17/11/2024
LENJETER YIMPOKSÜI (NOVEMBER) 2024 VOLUME X: ISSUE 2
KAKET MULUNG: “PONGZÜ ASABA (COMMUNITY WILDBOAR HUNTING)”
R.N.I Registration no. NAGAAO/2016/76453
Registered Registration No. NL/RN-733/2022-24
10/10/2024
LENJETER MONGPOTENI (OCTOBER) 2024 VOLUME X: ISSUE 1
KAKET MULUNG: “THE CHURCH OF ALMIGHTY GOD (EASTERN LIGHTNING) YA SHIRNOK?"
20/08/2024
LENJETER TASÜNGDANGBA SÜNGDEN. Chiteni (July 2024), Vol. IX: 10
13/08/2024
LENJETER LUROI (AUGUST) 2024 VOLUME IX: ISSUE 11
KAKET MULUNG: “KÜM TENEM YI JEMER TOKTSÜ"
05/07/2024
LENJETER CHIDENI (JULY) 2024 VOLUME IX: ISSUE 10
KAKET MULUNG: “SANGMONGPI ARTIST LEPDEN JAMIR"
23/06/2024
TENEM JAGI NI ATUTSÜ ~T. Senka Ao
Source: Lenjeter 2024, April Issue, Volume IX:07
Military otsü nung India nungeri Kargil maktoka atsüngtetba ya alima kintemi bangkaa reprangba tatalokba ka lir. Kechiyong India tsütsülen nungi Kargil-leni atutsübaji noktaker masü saka, apua apua dang atutsüba atang aser rüjep lungkerak dang. Lungji rüjep agi labanger alinung tetsüng agi ajemedang rüjepji jakzüka ajutoker. Ibaji dang masü. Kargil matongdang tekong ka sütaka aliba Twin Bump Sector ya tsükchiri tsüpoka maittettsüsa tenem kolak ka lir. Twin Bump nung bunker ajakji Pakistan nungeri ‘Saturated bunker’ tesa yanglua lir. Talang nungi yokba injang aser bomb agi ‘Saturated Bunker” raksatsütsü kanga tasak. Anungji tsüngtong or chitepa merarara alimang yimya nung tekongtenem, rüjep aser zenket agi yangluba mitsaji tsüpoka aitsü tamakoktsü liasü. India nunger noknü tajung aser sepai yongsük teimba süaka, itemji tamshilen makai aküm. Ya India o Pakistan tsüngda küm 50 dak tali khangtepa aser nongtepa litsü agi raktepba otsü lir. India nunger a*oshi Kargil tongpang ya kodanga amatsü makokba takok ka lir. Tanü Kargil mongsong ajunga India ket nung lir. Iba rara nung Aor nok ka maden asübo tongpangji chirepa India nungeri mokoki lila.
India aser Pakistan independence nguli nungi artsü mechi nung tsükchitepa aru. Kin anapronglai pei litsü moraloka tuluba kümnü. Aji oda artsü nungji aiben injang yoktep aser pei litsü nungi masetshii ar mena atatep. Mapang mashika nung tsükchir jagi nongoka aittsü asünung, raraba noknü akangshia aser arangshia renemtep aser sepai yongsük teimba küma parnok nemji rarayim tensa den apet aser sangra tasen tesayuba agütsü.
Alimang tasazük, rongsenketsüng aser nütsüng yongsük asadangra Pakistan tashiji India tesadang kata masü. Kechiyong alima nung raraba sepai teimba ayuba rongnung India ya asembuba lir. Air Forcer aser Navy medenia ali nung raraba sepai ‘Infantry’ sepai lakh ter dak tali lir. Saka yimyim agüja tongpang jazüka merara nungji mesepsepi injang yoktepba artsü nung aiben atalaok. Anungji Pakistan den artsü süa aliba Jamu aser Kashmir state ya India a*oshi tesünep makaba litsü ka aküm.
Kidanger kin anaji küm 17 dak tali azühtepa aser taku chitepa lia arur rara ka adok. Iba rara nung rongsen jenti lalu, tongpang nung aika asü. Rongsenketsüng züsentetba nung takoksa tulu liasü. Aji oda kidanger kin ana raraba nungji Russia-i putisür mapa inyaka 1966 küm January 10 nü Tashkent Declaration ajanga yimjung yanglutsü. Rara ka nung kodang yimjung yangludir, idakji takoker mesüra makoker shinga mali. Anatsülen saku dang, anungji 1966 Indo-Pak war ya India a*oshi takok tongpang ka masü, oda Pakistan den alangyu nung dang tembang.
Aji saka Kargil war yabo alangyu nung tembangba tongpang ka masü. India military otsü nung Kargil makteta atsüngtetba ya takok tulutiba rongnung ka lir. Iba tongpang nung Aor nok techira ka maden asübo Kargil nungji India flag mesongteti lila.
Kargil ya kanga tongtibang mongsong ka India aser Pakistan tsüngda lir. Shiri iba mongsong agidir par jagi temeküt lim ajakji par likha asütsüsa alimangji lir. Anungji ya kin anapronglai tenük yokba tenemti mongsong ka. Ya nisung temang nung telongpo aser tesaret tsüngda tenah amai kanga lendong aser tongtibang. Tsükchir arulen süra ya kanga lendong, saka kibur küma sotra ya onsara tongtibang. Iba mapang tashi nung Kargil ya Pakistan ket nung liasü. Tenem yimti ya magitetra, India a*oshi tang aser teti a*oshi tesensentsüka liasü. Kin anaprongla a*oshi Kargil ya senti nükjang.
Kargil maktettsü a*oshi “Operation Vijay” ta tenüng waloktsür, Indian army nung nüngtugu regiment nungi sepai meyirijang aika Pakistan artsü anasa tenemtsüng nungji noktak. Injang, bomb aser motor amshia raradangaka India nungeri iba tenem yimti magitet. Kechiyong Kargil anüktsü a*oshi Twin Bump koba Kargil tenemtsünglen nungi tuagi lir, ya injang aser bomb agi ateta mekatettsüsa bunker-ji yangluadoker liasü. Pakistan nungi Kargil aser Twin Bump tsütsülenji wapetsa aser lisa medemmedemer. Saka India tsütsülen aliji yujiyujia atangbang aser lungren agi tekongji südanger. Rüjep agi labanger aliba tekong ajakji lungkerak dang. Yangji sangraa yangluba bunker takang agi Twin Bump ya atsüdanger. Twin Bumb paitoker merüa Kargil lenjagi atutsü tamakoktsü. Yangji Pakistan nunger ar mena alibaji temetet dang. Twin Bump bunker jagi nisung kwi aruli oli asür ibaji aonung aser anüngdang metitemi binocular aser NVD (Night vision device) nungi meita alinung, India nungeri züngdangteta dang liasü. Ajak lazüker, saka tesotdak ka mangu nung artsü nungji bangtaker dang anogo aser ita aika ali.
Raraba noknü tajungba aser nütsüng teimba süaka, alimang yimya nung tekongtenem agi südanga alibaji India a*oshi kam tanuhba asünung rarayim melenshia asalentong tasen ka aen südangtsü atongdang. Joko chitepa raratsü memerangdangi aser aphi nungi injang aser bomb yokba anener Indian army-ji artsü nungi tera atsüngina sayu. Iba nükjidongji; Pakistan nunger khen zübadaktsür külen, aonung Twin Bump jagi tua mitkarji ola madoki tepsettsü sayang liasü. Yamala mapa ka meinyakra India a*oshi takok ana nungbo melika ta ajitet. Kodang iba sentong inyaktsü officer-tem ‘Operation Vijay’ arkhudong den lemsatepa jembi, pai ashi, “Tasaji junger. Saka tenem jagi shiba atutsü?” Atangji ya pei taküma tenlatsüba wadang ka liasü.
