Rozana samvad tv

13/10/2023

ਸਿਆਸਤ ਕਦੇ ਵੀ ਕੰਮੀਂ ਕੰਮੀਂਣ ਲੋਕਾਂ ਦੀ ਖੇਡ ਨਹੀਂ ਹੁੰਦੀ .... ਹੋ ਹੀ ਨਹੀਂ ਸਕਦੀ ..., ਜਦੋਂਕਿ ਕਿ ਪਤਾ ਹੁੰਦਾ ...ਅਗਲੇ ਦਿਨ ਦੀ ਰੋਟੀ ਇਸ ਮਾਲਕ ਦੇ ਹੱਥ ਹੈ.... ਸਿਆਸਤ ..... ਕਦੇ ਵੀ ਉਹ ਲੋਕ ਖੇਡ ਹੀ ਨਹੀਂ ਸਕਦੇ,.....ਜ਼ੋ ਘਰੋਂ ਹੀ ਹਾਰ ਕੇ ਚਲਦੇ ਹੋਣ.....ਅਤੇ ਬਾਹਰਲੇ ਬੂਹੇ ਦੀ ਸਰਦਲ ਤੇ ਡਿੱਗ ਪੈਂ ਕੇ ਏਹ ਸੋਚਦੇ ਹੋਣ ਕਿ ਪਤਾ ਨਹੀਂ ਅੱਜ ਦਿਹਾੜੀ ਮਿਲਣੀ ਜਾਂ ਨਹੀਂ...ਤੇ ਸਿਆਸਤ.... ਵੀ ...ਉਹ ਲੋਕ ...ਕਰ ਹੀ ਨਹੀਂ ਸਕਦੇ ... ਜਿਨ੍ਹਾਂ ਦੇ ਪੈਰ ਸਿਰਫ ਤੁਹਾਡੀ ਬਦੌਲਤ ਹੀ ਇਸ ਧਰਤ ਤੇ ਹੁੰਦੇ ਨੇ.. ਨਹੀਂ ਤਾਂ ਤੁਹਾਡਾ ਲਿਖਿਆ ਇਕ ਸ਼ਬਦ ਅਗਲਿਆਂ ਦੀਆਂ ਪੀੜ੍ਹੀਆਂ ਤਬਾਹ ਕਰ ਦਿੰਦਾ...ਗਾਲ ਦਿੰਦਾ .... ਤੇ ਆਪਾਂ ...... ਇਸਨੂੰ ਹੀ ਸਦੀਵੀ ਸੱਚ ਮਨ ਹੌਸਲਾ ਕਰ ਬੈਠ ਜਾਂਦੇ....

ਕਈ ਕੋਟਿ ਕੀਏ ਧਨਵੰਤ
ਕਈ ਕੋਟਿ ਮਾਹ ਮਹਿ ਚਿੰਤ
ਜਹਿ ਜਹਿ ਭਾਣੇ ਤਹਿ ਤਹਿ ਰਾਖੇ
ਨਾਨਕ ਸਭਿ ਕਿਛੁ ਪ੍ਰਭ ਕੇ ਹਾਥੈ

ਬਾਕੀ.........?

11/10/2023

ਮਾਣਯੋਗ ਸੁਨੀਲ ਜਾਖੜ ਜੀ , ਸੁਖਬੀਰ ਬਾਦਲ ਜੀ , ਬਾਜਵਾ ਜੀ ,ਰਾਜਾ ਵੜਿੰਗ ਜੀ..ਕੋਈ ਥੋੜ੍ਹੀ ਬਹੁਤ ਸ਼ਰਮ ਨਾਮ ਦੀ ਚੀਜ਼ ਘਰੋਂ ਲੈ ਕੇ ਤੁਰਦੇ ਓ ਜਾਂ ਨਹੀਂ ??.. ਚਾਂਦੀ ਦੀ ਕਹੀ ਨਾਲ ਟੱਕ ਲਾਉਣ ਵਾਲੀ ਫ਼ੋਟੋ ਚ ਕੈਪਟਨ ਨਾਲ ਬਲਰਾਮ ਜਾਖੜ ਜੀ ਵੀ ਖੜ੍ਹੇ ਨੇ.,ਦੇਵੀ ਲਾਲ ਨੇ ਹਰਿਆਣਾ ਵਿਧਾਨ ਸਭਾ ਚ ਪ੍ਰਕਾਸ਼ ਸਿੰਘ ਬਾਦਲ ਦੀ SYL ਦੇ ਸਰਵੇ ਕਰਾਉਣ ਦੀ ਇਜ਼ਾਜ਼ਤ ਦੇਣ ਦੀ ਤਾਰੀਫ਼ ਕੀਤੀ..ਸੁਖਬੀਰ ਸਿੰਹਾਂ ਗੁੜਗਾਓਂ ਵਾਲੇ Oberoi ਹੋਟਲ ਦੀ ਫਰਦ ਲੈ ਕੇ ਆਈਂ..ਬਾਕੀ ਰਹੀ ਪਾਣੀ ਦੀ ਗੱਲ ਓਹ ਤੁਸੀਂ ਫ਼ਿਕਰ ਨਾ ਕਰੋ ,,ਛੋਟੇ ਹੁੰਦੇ ਖੇਤ ਮੇਰੀ ਡਿਊਟੀ ਖਾਲ ਤੇ ਗੇੜਾ ਮਾਰਨ ਦੀ ਲੱਗਦੀ ਸੀ ਕਿ ਖਾਲ ਚੋਂ ਕੋਈ ਖੱਡ ਨਾ ਪੈਜੇ..ਡਿਊਟੀ ਹੁਣ ਵੀ ਪ੍ਰਮਾਤਮਾ ਨੇ ਮੇਰੀ ਖਾਲ ਤੇ ਈ ਲਾਈ ਐ ਪਰ ਇਸ ਵਾਰ ਖ਼ਾਲ ਦਾ ਨਾਮ ‘ਸਤਲੁਜ’ ਐ ..1 ਨਵੰਬਰ ਨੂੰ ਆਪਣੇ ਪੁਰਖਿਆਂ ਦੇ ਕੁਰਸੀ ਵਾਸਤੇ ਕੀਤੇ ਹੋਏ ਕੁਰਸੀਨਾਮੇ ਜਰੂਰ ਨਾਲ ਲੈ ਕੇ ਆਇਓ.. ਤਾਂ ਕਿ ਮੇਰੇ ਵਤਨ ਪੰਜਾਬ ਦੇ ਲੋਕ ਵੀ ਜਾਣ ਲੈਣ ਕਿ ਕੁਰਬਾਨੀ ਦੇਣ ਦੀ ਗੱਲ ਕਹਿ ਕੇ ਉਹਨਾਂ ਦੀ ਕਿੰਨੀ ਵਾਰ ਕੁਰਬਾਨੀ ਲਈ ਗਈ…
ਭਗਵੰਤ ਮਾਨ
ਮੁੱਖ ਮੰਤਰੀ ਪੰਜਾਬ

10/10/2023

ਵਿਜੈ ਮਾਣਕ ਆਲ ਇੰਡੀਆ ਪ੍ਰੋਫ਼ੈਸਨਲਜ ਕਾਂਗਰਸ (ਪੰਜਾਬ) ਦੇ ਸਟੇਟ ਸਕੱਤਰ ਨਿਯੁਕਤ

ਜਲੰਧਰ 10 ਅਕਤੂਬਰ ਆਲ ਇੰਡੀਆ ਕਾਂਗਰਸ ਕਮੇਟੀ ਵੱਲੋਂ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਹਲਕਾ ਅਮਰਗੜ੍ਹ ਤੋਂ ਕਾਂਗਰਸ ਪਾਰਟੀ ਵੱਲੋਂ ਚੋਣ ਲੜ ਚੁੱਕੇ ਕੌਮਾਂਤਰੀ ਖਿਡਾਰੀ ਸਮਿਤ ਸਿੰਘ ਨੂੰ ਆਲ ਇੰਡੀਆ ਪ੍ਰੋਫ਼ੈਸਨਲਜ ਕਾਂਗਰਸ ਦੀ ਪੰਜਾਬ ਇਕਾਈ ਦਾ ਪ੍ਰਧਾਨ ਅਤੇ ਐਡਵੋਕੇਟ ਵਿਜੈ ਸਿੰਘ ਨੂੰ ਸਟੇਟ ਸਕੱਤਰ ਨਿਯੁਕਤ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਵਿਜੈ ਸਿੰਘ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਲੀਗਲ, ਮਨੁੱਖੀ ਅਧਿਕਾਰ ਅਤੇ ਆਰ.ਟੀ.ਆਈ ਸੈਲ ਦੇ ਚੇਅਰਮੈਨ ਵੱਜੋਂ ਵੀ ਸੇਵਾਵਾਂ ਨਿਭਾਅ ਚੁੱਕੇ ਹਨ। ਉਨ੍ਹਾਂ ਦੀ ਚੰਗੀ ਕਾਰਗੁਜ਼ਾਰੀ ਨੂੰ ਦੇਖਦਿਆਂ ਹੀ ਕਾਂਗਰਸ ਹਾਈ ਕਮਾਂਡ ਨੇ ਉਨ੍ਹਾਂ ਨੂੰ ਹੁਣ ਆਲ ਇੰਡੀਆ ਪ੍ਰੋਫ਼ੈਸਨਲਜ ਕਾਂਗਰਸ ਦੀ ਪੰਜਾਬ ਇਕਾਈ ਦਾ ਸਟੇਟ ਸਕੱਤਰ ਨਿਯੁਕਤ ਕੀਤਾ ਹੈ।ਅੰਮ੍ਰਿਤਸਰ ਦੇ ਜੰਮਪਲ ਅਤੇ ਦਿੱਲੀ ਯੂਨੀਵਰਸਿਟੀ ਤੋਂ ਪੜ੍ਹੇ ਵਿਜੈ ਸਿੰਘ ਸੁਪਰੀਮ ਕੋਰਟ ਵਿਚ ਲੰਮੇ ਅਰਸੇ ਤੋਂ ਵਕਾਲਤ ਕਰ ਰਹੇ ਹਨ। ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਐਡਵੋਕੇਟ ਵਿਜੈ ਸਿੰਘ ਨੇ ਕਾਂਗਰਸ ਹਾਈ ਕਮਾਂਡ ਦਾ ਧੰਨਵਾਦ ਕੀਤਾ ਅਤੇ ਆਖਿਆ ਕਿ ਉਹ ਮਿਲੀ ਜ਼ੰਮੇਵਾਰੀ ਪੂਰੀ ਤਨਦੇਹੀ ਨਾਲ ਨਿਭਾਉਣਗੇ।

09/10/2023

ਵੈਸੇ ਹੀ 10 ਅਕਤੂਬਰ ਨੂੰ ਬਾਪੂ ਨੂੰ ਯਾਦ ਕਰਦਿਆਂ

ਜਦੋਂ ਵੀ ਦੱਸ ਤਾਰੀਕ ਆਉਂਦੀ .. ਬਹੁਤ ਕੁਝ ਤੂਫ਼ਾਨਾਂ ਵਾਂਗ ਰੋੜ੍ਹ ਕੇ ਆਪਣੇ ਨਾਲ ਲੈ ਜਾਂਦੀ.....ਜਿਵੇਂ ਦੱਸ ਫਰਵਰੀ ਨੂੰ ਮਾਂ ਤੁਰ ਗਈ ਸੀ.. ਦੱਸ ਫਰਵਰੀ ਨੂੰ ਹੀ ਮਾਮਾ ਤੁਰ ਗਿਆ ਸੀ ਤੇ ਦੱਸ ਤਾਰੀਕ ਨੂੰ ਹੀ ਬਾਪੂ ਨੇ ਮੰਜਾ ਮੱਲ ਲੈਣਾ ਸੀ.....ਵੈਸੇ ਹੀ...ਸੋਚਦਾ....ਬਾਪੂ ਨੂੰ ਆਖਰੀ ਲਾਂਬੂ ਤਾਂ ਇਕੱਤੀ ਜਨਵਰੀ ਨੂੰ ਲਾਇਆਂ ਸੀ...ਪਰ ....ਮਰ.. ਤਾਂ ...ਉਹ ਦੀ ਅੱਜ ਦੀ ਰਾਤੀਂ ਹੀ ਗਿਆ ਸੀ... ਮਾਂ ਮਰਨ ਮਗਰੋਂ ਉਸ ਭਾਂਵੇਂ ਘਰੇਲੂ ਕਲੇਸ਼ ਨੂੰ ਦੁਨਿਆਵੀ ਤੌਰ 'ਤੇ ਮਨ ਤੇ' ਨਹੀਂ ਸੀ ਲਾਇਆ,.ਪਰ ਅੰਦਰੋਂ ਅੰਦਰੀਂ ਟੁੱਟ ਗਿਆ ਸੀ ਉਹ..... ਚੁੱਪ ਰਹਿੰਦਾ.. ਵਾਹਿਗੁਰੂ ਦੇ ਹਰ ਭਾਣੇ ਨੂੰ ਸਵੀਕਾਰ ਕਰਨਾ ਉਸ ਆਪਣੀ ਤਕਦੀਰ ਮੰਨ ਲਈ ਲੱਗਦੀ ਸੀ.... ....
ਅੱਜ ਦੀ ਰਾਤ ਬੜੀ ਰੀਝ ਨਾਲ ਰੋਟੀ ਬਣਾਈ ਮੈਂ.. ਬਾਪੂ ਮੱਛੀ ਆਪ ਬਣਾਉਂਦਾ.. ਕਿਸੇ ਦੀ ਹੱਥ ਦੀ ਬਣੀ ਖਾਣੀ ਤਾਂ ਕੀ ... ਦੇਖਣਾ ਵੀ ਪਸੰਦ ਨਹੀਂ ਸੀ ਕਰਦਾ....ਪਰ ਮਾਂ ਜਾਣ ਮਗਰੋਂ ਬਾਪੂ ਬਿਲਕੁਲ ਬਦਲ ਗਿਆ ਸੀ... ਸੁਆਦ ਲੈਣੇ ਉਸ ਨੇ ਖੁਦ ਛੱਡ ਦਿੱਤੇ ਸਨ...ਜਾਂ ਉਮਰ ਦੇ ਤਕਾਜ਼ੇ ਨੇ ਜ਼ੁਬਾਨ ਵਿਚਲਾ ਸੁਆਦ ਵਾਲਾ ਖਾਨਾ ਹੀ ਖ਼ਤਮ ਕਰ ਦਿੱਤਾ ਸੀ...
ਕਿਉਂ ਭਾਪਾ ਸੁਆਦ ਏ.. ਮੈਂ ਦੂਸਰੀ ਵਾਰੀ ਕੌਲੀ ਵਿੱਚ ਮੱਛੀ ਪਾਉਂਦੇ ਆਖਿਆ.. ਹੂੰ...ਬਾਪੂ ਅਸਹਿਜ ਲੱਗਾ..! ਕੀ ਗੱਲ ...? ਮੈਂ ਪੁੱਛਿਆ.....ਨਹੀਂ ਕੋਈ ਗੱਲ ਨਹੀਂ.... ਬੱਸ ਜਲਦੀ ਘਰ ਆ ਜਾਇਆ ਕਰ...ਉਹਦੀ ਬਦਲੀ ਪਤਾਂ ਨਹੀ ਕਦੋਂ ਹੋਣੀ...ਬਾਪੂ ਨੇ ਸਿੱਧਾ ਵਾਰ ਕੀਤਾ ...ਚੱਲ ਉੱਠ ..ਲੰਮੇ ਪੈ.... ਸਵੇਰੇ ਪੂੜੀਆਂ ਖਾਵਾਂਗੇ... ਪਰ ਬਾਪੂ ਫਿਰ ਚੁੱਪ ਸੀ.. ਅੱਜ ਬਾਪੂ ਅਸਹਿਜ ਸੀ...ਅਸ਼ਾਤ .. ਐਵੇਂ ਫ਼ਿਕਰਮੰਦ ਜਿਹਾ .. ਜਿਵੇਂ ਉਹ ਆਮ ਨਹੀਂ ਸੀ ਹੁੰਦਾ ਕਦੇ.....ਪਰ ਕੁਝ ਸੀ..... ਜਿਸ ਨੂੰ ਪਰਖ ਨਹੀਂ ਸੀ ਸਕਿਆ ਮੈਂ......ਸਵੇਰੇ ਤਾਰੀਖਾਂ ਦਾ ਅਜੀਬ ਸੰਯੋਗ ਹੋਣਾ ਸੀ....10/10/10 .. ਦੱਸ ਤਾਰੀਕ .. ਦੱਸਵਾਂ ਮਹੀਨਾ ...ਤੇ ਵੀਹ ਸੌ ਦੱਸ ....ਬਾਪੂ ਉੱਠਿਆ.. ਐਵੇਂ ਹੀ ਅੰਦਰ ਛਲਕਦੇ ਭਵ ਸਾਗਰ ਦੀਆਂ ਘੁੰਮਣਘੇਰੀਆਂ ਨੂੰ ਤਰ ਕੇ ਪਾਰ ਨਿਕਲਣ ਦੀ ਉੱਠੀ ਕਿਸੇ ਖਾਹਿਸ਼ ਦਾ ਸ਼ਿਕਾਰ ਹੋ ਅਲਮਾਰੀ ਨੂੰ ਦੁਰਸਤ ਕਰਨ ਲੱਗ ਪਿਆ...... ਜਦੋਂ ਕਿ ਅਲਮਾਰੀ ਦੇ ਨਾਂ ਤਾਂ ਅੰਦਰ ਕੋਈ ਚਿੱਬ ਖੜਿੱਬਾ ਸੀ ..... ਤੇ ..ਨਾ ਹੀ ਬਾਹਰ ...ਪਰ ਬਾਪੂ ਹਥੌੜੇ ਨਾਲ ਅਲਮਾਰੀ ਦੇ ਵਾਰ ਕਰਦਾ ਆਪਣੀ ਜ਼ਿੰਦਗੀ ਦੇ ਪਤਾ ਨਹੀਂ ਕਿਹੜੇ ਚਿੱਬ ਕੱਢਦਾ ਪਸੀਨੋ ਪਸੀਨਾ ਹੁੰਦਾ ਮੰਜੇ ਤੇ ਡਿੱਗ ਪਿਆ ...... ਜਦੋਂ ਕਿ ਉਸ ਘੜੀ ਨਾ ਹੀ ਅੰਦਰ .... ਤੇ ਨਾਂ ਹੀ ਬਾਹਰ ...ਮਾਂ ਦਾ ਕੁਝ ਸੀ.. ਤੇ ਹੀ ਨਾ ਮੇਰਾ....
ਬੱਸ ਚੰਦ ਪਲਾਂ ਮਗਰੋਂ ਬਾਪੂ ਆਪਣੇ ਅੰਤਲੇ ਸਫ਼ਰਾਂ ਦਾ ਉਹ ਪਾਂਧੀ ਬਣ ਜਾਣਾ ਸੀ...ਜਿਸਤੇ ਉਸ ਇਕੱਤੀ ਜਨਵਰੀ ਤੱਕ ਦਾ ਸਫ਼ਰ ਤਹਿ ਕਰਨਾ ਸੀ....ਪਰ ਉਸ ਮਗਰੋਂ ਕਦੇ ਉੱਠ ਉਸ ਇਹ ਕਦੇ ਨਹੀਂ ਸੀ ਆਖਣਾ.. ਯਾਰਾ ..ਮਾਂ ਤੇਰੀ ਕਦੇ ਕਦਾਈਂ ਬਹੁਤ ਯਾਦ ਆਉਂਦੀ... ਮੈਨੂੰ ਕੁਝ ਹੋ ਗਿਆ ਤਾਂ ਤੇਰਾ ਧਿਆਨ ਕੌਣ ਰੱਖੂ... ਹੁਣ ਮੇਰੇ ਕੋਲ ਸੈਕਲ ਨਹੀਂ ਚੱਲਦਾ...ਤੇਰੇ ਪਿੱਛੇ ਤੁਰਿਆ ਰਿਹਾ ਕਰਾਂ.... ਬੱਸ ਜਲਦੀ ਪਰਤ ਆਇਆ ਕਰ ਘਰ ਨੂੰ....ਏਹ ਢੁਕਦੇ ਹੁੰਦੇ ਤੈਨੂੰ...ਤੇ ਇਹ ਵੀ ਉਦੋਂ ਤੱਕ .. ਜਦੋਂ ਤੱਕ ਆਪਣੇ ਖੰਭਾਂ ਤੇ ਨਹੀਂ ਉੱਡਦੇ...ਬੱਸ ਤੂੰ ਜਲਦੀ ਆ ਜਾਇਆ ਕਰ..

