Rwbailwng

31/12/2023

KOKBOROK KOKLOP BATAIMUNG 2024

KOKLOP SWIWI TONGNAI SIKLAROKNI BAGWI KOKTWMA KAHAM. NINI KOKLOP DIARY O SIMI SWIWI TONIYAWI LUKUNOBO PHUNUKDI TEI O BATAIMUNGO KWRWNGHORDI.

PARTICIPATE KHWLAINA BAGWI,
TINI NI SIMI 20 FEB 2024 JORA
20 LINES NI BISINGO DOC. FILE O KOKLOP ROHORNANI EMAIL [email protected]

05/06/2023

∆Koklob∆

HABUGWRA
Andrew Debbarma
Rangbo naiya rangchakbo san ya
Nwng koinene sakno kungchuk ya,
Buj soino twinai Bubagwra nwng
Saui sabai ya nini hamjakmung.
Dophani bagwi langma se rinai
Nini khairokma thwiyasak tongnai;
Hani bwsano birmano nugwi
Kwlaina nang kha nini le muktwi!
Hani bwsano hamjakma bagwi
Nini bwkhao khakchangma kwrwi,
Muktwi choromwi nwngle kabjao,
Chini lachimung nwngno yachago.
Haiphano nini khaduma pai ya──
Sakni dopha se nono sini ya!
Chwngno naikolo hamjakma bagwi
Nwng wng kha twiphang kubui.
Nini biyal tamo wng kha ba?
Tongthok-chathokno nwng le nai liya;
Hani bwsa se komorna naijak
Nwng de tei abono naithokjak?
Yakar kha nwng le sakni tongthokno
Hani bagwi se chobani lamo,
Kha kuphur nini, chwngno twithero
Chini thinangno nwng le wansugo....
Paithakni chobao yapri rw kha :
Greater Tipraland sanmung tubu kha.

16/05/2023

Kokrwbaino hamjagwi chajagwi chini Rwbailwng kokborok kokrwbai bwlaio swimung rohornai joto mare kiching songno khapang kupulung hamjakma tei chibai yapharo.Joto swimung rohornairok norokni writer's copy naharnani chaitokdi. Rwbailwng kokrwbai bwlaino nangjaknai rokbo khamao rijak kukduk eba WhatsApp numbaro kwrwngwi mano.paithago haino hai saphiro jotono jotono writer's copy naharnani chaitokdi.

Kokduk/whatsapp:- 8119048097

Hambai,
Rwbailwng.

15/05/2023

2050
(A reverie)
️ Suprachita Debbarma

Dogalam ani malkhung borong,
Maikhulaibw ani chamung borong,
Chaui chabaiya,tongui tongbaiya,
Nokhungnw ani aswk hamari kuplung.
Omor brwicharni ang ungjak,
Sai ani bachi Omorni,
Hamjakma haparo halok tongthok chini.
Sajwk ani nwichi Omorni,
Khumbarhai naithokjak goron bini.
Sajwla ani chidok omorni,
Rwngswrwgni haparo kwlwkui
Khorok choksajak bini.
Dogalam onkhur lama himmani
Khetw awarsi kwrwi,nokkuchuk si kung nangtwi.
Aswk mami mai hamtwi hamkha Wansugui khaosi ma tongthoksio.
Harpek sagw nangnai kwrwikha,
Sak kolomtwibw khikwlainai kwrwikha,
Boini sak saka bebak tongthok,
Jantrapati si samung khulaisio.
Aswk naithok,tongthok hayung,
Tesa aisiyok naiphinai hinui
Dibor Mai chai kisa thumaleh,
Sichaisi buji sio, erengsi aboh kubuiya
Emang bising ni wansukma si,
Tabukbw ani omor nwichisanw,
Nokhungbw makhaiya khu!!
Engreji bisi ni 2023si,
Emangni 2050phaiyakhu.

08/05/2023

Rwbailwng page ni bagwi khamao rijak email eba WhatsApp numbero no khagwnag swinai swinaijwk songni swimung rohorwi mano.

Hambai,
Rwbailwng.

08/05/2023

Sal kwdwkma romwi Rwbailwng pageo Koklop, Koktang, Kokbwkhal akorok phiyokjakya wngwi tongkha. Khagwnang swinai-swinajwk songno kobokjao norokni swimung rohornani bagwi.

Hambai,
Rwbailwng.

31/03/2023

Tini 31 march 2023 Bijab tero Rwbailwng Kokborok Kokrwbai bwlai phiyogwi rijakkha. Je naharna muchungwi tongnairok Bijab tero thangwi naharwi mano. Morok wngkha 55 aboni bising norok 50 khe naharwi mano.

