https://www.facebook.com/100640206106867/

Hatal Kokborok Kokrwbai Bodol

Home
India
Agartala
Hatal Kokborok Kokrwbai Bodol

A Yearly Literary Magazine in Kokborok

05/03/2024

Bisiburum burumni haino takwlai bisibo 'Hatal Kokborok Kokrwbai Bodol'bai komthingwi karijagwi tongma 'Hatalni Boyar' kokrwbai bwlai karijakphinai. O kokrwbai bwlaio norokni swimung Kokbwkhal, Kothoma, Koklob akorok sapokna muchungwi tongkhai 31st March 2024 salmarini bisingo khamani nikumao rohorlaibaidi.

19/01/2024

Norokni khapangni 'Hatalni Boyar' (Issue 2, 2023) kokrwbai bwlai naharna muchungwi tongnairok rang Khokbachi (50/-) baino tinini simi Khumpui Bijap Karima Nok phalnogo naharwi manbainai. Kha khwlaio Khumpui Bijap Karima Nok phalnogo thangwi chini 'Hatalni Boyar' kokrwbai bwlaibai kwrwngwi norokni hamjakmung riwano hinwi.

Tongthok Philbrwichidok Kokborok Kok Gosijakma Salni jotonono khapangni hamjakma tei chibai yapharo.

23/12/2023

THANSA
– Kilian Debbarma

Hindu Muslims Christian Buddha
Chwng jotoise kaisa
Chwng jotono thansa.

Rangchak hayungni twima bai twisa
Yaksi yagwra kochok tongnaisa
Malainai borok waisa.

Bedekbai bosok kaklaide manba
Bwlaibai bubar wade walaiba
Yaphangse bini kaisa.

Bukur bwchwlwi swrap tongyabo
Bahanno chaoi khipna hinwibo
Bwthaise bole thaisa.

Sabokhe nokni sabokhe buini
Chwng jotono thansa
Chwng jotono Tiprasa.

25/11/2023

ANI KHORANG KHWNANAI KWRWI

– Kusumsa Tripura

Turui turui ganatwi thango
Kok golok golok salaiwi
Bisi sni-chi kothoma kwchamno
Bupha -bwslano sao.

Khao kok tongwibo
Siring siring khugo kok kwrwi
Sana muchungwibo sawi manya
Buba hai khuk supjak.

Philik phalak ani ganatwi
Norokle thango ano nasigwi
Salangya ano kok thaisabo
Angle tongjao norokno naharwi.

Kebo logi ringna kwrwi
Kebo logi tuinai kwrwi
Aichai phuruni simi larum sujak hai
Sai sai bisi romwi thulung thulung bachawi.

Mokol tongwibo, nukya hai
Khunju tongwibo, khwnaya hai
Khuk tongwibo, khorang pasaya
Angle 'Holong' tei 'Rojong' manghai wngjak.

13/11/2023

'Hatalni Boyar' kokrwbai bwlai phiyokmung pandani koklam

13/11/2023

Tini Tangsal 13th Nov 2023 salmario 'Hatalni Boyar' Kokrwbai bwlai Hatal Kokborok Kokrwbai Bodol (HKKB)-ni habanogo phiyogwi rijakkha. O phiyokmungni pandao komthingnairokno khobwi manjak phaikha Hatal Kokborok Kokrwbai Bodolni adong Bishu Debbarma, Boyar Debbarma, Arnal Debbarma akosong.

10/11/2023

Phainai Tangsal 13th Nov 2023 salmari sajorani Damchinwi (12pm) jorao Hatal Kokborok Kokrwbai Bodolbai bisiburum burumni haino takwlaibo komthingwi karijak 'Hatalni Boyar' kokrwbai bwlai komthingnai Subendhu Debbarmani nogo (Colonel Chowmuhani, Supari Bagan Road, First Goli, Krishna Nagar, Agartala, Tripura) phiyogwi rijaknai. O phiyokmungni pandao joto swikwrwng tei mani kok Kokborokno hamjaknairokno phaiwi manjaknani bagwi chwng chini kokrwbai bodolni bwkhaktwi koihorjao.

