https://www.facebook.com/1510321305964415/

肥仔Law的鬼馬車評

Home
Hong Kong
Kung Tong
肥仔Law的鬼馬車評

18/01/2024

早幾日分享關於冬天Check呔壓問題，估唔到好多留言話「朋友教、同事講、聽講話」冬天應該要放呔氣，又乜乜乜咁喇🤣！
我都明白呢個可能係大家嘅第一印象或者聯想，不過試想像吓，條呔已經因為低氣溫而令到呔壓下降，你仲放多D呔氣，咁咪就會變成更加唔夠囉？
冬天要跟呔氣，唔係我亂吹出嚟，呢一點係我當年上雪地駕駛課程時阿Sir教嘅。除此之外我cap埋圖俾大家睇，連Michelin官方網站都有教大家記得冬天跟返原廠指示打返足呔氣㗎。
放呔氣果D「絕招」🤣，只係俾你萬一要「脫困」時用，如果條呔長時間唔夠呔氣咁行，行到條呔鋼線層都變埋形，就要提早換呔㗎喇！

#英國 #香港
#你硬要放我都阻止唔到你

15/01/2024

知道Met Office預報今個星期氣溫下降，我尋日又一早跟定D胎氣，上次响室外氣溫仲係5度左右時，我就照廠方建議頭尾嘅胎壓加多1磅。不過今次知道成個星期都有機會零度以下，所以就再打多1磅（即係比廠方建議胎壓加2磅）。今朝一早出門口，氣溫-1度，原裝胎壓提示燈冇著（証明夠胎壓）。不過我發現，街上面好多行緊嘅車，都幾明顯有胎壓不足嘅問題。
英國有D車主真係好錫車，就算二三十年車齡嘅平民細車，都可以keep得好靚，但有D就真係勁粗用當「腳車」一部，話之你「泥鴨」咁樣，總之識行識走就ok。
嚟咗英國咁耐，拜會過好多人，參觀過好多同汽車有關嘅舖頭，每日都可以學到好多以前响香港學唔到或者未見過嘅新知識，始終英國汽車市場俾香港大好多倍，要學真係要有排學😅

#英國 #香港 #每日學習中 #大家加油

04/12/2023

分享多一張都係叫AI幫手畫，今次淨係我部AE92，但係改做LEGO風格，大家又覺得可以嗎？

#豐田 #英國

04/12/2023

用AI幫手畫，代表《鬼馬車評》嘅相撲手，加埋我部AE92，要改裝到好似fast and furious 嘅電影風格，大家覺得可以嗎？

#豐田 #好靚 #我自己收貨了 #英國

30/11/2023

鏟咗兩日冰，都係用返張frostblocker好D。住英國北面D嘅朋友好多話我知，已經落咗初雪喇，睇怕我呢邊都快（你地果邊落雪未呢？）之前分享過天氣凍大家記得check吓呔氣，今日就提吓要留意迫力，天氣凍迫力冇咁快進入工作溫度，如果出門口好快就要上高速公路，最好襯早「印」幾腳個迫力，同埋留意吓路面有冇結冰，當然仲有記得保持足夠行車距離，萬一見到前面跣呔都有時間做反應。

#英國 #結冰 #大家好嗎 #小心駕駛

20/11/2023

好天氣同AE92出去晨運，今次其實都係翻新完運嚟英國出牌後，第一次好好咁感受吓部車，我同我老婆講，買咗部車咁耐，到今日我先覺得部車係自己嘅😅。不過英國開始準備入冬，又濕又凍之餘仲有機會落雪，未來幾個月應該都冇乜機會帶佢出街喇。但我就會襯呢個時間幫佢變吓身，因為之前買落好多嘢都未裝，期待快D回暖可以四周圍遊吓車河😄

其實鬼馬車評都有IG，日後果邊會多D分响日常生活，同英國發現嘅新事物，大家記得多多支持呀！
https://www.instagram.com/law_car_reviews/

#英國 #豐田

31/10/2023

鄉下仔响倫敦第一次見到🤣，KIA EV6警車，聽講舊年先開始執勤。

#英國 #倫敦 #無論去到邊都係掛住睇車

26/10/2023

我點睇JMS四部未來跑車？
尋日有關Japan Mobility Show，豐田FT-Se、本田Prelude Concept、日產Hyper Force Concept同萬事得Iconic SP Concept四部跑車完全响FB「洗版」。我個人真係好高興日本各大車廠重視返跑車市場，唔再一味推出各式各樣嘅SUV，同埋投放更多心力响新能源汽車上面，老實講日本電動車真係處於落後位置，真係要急起直追喇！不過有關於呢四部「概念車」，全部唔係「不日上映」，就係跟本明顯唔會推出，呢點真係有D失望，大家有興趣不如一齊討論吓。