21/03/2023

Hayung Koklop sal rwgwi Koklop panda khwlaikha Rangchak Richak Foundation

12/03/2023

Tokthusa

Asha Mani Jamatia

Khakwlab pheharwi
Bwkwrang phehelwi
Yang waisa ayang waisa
Kobonwi naio
Okhui mano poknani
Ransajak khapangno
Khakwchang rwnani
Oh bukchano supung nani,
Khamchuru rutukmang rutukmang
Kangkhung ruai sukha
Awarni maichwlwi bukubuk
Rutukmang rutukmang
Mokol ruai sukha,
Yachingno sengsa
Yachingno dasa
Hayung gwdalwi
Tongnani bagwi
Ada erwi chamang
Yaching chamsukha
Suchigwi chamang
Khuk ruai sukha.

06/02/2023

RWBAILWNG
A YEARLY LITERARY MAGAZINE OF RWBAILWNG
ISSUE 1,
Khajani swikwrwngsong tai kwtal swinairok norokni koklop,koktang,kothomabwsa,
Kokbwkhal akorok khamani email eba kokdukgo Docs file swnamwi rohornai bagwi kobokjao.

Email:[email protected]
Kokduk,
8119048097+9366503219
7085591263

29/01/2023

Yachakdi

Kripasindu Debbarma

Yachakdi yapharwi tongo,
Phiyaba thaisa thaisa khagwi ta khibidi.
Bale bangthaya,
Khanobo aswk swrangrwi manya,
Haiphano yachakdi yapharwi tongo.

Khabaino bedogo,
Kaham hamya hinwi,
Yachakya ta tongdi.
Anile kha kwlai,
Koiwi ang thangnaise,
Nwng yachakya hinkhe.

Khapangni thaio,
Torriui, lokriui, bwthai thaisa thainwi manma.
Yachakya ta kardi.
Mokolni nukmungo sitwra wngwimano,
Bwkhani nukmungole kahamse.
Ani yapharmungno,
Nwng yachakya ta wngdi.

26/01/2023

Khapangni swinai tei swinaijwkrokni bagwi kaham koktwma.
Norokni swimungno Kokrwbai Bwlaio sapokna muchungwi tongkhe mangpilio rijak kokduk numbero haiyakheba emailo jani jani swimung rohorwi mano.

Hambai

21/01/2023

Phil brwichiba kokborok sal luajikha Jorani khorang tulashikhok amchai oh panda ni kisa mangpli.

05/01/2023

MWCHWKMWNG
UDAI MANIK TRIPURA

Mannale mwchwkgu khani borok no
Sanale mwchwkgu khani kok no
Runale mwchwkgu ani kha nono
Kwmana kiriui saya ang nono

Hamya jora o runale mwchwkguloge nono
Phiya nwng chajak gwlak hinui saya khao tonio
Sal kwrwi tal chwngya twi
Nwng kwrwi ang chwng manya

Nokha kwrwi chwmwi kwrwi hai
Nwng kwrwi ani langma kwrwi hai
Sanale mwchwkgu kha ni a kokno
Sana hinkhe nono gana nangano

Ani a imang sabo no sasi nai
Sana borok le manlia gana
Nini mangphili no naiui wansokgo
I hayung o nwng kwrwi ang tmo khai nai…?

02/01/2023

Miya 1st January 2023 Ingraji Bisi Kwtalni salo Khumulwngni Khurio Koklop porima panda songchajakkha.
O pandano luajikha Swikwrwng Narendra Debbarma, Komthingnai, Jorani Khorang.
Tei kwbangma Sir, Madam, Ata aibi, sikla, sikli, mwnaisong tei kwbangma koklop, koktang, kothoma, kokrwbaino hamjaknai dophani borokrokbo chini i pandao phaiwi jora riphaikha.

Hambai,
Khakchangkha,
Jorani Khorang Ayuk Lokthun
🙏

30/12/2022

*Sakwlaimung*

Kokborok kokrwbaino hamjaknairokni bagwi belaino koktwma kaham. Rwbailwng kokborok kokrwbai Bodolni official FB page-o Koktang, Koklop, Kothoma bwsa, Kokbwkhal akorok phiyokjagwi tongo. Rebailwng kokborok kokrwbai Bodolni official FB page-ni bagwi khapangni swikwrwngrok norokni swimung rohorna muchungwi tongnairokno khamao rijak E-mail eba WhatsApp numbero MS word tei Doc khwlaiwi rohornani bagwi kobokjao.

