबाट मात्र नभई छिमेकी राज्य पश्चिम बङ्गालबाट समेत ठूलो सङ्ख्यामा दर्शक तथा सहभागीहरू आउने अपेक्षा गरिएको छ। विशेषगरी साँझपख आयोजना हुने सांगीतिक कार्यक्रममा सिक्किमका विभिन्न स्थानका चर्चित कलाकारहरू, साथै कालिम्पुङ र दार्जिलिङका प्रसिद्ध ब्यान्डहरूको विशेष प्रस्तुति रहने जानकारी आयोजक समितिले दिएको छ। यसले विन्टर फेस्टिभलको सांगीतिक साँझलाई अझ रोचक, ऊर्जावान र अविस्मरणीय बनाउने विश्वास लिइएको छ।
समग्रमा सोरेङ विन्टर फेस्टिभल केवल मनोरञ्जनको कार्यक्रम मात्र नभई सांस्कृतिक पहिचानको संरक्षण, जातीय सद्भावको प्रवर्द्धन र सामाजिक एकताको सशक्त माध्यमका रूपमा स्थापित हुँदै गएको देखिन्छ। विशेषगरी लिम्बु परम्परागत स्टलले प्रस्तुत गरेको सांस्कृतिक सौन्दर्यले सम्पूर्ण मानव मनलाई नै तरङ्गित बनाएको अनुभूति गराउँदै सोरेङ विन्टर फेस्टिभललाई अझ भव्य र अर्थपूर्ण बनाएको छ।