Honda Prelude Concept
四部車之中，Prelude Concept就真係最「虛」嘅一部，可以同大家分享吓，通常車展擺出嚟嘅Concept Car，如果玻璃位全黑封窗的話，好大機會只係一部「泥塑」作品。呢類型車可以話係非常初型，只係比設計草圖好D，叫做有件1:1實物俾老細真D再方便俾意見。不過Prelude Concept廠方乜資料都冇俾，只知話係一部純電車，會繼續努力開發咁話。推出機會就唔講喇。不過海外車評有一句我幾認同，就係Prelude Concept如果放响本田度吸引力就唔算好高，但如果換個豐田章，改名叫Prius Coupe的話，可能會有更加大嘅驚喜感。

Nissan Hyper Force Concept
外型設計完全冇誠意可言，側身車窗完全嚟自R35線條，車頭嘅頭鏟好似返咗去八十年代長谷見昌弘揸果部R30戰車咁。1,000kW馬力其實都係吹水多，因為冇實際資料數據嘅支持，話佢係未來嘅GT-R 36？機會更微，或者只係一部「不日上映」嘅車款。

Mazda Iconic SP Concept
四部車之中，以呢部線條最靚，我自己最鍾意。不過成部車有濃厚嘅Ferrari同Lotus嘅味道，特別係個車尾。動力係轉子引擎增程油電混合，馬力370匹。萬事得一向最心知將自己品牌+跑車+轉子引擎就係等於「流量密碼」，更何況話佢係MX-5後繼車型就一定可以俾車迷洗版。不過，佢嘅Concept Car要變成真車，一向都要等得比較耐，2015年部RX-Vision去到2020年RX-9當時話好快會出，結果2023就快完都仲未有聲氣，果班大叫「Shut up And Take My Money」嘅車迷應該變晒「長頸鹿」。呢部 Iconic SP Concept，我只可以話大家要等等等等等......！

Toyota FT-Se
四部車之中，我覺得最有機會變成真嘅，應該只係得呢部。不過，大家都唔好咁快開心住，當年豐田由FT-86 Concept到真正推出GT-86都用咗差唔多5年，而FT-1 Concept變Supra A90又係5年，所以 FT-Se就算真係變成電動版嘅MR-2，都可能仲要D時間。不過廠方話電池比bZ4X嘅細D、輕D同薄D，連摩打放响中間位置令部車能夠有中置引擎嘅重量分佈同埋駕駛感，呢點好吸引，另外仲有就係電池生產成本可以比宜家平40%，對車迷嚟講都係一個好消息嘅。

19/10/2023

真係一匹布咁長，今日終於收到呢份V5C即係香港俗稱嘅「牌簿」，亦即係話我部AE92 Levin已經成功响英國正式登記出牌喇！
由六月運車，八月英國落船，之後呢兩個幾月，來來回回搞咗好多文件，仲出動埋英國豐田幫手先搞掂。不過收到份V5C睇一睇之後，我即刻見暈一暈，一個新嘅故仔又重新開始，又要同DVLA（即係英國運輸署）再交手過。但係等我完成晒成個故仔之後先再一次過同大家分享喇，不過部AE92正式出咗牌我都係好開心嘅，話晒由舊年8月日本買車，舊年9月運到香港，翻新完再由香港運嚟英國，買咗部車已經超過一年，我自己揸應該都唔知夠唔夠500km，真係好手痕㗎嘛🤣