09/10/2023

ਯੂਨੀਵਰਸਿਟੀ ਕਾਲਜ, ਲਾਡੋਵਾਲੀ ਰੋਡ ਵਿੱਚ ਇਕ ਰੋਜ਼ਾ ਫਾਈਨ ਆਰਟ ਫੋਟੋਗ੍ਰਾਫੀ ਵਰਕਸ਼ਾਪ ਆਯੋਜਿਤ

ਜਲੰਧਰ 9 ਅਕਤੂਬਰ () ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਕਾਲਜ ਜਲੰਧਰ ਦੇ ਪੱਤਰਕਾਰੀ ਵਿਭਾਗ ਵੱਲੋਂ ਫਾਈਨ ਆਰਟ ਵਿਸ਼ੇ ’ਤੇ ਇਕ ਰੋਜ਼ਾ ਵਰਕਸ਼ਾਪ ਦਾ ਆਯੋਜਨ ਕੀਤਾ ਗਿਆ। ਇਸ ਮੌਕੇ ਤੇ ਮੁੰਬਈ ਤੋਂ ਆਏ ਪ੍ਰਸਿੱਧ ਫੋਟੋਗ੍ਰਾਫਰ ਗੁਰਮੀਤ ਸਿੰਘ ਗਾਵੜਾ ਨੇ ਮੁੱਖ ਬੁਲਾਰੇ ਵਜੋਂ ਸ਼ਿਰਕਤ ਕੀਤੀ, ਜੋ ਪਿਛਲੇ 18 ਸਾਲਾਂ ਤੋਂ ਇੱਕ ਪ੍ਰੋਫੈਸ਼ਨਲ ਫੋਟੋਗ੍ਰਾਫਰ ਵਜੋਂ ਵਿਸ਼ੇਸ਼ ਕਰਕੇ 'ਤੇ ਵਿਆਹ, ਆਰਟ ਵਰਕ ਅਤੇ ਫਾਈਨ ਆਰਟ ਫੋਟੋਗ੍ਰਾਫੀ ਖੇਤਰ ਵਿਚ ਇਕ ਸਥਾਪਿਤ ਹਸਤਾਖ਼ਰ ਹੈ। ਇਸ ਮੌਕੇ ਉਨ੍ਹਾਂ ਪੱਤਰਕਾਰੀ ਦੇ ਵਿਦਿਆਰਥੀਆਂ ਨੂੰ ਫੋਟੋਗ੍ਰਾਫੀ ਦੀਆਂ ਬੁਨਿਆਦੀ ਗੱਲਾਂ ਸਿਖਾਉਣ ਦੇ ਨਾਲ-ਨਾਲ ਫਾਈਨ ਆਰਟ ਫੋਟੋਗ੍ਰਾਫੀ ਦੀ ਪ੍ਰੈਕਟੀਕਲ ਸਿਖਲਾਈ ਵੀ ਦਿੱਤੀ। ਇਸ ਮੌਕੇ ਤੇ ਕਾਲਜ ਦੇ ਓ.ਐਸ.ਡੀ.ਪ੍ਰੋ.ਕਮਲੇਸ਼ ਸਿੰਘ ਦੁੱਗਲ ਨੇ ਕਲਾ ਅਤੇ ਸੱਭਿਆਚਾਰ ਫੋਟੋਗ੍ਰਾਫੀ ਉਦਯੋਗ ਵਿੱਚ ਗੁਰਮੀਤ ਸਿੰਘ ਦੇ ਯੋਗਦਾਨ ਦੀ ਸ਼ਲਾਘਾ ਕੀਤੀ ਅਤੇ ਵਿਦਿਆਰਥੀਆਂ ਨੂੰ ਉਹਨਾਂ ਦੇ ਇਸ ਜਨੂੰਨ ਨੂੰ ਪੂਰਾ ਕਰਨ ਲਈ ਪ੍ਰੇਰਿਤ ਵੀ ਕੀਤਾ। ਇਸ ਮੌਕੇ ਪ੍ਰੋ: ਦੁੱਗਲ ਨੇ ਪੱਤਰਕਾਰੀ ਵਿਭਾਗ ਦੇ ਪ੍ਰੋ: ਡਾ: ਨਿਧੀ ਸ਼ਰਮਾ, ਡਾ: ਕਾਦੰਬਰੀ ਨਈਅਰ ਅਤੇ ਕਾਲਜ ਸੁਪਰਡੈਂਟ ਹਰਜੀਤ ਸਿੰਘ ਦੇ ਉਪਰਾਲੇ ਦੀ ਵੀ ਸ਼ਲਾਘਾ ਕੀਤੀ |

07/10/2023

ਬੀਬੀ ਜਗੀਰ ਕੌਰ‌ ਵਲੋਂ ਵਿਜੀਲੈਂਸ ਦੇ ਰੇਡ ਸਬੰਧੀ ਸ਼ਪੱਸ਼ਟੀਕਰਣ

04/10/2023

ਜਲਦ ਹੋਣਗੀਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ
ਸ਼੍ਰੋਮਣੀ ਗੁਰੂਦਵਾਰਾ ਪ੍ਰਬੰਧਕ ਕਮੇਟੀ ਦੀਆਂ ਲੰਬੇ ਸਮੇਂ ਤੋਂ ਉਡੀਕੀਆਂ ਜਾ ਰਹੀਆਂ ਚੋਣਾਂ ਦੇ ਸੰਬੰਧ ਵਿੱਚ ਅਹਿਮ ਜਾਣਕਾਰੀ.. 21 ਅਕਤੂਬਰ 2023 ਤੋਂ ਨਵੀਆਂ ਵੋਟਾਂ ਬਣਾਉਣ ਅਤੇ ਵੋਟਰ ਸੂਚੀਆਂ ਦੀ ਸੁਧਾਈ ਦੀ ਪ੍ਰਕਿਰਿਆ ਸ਼ੁਰੂ ਹੋਵੇਗੀ..ਬਾਕੀ ਵੇਰਵੇ ਜਲਦੀ..
-ਮੁੱਖ ਮੰਤਰੀ ਪੰਜਾਬ

04/10/2023

ਬਿਕਰਮ ਸਿੰਘ ਮਜੀਠੀਆ

BREAKING NEWS : ਪੰਜਾਬ ਦੇ AG ਵਿਨੋਦ ਘਈ ਦੀ ਛੁੱਟੀ ਤੈਅ ......ਡੇਢ ਸਾਲ ’ਚ ਲੱਗੇਗਾ ਤੀਜਾ ਏ ਜੀ.....ਏ ਜੀ ਭਾਵੇਂ ਜਿੰਨਾ ਮਰਜ਼ੀ ਕਾਬਲ ਹੋਵੇ ਜਦੋਂ ਸੂਬੇ ਦਾ ਮੁੱਖ ਮੰਤਰੀ ਭਗਵੰਤ ਮਾਨ ਹੀ ਨਲਾਇਕ ਹੈ ਤਾਂ ਕੇਸ ਤਾਂ ……..ਪੰਜਾਬ ਤਾਂ ਪਹਿਲਾਂ ਹੀ ICU ’ਚ ਹੈ....AG ਵਿਚਾਰਾ ਕੀ ਕਰੂ.....ਕੇਸ ਹੀ ਹਾਰੇਗਾ ?

02/10/2023

02/10/2023

ਵੈਸੇ ਜਿਸ ਤਰੀਕੇ ਨਾਲ
ਸੁਪਰ ਕਾਪ ਕੇ ਪੀ ਐਸ ਗਿੱਲ ਆਪਣੀ ਨਾਲ ਦੀ ਕੋਠੀ ਵਿਚੋਂ ਕਾਤੀਆ ਕਾਂਡ ਵਿਚ ਕਥਿਤ ਤੌਰ ਤੇ ਬੇਅੰਤ ਸਿੰਘ ਦੇ ਪੋਤਰੇ ਨੂੰ ਨਹੀਂ ਸੀ ਲੱਭ ਸਕਿਆ,.... ਅਤੇ ਉਹ.. ਕੇ ਪੀ ਐਸ ਗਿੱਲ ਜੱਟ ਮੰਡ ਦੇ ਇਲਾਕੇ ਵਿੱਚ ਜਾ ਕੇ ਵੀ ਨਾਮੀਂ ਖਾੜਕੂਆਂ ਨੂੰ ਲੱਭ ਲਿਆਉਂਦਾ ਸੀ,... ਅੱਜ ਵੀ ਉਹੀ ਵਰਤਾਰਾ....ਬਾਕੀ ਦੇ ਕੋਈ ਤੁਹਾਡੇ ਜਾਂ ਮੇਰੇ ਵਰਗਾ ਹੁੰਦਾ ,ਪੁਲਸ ਨੇ ਅੱਧੇ ਘੰਟੇ ਵਿੱਚ ਬੰਦਾ ਬਰਾਮਦ ਕਰਕੇ ਚਿੱਟਿਆਂ ਕਰ ਛੱਡਣਾ ਸੀ। ਉਹੀ ਤਰੀਕਾ ਦੋ ਪੁਲਿਸ ਮੁਲਾਜ਼ਮ ਘਰ ਜਾਣੇ ਸਨ। ਘਰ ਦੇ ਬੰਦੇ ਨੂੰ ਮੋਟਰਸਾਈਕਲ ਤੇ ਵਿਚਕਾਰ ਬੈਠਾਉਣਾ ਸੀ ਅਤੇ ਨਾਲ ਹੀ ਘਰਦਿਆਂ ਨੂੰ ਇਹ ਦਬਕਾ ਮਾਰਨਾ ਸੀ ਕਿ ਜੇ ਇਸ ਨੂੰ ਛੁਡਾਉਣਾ ਤਾਂ ਕੱਲ ਤੱਕ ਬੰਦਾ ਪੇਸ਼ ਕਰੋ। ਪਰ ਹੈਰਾਨੀ ਇਸ ਗੱਲ ਦੀ ,ਇਹ ਪੁਲਿਸ ਦਾ ਇਹ ਹਥਿਆਰ ਆਮ ਬੰਦਿਆਂ ਤੇ ਹੀ ਲਾਗੂ ਹੁੰਦਾ, ਮਨਪ੍ਰੀਤ ਬਾਦਲ, ਰਾਜਜੀਤ ਵਰਗਿਆਂ ਤੇ ਨਹੀਂ ।

02/10/2023

ਰਾਹੁਲ ਗਾਂਧੀ ਦੀ ਅੰਮ੍ਰਿਤਸਰ ਫੇਰੀ

ਜਦੋਂ ਵੀ ਕਦੇ ਗਾਂਧੀ ਪਰਿਵਾਰ ਦਾ ਕੋਈ ਵੀ ਵਿਅਕਤੀ ਸ਼੍ਰੀ ਹਰਿਮੰਦਰ ਸਾਹਿਬ ਵਿਖੇ ਨਤਮਸਤਕ ਹੋਣ ਆਉਂਦੇ ਹਨ, ਤਾਂ ਉਨ੍ਹਾਂ ਦੀ ਫੇਰੀ ਦਾ ਸ਼੍ਰੋਮਣੀ ਅਕਾਲੀ ਦਲ ਵਲੋਂ ਸਿਆਸੀ ਤੌਰ ਉਸਦਾ ਵਿਰੋਧ ਜ਼ਰੂਰ ਕੀਤਾ ਜਾਂਦਾ ਹੈ। ਅੱਜ ਵੀ ਵਿਰਸਾ ਸਿੰਘ ਵਲਟੋਹੇ ਵਲੋਂ ਰਾਹੁਲ ਗਾਂਧੀ ਦੀ ਫੇਰੀ ਦਾ ਸਵਾਗਤ (ਵਿਰੋਧ) 'ਮੇਰੀ ਦਾਦੀ ਪਾਪਣ' ਅਤੇ ਹੋਰ ਬਹੁਤ ਤਿੱਖੇ ਸ਼ਬਦਾਂ ਨਾਲ ਕੀਤਾ ਗਿਆ। ਵੈਸੇ ਅਕਾਲੀ ਦਲ ਨੂੰ ਇਕ ਨਿਮਾਣੀ ਸਲਾਹ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਉਨ੍ਹਾਂ ਦੀ ਆਪਣੀ ਹੈ। ਇਸ ਲਈ ਐਸਜੀਪੀਸੀ ਦੇ ਅਗਲੇ ਮਹੀਨੇ ਹੋਣ ਵਾਲੇ ਇਜਲਾਸ ਵਿੱਚ ਇਸ ਸਬੰਧੀ ਇਕ ਮਤਾ ਪਾਸ ਕਰ ਦੇਣ ਕਿ ਗਾਂਧੀ ਪਰਿਵਾਰ ਦਾ ਕੋਈ ਵੀ ਮੈਂਬਰ ਸ਼੍ਰੀ ਹਰਿਮੰਦਰ ਸਾਹਿਬ ਵਿਖੇ ਕਦੇ ਵੀ ਨਤਮਸਤਕ ਨਾ ਹੋਵੇ ਅਤੇ ਨਾਲ ਹੀ ਇਸ ਸਬੰਧੀ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਵੀ ਹੁਕਮਨਾਮਾ ਜਾਰੀ ਕਰਵਾ ਦੇਣਾ ਚਾਹੀਦਾ ਹੈ।
ਵੈਸੇ ਜਿਹੋ ਜਿਹੇ ਦੋਸ਼ ਰਾਹੁਲ ਗਾਂਧੀ 'ਤੇ ਉਸਦੀ ਦਾਦੀ ਦੇ ਸੰਦਰਭ ਵਿਚ ਲਗਾ ਕੇ ਉਸਦਾ ਵਿਰੋਧ ਅਤੇ ਗਾਂਧੀ ਪਰਿਵਾਰ ਨੂੰ ਕਟਹਿਰੇ ਵਿੱਚ ਖੜ੍ਹਾ ਕੀਤਾ ਜਾਂਦਾ ਹੈ,ਉਹੋ ਜਿਹੇ ਦੋਸ਼ ਤਾਂ ਮਜੀਠੀਆ ਪਰਿਵਾਰ ਦੇ ਜਰਨਲ ਡਾਇਰ ਦੇ ਸਬੰਧਾਂ ਵਿੱਚ ਲਗਾਏ ਜਾਂਦੇ ਹਨ , ਕਿ ਕਿਸ ਤਰ੍ਹਾਂ 13 ਅਪ੍ਰੈਲ 1919 ਨੂੰ ਜਲਿਆਂ ਵਾਲੇ ਬਾਗ ਵਿੱਚ ਨਰ ਸੰਹਾਰ ਕਰਕੇ ਮਜੀਠੀਆ ਪਰਿਵਾਰ ਦੀ ਮੇਜ਼ਬਾਨੀ ਸਵੀਕਾਰ ਕੀਤੀ ਸੀ। ਇਸ ਸਬੰਧੀ ਅੱਜ ਤੱਕ ਇਸ ਤੱਥ ਸਬੰਧੀ ਅਕਾਲੀ ਦਲ ਨੇ ਕਦੇ ਵੀ ਮੁਆਫ਼ੀ ਨਹੀਂ ਮੰਗੀ।
ਇਸ ਸਾਰੇ ਪ੍ਰਸੰਗ ਵਿਚ ਸਿਮਰਨਜੀਤ ਸਿੰਘ ਮਾਨ ਦਾ ਕਿਰਦਾਰ ਸਭ ਤੋਂ ਵਧੀਆ ਅਤੇ ਸਾਫ਼ ਹੈ, ਜਿੱਥੇ ਉਹ ਆਪਣੇ ਨਾਨੇ ਅਰੂੜ ਸਿੰਘ ਵਲੋਂ ਜਰਨਲ ਡਾਇਰ ਨੂੰ ਸਿਰੋਪਾ ਦੇਣ ਦੀ ਘਟਨਾ ਦੀ ਸ਼ਰੇਆਮ ਪੰਜਾਬੀਆਂ ਤੋਂ ਮੁਆਫੀ ਮੰਗ ਲੈਂਦਾ ਹੈ।

