ArtiboMedia

Priyorite nou se enfòme'w de tout sa k'ap pase nan peyi an ak peyi etranje, san voye monte.
(1)

27/03/2024

Ansyen prezidan chanm depite a, Cholzer Chancy ke Jij Al Duniel Dimanche te arete nan kad detouneman materyèl CNE a, jwenn liberasyon li aprè plis pase 2 mwa ke l sot pase nan prizon.

Aprè anviwon 2zè de tan t ap tande li, yon lòt jij ki rele Merlan Belabre pran desizyon pou libere ansyen depite komin ènri an.

ArtiboMedia.

02/08/2022

Vil okay ki nan depatman sid peyi a leve jodi lendi 01 dawout 2022 a an mòd grèv, kawotchyou k ap boule, barikad nan divès wout, sektè komèsyal la prèske pat fonksyone, san konte sektè transpò piblik la ki te sanse kanpe, yon fason pou di non ak ensekirite planifye sa ki plane sou prèske tout teritwa nasyonal la, wout matisan an ki toujou bloke ak lavi chè a ki pa sispann kenbe popilasyon an anba kè.

02/08/2022

Doktè Pierre Réginald Boulos, atravè yon nòt ke l adrese a manm pati politik li a"Mouvman twazyèm vwa Ayiti" a(MTVAyiti) jodi lendi 01 dawout 2022 a, di sa fè anviwon 14 mwa yo te fòse l kite peyi a, fè l al viv lwen de peyi a, aprè pil pèsekisyon politik li di l t ap sibi.Òm dafè a di li konstate depi aprè yò fòse l kite peyi a, bagay yo vin pi mal, sitiyasyon ensekirite a vin pi degrade, lavi chè a ogmante elatriye...

Anmèm tan, patwon delimat la pwofite anonse ke l lave men l tankou pòs pilat nan zafè fè politik ak fè biznis nan peyi a, li di kounye a se lòt kote li envesti, Réginald Boulos di li pran retrèt li nan koze peyi a. Pou apiye desizyon l lan, òmdafè a evoke pwoblèm sante ke l ap konfwonte mete sou divizyon ki fè kenken anndan pati politik "MtvAyiti" a akòz divèjans politik ki te genyen antre menm yo menm nan sou vòt pati a te finalman bay pou akò 11 septanm 2021 an.

Réginald Boulos di ke se avèk anpil lapèn, anpil regrè ke li rive pran desizyon sila, lè l sonje valè sakrifis li di l fè pou te kenbe pati a, pou te batay pou pote vrè chanjman an pou peyi a.

Pou fini, Ansyen prezidan MtvAyiti a di sa gen anviwon 4 mwa li t ap travay jis yo arive fòme yon nouvèl komisyon pou kontinye jere pati politik la.

ArtiboMedia

01/08/2022

Lapolis nan zòn kabarè ki nan awondisman akayè nan depatman lwès peyi a met lapat nan kòlèt 2 endividi sa yo, John François 25 lane ak Wilbert Éxumé ki gen 29 lane, granm maten(2zè nan maten) dimanch 31 jiyè 2022 a, kote chèf lòd yo jwenn 2 zam kalib 9mm nan men Wilbert Éxumé a ki te akonpanye ak lòt jèn gason an, ki t ap sikile sou motosiklèt.

2 endividi yo te plase touswit nan gadavi, pou rès pwosedi legal yo.

ArtiboMedia

01/08/2022

Lapolis bloke minis jistis ak sekirite piblik la mèt Bertho Dorcé, ki t ap klewonnen kò li nan fè tantativ pou l rantre nan palè nasyonal pou al asiste yon konsèy dè minis ki t ap fèt, selon jounalis Guerrier Henri nan emisyon "Allo Henri", jounen dimanch 31 jiyè 2022 a.

Anpil moun ap mande poukisa lapolis pat tou arete minis la, yo di paske se li ki nan konfyolo rantre zam nan peyi a k ap touye polisye yo prèske chak jou Bondye mete.

ArtiboMedia

01/08/2022

Nèg ak zam ki enstale yo nan zòn "Tibwadòm" sou wout gwomòn nan ki se yon komin nan depatman latibonit simen katouch sou yon machin "Institut National de Formation Professionelle"(INFP), jodi dimanch 31 jiyè 2022 a, nan moman yon delegasyon de 4 sitwayen ki te twouve yo nan machin nan t ap rann yo nan depatman nòdwès peyi a, pou dosye egzamen ofisyèl yo.Tou lè 4 manm delegasyon an blese ak bal ladan yo youn ki grav anpil.