#英國 #香港 #豐田 #正式成功登記出牌

16/10/2023

「英國」嘅車友呢兩日室外氣溫跌到5度以下，出門口記得check吓「胎壓」呀，如果部車冇呔壓燈提示功能，更加要注意喇。
我今朝室外氣溫得2度，你哋呢？

13/10/2023

我嘅新廚刀（純粹分享）
唔知道有冇人同我一樣，對於廚刀好感興趣呢？
嚟到英國，一早預咗會變身做「住家廚神」，好彩以前响香港，我一得閒都鍾意入廚煮兩味，所以每逢星期六日我都鍾意「蒲」大埔舊墟街市，貪果度夠多海鮮買嘛。
香港用開嘅廚刀，雖然我都帶晒過嚟，不過又心思思想買多套新嘅旁吓身，所以臨出發英國前，走咗一轉去油麻地嘅「陳枝記」度行吓。關於廚刀，真係好個人，因為每個人手掌大細、使用習慣、力度同喜愛嘅刀身長度都會有唔同，所以好難講話邊一個牌子一定係最好。
自己用開嘅分別有「孖人」同「旬」兩個牌子嘅中西廚刀，而今次就集中想搵日本刀之中嘅「牛刀」（即係主廚刀），加多把「三德刀」俾老婆用。
「陳枝記」好好，只要講低你嘅要求，佢地就搵幾款合適嘅刀款俾你選擇，除咗揀鋼水，我就特別關心把刀嘅前後配重同手感。最後，我就選擇咗呢對「藤次郎」嘅廚刀，價錢一D都唔貴之餘，而且設計仲攞過Good Design Award㗎！

#香港 #英國 #陳枝記 #廚刀 #藤次郎 #鍾意煮飯嘅人值得買把好廚刀 #下次返香港買多把柳刃

25/09/2023

小小嘅成就解鎖😁終於有個自己嘅車房
英國屋，好多都會有屬於自己嘅車房。不過好奇怪，好多英國人又唔太鍾意將部車泊入車房裡面，最大可能係由於每日都要用車，出入要快嘅關系啩。
好似我住嘅果條街，就算幾靚嘅車，話之你林寶、拉利、珍藏級保時捷定野馬，都係泊晒响屋前花園嘅位置，至於間車房呢？最多人用嚟當雜物房，有D人會分開兩半改做utility area（洗衣房）同gym room，甚至打通佢變成客廳或者飯廳嘅一部份。
啱啱嘅星期六日，我終於得閒開始搞吓個車房。打開個車房閘門通吓風，做吓清潔，同埋將原本嘅紅磚牆油成白色（遲吓先再諗吓油唔油埋地下😅）。
以前响香港，最希望有一間屬於自己嘅車房，除咗部車唔使日曬雨淋之外，仲可以靜靜地自己幫部車洗車吸塵打蠟，鍾意DIY嘅，有時D嘢未裝拆完，可以就咁放响度第二日先再整，工具都唔使每次搬嚟搬去，夠晒方便。
其實仲有一個重點，唔知大家會唔會好似我咁，一個人聽吓歌整吓自己部車，其實都會覺得好減壓好治愈㗎🤣

#英國 #香港 #男人的浪漫 #有水有燈有電整乜都得

11/09/2023

多謝大家關心，我一切安好！
減少咗响社交平台發文都幾個月，亦一直冇新片上架，非常抱歉，其實我已經離開咗香港到咗英國生活喇！

我係一個百份百香港出世，由細個讀書到返工，結婚建立自己家庭，小朋友出世成為人父，放棄打工創立屬於自己嘅事業，一個最普通最典型，一步一步向前行嘅香港人。要決定離開，其實自己都覺得好唔捨得。

睇過一篇文章，大概係話移民就好似第二次出世，只不過今次可以自己選擇地方。而相同嘅係，所有嘢都係由零開始慢慢學習。正式到埗就快兩個月，慶幸事前安排總算周詳，一切順利，未有遇到咩特別難題。嚟緊就係學習呢度嘅文化，融入呢度嘅生活。

作為一個車迷，可能大家會問部「大霸王」同部AE92點？到咗英國有冇買新車呢？報告返，「大霸王」已經有好人家接手，而AE92當然跟埋我過嚟，會留响英國養老。另外我都响呢邊買咗車，實在有太多事想同大家分享，不過要忙多一陣就會再拍返片㗎喇。

記得香港機場排隊辦理登機時，同响登機閘口前，遇到好幾位讀者。你地嘅鼓勵完全收到，我都希望你地响英國新生活健康，快樂順利。另外，响《鬼馬車評》facebook同youtube留言同短訊俾我嘅讀者，附上近照一張，身型仲keep得好好，肥肥白白，淨係頭髮長過以前，感謝你地嘅關心同問候，令我知道香港人嘅心仲係好溫暖。

