28/12/2024
छत्तीसगढ़ी समाचार अनुवादक - किरण वर्मा
1- पूर्व प्रधानमंत्री डॉक्टर मनमोहन सिंह के आज नई दिल्ली के निगम बोधघाट म पूरा राजकीय सम्मान के साथ अंतिम संस्कार करे गीस।
2- छत्तीसगढ़ के पूर्व आबकारी मंत्री कवासी लखमा अउ उंखर बेटा हरीश कवासी के घर आज प्रवर्तन निदेसालय ह करे हे छापामारी।
अउ
3- चौबीसवां राष्ट्रीय वनवासी क्रीडा प्रतियोगिता के मुकाबला आज ले रईपुर म सुरू होगे हे।
अब समाचार विस्तार ले .....
डॉक्टर मनमोहन सिंह-अंतिम संस्कार
पूर्व प्रधानमंत्री डॉक्टर मनमोहन सिंह के आज नई दिल्ली के निगम बोधघाट म पूरा राजकीय सम्मान के साथ अंतिम संस्कार करे गीस। सिक्ख ग्रंथी अउ डॉक्टर मनमोहन सिंह के परिजन मन अंतिम संस्कार ले पहिली गुरूबानी के पाठ करीन।
औपचारिक गार्ड ऑफ ऑनर के बाद राष्ट्रपति द्रौपदी मुर्मु, उपराष्ट्रपति जगदीप धनखड़, प्रधानमंत्री नरेंद्र मोदी, केंद्रीय मंत्री राजनाथ सिंह, अमित शाह अउ जगत प्रकाश नड्डा अउ लोकसभा अध्यक्ष ओम बिरला ह डॉक्टर सिंह ल श्रध्दांजलि अर्पित करीन। एखर अलावा कांग्रेस अध्यक्ष मल्किर्जुन खड़गे, सोनिया गांधी अउ राहुल गांधी समेत कांग्रेस पार्टी के कई वरिष्ठ नेता मन ओमन ल अंतिम बिदाई दीन।
थल सेना प्रमुख जनरल उपेन्द्र द्विवेदी, नौसेना प्रमुख दिनेश के. त्रिपाठी, वायु सेना प्रमुख अमरप्रीत सिंह, भूटान नरेश जिगमे खेसर नामग्याल वांगचुक अउ मॉरिशस के विदेस मंत्री धनंजय रामफल ह घलो डॉक्टर मनमोहन सिंह ल पुष्पांजलि अर्पित करीन।
पूर्व प्रधानमंत्री के पार्थिव सरीर ल आज बिहनिया कांग्रेस मुख्यालय ले अंत्येष्टि स्थल निगम बोधघाट लाय गे रिहीस। एखर पहिली ओखर पार्थिव सरीर ल ओखर निवास ले कांग्रेस मुख्यालय लाय गे रिहीस, जिहां लोगन अउ पार्टी कार्यकर्ता मन ओखर आखिरी दर्सन करीन। डॉक्टर मनमोहन सिंह के बयानवे बछर के आयु म गुरूवार के नई दिल्ली के एम्स म निधन होगे रिहीस।
एनआईए-कार्रवाई
राष्ट्रीय अन्वेषण अभिकरण-एन.आई.ए. के टीम ह पाछू साल राज्य विधानसभा चुनई के दउरान मतदान कर्मी अउ सुरक्षा दल उपर माओवादी मनके हमला के सिलसिला म काली छत्तीसगढ़ म कई ठिन जघा अउ झारखंड के गिरिडीह जिला म छापामारी करिस। ए दउरान टीम ह नक्सली पर्चा, बुकलेट, मोबाइल फोन, डिजीटल डिवाइस अउ दूसर आपत्ति जनक सामग्री समेत डेढ़ लाख रूपिया नगद जब्ती करीस। एनआईए ह ए मामला म अब तक दस झिन आरोपी मनके खिलाफ आरोप पत्र दायर करे हे।
एनआईए ह केहे हे कि गरियाबंद अउ धमतरी जिला के माओवादी प्रभावित इलाका रावनडिग्गी, सेमरा, मैनपुर, घोरागांव, केराबहरा अउ गरियाबंद गांव मन म ग्यारा संदिग्ध मनके कई ठिकाना उपर तलासी ले गीस। माने जात हे कि संदिग्ध आरोपी प्रतिबंधित सी.पी.आई. (माओवादी) आतंकी संगठन के मैनपुर-नुआपाड़ा डिवीजन के सदस्य अउ समर्थक हरय।
