04/01/2024
Shan farood iyo calaacal ayaan ka xigaa Baddaas iibkeeda , Axmed gureyna waa nool yahay '' Siyaasi Xasan Jigraale
MAWDUUC KU SAABSAN BADDA
Waxan maqlay 20 KM ayaa laga kireeyey Amxaaro, ma dhacdo mana jirto 20 KM oo goonni u taagani ee waa Murabbac ah Afarta koone oo Min Labaatan ah waana 80 KM, halkaasi waa dhul aad u badan, dhulkaas taako ka mid ah Muuse Biixi ma iibin karo, mana kireyn karo, bilaashna uma bixin karo, waxan sidaas u leeyahay heshiiska intaas leeg waxa gala Madaxweyne calanka uu haystaa uu Jamciyadda quruumaha ka dhaxaysaa ka dhex qotomo .
Haddaba intaanu waxba bixin waa inuu Ictiraafkii Jamciyadda quruumaha ka dhaxaysa uu ka haystaa, waxan ku darayaa oo aan su’aal waydiinayaa dadkii Kulmiye mar la dhashay ee aan h**e u jirin “Haddii ay Amxaaradu tahay tii aynnu dhulka isku haynay , Hadday tahay tii Axmed Gurey Fardaha Sanaag uga hooraystay ee ilaa Kafeyga eryaday , haddii ay tahay 62-kii tii Jamciyada quruumaha ka dhaxaysaa ay isla galeen dawladdii Soomaali weyn ee Aadan Cabdulle Cismaan iyo Xabashida ee Xayla salaasi haddii ay taas tahay inaga dhinaceenna Cumar Carte Qaalib oo wasiirul Khaariji ahaa uu ka doodayey iyagana uu u doodayey Kataba Yuflo oo Wasiirul Khaariji ahaa ee Xabashiduna ku doodaysay inay leeyihiin Gobolada woqooyi gaar ahaan, Saylac, Xariirad, Allaybaday, Lafa ciise iyo wajaale , inaguna aynu ku doodaynay Ogaadeeniya oo idil hadday Amxaaro taas aan soo sheegay ay tahay waxba lagama kireyn karo.
Hadday weliba tahay tii ku soo duushay Sayla cee geeljiraha habaryoonis godinta kaga furtay Qoryahay wateen , kadibna Go’aankii Xayla salaasa uu noqday Habar-yoonis hala tirtiro ee Rafle Guuleed yidhi nin walba oo habar yoonisoow nin Ogaadeen ah ku daba fayl, nin Ogaadeen ahina ma odhan karo ninkani waa habar yoonis ee Rafle Guuleed ku fashiliyey xiligaas ay Amxaaro tahay .
Hadday tahay tii dagaalkii raamaale ka dhacay oo habar awal ka fal celisay oo ay tidhi “Dagaalka ka dhacay dannood iyo hawd ninkii doontay hayska daafaco” haddii ay yihiin tii Muuse Aaye oo Arab ahaa tii uu ka gabyahay ay yihiin ee uu yidhi “Geerida xalaasha ah ragii geyey ku hawshooye, gobonimada meel fool xun bay guni ka eegtaa”, hadday xabashi taas tahay waxba lagama kireyn karo.
Ictiraafku ma aha Janno laguugu bushaaraynayo waxa weeye Ictiraafka laguu sheegayaa dalkaaga taladiisa aan kula yeesho, hal dan markaan kuu fuliyona boqol danood ayaan anna kaa rabaa, ictiraafka aad ku ordaysaa waa kaas.
Haddab taasi waxay la mid tahay berigii dagaalka lagu Qaaday Maxamed Siyaad Barre ee la kala qaxay, markii dagaalkii joogsaday ee dalka lagu soo noqday nin ayaa laba guri oo kala jeeda wuxu ku lahaa Magaalada Caasimadda ah, nin ayaa ku habsaday, ninkii lahaa baa yimi markii ay qabowday, gurigii oo baloodhna banaan yahay baloodhna uu nin kale ku jiro ayuu yimi, wuxu yidhi walaaloow gurigan maadaa leh, wuxu yidhi haa Aniga ayaa iska leh , wuxu yidhi waayahay intan aad ku jirto mooyaane inta kale iga kireey , kiradii ayaa lagu heshiiyey , sannad ayuu kiradii qaddimay , gurigiisii buu iska soo galay,
markii nidaam dawladeed la dhisay ayaa ninkii kiradii u soo doontay, wuxu yidhi walaalkayoow ina mari oo Dawladda inoo geey, waa laysula tegey , ninkani guriga uu sheeganayo ee badhka ku jiro anigana uu iga kireeyey aniga ayaa iska leh, mulkiyaddiina waa taas, waxana ugu kireystay aad gurigaagii cagaha la heshid, dawladi markay hagaagtona aad sharciyadeeda ka martid , maanta ayaa ilaahay ku soo beegay , waxan doonayaa intuu kirada iga qaadayna in layga siiyo oo lay soo celiyo, qaybtuu ku jireyna kiradeedii uu I siiyo iigana baxo, nin caqli badan ayuu ahaa, taasi waxay maanta ka dhigan tahay xabashiga sheeganayey dhulkeenna ee aroortana ku odhanaya iiga bax inta kale ee aan sheeganayo anigu cagaha inaan la helo baan doonayey, kirona iguma lihid intaas qaadatayna I sii. Ninkaasi wuxu haystaa dacwaddiisii , kamana tanaasulin , haddaba waagaas jamciyadda quruumaha ka dhaxaysaa may kala xukumine waxay tidhi xuduuddii ingiriisku dhigay halla ixtiraamo , waa su’aalee xabashidu dacwaddaas maka noqotay ? , haddaan wax kireynaaysaan gaal aan waxba idinka kireyn ka kireeya.
Waxan xasuustaa berigii kacaankii adhile ayaanu ahayn xooshkaas arooro ee burco ayaa naloo xidhay oo dadkii nalooga raday, Todoba cisho baa lagu xanaanaynayaa adhigiina halkaas qaybtii ugu horraysay ee halkaas xoolohooda geliya ayaan ahaa , Wuxu yidhi Ina Saxar adhiga iyo lo’daba waa la talaalayaa, dawada lagu talaalayo I tus ayaan idhi waxa ku qoray Asutrelia, waxan ku idhi joojiya neef aannu leenahay lagu dhufan maayo, Ina Saxar wuxu yidhi soo fuul gaadhiga wuxuna I geeyey xeradii Mulleteriga burco oo uu haysto kaahiye, wuxu yidhi ninkani wuxu is hortaagay shaqadii qaranka, denbiguu leeyahay ha lagu qaado, Kaahiye wuxu diray Taar wuxuna yidhi ishortaag shaqo qaran ayaanu haynnaa , dawadii xoolaha lagu mudayey dad ayaa diiday , arrintaasi waxay ku dhamaatay nin ila loolamaya oo suuqa igula tartamaya dawo uu leeyahay qaadan maynno, Ixtiraam iyo Sharaf anagoo mudan ayaa halkii nalaga soo daayey, daawadiina waa la gubay, waxana naloo keenay mid yurub ah, sidaas ayay ku dhamaatay, maslaxadda dalka ninka hogaaminayaa waa inuu sidaas u gartaa marka wax loo sheego.
Shan farood iyo calaacal ayaan ka xigaa Baddaas iibkeeda , Axmed gureyna waa nool yahay