#英國 #香港

10/07/2023

咁好天，去個旅行先🤣

#放假 #藍天白雲

09/07/2023

【想買40系Alphard同Vellfire嘅讀者可以睇吓】
啱啱星期五去咗睇40系Alphard同Vellfire新車，代理話有機會可以同總工程師吉岡憲一先生（Mr. Kenichi Yoshioka）見面，仲可以問佢有關呢兩部新車嘅問題，我就當然第一時間舉手🙋🏻‍♂️叫留位。
當日除咗我，仲有狄Sir一齊，而除咗總工程師吉岡憲一先生（右二）鏡頭大家見到嘅另一位就係副總工程師菅間隆博先生（左二），不過其實鏡頭影唔到嘅仲有好多嚟自日本唔同嘅代表陪同，陣容非常強大，我估無論我問乜嘢刁鑽問題，都唔會難到佢地😉。
好喇，當日見面時間有限，簡單互相介紹完，我都老實唔客氣開始問想問嘅問題。

問題一：
新一代40系Alphard / Vellfire取消咗配備以往受稱讚嘅3.5公升V6引擎，宜家大馬力型號（350）改配嘅係T24A-FTS 2.4公升 Turbo引擎，根據以往V6引擎給予我嘅的印象，運作夠線性、寧靜、震動少同力量豐厚，咁新嘅四汽缸Turbo引擎係唔係都可以維持到相同嘅駕駛優越感？

吉岡憲一先生：
只要留意T24A-FTS馬力輸出數字，就會發現新四汽缸Turbo引擎最大扭力達到430Nm/1,700~3,600rpm，相比以往嘅3.5公升V6引擎嘅扭力輸出數字仲要高。新引擎開發時，特別就時速60km/h-70km/h開始嘅運作震動同聲音進行細意調校，而車廂亦為10-15Hz行車時所產生嘅低頻而加強降低噪音管理，所以搭配新引擎响各方面行車同乘坐表現必定比以往更好。

問題二：
咁，配3.5公升V6引擎嘅Alphard或 Vellfire係咪唔會再出現？或者會唔會換另一個方式例如响GR Alphard或者GR Vellfire出現呢？

吉岡憲一先生：
3.5公升V6引擎應該短時間內唔會再見到，將來當然唔能夠肯定。至於有冇GR Alphard或者GR Vellfire型號？呢一刻都未有實行計劃。相反我地努力緊嘅係Alphard / Vellfire PHEV（Plug-in Hybrid）版本，亦希望能夠盡快將PHEV版本帶嚟香港。（大家留意喇！）

問題三：
新40系Alphard / Vellfire 用全新嘅TNGA GA-K車架，廠方資料話車身抗扭曲剛度增加咗50%，當中要咁大幅強化車架嘅剛度，係唔係有特別原因？

吉岡憲一先生：
我地設計新車時，有做過好多資料搜集同聽取用家意見，收集到嘅其中一個嘅意見，係有部份用家表示，以往嘅車型乘坐感覺總好似比豪華房車遜色。當中經過我地細緻研究之後，其中一個原因相信係單廂式車架同三廂式車架嘅抗扭曲性唔同。加上以往我地認為提升舒適性，懸掛避震吸震力應該係要軟一D，結果相反引至行車嘅時候晃動較多（坐船感覺？），所以結果反而影響咗舒適性。
新車响車架唔同位置都增加咗環狀結構，大大提高咗車身抗扭曲同剛度。仲有，有一個位置係大家未必發現嘅，就係兩邊趟門下方嘅門檻、滑輪同路軌設計，新車採用C字形結構柱，滑輪係藏咗响裡面，相比以往嘅地台門檻同外置滑輪設計，變得更加扎實，進一步提升咗車架嘅剛性。
另外就係吸震筒嘅設計，由以往單孔油路改變成三孔油路，吸震力嘅硬度亦都比以往提升咗30%，所以兩者配合之下，晃動感覺比以往大大減少，行車更加穩定。

問題四：
根據新車發佈會所講，40系Alphard 同 Vellfire定位唔同，偏重舒適同針對操控，咁兩款車嘅駕駛同乘坐感分別係咪真係好大？將來試車時真係可以清楚感受到嗎？

吉岡憲一先生：
係！分別好大而且明顯，只要有機會駕駛過兩個型號，必定可以感受得到！
Vellfire車架經過特別強化，重點係引擎室頭陣同頭架上面嘅一對強化桿，情況會好似改裝汽車加裝頂Bar一樣。

