18/06/2022
Retheihna hnehtu Sadio Mane..
"Ka naupan lai chuan school kalna tur pawisa kan neih loh avangin, tihtur nei ta lo thin chu khawlaiah thiante nen kan inkhel thin. English Premier League hi chu ka hre ve a, ka khel ve chak thei hle, mumang lamah tehian ka hmu ve fo thin."
"K*m 2002 khan k*m 10 mi chauh ka la ni, khang hunlai khan World Cup ah kan ram Senegal kha tihtakzetin ka tan a, engtik niah emaw chuan he ka ram tan hian ka khel ve ngei ang" tiin.
Senegal rama awm Bambali khaw tetakte, mi sing 2 bawrvel lek chenna ah k*m 1992 khan chhungkaw khawsak hniam ve takah rawn seilianin harsatna tamtak palchhuak turin a rawn thanglian ve zel a. He nau hian eng kawng nge a zawh anga, eng thleng nge a dai ang tih hi a chhungte leh thiante pawhin an hriatpui bik hauh lovang le.
K*m 2000 k*m khan Senegal ramah chuan club pakhat Academie Generation Foot tih hi din a ni a, he club hian stadium tepawh nei ve in, mi 1000 bawrvel chauh en theih a ni thung. K*m 17 a upa khawlaia ball chhe ve tawh tak pet thin, ball boot hluihlawn tawh bun thin Sadio Mane chuan k*m 2009 khan he club hi a zawm ve a, a football career ah enge thleng dawn tih hre lawk hauh lovin phur takin a khel ve tauh tauh thin kha ania.
Mane k*m 19 anih k*m 2011 alo thlen chuan atan thil lawmawm tak a rawn thleng ta ! French football a League hniam zawk Ligue - 2 a khellai club pakhat FC Metz a an football hruaitu te zinga mi thenkhat chuan Senegal rama club tenau pakhat a khel lai tlangval la naupang tak pakhat chu a ball khalh dan leh chetla laivel an enin an mit a tlung hle ni tur a ni, he Senegalese rawlthar hi an club a khel turin k*m 2011 ah vek chuan an lalut ta a, Professional football career chu a zawh chho tan ta kan ti thei tawh ang.
"Khami tuma ka chhungte leh thiante min lawmpuizia kha ka sawichhuak thiamlo fo thin, France ramah professional football zinkawng ka zawh thei dawn ta a, ball boot bun tawh hnu leh football chhe tak pe tawh lovin keima pualin a that hlak ka pet ve thei dawn a ni" tiin.
K*m 2011 - 2012 season bik hi French clubah hian chetha lutuk lovin khelh 22 atangin goal 2 chauh a thun thei a, a khelhna club FC Metz a pawh chu league hniam lamah an tla thla zui ta.
Professional huang chhung bik hi chu a ni tan chuan a har a ni, khawlaia ball pet mai mai leh Coaching tha tak hnuai pawha seilian ni lo, ei tha dawnglo, tui thianghlim taksa tana hrisel tur hmu pha velo tan chuan a harsa hle ngeiin a rinawm, mahse a beidawnglo. Ka zawh ta sa sa hlawhtling turin ka bei ang tih changchawiin k*m 2012 khan Austria rama club hlun ve tak RB Salzburg a zawm leh ta nghal a, beiseina nei sang lo tlangval chu khawvelin a thiamna a la hmu tlat lo.
Mahse thil a danglam chho dawn a ang ta, thli leh ruahsur karah training a thulh lo, club hlun leh hausa chuan khawl leh hmanraw tha a nei a, chung techu hmang tangkai tumin a bei ve ta, midangte aiin a thawh nasat fal bik a ngai tih hriain, a sur a sa hnuaiah a bei tauh tauh a. Ball sep, speed sang taka tlan, goal hma a hriam techu training ground a a zir nasat berte an ni, ngaihzawng leh social media lam a lang lo, hlawhtlinna chan tumin theihtawp a chhuah a, a par chhuak ta !
Austrian club tha RB Salzburg tan hian game 63 atangin goal 31 lai a chhuilh lut thei a, khawvelin a hre chho dawn ta. English club zinga ram tamtak a player tha leh talent nei sang te thlithlai thintu Scout nei tha lawrlak Southampton FC an rawn lang a, Sengal tlangval RB Salzburg a khel lai chu an rawn hmu ta chat mai le ! K*m 2014 a ni a, work permit vel tihfel ngai neuh neuh tihfel anih hnu in a naupan lai ata tawh mumang rama a lo hmuh fo thin Premier League a khel ve turin Southampton chu a zawm ta anih kha.
Southampton ah hian Sadio Mane chu che chhe lem lovin k*m hnih chhungin goal 21 a khunga, RB Salzburg a alo practice fo thin Tlan chak, rang taka ball han thai kual vel te, goal hma a hriam techu a takin a hmang tangkai chho ta a tih theih ang. RB Salzburg atanga Southampton a zawm tum khan Southampton football history a player transfer record thar siamin £12million lai sen a ni a, an tisual lo hle anihkha.
Southampton a akhelh lai hian k*m 2015 khan Premier League record siamin hattrick thun rang ber a ni a, second 176 chhungin Aston Villa lakah Hattrick a siam anihkha !
K*m 2016 alo thlenga Liverpool an rawn lang ta, £35million in Southampton a khellai Sadio Mane chu an lei a, k*m 6 chhung khelin Premier League, Champions League te a chawipuia, The Reds tan hian ropui taka inlanin, sawi a ziah dawn chuan a sei hle awm e. Tichuan, vawiin hunah German club ropui Bayern Munich a zawm dawn ta niin alang, a hun hmasa lam ngaihtuahin Sadio Mane chanchin hian mittui a kochhuak ve thei hial awm e.
A naupan lai leh a tleirawl chhoh tirh a alo dream ve thin Premier League ah ropui taka che in, tumna a awm chuan kawng pawh a awm tih chiang takin a lantir a. Hrehawm tamtak, lungngaih chang tamtak paltlangtu he Senegal inkhelthiam hian fak a phu ngawih ngawih a ni. African player inkhelthiam berte zingah a hming hi tarlan thin a ni fo tawh anga, a chhungte, a thiante a panlai nun hmanna te a theihnghilh ngai lohna hian ngaihsanna thuk tak min neih tir a ni.
K*m tam professional football khel tawh a ni, a neihsum a tam tawh a, hmun ropui leh nuam tlawha inti hlim thei a ni. Mahse a seilenna, a thiante leh khawlaia ball a pet thinna hmun te a theihnghilh lova, a tlawh fo thin. A nun a tlawma, a thil neihte a tha ber ber an ni lo fo. Khawvel chhe tawh tak karah leh chanhai zawkte rahbehna hmunah hian eng tiang taka nasa in nge parchhuah tumin a beih thin ang le.
