18/12/2022
MATCH REPORT : 'Magic Man' Messi leh a naute an CHAMPION
FIFA World Cup 2022 chu khelh zawh a ni ta, final inkhel hmuhnawm takah Lionel Messi khelhna Argentina chuan champion lai France chu penalty hmanga hnehin a vawi thum nan World Cup nomawi an chawi a, k*m 36 hnuah La Albiceleste hi champion lehin; Brazil, Italy leh Germany tih lova champion hnem ber an ni.
Final inkhel hmuhnawm takah hian minute 79 thlengin Argentina chuan si hnih faiin hma an hruai a, game thunun viau mah se football hi chuan ken tel a ngah tlat! France chuan minute 3 chhung lekin siphurh an sut a, si hnih ve ve inpein minute 90 chhunga an inhnehtawk avangin extra time khelh ngaiin an awm.
Extra time khelh a nih hnuah 'The Magic Man' Lionel Messi chuan Argentina tan pet goalin minute hnih chauh awm tawhah France tan Kylian Mbappe chuan penalty ațanga pet goal leh bawk a, si thum ve ve inpein an inhnehtawk a, penalty hmanga chak zawk tur zawn a ni. Penalty hmanga chak zawk tur zawnah Argentina vannei zawkah ţangin World Cup nomawi an chawi ta a ni.
Argentina 3-3 France(AET)
- Lionel Messi(P) 23', 109', Di Maria 36'
- Kylian Mbappe(P) 80', 81', (P) 118'
(Penalty Argentina 4-2 France)
Lionel Scaloni chuan Quarter final leh semi finala hmun chang phak lo Angel di Maria chu bul ţan turin a thlang a; Marcos Acuna pawh leftback-ah thlang zet mah se Nicolas Tagliafico hmangin a thlak leh. Didier Deschamps chuan an țhat ber dan tura a ngaih angin player XI a thlang ve bawk a, rinlawk loh thlan a nei lo.
Argentina XI : Martinez; Molina, Romero, Otamendi, Tagliafico; De Paul, Enzo Fernández, Mac Allister; Di María, Messi, Julián Álvarez
France XI : Lloris; Koundé, Varane, Upamecano, Theo Hernandez; Griezmann, Tchouaméni, Rabiot; Dembélé, Giroud, Mbappé.
Lusail Iconic Stadium-ah hian Polish referee Szymon Marciniak enkawlna hnuaiah inkhelin Argentina chuan bul an țan țha zawk a; minute 6 lekah Mac Allister chuan 25yard vel ațangin Hugo Lloris a enchhin a, Les Blues captain tan man a harsa lo.
Minute 17-ah Copa America hero Angel di Maria chuan chance țha tak ho angreng takin a hlah a,Argentina chuan France an nawr bet zel. Minute 21-ah Di Maria chuan penalty hlawhchhuakin Ousmane Dembele chuan titlu a, penalty hi Lionel Messi chuan Hugo Lloris dive lohna lamah petin Argentina chuan hma an hruai.
Minute 36-ah Argentina bawkin goal ropui an thun leh a, an teamwork țhatzia counter attack hmangin an lantir a; France țhiatin Mac Allister siamsak ațangin Angel di Maria chuan si hnih faia hma an hruai nan a pet goal. Goal an thunna tura Lionel Messi, Alvarez leh Mac Allister ball inpe vel chu final atan chuan entute tan duhthusam a ni.
Didier Deschamps chuan an game thlak danglam turin subtitution a siam thuai a; Marcus Thuram leh Kolo Muani dah lutin Olivier Giroud leh Dembele a lachhuak thung. First half chhungin France an insiamrem thei lova, Argentina goalah shot an nei ve lo!
https://www.facebook.com/infiamnarunpui
Second half-ah pawh Argentina bawk an langsar hmasa leh a, minute 49-ah Rodrigo de Paul volley chu Hugo Lloris chuan a man sak. Minute 58-ah Julian Alvarez chuan chance neiin Hugo Lloris an a dansak leh bawk.
Champion chaka tuihal Argentina an taima a, France tlarhnung tan hna an siam zeuh zeuh. Minute 70-ah France tan Kylian Mbappe kan hmu a, mahse goal kham chung lamah a pet thung! Minute 72-ah Argentina chuan nawr let lehin Enzo Fernandez shot chu Hugo Lloris chuan a save leh bawk.
Minute 79-ah Nicolas Otamendi chuan Kolo Muani a check hneh loh tuarin penalty a chawi a, Kylian Mbappe chuan minute 80-ah penalty pet goalin; France an phur thar a, goal an thun lehnghal.
Minute 81-ah Argentina tlarhnung țhiatin Marcus Thuram siamsak chu Kylian Mbappe chuan World Cup-a goal 7-na leh he inkhela goal hnihna thunin siphurh a rul a, Mbappe țhatzia kan hmu ta.
Si phurh an sut hnuah Argentina an bet tual tual a, Didier Deschamps chuan Antoine Griezmann leh Theo Hernandez aia mual lai tichak tura Camavinga leh Kingley Coman a dah luh an chhawr țangkai a, Argentina lamin Di Maria aia Marcos Acuna lut an tuar zawk tih a lang bawk. Minute 90 zawh hnuah minute 8 hun pekbelh a ni a, Adrien Rabiot shot chu Martinez chuan țha taka save-in, Argentina an him hram a; minute 1 chauh awm tawhah Lionel Messi shot țha tak chu Hugo Lloris chuan a save sak bawk. Minute 90 chhunga an inhnehtawk avangin extra time an khelh a ngaiin an awm.
Minute 105-ah Argentina chuan France tlarhnung țhiatin Lionel Messi siamsak chu bench ațanga lut Lautaro Martinez chuan awlsam takin a pet goal dawn emaw tih hnuah Upamecano chuan a block sak a, hemi hnu lawk hian Martinez bawk hian chance țha nei zuiin Lloris chauh a hmachhawn hnuah goal ban pawn lamah a pet thung!
Minute 107-ah Lionel Messi shot chu Hugo Lloris chuan a save sak a, minute 109-ah France chuan Argetina nawr let an dawl zo lova; Lautaro Martinez shot Hugo Lloris save per chu Lionel Messi chuan pet goalin Argentina chuan hma an hruai. Minute 118-ah Kylian Mbappe shot chu Gonzalo Montiel chuan a kiua a dan avangin penalty a chawi a, Kylian Mbappe chuan penalty chiang taka pet goalin siphurh a sut a; inkhel a hmuhnawm rep rep hle.
Minute 120 zawh hun pekbelhah Kolo Muani chuan Martinez chauh hmachhawn mah se Martinez hian World Class save a nei a, Argentina ropui takin a chhanhim. Argentina hian nawr let ve nghalin; Lautaro Martinez chuan ho takin a head a, Argentina fan tan chuan Lautaro Martinez hi theihnghilh a harsa tawh viau maithei! Goal a luhbelh tawh loh avangin penalty hmanga chak zawk zawn a ni.
Penalty hmanga chak zawk tur zawnah Argentina tan Lionel Messi, Paulo Dybala, Leandro Peredes ten pet goalin France tan Kylian Mbappe, Kolo Muani ten pet goal mah se a vawi hnihna leh vawi thumnaa pet Kingsley Coman pet Martinez an a save hnuah, Tchouameni chuan goal ban pawn lamah petin, Argentina Gonzalo Montiel chuan pet goal zuiin Argentina chuan hnehna an chang ta ani..