問題五：
以往Alphard 同 Vellfire都會配有前後雙天窗，但40系就取消咗前天窗，後面大天窗就變成左右席獨立設計，中間柱位做按鍵同風口，呢個設計係唔係都係為強化車架而考慮？

吉岡憲一先生：
只係部份原因係為咗強化車架，記唔記得新車設計係以「悉心款待，賓至如歸（おもてなし Omotenashi）」作為宗旨？左右席雙天幕係希望令車門開關、車窗嘅遮光同窗簾嘅按鍵集中返响中間嘅位置。日本人有一種習慣，就係探訪公司或者探親時，對方會一直歡送你上車甚至離開，如果你想打開另一邊車窗或者窗簾同對方揮手，宜家無論你坐响中排座椅嘅左邊或者右邊，都可以輕鬆打開另一邊嘅車窗或者窗簾，呢個係以往型號都做唔到嘅。另外以往車頂兩側會有車廂燈或者風口，宜家集中咗响中央，騰出嚟嘅位置就可以用嚟做電動遮光簾同窗簾，雙重設計。

問題六：
既然之前吉岡憲一先生講Alphard同Vellfire嘅駕駛感同乘坐感有咁唔同分別，咁唔知道你自己會選擇邊一款多D呢？

吉岡憲一先生：
呢個好問題，因為我係冇聘請司機，日常都係自己揸車，所以我會鍾意Vellfire多一D！

~完~

老老實實，我最鍾意研究MPV，而且有機會能夠訪問到Alphard/Vellfire總工程師吉岡憲一先生，當日代理安排半個鐘見面，其實真係唔夠，我估就算俾兩個鐘我都可以繼續傾，不過現場見到不停「畫圈」（暗示要停），加上知道吉岡先生仲有澳門同國內行程要趕，當然唔好意思阻擾佢咁耐。各位，我真係盡咗力㗎喇😅！但好多謝吉岡先生接受訪問，今次學到好多新嘢！

#豐田 #這些機會非常難得 #感謝代理幫忙安排

07/07/2023

终於到我睇新Alphard同Vellfire 喇😁一陣仲可以同總工程師：吉岡憲一先生（Mr. Kenichi Yoshioka）面對面傾吓計😉，我準備咗好多問題要問佢。(留言多圖)

各版本價錢：
Alphard 250 $799,860
Alphard 350 $999,520
Alphard HEV $1,099,680
Alphard Executive Lounge $$1,099,680
Alphard HEV Executive Lounge $1;199,440
Vellfire 250 $799,860
Vellfire 350 $999,920
Vellfire HEV $1,099,680

06/07/2023

作為一個車迷，冇理由未試過夜晚上大帽山打卡嘛？🤣

#尋晚 #比我唔會去快富街或者麥當勞道打卡 #梗係去荃錦公路 #打卡 #香港

30/06/2023

感謝Porsche Centre Hong Kong & Macau 邀請，能夠一同感受保時捷跑車75周年嘅喜悅，祝品牌業務蒸蒸日上、蓬勃興盛。

#保時捷

18/06/2023

（不是廣告）AE92翻新計劃，今次想將日本訂返嚟嘅頭唇wrap成碳纖，資料搜尋咗好耐，揾到一間話自己D料應該係目前仿真度最高嘅碳纖貼，所以就膽粗粗試吓。收貨日，現場睇真係好似真碳纖，效果比預期仲要好，幾錢？人工收費千幾蚊。

#翻新計劃 #包碳纖

14/06/2023

現代最新推出Staria MPV（留言多圖）
香港目前有7座 Staria Premium同8座Staria Wagon兩個版本選擇，同樣配3.5 V6引擎同8速波箱，最大馬力272匹。豪華設備全齊，大mon、雙天窗、360鏡頭、一按休閒模式座椅同SmartSense主動式安全系統等等。
價錢：8座$398,800、7座$488,800。