01/10/2023

ਪ੍ਰਤਾਪ ਸਿੰਘ ਬਾਜਵਾ

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਇੱਕ ਹੋਰ ਯੂ-ਟਰਨ ਲੈਂਦਿਆਂ ਪੰਚਾਇਤ ਵਿਭਾਗ ਦੇ ਮੁਅੱਤਲ ਕੀਤੇ ਸੀਨੀਅਰ ਨੌਕਰਸ਼ਾਹਾਂ ਵਿਚੋਂ ਇੱਕ DK Tiwari ਨੂੰ ਬਹਾਲ ਕਰ ਦਿੱਤਾ ਹੈ। ਇੱਕ ਹੋਰ ਮੁਅੱਤਲ ਨੌਕਰਸ਼ਾਹ ਗੁਰਪ੍ਰੀਤ ਸਿੰਘ ਖਹਿਰਾ ਨੂੰ ਜਲਦੀ ਹੀ ਬਹਾਲ ਕੀਤਾ ਜਾ ਸਕਦਾ ਹੈ।

AAP ਸਰਕਾਰ ਦਾ ਇਹ ਕਦਮ ਸਾਬਿਤ ਕਰਦਾ ਹੈ ਕਿ ਦੋਵੇਂ ਸੀਨੀਅਰ ਨੌਕਰਸ਼ਾਹਾਂ ਨੂੰ ਬਲੀ ਦਾ ਬੱਕਰਾ ਬਣਾਇਆ ਗਿਆ ਸੀ। ਹੁਣ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਪੰਜਾਬ ਦੇ ਲੋਕਾਂ ਨੂੰ ਸਪਸ਼ਟੀਕਰਨ ਦੇਣਾ ਚਾਹੀਦਾ ਹੈ ਕਿ ਪੰਚਾਇਤਾਂ ਨੂੰ ਭੰਗ ਕਰਨ ਪਿੱਛੇ ਮੁੱਖ ਦੋਸ਼ੀ ਕੌਣ ਸੀ।
ਪੰਜਾਬ ਦੇ ਲੋਕਾਂ ਨੂੰ ਸੱਚ ਜਾਣਨ ਦਾ ਪੂਰਾ ਅਧਿਕਾਰ ਹੈ।

29/09/2023

ਸੁਖਪਾਲ ਸਿੰਘ ਖੈਹਰਾ ਦੇ ਸੰਦਰਭ ਵਿੱਚ ਜ਼ੋ ਰੁਖ ਪੰਜਾਬ ਕਾਂਗਰਸ ਦਾ ਬੀਤੇ ਦੌਰ ਵਿਚ ਰਿਹਾ ਹੈ,ਅੱਜ ਵੀ ਉਹੀ ਫਾਜ਼ਿਲਕਾ ਵਿਖੇ ਦੇਖਣ ਨੂੰ ਮਿਲਿਆ, ਜਿੱਥੇ ਸੀਆਈਏ ਸਟਾਫ਼ ਵਿਚ ਸੁਖਪਾਲ ਖੈਹਰਾ ਬੰਦ ਹਨ। ਪ੍ਰਤਾਪ ਬਾਜਵਾ, ਰਾਜਾ ਵੜਿੰਗ ਅਤੇ ਸੁਖਜਿੰਦਰ ਰੰਧਾਵਾ ਤੋਂ ਬਿਨਾਂ ਕੋਈ ਵੀ ਵੱਡਾ ਕਾਂਗਰਸੀ ਆਗੂ ਜਾਂ ਕਾਂਗਰਸੀ ਸਮਰਥਕਾਂ ਦੀ ਵੱਡੀ ਭੀੜ ਦੇਖਣ ਨੂੰ ਨਹੀਂ ਮਿਲੀ ਅਤੇ ਨਾ ਹੀ ਉਕਤ ਵਰਣਿਤ ਆਗੂਆਂ ਵੱਲੋਂ ਖਕੋਈ ਵੱਡੇ ਪੱਧਰ ਤੇ ਪ੍ਰਦਰਸ਼ਨ ਕੀਤਾ ਗਿਆ। ਪ੍ਰਤਾਪ ਬਾਜਵਾ ,ਰਾਜਾ ਵੜਿੰਗ ਅਤੇ ਸੁਖਜਿੰਦਰ ਰੰਧਾਵਾ ਗਏ, ਖੈਹਰੇ ਨੂੰ ਮਿਲਣ ਦੀ ਕੋਸ਼ਿਸ਼ ਕਰਦੇ ਦੱਸਿਆ ਗਿਆ, ਅੱਗੋਂ ਪੁਲਸ ਵਲੋਂ ਮਿਲਾਣ ਤੋਂ ਇਨਕਾਰ ਕਰਨ ਤੇ ਪ੍ਰੈਸ ਦੇ ਕੈਮਰਿਆਂ ਸਾਹਮਣੇ ਵੱਡੇ ਵੱਡੇ ਬਿਆਨ ਦਾਗੇ ਅਤੇ ਫਿਰ ਇਹ ਕਹਿ ਕੇ ਕਿ ਬਾਕੀ ਆਗੂਆਂ ਨਾਲ ਮਿਲ ਕੇ ਬਣਾਉਂਦੇ ਹਾਂ ਕੋਈ ਪ੍ਰੋਗਰਾਮ...., ਚੰਡੀਗੜ੍ਹ ਨੂੰ ਚਾਲੇ ਪਾਏ ਲਏ ਗਏ। ਜੇਕਰ ਇਹੋ ਹੀ ਕੁਝ ਕਰਨਾ ਸੀ ਤਾਂ ਉਹ ਚੰਡੀਗੜ੍ਹ ਵਿਖੇ ਬੈਠ ਵੀ ਕੀਤਾ ਜਾ ਸਕਦਾ ਸੀ। ਪਰ ਖੈਰ..ਇਸ ਸਭ ਨਾਲ ਤਾਂ ਇਹ ਗੱਲ ਸ਼ਪੱਸ਼ਟ ਹੋ ਗਈ ਕਿ ਇਹ ਲੜਾਈ ਵੀ ਸੁਖਪਾਲ ਖੈਹਰੇ ਨੂੰ ਇਕੱਲੇ ਲੜਨੀ ਪੈਣੀ। ਕੋਈ ਵੀ ਭਵਿੱਖ ਵਿੱਚ ਉਸ ਨਾਲ ਖੜਦਾ ਨਜ਼ਰੀ ਨਹੀਂ ਆਉਂਦਾ, ਕਿਉਂਕਿ ਜੇਕਰ ਆਸ਼ੂ ਵਰਗਿਆਂ ਕਰਕੇ ਜੇਕਰ ਵਿਜ਼ੀਲੈਂਸ ਦੇ ਦਫ਼ਤਰ ਦਾ ਘੇਰਾਉ ਕੀਤਾ ਜਾ ਸਕਦਾ ਤਾਂ ਸੁਖਪਾਲ ਖੈਹਰੇ ਵਾਸਤੇ ਕਿਉਂ ਨਹੀਂ। ਹੈਰਾਨਗੀ ਇਸ ਗੱਲ ਦੀ ਹੈ ਵਿਰੋਧੀ ਧਿਰ ਦਾ ਨੇਤਾ ਉੱਥੇ ਹੋਵੇ, ਪਾਰਟੀ ਪ੍ਰਧਾਨ ਉੱਥੇ ਹੋਵੇ, ਸਾਬਕਾ ਡਿਪਟੀ ਮੁੱਖ ਮੰਤਰੀ ਉੱਥੇ ਹੋਵੇ, ਪਰ ਵਰਕਰ ਕੁੱਲ ਮਿਲਾ ਕੇ ਪੰਜਾਹ ਤੋਂ ਵੱਧ ਇਕੱਠੇ ਨਾ ਹੋਣ ਤਾਂ ਇਸ ਦਾ ਸੰਕੇਤ ਕੀ ਜਾਂਦਾ।ਸਿਰਫ ਇਹੀ ਕਿ ਲੋਕਾਚਾਰੀ ਡਰਾਮਾ ਕਰਨਾ ਸੀ,ਉਹ ਕਰ ਲਿਆ,ਬਾਕੀ ਕੰਮ ਖ਼ਤਮ। ਲੜਾਈ ਇਕੱਲੇ ਸੁਖਪਾਲ ਖੈਹਰੇ ਦੀ ਹੈ,ਜਿਸ ਤਰੀਕੇ ਨਾਲ ਉਹ ਬੀਤੇ ਵਿਚ ਕਾਂਗਰਸੀ ਹੁੰਦਾ ਹੋਇਆ ਵੀ ਟਕਸਾਲੀ ਕਾਂਗਰਸੀ ਨੇਤਾਵਾਂ ਦੀ ਨਜ਼ਰ ਵਿਚ ਕਾਂਗਰਸੀ ਨਹੀਂ, ਇਕੱਲਾ ਲੜ੍ਹਦਾ ਆਇਆ ਹੈ,ਹੁਣ ਵੀ ਉਸੇ ਤਰੀਕੇ ਨਾਲ ਕਰਨਾ ਪਵੇਗਾ।

28/09/2023

ਅੱਤ ਖੁਦਾ ਦਾ ਵੈਰ

ਅੱਵਲ ਹਮਦ ਜਨਾਬ ਅੱਲਾਹ ਦੀ ਨੂੰ,
ਜਿਹੜਾ ਕੁਦਰਤੀ ਖੇਲ ਬਣਾਂਵਦਾ ਈ ।
ਚੌਦਾਂ ਤਬਕਾਂ ਦਾ ਨਕਸ਼ ਨਿਗਾਰ ਕਰਕੇ,
ਰੰਗਾ ਰੰਗ ਦੇ ਭੇਖ ਰਚਾਂਵਦਾ ਈ ।
ਸਫਾਂ ਪਿਛਲੀਆਂ ਸਭ ਸਮੇਟ ਲੈਂਦਾ,
ਅੱਗੇ ਹੋਰ ਹੀ ਹੋਰ ਵਿਛਾਂਵਦਾ ਈ ।
ਸ਼ਾਹ ਮੁਹੰਮਦਾ ਓਸ ਤੋਂ ਸਦਾ ਡਰੀਏ,
ਬਾਦਸ਼ਾਹਾਂ ਥੀਂ ਭੀਖ ਮੰਗਾਵਦਾ ਈ

ਕਹਿੰਦੇ ਅੱਤ ਖ਼ੁਦਾ ਦਾ ਵੈਰ ਹੁੰਦਾ, ਜਿਨ੍ਹਾਂ ਵੀ ਬੰਦਿਆਂ ਨੇ ਭਾਵੇਂ ਕਿਸੇ ਵੀ ਖੇਤਰ ਵਿਚ ਅੱਤ ਚੁੱਕੀ ਹੋਵੇ , ਬਜ਼ੁਰਗ ਕਹਿੰਦੇ..ਜਰੂਰ ਪੈ ਜਾਂਦੀ.....ਪਤਾ ਨੀ ਬੰਦਾ ...,ਉਸ ਅਕਾਲ ਪੁਰਖ ਦੇ ਇਸ ਭਾਣੇ ਨੂੰ ਕਿਉਂ ਭੁੱਲ ਜਾਂਦ...? ਬੀਤੇ ਸਮੇਂ ਦੇ ਬੜੇ ਉਹ ਚਿਹਰੇ ਹਨ, ਜਿਨ੍ਹਾਂ ਤਾਕਤ ਦੇ ਨਸ਼ੇ ਵਿਚ ਰੱਬ ਨੂੰ ਹੀ ਭੁਲਾ ਦਿੱਤਾ ਸੀ.....ਇਸ ਵੀ ਸੁਖਬੀਰ ਬਾਦਲ ਵੀ ਆਉਂਦਾ, ਨਵਜੋਤ ਸਿੱਧੂ ਵੀ, ਬਿਕਰਮ ਮਜੀਠੀਆ ਵੀ , ਸੁਖਪਾਲ ਖਹਿਰਾ ਵੀ ਅਤੇ ਮੌਜੂਦਾ ਸਮੇਂ ਵਿਚ ਭਗਵੰਤ ਮਾਨ ਵੀ..ਸ਼ਾਹ ਮੁਹੰਮਦ ਲਿਖਦਾ..
ਅੱਵਲ ਹਮਦ ਜਨਾਬ ਅੱਲਾਹ ਦੀ ਨੂੰ,
ਜਿਹੜਾ ਕੁਦਰਤੀ ਖੇਲ ਬਣਾਂਵਦਾ ਈ ।
ਚੌਦਾਂ ਤਬਕਾਂ ਦਾ ਨਕਸ਼ ਨਿਗਾਰ ਕਰਕੇ,
ਰੰਗਾ ਰੰਗ ਦੇ ਭੇਖ ਰਚਾਂਵਦਾ ਈ ।
ਸਫਾਂ ਪਿਛਲੀਆਂ ਸਭ ਸਮੇਟ ਲੈਂਦਾ,
ਅੱਗੇ ਹੋਰ ਹੀ ਹੋਰ ਵਿਛਾਂਵਦਾ ਈ ।
ਸ਼ਾਹ ਮੁਹੰਮਦਾ ਓਸ ਤੋਂ ਸਦਾ ਡਰੀਏ,
ਬਾਦਸ਼ਾਹਾਂ ਥੀਂ ਭੀਖ ਮੰਗਾਵਦਾ ਈ ,
ਨਿਰਸੰਦੇਹ ਸੁਖਪਾਲ ਖੈਹਰਾ ਖਿਲਾਫ ਹੋਈ ਕਾਰਵਾਈ ਬਦਲਾ ਲਉ ਰਾਜਨੀਤੀ ਦਾ ਹੀ ਹਿੱਸਾ ਹੈ,ਇਸ ਵਿਚ ਕੋਈ ਸ਼ੱਕ ਨਹੀਂ,ਪਰ ਪਿਛਲੇ ਪੌਣੇ ਦੋ ਸਾਲਾਂ ਤੋਂ ਜਿਸ ਤਰੀਕੇ ਦੀ ਭਗਵੰਤ ਮਾਨ ਦੇ ਖਿਲਾਫ ਉਹ ਹੇਠਲੇ ਪੱਧਰ ਦੀ ਬਿਆਨਬਾਜ਼ੀ ਕਰ ਰਿਹਾ ਸੀ ਅਤੇ ਉਹ ਵੀ ਨਿੱਜੀ ਪੱਧਰ ਤੇ....,ਇਹ ਕਾਰਵਾਈ ਹੋਣਾ ਸੁਭਾਵਿਕ ਸੀ।
ਭਗਵੰਤ ਤੇਰੀ ਮਾਂ , ਤੇਰੀ ਭੈਣ,ਆਦਿ ਬੋਲ ਖੈਹਰਾ ਦੀ ਬੋਲੀ ਦਾ ਮਹਿਜ਼ ਸਾਧਾਰਨ ਹਿੱਸਾ ਹਨ। ਨੰਗੀਆਂ ਗਾਲ਼ਾਂ ਤੋਂ ਥੋੜਾ ਜਿਹਾ ਘੱਟ ਰਹਿਣਾ ਸੁਖਪਾਲ ਖੈਹਰਾ ਵਲੋਂ ਆਪਣੇ ਅੰਦਰਲੇ ਗੁੱਸੇ ਦਾ ਇਜ਼ਹਾਰ ਕਰਨਾ ਉਸਦੀ ਤਬੀਅਤ ਦਾ ਹਿੱਸਾ ਬਣ ਚੁੱਕਾ ਹੈ।
ਖੈਹਰੇ ਦੇ ਹਿਤੈਸ਼ੀ ਜਿਸ ਤਰੀਕੇ ਨਾਲ ਮਰਜੀ ਉਸ ਨੂੰ ਪੰਜਾਬ ਅਤੇ ਪੰਜਾਬੀਅਤ ਦਾ ਰਖਵਾਲਾ ਦੱਸਣ ਦਾ ਪੁਰਜੋਰ ਜ਼ੋਰ ਲਗਾ ਲੈਣ, ਪਰ ਫਿਰ ਵੀ ਉਸ ਵਲੋਂ ਆਪ ਸਰਕਾਰ ਖ਼ਿਲਾਫ਼ ਕੀਤੀ ਜਾ ਰਹੀ ਜੰਗ ਉਸਦੇ ਇਕੱਲੇ ਦੀ ਸੀ,ਨਾ ਕਿ ਸਮੁੱਚੀ ਕਾਂਗਰਸ ਪਾਰਟੀ ਦੀ, ਕਿਉਂਕਿ ਕਦੇ ਵੀ ਉਸਦੇ ਹੱਕ ਵਿੱਚ ਪੰਜਾਬ ਕਾਂਗਰਸ ਖਲੋਤੀ ਨਜ਼ਰ ਨਹੀਂ ਆਈ।
ਅੱਜ ਵੀ ਇਸ ਨਾਜ਼ੁਕ ਸਮੇਂ ਤੇ ਜ਼ੋ ਬੋਲ ਰਾਣੇ ਗੁਰਜੀਤ ਸਬੰਧੀ ਉਸ ਨੇ ਬੋਲੇ ਹਨ , ਉਸਦੀ ਅੰਦਰ ਦੀ ਮਾਨਸਿਕਤਾ ਨੂੰ ਦਰਸਾਉਂਦੇ ਹਨ ਕਿ ਆਪਣੇ ਵਿਰੋਧੀਆਂ ਨੂੰ ਉਹ ਕਿਸ ਤਰ੍ਹਾਂ ਲੈਂਦਾ ਹੈ ਅਤੇ ਕਿਸ ਤਰ੍ਹਾਂ ਆਪਣੀ ਅਸੁਤੰਸ਼ਟਾਂ ਦਾ ਇਜ਼ਹਾਰ ਕਰਦਾ ਸਭ ਕਦਰਾਂ ਕੀਮਤਾਂ ਭੁੱਲ ਜਾਂਦਾ ਹੈ।
ਅੱਜ ਉਸਦੇ ਹੱਕ ਵਿੱਚ ਪ੍ਰਤਾਪ ਬਾਜਵਾ ,ਰਾਜਾ ਵੜਿੰਗ, ਗੁਰਕੀਰਤ ਕੋਟਲੀ ਦੇ ਬਿਆਨ ਆਏ,ਪਰ ਕੋਈ ਨਿਸ਼ਚਿਤ ਪ੍ਰੋਗਰਾਮ ਕਾਂਗਰਸ ਪਾਰਟੀ ਵਲੋਂ ਨਹੀਂ ਦਿੱਤਾ ਗਿਆ..ਖੈਰ
ਖੈਹਰੇ ਦੀ ਗਿਰਫਤਾਰੀ ਬਦਲਾ ਲੈਣ ਹਿੱਤ ਕੀਤੀ ਗਈ ਹੀ ਕਾਰਵਾਈ ਹੈ,ਇਸ ਵਿਚ ਕੋਈ ਸ਼ੱਕ ਨਹੀਂ। ਜਿਸਦੀ ਜਿੰਨੀ ਵੀ ਨਿੰਦਾ ਕੀਤੀ ਜਾਵੇ,ਉਹ ਘੱਟ ਹੈ, ਕਿਉਂਕਿ ਉਹ ਲੋਕਾਂ ਦਾ ਚੁਣਿਆ ਹੋਇਆ ਨੁੰਮਾਇੰਦਾ ਹੈ।ਦੂਸਰੇ ਪਾਸੇ ਹਰ ਨੇਤਾ ਨੂੰ ਬਿਆਨਬਾਜ਼ੀ ਕਰਨ ਤੋਂ ਪਹਿਲਾਂ ਜ਼ਬਾਨ ਤੇ ਤਾਲਾ ਜ਼ਰੂਰ ਲਗਾ ਲੈਣਾ ਚਾਹੀਦਾ, ਤਾਂ ਜੋ ਕਿਸੇ ਦੀ ਨਿੱਜਤਾ ਤੇ ਹਮਲਾ ਨਾ ਹੋਵੇ।