06/10/2023

Kokborok kokrwbaino hamjaknairokni bagwi belaino koktwma kaham. Thangnai bisini haino takwlai bisibo bisiburum burum 'Hatal Kokborok Kokrwbai Bodol' (HKKB)-bai komthingwi karijaknai 'Hatalni Boyar' kokrwbai bwlai phainai November talo karijakphinai. Aboni bagwi joto amani kokno hamjaknairokno choyaui logi riui tongnani bagwi koijao.

15/07/2023

Kokborok koktang swinai swikwrwngrokni mungbwtang khamao phunukjagano–

1. Bangshi Thakur
2. Ajit Bandhu Debbarma
3. Shyamlal Debbarma
4. Rabindra Kishore Debbarma
5. Chandrakanta Murasingh
6. Narendra Debbarma
7. Sabita Debbarma
8. Uttam Debbarma
9. Utpal Debbarma
10. Anita Debbarma
11. Sudhanya Tripura
12. Sudhanya Debbarma
13. Nityananda Debbarma
14. Kamalia Debbarma
15. Biplab Debbarma
16. Dharinjoy Tripura
17. Kunjumohan Debbarma
18. Babul Debbarma

Sakao khursajakrok koktang swikwrwngrokno karwibo Kokborok kokrwbaio teibo koktang swikwrwngrok tongwi mano. Aborokno naitugwi mankhai ulni salo phunukjakphirnai.

16/06/2023

HATALNI BOYAR kokrwbai bwlaino porina muchungwi tongnairok Tripura University-ni Library Periodical Section khotolo poriui manbainai. Khagwnang kokno hamjaknai khapangni logisong jotono nailaijabaidi.

09/06/2023

HALOKNI LAMAO HIMLAIMA
–Andrew Debbarma

Holokni yapiri barok doropsikhu
Lama duwari bwskango bwswk rimibo wngno!
Tabuk bwkha bisingo yarwng surnani jora
Khapang raplaima kophon hwnkhwlai
Swrapsa jorani bisingode lam pherwi thangno?

Omoba tamo chengdorobsikhu
Ayang nokha mwnagwi somsai phaiyanw
Watwi lukhwlai phuirang kokphuru
Khapangni nukhungno rutukna nangganw.

Imang nukkhwlai mukthangni salno naisingdi
Tabuk imang sichwlasikhu,
Puito thwinani tabuk joraya
Mwnak harungse laiwi manyakhu.
Busulwng kwchartwi himwi tongphuru
Yapha chwlaio busu panaino,
Harep rekeui thangna nangphuru
Rojongo yakung usta khunaino,
Phiya sak soidi, bwkha tabeldi.

Omoba tamo kwthwi harungde?
Panthor kuthugo mwnak sampili
Monoba laiwi thangna nangyade?
Rangchakni sal naisingwi tongo
Aro tongthokma nobar dubui dubui sibjak;
Langmani khakama bebak imang nukmani
Mukthang khwlainani lamano him.
*****

02/02/2023

ELEM
–Jesmin Debbarma

Nwngle sakni morok manwi
Phobwi hui tonwimanya
Borokno sinimung riwi chwnarwnai bo nwngno
Yathekno busu bai katirwnaisa
Lama kororwya yaphangni buchuk twlangnai
Manmarino kubunno pirna sep rwnai
Bwkhwrwi no bubar kiyokrwi babwrai swnamnai
Mwnak o chati mwchwngnai
Nono manyawi sabo khorok tisai himwi mannai tong
Mokol tongbo palino side sinikhamu
Nwng tongwise borok wngwi langma nahana rwngsio.
*******

01/02/2023

ANG ANGLIYADE
–Sachlang Debbarma

Bamwrai bai Hathairai kung sulaiwi batailaio
Saboni sai saboni bisi lok hinwi
Abohaikhaino sal thangu hor phaio.
Tabuk noksu kunao achugwi mokjak
Ani nokni rondok tei aroni mailuma.
Bisingo bukurung saka simi naithothok.

Ani sakni mwtai nongkhorwi thangkha
Aphuru kisa aphuru kisa khaiwi
Bahan swkakjakmang swkakjakmang
Mangkhong simi kereng kurung tabuk.

Kuchuk tolinghai wngwi mankhaile
Nokha gwnangwi pisarwi rikhamon
Jaduni ragini khorangbai ani sinimungno
Ani hani sinimungno kung tisa rere khaiwi.
Tabuk ani bebak swlaijak,
Mwkhang swlaijak, bukung swlaijak
Swlaijak bebak sakmang
Tamo ang angliyade tamo!