#現代 #7人車 #8人車 #港車北上

28/05/2023

不是廣告 - 今個星期換咗呔軨
部AE92翻新計劃仍然繼續，今個星期到呔軨，千奇唔好誤會，套原裝軨我係唔會放棄，都會攞去翻新，不過我想保留原裝「拉絲」紋設計，所以應該唔會選擇噴油。
換軨，選擇增加一吋由14變成15吋，車呔size都係當年熱門嘅195/55R15，係呀，八九十年代15吋軨已經叫大，邊似宜家閒閒地18、19吋。選擇車呔，其實都思考咗一陣，用RE71RS定RE004好，其實兩款呔，價錢唔算相差好大（15吋呔其實算幾平），不過最後我都係選擇咗RE004，有運動表現但相對RE71RS會靜DD，何況我又唔快🤣（我當然知RE71RS係神兵利器，夠晒屈機喇）。
選擇去石橋Pro Tyre shop，唔係有優惠/贊助（各位大佬，所有嘢我自己俾錢買），係裡面有位老師父駐場（佢話唔好開名喎）。呢位老師父好有堅持，唔完美唔準走，好似換軨時中心圈通常都唔會啱，要加返個墊圈，咁啱佢地冇呢個size嘅貨，就四周圍揸車幫我去其他軨舖度搵，可惜都係搵唔到。本來我都話唔好麻煩，等我自己出去再配，但佢竟然「碌」人情卡叫機械廠即刻「車」四隻出嚟，當時仲要係午飯時間，搞到我都鬼咁唔好意思，緊係要分享大家知。
去石橋Pro Tyre shop換呔，條條呔都係免費打氮氣，而且可以一條龍度埋呔尺，仲有一樣細心位，就係佢地會提你行咗1,000km之後，返去再檢查吓條車呔行成點。而且每條車呔都有獨立編號，只要上網登記重有保固（詳情問返佢地好D）。

#石橋 #翻新計劃仍然繼續

21/05/2023

差唔多搞掂，準備著車，去邊度試車好？
學「霹靂火」咁，天矇光去粉嶺公路試車？今時今日一定唔會遇到「督爺」喇😂

#翻新計劃仍然進行中

19/05/2023

新版嘅AMG A35啱啱响陳列室展出，尋日我就去咗柴灣睇車，新版同舊版有咩唔同呢？不如精簡同大家介紹一吓！（留言區更多相片）

-新車車頭造型有少少改動，更趨向AMG A45 。
-由平頭冚變咗做有兩條拱起嘅骨邊（拱頂），貼近返AMG家族特色
-頭冚上有AMG圓形標誌
-新設計頭燈
-AMG專用鬼面罩（以前係橫間）
-新款合金軨
-後頂置尾翼
-新款尾燈
-AMG Performance軚連AMG按鈕
-新加入48V電力輔助系統
-馬力306匹、扭力400Nm
- RSG發電起步額外輸出14匹
-波箱由7變成AMG SPEEDSHIFT 8速
-娛樂系統時鐘可以自行設定成IWC手錶顯示（紅藍兩色）
-售價$655,000起（Night Package 1、2變成標準配備）

14/05/2023

終於~AE92翻新計劃正式開始喇！
訂零件竟然要等幾個月，好彩要搵嘅都搵得齊😁

#豐田
#年青時嘅第一部單門跑車 #開心

09/05/2023

法拉利官方Ferrari Premium計劃！
Ferrari Premium計劃，會為車輛一系列專用零件的定價上提供特許價格，確保有關法拉利汽車响首20年使用期內嘅持續性以及最高水準嘅服務同性能。經計劃認證後，仲會協助車主獲得Ferrari Classiche全原裝認證資格。
保養計劃會安裝一套專用的法拉利純正原廠零件，包括以下系統：
1. 燃油和進氣系統
2. 排氣系統
3. 液壓動力轉向系統
4. 制動系統
詳細內容可向代理查詢
查詢：Blackbird Concessionaires (3108 2178)

09/05/2023

Mazda CX-60 價單同設備規格表！（留言多圖）
香港代理目前新車將會有2.5 4WD同3.3T 4WD兩個型號選擇，前者配直四2.5公升引擎最大馬力191匹，後者配直六3.3 Turbo+48V 微混能引擎，馬力284匹而摩打17匹。兩個型號同樣配SKYACTIV 8前速波箱（附+/-）。售價方面，2.5 4WD版HK$419,990（早鳥價$399,990）而3.3T 4WD HK$549,990，有咩意見可以留言分享。

#萬事得

27/04/2023

新片上架 - Toyota Corolla Sport Hybrid
即刻睇片：
https://youtu.be/pAorFAd4L4k

呢單嘢我講明係「自肥」，自己私心想試嘅，油價咁貴，今時今日買車，除咗電動車就緊係考慮Hybrid，就連我都心思思想換車。不過，之前試過Corolla Touring Hybrid （即係旅行版），一直都好想試埋呢部揭背版嘅Corolla Sport Hybrid。等咗咁耐，機會終於嚟喇，到底兩部車揸起上嚟分別大唔大呢？我又覺得邊部啱我多D呢？今集會同大家分享。