28/09/2023

Bikram Singh Majithia

ਜਦੋਂ ਮੇਰੇ ਖਿਲਾਫ ਪੈਚ ਲਾਉਣ ਵਾਲੇ ਮੁੱਖ ਮੰਤਰੀ ਨੇ ਝੂਠਾ ਐਨ ਡੀ ਪੀ ਐਸ ਦਾ ਕੇਸ ਦਰਜ ਕੀਤਾ ਸੀ, ਭਾਵੇਂ ਉਦੋਂ ਸੁਖਪਾਲ ਖਹਿਰਾ ਕੁਝ ਨਹੀਂ ਬੋਲੇ ਸਨ ਪਰ ਜਿਸ ਤਰੀਕੇ ਅੱਜ ਖਹਿਰਾ ਨੂੰ ਗ੍ਰਿਫਤਾਰ ਕੀਤਾ ਹੈ, ਮੈਂ ਉਸਦੀ ਜ਼ੋਰਦਾਰ ਨਿਖੇਧੀ ਕਰਦਾ ਹਾਂ। ਜਾ ਮਜੀਠੀਆ ਤੇਰੇ ਨਾਲ ਆ ਜਿੱਥੇ ਲੋੜ ਪਊ ਤੇਰੇ ਨਾਲ ਖੜ੍ਹੇ ਹਾਂ !! Sukhpal Singh Khaira

28/09/2023

ਖੈਹਰਾ ਦੀ ਗਿਰਫਤਾਰੀ ਤੇ ਬੋਲੇ ਪ੍ਰਤਾਪ ਬਾਜਵਾ

28/09/2023

ਸੁਖਪਾਲ ਖਹਿਰਾ ਪੰਜਾਬ ਪੁਲਿਸ ਵਲੋਂ ਗ੍ਰਿਫਤਾਰ

28/09/2023

ਪ੍ਰਤਾਪ ਸਿੰਘ ਬਾਜਵਾ ਦਾ ਖੈਹਰਾ ਦੇ ਹੱਕ ਵਿੱਚ ਆਇਆ ਟਵੀਟ

ਸੀਨੀਅਰ ਕਾਂਗਰਸੀ ਆਗੂ ਅਤੇ ਹਲਕਾ ਭੁਲੱਥ ਤੋਂ ਵਿਧਾਇਕ Sukhpal Singh Khaira ਦੀ ਗ੍ਰਿਫ਼ਤਾਰੀ ਬਹੁਤ ਹੀ ਨਿੰਦਣਯੋਗ ਹੈ। "ਆਪ" ਸਰਕਾਰ ਨੇ ਹੁਣ ਸਭ ਤੋਂ ਹੇਠਲੇ ਪੱਧਰ 'ਤੇ ਝੁਕ ਕੇ ਬਦਲਾਖ਼ੋਰੀ ਦੀ ਰਾਜਨੀਤੀ ਦਾ ਸਹਾਰਾ ਲਿਆ ਹੈ।

ਸੁਖਪਾਲ ਸਿੰਘ ਖਹਿਰਾ ਹਮੇਸ਼ਾ ਸਪੱਸ਼ਟ ਤੌਰ 'ਤੇ ਬੋਲਿਆ ਹੈ ਅਤੇ ਉਨ੍ਹਾ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਸਰਕਾਰ ਦੁਆਰਾ ਕੀਤੇ ਗਲਤ ਕੰਮਾਂ ਅਤੇ ਬੇਨਿਯਮੀਆਂ ਵਿਰੁੱਧ ਆਪਣੀ ਆਵਾਜ਼ ਬੁਲੰਦ ਕੀਤੀ ਹੈ।
ਪੰਜਾਬ ਕਾਂਗਰਸ ਕਾਨੂੰਨ ਦੇ ਦਾਇਰੇ ਵਿੱਚ ਰਹਿ ਕੇ ਉਸ ਨੂੰ ਰਿਹਾਅ ਕਰਵਾਉਣ ਵਿੱਚ ਕੋਈ ਕਸਰ ਬਾਕੀ ਨਹੀਂ ਛੱਡੇਗੀ।

"ਆਪ ਸਰਕਾਰ ਮੁਰਦਾਬਾਦ"

28/09/2023

ਸੁਖਪਾਲ ਸਿੰਘ ਖਹਿਰਾ ਨੂੰ ਪੰਜਾਬ ਪੁਲਿਸ ਵਲੋਂ ਕੀਤਾ ਗਿਆ ਗਿਰਫ਼ਤਾਰ

26/09/2023

ਯੂਨੀਵਰਸਿਟੀ ਕਾਲਜ ਲਾਡੋਵਾਲੀ ਰੋਡ ਦੀ ਕਨਿਕਾ ਮਹੇ ਨੇ ਯੂਨੀਵਰਸਿਟੀ ਨਤੀਜਿਆਂ ਵਿੱਚ ਮਾਰੀ ਬਾਜੀ

ਜਲੰਧਰ 26ਸਤੰਬਰ () ਯੂਨੀਵਰਸਿਟੀ ਕਾਲਜ ਲਾਡੋਵਾਲੀ ਰੋਡ ਜਲੰਧਰ ਦੀ ਵਿਦਿਆਰਥਣ ਵਲੋਂ ਯੂਨੀਵਰਸਿਟੀ ਪ੍ਰੀਖਿਆਵਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਐਮਸੀਏ ਦੀ ਕਰਵਾਈ ਗਈ ਸਮੈਸਟਰ ਪ੍ਰੀਖਿਆਵਾਂ ਵਿੱਚ ਪਹਿਲਾ ਸਥਾਨ ਹਾਸਲ ਕਰਕੇ ਕਾਲਜ ਦਾ ਨਾਮ ਰੌਸ਼ਨ ਕੀਤਾ ਹੈ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕਾਲਜ਼ ਦੇ ਓਐਸਡੀ ਡਾ.ਕਮਲੇਸ਼ ਸਿੰਘ ਦੁੱਗਲ ਨੇ ਦੱਸਿਆ ਕਿ ਕਾਲਜ ਦੀ ਵਿਦਿਆਰਥਣ ਕਨਿਕਾ ਮਹੇ ਨੇ ਐਮਸੀਏ ਦੇ ਸਮੈਸਟਰ ਚੌਥਾ ਦੀ ਪ੍ਰੀਖਿਆ ਵਿੱਚੋਂ 8.90 ਸੀਜੀਪੀਏ ਪ੍ਰਾਪਤ ਕਰਕੇ ਯੂਨੀਵਰਸਿਟੀ ਵਿੱਚੋਂ ਟਾਪ ਕੀਤਾ ਹੈ,ਜ਼ੋ ਕਾਲਜ਼ ਵਾਸਤੇ ਬੇਹੱਦ ਮਾਣ ਵਾਲੀ ਗੱਲ ਹੈ।ਡਾ. ਦੁੱਗਲ ਨੇ ਵਿਦਿਆਰਥਣ ਨੂੰ ਦਿਲੀ ਮੁਬਾਰਕ ਬਾਦ ਦਿੰਦਿਆਂ ਭਵਿੱਖ ਵਿੱਚ ਹੋਰ ਵੀ ਨਵੇਂ ਦਿਸਹੱਦੇ ਸਥਾਪਤ ਕਰਨ ਦੀ ਪ੍ਰੇਰਨਾ ਦਿੱਤੀ। ਇਸ ਮੌਕੇ ਪ੍ਰੋ: ਦੁੱਗਲ ਨੇ ਯੂਨੀਵਰਸਿਟੀ ਬਿਜ਼ਨਸ ਸਕੂਲ ਦੇ ਸਮੂਹ ਅਧਿਆਪਕਾਂ ਨੂੰ ਵੀ ਵਧਾਈ ਦਿੱਤੀ | ਇਸ ਮੌਕੇ ਤੇ ਪ੍ਰੋ.ਰਾਮ ਦਿਆਲ,ਪ੍ਰੋ ਸੋਨੀਆ ਮਦਾਨ ਅਤੇ ਨਿਗਰਾਨ ਹਰਜੀਤ ਸਿੰਘ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ |

24/09/2023

ਨਵਜੋਤ ਸਿੱਧੂ ਦਾ ਪੰਜਾਬ ਮਾਡਲ ਦੀ ਨਿਕਲਦੀ ਫੂਕ

ਨਵਜੋਤ ਸਿੰਘ ਸਿੱਧੂ ਜਦੋਂ ਆਪਣੇ ਸਿਖ਼ਰ ਤੇ ਸੀ, ਉਦੋਂ ਉਹ ਹੁਣ ਪੰਜਾਬ ਦੀ ਆਰਥਿਕਤਾ ਸਬੰਧੀ ਦਿੱਤੇ ਜਾ ਰਹੇ ਮੌਜੂਦਾ ਅੰਕੜਿਆਂ ਤੋਂ ਪੂਰੀ ਤਰ੍ਹਾਂ ਅਣਜਾਣ ਸਨ।ਉਸ ਸਮੇਂ ਉਸਦੀ ਜੰਗ ਪ੍ਰਧਾਨਗੀ ਪ੍ਰਾਪਤ ਕਰਨ ਮਗਰੋਂ ਪੰਜਾਬ ਦੇ ਮੁੱਖ ਮੰਤਰੀ ਦੇ ਅਹੁਦੇ ਤੱਕ ਸੀਮਤ ਸੀ।ਉਸ ਸਮੇਂ ਉਸਦੀ ਸਿਆਸਤ'ਪੈਂਟ ਢਿੱਲੀ ਕਰ ਦੇਵੇਗਾ,ਇੱਕ ਨਾਲ ਇੱਟ ਖੜਕਾ ਦਊ' ਆਦਿ ਤੱਤੇ ਬਿਆਨਾਂ ਨਾਲ ਭਰੀ ਪਈ ਸੀ। ਇਸ ਮਗਰੋਂ ਉਹ ਫਿਰ ਅਖੌਤੀ ਪੰਜਾਬ ਮਾਡਲ ਦੀ ਗੱਲ ਕਰਨ ਲੱਗ ਪਿਆ, ਅਤੇ ਜਿਸ ਨੂੰ ਰਾਹੁਲ ਗਾਂਧੀ ਨੇ ਵੀ ਇਹ ਕਹਿ ਕੇ ਸਵਈਏ ਕਰ ਲਿਆ ਕਿ ਤੁਸੀਂ ਚੰਨੀ ਨੂੰ ਮੁੱਖ ਮੰਤਰੀ ਬਣ ਲੈਣ ਦਿਉ,..ਫਿਰ ਚੋਣਾਂ ਮਗਰੋਂ ਤੁਹਾਡੇ ਪੰਜਾਬ ਮਾਡਲ ਨੂੰ ਲਾਗੂ ਕਰ ਦੇਵਾਂਗੇ। ਜ਼ੋ ਮਹਿਜ਼ ਇਕ ਖ਼ਿਆਲੀ ਪਲਾਉ ਸੀ ਜ਼ੋ ਰਾਹੁਲ ਗਾਂਧੀ ਦਾ, ਜਿਸਦਾ ਮਕਸਦ ਸਿਰਫ ਸਿੱਧੂ ਨੂੰ ਆਪੇ ਨਾਲ ਚੋਣਾਂ ਤੱਕ ਜੋਰ ਕੇ ਰੱਖਣਾ ਸੀ ਅਤੇ ਦੂਸਰੇ ਪਾਸੇ ਸਿੱਧੂ ਦਾ ਦੁਖਾਂਤ ਇਹ ਹੈ ਕਿ ਅਜੇ ਵੀ ਉਹ fool Paradise ਵਿਚ ਰਹਿ ਰਿਹਾ ਹੈ।ਅੱਜ ਤੱਕ ਸਿੱਧੂ ਨੇ ਕਦੇ ਵੀ ਡੱਟ ਕੇ ਲੜਾਈ ਨਹੀਂ ਲੜੀ ਜਿਸ ਤਰ੍ਹਾਂ ਸੁਖਜਿੰਦਰ ਰੰਧਾਵਾ, ਪ੍ਰਤਾਪ ਬਾਜਵਾ ਜਾਂ ਬਾਕੀ ਨੇਤਾ ਲੜਦੇ ਰਹੇ ਹਨ,ਬਲਕਿ ਇਹ ਸੀਜ਼ਨਲ ਨੇਤਾ ਦੀ ਸ਼੍ਰੇਣੀ ਵਿਚ ਆਉਂਦਾ ਹੈ,ਜ਼ੋ ਮੌਕੇ ਦੀ ਨਜਾਕਤ ਅਨੁਸਾਰ ‌ਲੋਕਾਂ ਵਿਚ ਆਉਂਦੇ ਹਨ।

ਹੁਣ ਉਸ ਵਲੋਂ ਪੰਜਾਬ ਦੀ ਆਰਥਿਕਤਾ ਸਬੰਧੀ ਦਿੱਤੇ ਜਾ ਰਹੇ ਬਿਆਨ, ਸਿਰਫ ਉਸਦੀ ਅਸੁਤੰਸ਼ਟਾਂ ਨੂੰ ਹੀ ਉਜਾਗਰ ਕਰਦੇ ਹਨ, ਕਿਉਂ ਕਿ ਉਸਦੇ ਇਨ੍ਹਾਂ ਬਿਆਨਾਂ ਨੂੰ ਨਾ ਤਾਂ ਕਦੇ ਪੰਜਾਬ ਸਰਕਾਰ ਨੇ ਗੰਭੀਰਤਾ ਨਾਲ ਲਿਆ ਹੈ ,ਨਾ ਹੀ ਮੀਡੀਆ ਨੇ,ਤੇ ਨਾ ਹੀ ਪੰਜਾਬ ਕਾਂਗਰਸ ਦੀ ਇਕਾਈ ਨੇ ... ... ਅਤੇ ਇਸਤੋਂ ਵੱਧ ਨਾ ਕਦੇ ਉਸਦੀ ਆਪਣੀ ਹਾਈ ਕਮਾਨ ਨੇ...

