18/06/2025
इरान र इजरायलका नेपालीलाई सरकारको पाँचबुँदे आह्वान, जान चाहनेलाई के भनियो ? (पूर्ण पाठ)
इजरायल र इरानबीचको पछिल्लो द्वन्द्वलाई मध्यनजर गर्दै सरकारले त्यहाँ रहेका नेपाली नागरिकलाई उच्च सतर्कता अपनाउन आग्रह गरेको छ । परराष्ट्र मन्त्रालयले बुधबार एक सूचना जारी गर्दै इजरायल र इरानमा रहेका नेपालीका लागि पाँचबुँदे र ती दुई देश जान लागेका नेपालीका लागि दुईबुँदे आह्वान गरेको हो ।
हाल कतिपय मुलुकहरूले आफ्ना नागरिकलाई इजरायल र इरान छोड्न अनुरोध गरेका छन् । सुरक्षाका दृष्टिकोणले अधिकतम सतर्कता अपनाउनुपर्ने अवस्था रहेको भन्दै परराष्ट्र मन्त्रालयले तोकेको समय र स्थानमा बाहेक घर वा बंकर/ सेल्टरबाट बाहिर ननिस्कन आग्रह गरेको छ । यसका साथै त्यहाँको सरकारले जारी गरेका सुरक्षा सतर्कता, यात्रा, आवागमन तथा सुरक्षित स्थान सम्बन्धी सूचना, मापदण्ड तथा जानकारी निरन्तर रूपमा लिन र पालना गर्न आग्रह गरिएको छ । नेपाली समुदाय र राजदूतावाससँग नियमित रूपमा सम्पर्कमा रहन पनि मन्त्रालयले आग्रह गरेको छ ।
संकट आइपरेमा उद्दार तथा सहायता र ट्रेकिङ गर्न सहजताका लागि परराष्ट्र मन्त्रालय, कन्सुलर सेवा विभाग र नेपाली राजदूतावास, तेल अभिभको वेवसाइटमा राखिएको अनलाइन लिंक रजिस्ट्रर गरी आफ्नो विवरण फाराम यथाशीघ्र भर्न पनि मन्त्रालयले आग्रह गरेको छ । साथै सरकारले अहिलेको अवस्थामा नेपालबाट इजरायल र इरानको भ्रमण नगर्न पनि आग्रह गरेको छ ।
स्वेच्छाले नेपाल फर्कन चाहने नेपाली नागरिकका लागि हाल इजरायल र इरानको हवाइमार्ग बन्द रहेका कारण तेश्रो मुलुकहुँदै नेपाल फर्कनु परेमा तेश्रो मुलुकको ट्रान्जिट भिसा लिनुपर्ने अवस्था आउन सक्ने भएकोले यसका लागि सहजीकरण गर्न आवश्यक पहल गरिने पनि मन्त्रालयले जनाएको छ । परराष्ट्रले इजरायल र इरानबीच विकसित घटनाक्रमलाई नेपाल सरकारले नजिकबाट नियालिरहेको र त्यहाँ रहेका नेपाली हालसम्म सुरक्षित रहेको जानकारी समेत दिएको छ । साभार शिलापत्रडटकम
हेर्नुहोस् सूचना :