#混能 #豐田

27/04/2023

終於都俾我試埋呢部Corolla揭背版😁

20/04/2023

繼續玩新Prius頭燈
繼上次分享過MR-S配新Prius頭燈竟然出奇地夾之後，網上又有新相出現，今次到Supra 80/90、GR86、Celica 、仲有大皇冠，你覺得邊部好睇呢？

#豐田

18/04/2023

新片上架 - Toyota GRMN Yaris
立即睇片：
https://youtu.be/pipcTlzWWJI
如果以武俠小說方式嚟作比喻，GR Yaris同GRMN Yaris嘅分別，係一個人練咗「九陽神功」，內外雙修走入極致，加加埋埋成個好「揪」晒！GRMN Yaris車架剛性同下盤馬步，真係可以話近年試車好少見咁強，愈同部車溝通得耐，愈放膽就愈覺得部車嘅潛能深厚，講真試完車真係有「唔夠喉」嘅感覺😁。

#豐田

Address

Kung Tong

Website

facebook.com

Alerts

Be the first to know and let us send you an email when 肥仔Law的鬼馬車評 posts news and promotions. Your email address will not be used for any other purpose, and you can unsubscribe at any time.

Contact The Business

Send a message to 肥仔Law的鬼馬車評:

Videos

AMG GT 63 S E Performance

【特約內容】好掛住賽車場呀！以前去海外試車，經常都有機會去賽車場跑吓，就算近近地上海或者珠海，試車感覺都一定會同响街完全唔同，一來可以盡情咁發揮，又唔使就住就住，擔心影響到其他道路使用者。今次呢條片，如果你有留意澳門格蘭披治大賽車的話，應該一定知邊個係晏高喇，今次佢試嘅新車，係Mercedes-AMG第一部高性能油電混合動力車款AMG GT 63 S E Performance。等我分享吓規格先，4.0升V8雙渦輪增壓引擎、後軸電動摩打，綜合馬力達到843hp，扭力有成1,470Nm， 0-100km/h加速時間只需要2.9秒，極速可以達到316km/h，睇到以上數字，應該都感受到呢部係一部真正嘅四門「跑車」。又爆多少少嘢俾大家知，呢部車「好快」就會响香港推出，如果想知多D消息？記住繼續留意《鬼馬車評》呀！ #mercedes #mercedesamg #混合動力 #AMGGT #四門跑車 #肥仔Law的鬼馬車評

FUSO Hong Kong

【特約廣告】【世一 Ca 姐都話三菱貨車喺 No.1！】想跟 Ca 姐陳苡臻 Jessica 話你聽，一樣做世一冇難度！ Ca 姐今次化身精明能幹俏秘書👩🏻💼 ，喺三菱貨車搵到 6 項業界No.1 🚛，成功完成任務，幫全港老闆同司機們搵到信心之選👏🏼！三菱貨車作為你嘅第一選擇，推出市場唯一嘅 3 年原廠保養，3 年後保證回購價嘅 Canter Trust 信心購車計劃，保證回購價達 50%！三菱 FUSO 提供全港首個先租後買商用車計劃，一年後買車仲可以100% 租金回扣！入手之後服務多到數唔曬，可享免費首年全無憂保養連免費代用車服務，以及點對點一換一收送車服務，作為最全面租車及易手車服務，易手車仲包 6 個月或 6,000 公里原廠保用添，錫車嘅你任何時候都可享貼心有效嘅服務😄！記得 Download 埋 FUSO CARE 手機程式預約維修服務，確保一路暢通🙌🏻！ 👍🏻Mitsubishi Fuso Truck and Bus (Hong Kong)：第一選擇選擇第一識貨之人一定揀三菱！立即入手: https://cutt.ly/uTWPwlJ 查詢熱線：98843030 website: www.mitsubishi-fuso.com.hk #三菱貨車 #三菱FUSO #第一選擇選擇第一 #世一貨車 #識貨之人揀三菱 #CanterTrust #3年原廠保養 #易手車服務 #FUSOCARE #肥仔Law的鬼馬車評 🚗除咗俾Like，記得按「追蹤中」（Following）按鈕，然後選擇「搶先看」（See First），咁先可以睇到《肥仔Law的鬼馬車評》每日最新資訊同影片㗎！】 🚕肥仔Law的鬼馬車評Instagram https://www.instagram.com/law_car_reviews/ 🎬肥仔Law的鬼馬車評 YouTube Channel https://www.youtube.com/channel/UCdhFetgKx0vxIH2okOXvFEw