N ap raple w, otorite yo te fè sòti yon nòt pou te di yo repran kontwòl zòn "Tibwadòm) nan jou pase yo, ta sanble se te pawòl tafya, pwiske nèg ak zam te epi ta sanble toujou okipe zòn sa, nan pran plezi yo viktim dè pezib sitwayen k ap vakye ak aktivite yo.

ArtiboMedia

31/07/2022

Lapolis nan kwadèboukè met lapat nan kòlèt jèn gason sa y ap rele Michel Azard, , ki te pran plezi li ap fouye oubyen fè resèt nan men timachann ak chofè kamyonèt yo, sou wout nasyonal #1 an, zòn mache chabon bonrepo a, nan komin kwadèboukè, nan depatman lwès peyi a.

Endividi sa ki ta fè pati yon gwoup gang, selon lapolis, ki ta gen plizyè lòt manm ke chèf lòd yo ta ap chache tankou chen fou, pou trennen devan lajistis, pou fè se ke de dwa.

Chèf lòd yo jwenn plis pase 4 mil goud(4000g) tou chifonnen nan pòch akize a, pou kounye a, Michel Azard twouve l nan gadavi, annatandan swivi legal yo.

ArtiboMedia

31/07/2022

Minis jistis ak sekirite piblik la, Me Bertho Dorcé nan gwo difikilte depi aprè arestasyon konseye li Me Robinson Pierre-Louis nan dosye kagezon zam lapolis ak ajan dwanye yo te sezi sou waf pòdepè a, nan kòmansman mwa jiyè a.

Kominote entènasyonal la ap fè gwo presyon sou Ariel Henry pou PM nan ta revoke minis Dorcé, selon sa "Radio metronome" releye de yon sous li, PM Ariel Henry ta deja mande minis la pou l ta bay demisyon li(demisyone). San konte Viza ameriken minis Bertho Dorcé a ki ta deja anile tou, toujou selon menm sous la.

Bagay yo genlè konplike!

ArtiboMedia

31/07/2022

Plizyè avoka nan bawo pòtopwens ladan yo, mèt Dieudoné Dieunold ak mèt Pierre fache, boude, estomake, tire pye kont jounalis Thériel Thélus yo di k ap voye monte nan dosye arestasyon Me Robinson Pierre-Louis a ki ilegal selon sa òm de lwa yo fè konnen.

Avoka yo di Thériel pa konn anyen nan dwa, s on inyoran li ye. Avoka yo ale pi lwen pou di Thériel Thélus pa gen ankenn lòt emisyon li ka fè ke bay enfòmasyon sou bandi, mennen ankèt sou bandi elatriye. Yo di ke l kontinye nan liy li an, pou l pa foure bouch li nan dosye ke l pa metrize.

Pi lwen, avoka yo di se pa paske Me Robinson Pierre-Louis se sekretè bawo a ak sekretè federasyon bawo yo ki fè yo mobilize konsa, yo di nenpòt avoka li te ye a yo t ap toujou kont sa, paske arestasyon Me Robinson nan ilegal, li pa kadre ak lalwa. Pou soutni agiman yo a, avoka yo di yo chita sou dekrè 29 mas 1979 la ki reglemante pwofesyon avoka a ak atik 26.1 nan konstitisyon peyi a.

Yon lòt kote, avoka yo di pou Thériel fè anpil atansyon paske etazini pa peyi l, pou l pa komèt yon erè pou yo pa depòte l voye l vin Ayiti anba men yo.

Pou fini, avoka sa yo ki fè pati bawo pòtopwens lan di y ap kontinye denonse epi mande liberasyon Me Robinson, paske selon yo, s on arestasyon ki ilegal, ki pa gen anyen pou wè ak lalwa.

ArtiboMedia

30/07/2022

Plizyè jèn gason ak gwo zam nan men debake, lannwit yè vandredi 29 jiyè 2022 a, nan ri chaván ki nan vil senmak, kote katouch fè mikalaw, vè 23zè konsa,nan site "Nissage Saget" a, nan depatman latibonit.

