27/12/2024
Tiluk/China nih a Ser Thar mi a Stealth Jet a Langhter
===================================
Minung nih monghmi sixth-generation stealth raltuknak vanlawng a ser thar mi China nih a langhter. Mah hi vanlawng thar a sining hi a dang Chinese sixth-generation vanlawng he an sining ai khat ngai ko rua.
A ser tharmi vanlawng hi mei a ngei lo i, Shenyang Aircraft Corporation nih an sermi a si. A hmet zong a hme deuh ngaingai, ti a si.
Mah cu vanlawng cu Chengdu J-20S he hmunkhat ah an zuanter. A hmun le a caan theihfian a si lo in, J-20 a langh ve caah Chengdu Aircraft Corporation pawngkam si dawh cu a si.
Hi vanlawng hi mongtu pahnih maw pakhat thutnak ai ngeih mi a si ai thei lo. J-20 muisam cu a keng ngai. Asinain, mei a neih lo caah, China nih next generation a vanlawng pawl hi mei ngei lo in ser i tim cang sehlaw a dawh. 2021 October ah khan CAC sehzung ah mei ngei lo vanlawng pakhat satellite nih hman a thlak bal. Diamond pungsan a si i, J-20 he an muisam ai lawhnak a tam ngai.
US nih cun a Next-generation vanlawng pawl mei a ngeihter dih hna. A ruang cu radar tlaih har deuh seh, ti an duh caah a si. Cun speed in vanlawng a zuan tikah a mei nih hin tampi a tthing khawh ti a si. Asinain khat lei kap ah mei ngei lo vanlawng hi a hnu hmai ai herh tikah a buai ngai te lai. Cu tutan vanlawng ah hin meitha chuahnak engine an benhnak a lang lo. Mah bantuk engine nih hin vanlawng a takpum hi a tuam tawn. YF-23 bantuk in a si awk a si, an ti.
Mei ngei lo, a hme fawn, a musiam ai dawh, a ciankhan dawh a si, asinain zeitluk in dah radar a hrial khawh, ti cu theih fian khawh a si rih lo. A muisam le J-20 he ai khat ngai fawn, asinain mei le a ngei lo i, mil lung piin a um. Asinain J-20 nakin radar a hrial khawh deuh lai cu zumhraih a si theng lo, mei a va ngeih theng lo zongah.
Mei ngei lo a si tikah a thla pakhat ah vanlawng mei i an bunh tawnmi control system 5 cio an bunh. Mei a ngeih lo ruang i vanlawng a pumpi control tuahnak dingah an bunh mi a si. Vanlawng a tum a kai tik i control nak ca zongah a si.
A hmet le ngan ah cun J-20 tia hrawng a si. J-20 hi pe 70 a sau. A thla pahnih i a tumnak dear zong hi ai phundang ngai. A pum hi a ngan ngaingai caah, zinan le hriamnam tampi a tlum lai, ti a fiang.
A keng zawnah hin thli a luhternak ai ngeih. Cun a paw lei zongah mah bantuk cu pahnih ai ngeih hna. Cucaah hi vanlawng hi engine 3 i ngeih sehlaw a dawh. J-20 ah an hmanmi WS-10C turbofans 3 i ngeih sehlaw dawh in an chim. Biatak te ral a tuk tikah ai tinhmi kheng kho dingin le khurang tein zuang kho dingin le cungsannak zong thatein cawlcang kho seh, ti an duh caah a si.
China nih raltuknak vanlawng sixth-generation ser ai tim peng, tiin Air Fore Gen. Mark D. Kelly (retired) nih 2022 ah khan a rak chim bal. Kanmah US nih the sixth-generation vanlawng kan i ngiat bantuk tein China zong nih ai ngiat ve. Anmah le an design tein ser an i tim. Amah belte cuhlan an vanlawng chirhchan in vun tharchuah vial lawng khi a ti khawh lai, tiin Kelly nih a chim.
Cun a tu lio an i ngeihmi stealth vanlawng pawl nak thadeuh dingin an tharchuah te lai. Tutan an langhtermi vanlawng hi raltuknak caah an sermi maw a si, asiloah a dang vanlawng thar ser an duh caah hneksaknak ca i an sermi dah a si, ti theih khawh a si rih lo. Nai hrawnghrang cu China nih hin minung nih monghmi vanlawng pawl heh tiah a hniksak i, tutan vanlawng zong hi a dang raltuknak vanlawng thar ser a duh ruang i neksaknak ah a hmanmi a si kho men.
JH-XX an ti mi bomber program hi China nih a thuhnawh rih mi program a si. Tuan ah khan cun Shenyang Aircraft Corporation (SAC) hi JH-XX caah rian a tuanmi a si i, mah ka ah cun J-20 zong an rak i hmaithlak bal. Hi company hi Chengdu he ai zuamcawh ngaimi an si.
Mah hi vanlawng hi US ser NGAD pungsan he i khat ngai sehlaw a dawh. A muisam hi drone he ai i lo. Asinain NGAD program belte cu a tu lawlawse an dinhter rih i, dinter thai zong a fawite. Asinain Trump cozah tang belte ah phundang in thilsining ai thleng kho mi a si.
Zapi hmanthlak khawh dingin China nih a vanlawng a zuantermi zoh tikah vawlei pi nih hmu hna seh, ti a duh cu a fiang.
Hi vanlawng kong hi tam theih a si rih lo nain, a pum a ngantuk ve caah radio le radar tlaih fawite si sehlaw a dawh. A pungsan zoh tikah le engine 3 ai ngeih caah cung sangpi tiang zuang kho sehlaw a dawh. Cun lam hla pi tiang zuang kho sehlaw a dawh fawn. Cuhlan ah mah bantukin lampi ah zinan ram hau ti lo in voikhat zuan ah saupi a zuang kho mi vanlawng hi China nih a ser kho bal lo.
Cu tikah, vanlei, tanglei ah a ummi target pawl caah ttihnung a si kho i, cun US tankers, vanlawng phurtu hei ti bantuk pawl caah ttihnung a si kho. Cun raltuknak tilawng le thohhlanzi vanlawng pawl ca zongah ttihnung a si kho. A muisam hi drone he ai lawh ngai caah, a thazaang thawnnak le ral pawl a ngaitthlai khawhnak a thazaang hi tuahtamh fawite sisehlaw a dawh.
Phundang in chim ah cun, mah bantuk vanlawng a um hi ralrin hau ngai cu a si. Hi vanlawng a min hi J-36 tiin min pe hna sehlaw a dawh. Asinain biafiang theih a si rih lo. A thla ah 36 ti ai tial caah a si. J-35 nakin a thadeuh, ti langhter nak a si kho men.
A hmur zawn ah hin awng pahnih an um i, pakhat hi cu thlalangawng, pakhat deuh cu RF sensor si dawh a si.Crd..Chelsae Bawi
Cun J-20 bangin hriamnam chiahnak ai ngeih. A mei lei ah hin a khan an dangmi 18 hrawng a lang.
