23/12/2025
WANAAG IYO XUMAAN WARKA AAD BAAHISO ADIGA AYAA KA MASUUL AH ADUUN IYO AAKHIRABA !!
Marka laga hadlaayo dagaal ay dad ku dhinteen qaar kalena ku dhaawacmeen, dadka caadiga ah oo ay ku jiraan qaar baraha bulshada u adeegsada in ay ku faafiyaan xogta ay helaan waxay ku go'aan qaataan hal mar oo ay warka ka maqlaan hal qof lkn saxaafadu sidaas maaha.
Suxufigu hadii aanu goobjoog ahayn dhacdada waxa uu ku bixiyaa dedaal badan. Sobobta oo ah xogta uu tebinaayo k**a qaadan-karo il keliya. Xataa hadii uu helo masuulka ugu sareeya maamulka deegaanka uu dagaalku ka dhacay xogta uu ka helay weli kuma filna.
Sobobta oo ah waxa meesha ka dhacay wuu ka sal-balaadhanyahay inta uu xiligaasi ogyahay masuulku gaar ahaan marka ay noqoto in war laga helo goob dagaal.
War-tabiyeenka wanaagsani waxa uu isku hawlaa in uu helo goob-joogayaal kala duwan, dhinacyada dagaalamaya, qof dagaalku saameeyey (ama ha ku dhaawacmo ama ha ku bara-kaco) iyo cadaymo la xidhiidha dhacdada.
War-fidiyeenka bulshadu dhageysato waxa uu sameeyaa Kuur-gal, dhabo-gal, xaqiijin, xaqiiq-ku salayn, hadana hubin iyo dhex-dhexaadnimo isaga oo ilaalinaaya dheeli-tirnaanta xogta. Suxufigu la mid maahan dadka soo bandhiga wararka kutiri-ku-teenka ah ee ku salaysan caadifada kuwaasi oo halis gelin-kara nolosha dad kale oo ku nool deegaano kale oo ka baxsan halka uu dagaalku ka dhacay.
Xili ay xiisad colaadeed ka dhex-aloosnayd labo qoomiyadood oo wada degen dalka Rwanda ayaa weriye caadifadaysan warbixin iskugu jirta been-abuur iyo kicin bulsho waxa uu ka siidaayey idaacada wadanka, arintaasi waxay noqotay mid ka mid ah sobobihii ugu weynaa ee keenay xasuuqii wadankaasi ka dhacay 1994-kii oo ay ku dhinteen dad ay tiradoodu ku dhowdahay hal million oo qof (1M).
Waa tusaale ku sahabsan saamaynta ay leedahay marka la baahinaayo war aan la xaqiijin ama dhacdo jirta oo si xun loo sheego, sidaasi darteed qofka bulshada la wadaaga war aan xaqiiqo ahayn ama si qaldan u sheega (buun-buunin, caadifadayn, kicin Iwm) Isaga ayaa ka masuul ah adduun iyo aakhiraba !!
Ugu danbayn, ma ogtahay in warbaahinta lagu kalsoon-yahay ay maalinkasta soo bandhigto wararka xaqiiqada ah taasina kuma helaan tixgelin gaar ah maadaama ay tahay waajibkooda,
Balse hal maalin oo ay baahiyaan war ay ku deg-degeen kaasi oo hadhow xaga danbe ka noqda mid been ama been-abuur ah waxay ku mutaystaan in lagu shaambadeeyo warbaahin beenalay ah oo aan lagu kalsoonaan-karin.
Ibraahin Suxufi