India ama sub-continent ka nung, linük a*oshi pei taküm tenlatsü ta azüngashia nangzüker sepai nung adener meyirijang paika rongnung karbosa lidikodi ta jembitep, saka terataba teimla ka nung ya tendangtsü lemtet. Pakistan sepai-ji teimbaka Pathan nüsong lir.
Parnokji a*oajen tetemjen aser tash*tait tesa asünnug, shibai iba tayongzükba langzüteta noktakdir, paji tasü aitba mesüng dangjibo teperi masü. Paji a*oajen tajung aser tash*tait, temulung tulu aser tia apir tekolok amsh*tetba nübu ka asütsüla. Pai kechi agizüka lemteter ibaji melangmelanga inyaktetba nübu asütsüla. Anungji India nung regiment tajungtibatem adenshidak nungjagi tasütait aser tash*tait sepaitem kar shimteta pei pei regiment nungi anir arutsü bangjem. Parnok dangji kechi atema par regiment nungi shimteta jateper ibaji mashi, saka noklenwar tetemsü asütsüpur tenük yoka asadanger pei pei regiment commander-i anir sentep.
Kodang otsü ajak shia tiaji metetdaktsü, iba hall nungji shinga mali ama tsüngdangpi konga azünga aküm. Sepai ka züngsem akümnü, nüngdakra kin a*oshi taküm agütsütsü ta alima aser tsüngrem tsüngdang azüngashia nangzükba mapangji ibai lir ta shir, temulunger kar lira noktaktsü asüngdang. Iba tajaba ya ajungben tsüngi laoktsür ama aika a*oshi taoksatsü ka liasü. Shinga ola madok. Tanishir jagi nenshia asüngdng, “Tenem jagi shiba atutsü?” Parnok sentepba hall nungji tzüzü shiloktsü ama kok mesüi alidang, 2nd Naga regiment nungi Imliaküm noktak aser ashi, “Sir, ni atutsü.” Tango saketer hall nung mena alirtemji serem ta tango sazük aser tejak meyiper Imliaküm dak reprang. Khenpiga lir tanishir jagi ashi, “Ano kar aliasü?” Saka shinga ola maliasü. Kechiyong iba ama mapa ka a*oshi kija dangbo meyoknüi tanishir jagi bilem südi. Saka shingaia melangzü nungji tanishir jagi Imliaküm dang asüngdang, “Na dang süaka atutsü asü masü?” Pai langzü, “Sir kü kija dang süaka ni atutsü.” Tanaben tanishir jagi “Imliaküm den atutsü kar aliasü?” ta asüngdangdang, Mao nunger Atharani noktaka “Imliaküm tura nia pa den atutsü.” ta ashi. Yamaji Naga regiment nungi asangur anati par taküm tenlatsü tashi makeni linük a*oshi iba mapa inyaktsü langzük.
Chuchuyimpang nunger Arennungba aser Aoinla jaba*o Imliaküm 1976 küm, Ao lima nung Revival tewangwang mapang July 25 nü a*o. Pa küm 18 alidang 1994 küm May 10 nü 2nd Naga regiment nung tenüng züluok. Imliaküm tar süklep 5 ser tesdang talang, sentsü tajung aser temang longsünglongsünga tetsüng tepen nung tetsüji melangmelanger. Lanuwa nungi tsüraburi pa Tsüngrem meimba nung anitet. Pai kechi inyakdir jetjeta tajitettsü makai inyaktet. Pa sepai nung ano küm treok dang aser arishi küm 23 alidang linük a*oshi tsükchir lima nung kija noktaktsü tajaba ya agizük.
Rüjepma nung jajatsü asünung pa süoshi tetsüng nungi tekolak tashi rüjep sentsü nung dang yanglutsü. Mitkar dakji injang yoka kara perangbong olaji angashir bunker nung aliertemji senteta adoktsü asünung perangbong maben. Saka pistol ka nung injang trok setokba ka bendaktsü. Ibaji mitkar dakji akatsüba masü saka taküm tasü tsüngda nüngdak kar adokra ta bendaktsüba liasü. Aser komala tia ka nung aji amsh*tsü tesayuba ajak agütsü. Rüjepma nung lenalena jajaba tsüngsem ka agütsü. Pa commander captain Sarawad tena tango agi jembiteptsü a*oshi microphone ka pa tenarong aser tebang nung chiloka süoshi nungji süloka yanglutsür liasü.
Regiment ajak nung tanishirtemji adenshir Imliaküm dang noknü tapu balala sayua pa dang kobala abentsü ta asüngdang. Aser aji koma amsh*tsü ajia sayu. Item rongnung: pu, khukri, nü, merang taju, merang süngsü, kotari aser anatsü noklangnok aika sayu. Saka pai item rongnung ka danga magizük. Pai Aor nok ka chirachiraa arangteter aliba parnok dang sayu. Parnok ajaki aji meshir amdanga aser meimshia reprang. Aji asünung Aor nok kajia rüjep sentsü agi nübanga renemtsü. Par tanishir aser tulurtemi tasüaittsü, metsübutsü aser kecha terata aser tatitak makai tenem jagi atutsü sayutsüngi aika agütsü, saka itemji pa atema kanga nüngdakbo maliasü, kechiyong parnoki mashidang pa ternemdang liasü.
6 Tiger Hill tenem, koba Naga Regiment-i Pakistan nunger nungi June ita nung atsüngtoker joko parnok menjendi yanglur liasü, iba nungjagi Imliaküm July 6 nü terotu meta apuso. Ayatrem meta tsükchir lima nungji tetsüng ajemoka rüjepma nungji apua apua atu. Twin Bump tenem kolak atongtsü teyu ka lia par asem khen süngjema amen. Yangnungjagi, Pakistan nunger mitkar ana ajurutepa süili aser ano meyipa aruli ta senzübaji ajioka ayu. Pa sülen Atharani feet 100 shi tetsüngda yur anitak. Iba nungjagi tatsüka lur Company Commander Sarawad-i kechi ashir iba amaji Imliaküm rüjepma nungji aseta aseta atu. Captain Sarawad-i aphi nungi Pakistan nunger mitkar joitepa oli aruli ta tenem kolak nung jajaba meraji züngdanga, ‘left right! left right! ta microphone nungji ashidang Imliaküm tenem kolakji anasaba anasaba aseta aseta atu. Kodangsa mitkar anaji tekong tiyongtsü nungji ajurutepa khenpiga noktakdir, Imliakümi pa tekolak rüjepma nung rüngeta apudaker aliba nungi lasa angema atur reprangli asü. Longkongji atongtsü feet 20 shi lia pa dang khen anener süngjemsh*tsü aser pa medemsang Atharani atatsü Captain Sarawad jagi ashi. Anungji pa tango sashiba aser azü süngjema khen marakzüi rüjepma nungji apudaka anener ali. Nok jagi leptettsüsa longkong nungji mitkar mera jagi Imliaküm aser medemsang tena ontaka alidakji ajangli dang Captain Sarawad-i microphone nungji “Kob!” ta ashi. Pakistan nunger mitkarji a*o tulu asünung tesülen nungi shir joko süia taor lia Atharani-i tesülen nungi laodaktsü aser idangji Imliaküm-i tepiji jendanga alep aser laor lia tekongji atang. Tanabuba mitkarji, pa temba meyipa aruba maliasü nung, ‘ustat, ustat’ ta longkong nungji phensema aru. Pai ataa alidak tesemji mera kati ajangli dang Imliakümi jokketa tur, teperemji temdanga alep. Aji oda tanabuba mitkarji pa tar ajak meyazüka alua ali nung laoa ontak. Ya 1999 küm July 7 nü ayaterm süir 2:15 AM nung liasü. Tenemtsüng nungi rüjepma nung apua apua atuba aser Twin Bump tenem kolak nung Imliaküm nokinket ketmungji India litsü nungi ‘Night Vision Device’ binocular nungi ajia liasü. Pai nangzükba wadang ka takok ngua tembanger, iba rüjepma longkong nung pa kija noktaker teka metonga sayudang, Captain Sarawad-i aniba commando-temji pungmesoa tua Twin Bump nung bunker südaka aliba nungji bomb tesashi asemsü nung külemi ajungokja apokdang bunker ajungaji ali agi anenbanga yangji alir aja repoka asü.
