20/12/2020
બે દિવસ પહેલાં ફેસબુક પર એક પોસ્ટ જોઈ હતી. તેમાંથી આ સ્ટોરીનો આઈડિયા આવેલો. એન્જિનિયરીંગ પાસ એક યુવકે ઓફર કરવામાં આવતા ચણાંમમરાં જેવા પગારથી કંટાળી જઈને પોતાનો ટી સ્ટોલ શરૂ કર્યો હતો. અમદાવાદનાં સુભાષબ્રીજ પાસે નારણઘાટ નજીક તેનું આ સાહસ જોવાની મને તરત ઈચ્છા થઈ આવેલી. ખાસ તો તેનો આ ધંધા માટે આત્મવિશ્વાસ કેવો છે તે મારે જોવું હતું. બપોરે પહોંચ્યો છતાં સારી એવી ભીડ હતી. મોટાભાગનાં યુવાનો હતાં. રોનક રાજ નામનો યુવક તેનાં ભાઈ સાથે ચા સર્વ કરતો હતો. મેં તેને મારા અહીં આવવાનું કારણ જણાવ્યું. તે રાજી થયો. પછી તેની કહાની જાણી. જે અહીં રજૂ કરું છું.
શાહરૂખ ખાનની ‘રઈસ’ ફિલ્મનો એક ડાયલોગ છે, ‘કોઈ ધંધા છોટા નહીં હોતા, ઔર ધંધે સે બડા કોઈ ધર્મ નહીં હોતા..’ શક્ય છે આ વાત જેટલી બોલવામાં સરળ લાગે છે તેટલી વાસ્તવિક જિંદગીમાં નહીં હોય. કેમ કે બહુમતિ લોકો ધંધાની પસંદગી પોતાની શૈક્ષણિક લાયકાત અને સામાજિક હોદ્દાને ધ્યાનમાં રાખીને જ કરતાં હોય છે. આજેય ઉચ્ચ શિક્ષીત યુવાનોને અમુક પ્રકારનું કામ નાનું લાગે છે તેની પાછળ આ સિવાય બીજું કોઈ કારણ નથી. જો કે અમદાવાદનાં મેઘાણીનગરમાં વસતાં રોનક રાજ નામનાં ઈલેક્ટ્રીકલ એન્જિનીયર યુવાને ચાની કીટલી શરૂ કરીને સૌને આશ્ચર્યમાં નાખી દીધાં છે. પાંચ વર્ષ પહેલાં એન્જિનીયરીંગનું ભણીને તેણે નોકરીની શોધ શરૂ કરી હતી. પણ કંપનીઓ તેને જે પગાર ઓફર કરતી હતી તે ચણાંમમરાં જેવો હતો. કંટાળીને તેણે સરકારી નોકરીની તૈયારીઓ શરૂ કરી. અનેક સ્પર્ધાત્મક પરીક્ષાઓ પાસ કરી. પરંતુ ત્યાં પણ તેને લાઈનમાં ઉભા રહેવા સિવાય કશું ન મળ્યું. આખરે તેણે ‘એન્જિનીયરની ચા’ નામે પોતાની કીટલી શરૂ કરી દીધી.
એન્જિનીયરની ચાનાં સ્ટોલ પર ચા તો સરસ મળે જ છે. સાથે બીજી પણ કેટલીક બાબતો છે જે તેને અન્યો કરતાં યુનિક બનાવે છે. અહીં તમને દરરોજ સવારે અંગ્રેજી અને ગુજરાતીનાં તમામ જાણીતાં અખબારો વાંચવા માટે મળી જશે. આ સિવાય એક નાનકડું પુસ્તકાલય પણ છે, જેનો અહીં ચા પીવા આપતાં ગ્રાહકો પોતાના રસ પ્રમાણે ઉપયોગ કરે છે. આજે એક તરફ દેશમાં સેંકડો લોકો કોરોનાની અસર તળે પોતાની નોકરી ગુમાવી ચૂક્યાં છે. બીજી તરફ શિક્ષિત બેરોજગારીનો સતત ઉંચો ચડતો જતો ગ્રાફ અને ખાનગી કંપનીઓ દ્વારા ઓફર કરવામાં આવતો પગાર યુવાવર્ગને નિરાશ કરી રહ્યો છે. ત્યારે આવી કપરી પરિસ્થિતિમાંથી કેવી રીતે રસ્તો કાઢવો તે રોનક જેવા સાહસિક યુવાનો જ સમાજને શીખવતા હોય છે. જરૂર હોય છે માત્ર જાત પર વિશ્વાસ કરીને તેનાં પર અમલનું સાહસ ખેડવાની.
જો તમને મારું કામ ગમતું હોય તો ચેનલ સબસ્ક્રાઈબ કરો, સ્ટોરી ગમે તો લાઈક કરો, કમેન્ટ કરી તમારો પ્રતિભાવ જણાવો, મિત્રોમાં શેર કરો.
સ્ટોરી Theuntouchedstory દ્વારા..
Subscribe, Share and support our Channel. Follow us here : https://www.facebook.com/theuntouchedstory1Twitter: ...