Email:[email protected]
WhatsApp:-8119048097.


Koboknai
Rwbailwng kokborok kokrwbai bodol

*HAMBAI*

21/12/2022

*****Koklop*****
|| Achugwi Ta-tongbaisidi ||
~By~Kusumsa Tripura.

Jora kwrwikha phaibaisidi chalairog
Phaibaisidi Achugwi Ta-tongbaisidi.
Bachai phaidi lampra o tiyar wngwi
Jora naisingya lerwi Ta-tongbaisidi.
Swkang yapri senani chengphaidi
Satok-pitok khaijagwi busuk tongsinai kechen?
Tabukle chwngbo tongliya buini tolao.
Chini amani kok kokborok kokno,
Nok burum-brum tunsukna nanganw.
Twisa twi thejaktoi dim dim ta-tongbaisidi!
Kha phurui bachai phaisidi kubui lamao.
Swmai tangwi, khorokgo risa soroi,
Yago homchang twiwi nongkhorbaisidi.
Tapokdi nirok chini Rangchakni haano
Tapokdi nirok chini swmaino, muitu khwlaidi.
Kokno kiyoksa rwnai khapang kha riwi
Chaplaina nanganw kokma kokthairokno.
Jotto kuthumoi bosongno mwthangdi
Hani arino twiwibo chwng bolaina nanganw.
Oroi,Poroi wngjak dophano sochadi
Palkhe yapri sewi haano nana khwlaidi.
Khanga yak sungoi,thongla kochoyoi
Mok-mok nayoi tatongbaisidibachadi.

20/12/2022

***Maa-phaa kwrwi ni birman***
Swinai:-Lordjen Debbarma

Duksa songdari buduk
Kok sao tini bolong bisingo.
Toktu baoi phung mani,
Kukuruku khorang
Khwnao bolongni waphang bugang.
Kwrwi kha tini ani sakolom
Sokjagui thapla chakha.
Amani maya tini kwrwi kha,
Kha khamjak bwkha rwtwgo nono ama
Aswk de chaloi thang kha;
Hor kuthukni imango ama
Uaisaswk nwng phaina ba,
Thangnai logio nini.
Lama lamkolok haduk duk kolok
Himna ang lengya tini.
Lama lamkolok saisung himnase,
Bwkhani kiri mani.
Nwng kwrwini se
Mokolni mwktwi ramya ranya ani.
Baba ni yak romwi lama himmani
Oh sal rokno moito mankhe,
Bwkha phate naio ani!
Maa-phaa kwrwini,
Bui sathok jakmani.
Ani kokno seja thani oh,
Khukse koroya buini.

17/12/2022

Muito mano
Kashmir Debbarma

Muito mano
Bisinwi bisitham swkang ni kokrok
Oh jora nwng samani kokbiti
Nukhungni hamjwk kanani kokrok.
Gana rekeui mwkhang o nini mwnwima
Kakya khwlaui
Ani dukhu horwi twimani
Jadu oh sal kwrwikha.
Salsa swmai tanglaima
Goriya ni salo_
Chwng kwnwi baba goria no khulumwi
Thansa ni nukhung khanani chongwi.
Biko swmai
Kwmakha, chumui kobolbaikha oh salrok
Nwngbo ih chumuio no munuisuru suru
Kwtal khakulu hai kwlwi tal ni logi.
Aswk hachal ang nwng bai
Chumui bai ha tola
Ringbo ring bo khwnaiya ani khorang
Nuhorliya aswk hachal chumuio tongma bai,
Ang bo nuhorliya nini kaya maya goron
Haikhe saka naisa mang sal laio, hor wngo
Khao ruwaimang.

15/12/2022

'''''Koklop'''''
Birman

Chwngle achaikha tipra hao
achuklai tongo ama ni khurio,
Obo no wng kha omthai thwi kwlai mani ha
Wansugwi manya atwi wnganw hwnwi tipra ha.
Saboni swraimung ba nangkha
buino solyakhe birman manlaina nangkha!
Siya hwnwi khuksa bai twmani aswkhe
satok jakna nangkha twmani chwngkhe?
Maitwk twksani maino chalai tongjao chwngle
Kok kaisa kha baksa wngwi manya twmani chwngle,
Thansa khe tong nani rwngya chwngle
birman man nani nang khwna haino bagwino tipra hani sarokle..
Twma khwiyo ba kwcha laikha
yogwi manlai liya
twma yakhilik ba songcha laikha kasai manlai liya..
Khuk kupulung swraimung swbani
buphuru komor sinai birman chini
paiphwlaiya liya birman hani
bwsa hwnwi sinijagwi tong nai rokni..
Swba ba khwna nai swlwkma khorang chini
swba ba yachak nai mokolni mwktwi chini..
Swinai :- Asha Mani Jamatia

14/12/2022

*****Koklop*****

Kami amchaini hati
Swinai :- Lordjen Debbarma.