Iba sülenbo ghonda ishika nung Kargil atsüngtet. Indian military otsü nung Kargil maktetba ya takok tutuiba rongnung ka lir. Kargil agir külenbo iba temeküt nung Pakistan nungeri agia aliba tenem; Rocky K**b, Twin Bump, Safaid Nala, PT 5113, aser Naga Hill ya Indiai makteta agi. July 6 aonung Imliaküm Twin Bump-i apusodak PT 5113 aser Naga Hill tenem ana tsüngda lenmang waitepdak tesem nungji hontzü agi, “Imli Point” ta züluba nüngshilung ka tanü tashi noktaka angutsü. Pa dang “Kargil Hero” ta ajar.
Iba mapang India nung Defence Minister George Fernandes liasü. Tongpang nung takok tulu anguba nüngtem nung pai sepai-tem nem benjong ka agüja semdang. Iba tongpang nung tasüita rarartem parnok ishika tenüng teta songteter Defence Minister denji ajurutepdaktsü. Defence Minister jagi parnok tenüng sanga, “Shabash” ta shia parnok taginüba kar lira ash*tsü nisung shia nem mapang agütsü. Parnok kari, par chir MBBS azüngtsü admission agüjang ta ashi. Ano kari par chir Engeneering college nung admission meshi. Teimbakati parnok chirnur nem government mapa agüjang ta mepishi. Ajak rongnungi alakteta Defence Minister jagi Imliaküm den salem süa pa taginüba kar lira meshiang ta ashidang, Imliakümi ashi, “Sir, Nagaland nung Sainik School ka lapokjang”. Iba o ya angashir Defence Minister jagi tepela agi Imliaküm dak azüit aser pai mepishibaji agütsütsü ta nangzük. Iba sülen Defence Minister jagi, komala noknü ka amshia pai mitkar anaji tepsettet ibaji reprangdangnür ta ashi nung, pai oa Aor nok kaji bener arua atsüteta sayu. Aji angudang George Fernandes-i pa tekapu anaprongla mejemtepa teku nung süloker nokji külema akümtsübu sayu. Iba sülenjiang nok dakji amtaka meimshia aser meyipshia reprang.
Nokinketer Imliaküm nem MVC medal agütsütsü ta 2000 küm Indian Republic Day nung sangdong aser November 19 nü Indian President K. R. Narayanan ajanga MVC (Mahavir Chakra) medal agüja tetushi waloktsü. Pa den anitaka atusang Atharani nem Sena Medal aser Captain Sarawad nem Vir Chakra medal agütsü.
Tongpang nung takok angur tetoshiji atamta masü. Kechiyong pazü agi linük alangzük. Nokinketertem rongnungjia shiri tsükchir lima nung mayang süa noktaka tsükchir litsü rakpoka takokleni anir, parnok nemji alakteta tetushi konang waloktsür. Tetushi aser konang waloktsüba sempetji kechi komala ka? ta masü saka, shibaket nung angur iba jenjang jagi konangji shisangdaktsür. Indian President-ji linük nung tulutiba aser kin tebu lir. Pa ket agi waloktsüba sempet dak tuluba tanga kecha mali.
Aji oda kodang Kargil nokinketertem pei pei limai sodi ao idangji par nübur nungi tetoshi tulu agüja agizük. Parnok aika par state nung Governor aser Chief Minister-i jaoka tenüngsang agütsü. Khenkhen tensa aser tia agi iba amala mapang magitetaka, nüngsangmen o zülur agütsür. Par state nung Ex. Servicemen telungjem jagi tenüngsang aser tetushi agüja sentong tajung agir. Kechiyong tanü sepaitem tongpang nung noktaka aliba amaji, Ex Servicemen ajakji linük kümzüktsü a*oshi pei taküm bendanga agüja arur sodi agibatem lir. Anungji Ex Servicemen aser tanü tongpang nung noktaka alirtemji kasa wadang nung tebu aser jaba*o amai lir. Ibayongji district shia Ex Servicemen telungjem government-i tenteta yuja lir. Anungji tongpang nung nokinketer pei limai arudang Ex Serviceman telungjem jagi tushia agizüktsübasa. Ano iba den lokti tentet balalai sentong yanglua takoker nemji tetushi agütsür. Kargil tongpang nung Aor sangbang kati kin a*oshi taküm tenla agüja tsükchir litsü rakpoka aibayong kini tetushi agütsüba osangkakettem, All India Radio aser Doordarshan nung tetushi ola yoka sangtong. Ao Mileni mezüngbuba tapak nung nokinketer taküm aser mapa indang adoktsü. Iba ama kin a*oshi pei taküm tenla takok ngutetba tasütait aser tetamatsü osang ya Naga nungeri angashia aikati süngmang aser ajak pelatep.
Kodang arshii aor ka sarir mangko bener pei süngkümi aitdir, süngkong ajena, oriri agüja pa anak ken tena agizükba ya Ao kini benshia aru. Nokinketer ka tushibaji ajak rongnung tematiba konang tulutiba. Kechiyong nokinketer jagi linükji alangzük. Kargil nokinketer takok korang bener pei limai arudang pa ta*o yim sensopuri pelaa agizükba dak alaka, Ao kini Imliaküm nem tenüngsang magütsütet. Mokokchung district Ex. Servicemen telungjemi pa nem tetushi agütsüba sentong kecha meyanglu mesüra pa ajurua tenüngsang o ka danga ashiba maliasü. Ao Senden aser Tsükong Mungdangi ola madok. Pei jaba*oi iba ama takok tulu bener kidangi shilangdang, tetsü ka ama Watsü Mungdangi tenüngsang aser tepela lemsatep asübo alimaji koda tobur jungla. Ajaklen tenüngsang ola agi anünga liasü.