एनआईए ह किहीन कि पाछू साल नवंबर म विधानसभा चुनई के दउरान मतदानकर्मी अउ सुरक्षाकर्मी मन उपर हमला म एक हेडकांस्टेबल के मउत होगे रिहीस। ए हमला के पीछू मैनपुर नुआपाड़ा डिवीजन के हाथ रिहीस।
ईडी-छापा
छत्तीसगढ़ के पूर्व आबकारी मंत्री कवासी लखमा अउ उंखर बेटा हरीश कवासी के घर आज प्रवर्तन निदेसालय-ईडी ह छापामारी करे हे। कवासी लखमा के रईपुर स्थित निवास म बिहनिया ले ईडी के टीम पहुंचिस। सुरक्षा ल देखत मउका म बड़का संख्या म सीआरपीएफ के जवान मौजूद रिहीन। एखर अलावा कवासी लखमा के करीबी माने जात सुशील ओझा के चौबे कालोनी स्थित घर म ईडी के टीम जांच बर पहुंचिस।
उहें, एखर ले पहिली ईडी ह सुकमा जिला म हरीश कवासी अउ नगर पालिका अध्यक्ष राजू साहू के घर म दबिस दीस। कवासी लखमा के बेटा वर्तमान म जिला पंचायत अध्यक्ष हरय। अधिकारी मनके टीम ओखर घर म मिले दस्तावेज के जांच करत हे।
बतादन कि ईडी ह सराब अउ कोयला घोटाला मामला म दू झिन पूर्व मंत्री, विधायक समेत सौ लोगन मनके खिलाफ नामजद एफआईआर दरज कराय हे। एमा कांग्रेस सरकार म आबकारी मंत्री रहय कवासी लखमा, खाद्यमंत्री अमरजीत भगत, पूर्व विधायक यूडी मिंज, गुलाब कमरो अउ शिशुपाल सोरी के नाव सामिल हे।
मन की बात
प्रधानमंत्री नरेंद्र मोदी काली आकाशवाणी म ‘‘मन की बात‘‘ कारीकरम म देस-विदेस के लोगन मन संग अपन बिचार साझा करही। ए मासिक रेडियो कारीकरम के एक सौ सत्रहवां कड़ी होही। मन की बात कारीकरम के प्रसारण आकाशवाणी अउ दूरदर्सन के पूरा नेटवर्क, आकाशवाणी समाचार वेबसाइट अउ न्यूज ऑन ए.आई.आर. मोबाइल ऐप म घलो प्रसारित करे जाही। एला आकाशवाणी समाचार, डीडी न्यूज, पीएमओ अउ सूचना अउ प्रसारण मंत्रालय के यूट्यूब चैनल मन म घलो सीधा प्रसारित करे जाही।
दुर्घटना-मौत
कांकेर जिला म एक सड़क दुर्घटना म दू छात्रा समेत पांच मनखे मन के मउत होगे हे। पुलिस ले मिले जानकारी के अनुसार ए हादसा भानूप्रतापपुर के अंतागढ़ मार्ग म ओतका बेर होइस, जब एक ठिन चार चक्का गाड़ी ह दू झिन मोटर साइकिल संवार मन ल टक्कर मार दीस। ए घटना म मोटर साइकिल सवार पांच मनखे मनके मउकच म मउत होगे। पुलिस ह आरोपी वाहन चालक ल गिरफ्तार कर ले हे।
उहें, जांजगीर-चांपा जिला के देवरी म हसदेव नदिया म डूबे दूसर युवक के घलो सव बरामद कर ले गेहे। पंतोरा पुलिस के अनुसार नदिया म नहाय के दउरान काली कोरबा जिला के दीपका निवासी दू झिन युवक डूब गे रिहीन। एक युवक के सव कलेच बरामद कर ले गे रिहीस।
माओवादी-आत्मसमर्पण
