21/12/2024
မြောက်လန်ဒန်မြေမှာ ကြိုးကြာနီတွေ နိုင်ပွဲပြန်တွေ့မှာလား ( တော့တင်ဟမ် Vs လီဗာပူးလ် ပွဲကြိုသုံးသပ်ချက် )
ဒီ weekend မှာ အသင်းဟာ မြောက်လန်ဒန်ကို သွားရောက်ပြီး တော့တင်ဟမ်နဲ့ ပရီးမီးယားလိဂ်ပွဲစဉ် ကစားရမှာပါ။ လာမယ့်ဇန်နဝါရီပထမပတ်မှာလည်း တော့တင်ဟမ်နဲ့ပဲ ကာရာဘောင်ဖလား ဆီမီးဖိုင်နယ် ပွဲစဉ်ကစားရမှာပါ။
ကြားရက်မှာ ၂သင်းလုံးက ကာရာဘောင်ဖလားပွဲစဉ်တွေ ကစားထားရပြီး လီဗာပူးလ်က ဆာလာ၊ ဒီယက်ဇ်၊ အာနိုးလ်၊ ဗန်ဒိုက်၊ ဆိုဘော့ဇ်လိုင်း၊ ဂရာဗန်ဘက်ခ်ျ၊ အလီဆင်တို့လို အဓိကကစားသမားတွေကို အနားပေးနိုင်ခဲ့ပါတယ်။
တော့တင်ဟမ်ကတော့ မန်ယူကို ရင်ဆိုင်ခဲ့ရတာဖြစ်ပြီး ဒဏ်ရာရကစားသမားတွေလည်း များပြားနေတဲ့အတွက် အကောင်းဆုံးလူစာရင်းကို ပွဲထုတ်ကာ နိုင်ပွဲယူ ဆီမီးဖိုင်နယ်တက်ခဲ့ပါတယ်။
ဒီရာသီမှာ တော့တင်ဟမ်ဟာ ခြေစွမ်းပိုင်းမတည်ငြိမ်ဘူးဆိုပေမယ့် ကြီးခြောက်ကြီး ပြိုင်ဘက်တွေနဲ့ ရင်ဆိုင်ရတဲ့အခါ ခြေစွမ်းကောင်းပြနိုင်တဲ့အသင်းပါ။ ဒီရာသီ ပရီးမီးယားလိဂ်မှာ လန်ဒန်မြို့ခံပြိုင်ဘက်တွေဖြစ်တဲ့ အာဆင်နယ်၊ ချဲလ်ဆီးတို့ကို ကပ်ရှုံးထားပြီး မန်ယူနဲ့ မန်စီးတီး၂သင်းလုံးကို ပရီးမီးယားလိဂ်မှာရော၊ ကာရာဘောင်ဖလားမှာပါ အနိုင်ယူထားပါတယ်။
လီဗာပူးလ်က ပရီးမီးယားလိဂ်မှာ နောက်ဆုံး၂ပွဲဆက် သရေကျခဲ့တာကြောင့် ဒီ weekend မှာတော့ နိုင်ပွဲပြန်ရဖို့ လိုနေပါတယ်။ ပြိုင်ပွဲစုံ နောက်ဆုံးပွဲ၂၀ဆက် ရှူံးပွဲမရှိသလို ဒီရာသီအဝေးကွင်းမှာ ရှူံးပွဲမရှိသေးတဲ့ ကြိုးကြာနီတွေဟာ Tottenham Hotspur Stadium မှာ နိုင်ပွဲပြန်တွေ့ဖို့ အစွမ်းကုန် အားထုတ်ပါလိမ့်မယ်။
ဒီရာသီမှာ အာနယ်စလော့တို့ဟာ Big Six ပြိုင်ဘက်ကလပ်တွေဖြစ်တဲ့ မန်စီးတီး၊ မန်ယူနဲ့ ချဲလ်ဆီးတို့ကို အနိုင်ယူထားပြီး အာဆင်နယ်ကို သရေကျထားပါတယ်။ ဒီရာသီပရီးမီးယားလိဂ် အဝေးကွင်းပွဲစဉ် ၇ပွဲမှာ ၅ပွဲနိုင်၊ ၂ပွဲသရေကျထားပါတယ်။