Gwoup nèg ak zam sa yo ki te gen manchèt nan men yo tou, te gentan jwenn chans met van nan vwèl yo kite menm machin yo aprè ensidan an, selon premye eleman enfòmasyon yo, endividi ame sa yo ta manm baz "Gran Grif" la nan savyen, ki te debake nan vil senmak nan lide pou tire epi rachonnen ak kout manchèt yon jounalis k ap travay nan radyo "Évolution Inter" ki nan ri chaván nan, nan kè vil senmak, ki rele "Sexy" ensikoni.

Konekte w ak ArtiboMedia wi, n ap chache plis enfòmasyon sou zak sila.

ArtiboMedia

30/07/2022

An nou tout leve vwa nou ansanm pou n di Chrisnette Saint-Georges bòn fèt🎂🎂🎂🍧🍨🍦🍔🍕🍜🍝🍛🍴🍷🍹🍸🍻

Bon non l ki se "Marie Chrisnette Saint-Georges" se yon nòmalyèn, jounalis, psikològ, edikatris, prezantatris bilten metewo nan prèske tout radyo nan kapital la.

Li raman pou w konn tande radyo pou w pa konn tande bèl vwa bèl dam sa, li toujou prè, toujou disponib pou enfòme popilasyon an ak bon jan enfòmasyon sou kijan tan an ye ak kijan li pral ye.

Ann aprann bay valè ak valè, met valè sou sa ki gen valè.

Bòn fèt Chrisnette, kenbe la!👏👏👏

ArtiboMedia

30/07/2022

Lapolis nan komin mon-wi nan depatman latibonit sezi depi se dwoum ak galon kèk endividi ta ap klewonnen kò yo pou ta al achte gazolin epi chita ap vann atè, jounen vandredi 29 jiyè 2022 a, ata menm machin k ap pase sou komin nan pou al achte gaz lòt kote lapolis sezi tout.

Majorite popilasyon an ki apiye mouvman sila, di se moun ki pran plezi yo nan vann gaz la atè a ki lakoz yo paka jwenn gaz la nan tank.

ArtiboMedia

30/07/2022

Plis pase twasan(300) jèn fanm ak jèn gason Ayisyen kase tèt tounen nan peyi dAyiti, atravè aryopò entènasyonal "Toussaint Louverture" a, jounen jedi 28 jiyè 2022 a, aprè yo fin pase plizyè mwa bloke nan peyi "Turquie".

Anpil ladan yo fè konnen yo te pati nan lide pou te al chache yon lavi miyò, men ta sanble se pa sa, bagay yo ta sanble konplike lòtbò a.

IOM Haïti ak OPC ak plizyè lòt òganizasyon ankò te pote kole pou fasilite jèn fanm ak jèn gason ki gen tout kouraj yo sou yo, kase tèt tounen nan peyi a, pandan òganizasyon yo te pote ti lasistans bay depi "Turquie" epi lè yo fin rive nan aryopò a Ayiti a ankò.

ArtiboMedia

29/07/2022

Plizyè inite espesyalize nan lapolis la te deplwaye nan divès kwen nan kapita la, ayè mèkredi 27 jiyè 2022 a, kote anba lavil pòtopwens te konnen yon jounen tèrib, batay gang ak gang, anpil katouch t ap tire tribòbabò, moun ap kouri enpe patou, timachann elatriye...

Pou jounen sa, nan kad entèvansyon lapolis fè yo, yo anonse ke yo rive vide plizyè prezime bandi atè, yo sezi plizyè machin ak anpil lòt materyèl ankò.

Lapolis kontinye ap mande kolaborasyon tout sektè nan vi nasyonal la, pou kontinye misyon li ki se pwoteje ak sèvi tout popilasyon an, nan arete oubyen estope civil ak zam ilegal k ap simen latwoublay nan peyi a.

Travay la sanble pa twò fasil, nan imaj yo ou ka santi anpil efò fèt menmlè yo pa sifi, yo poko ka pote rezilta.
Men ann ankouraje yo👏👏👏
Malgre atant nou poko konble.

ArtiboMedia

29/07/2022

Nan yon nòt ministè jistis ak sekirite piblik fè sòti, ki pote siyati minis Bertho Dorcé di li kondane ak tout fòs li zak briganday ki fèt nan pakè kwadèboukè a, kote nèg ak zam rive mete dife nan tribinal prèmyè enstans jiridiksyon kwadèboukè a.

Nan sans sa a, minis Dorcé mande pou lapolis ak lajistis fè tout sa yo kapab avèk dè mezi drastik, pou rive mare oubyen arete tout moun ki ta patisipe ni de lwen ni de prè nan zak sa a, epi trennen yo devan lajistis, pou sèvi avèk yo, selon lwa peyi a.