Ani hani motom twilwlwk bahai
Tabuk biyangbo kwmai thangkha.
Ang sak kwrwi, mwkhang kwrwi,
Kereng kurung mangkhongno twiwi
Naitugu twisa toksa toksa
Bororogoda teisa manphirno hinwi.
******

31/01/2023

ANI HAPING SAKAO
–Kashmir Debbarma

Haping chuksorosoro
Pungo toksa chaksoro
Dakti thanglaina nanganu
Tiyar wngdiba dodoro.

Halap hapung kewawang
Nango nobar kwswrang
Bwswkse kha swrang
Taisi
Khwnao tokthu toksani khorang.

Naisingwi naidi aisiri siri
Haping bwkhak
Kwlai tongo
Phungni siyari.
Pohor chwngsaui mwchangwi tongo
Aichukni athukiri.

Phung aima logi logi
Thui bwchakha
Hapingni toksa tokmili.
Birsaui thangkha
Nokhani saka
Sampili simi riui
Haping ni saka.
Iko–
Haping sakao
Mwchangwi tongkha
Naisigwi naidi
Gairing.
Nobar nangmani saui kul paiya.

Ri borok kanwi ri borok chumui
Tak borok chumui cha kothok chaui
Samung tanglaio
Ani takhuksong ani bukhuksong.
Khorogo pakiri
Chango pudiri
Khaui
Tongthogwi tanglaio, tonglaio samungni ari.

19/01/2023

Kokborok kokrwbaino hamjaknairogni bagwi belaino koktwma kaham. Thangnai bisini haino takwlai bisibo bisiburum burum 'Hatal Kokborok Kokrwbai Bodol' (HKKB)-bai komthingwi karijaknai 'Hatalni Boyar' kokrwbai bwlai karijakphinai. O kokrwbai bwlaio norogni Koktang, Koklop, Kothoma, Khothoma Bwsa, Kokkhal akorogno sapokna muchungwi tongkhai 20th January 2023 salmarini simi 15th February 2023 salmarini bisingo khamani nikumao rohorlaijadi.
Email :-
[email protected]
WhatsApp :-
✴️ 9366241295 (Prijesh Debbarma)
✴️ 7005671982 (Rostam Debbarma)
✴️ 9366156231 (Dhiman Debbarma)
✴️ 9366243155 (Subendhu Debbarma)

06/01/2023

MUITU KHWLAIDI NWNG ANO
– Boyer Debbarma

Tiniya khwna, khwnaya soni
Salsa malaikhai, salsini wngnai
Muitu tonithai khani kokno
Nwng kwrwi kha kwmao
Muitu khwlaithai nwngle ano.
Jalailwngo angle tongjakkha
Phiyoknai nwngno, nono chongkha
Chopjakma thaio, nwng phiyogwi
Khao hamjakma manwi,
Wansukte wansukte hamjakma paiya
Bubar barsa nono riui
Nini hamjakma ang manwi
Khao muitu tongo bubarno.
Sakni sampili nono ruktharwi
Bubarno khao chobwi
Kitinglwlwk nini goron
Haiphano,
Hamjakkha ang tangwi?
*****

05/01/2023

KIYOKNA JORA
– Kwplai Debbarma

Khumbar kiyokkha
Bahai motomkha.
Biyang thangbaikha
Takhuk bukhukrok?
Hachuk beserni khumbo kiyokkha
Motom bahaino sar saui rikha.
O bubakrok o bedekrok
Rakbai sidi norok.
Twimani holong kochok thangmahai
Ta kochok sidi norok.
Sal kiyokkha jorabo phaikha
Motom bahaino pirsaui rinani.
*****

02/01/2023

∆∆ Koklop ∆∆
AMANI KOK
Kashmir Debbarma

Kokborok kok ani amani kok
Saui tonglaima kothoma kolok
Khunjubai khwnaui swrango bwkha
Kokno tongo kwtwi kwkha.
Ama rimani rigwnai risa
Phaidi chwng kanwi nayano kisa.
Amani kokno chwng salainai swkang
Pohorhai kwchwng swnamnai amani mwkhang
Ulo yapharwi rinai bwskangni achaisongni thani
Borokse thinang chini.
Ama rimani chokhani khwtwng
Ama hukni tubuma muikwthwng
Chanai chwng tini, chathai kothok tongo chini.