24/09/2023

ਅਫ਼ਸਰਸ਼ਾਹੀ ਦੀਆਂ ਬਦਨੀਤੀਆਂ ਅਤੇ ਕਿਸਾਨ ਜਥੇਬੰਦੀਆਂ ਦੀ ਧੱਕੇਸ਼ਾਹੀਆਂ ਦੀ ਭੇਂਟ ਚੜ੍ਹੀ ਬਟਾਲਾ-ਰਈਆ ਦੋ-ਮਾਰਗੀ ਸੜਕ ਯੋਜਨਾ

ਦਿਲੀ ਕੱਟੜਾ ਹਾਈਵੇ ਦੇ ਅੰਤਰਗਤ ਬਣ ਰਹੀ ਬਟਾਲਾ ਬਿਆਸ ਦੋ ਮਾਰਗੀ ਸੜਕ ਯੋਜਨਾ ਅਫ਼ਸਰਸ਼ਾਹੀ ਦੀਆਂ ਬਦਨੀਤੀਆਂ ਅਤੇ ਕਿਸਾਨ ਜਥੇਬੰਦੀਆਂ ਦੀਆਂ ਧੱਕੇਸ਼ਾਹੀਆਂ ਕਾਰਣ ਬਣਨ ਤੋਂ ਪਹਿਲਾਂ ਹੀ ਬੰਦ ਹੋ ਗਈ ਹੈ।ਇਸ ਨਵੇਂ ਬਣ ਰਹੇ ਸੜਕ ਮਾਰਗ ਨੂੰ ਲੈ ਬਿਆਸ ਤੋਂ ਲੈ ਕੇ ਬਟਾਲਾ ਤੱਕ ਦੇ ਲੋਕ ਬਹੁਤ ਖੁਸ਼ ਸਨ, ਕਿਉਂ ਕਿ ਇਕਤਰਫਾ ਟੁੱਟੀ ਫੁੱਟੀ ਸੜਕ ਕਾਰਨ ਜਿੱਥੇ ਭਾਰੀ ਟ੍ਰੈਫਿਕ ਦੀ ਸਮੱਸਿਆਂ ਨਾਲ ਜੂਝਣਾ ਪੈਂਦਾ ਸੀ , ਉੱਥੇ ਨਾਲ ਹੀ ਮਹਿਜ਼ ਤੀਹ ਮਿੰਟ ਦਾ ਸਫ਼ਰ ਇੱਕ ਘੰਟੇ ਦਾ ਹੋਣ ਕਾਰਣ ਭਾਰੀ ਪ੍ਰੇਸ਼ਾਨੀ ਦਾ ਸਬੱਬ ਵੀ ਬਣਦਾ ਸੀ।ਨਵੀਂ ਯੋਜਨਾਬੰਦੀ ਦੇ ਤਹਿਤ ਇਸ ਸੜਕ ਨੂੰ ਚੌੜਾ ਕਰਕੇ ਕਰਤਾਰਪੁਰ ਕਾਰੀਗਰ ਤੱਕ ਇਸਨੂੰ ਜੋੜਨਾ ਸੀ,ਜਿਸਦੇ ਤਹਿਤ ਇਸ ਉੱਤੇ ਕੰਮ ਵੀ ਸ਼ੁਰੂ ਹੋ ਗਿਆ। ਰਸਤੇ ਵਿਚ ਕਿਸਾਨਾਂ ਦੀਆਂ ਆਉਣ ਵਾਲੀਆਂ ਜ਼ਮੀਨਾਂ ਦਾ ਸਰਕਾਰ ਵਲੋਂ ਮੁਆਵਜ਼ਾ ਪ੍ਰਤੀ ਕਿੱਲਾ 1 ਕਰੋੜ ਵੀਹ ਲੱਖ ਨਿਰਧਾਰਤ ਕੀਤਾ ਗਿਆ,ਜਿਸਦੇ ਤਹਿਤ ਕਿਸਾਨਾਂ ਨੂੰ ਇਸਦਾ ਭੁਗਤਾਨ ਵੀ ਕਰ ਦਿੱਤਾ ਗਿਆ ਅਤੇ ਕਿਸਾਨਾਂ ਵਲੋਂ ਸਰਕਾਰ ਨੂੰ ਕਬਜ਼ਾ ਵੀ ਦੇ ਦਿੱਤਾ ਗਿਆ। ਜਿਸ ਕਾਰਨ ਇਸ ਮਾਰਗ ਤੇ ਕੰਮ ਹੋਣਾ ਸ਼ੁਰੂ ਹੋ ਗਿਆ, ਸੜਕਾਂ ਦੇ ਕਿਨਾਰੇ ਰੁੱਖਾਂ ਦੀ ਕਟਾਈ ਦਾ ਕੰਮ ਜ਼ੋਰਾਂ ਨਾਲ ਚੱਲ ਪਿਆ, ਸੜਕਾਂ ਤੇ ਬਕਾਇਦਾ ਤੌਰ ਤੇ ਨਵੇਂ ਉਸਾਰੀ ਦਾ ਕੰਮ ਵੀ ਸ਼ੁਰੂ ਹੋ ਗਿਆ।
ਕਹਿੰਦੇ ਇੱਥੋਂ ਹੀ ਅਫ਼ਸਰਸ਼ਾਹੀ ਦੀਆਂ ਬਦਨੀਤੀਆਂ ਦੀ ਸ਼ੁਰੂਆਤ ਹੁੰਦੀ ਹੈ। ਅਫ਼ਸਰਸ਼ਾਹੀ ਵਲੋਂ ਕਥਿਤ ਤੌਰ ਕਿਸਾਨਾਂ ਨੂੰ ਨਿਰਧਾਰਤ ਰੇਟਾਂ ਅਨੁਸਾਰ ਭੁਗਤਾਨ ਕਰਨ ਦੀ ਬਿਜਾਏ ਮਨਮਰਜ਼ੀ ਦੇ ਰੇਟ ਦਿੱਤੇ ਜਾਣ ਲੱਗ ਪਏ ਅਤੇ ਨਾਲ ਹੀ ਵਿਚੋਲਿਆਂ ਰਾਹੀਂ ਇਹ ਸੁਨੇਹਾ ਵੀ ਕਿਸਾਨਾਂ ਨੂੰ ਪਹੁੰਚਾ ਦਿੱਤਾ ਗਿਆ ਕਿ ਜੇਕਰ ਪੂਰੀ ਕੀਮਤ ਲੈਣੀ ਹੈ ਤਾਂ ਬਣਦੀ ਕਮਿਸ਼ਨ ਅਫਸਰਾਂ ਨੂੰ ਪਹੁੰਚਾ ਦਿੱਤੀ ਜਾਵੇ।,ਜਿਸ ਨੂੰ ਲੈ ਕੇ ਜ਼ਮੀਨ ਦੇ ਮਾਲਕਾਂ ਵੱਲੋਂ ਕੋਰਟ ਵਿੱਚੋਂ ਸਟੇਅ ਲੈਣ ਲਿਆ ਗਿਆ ਅਤੇ ਕੰਮ ਉੱਤੇ ਦਾ ਉੱਥੇ ਰੁੱਕ ਗਿਆ।
ਦੂਸਰਾ ਇਸ ਮੁੱਦੇ ਨੂੰ ਲੈ ਕੇ ਕਿਸਾਨ ਜੱਥੇਬੰਦੀਆਂ ਵੀ ਅੱਗੇ ਆ ਗਈਆਂ ਅਤੇ ਇਸ ਦਾ ਵਿਰੋਧ ਕਰਨਾ ਸ਼ੁਰੂ ਕਰ ਦਿੱਤਾ। ਹੁਣ ਦਿਲਚਸਪ ਤੱਥ ਇਹ ਸਾਹਮਣੇ ਆਇਆ ਕਿ ਕਿਸਾਨ ਮੁਆਵਜ਼ਾ ਲੈਣ ਕੇ ਸਰਕਾਰ ਨੂੰ ਆਪਣੀ ਜ਼ਮੀਨ ਦਾ ਕਬਜ਼ਾ ਦੇਣ ਲਈ ਤਿਆਰ ਹਨ,ਪਰ ਕਿਸਾਨ ਜਥੇਬੰਦੀਆਂ ਸਰਕਾਰ ਨੂੰ ਇਸਦਾ ਕਬਜ਼ ਨਹੀਂ ਕਰਨ ਦੇ ਰਹੀਆਂ।ਇਸ ਸਬੰਧੀ ਸਿਰਫ ਉਨ੍ਹਾਂ ਦਾ ਇਹ ਤਰਕ ਹੈ ਕਿ ਉਨ੍ਹਾਂ ਦੀ ਕੇਂਦਰੀ ਕਮੇਟੀ ਦਾ ਇਹ ਫੈਸਲਾ ਹੈ।
ਇਸ ਸਭ ਨਾਲ ਇਹ ਯੋਜਨਾ ਪੂਰੀ ਹੋਣ ਤੋਂ ਪਹਿਲਾਂ ਹੀ ਦਮ ਤੋੜ ਗਈ,ਜਿਸਦੀ ਜ਼ਿੰਮੇਵਾਰੀ ਮੁੱਖ ਰੂਪ ਵਿੱਚ ਅਫ਼ਸਰਸ਼ਾਹੀ ਦੀ ਬਣਦੀ ਨਜ਼ਰ ਆਉਂਦੀ ਹੈ ਜ਼ੋ ਸਰਕਾਰ ਵਲੋਂ ਨਿਰਧਾਰਤ ਕੀਮਤਾਂ ਦੇਣ ਦੀ ਆਪਣੀਆਂ ਜੇਬਾਂ ਭਰਨ ਵੱਲ ਰੁਚਿਤ ਸਨ ,ਪਰ ਅਜਿਹਾ ਤਾਂ ਨਹੀਂ ਹੋਇਆ, ਕਿਉਂਕਿ ਕਰਤਾਰਪੁਰ ਕਾਰੀਡੋਰ ਬਣਨ ਸਮੇਂ ਸੂਤਰਾਂ ਅਨੁਸਾਰ ਜਿਸ ਤਰੀਕੇ ਨਾਲ ਇਸ ਸਭ ਨਾਲ ਸਬੰਧਤ ਅਫ਼ਸਰਸ਼ਾਹੀ ਰੱਜੀ ਹੈ,ਉਹੋ ਜਿਹਾ ਸੁਆਦ ਹੀ ਉਹ ਇੱਥੋਂ ਭਾਲ ਰਹੀ ਸੀ।ਸਿੱਟਾ ਮਾਮਲਾ ਖਟਾਈ ਵਿਚ ਪੈ ਗਿਆ,ਜਿਸਦਾ ਖਮਿਆਜ਼ਾ ਖੱਜਲਖੁਆਰੀ ਦੇ ਰੂਪ ਵਿੱਚ ਇੱਥੇ ਰੋਜ਼ਾਨਾ ਸਫ਼ਰ ਕਰਨ ਵਾਲੇ ਹਜ਼ਾਰਾਂ ਲੋਕਾਂ ਨੂੰ ਭੁਗਤਣਾ ਪਵੇਗਾ

22/09/2023

ਮੋਦੀ ਹੈ ,ਸਭ ਮੁਮਕਿਨ ਹੈ

ਭਾਰਤ- ਕਨੇਡਾ ਰਿਸ਼ਤਿਆਂ ਦੇ
ਟੁੱਟ ਰਹੇ ਸਬੰਧਾਂ ਅਤੇ ਇਸ ਵਿੱਚ ਚੀਨ ਅਤੇ ਪਾਕਿਸਤਾਨ ਵਲੋਂ ਫਾਇਦਾ ਲੈਣ ਅਤੇ ਇਸਦਾ ਮੁੰਹਤੋੜ ਜਵਾਬ ਦੇਣ ਵਾਸਤੇ ਅੰਤਰਰਾਸ਼ਟਰੀ ਪੱਧਰ 'ਤੇ ਭਾਰਤ ਵੱਲੋਂ ਖਾਸ ਕਰ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਵਲੋਂ ਭਾਰਤ ਦੀ ਪ੍ਰਭੂਸੱਤਾ ਅਤੇ ਅਖੰਡਤਾ ਨੂੰ ਕਾਇਮ ਰੱਖਣ ਪ੍ਰਤੀ ਅਪਣਾਈ ਰਣਨੀਤੀ ਦੀ ਅਸਲ ਕਹਾਣੀ, ਤੱਥਾਂ ਸਹਿਤ ਕੱਲ ਪੇਸ਼ ਕਰਾਂਗੇ। ਇੰਤਜ਼ਾਰ ਕਰੋ ਅਤੇ ਨਾਲ ਹੀ ਗੱਲ ਕਰਾਂਗੇ ਭਾਰਤੀ ਖੁਫੀਆ ਏਜੰਸੀਆਂ ਵਲੋਂ ਦੀ ਭਾਰਤ ਖਿਲਾਫ ਸਰਗਰਮ ਤਾਕਤਾਂ ਨੂੰ ਉਨੀਂ ਦੇ ਦੇਸ਼ ਅੰਦਰ ਦਾਖਲ ਹੋ ਦੇਸ਼ ਵਿਰੋਧੀ ਤਾਕਤਾਂ ਨੂੰ ਠੋਕਣ ਦੀ....!
..

22/09/2023

ਕੰਗਨਾ ਰਣੌਤ ਇਕ ਅਜਿਹੀ ਅਦਾਕਾਰਾ ਹੈ,ਜ਼ੋ ਕਲਾਕਾਰ ਘੱਟ,ਇੱਕ ਪਾਰਟੀ ਦੇ ਬੁਲਾਰੇ ਵਜੋਂ ਕਥਿਤ ਤੌਰ ਤੇ ਜ਼ਿਆਦਾ ਕੰਮ ਕਰਦੀ ਨਜ਼ਰ ਆ ਰਹੀ ਹੈ। ਕਿਸਾਨੀ ਅੰਦੋਲਨ ਦੌਰਾਨ ਉਸ ਵਲੋਂ ਸਾਡੀਆਂ ਬੀਬੀਆਂ 'ਤੇ ਕੀਤੀਆਂ ਗਈਆਂ ਟਿੱਪਣੀਆਂ ਨੂੰ ਕਿਸਾਨ ਅਜੇ ਭੁਲੇ ਨਹੀਂ ਅਤੇ ਲੋਕ ਦਿਲਜੀਤ ਦੁਸਾਂਝ ਨੂੰ ਵੀ ਨਹੀਂ ਭੁਲੇ,,ਜਿਸ ਤਰੀਕੇ ਨਾਲ ਉਸਨੇ ਇਸ ਬੀਬੀ ਨੂੰ ਕਰਾਰੇ ਜੁਆਬ ਦਿੱਤੇ ਸਨ। ਹੁਣ ਉਹ ਇਕ ਵਾਰ ਫਿਰ ਸਮੁੱਚੇ ਪੰਜਾਬੀਆਂ, ਖਾਸ ਕਰ ਸਿੱਖਾਂ ਦੀ ਦੇਸ਼ ਭਗਤੀ ਤੇ ਪ੍ਰਸ਼ਨ ਉਠਾਉਂਦੀ ਹੋਈ ਉਨ੍ਹਾਂ ਨੂੰ ਉਪਦੇਸ਼ ਦੇ ਰਹੀ ਹੈ। ਸਿੱਖਾਂ ਦੀ ਦੇਸ਼ ਭਗਤੀ ਅਤੇ ਇਸ ਪ੍ਰਤੀ ਵਫ਼ਾਦਾਰੀ ਦੀ ਪਰਿਭਾਸ਼ਾ ਕੀ ਹੁਣ ਸਿੱਖਾਂ ਨੂੰ ਕੰਗਨਾ ਰਣੌਤ ਵਰਗੀਆਂ ਸਿਖਾਉਣ ਗਈਆਂ .........? ਕਮਾਲ ਹੈ.....ਯਾਰ ਕੀ ਹੋ ਰਿਹਾ ਦੇਸ਼ ਅੰਦਰ...ਭਾਰਤ ,ਅੰਦਰ ਰਹਿੰਦੇ ਸਿੱਖਾਂ ਨੇ ਕਦੇ ਵੀ ਖਾਲਿਸਤਾਨ ਦੇ ਹੱਕ ਵਿੱਚ ਕਦੇ ਕੋਈ ਬਿਆਨ ਨਹੀਂ ਦਿੱਤਾ ਅਤੇ ਨਾ ਹੀ ਇਸ ਸਬੰਧੀ ਕਦੇ ਕੁਝ ਸੋਚਿਆ ਹੈ।ਇਹ ਸਿਰਫ ਵਿਦੇਸ਼ਾਂ ਅੰਦਰ ਰਹਿ ਕੁਝ ਲੋਕਾਂ ਦੀ ਸੋਚ ਹੋ ਸਕਦੀ,ਪਰ ਇਸ ਮੁੱਦੇ ਤੇ ਕੰਗਨਾ ਰਣੌਤ ਵਰਗੀ ਅਦਾਕਾਰਾ ਦਾ ਬਿਆਨ ਸਿਰਫ ਫੋਕੀ ਸ਼ੋਹਰਤ ਲੈਣ ਕਰਕੇ ਹੀ ਦਿੱਤਾ ਜਾ ਸਕਦਾ ਹੈ ਜਾਂ ਮੰਡੀ ਹਲਕੇ ਤੋਂ ਸੰਭਾਵੀ ਭਾਜਪਾ ਦੇ ਲੋਕਸਭਾ ਉਮੀਦਵਾਰ ਦੀ ਟਿਕਟ ਲੈਣ ਵਜੋਂ। ਸਿੱਖਾਂ ਨੂੰ ਆਪਣੀ ਦੇਸ਼ ਭਗਤੀ ਦੇ ਸੰਦਰਭ ਵਿਚ ਇਹੋ ਜਿਹੇ ਅਦਾਕਾਰਾ ਪਾਸੋਂ ਸਰਟੀਫਿਕੇਟ ਜਾਂ ਉਪਦੇਸ਼ ਲੈਣ ਦੀ ਲੋੜ ਨਹੀਂ। ਭਾਰਤ ਦੀ ਅਜ਼ਾਦੀ ਵਾਸਤੇ ਪੰਜਾਬੀਆਂ ਦੀਆਂ ਦਿੱਤੀਆਂ ਕੁਰਬਾਨੀਆਂ ਦਾ ਇਤਿਹਾਸ ਸਹਿਜੇ ਇਸ ਦੀ ਗਵਾਹੀ ਭਰਦਾ ਹੈ।

16/09/2023

ਪਤਾ ਨਈਂ ਕਿਉਂ, ਅੱਜ ਏਨਾਂ ਦੀ ਯਾਦ ਆ ਰਹੀ,ਤੇ ਉਹ ਵੀ ਬਹੁਤ

ਹੱਥ ਘੁੱਟ ਕੇ ਫੜ ਲਓ ਵੇ,ਹਾਲੇ ਮੇਰੀ ਉਮਰ ਨਿਆਣੀ,
ਮੈਂ ਸੁਣਿਆ ਦੁਨੀਆਂ ਦੇ ਮੇਲੇ 'ਚੋਂ,
ਵਿਛੜ ਗਏ ਕਈ ਰੂਹਾਂ ਦੇ ਹਾਣੀ,
ਇਹ ਦਰਦ ਵਿਛੋੜੇ ਦੇ,ਮੈਥੋਂ ਨਾ ਜਾਣੇ ਨੇ ਝੱਲਣੇ,
ਹੁਣ ਹੋਣ ਨਸੀਬਾਂ ਨਾਲ ,ਵਿੱਛੜ ਗਏ ਦੇ ਮੇਲੇ