Kargil War nung Imliaküm den parnok nisung teri Mahavir Chakra angu. Item rongnung Northeast nungi Angami nunger Captain Neikezhakuo Nengurise aser Khasia nunger Captain Keishing Clifford Nongrum liasü. Captain Nengurise iba ‘Operation Vijay’ nung linük a*oshi taküm tenlaa tongpang tejaklen asü. Pa tasümang bener arudang government-i tetushi tulu agüja agizük. Kodang pa nem MVC konang waloktsü, Angami Public Organizationa-i pa nem tenüngsang aser tetushi agütsüba sentongji kanga merena liasü. Meimchir nem tenüngsang aser tetushi tulutiba agütsübaji senso shiri taküm tenlaa pei kin a*oshi noktaker parnok nem waloktsüba ya lir. Par takümjii yimkong wabanga süngwa ka ama iba akhüm nungji nüburtem süngzüker. Iba süngti nung atangba süngjangji nüburtem a*oshi lir. Nokinketer ka konangji mejeni par nübur dak pa sentsüji rungloka alimai achaketa repranger. Nokinketer ka aliba süngkümji tsükchiri sensena reprangba yimti ka lir. Tanü asenok den Nengurise mali, saka pai alangzüka yutsüba maongkaji nüburtemi agir. Nengurise aser par yim tenüngji danga tetshi nung Indian army sabang nungi par yimerji jenjang keta benshir. Kasaji Shillong nunga Captain Keishing Clifford Nongrum nem Meghalaya state government-i ayonga Khasi & Jaintia Hills nüburtemi tetushi tulu agüja agizük. Naga nunger rongnung iba tetushi sempet MVC ya taoba mapang shingaia ngua maru.
Pei sensopuri par takoker tushiba nungji nübur a*oshi tashi asüngsashiba ka lir. Iba tetushi ya nisungba atemaji dang masü, saka tarutsü nung kasa süngjang adoktsü züsenba ka lir 1947 nungi 2017 tashi nung Mahavir Chakra angur 218 dang lir. Item rongnung Aor nokinketer ka dentetbaji kin a*oshi koda tejak tentettsüka. India kini alakteta tushiba Imliaküm, Ao sensopur rongnung lokti tentet kati danga tenüngsangba ola madok. Parnoki nokinketerji mangu aser pa mapaji mangashi aküm. Ao kin a*oshi ya koda tia maka!
Yamaji, tajung dang junger ta mesh*tetba tia ka nung Imliaküm MVC sodi arur alidang, ni pa den mensem ka kanür ta A*o Imsong dang shiok. 2001 küm January 19nü, masangyong süilika tena ozü kidangi aru. Ya ni a*oshi senti mapang ka liasü. Ozü asem mensem nung sensaksemdang, Imliakümi pa lanuwa taküm aser koda Naga Regiment nung shimteta training agi aser Twin Bump nung pai mitkar ana taküm agiba sülen Kargil maktetba nung pai shilem agi item otsü ashidang, tango saketer angatsü tatalokbatem tesa liasü. Atangji pa dang Kargil Hero ta ajabaji tetemsü aser tsüngchi.
Tsükchir lima ka nung pa kisüng aonung ghonda paikaji apua apua tua perangbong amer alir den nok pasa agi dang raratsü tashiji kong nungi ta ni asüngdang. Kechiyong yamala mapa ya shi temang nung tashi aitba dang nungibo tasütait aser tangatetba ain ka makara meinyaktettsü. Imliakümi ashi, “Oko, tangbo nia pungmang ka ama mulungsentsü nung dang bilemteter. Saka idangji ni kecha metsübu, metata aser temulung lemlema dang Tiger Hill nungi apuso. Terata mesüra tarentakba kecha maliasü. Onok tanishir jagi, “Tenem jagi shiba atutsü?” ta ashidang kü mulung nung kecha tatitak makai melangmelanga ni tenem kolak tashiji atutsü mulungtet.” Twin Bump nung tetsüng ajemoka apusodang, pai sarasadem aser kidang tebu aser tetsüi teti pa a*oshi sarasademba bilemtet. Pai teimla mesama. Lanuwa nungi tebui parnok dang, ochishia lira Tsüngremi kodanga mesentoktsü ta ashibaji parnok taküm nung rongniba tashi liasü. Tebui parnok dang ashi, “Ochimashir aser aibeleneri tsübur. Saka ochishir a*oshi tetsübutsü mali. Tsüngremji ochi. Na ochishia lira kecha tetsübu. Tsüngrem ne den alitsü”. Pai tebu o bilemtet. Aser pai pa sasa asüngdang, “Tsüngrem, ni ochi danga to!”
Pai otsü shia aodang, pa taküm nung aiben meimlaba jenjang ajurur ta ashi. Naga Regiment nung adentsü interview agütsüdang, tangarbo tulur aser tongtibang nisungtem nungi ‘recommendation’ tajung bener aru. Pabo yamala kecha maka. Saka ochi nung pa tajungtiba agi meranga interview-ji agütsü. Pai kangabo meimla liasü. Saka shimteter rongnung pa tamapur liasü. Ya meimlaba jenjang ka pa dak atalok.
Pa taküm nung meimlaba jenjang aiben ataloker ta Imliakümi ashiba oji ni a*oshi shisapuin yange tasen ka liasü. Anungji pa dak atalokbatem ni meita ali. Aser atangji meimlaba jenjang ka Imliaküm taküm nung atalok. Naga lima nung Sainik School ka lapoktsü ta Indian Defence Minister-i pa nem o agütsüba ama 2007 küm May 20 nü Sainik School-ji lapok. Iba school lapoktsü tetemjen mongsong ka indang par tanishirtemi Imliaküm den lemsatepdang, Ao lima lisa tajung ka nung Sainik School lapokra kanga ajungtsü ta pai ashi. Ibaji züluoka ayu. Iba nükla nung inyaka aru. Kodang mapangji tonga aru, Ao lima nung masü saka Punglwa nung Sainik school ya lapok aser tatemlen koma tembang; school-ji tenzüker külenang kechiba kechi masü aji angajema aru. Iba Sainik School 2007 küm May 20 nü lapokdang Nagaland nung Ex Servicemen aser sepai tulur aika benjongmung nungji dena liasü. Saka Imliaküm dang iba sentong indang mashi mesüra pa mejaok. Pa tanishibai Imliaküm dang Defence Minister-bai pa nem o agütsüba ama, Nagaland nung Sainik School to lapokogo ta ashidangang pai osangji angashi. Aser Newspaper nung osang tejangjaji angu. Ibaia Imliaküm taküm nung meimlaba jenjang aka ajuruba liasü.
Taküm nung Imliakümi meimlaba jenjang ka ajurubaji; nüksakmenü agi kanga azür, tesüngjem aser jakla teindang tobur tajung aiür ka ajuruba ya liasü. Iba aiür, Dibuia nunger Tatongkaba jala Imosongla den 2008 küm December 10 nü Chchuyimpang Baptist arogo nung Rev. I. Wati Imsong ajanga temeshi kiyimba kulizüng agi.
Tongpang nung nokinketer ka nem tetushi waloktsüba den sentakba nung maongka aikasa lir. Rank nung menden temabai atuba den itasen teimba sükloktsür. Pa den temaba tanishirtemi meraketa aser akümtsübua benshir. Imliaküm 1994 küm Naga Regiment nung ‘constable’ interview nung takok ngua tenüng züluok. Kin a*oshi pei taküm tenlatsü tashi mapayuri tsükchir lima nung kija noktaka takok anguba tetushi aser tenüngsang agüja, Imliaküm MVC, nem Honarary Captain agütsü. Pei ta*oli a*oshi asangwa aser atura piyong, küm 28 tashi, Captain Imliaküm MVC pa tajungtiba alima nem agütsü. Kin ka a*oshi rongsen tulutibaji sensopur rongnung azü tenla agütsür sotetbaji lir.