Chini kokthaio tongo kwcham hukumu mukumu
Tei waisa bubar bartwi swnamnw phududu khumu.
Amani rigwnai risa kanwi
Khapangni durao borom manwi
Amaba swrangjano khakchangma manwi.
Kokni yarwng torsakha twrwk twrwk
Dasabai tanbo choliya dwrwk
Khapango wansugwi ta nangdi swrwk swrwk
O ani khapangni tipra yalwk.

31/12/2022

SIKILI JORA
– Bubar Debbarma

Bisi kwtal jora maphale tongna muchungjago
Kurum kuthum nukhung khungsa,
Angbo tongna muchungo kurum kuthumkhe
Bwkha sikiliba angbo tongthok tongna muchungo.

Sikili bwkha buma buphani muchung mano
Supungwi manya borokni naimano
Muchungo angbo ma-phabai tongnani.
O sikili bwkhanoba sabo bujinai?

Aswkda ani bwkhaba holong wngkha
Ma-phani muchung mano bujiya!
Bisi kwtalni jora ma-phani bwkha
Swbaina muchungya dukhubai.

Tongwino thangna muchungo angbo
Naithothok khwlaiwi ma-phabai
Bisi kwtal jora kurum kuthum mwnwiwi
Phiya ani bagwi wngliya naithothok bisi kwtal!

30/12/2022

HATAL KOKBOROK KOKRWBAI BODOL-bai Komthingwi karijak HATALNI BOYAR kokrwbai bwlai chini khachuksa Boromgwnang EM Mg Suhel Debbarmano yaphartwi chini Kokborok hamkwraini kokno twiwi salaima. Yapharthani tongo HATALNI BOYAR kokrwbai bwlai komthingnai Rostam Debbarma, Swinai Sahil Debbarma tei Boyar Debbarma.

30/12/2022

THWIYASAKNI
– Badal Tripura

Mokolbai nono nugwi
Bwkhabai nono chajakkha.
Bwkhabai nono chajagwi
Khani ario thai rikha.
Khani ari thai riwi
Halok manjwkha nwngbai.
Halok manjwi nwngbai
Yakhwrai bokha thansa.
Yakhwrai bowi yapri sekha kaisa.
Yapri sewi langma tongsakni ari bokha.
Langma tongsakni ari bowi
Thwiyasakni halok bokha.
*****

28/12/2022

**KAMI**
– Aichuk Debbarma

Toksa tokmilini khorang phungni nobar
Mwchangwi tongo kamini tongkhor
Pha thango al juwaina, ama thango mai rana
Chwrairokni yago sokjak maidul
Bwrwichwk burarokni yago duma
Achwi mai tugo rwchapmungbai diborni.
Twimani a puthi thok kwrwi baja chaise naidi moja
Sariphang ochai batijago rwchapmungbai
Mamita ter khwlainani chwngle khabai khukbai.
Sarik sanja kuthumlaio chokdirini nokhwla
Ker mwtaino suwailainani chwngle,
Kami chokdirini kokbai chwngle yapri selaio
Kamio tongthok chathokni boyar sibwi tongo.
Tabukle sabo sisi chokdirini borom
Komorna naikha hoda hukumuni borom
Dongoima dongoiphani kerang kothoma
Tabukbo tongkhu kwthang chini laibuma.
Sichadi takhuk khorang ridi bukhuk
Laibumano komorna rigwlak chwng tabuk.

27/12/2022

NOROKNI HAMARI
– Bijoy Ram Tripura

Chwng siyano sirukha,
Chwng nukyano nukrukha.
Sakni kolomtwi khiklaiwi,
Hakchal hakchalni phaiwi.

Bwsani mayano chwngno rogwi,
Sakni bebak simano chwngno rogwi.
Tisakha chwngno elem kwrwng,
Tisakha chwng sikwrwng-nukwrwng.

Norokni phorwngmabai,
Norokni swrwngromabai.
Kebo wngkha doctors, kebo scientists,
Kebo wngkha engineers tei kwbangma officers.
Kebo wngkha thinangno naikolnai,
Norokno rwngswrwngnairokni lamaronai.

Thinangno chwngsa ronanibo norokni yaktwi,
Rwngswrwngnairokno elemgwnangkhe tisananibo norokni bisingtwi.
Joto phwrwngnairokno paiphwlaiya hambai
Chwngno langma kwtal romanibai.