ထိပ်တိုက်တွေ့ဆုံမှုမှတ်တမ်းတွေအရ ပရီးမီးယားလိဂ်မှာ ဒီ၂သင်းနောက်ဆုံးတွေ့ဆုံခဲ့တဲ့ ၁၀ကြိမ်မှာ လီဗာပူးလ်က ၇ကြိမ်နိုင်၊ တော့တင်ဟမ်က ၁ကြိမ်နိုင်ပြီး ၂ကြိမ်သရေကျထားပါတယ်။ တော့တင်ဟမ်ရဲ့အိမ်ကွင်းကို လီဗာပူးလ် နောက်ဆုံးသွားရောက်ခဲ့တဲ့ ၅ကြိမ်မှာ လီဗာပူးလ်က ၃ကြိမ်နိုင်၊ တော့တင်ဟမ်က ၁ကြိမ်နိုင်ပြီး ၁ကြိမ်သရေကျထားပါတယ်။
တော့တင်ဟမ်ကတော့ ဒီရာသီ အိမ်ကွင်းပရီးမီးယားလိဂ်ပွဲစဉ် ၈ပွဲမှာ ၄ပွဲနိုင် ၁ပွဲသရေ ၃ပွဲရှူံးဆိုတဲ့ ရလဒ်ထွက်ပေါ်ထားတာ တွေ့ရပါတယ်။ မြောက်လန်ဒန်သားတွေရဲ့ အိမ်ကွင်းစွမ်းဆောင်ရည်က အရမ်းအကောင်းကြီး မဟုတ်ရင်တောင် အဆိုးကြီးမဟုတ်လှပါဘူး။
ဒါပေမယ့် အသင်းမှာ ဒဏ်ရာရကစားသမားတွေ များပြားနေတာက အန်ဂျီပိုစတီကိုဂလူကို ခေါင်းကိုက်စေပါတယ်။ အဓိက ကစားသမားတွေဖြစ်တဲ့ ဘန်ဒေးဗီးစ်၊ ရိုမဲရိုး၊ ဗန်ဒီဘန်၊ ဗီကာရီယိုတို့ ဒဏ်ရာရနေပြီး အူဒေါ့ဂျီနဲ့ ရစ်ချာလီဆင်တို့ကလည်း ဒီပွဲမှာ ဝင်ကစားနိုင်ဖို့ မသေချာသေးပါဘူး။
လီဗာပူးလ်က ပြိုင်ဘက်အသင်းထက် နားရက်တစ်ရက် ပိုရထားပြီး အဓိကကစားသမားအများစုကလည်း နားချိန်ရခဲ့ပါတယ်။ ဂျိုတာ၊ ဆီမီကတ်စ်တို့ ကြံ့ခိုင်မှု ပြည့်ဝလာပြီဖြစ်တဲ့အတွက် တော့တင်ဟမ်နဲ့ပွဲမှာ ပွဲထွက်လာနိုင်ပါတယ်။ ကိုနာတေးနဲ့ ဘရက်ဒလေတို့ကတော့ အနားယူနေရဆဲပါပဲ။
စလော့ဟာ ဂျိုတာ၊ ဆာလာ၊ ဒီယက်ဇ်ဆိုတဲ့ တိုက်စစ်ကို ဂရာဗန်ဘက်ခ်ျ၊ မက်ကာလစ္စတာ၊ ဆိုဘော့ဇ်လိုင်းဆိုတဲ့ ကွင်းလယ်အတွဲအဖက်နဲ့အတူ ဂိုမက်ဇ်၊ ဗန်ဒိုက်၊ ဆီမီကတ်စ်၊ အာနိုးလ်၊ အလီဆင်ဆိုတဲ့ ခံစစ်အင်အားစုကို ပွဲထုတ်မယ်လို့ ယူဆမိပါတယ်။ စပါးအသင်းဟာ ဆိုရင် ခံစစ်ပိုင်းမှာ အားနည်းမှုတွေ ရှိနေပေမယ့် တိုက်စစ်ကတော့ အစွမ်းထက်တဲ့အသင်းတစ်သင်းဖြစ်ပါတယ်။ လက်ရှိအချိန်မှာ အနည်းငယ်ဆိုးရွားနေတဲ့ ခံစစ်စွမ်းဆောင်ရည်ကို စပါးနဲ့ပွဲမှာ အကောင်းဆုံး ပုံစံနဲ့ မြင်တွေ့ရဖို့ အရေးကြီးပါတယ်။
အဆင့်၁နေရာကနေ ဆက်ဦးဆောင်နေဖို့ နိုင်ပွဲရဖို့လိုတဲ့အတွက် စူပါဆန်းဒေးမှာ ကြိုးကြာနီတွေ အောင်ပွဲခံ နိုင်ပွဲပြန်ရမယ်လို့ ယုံကြည်နေမိပါတယ်။