16/06/2024
OBA NEM SEMPET KA ~ T. Senka Ao
Source: Lenjeter Vol 3. 9, June 2018
Kü temba Shilumeren jaba*o Lolenlepden Mokokchung town nung kiyong tatemlen ward ka nung alir. Tera atanglen tuagi. Anungji par kidangi aodang, lung khen yok tsüngda ka nung gari-ji yur tetsüng agi hoi hoi ta jajatsü. Saka kiji tonger reprangra, par ki, kima, atsü aser temeketji jepjepa tajinütsüka. Oda kazüa linütsüka.
Gari-ji aiben longshirang meyiptettsüsa lenmangji temesü liaka aser tetsüng agi jajatsüsa atang süaka ni par ki semdangba nungji teti tepela kati ani. Tanü Shilumeren maliyong lanuwa tembar bilemteta par jaba*o Lolenlepden ajurunübayong dang masü mesüra compound tesadem nung tobur tajung ki ka meketa naro pungsen sanem nungji masü, saka kü nüki songtemtsü makoktsüsa par jala ka denji khen danga jembinüyong ni Lolenlepden aiben semdang.
Mobile phone amshiaka, land-line telephone tanü tashi par kidang junga yua lir. Nai par kidang jagi tsüngtong moaka iba land-line phone nungji khen danga jembidangangjo! Na tia kara iba phone-ji par jala Ajinaroi agizüktsü. La ola tanang aser osü tajung jagi ne mulung manga liaka, mepet süshir ama sangwadaktsütsü. La ola osü tanang anganübaji kü dak tash*tak tamajung ka ama küma teyongyaba kati ni shirangdaktsü. Aser nisa tia aka iba phone nungji jembidang aiben lai agizük. Kechiyong lar tsüraburbo mobile phone karji, land-line phone-ji oda parnoki züdok südi. Aser ibajia kü bangsang nungsa sülok. La den jembi tzüra madem nung aiben oji atsülanga mechimenu aika dena ni jembili asü. Talisa tsürabur office nungi ano marudang aser labo school senshia ki tonger alidang mapang indok mesasai ni jembi. La ola tanang aser tepuwatsü osü denji mulungsentsü teindang aser tongmelang shisatsüji kau nüksh*tsüka. Aiben ni la den jembidang, “Obou, na shiba den jembiner?” Aser kodang tsürabur kidang melilir, lai asüngdanger, “Obou, na shibai jembi ta ni kübu dang ash*tsü?” Aser ashir , “Obala arur jembiang no?” La yimya awashi meteta jembiba jagi, la ola osüji tali tenüksh*tsü ka kümdaktsü.
Ajinaro class pezü nung azünger. La arishi küm ti mesüra tuko medaka dang asütsü amai. La sadoksanem aser mulungsentsü temerük nungi jembiba jagi ni dang masü saka aienlongener aser süisüpongertemia khenbosa rangkaa reprang. La nüksak kerangkeranga sentsü jensajensar. Tepen aser temola chilongchilonga tonglongso ama. Tenarongji lipokkonger temechi ama anepaneper, oda khen danga amdangnütsüka. Asükwabo la tenipong tera kangsar saka tebangmechijibo tangshipu satet medem tangpatangpaa süsür.
Anepdang school-i aodang uniform-ji agirbo menamenaa kau penzünütsüka. La school nungi senshidang yangkhu sünga kaketji mokoksümongi tekolak nung anem ama yangkhu tayiji süloker arubaji kau lamatsüka. Ongji la menerem tejak angudang yangkhujia densema khen danga ajunga arunütsüka. Kechi süoshi agidir la dak petpeter. Anükla Lolenlepdener kidangi ni aiben kisemi aobaji, tebu onok lanuwa otsü alongtsüba tatemtsü sür, Ajinaro den phone nung jembi mesüngibo mulung meleti aji oda la yusaro aser nüksangmenü khen danga nguyua ajurutepbaji lung kati ozü ana onzük ama liasü.
Anepdang züngia, naroben nung azüngtzü jenloka, masangyong nungbo naroji kodaka tobur junga apungtsü ta alima tsüngdang Lolenlepdener kibong nung Ajinaro nükmia reprangba mapang ka nung, kanga taku tia ka ajuru. Tedi ana den tenu Ajinaro ano küm pezü dang doktsür Lolenlepden tebutsü Odijungla anogo ishika dang rarema lir, kodanga meshilangba lima jagi oadok. Itasen tajung anüngakongtsü kecha maka, lirepatsüka aliba tetemjen kibong kaji tasübai menep. Lolenlepden chendonglur aküm, aser tanurtem tetsü ta*ola makai rongjentsü mapang kati atong.
Office mapa meraket jenjang nungi itasen tenük sünga angur. Ajinaro tedi ana Mangichen aser Saonger tekolok tajung. CYE aser lanurtemi arogo tenzükba nung tena dak arogopuri tamang katetyong tenzükba wadangren aisü nung tena amshi. Deobar-nü CYE teloki ken atendang, Ajinaro tebu den mener tedi nunger kentenbaji kanga jangratema anga, saka item kentenba ajakji angudang Lolenlepdeni tebutsü Odijungla bilemtet. Küm ishika tejaklen Fathers’ Day nung CYE teloki ken atendang tebutsü tena tsüngda Ajinaro mener kentenba angaba to tanübo rongjenseta jala tena kisüng.
Atura nung Lolenlepden kijunglur kümer. Zürepa aser rongjena alidang, Ajinaro ya dang pa süneptsürji liasü. Tebu tena külemi mejang, kasa menden nung mener chiyung aser yipteni yir otsü atonga amoa oli asü. Nekongdang office nungi arua Lolenlepdeni pei jala ajurudang pelabaji tesünep tulu liasü. Tedi ana temeim la dak alibaji dang masü, saka kinunger aser adianu ajaki ketasena Ajinaro meim. La dak temeimtsü aser tenüksh*tsü sempet jagi lai shiba den jembidir parnok mulungji atsüa aru.
Office mapa tulu den kibong khureti neneter Lolenlepden rongjena aser zürepa küm ishika aru. Kibong lanu, tanurtem kaket shisatsü nung temulung agütsütsüba mapang. Saka meshi mabensa chipo metongdaktet ama tebutsü mangyim nüktzü aser kijunglur khuret nüktzü anaprongla pa kapui aidok.
Meimchir soli süli lima chendonglur maroksa takuba. Shiri ajangogo parnoki dang metet. Lolenlepden ashirepba nisung ka aküm. Kidang kilung nung osettsüset tiptem maka, kima temdangsünga osettsüset merepshia benjar. Aser naro tobur tajung tapu meyina tsünüteta aliba joko anepdang aser nekongdang tzü junga main nung azülar aser karbo aroa oadoker. Tebutsü Odijungla alidang pa süoshi jepjepa aser sütepsütepa agiba to, tangbo sülasüshia agir, tsüngsem nung sentsü adoka perangperanga agiba to puyakpuyaka dang. Pa tejak nung sentsü ka mait, anasa menteper sensaksemdanga ola tsüngtsünga madoker. Tsüa, anükla Lolenlepden to yamai zürepa rongjentsü no ta kü mulungjangi mokoki ni pa tiaji lamaseta aochi.
Adianu aser kinungertemi tetsür tasen ka anioktsü ashi. Karibo ya jungdisü ta, ibaia koda ta tuyu. Saka pai pak masü. Kecha melangzü. Ashiko pa mulung nung kechi tongpang liasü shingaia memetet. Kenü Shilumeren tenu Süjunginlai kü dangi arua ashi, “Oko Senka, nai Lolenlepden dang langka shiang. Pa yamai rongjena meyutsüli. Mesüra ashiko, tebutsü ama, paia jaba*o ana den jala ka ya repranga malitsü. Pa arishia malitsüakodi. Memenui tetsür ka agitsü shiang. Odila nenok külemi lia arudang pa lanuwa nungi ne denbo mulungtoka aser pokpatsübaa aru nungji pai ne dangbo pa mulung lapoka jembitsü. No? Na khen oang no?”