15/09/2023

ਅਧਿਆਪਨ ਵਰਗ ਸਬੰਧੀ ਬਦਲਦੇ ਪਰਿਪੇਖ

ਹੁਣ ਉਹ ਸਮਾਂ ਰਿਹਾ ਹੀ ਨਹੀਂ...ਕਿ ਅਧਿਆਪਕ ਤੁਹਾਨੂੰ ਇਹ ਪੁੱਛ ਸਕੇ ਕਿ ਪੁੱਤਰ ਜੀ ਕਲਾਸ ਵਿੱਚ ਕਿਉਂ ਨਹੀਂ ਆਉਂਦੇ....?....ਜਾਂ ਅਧਿਆਪਕ ਕੁੱਟ ਕੁੱਟ ਕੇ ਤੁਹਾਨੂੰ ਸੋਨਾ ਬਣਾ ਦੇਵੇ ਤੇ ਤੁਸੀਂ ਸਦਾ ਉਸ ਤੇ ਫ਼ਖ਼ਰ ਕਰਦੇ ਰਹੋ.,... ਹੁਣ ਉਹ ਸਮਾਂ ਨਹੀਂ... ਹੁਣ ਬੱਸ ਆਪਣੀ ਪੜਨ ਪੜਾਉਣ ਦੀ ਜਿੰਮੇਵਾਰੀ ਠੀਕ ਤਰੀਕੇ ਨਾਲ ਨਿਭਾਉ..... ਵਿਦਿਆਰਥੀ ਕਲਾਸ ਵਿੱਚ ਹਨ ਤਾਂ ਚਲੇ ਜਾਉ... ਨਹੀਂ ਤਾਂ ਕਿਸੇ ਰਾਹ ਜਾਂਦੇ ,ਤੇ ਖਾਸ ਕਰ ਉਦੋਂ ਜਦੋਂ ਉਹ ਕਿਸੇ ਆਪਣੀ ਨਾਲ ਤੁਰਿਆ ਜਾਂਦਾ ਹੋਵੇ,.. ਅੱਖਾਂ ਬੰਦ ਕਰ‌ ਲਾਗੋਂ ਇਸ ਤਰ੍ਹਾਂ ਲੰਘ ਜਾਉ .. ਜਿਵੇਂ ਤੁਸੀਂ ਜਨਮ ਜਨਮਾਂਤਰਾਂ ਤੋਂ ਅੰਨੇ ਹੋ... ਹੁਣ ਕੋਈ ਲੋੜ ਨਹੀਂ ..ਰਾਹ ਦਸੇਰੇ ਬਨਣ ਦੀ...ਵੀਰੋ .. ਆਦਰਸ਼ ਆਪਣੀ ਜਗ੍ਹਾ ਹਨ... ਅਤੇ ...ਯਥਾਰਥ ਆਪਣੀ ਜਗ੍ਹਾ... ਕਿਸੇ ਨੇ ਤੁਹਾਡੇ ਪਿੱਛੇ ਆ ਤੁਹਾਡੇ ਪਰਿਵਾਰ ਨੂੰ ਇਹ ਨਹੀਂ ਪੁੱਛਣਾ ਕਿ ਤੁਹਾਡੇ ਮਗਰੋਂ ਬੱਚਿਆਂ ਦਾ ਕੀ ਬਣਿਆ... ਤੇ ਨਾ ਹੀ ਤੁਹਾਡੀ ਪੱਗ ਲੱਥਣ ਉਪਰੰਤ ਕਿਸੇ ਨੇ ਤੁਹਾਡਾ ਸਾਥ ਦੇਣਾ......ਅਥਾਰਟੀ ਨੇ ਉਪਰੋਂ ਆਏ ਹੁਕਮਾਂ ਦੇ ਤਹਿਤ ਜਾਂਚ ਕਰ ਤੁਹਾਨੂੰ ਹੀ ਦੋਸ਼ੀ ਸਾਬਤ ਕਰ ਦੇਣਾਂ ਹੁੰਦਾ...ਮੈਨੂੰ ਇਕ ਘਟਨਾ ਯਾਦ ਹੈ ..ਸਾਲ ਕੋਈ ਹੋਵੇਗਾ 1995 ਦਾ.. ਮੈਂ ‌ਨਵਾਂ ਨਵਾਂ ਅੰਮ੍ਰਿਤਸਰ ਦੇ ਇਕ ਨਾਮੀ ਕਾਲਜ਼ ਵਿੱਚ ਐਡਹਾਕ ਅਧਿਆਪਕ ਲੱਗਾ ਸਾਂ... ਸਹਿਕਰਮੀ ਐਡਹਾਕ ਮੈਡਮ ਨੂੰ ਸ਼ਹਿਰ ਦੀ ਇੱਕ ਨਾਮੀ ਮਿੱਲ ਦੇ ਮੁੰਡੇ ਨੇ ਚਾਕ ਮਾਰ ਗਲਤ ਹਰਕਤ ਕੀਤੀ.. ਜਿਸਨੂੰ ਦੇਖ ਇਕ "ਪਾਗ਼ਲ" ਅਧਿਆਪਕ ਦਾ ਜ਼ਮੀਰ ਜਾਗਿਆ ...ਖੂਨ ਖੌਲਿਆ..ਉਸਨੇ ਮੁੰਡੇ ਨੂੰ ਫੜ ਗੁੱਸਾ ਵਿਅਕਤ ਕੀਤਾ ..ਨਤੀਜਾ ਕਾਲਜ ਵਿੱਚ ਅਗਲਿਆਂ ਹੜਤਾਲ ਕਰਵਾ ਦਿੱਤੀ.. ਪ੍ਰੋਫੈਸਰ ਨੂੰ ਮੁਆਫੀ ਮੰਗ ਕੇ ਖਹਿੜਾ ਛੁਡਾਉਣਾ ਪਿਆ....ਤੇ ਉਹ ਜਿਉਂਦੀ ਜਾਗਦੀ ਜ਼ਮੀਰ ਵਾਲਾ ਅਧਿਆਪਕ ਕਈ ਸਾਲ ਜਾਂਚ ਕਮੇਟੀਆਂ ਅੱਗੇ ਪੇਸ਼ ਹੁੰਦਾ ਰਿਹਾ...ਇਹ ਇਕ ਵਰਤਾਰਾ ਨਹੀ, ਬਹੁਤ ਉਦਾਹਰਣਾਂ ਹਨ.....ਧੱਕੇ ਨਾਲ ਵਿਦਿਆ ਹੁਣ ਕੋਈ ਕਿਸੇ ਨੂੰ ਨਾ ਦੇ ਸਕਦਾ ਤੇ ਨਾ ਕੋਈ ਲੈਣ ਨੂੰ ਤਿਆਰ...ਵਿੱਤੀ ਸਹਾਇਤਾ ...ਜਾਂ ਕਿਸੇ ਤਰੀਕੇ ਨਾਲ ਵਿਦਿਆਰਥੀਆਂ ਦੇ ਭਵਿੱਖ ਉਸਾਰਣ ਦਾ ਸੁਆਦ ਕੱਲ ਦਾ ਜਿਸ ਤਰੀਕੇ ਨਾਲ‌ ਸੁਰਜੀਤ ਆਈਸੀਯੂ ਵਿਚ ਲੈ ਰਿਹਾ ...ਉਹ ਵੀਰਪਾਲ ਕੌਰ ਦੀ ਪੋਸਟ ਪੜ੍ਹ ਕੇ ਜਾਚਿਆ ਜਾ ਸਕਦਾ.. ਹੁਣ ਤਾਂ ਘਰੋਂ ਤੁਰਨ ਲੱਗੇ ਵੀ ਬੱਚੇ ਕਹਿੰਦੇ....ਪਾਪਾ..ਜ਼ਿਆਦਾ ਬੱਚਿਆਂ ਨੂੰ ਕਹਿਣ ਕਹਾਉਣ ਦੀ ਲੋੜ ਨਹੀਂ... ਕੋਈ ਆਉਂਦਾ ਤਾਂ ਠੀਕ .. ਨਹੀਂ ਆਉਂਦਾ ਉਹ ਵੀ ਠੀਕ...ਬੱਸ ਸੁਰਜੀਤ ਅੰਕਲ ਵਾਂਗੂ ਇਸੇ ਓਮਰੇ ਹੱਢ ਨਾ ਤੁੜਵਾ ਬਹਿਓ..ਤੇ ਬੇਇੱਜ਼ਤੀ ਨਾ ਕਰਵਾ ਲੈਣਾ... ਕਿਉਂਕਿ ਕਿਸੇ ਸਾਥ ਨਹੀਂ ਦੇਣਾ..ਪਰ ਜ਼ੋ ਹੋਇਆ ਨਿੰਦਣਯੋਗ ਹੈ ਤੇ ਹੈਰਾਨਗੀ ਇਸ ਗੱਲ ਦੀ .. ਸਰਕਾਰ ਵਲੋ ਕੋਈ ਵੀ ਪ੍ਰਤੀਕਰਮ ਸਾਹਮਣੇ ਨੀ ਆਇਆ, ਜਦੋਂਕਿ ਆਪ ਸੁਪਰੀਮੋ ਖੁਦ ਇਸ ਸਮੇਂ ਸਿੱਖਿਆ ਅਭਿਮਾਨ ਨੂੰ ਲੈ ਕੇ ਪੰਜਾਬ ਦੌਰੇ ਤੇ ਹਨ...

ਤੇ ਇਸ ਮਸਲੇ ਨੂੰ ਕੋਈ ਹੋਰ ਰੰਗਤ ਦੇਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ

15/09/2023

ਪ੍ਰੋ ਸੁਰਜੀਤ ਤੇ ਹੋਇਆ ਹਮਲਾ ਨਿੰਦਣਯੋਗ

ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਪੰਜਾਬੀ ਵਿਭਾਗ ਦੇ ਸੀਨੀਅਰ ਪ੍ਰੋਫੈਸਰ ਸੁਰਜੀਤ ਉੱਤੇ ਅਖੌਤੀ ਵਿਦਿਆਰਥੀਆਂ ਦੀ ਭੀੜ ਵਲੋਂ ਕੀਤਾ ਗਿਆ ਹਮਲਾ ਕਿਸੇ ਵੀ ਸੂਰਤ ਵਿੱਚ ਜਾਇਜ਼ ਨਹੀਂ ਆਖਿਆ ਜਾ ਸਕਦਾ। ਇਸਦੀ ਜਿੰਨੀ ਵੀ ਨਿੰਦਾ ਕੀਤੀ ਜਾਵੇ, ਉਨੀਂ ਹੀ ਘੱਟ ਹੈ, ਕਿਉਂਕਿ ਇਸ ਸਭ ਕਾਸੇ ਨੂੰ ਰੋਕਣ ਵਾਸਤੇ ਪ੍ਰਸ਼ਾਸਨਿਕ ਪੱਧਰ ਅਤੇ ਸਰਕਾਰ ਦੇ ਪੱਖ ਤੋਂ ਕੋਈ ਕਾਰਵਾਈ ਨਾ ਕੀਤੀ ਗਈ , ਤਾਂ ਇਹ ਖਤਰਨਾਕ ਰੁਝਾਨ ਨੂੰ ਪੈਦਾ ਕਰੇਗਾ। ਕਾਲਜਾਂ ਵਿੱਚ ਕਲਾਸਾਂ ਅੰਦਰ ਵਿਦਿਆਰਥੀਆਂ ਦੀ ਗਿਣਤੀ ਦਾ ਘੱਟਣਾ ਅਤੇ ਦੂਸਰੇ ਪਾਸੇ ਆਮ ਥਾਂਵਾਂ ਤੇ ਪੱਛਮੀ ਤਰਜ਼ ਤੇ ਬਾਹਵਾਂ ਵਿੱਚ ਬਾਹਵਾਂ ਪਾਈ ਆਮ ਤੁਰੇ ਫਿਰਨਾ ਆਮ ਵਰਤਾਰਾ ਬਣ ਚੁੱਕਾ ਹੈ। ਕਲਾਸਾਂ ਅੰਦਰ ਸ਼ਰੇਆਮ ਮੋਬਾਈਲਾਂ ਦੀ ਵਰਤੋਂ ਅਤੇ ਕਾਪੀ ਕਿਤਾਬਾਂ ਤੋਂ ਸੱਖਣੇ ਆਉਣ ਨੂੰ ਆਪਣੀ ਸ਼ਾਨ ਸਮਝਣਾ ਵਿਦਿਆਰਥੀ ਵਰਗ ਵਲੋਂ ਸਾਧਾਰਣ ਗੱਲ ਹਨ। ਸ਼ਾਇਦ ਇਸਦਾ ਕਾਰਨ ਬੀਤੇ ਸਮੇਂ ਵਿੱਚ ਵਿਦਿਆ ਦਾ ਵਪਾਰੀਕਰਨ ਹੋਣਾ ਹੈ ,ਜਿੱਥੇ ਸ਼ੈਲਫ਼ ਫਾਈਨਾਂਸ ਕਾਲਜ਼ ਅਨੁਸ਼ਾਸਨ ਅਤੇ ਹੋਰ ਸਾਰੇ ਨਿਯਮਾਂ ਨੂੰ ਛਿੱਕੇ ਤੇ ਟੰਗ ਦੇ ਹੋਏ ਵਿਦਿਆਰਥੀਆਂ ਦੀਆਂ ਹਰ ਸ਼ਰਤਾਂ ਸਹਿਜੇ ਹੀ ਮੰਨ ਲੈਂਦੇ ਹਨ,ਜਿਸਦਾ ਖਮਿਆਜ਼ਾ ਦੂਸਰੀਆਂ ਵਿਦਿਅਕ ਸੰਸਥਾਵਾਂ ਅਤੇ ਪ੍ਰਾਧਿਆਪਕ ਵਰਗ ਨੂੰ ਭੋਗਣਾ ਪੈ ਰਿਹਾ ਹੈ।ਜੇ ਇਸ ਸਭ ਕਾਸੇ ਵੱਲ ਤਰੁੰਤ ਧਿਆਨ ਨਾ ਦਿੱਤਾ ਗਿਆ, ਤਾਂ ਯੂਨੀਵਰਸਿਟੀਆਂ ਅਤੇ ਕਾਲਜਾਂ ਅੰਦਰ ਪੜਾਉਣ ਵਾਲੇ ਆਪਣੇ ਅਸਲ ਫ਼ਰਜ਼ਾਂ ਨੂੰ ਤਿਲਾਂਜਲੀ ਦਿੰਦੇ ਹੋਏ ਆਪਣੀ ਪੱਤ ਅਤੇ ਜਾਨ ਬਚਾਉਂਦੇ ਹੀ ਨਜ਼ਰ ਆਉਂਣਗੇ।

14/09/2023

ਯੂਨੀਵਰਸਿਟੀ ਕਾਲਜ਼, ਲਾਡੋਵਾਲੀ ਰੋਡ ਦੇ ਸੁਖਚੈਨ ਨੇ ਯੂਨੀਵਰਸਿਟੀ ਨਤੀਜਿਆਂ ਵਿੱਚ ਮਾਰੀ ਬਾਜ਼ੀ

ਜਲੰਧਰ 14 ਸਤੰਬਰ () ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਕਾਲਜ ਲਾਡੋਵਾਲੀ ਰੋਡ ਦੇ ਪ੍ਰੀਖਿਆ ਨਤੀਜੇ ਹਮੇਸ਼ਾ ਹੀ ਚੰਗੇ ਰਹੇ ਹਨ। ਇਸ ਵਾਰ ਵੀ ਵਿਦਿਆਰਥੀ ਸੁਖਚੈਨ ਸਿੰਘ ਨੇ ਆਪਣੀ ਪ੍ਰਤਿਭਾ ਦਾ ਸਬੂਤ ਦਿੰਦਿਆਂ ਬੀ.ਵੋਕ (ਫੋਟੋਗ੍ਰਾਫੀ ਅਤੇ ਪੱਤਰਕਾਰੀ) ਵਿੱਚ ਯੂਨੀਵਰਸਿਟੀ ਦੇ ਸਮੁੱਚੇ ਪ੍ਰੀਖਿਆ ਨਤੀਜਿਆਂ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ ਹੈ । ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕਾਲਜ ਦੇ ਓ.ਐਸ.ਡੀ.ਪ੍ਰੋ.ਕਮਲੇਸ਼ ਸਿੰਘ ਦੁੱਗਲ ਨੇ ਦੱਸਿਆ ਕਿ ਕਾਲਜ ਦੇ ਸੁਖਚੈਨ ਨੇ 2400 ਵਿੱਚੋਂ 1747 ਅੰਕ ਪ੍ਰਾਪਤ ਕਰਕੇ 72.79 ਫੀਸਦੀ ਅੰਕ ਪ੍ਰਾਪਤ ਕਰਕੇ ਯੂਨੀਵਰਸਿਟੀ ਵਿੱਚੋਂ ਪਹਿਲਾ ਸਥਾਨ ਹਾਸਲ ਕੀਤਾ ਹੈ। ਪ੍ਰੋ. ਦੁੱਗਲ ਨੇ ਵਿਦਿਆਰਥੀ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਉਹ ਆਪਣੀ ਮੰਜ਼ਿਲ 'ਤੇ ਪਹੁੰਚਣ ਤੱਕ ਯਤਨਸ਼ੀਲ ਰਹਿਣ | ਇਸ ਮੌਕੇ ਪੱਤਰਕਾਰੀ ਵਿਭਾਗ ਦੇ ਅਧਿਆਪਕ ਡਾ: ਨਿਧੀ ਸ਼ਰਮਾ, ਡਾ: ਕਾਦੰਬਰੀ ਅਤੇ ਕਾਲਜ ਸੁਪਰਡੈਂਟ ਹਰਜੀਤ ਸਿੰਘ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ |

08/09/2023

ਯੂਨੀਵਰਸਿਟੀ ਕਾਲਜ ਨਕੋਦਰ ਦਾ ਪ੍ਰਿੰਸੀਪਲ ਹੋਇਆ ਲਾਚਾਰ
ਕਾਲਜ ਅੰਦਰ ਚੋਰੀ ਅਤੇ ਲੁੱਟਮਾਰ ਕਰਨ‌ ਵਾਲੇ ਕਥਿਤ ਦੋਸ਼ੀਆਂ ਦੇ ਹੱਕ ਵਿੱਚ ਆਇਆ ਖਲੋਤਾ ਨਜ਼ਰੀਂ!
ਜਲੰਧਰ 9 ਸਤੰਬਰ() ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਕਾਲਜ ਨਕੋਦਰ ਦਾ ਇਕ ਵੱਖਰਾ ਦਿਲਚਸਪ ਮਾਮਲਾ ਸਾਹਮਣੇ ਆਇਆ ਹੈ,ਜਿਸ ਵਿਚ ਕਾਲਜ ਦੇ ਦੋ ਸੁਰਖਿਆ ਕਰਮਚਾਰੀਆਂ ਵੱਲੋਂ ਖੁਦ ਹੀ ਕਾਲਜ਼ ਦੇ ਸਟਾਫ ਰੂਮ ਵਿਚ ਜਾ ਕੇ ਮਹਿਲਾ ਪ੍ਰੋਫੈਸਰ ਸਾਹਿਬਾਨ ਦੇ ਲਾਕਰ ਭੰਨਣ , ਜ਼ਰੂਰੀ ਦਸਤਾਵੇਜ਼ਾਂ ਦੀ ਚੋਰੀ ਅਤੇ ਇਸ ਸਭ ਦਾ ਇਲਜਾਮ ਆਪਣੇ ਹੀ ਇਕ ਸਾਥੀ ਤੇ ਲਗਾ ਕੇ ਉਸਨੂੰ ਮੌਤ ਦੇ ਮੂੰਹ ਵਿੱਚ ਭੇਜਣ ਲਈ ਮਜਬੂਰ ਕਰਨਾ ਹੈ। ਇਸ ਸਬੰਧੀ ਮਿਲੀ ਜਾਣਕਾਰੀ ਅਨੁਸਾਰ ਕਥਿਤ ਤੌਰ ਤੇ ਯੂਨੀਵਰਸਿਟੀ ਕਾਲਜ ਨਕੋਦਰ ਦੇ ਦੋ ਸੁਰਖਿਆ ਕਰਮਚਾਰੀਆਂ ਰਜਿੰਦਰ ਕੁਮਾਰ ਵਾਸੀ ਕਰਤਾਰ ਨਗਰ ਨਕੋਦਰ ਅਤੇ ਮਨਪ੍ਰੀਤ ਨੇ ਰਲ ਕੇ ਬੀਤੀ 21ਅਗਸਤ ਨੂੰ ਸਟਾਫ ਰੂਮ ਵਿਚ ਮਹਿਲਾ ਪ੍ਰਾਧਿਆਪਕਾਂ ਸਾਹਿਬਾਨ ਦੇ ਲਾਕਰ ਭੰਨਦੇ ਹੋਏ ਉਨ੍ਹਾਂ ਵਿੱਚੋਂ ਜ਼ਰੂਰੀ ਦਸਤਾਵੇਜ਼ਾਂ ਦੀ ਚੋਰੀ ਕਰਦੇ ਹੋਏ ਸਾਰੀ ਜ਼ਿੰਮੇਵਾਰੀ ਆਪਣੇ ਹੀ ਇਕ ਸਹਾਇਕ ਤੇ ਸੁੱਟ ਦਿੱਤੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਜਦੋਂ ਉਸ ਕਥਿਤ ਤੌਰ ਤੇ ਇਹ ਗਾਜ ਡਿੱਗੀ ,ਅਗਲਾ ਆਪਣਾ ਸੁੰਤਲਨ ਗੁਆ ਬੈਠਾ ਅਤੇ ਹਸਪਤਾਲ ਵਿਚ ਦਾਖਲ ਹੋ ਗਿਆ, ਜਿੱਥੇ ਉਹ ਅਜੇ ਵੀ ਜੇਰੇ ਇਲਾਜ ਹੈ। ਦੂਸਰੇ ਪਾਸੇ ਜਦੋਂ ਕਾਲਜ਼ ਦੇ ਪਿ੍ੰਸੀਪਲ ਨਾਲ ਇਸ ਸਾਰੇ ਘਟਨਾਕ੍ਰਮ ਦਾ ਪੱਖ ਲੈਣ ਸਬੰਧੀ ਫੋਨ ਕੀਤਾ ਗਿਆ ਤਾਂ ਉਨ੍ਹਾਂ ਨੇ ਇਸ ਸਬੰਧੀ ਚਾਰ ਮੈਂਬਰੀ ਕਮੇਟੀ ਗਠਿਤ ਦੀ ਰਿਪੋਰਟ ਆਉਣ ਤੇ ਬਾਅਦ ਕੋਈ ਕਾਰਵਾਈ ਕਰਨ ਦੀ ਗੱਲ ਕੀਤੀ, ਜਦੋਂਕਿ ਦੂਸਰੇ ਪਾਸੇ ਪ੍ਰਿੰਸੀਪਲ ਵਲੋਂ ਇਸ ਸਾਰੇ ਮਸਲੇ ਨੂੰ ਛੁਪਾਉਣ ਦਾ ਕਾਰਜ ਕਰਦੇ ਹੋਏ ਇੱਕ ਦੂਸਰੇ ਕੋਲੋਂ ਮੁਆਫੀ ਮੰਗਵਾ ਕੇ ਸਾਰੇ ਮੁੱਦੇ ਨੂੰ ਸਮੇਟਣ ਦਾ ਯਤਨ ਕੀਤਾ ਜਾ ਰਿਹਾ ਹੈ। ਜਦੋਂ ਕਿ ਦੂਸਰੇ ਪਾਸੇ ਅਪੁਸ਼ਟ ਸੂਤਰਾਂ ਤੋਂ ਇਹ ਵੀ ਪਤਾ ਲੱਗਾ ਕਿ ਕਥਿਤ ਤੌਰ ਤੇ ਇਹ ਦੋਵੇਂ ਸੁਰੱਖਿਆ ਕਰਮਚਾਰੀ ਪ੍ਰਿੰਸੀਪਲ ਨੂੰ ਵੀ ਟਿੱਚ ਸਮਝਦੇ ਹਨ ਅਤੇ ਸਮੁੱਚਾ ਕਾਲਜ ਇਨ੍ਹਾਂ ਦੇ ਹੀ ਰਹਿਮੋਕਰਮ ਤੇ ਚੱਲ ਰਿਹਾ ਹੈ।ਇਸ ਸਬੰਧੀ ਜਦੋਂ ਕਾਲਜ਼ ਦੇ ਪਿ੍ੰਸੀਪਲ ਦਾ ਪੱਖ ਜਾਨਣ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਓਐਸਡੀ ਰੰਧਾਵਾ ਵਲੋਂ ਫੋਨ ਨੂੰ ਅਟੈਂਡ ਕਰਨਾ ਵੀ ਵਾਜਬ ਨਹੀਂ ਸਮਝਿਆ ਗਿਆ।

05/09/2023

ਜਲੰਧਰ 5 ਸਤੰਬਰ () ਸਥਾਨਕ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਕਾਲਜ, ਲਾਡੋਵਾਲੀ ਰੋਡ ਵਿਖੇ ਪੋਸਟ ਗਰੈਜੂਏਟ ਪੰਜਾਬੀ ਵਿਭਾਗ ਅਤੇ ਪੱਤਰਕਾਰੀ ਵਿਭਾਗ ਦੇ ਵਿਦਿਆਰਥੀਆਂ ਵਲੋਂ ਅਧਿਆਪਕ ਦਿਵਸ ਦੇ ਮੌਕੇ ਤੇ ਵਿਸ਼ੇਸ਼ ਸਮਾਗਮ ਦਾ ਆਯੋਜਨ ਕੀਤਾ ਗਿਆ।ਇਸ ਮੌਕੇ ਤੇ ਕਾਲਜ ਦੇ ਓਐਸਡੀ ਡਾ ਕਮਲੇਸ਼ ਸਿੰਘ ਦੁੱਗਲ ਨੇ ਵਿਦਿਆਰਥੀਆਂ ਨੂੰ ਸੰਬੋਧਿਤ ਕਰਦੇ ਅੱਜ ਦੇ ਦਿਨ ਦੀ ਮਹੱਤਾ ਸਬੰਧੀ ਜਾਣਕਾਰੀ ਦਿੰਦਿਆਂ ਡਾ ਸਰਵਪੱਲੀ ਰਾਧਾਕ੍ਰਿਸ਼ਨਨ ਦੇ ਜੀਵਨ, ਉਨ੍ਹਾਂ ਵਲੋਂ ਅਜ਼ਾਦੀ ਲਹਿਰ ਵਿੱਚ ਦਿੱਤੇ ਯੋਗਦਾਨ ਅਤੇ ਸਿਖਿਆਵਾਂ ਬਾਰੇ ਜਾਣੂ ਕਰਵਾਇਆ ਅਤੇ ਵਿਦਿਆਰਥੀਆਂ ਨੂੰ ਅਨੁਸ਼ਾਸਨਾਤਮਕ ,ਜੀਵਨ ਬਤੀਤ ਕਰਨ ਤੇ ਜ਼ੋਰ ਦਿੱਤਾ। ਇਸਦੇ ਨਾਲ ਹੀ ਉਨ੍ਹਾਂ ਇਸ ਮੌਕੇ ਤੇ ਅਧਿਆਪਕ ਵਰਗ ਨੂੰ ਸੰਦੇਸ਼ ਦਿੰਦੇ ਆਖਿਆ ਕਿ ਸਫਲ ਅਧਿਆਪਕ ਉਹੀ ਹੈ,ਜੋ ਪੂਰਣ ਰੂਪ ਵਿਚ ਆਪਣੇ ਵਿਦਿਆਰਥੀਆਂ ਨੂੰ ਆਪਣੇ ਕਰਮ ਪ੍ਰਤੀ ਪੂਰੀ ਤਰ੍ਹਾਂ ਸਮਰਪਿਤ ਹੁੰਦਾ ਹੈ। ਇਸ ਉਪਰੰਤ ਵਿਦਿਆਰਥੀਆਂ ਵਲੋਂ ਅਧਿਆਪਕ ਦਿਵਸ ਦੇ ਮੌਕੇ ਤੇ ਪ੍ਰਣ ਲਿਆ ਗਿਆ ਕਿ ਉਹ ਜੀਵਨ ਵਿਚ ਮਹਾਨ ਵਿਅਕਤੀਆਂ ਦੇ ਆਦਰਸ਼ਾਂ ਨੂੰ ਅਪਣਾ ਕੇ ਨਵੇਂ ਦਿਸਹੱਦੇ ਸਥਾਪਤ ਕਰਨ ਦਾ ਯਤਨ ਕਰਨਗੇ। ਇਸ ਮੌਕੇ ਤੇ ਪੰਜਾਬੀ ਵਿਭਾਗ ਦੇ ਡਾ ਲਖਵੀਰ ਸਿੰਘ, ਪੱਤਰਕਾਰੀ ਵਿਭਾਗ ਦੇ ਮੈਡਮ ਨਿਧੀ ਸ਼ਰਮਾਂ, ਮੈਡਮ ਕਾਦੰਬਰੀ, ਮੈਡਮ ਸੁਰਿੰਦਰ,ਮੈਡਮ ਸਿਮਰਨਪ੍ਰੀਤ ਕੌਰ,ਮੈਡਮ ਪਰਮਿੰਦਰ ਕੌਰ, ਮੈਡਮ ਸ਼ਾਲੂ,ਪ੍ਰੋ. ਇਕਬਾਲ ਸਿੰਘ, ਨਿਗਰਾਨ ਹਰਜੀਤ ਸਿੰਘ, ਸੀਨੀਅਰ ਸਹਾਇਕ ਅਸ਼ੋਕ ਕੁਮਾਰ ਆਦਿ ਤੋਂ ਇਲਾਵਾ ਦੋਵਾਂ ਵਿਭਾਗਾਂ ਦੇ ਵਿਦਿਆਰਥੀ ਭਾਰੀ ਗਿਣਤੀ ਵਿੱਚ ਮੌਜੂਦ ਸਨ।ਇਸ ਮੌਕੇ ਤੇ ਡਾ ਦੁੱਗਲ ਵਲੋਂ ਕੇਕ ਕੱਟ ਕੇ ਵਿਧੀਵੱਤ ਤਰੀਕੇ ਨਾਲ ਪ੍ਰੋਗਰਾਮ ਦੀ ਸ਼ੁਰੂਆਤ ਕੀਤੀ ਗਈ।

04/09/2023

ਅਧਿਆਪਕ ਦਿਵਸ ਦੇ ਮੌਕੇ ਤੇ....