Pou fini, alatèt MJSP a mande pou popilasyon kwadèboukè a gade kalm li, li di ministè jistis ak sekirite piblik deja pran bon jan mezi, pou fè lapè retabli nan tout jiridiksyon an.

ArtiboMedia

28/07/2022

Anthony Dumas, se non polisye sa ki te fè pati 27èm pwomosyon lapolis la ki rive pèdi lavi li, ak yon bal nan tèt, kote polisye a ta pran nan yon anbiskad, kèk endividi ke pèsòn poko idantifye, maten jedi 28 jiyè 2022 a, sou wout gwomòn nan, nan zòn tibwadòm , nan depatman latibonit.

Konekte w ak ArtiboMedia, n ap gen pou n vin ak plis detay sou dosye sa...

28/07/2022

Winter Etienne ki se pòtpawòl "Nou se revolisyonè" nan zòn raboto nan vil gonayiv lanse, jounen mèkredi 27 jiyè 2022 a, yon operasyon ki batize "Deboulonnen Ariel", li di se menm bagay ki te pase 2004 la ki pral pase an 2022 sa nan peyi a, aprè sinyal sa li di yo voye granm maten mèkredi a, kote katouch t ap chante tankou wosinyòl, anpil barikad te drese ak yon manifestasyon ki te òganize nan santre vil gonayiv.

Winter Étienne mande pou Ariel Henry kite tèt primati peyi a, li di Ariel p ap regle anyen, koz sitiyasyon an vin pi mal, ou paka achte anyen sou mache a anplis li di, Ariel Henry te patisipe nan touye prezidan Jovenel Moïse.

Pòtpawòl Nou se revolisyonè a pwomèt gwo mouvman nan jou k ap vini yo la, li di l ap fè anpil atansyon pou timalere ak malerèz yo pa viktim, li tou voye yon pinga bay kèk polisye li di yo ta bay timonnen pou ta vin tire sou divès mouvman pwotestasyon yo pral fè nan jou k ap vini yo.

Konekte w ak ArtiboMedia, pou w pa rate yon yota nan aktyalite a.

28/07/2022

Komisè gouvènman jiridiksyon okay la, Me Ronald Richemond ansanm ak lapolis rive met lapat, jodi mèkredi 27 jiyè 2022 a, nan kòlèt sitwayen sa ki rele Francky Casséus pou enplikasyon selon komisè a, nan asasina Gregory Oscar, nan dat 7 jwen ki sot pase la.

Komisè a fè konnen ke li gentan idantifye tout moun ki ta enplike nan dosye sa, li site anpil lòt non ke lapolis ak lajistis ap chache tankou chen fou, toujou sou dosye sa.

N ap raple w, Gregory Oscar te asasinen nan vil okay aprè li te kite peyi etranje pou te rantre nan peyi dAyiti pi presizeman nan vil okay, pou te vin rekipere yon tè ki ta pou li, ke yon ansanm lòt moun t ap fè zye dou.

Pou kounye a, Francky Casséus twouve l nan gadavi komisarya vil okay la, annatandan swit legal yo.

ArtiboMedia

28/07/2022

Lapolis met lapat nan kòlèt 6 endividi ladan yo Guillaume Jean André alyas "Ti André" ki ta chofè chèf gang baz 5 segond la(Izo), jodi mèkredi 27 jiyè 2022 a, nan zòn pako nan pòtopwens.

Lapolis akize mesye sa yo de asosyasyon malfektè, vòlè ak zam nan men elatriye... Pou kounye a, prezime bandi yo selon lapolis, twouve yo nan gadavi, annatandan swit jidisyè yo.

ArtiboMedia

27/07/2022

Ti machann yo leve tout batanklan yo(machandiz yo) al depoze epi chita ap vann douvan komisarya gonayiv la, Nan moman n ap ekri la, mache anba lavil gonayiv ap fonksyone nan bouch komisarya a, akòz anba lavil gonayiv ki cho ak kout bal ki t ap tire ansanm ak barikad ki drese nan wout yo, yon sitiyasyon ki sanse paralize tout aktivite yo nan sant site endepandans lan.