24/12/2022

RISA
– Boyer Debbarma
Sarik sal hapkhe saindani khorang khwnahoro
Hachugo thangbo motomjak bahai
Harep thangbo motoma bahai
Tamoswk motom wngkha jani.
Sakni goronbai nwngle mwchangjak risa
Khorogo sorwibo chwnajak risabai
Bwchango khabo chwnajak risa
Risani bumulno nugwi hamjakma phaio khao.
Yago risabai khawi mwchangjak
Chwnajakya mungsa kwrwi risabai
Lamao himbo risano twiwi
Pogwi manya risani bumulno.
Khorogo pakuri sorwi
Muktwrwi thangyabo thangthothok
Risano logi twiwi.
Habarbo mwchangjak, goron chwnajak
Maitwram thangphuru risano twiwi
Risa belai naithok, belai mwchangjak
Thaimani thaikuchuk, thaimanibo baitwtwi
Risabai khawi narwkkhe tongrwknai khaobo.
Thaimani thaikiting, bwlai loksisi
Haiphano risano hamjago ang
Chango risa khawi tongnani.

23/12/2022

-:SAKWLAIMUNG:-

Kokborok kokrwbaino hamjaknairokni bagwi belaino koktwma kaham. HATAL KOKBOROK KOKRWBAI BODOL official FB page-o Koktang, Koklop, Kothoma bwsa, Kokbwkhal akorok phiyokjaknai. HATAL KOKBOROK KOKRWBAI BODOL official FB page-ni bagwi swimung rohorna muchungwi tongnairokno khamao rijak E-mail eba WhatsApp numbero MS word tei Doc khwlaiwi rohornani bagwi kobokjao.

E-mail:-
[email protected]

WhatsApp:-
8974482627

HAMBAI.

07/12/2022

HATALNI BOYAR
₹ 60/- (40% Off)

Norokni khapangni HATALNI BOYAR kokrwbai bwlai naharna muchungwi tongnairok rang Khokdokchi (60/-) khwlaiwi KHUMPUI BIJAP KARIMA NOK phalnogo naharwi manbainai. Kha khwlaio KHUMPUI BIJAP KARIMA NOK phalnogo thangwi chini HATALNI BOYAR kokrwbai bwlaibai kwrwngwi norokni jotoni hamjakmung mannano hinwi.

29/11/2022

HATALNI BOYAR
₹ 60/- (40% Off)

Norokni khapangni HATALNI BOYAR kokrwbai bwlai naharna bagwi khamani nikumao kwrwngjadi.

- 7005671982
- 9366156231
- 9366241295
- 9366243155

27/11/2022

Chasal 26th November 2022 salmario HATALNI BOYAR Kokborok kokrwbai bwlai Swikwrwng Dr Bijoy Debbarma bai Swikwrwng Narendra Debbarmani yaktwi Rwbai Nogo phiyogwi rijakkha. Pandao phaiwi manjak phaikha Swikwrwngjwk Shyamali Debbarma tei All Tripura Kokborok Media Forum-ni President Swikwrwng Samir Debbarmano khobwi joto manikok Kokborokno hamjaknai sikla chalairog.

27/11/2022

Hatalni Boyar kokrwbai bwlai phiyokma pandao dophani bagwi kokkwcharkha Swikwrwng Narendra Debbarma.

Address

Agartala

Website

facebook.com

Alerts

Be the first to know and let us send you an email when Hatal Kokborok Kokrwbai Bodol posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Hatal Kokborok Kokrwbai Bodol:

Videos

'Hatalni Boyar' kokrwbai bwlai phiyokmung pandani koklam

Hatalni Boyar kokrwbai bwlai phiyokma pandao dophani bagwi kokkwcharkha Swikwrwng Narendra Debbarma.

Hatalni Boyar kokrwbai bwlai phiyokmung pandao Kokborok hamkwraini bagwi kokkwcharkha Swikwrwng Dr. Bijoy Debbarma.

'Hatalni Boyar' Kokborok kokrwbai bwlai phiyokma pandao Hatal Kokborok Kokrwbai Bodol ni Ojama Swikwrwng Subendhu Debbarma Kokrwbai bwlai phiyokjakmani kokbothomano saui khwnarikha.