ਫ਼ਰਜ਼ਾਂ ਤੇ ਸੰਵੇਦਨਾਵਾਂ ਦਾ ਚੌਮੁਖੀਆ ਚਿਰਾਗ਼ : ਡਾ
ਕਮਲੇਸ਼ ਦੁੱਗਲ

ਗੱਲ ਕੋਈ ਜਿਆਦਾ ਪੁਰਾਣੀ ਤਾਂ ਹੈ ਨਹੀਂ...ਬੱਸ ਤੀਹ ਕੁ ਵਰ੍ਹੇ ਪੁਰਾਣੀ ਏ......ਲੱਗਦਾ ਕੁਝ ਵੀ ਬਦਲਿਆ ਨਹੀਂ...ਪਰ ਹਾਂ... ਦਾਹੜੀ ਨੂੰ ਕਾਲਾ ਕਰਨਾ ਸ਼ੁਰੂ ਕਰ ਦਿੱਤਾ...ਬੱਚੇ ਆਪ ਹਾਣੀ ਹੋ ਗਏ..... ਤਾਂ ਲੱਗਦਾ ਬਹੁਤ ਕੁਝ ਬਦਲ ਗਿਆ......
ਪਰ ਜਦੋਂ ਕਾਲਜ਼ ਆਉਂਦਾ......ਇਕ ਚਿਹਰਾ... ਤੀਹ ਸਾਲ ਪਹਿਲਾਂ ਵੀ ਉਸੇ ਤਰ੍ਹਾਂ ਉਡੀਕ ਕਰਦਾ ਨਜ਼ਰ ਆਉਂਦਾ... ਜਿਵੇਂ ਅੱਜ ਤੋਂ ਤੀਹ ਵਰ੍ਹੇ ਵੀ ਪਹਿਲਾਂ ਉਡੀਕ ਕਰਦਾ ਨਜ਼ਰ ਆਉਂਦਾ ਸੀ...... ਠੀਕ ਏ ਕਾਕਾ... ਸਮੇਂ ਸਿਰ ਕਲਾਸ ਚ' ਆਇਆ ਕਰੋ ਏਂਦਾ ਨਹੀਂ ਚਲਣਾ....ਤੇ ਅੱਜ ਵੀ ..'ਅਣਖੀ' ਠੀਕ ਏ..ਸਿਹਤ ਦਾ ਧਿਆਨ ਰੱਖਿਆ ਕਰ.... ਧਿਆਨ ਨਾਲ ਆਇਆ ਕਰ .. ਬੜੀਆਂ ਜ਼ਿੰਮੇਵਾਰੀਆਂ ਨੇ ...... ਨਿਭਾਉਣ ਦਾ ਸਮਾਂ ਏ...ਖਾਣ ਪੀਣ ਦਾ ਧਿਆਨ ਰੱਖਿਆ ਕਰ..... ਸਮਝਿਆ....ਪਤਾ ਹੀ ਨਹੀਂ ਲੱਗਾ... ਕਦੋਂ ਇਹ ਵਿਦਿਆਰਥੀ ਅਤੇ ਅਧਿਆਪਕ ਦੇ ਰਿਸ਼ਤੇ ਅਪੱਣਤ ਦੀਆਂ ਸਰਹੱਦਾਂ ਪਾਰ ਕਰ ਨਵੇਂ ਰਿਸ਼ਤਿਆਂ ਦੀ ਇਬਾਰਤਾਂ ਸਿਰਜ ਗਏ... ਜ਼ਿੰਦਗੀ ਦਾ ਕੋਈ ਅਜਿਹਾ ਨਿੱਜੀ , ਪਰਿਵਾਰਕ ਜਾਂ ਸਮਾਜਿਕ ਪਹਿਲੂ ਹੋਵੇਗਾ ,ਜਿਸਤੋਂ ਗੁਰੂ ਜੀ ਅਣਜਾਣ ਹੋਣ.. ਖੁਸ਼ੀ ਦੇ,(ਜ਼ੋ ਸ਼ਾਇਦ ਕਦੇ ਆਈ ਹੀ ਨਹੀਂ) ਜਾਂ ਉਦਾਸੀ ਦੇ( ਜ਼ੋ ਸਦਾ ਅੰਗ ਸੰਗ ਰਹੀ) ਪਲਾਂ ਦੇ ਉਹ ਸਦਾ ਗਵਾਹ ਰਹੇ ਹਨ..... ਇਕ ਨਾਮੀ ਪੱਤਰਕਾਰ ਬਨਣਾ ਜੀਵਨ ਦਾ ਸੁਪਨਾ ਸੀ, .. ਬੜੇ ਔਖੇ ਹੋ ਕੇ ਦਾਖਲਾ ਲਿਆ ਸੀ...ਗੁਰੂ ਜੀ ਨੇ ਪੱਤਰਕਾਰੀ ਦੇ ਸੰਦਰਭ ਵਿਚ ਪਹਿਲੇ ਦਿਨ ਪੰਜ ਕੱਕਿਆਂ ਦੀ ਉਦਾਹਰਣ ਦੇ ਕੇ ਕਿਸੇ ਇੱਕ ਭਾਸ਼ਾ ਵਿਚ ਸਫ਼ਲ ਹੋ ਕੇ ਸਥਾਪਤ ਹੋਣ ਦਾ ਗੁਰਮੰਤ੍ਰ ਦਿੱਤਾ ਸੀ...ਸਫਲ ਪੱਤਰਕਾਰ ਤਾਂ ਨਹੀਂ ਬਣ ਸਕਿਆ,ਪਰ ਗੁਰੂ ਹੁਣਾਂ ਦੇ ਦਿੱਤੇ ਗੁਰਮੰਤ੍ਰ ਸਦਕਾ ਪੰਜਾਬੀ ਭਾਸ਼ਾ ਦੀਆਂ ਕੁਝ ਬਾਰੀਕੀਆਂ ਨੂੰ ਸਮਝਣ ਦੇ ਲਖਾਇਕ ਹੋ ਗਿਆ...... ਫਿਰ ਵੀਹ ਵਰ੍ਹੇ ਬੀਤ ਗਏ.. ..ਤੇ ਫਿਰ ਇਕ ਦਿਨ ਵੀਹ ਵਰ੍ਹਿਆਂ ਬਾਅਦ .... 'ਗੁਰੂ ਜੀ' ... ਅੱਜ ਕੱਲ੍ਹ ਮੈਂ ਵਿਹਲਾ..ਕੁਝ ਹੋ ਸਕਦਾ.. ... ਦੂਸਰੇ ਪਾਸੇ ਸ਼ਾਂਤ ਸਮੁੰਦਰ ਜਿਹੀ ਚੁੱਪ ਸੀ....... ਫਿਰ ਦੋ ਮਹੀਨੇ ਬਾਅਦ.... ...ਜਨਵਰੀ ਮਹੀਨੇ ਦੀ ਹੱਢ ਚੀਰਵੀ ਠੰਡ... ਮੋਬਾਈਲ 'ਤੇ ਘੰਟੀ ਵੱਜਦੀ...'ਕਿੱਥੇ ਤੂੰ' ਅੱਜਕਲ੍ਹ..... ਸਿੱਧਾ ਪ੍ਰਸ਼ਨ....ਸਰ ਮੈਂ ਬਟਾਲੇ..... ਦੂਸਰੇ ਪਾਸਿਓਂ ਇਕ ਅਪਣੱਤ ਨਾਲ ਮੋਹ ਭਰਿਆ ਸ਼ੰਦੇਸ਼ ਸੀ....ਏਦਾਂ ਕਰ ਪਰਸੋਂ ਆ ਜਾ ਆਪਣੇ ਕਾਲਜ....ਬਸਤੀ ਨੌਂ ਵਾਲੇ ਨਹੀਂ.. ਲਾਡੋਵਾਲੀ ਰੋਡ ਵਾਲੇ ਕਾਲਜ਼..ਮੈਂ ਮੀਟਿੰਗ ਤੇ ਅੰਮ੍ਰਿਤਸਰ
ਜਾਣਾਂ....,... ਅਸ਼ੋਕ ਨੂੰ ਮਿਲ ਲਵੀਂ... ਕਾਗਜ਼ ਜਮਾਂ ਕਰਵਾ ਦੇਵੀਂ......ਤੇ ਫਿਰ ...ਉਸ ਦਿਨ ਅਸ਼ੋਕ ਹੁਣੀਂ ਵੀ ਖਲੋਤਾ ਸਨ.. ਮੇਰੇ ਇੰਤਜ਼ਾਰ ਵਿਚ... ...ਤੁਹਾਡੇ ਕਹਿਣ ਤੇ.., ,. 'ਆ ਗਏ ਤੁਸੀਂ'... 'ਸਰ ਕਹਿ ਕੇ ਗਏ ਹਨ' .. 'ਉਸਨੂੰ ਫੇਰਾ ਨਾ ਪਵੇ'... 'ਅਸ਼ੋਕ ਨੇ ਮਿੱਠੀ ਚਾਹ ਪਿਆਉਂਦੇ ਇਹ ਬੋਲ ਸਾਂਝੇ ਕਰਦਿਆਂ ਦੋ ਘੰਟਿਆਂ ਦੀ ਸਫ਼ਰ ਦੀ ਥਕਾਵਟ ਨੂੰ ਸੰਕਿੰਟਾਂ ਵਿਚ ਉਡਾਦਿਆਂ ਆਖਿਆ ਸੀ..'ਸਰ ਅੱਜ ਹੀ ਸਮਾਂ ਸਾਰਣੀ ਲੈ ਕੇ ਕਲਾਸਾਂ ਲੈ ਲਉ'....ਕੀ ਲਿਖਾਂ... ਸ਼ਬਦ ਮੁੱਕ ਸਕਦੇ ਹਨ ,.. ਇਬਾਰਤਾਂ ਨਹੀਂ... ਕਦੋਂ ਤੁਹਾਡੇ ਵਰਗੇ ਅਧਿਆਪਕ ਸਾਡੇ ਵਰਗਿਆਂ ਦੇ ਰਹਿਨੁਮਾ ਬਣ ਸਭ ਜ਼ਿੰਮੇਵਾਰੀਆਂ ਦੇ ਹੀ ਗਵਾਹ ਨਹੀਂ ਬਣਦੇ.....ਬਲਕਿ ਨਿਭਾਉਣ ਵਾਸਤੇ ਵੀ ਤਾਰਨਹਾਰੇ ਵੀ ਬਣ ਜਾਂਦੇ ਨੇ...ਇਹ ਮੈਂ ਤੁਹਾਡੇ ਵਿੱਚੋ ਦੇਖਿਆ ਹੈ.. ਬਹੁਤ ਕੁਝ ਸਿੱਖਿਆ ਹੈ ਆਪ ਪਾਸੋਂ..ਡਿਊਟੀ ਨੂੰ ਡਿਊਟੀ ਸਮਰਪਣ .. ਭਾਵੇਂ ਇੱਕ ਹੀ ਵਿਦਿਆਰਥੀ ਕਲਾਸ ਵਿੱਚ ਹੋਵੇ...ਕਲਾਸ ਨਹੀਂ ਛੱਡਣੀ... ਇਹ ਵੀ ਗੁਰਮੰਤ੍ਰ ਹੈ ... ਮਾਨਵੀ ਸੰਵੇਦਨਾਵਾਂ ਅਤੇ ਫ਼ਰਜ਼ਾਂ ਦੇ ਸੁਮੇਲ ਵਿਚ ਉਹ ਚੌਮੁਖੀਆ ਚਿਰਾਗ਼ ਬਣ ਸਦਾ ਰੌਸ਼ਨ ਬਣ ਆਪਣੇ ਵਿਦਿਆਰਥੀਆਂ ਦੇ ਪੱਥ ਪ੍ਰਦਰਸ਼ਕ ਬਣੇ ਰਹਿਣਗੇ,ਇਹ ਮੇਰਾ ਖਿਆਲ ਨਹੀਂ, ਬਲਕਿ ਯਕੀਨ ਹੈ.... ਅਧਿਆਪਕ ਦਿਵਸ ਦੇ ਮੌਕੇ ਤੇ ਦਿਲੀ ਸਿਜਦਾ
।

04/09/2023

ਤਰਲੋਚਨ ਸਿੰਘ ਭਾਜਪਾ ਨੇਤਾਵਾਂ ਨੂੰ ਖੁਸ਼ ਕਰਨ ਲਈ ਸਿੱਖ ਇਤਿਹਾਸ ਬਾਰੇ ਕੁਫ਼ਰ ਤੋਲ ਰਿਹਾ : ਸਰਨਾ

ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਤੇ ਦਿੱਲੀ ਤੋਂ ਅਕਾਲੀ ਦਲ ਦੇ ਪ੍ਰਧਾਨ ਸ. ਪਰਮਜੀਤ ਸਿੰਘ ਸਰਨਾ ਨੇ ਪ੍ਰੈਸ ਨੂੰ ਜਾਰੀ ਇਕ ਬਿਆਨ ਵਿਚ ਘੱਟ ਗਿਣਤੀ ਕਮਿਸ਼ਨ ਦੇ ਸਾਬਕਾ ਮੈਂਬਰ ਤਰਲੋਚਨ ਸਿੰਘ ਨੂੰ ਆੜੇ ਹੱਥੀਂ ਲੈਂਦਿਆਂ ਦੋਸ਼ ਲਗਾਇਆ ਹੈ ਕਿ ਬੀਤੇ ਦਿਨ ਭਾਜਪਾ ਦੇ ਕੌਮੀ ਪ੍ਰਧਾਨ ਅੱਗੇ ਇੱਕ ਸਮਾਗਮ ਵਿੱਚ ਬੋਲਦਿਆਂ ਜੋ ਮਾਸਟਰ ਤਾਰਾ ਸਿੰਘ ਬਾਰੇ ਤੇ ਅਕਾਲ ਸਹਾਏ ਫੌਜ ਬਾਰੇ ਤੇ ਹੋਰ ਗੱਲਾਂ ਕਰਦਿਆਂ ਤਰਲੋਚਨ ਸਿੰਘ ਨੇ ਕੁਫ਼ਰ ਤੋਲਿਆ ਹੈ । ਜਿਸ ਨੂੰ ਸੁਣ ਕੇ ਹੈਰਾਨੀ ਹੋਈ ਕਿ ਕੋਈ ਬੰਦਾ ਭਰੇ ਇਕੱਠ ਵਿੱਚ ਏਨਾ ਝੂਠ ਤੇ ਤੱਥਾਂ ਨੂੰ ਤੋੜ ਮਰੋੜ ਕੇ ਪੇਸ਼ ਕਰਨ ਦੀ ਹਿੰਮਤ ਕਿਵੇਂ ਕਰ ਸਕਦਾ ਹੈ ।

ਸ੍ਰੀ ਸਰਨਾ ਨੇ ਦੱਸਿਆ ਕਿ ਤਰਲੋਚਨ ਸਿੰਘ ਨੇ ਬੋਲਦਿਆਂ ਇੱਕ ਤੇ ਇਹ ਝੂਠ ਬੋਲਿਆ ਕਿ ਵੀਰ ਸਾਵਰਕਰ ਦਾ ਕੇਸ ਮਾਸਟਰ ਤਾਰਾ ਸਿੰਘ ਨੇ ਲੜਿਆ ਸੀ । ਜੋ ਕਿ ਸਰਾਸਰ ਕੋਰਾ ਝੂਠ ਹੈ । ਆਪਣੇ ਗੱਲ ਨੂੰ ਸੱਚੀ ਸਾਬਤ ਕਰਨ ਲਈ ਤਰਲੋਚਨ ਸਿੰਘ ਨੇ ਇਹ ਦਾਅਵਾ ਵੀ ਕੀਤਾ ਕਿ ਉਸ ਸਮੇਂ ਦੀਆਂ ਅਖਬਾਰਾਂ ਤੇ ਤਸਵੀਰਾਂ ਮੌਜੂਦ ਹਨ । ਜਿਸ ਕਰਕੇ ਇਹ ਚੁਣੌਤੀ ਦਿੰਦਾ ਹਾਂ ਕਿ ਉਹ ਇੱਕ ਵੀ ਅਖਬਾਰ ਪੇਸ਼ ਕਰਨ ਜਿਸ ਵਿੱਚ ਸਪੱਸ਼ਟ ਹੋਵੇਂ ਕਿ ਮਾਸਟਰ ਜੀ ਨੇ ਸਾਵਰਕਰ ਦਾ ਕੇਸ ਲੜਿਆ?
ਇਸਦੇ ਨਾਲ ਹੀ ਦੂਜਾ ਝੂਠ ਤਰਲੋਚਨ ਸਿੰਘ ਨੇ ਵੰਡ ਮੌਕੇ ਅਕਾਲੀ ਆਗੂਆਂ ਤੇ ਪੰਥ ਦਰਦੀਆਂ ਵੱਲੋਂ ਸਿੱਖਾਂ ਦੇ ਗੁਰਧਾਮਾਂ ਤੇ ਜਾਨ , ਮਾਲ ਦੀਆਂ ਰੱਖਿਆ ਲਈ ਬਣਾਈ ਗਈ ਅਕਾਲ ਸਹਾਏ ਫੌਜ ਨੂੰ ਜੋ ਆਰ. ਐਸ. ਐਸ ਨਾਲ ਜੋੜਿਆ ਹੈ । ਉਹ ਨਿਰਾ ਕੁਫ਼ਰ ਹੈ । ਅਜਿਹੇ ਕਹਿੰਦੇ ਹੋਏ ਤਰਲੋਚਨ ਸਿੰਘ ਨੂੰ ਸ਼ਰਮ ਆਉਣੀ ਚਾਹੀਦੀ ਹੈ । ਇਹ ਜਥੇਬੰਦੀ ਸਿੱਖਾਂ ਨੇ ਨਿਰੋਲ ਆਪਣੇ ਪੱਧਰ ਤੇ ਬਣਾਈ ਸੀ ਤੇ ਇਸਨੇ ਆਪਣੇ ਪੱਧਰ ਤੇ ਕਾਰਜ ਕਰਦਿਆਂ ਸਿੱਖਾਂ ਦੇ ਜਾਨ , ਮਾਲ ਦੀ ਹਿਫਾਜਤ ਕੀਤੀ । ਸਰਨਾ ਨੇ ਦੱਸਿਆ ਉਨ੍ਹਾਂ ਦੇ ਪਿਤਾ ਜੋ ਕਿ ਖੁਦ ਇਸਦਾ ਹਿੱਸਾ ਸਨ । ਉਹਨਾਂ ਇਹ ਸਾਰੀਆਂ ਗੱਲਾਂ ਖੁਦ ਉਨ੍ਹਾਂ ਨੂੰ ਦੱਸੀਆਂ ਹਨ ਤੇ ਇਤਿਹਾਸ ਦੇ ਤੱਥ ਵੀ ਇਹੀ ਕਹਿੰਦੇ ਹਨ, ਪਰ ਚਾਪਲੂਸੀ ਕਰਦਿਆਂ ਤਰਲੋਚਨ ਸਿੰਘ ਇਸ ਹੱਦ ਤੱਕ ਡਿੱਗ ਗਿਆ ਕਿ ਉਸਨੇ ਇਸ ਜਥੇਬੰਦੀ ਨੂੰ ਵੀ ਆਰ . ਐਸ . ਐਸ ਨਾਲ ਮਿਲਕੇ ਚੱਲਣ ਵਾਲੀ ਜਥੇਬੰਦੀ ਕਿਹਾ ਜਦਕਿ ਉਸ ਵੇਲੇ ਤੱਕ ਪੰਜਾਬ ਵਿੱਚ ਆਰ . ਐਸ . ਐਸ ਦਾ ਕੋਈ ਨਾ ਥਾਂ ਵੀ ਨਹੀ ਸੀ ।

ਤੀਜਾ ਝੂਠ ਤਰਲੋਚਨ ਸਿੰਘ ਨੇ ਇਹ ਬੋਲਿਆ ਕਿ ਮਾਸਟਰ ਤਾਰਾ ਸਿੰਘ ਨੂੰ ਸਾਵਰਕਰ ਦੀ ਮੱਦਦ ਕਰਨ ਦੇ ਕਾਰਨ ਕੇੰਦਰ ਸਰਕਾਰ ਨੇ ਜੇਲ੍ਹ ‘ਚ ਸੁੱਟਿਆ, ਜਦੋਂ ਕਿ ਸਾਰੇ ਜਾਣਦੇ ਹਨ ਕਿ ਜਦੋਂ ਮਾਸਟਰ ਤਾਰਾ ਸਿੰਘ ਨੇ ਸਿੱਖਾਂ ਨਾਲ ਵੰਡ ਤੋਂ ਪਹਿਲਾਂ ਜੋ ਵਾਅਦੇ ਕੀਤੇ ਗਏ ਸਨ । ਉਹਨਾਂ ਨੂੰ ਪੂਰਾ ਕਰਨ ਲਈ ਆਵਾਜ਼ ਉਠਾਉਣੀ ਆਰੰਭ ਕੀਤੀ ਤਾਂ ਪੰਥ ਤੇ ਪੰਜਾਬ ਦੇ ਹਿੱਤਾਂ ਦੀ ਆਵਾਜ਼ ਬੁਲੰਦ ਕਰਨ ਦੇ ਬਦਲੇ ਉਹਨਾਂ ਨੂੰ ਜੇਲ੍ਹ ‘ਚ ਸੁੱਟਿਆ ਗਿਆ ਸੀ ।
ਤਰਲੋਚਨ ਸਿੰਘ ਨੇ ਬੇਸ਼ਰਮੀ ਨਾਲ ਇੱਕ ਤੋਂ ਵੱਧ ਇੱਕ ਝੂਠ ਬੋਲਕੇ ਭਾਜਪਾ ਤੇ ਸੰਘ ਦੇ ਆਗੂਆਂ ਦੀ ਨਜ਼ਰ ਵਿੱਚ ਆਉਣ ਲਈ ਚਾਰਾ ਕੀਤਾ ਹੈ । ਇਹ ਸਭ ਕਰਕੇ ਭਾਵੇਂ ਸਰਕਾਰ ਤੋਂ ਉਸਨੂੰ ਕੋਈ ਬੋਟੀ ਪੈ ਜਾਵੇ , ਪਰ ਸਿੱਖਾਂ ਦੀਆਂ ਨਜ਼ਰਾਂ ‘ਚੋਂ ਉਹ ਪੂਰੀ ਤਰ੍ਹਾਂ ਹਮੇਸ਼ਾ ਲਈ ਡਿੱਗ ਗਿਆ ਹੈ ।