各位今日無論红定黑雨都真係要小心駕駛，好多地方都有水浸報告，不過呢段就直頭係激流😅，冇咩事留返响安全地方。揸車嘅朋友盡可能避免行山路。影片：朋友轉發 #海水公園激流旅程 #低身車唔知過唔過到 #肥仔Law的鬼馬車評

Drift King 1980

揸住土屋部86去跑山路 - The∙峠〜DRIFT KING 1980〜由土屋圭市親自監修賽車手機遊戲「The∙峠〜DRIFT KING 1980〜」，故事背景集中响1980至1990期間嘅日本，大家可以揸住土屋部AE86去跑山路、公路挑戰唔同對手，睇過介紹影片畫面相當靚，不過最可惜暫時只有ios有得玩先，免費下載，不過裡面當然會吸引你課金啦！ #土屋圭市 #toyota #AE86 #DRIFT #漂移 #肥仔Law的鬼馬車評 🚗除咗俾Like，記得按「追蹤中」（Following）按鈕，然後選擇「搶先看」（See First），咁先可以睇到《肥仔Law的鬼馬車評》每日最新資訊同影片㗎！】 🎬肥仔Law的鬼馬車評 YouTube Channel https://www.youtube.com/channel/UCdhFetgKx0vxIH2okOXvFEw 🚕肥仔Law的鬼馬車評Instagram https://www.instagram.com/law_car_reviews/

NOAH 2022

Toyota新Noah行街街，有片睇！（留言區仲有相）近日有唔少日本網民分享，都係影到豐田新Noah行街嘅相片同影片，但係車身都係貼滿偽裝貼紙，細緻位就睇得唔係咁清晰喇，不過其實日媒都一早放過風，新Noah係唔會响今年內推出，預計應該係明年嘅第一季，想買新Noah嘅你，儲定錢喇！😁 #Toyota #豐田 #Noah #MPV #肥仔Law的鬼馬車評影片來源：@namu_tt8s 🚗除咗俾Like，記得按「追蹤中」（Following）按鈕，然後選擇「搶先看」（See First），咁先可以睇到《肥仔Law的鬼馬車評》每日最新資訊同影片㗎！】 🎬肥仔Law的鬼馬車評 YouTube Channel https://www.youtube.com/channel/UCdhFetgKx0vxIH2okOXvFEw 🚕肥仔Law的鬼馬車評Instagram https://www.instagram.com/law_car_reviews/

TESLA

係咪要「震驚1x億人了」？ D Tesla仲可以咁「生猛」四圍去？以後買車要睇埋涉水能力測試先。 #Tesla #肥仔Law的鬼馬車評 🚗除咗俾Like，記得按「追蹤中」（Following）按鈕，然後選擇「搶先看」（See First），咁先可以睇到《肥仔Law的鬼馬車評》每日最新資訊同影片㗎！】 🎬肥仔Law的鬼馬車評 YouTube Channel https://www.youtube.com/channel/UCdhFetgKx0vxIH2okOXvFEw 🚕肥仔Law的鬼馬車評Instagram https://www.instagram.com/law_car_reviews/

我要「拮」得起

我要「拮」得起 - KIA K2500 車系年紀大，機器壞，「拮」唔起，點搵食？咪心邪，講緊你部搵食車啫。開工好拍檔唔精神，真係會阻住你搵食。不如考慮吓換過部新車喇，韓國KIA K2500 車系，除咗有「拮斗皇」之外，仲有「鐵斗皇」、「雪櫃斗」，同埋有唔同設計嘅「密斗皇」，價錢特平都只係$189,000起。唔好考慮咁多喇，打個電話去2760 9933問吓喇！ #價錢18萬幾起 #即買即開工 #KIA #K2500 #拮斗皇 #鐵斗皇 #雪櫃斗 #密斗皇 #肥仔Law的鬼馬車評 🚗除咗俾Like，記得按「追蹤中」（Following）按鈕，然後選擇「搶先看」（See First），咁先可以睇到《肥仔Law的鬼馬車評》每日最新資訊同影片㗎！】 🎬肥仔Law的鬼馬車評 YouTube Channel 🚕肥仔Law的鬼馬車評Instagram