Kami amchaini hati
Kisa beraoi naidi,
Juwa bai kupulung tini.
Brwichuk bura naiya, sikla cherai siya,
Tomungsi naidi boni.

Kami amchaini hati
Kisa beraoi naidi,
Kupulung phekjaknai manui bai tini.
Nuganu khuk sitra salai mani;
Okhra cberai naiya saknangya wnglaimani.

Kami amchaini hati
Kisa beraioi naidi,
Aphuru nuganu hatini
Manui khwnwi morok baimani.
Kwrwi kha agini tongkwchang chakwchang
Tongmung chamung rok chini
Kami amchaini hatiobo
Uro-muro wngnani chengkha tini.

07/12/2022

Thansa

~ Sania Debbarma

Chwng Tiprasa,
Tipra hani bwsa.
Tamo Hindu, tamo christian,
Tonglayanw chwng joto kha thansa.
Naithok sitwra, kaham hamya,
Jotono tongjao chwngle miliwi.
Nini ani hinlayawi,
Kwrwi gwnang khaklayawi.
Tonglainai chwng joto baksa,
Chwng Tipra hani bwsa.

21/11/2021

KHANI HATI
-Kapiram Tripura

Sabo painai tong?
Pai phaidi ano
Angle morokya
Hati morok phano,
Rangchak-richak
Nangwlak kunu phano
Phiya swmai marwnai
Yak romwi ano
Supungnai hwni ani o
Bwkcha bohokno.

Sabo painai tong?
Pai phaidi ano
Maya kupulwngbai
Hamjagwi simino.
Chini swmai ongnai
Thwiyasakni puito
Khani halokno swlaiwi
Kwlangnai muito
Sabo painai tong
Pai phaidi ano
Khale kahamno ani
Goron sitra phano.
-----------------x-----------------

07/11/2021

BUBAGRANI HAMJAKMA
- Pradip Rupini

Wansukma kaisa nasikmung thansa
Basima kwrwi hamjakma bini jotono baksa.
Chongkhereng ahai bini khale
Basiya nini palino nugwi bole
Nawi nohorya bini hamjakma paithakni ari
Swngsaro kwrwi sonani mari.
Langma kuphungjak mwnakni khwio
Buchukubuk chungwi phaikha
Naharwi naikhe nugano langmani chati nungle
Swngsarno taknai tongsak
Tongnai logio hamari bini bini bwsarok tongsak
Tekto hinma saboni bagwi
Nini bagwi da na ani bagwi
Phiyokjaknai lama busulung tongnai
Thinangni lama tektoba tongnai
Sal tongkhle hagiri tongo.
Tal tongkhle athukiri tongo
Twisa tongkhle twikhreng tongnai
Mwnak tongkhle pohor tongnai.

05/11/2021

Khani Busu
~Espan Debbarma

Hor salno nasikna jora manya
Buphurubo sikhok haikhe lawi thangbaio
borog khorang khailangbaina
Tophano ang kubunio kwmangjak.

Khao khatungma kuplung simi
Tei Janga bisingni Tokhai
Bwkrang saharwi birna muchungjak
Phiya jora kebengwi bachao.

Jora Tabuk bebagono thabeng thabeng
Kokthai kholna naikhe
Bomtomno chukli riui kebeng rio
Koktang koklop thaisa ethoknaphano
Jora sao tabukya.

Haikheno angbai halok Chaljak
Kokthai kholna, tongthokma, lenama.
Risi nangjakmahai
Koklop kothoma ano muitu khailiya.

Bising bising
Masing hapdropni Siyari
Khano teibo hilik rio
O jora sikla khapangno unok rio
Phiya jora orobo kebengjak
Jorani pherwi bebak tongwibo kwrwihai.

25/10/2021

KOKBOROK GRAMMAR (KOKBOROK KOKMA)



PAGE 1 =
* Mungswlai tamo?
* Mungswlai dalbwswk tong?

PAGE 2 =
* Mungswlaini dalno phunukmari riwi swidi.

23/10/2021