Rete konekte ak ArtiboMedia...n ap tounen.
📷:gros-morne tv

27/07/2022

400 motosiklèt, 19 machin ladan yo yon anbilans, plizyè kits solèy ak anpil lòt materyèl ankò, se ansanm materyè ak ekipman minis sante piblik ak popilasyon an, Dr Alex Larsen nan moman yon rankont, jounen madi a, nan lide pou relanse vaksinasyon kont Covid-19 la, remèt bay 10 direktè depatmantal sante yo, pou pèmèt Ayisyen sou tout teritwa nasyonal la rive vaksinen, pou pèmèt yo konbat kowonaviris la, selon ministè a.

Minis la ki montre l trè rekonesan, pwofite remèsye UNICEF, USAID, OMS, OPS ak anpil lòt ONG ankò pou sipò yo li di yo bay nan relansman vaksinasyon kont kowonaviris la nan peyi a.

Konekte w ak ArtiboMedia, pou w ka toujou ret enfòme...

27/07/2022

Vil gonayiv leve sou panik, maten mèkredi 27 jiyè 2022 a, kote katouch t ap chante tankou wosinyòl ak barikad ki drese lakòz tout aktivite nan site endepandans lan sanse paralize, ke l te bank, mezon transfè ata menm mache enfòmèl la. Yon lòt kote, timesye ame raboto yo mete ak kèk lòt manm nan sosyete sivil la tanmen yon manifestasyon nan vil la toujou maten mèkredi a kont lavi chè.

Rete konekte...n ap tounen...
📷:Trans infos plus
ArtiboMedia

27/07/2022

Ministè sante piblik ak popilasyon an ki gen nan tèt li, Dr Alex Larsen òganize yon gwo rankont, jodi madi 26 jiyè 2022 sa, kote yo rive pran desizyon pou releve oubyen tounen ak vaksinasyon kont kowonaviris la nan peyi dAyiti. Yo di yo kòmanse deja nan depatman nò ak nòdès, yo pral wè kòman yo ka rive nan lòt depatman yo. Yon anons ki fèt nan yon tibout nòt ki rann piblik atravè konp ministè sante a.

ArtiboMedia

26/07/2022

Batonyè lòd avoka pòtopwens yo Me Marie Suzy Légros debake nan pakè pòtopwens, jodi lendi 25 jiyè 2022 a, pou al asiste odyans kote sibstiti komisè gouvènman Me Merovée Jean Rolex t ap tande ò odisyone Me Robinson Pierre-Louis sou evantyèl enplikasyon li nan dosye rantre zam nan peyi dAyiti, atravè waf pòdepè a.

Batonyè a kontinye ap mande liberasyon Me Robinson Pierre-Louis li di, ki arete ilegalman e abitrèman, Marie Suzy Légros di lapolis jidisyè pa gen dwa pou arete moun san manda, palpa pou Me Robinson ki ta yon avoka an fonksyon selon sa li di, ki ta sekretè konsèy lòd avoka yo, li di lalwa pa ba yo lòd arete yon avoka san se pa bawo a ki livre l bay.

Batonyè Marie Suzy te mache ak tout dokiman l, ladan yo, yon pwosè vèbal li di ki konstate ke Me Robinson nan mitan 4 miray.

ArtiboMedia ap swiv dosye sa de prè pou abòne l yo.

26/07/2022

Aprè repons yo bay nan kesyon sibstiti komisè gouvènman an Me Merovée Jean Rolex t ap poze yo, Me Virgile Michelet ansyen komisè gouvènman pòdepè a ak Me Robinson Pierre-Louis ansyen konseye minis jistis ak sekirite piblik la kapab transfere tèt dwat nan penitansye nasyonal. Selon yon sous pwòch pakè a ke "Radio Télé Metronome" releye, dosye a kapab al achemine nan kabinè denstriksyon, apati jodi lendi sa menm.

Lajistis genlè deside fwa sa pou mare 2 ansyen chèf yo vre.

Antouka...ArtiboMedia ap rete swiv dosye sa de prè pou abòne l yo.

Adresse

Saint-Marc
Gonaïves
3921

Téléphone

+50931780142

Site Web

http://www.ArtiboMedia.com/

Notifications

Soyez le premier à savoir et laissez-nous vous envoyer un courriel lorsque ArtiboMedia publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Vidéos

Gwo dife pete nan vil senmak, aprèmidi mèkredi 28 jwyè 2021 an(6h 30 PM), akoz gaz k'ap vann atè sa fè yon bon bout tan, nan angle wout pivè a ak boulva libète a, devan lekòl bon samariten an, nan sant vil senmak. 🎥 : tele amani-y