महाराष्ट्र के गोंदिया जिला म सक्रिय बीजापुर जिला के एक माओवादी देवा सुमादो मुदाम ह आत्मसमर्पण कर देहे। एखर उपर सात लाख रूपिया के इनाम रिहीस। गोंदिया जिला पुलिस के अपील के बाद अउ नक्सली समूह के गतिविधि मन ले निरास होके ओ ह जिला कलेक्टर प्रजीत नायर अउ पुलिस अधिकारी मनके आगू आत्मसमर्पण करीस।
उहें, सुकमा जिला म पुलिस अउ सीआरपीएफ के टीम ह दोरनापाल-पोलमपल्ली के बीच बीस-बीस किलो के दू आईईडी बरामद करे हे। पुलिस अधीक्षक किरण चव्हान ह बतइन कि ए आईईडी माओवादी मन जवान मन ल निसाना बनाय के उद्देस्य ले लगाय रिहीस।
राष्ट्रीय वनवासी क्रीडा प्रतियोगिता
चौबीसवां राष्ट्रीय वनवासी क्रीडा प्रतियोगिता के मुकाबला आज ले रईपुर म सुरू होगे हे। साईंस कॉलेज मैदान म आज एक सादा समारोह म ए प्रतियोगिता के उद्घाटन वनवासी कल्याण आश्रम के राष्ट्रीय अध्यक्ष सत्येन्द्र सिंह अउ राष्ट्रीय खिलाड़ी कविता राउत ह करीन।
आकाशवाणी समाचार ले गोठबात करत वनवासी कल्याण आश्रम के प्रांत प्रचार-प्रसार प्रमुख राजीव शर्मा ह बतइन कि आने-आने प्रांत के करीबन आठ सौ ले जादा खिलाड़ी ए प्रतियोगिता म हिस्सा लेवत हे।
प्रतियोगिता के आयोजन रईपुर के तीन जघा-स्वामी विवेकानंद स्टेडियम कोटा, पंडित रविशंकर शुक्ल विश्वविद्यालय के फुटबॉल मैदान अउ आर्चरी मैदान म करे जावत हे। ए प्रतियोगिता के तहत तीरंदाजी अउ फुटबॉल के मुकाबला होवत हे। प्रतियोगिता के समापन इकतीस दिसंबर के होही।
जिले की चिट्ठी
प्रादेसिक समाचार एकांश आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र रिले करही। ए दारी के अंक म ‘‘धमतरी‘‘ जिला के गतिविधि के बारे म जानकारी दे जाही।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के ‘‘हल्बी अउ गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र जगदलपुर ले प्रसारित करे जाही। एला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे ले प्रसारित करे जाही।
मौसम
अउ अब पेस हे मौसम के हाल...
प्रदेस म पाछू चौबीस घंटा के दउरान कई ठिन जिला म बारिस होय हे। गौरेला-पेण्ड्रा-मरवाही जिला म आज बिहनिया तेज हवा के संग बौछार पड़िस। उहें, कोरिया जिला के बैकुंठपुर के तीर-तखार के जघा मन म आज बरसा होइस। रईपुर जिला म आज बिहनिया ले धूप-छांव के स्थिति बने रिहीस। कुछेक जघा मन म बूंदाबांदी होइस।
मौसम विभाग के अनुसार प्रदेस म हवा के दिसा बदल गेहे, जेखर सेति बंगाल के खाड़ी ले नमी आवत हे। प्रदेस म अवइया चौबीस घंटा के दउरान मौसम के सुष्क रहे के संभावना हे। संघरा काली ले जाड़ घलो बाढ़ सकत हे। एक जनवरी ले उत्तर छत्तीसगढ़ के कुछेक हिस्सा म सीतलहर के स्थिति बनही। उहें, दू जनवरी तक प्रदेस के अधिकांस हिस्सा मन म न्यूनतम तापमान छै ले आठ डिग्री सेल्सियस गिरे के संभावना हे।