“Nenoki langkabo shidang asü masü?”
“Onoki haya shiogo”
“Pai koma bilemer?”
“Kecha melangzür. Oda paka masür. Tebang melapoker.”
Tebu küna akialu aser inyaksangshi maparem aika nung külemi lia arudang ni Lolenlepden shisamulung ngua lir. Lolenlepden ya kanga terajem aser tebilemdangba nisung ka lir. Tatsü talang ajak medemdanga shisadangerang pai telemtetba agia aruba ni meteta lir. Kinunger aser adianu dang pai kok masübaji kuli karbosa alitsü ta tenü o nungjagi ni lazük. Aser atangji kijai kibong khuret abentsüji temela masü. Kechiyong küna ajurutepa sensaksemdang pai kü den mepilanüi pa lanuwa onok lia aruba otsü alongdang aser tang pa koda rongjena ali aji pa tejak nungji ni ajitet.
Kijunglur tebur ka pa den chirnur lia pa a*oshi kinungtsü ka bush*tettsüji mapa tasak rongnung ka lir. Kechiyong laji tebursang kiji dang aor masü, saka rabitsür kati a*oba chirnurtem den alitsüba. Iba amala tetsür kaji khuret angatetba dang masü saka tsüngrem meimba taküm ka asütsüla. Ano kijunglur tebur jagi pa den tantsü kabo maginer asünung tesütep tetsür ka angutsüji anatsülen nungi süngbang medema bushidang apu latsürtemji kanga belemer.
Paonungji ni langbang nung mepidaka mejanger kü mulungjang Mokokchung town nung ward ajak sema senzüdang. Aser chitarotor aliba tetsürtem karbo kü nükdangia aru. Saka parnokji rabir chirnur den alila nisung masü. Ano amitsür kar liaka parnokji chirnur aika aliba tesa. Anungji tsürabur ken ka nung “Enü wali endi korak, Enü wali endi korak” ta taolen ajak lenmang tekirak dang asünung chitakdokba ama pungtetdak lener ka munguteti ni amoa ao.
Kü kolok nung kecha mebenaka, tasüng aonungji, Lolenlepdeni kanga sabuba aon ka bener nekongdang chiyong menepa pa dangi ao. Etsük mersü nung jetjeta mesanglong soa amchi ana nung süktepa temer oli, pa chiyungtsü auso agizüya liasü. Chiyung menepa aon agütsüba nungji tepela ka lir. Aser aon agizükerjia remso nungji kau pelar.
Par kinungetr chiyunga yutsür, taktang ka koba kisemkidar sadoksanema amener yangji ni mener ata. Khenpika dang lir kilung jagi Ajinaro longoka ait aser kü dak tsüketa kasa menden nungji amen. Lai kü dak tera mangaloka mener ashi, “Obou, na chiyungerna”
“Nichiyungzükli aru.”
“Na kechi den chiyung ni meteta lir.”
“Süra obou dang shiangjong, ni kechi den chiyung?”
“Obou, na caterpillar den chiyunga.”
“Caterpillar ta! Shibai ashi? Ozü aser ani dang caterpillar achir. Saka nisungibo machir.”
“Na caterpillar den chiyunger kübu nema bener arutsüba to koda?”
“Iba to caterpillar masü. Iba dang to mesanglong ta ajar. Nebu onok pa lanuwa asüdang nungi ato chia aru. Ya chiyungtsü tajung ka lir. Ya ango mesük aser shia mesük.”
“Obou, taonung onok ak shi den chiyungtsüba liasü. Nai agütsüba to agizükerbo obalai pa auso nung aliba ak shiji kü auso nung enoktsü aser item caterpillar to dang mejaka pabo chiyung. Pai agütsüba shimelangjia ni caterpillar ama bilema sempaadok. Anungji ni pa nemsa meyipa agütsü aser kü ausojia tera aseta bener oa ni mener chiyung. Pa auso sünga caterpillar ayazür ama ni tsübuseta reprang.”
“Narola, na kechi den chiyung obouia meteta lir.”
“Shiang, obou shiang. Ni kechi den chiyung” ta lai shia kü tebang aser teni nung la tekapu tanük jagi nemet. Anungji ni ashi, “Na dal den chiyung”
“Nai kü ket nung dal menemera na?”
Menürema ni la tobur tajung aser tajinütsü tekapu nungji soter, inüji la school-i aodang kechi tiffin bener ao ta otsü longa alidang, kilung jagi tebu ait aser ashi , “Narola, obou nema süngo bener atujang” Lai jet ta noktak aser ashi, “Ni ne nem süngo yanglutsütsü obou. Ataa liang no,” Ni ola tera nemzüker Lolenlepden dang ashi, “Anük na tetsür ka agitsü. Na yamai rongjena malitsü.” Pai khenpika mokorai ali aser ashi, “Oko, nai ashiba ama kinungertemia ashir. Saka ya mapa tasak rongnung ka lir. Kijunglur ka asentenshia kibong kümsh*tsüji temela masü. Tetsükdaktsü, tenokdangtsü aser koda masüba maparen aika idakji sentaka lir.” Idangji Ajinaroi kü nem süngo bener atutsü nung, küna onük khen thinen. Ni menürema aser apayuseta marokji agi. Aser süngoji mangemdang nung shini agi tajem mejungi ninangmochitzü ama tanang liasü. Ni süngo ajemdangji kishi teindangba sü tsüngda nung tekolak adoker Ajinaroi reprangya liasü. Kü tebang kümdena aser temeli agi tebangmechi nung menakzüka yokbaji Lolenlepdeni ngua ashi, “Süngoji koma? Kanga temokonga na?” Ni tera menürema ashi, “Jungerko, kecha masü” Tebui Ajinaro dang asüngdang, “Narola süngo ya shibai yanglu?”
“Ni yanglua oba.”
“Koma yanglu? Junga yabnglu südi?”
“Ni obou kanga meimba agi shini spoon asem inoktsü. Kanga tanang alitsü. Na? Obou junger südi?” Ni la dak ajia aser menürema ashi, “Aya, Narola süngosa tajungba. Kanga junger. Asünga obou nem yamai yanglujangma no” Kü o nungji Ajinaro tejak sangwaa pela aser tedi nunger dangi ao. Lai süngo junga yanglutetba tedi nunger dang ash*tsü la asemjena aor ta ni ajitet.
Küna kija mentepa alidang khuret jakden kati kü dak ajia Lolenlepdeni ashi, “Oko, ni tang ya tetsür ka aniokdi asünung tebilemtsü anati ni khu kanga retdaktsür. Tedi anabo joko nisung kümer. Tenatibo tajung aser tamajung apitetba dang masü saka tetsü ta*or meyonger ka den alitsü mulungdangji benshia litettsü. Saka Ajinarobo ano küm tuko mabensa. Komala rabitsür ka den la alitsü ta kü mulungi mokoki bilemer. Kü rongsen, senti rongsen kaupayutsü kaji Ajinaro ya dang lir. La tobur tajung aser tenüksh*tsü sempet ya rabitsür ka ket nung ajetrepa raksadisü ta kü mulungi kau makoker.”
“Nai yamaji bilemtsüji tim dang. Nia aji oda bilemer. Ajinaro yabo senti berem ka kotakeri asaa ner kibong nem agütsüba sempet lir. Saka asenoki tang ajung dang asaa tetsürji shimtsü masüato? Tsüngrem meimer tetsür aika lir. Aser shiba südir süang iba tetsür jagi lai a*oba ama Ajinaro yabo meimtsüsa. Shibaibo Ajinaro sempatsü. La ajuruba shia nia pelar. Aser kinunger ajaki la yamai meima aser apayua benshiba anati ngua lirto. Na ibajibo kangabo khuret tesü. Kua, kinungertemi tetsür karbo aien südanga ladangba ne dang shia aliasü masü.”
“Ilenjibo kenoji süngbang medema aruogo; Aser laa kenübo kidangi arur tanurtem dena jembitepa kazür opgo.”
“Aji osang tajungato. Kua shiba?”
“Ayee…. Tangar masü, Putikala-a”
“O ….. oo Putikala. Junger, junger. Aya tetsür tajung ka ngutetogo. Anük, na taküm tasen ka tenzüktsü aser kibong nung sünepa alitsü.”
“Kinunger ajaki yamajisa ashir.”
“La to Impur nung vernacular theology zünger tesayula inyaka liasü. Tebuba tena küm ti lir tanur kata mali. Tia maka tebuba süadok. Lanur tazünger jenti adok nungji lai la sasa sodi agi. Saka tang tashi tongtibang onük laisa jembir. Lanur tazüngertemi la madoksar. Aji dang masü, reprangang revival hour nung Tsüngremi la kanga amshir. La ama kati kodasür Ajinaro aser tedi nunger memeimtsü.Tsüngremer sentongji tesüngmangtsü. Tsüngrem tenüng sangang.”
“Oko, ni ashi ama ano tebilemtsü ka lir.”
“Anük Lolen, ena, teburbo onsaraa rajema aser shisaa shira mapa majeter. Tongmelangka liang. Lanuwa nungi na kanga rasarabonga shisadangba tanur ka liasü. Südi? Kanga metsüksaa kujang katia pu bener yidi süra mechimenu ajakji tetsükdaktsü dang kümer angutsü. Yakta mapangji agiadokang.”
“Oko, kü o yaa khen angangkoto.”
“Shiangjong, ano kechi tebilemtsü ali. Aji lira asenok ajak yariteptsü masü no?”
“Ena oko, tang ozü ki süa aliba kimung ya kübutsü Odijungla tenüng nung lir. Kimung ya la tayimdong meyong ta la lekhumung nung o tembangogo. Ni tetsür tasen ka aniokra kimung ya azüngtettsütsüsa akümer. Tanurtem mechi nung parnoki kimungji azüngtetjang ta mashir dang.”
“Anük, na kimung tajung ana gari agi tongteta lirto. Tang aliba kimung yabo gari agi matonger aser kanga sademabo masü. Gari agi metongtetba ki ka nung alitsüji tebang agi mesh*tetba timtem aika lir. Kimungji tang tangbosa azüngtetjang ta parnokia mashili? .Aser kenübosa azüngtettsütsüsato? Küm tsüngda nugbosa asenia kiji sütettsü masüna.”
“Kübutsü adianu aser lar kinunger jakla nai meteta lir. Item ya teben dang matenashi shiruru tesa. Parnoki tangsa tang azüngtetang ta tsükben rungben milak jagi ni merutsü. Aji temetet dang.”
“Kecha masüato? Tang aliba ki ya oda doktsür, ne kimung nungji tobur tajung ki ka noktaktsü ne dak tashi malina. Terata.”
“Oko, tetsür ka mechi nung ni ki belenba maksüji alimaia koda reprangtsü.”
“Nebutsü Odijungla süadokaka chirnurtemi sosema lirji parnok dak rangloker ner anükabangtem jagia takümbosa azüngtetjang tabo meshilima. Par kinunger rongnug tangateter lirto? Aser nungtakra parnok denji jungshiratep o nia jembitsüato.”
“Tamajung aika rongnung tajung ka oji magir. Aser tajung aika jagi tamajung kaji majeter. Par kinunger rongnung Jirenkaba oji shingaia malemtettsü. Pai ajak raksar. Kübutsü Odijungla lepkhumungnü semang onük nung pa kanga kua chirar aoba tanü tashi küna tsüngda yimjung mali. Kibokkisem maka oda ainkishir alir ama dang. . Ozü kina tsüngda yimjung aser temeim lenr kati arudisü ta ni aiben merangdangogo. Par mapa tilatari adokdang ni Mangichen o tenuna yoka nübu agi aiben yarir aser atsüki nungi mezüng adokba aonsotsü niang mechii bener yokdanga pai mashi dang angateter. Item mapa tajung ajak jagi ni pa mesüzüktsü memeranger ama dang pai bilemer. Kodangsa Mangichen o tenuna par kidangi, ‘Oko, Oko’ ta odir pri nakonakena nüksak tamajung agi khunem jakla sayur. Anungji tenati joko tekor kidangi moli asür. Khen khen Ajinaroa dena yokdang dang Jirenkabaji menüremtsü. La angudangdang teko mulungjangji salar. Ajinaroi asüngdangbabo ajak langzür aser pai laji ajungaka arur.”
“Anük, shin o nung ashiba agi, ‘tasümaiterbo parnok masüdang aiben süa atar’ Kimung ka azüngtettsü mechi na tetsür ka magitettsübaji kechia ta asürba? Na ya laphia ya! Aser na, pungmang katia nisung mulungjang melensh*tsür. Asenoki Tsüngrem dang sarasademtsü aser Pai mapaji inyaktsü. Tsüngremi parnok den jembitsü.”
Terongjen nisung ka terata nung yutsür ni kidangi meyip. Saka ni pelabaji Putikala ama tesüngjem shisatsü aser temeim akaba tetsü kati Lolenlepdener kibong nung joko ketdangsüa alitsüba haihaura akabaji khen bilembo mamangtsüka liasü. Aser, Tsüngremi ya atangjii Ajinaro nem tetsü ta*ola tanaben meyipa yoker südi ta ni bilem. Lolenlepden kanga tia aka. Tanur asem denji lai tetsü ta*ola ama alitsü temetet dang. Taküm tasen ka tenzüka meraket kibong ka Putikala aser Lolenlepdeni yangertsü ngua ni kanga süngzük.
Konung Lolenlepden den par chir asem aser Putikala den la adianu ana tenla kidangi oa deacon anati kuli süa tena temeshi kiyimba kulizüng agi. Paonungji par kidanger ana den nia jaoka, onok ajak agi nisung tertrok par kidang kirbenjong chiyungba mapangji agi. Ya kanga tesünep aser tesüngjem mapang ka liasü.
Jirenkaba tebutsü Songsongnaro tash*tak tulu kati tonger tanüptsü bushia bendang limalen ita aseem tashi hospital nung munger shilangba angashia nekongdang ka ni par semdangi ao. Hospital nungi kidangi shilangba tesünep aser tepelajia papu ka lir. Shirangerji taktang telung nung liaka Jirenkaba kanga sadoksanema kisemer agizüka amenba taktang nungji pa kija mena liasü. Ni ngur pa kanga pela. Par semdangbaji nükjidong ana nung liasü. Bendang lima nungi shiranger ka tanüptsü ngur shilangba tepela lsemsateptsü aser sensaksema aodang kimung indangjia tera süoksema Jirenkaba mulung ladangtsüba.
Jirenkabai kanga pelaa ni agizük aser küna süngo marok ka ka amer pai otsüji tenzüksa mendenji kü tsütsüi tera aseta aru. Mokokchung nungi koda apuso aser hospital nung amungdang ajuruba otsü pai ashidang ni tenoktenoka angatsü tenzük. Jirenkaba ya tekong temerang, khunem aser pai khen langka inyaktsü mulungtetra atsüsh*tsü masü. Iba den pa o kangabo maka. Saka inüjibo pa mulung kanga atemzüka kü den sadoksadoka jembimeso. Küm ishika tejaklen tedi ka shiranga Gauhatii anir oa tasümang dang bener aruba kasa hospital nungji parnok munger aruba süren otsüjia pai repa ashidang pa mulungjang nung temeyoktep yipru ka ni ajitet. Aser ano tenu Odijungla sür küm pezüshi dang. Aji oda tetsü ka asüba indang jembia alidang lar jala Ajinaro küna mena aliba taktang jagi longoka ait. Ajinaro ya rabitsür Putikala den shirangerji semdangi aruba liasü. Taktang telung nung süngzüka alila denji Putikala sensaksema jembidang, Ajinaro küna amaendak jagi aji oda aita noktak. Ashiko, kilungi maitdang lai ni ngur liasü südi. La ngua künaprongla temulung ajunga salaa pela. Ni ashi, “Narola, arung obou den menang.” Saka inüjibo lai kü den memeni teko Jirenkaba jakdang menürema noktaker ashi, “Oko, Oko, ne nem agütsütsüba ni langka bener arua lir. Aji nai metet asü memetet?”
“Aya, Ajinaro tajungla, oko nem nai kechi bener arutsü?”
“Nai kechia ta bilemer.”
“Nai shiang.”
“Mash*tsü.”
“Kechiba mash*tsü?”
“Khen lir ash*tsü.”
“Nai oko nem agütsütsü bener arubaji kechiar shiang.”
“Mash*tsü.”
“Nai oko nem kechiba aji bener arutsü?”
“Oko, asenok anaben mejangba saaker Fathers’ Day amungtsü. Anungji ni ne nem sempet ka bener aruja lir,” ta shia lai la teka anatsülen la tesülen alibaji marakzü ali. La nüksakmenü aser osü tajung jagi künaprongla tepela lima kati anir agien. Jirenkabai teka songdoker, “kua, kua” ta ashidang Ajinaroi ashi, “Ni kechi bena lir ibaji nai shiang.” Iba amai tasüngtet aser temeimtsü aiür chanu kati Fathers Day senpet ka indang jembibaji Jirenkaba a*oshi mulungsentsü taroktiba tashi nung kongsh*tsü osang ka liasü. Küna jembia aliba onük khenyongi melen aser pai asüngdang, “Methai-a na?
“Masü”
“Chocolate?”
“Masü.”
“Süra ibaji kodaka?” Idangji Ajinaroi la tekong tera manger bilemdanga lir ashi, “Kü temeyong dang nungi tera tuluba.”
“Süra ibaji tanuri dang amshir asü tainia amshir?”
“Ajaki amshir.”
“Achir asü machir?”
“Machir”
“Sentsüji komala?”
“Sentsüji tapu balala dang.”
“Kong angur?”
“Dokan nung angur.”
“Sen kwi agi alir?”
“Kar sen ter agia alir aser karbo sen noklang noklang noklang aikatia alir.”
“”Aji shibai ashi?”
“Ojalai ashi.”
“Ojalaji shiba?” Idangji Ajinaroi tanga taktang ka nung Jirenkaba tebutsü den jembia aliba taktangji tuyua, “tang jembia alila ya ojala. Onoki la dang oja ta ajar.”
Iba o angashili, Jirenkaba nüktzü tsüngrang aser ashi, “Ajinaro, tajungla, nai oko nem Fathers’ Day senpet bener arutsü nung ni pelaseter. Yakta Kua! Kua! Kua!” ta teka anaprong la tsütsüi songdok. Aiür chanu jagi ashi, “Na tenük amoang.” Jirenkaba nüktzü tsüngranger tenük amoa teka songdoker atadang, Ajinaroi, sen jenjang aika alangba Sheafer Fountainpen ka amoktsü. Aji ngua ola madoktet Jirenkaba temulung kanga raksa. Aser ashi, “Narola nai kechi aginer ni agütsütsü. Shiang kechi aginer?”
“Oko, chewing-gum.”
“Ano kechi aginer?”
“Oko naia oba nem senpet ka agüjang. Ni bener odi.” Iba oji Jirenkaba tenük nungi nüktzü trok! trok! ta tsüktsü teperi liasü. Pai nüktzü aidoker tanemi noktak aser tanga taktang kati yia tobur tajung neck-tie temerem ka bener adoka aji kolepa aleper Ajinaro nem amoktsüsa ashi, “Ya nebu nem Fathers’ Day senpet agüjang aser asüng aonung ner kinunger ajak ozü kidang külemi chiyungtsü arung no?”
Joko anü aitsü mapang asünung tena meinoktsüdi ta ozü asem külemi gari nung apuso. Paonungji kechi atalok item ajak meyipa reprangdangdang yimjung mapaji Putikala sentong liasü ta ni angatet. Tepela tulu agi ni la dang ashi, “Akala, tesempatep mulungjang alenteptsütsüTsüngremi na iba kibongi yok. Ne nem kotaker taochi ka agüja aliba ni angur. Nai junga inyakogo. Tsüngremi na moatsütsü.” Lai kanga süngjema aser menürema langzü, “Oko, Fathers’ Day nung chirnurtemi pei tebu nem senpet agütsübajibo kecha balaka masü. Aji tim dang. Aser aikati yimya ka amai bensh*teper. Saka iba anogo nung tebu kati pa medemsor ka nem sempet bentsübajibo alima nung temeim litsü ulushiba ka lir. Tebu kati medemsor ka toshibaji kinungtsür aser par chirnur pai temoatsü peroker. Aser iba temeim yongtsü nungji kinungtsüji noktaka lir.”
Idangji onok pilatsü lenerji atong. Putikalai gari nungi yakta lua Ajinaro ajungzük. Ano maneni küna sensaksema alidang, Ajinaro lar ki tsütsü atuba lenmang nungji mera ishika tua la teka nung neck-tie temerem kaji amer tetsü ata. Aser lai kü den pilaba tepela tamaitsü menürema teka agi ayipa sayu. Aji ngua kü mulung nung temeyoktep tepla milak kati arung. Gari-ji mapusoi, steering nung kü teka anatsüleni ameter, Ajinaro o tetsüna atangleni par kima atsüki tonga matu tashi ni reprangjen reprang. Par asem koda ajuruteper alitsü ni yimdangi aru. Ji! Iba neck-tie temerem ka to lai tebu ket nung amoktsüdang la nüksakmenü tajinütsü jakden nung tanganütsü osü jagi tebu den komaka jembir alitsüka ta yimdangi arudang, memeteti kü nük nung tepela nüktzü adenshi. Kodang par atsüki nung süngdong tulu kaji ajanga Ajinaro o tetsüna kü nükdang nungi pila, ni kü tenipong nung nüktzü aidok aser kidangi meyip.
Address
Liden Ki, Near Nagaland University, Meriema
Kohima
797004
Telephone
Website
Alerts
Be the first to know and let us send you an email when Lenjeter posts news and promotions. Your email address will not be used for any other purpose, and you can unsubscribe at any time.
Videos
Shortcuts
Share
