30/10/2024
«Украинская правда» Ukraynanın nüfuzlu və peşəkar nəşrlərindən biridir. Bu qəzet yalnız Ukrayna üçün deyil, həm də rus və ingilis dillərində dərc nəşr edilir və Ukrayna ilə bağlı siyasətin müəyyənləşməsində rolu, marağı olan ciddi siyasi çevrələrin də rəyinin formalaşmasında, informasiyalar almasında mühüm rol oynayır. «Украинская правда» bu gün Azərbaycandan müxalifət lideri Əli Kərimlinin Ukrayna müharibəsi, Qərbin və Rusiyanın strategiyaları, o cümlədən Azərbaycanın rəsmi və ictimai baxışlarını təhlil edən yazısını öz oxucularına təqdim edib, həm də yazının sonunda xüsusi təqdimatla. Yazının orijinalını fb dostlarım üçün Azərbaycan dilində paylaşıram (linki isə şərhə əlavə edirəm).
“Ukrayna müharibəsi ilə paralel olaraq Rusiya Cənubi Qafqazı öz nəzarəti altına alağa çalışır
Biz burada - Azərbaycanda böyük narahatlıqla izləyirik ki, Rusiyanın Ukrayna torpaqlarını işğalı demək olar ki, hər gün artır. Təkcə ötən həftə Rusiya ötən bir ildə rekord sayılacaq qədər çox - 200 kvadrat kilometr ərazini işğal edib. Ukrayna ordusunun qəhrəmancasına müqavimətinə baxmayaraq Rusiya işğalının hər gün, hər həftə genişlənməsi Ukraynaya edilən beynəlxalq yardımların yetərli olmadığını əyani şəkildə sübut edir.
Əlbəttə, bu bir həqiqətdir ki, Ukraynanın özünü Rusiya işğalından qoruması üçün
ABŞ, Avropa İttifaqı və Böyük Britaniya başda olmaqla demokratik dövlətlər ötən iki il yarımda Ukraynaya çox böyük dəstək veriblər. Ancaq indi bu çox aydın görünür ki, Rusiyanın işğalçılıq planlarını durdurmaq üçün indiyədək görülmüş işlər kifayət deyil.
Üstəlik, Rusiya işğalının gücləndiyi bu günlərdə demokratik dünyanın bir çox təmsilçilərinin, siyasətçi, ictimai xadim və jurnalistlərin Qərb toplumlarının Ukraynaya dəstəkdən yorulduğunu, Ukraynanın işğalçı dövlətə güzəştə getməli olduğunu ictimai müzakirəyə çıxarması çox təəssüfedicidir. Həmin ictimai - siyasi xadimlər, jurnalist və ekspertlər nəzərə almalıdır ki, Ukrayna xalqının Rusiya işğalına qarşı qəhrəmancasına savaşı təkcə Ukrayna xalqı üçün müstəqillik, ərazi bütövlüyü və azadlıq uğrunda savaş deyil, həm də daha azad, daha ədalətli bir dünya düzəni uğrunda qlobal mübarizənin tərkib hissəsi, hətta episentridir.
İndi artıq hamı başa düşür ki, Rusiya imperializmi bu savaşda qalib gəlsə, Ukrayna ilə kifayətlənməyəcək. Növbəti hədəf keçmiş Sovet respublikaları olmuş Rusiyanın indiki qonşuları olacaq. Əgər Putinin işğalçılıq siyasəti durdurulmasa, dünyadakı bütün avtoritar və totolitar sistemlər ruhlanacaq, özgüvən qazanacaq və daha da sıx birləşərək demokratik Qərbə strateji məğlubiyyət yaşatmaq, hazırkı beynəlxalq hüquqa söykənən dünya düzənini güclülərin hüququ ilə əvəz etmək iddiasına düşəcəklər.
Ona görə də Ukrayna xalqının azadlıq mübarizəsinə beynəlxal dəstək sadəcə davam etməməlidir, həm də daha bir üst səviyyəyə keçməlidir.
Rusiya - Ukrayna müharibəsinə yanaşma konseptual olaraq dəyişməlidir. Söhbət təkcə Ukraynanın işğala məruz qalmasından və onun özünümüdafiəsinə yardım etməkdən yox, Rusiyanın liderliyi ilə diktataturaların və qeyri - demokratik rejimlərin demokratik dünyaya qarşı, bəşəri dəyərlərə, azadlıq və ədalətə, dünya düzəninə qarşı başlatdığı hibrid savaşı durdurmaq və işğalçıları məğlub etmək üçün dünyanın bütün demokratik qüvvələrinin səfərbər olunmasından getməlidir.
Əks tərəfdə avtoritar rejimlər məhz bunu edir. Çin öz istehsal vasitələrilə Rusiyaya kömək edir, İran ballistik raketlər və PUA-lar göndərir. Şimali Koreya isə son həftələrdə 12 min nəfər əsgər və zabitini artıq Rusiya ərazisinə yerləşdirib və bu əlbəttə ki, son deyil. Rusiyanın qələbəsi üçün Şimali Koreya daha çox hərbçi də göndərə bilər.
Biz bu sualı tez - tez verib, cavab axtarmalıyıq: Nəyə görə dünyadakı avtoritar və totalitar sistemlər qətiyyət və sürətlə birləşdikləri halda dünyadakı demokratiyalar şərə qarşı mübarizədə hələ də tərəddüdə, ləngliyə, qətiyyətsizliyə yol verirlər?
Əminəm ki, beynəlxalq irticaya qarşı ön cəbhədə vuruşan Ukrayna xalqı bu sualı tez - tez verir. Ancaq bu sual tək ukraynalıların sualı olmalı deyil. Bu sual bütün dünyadakı demokratik qüvvələrin özü - özünə və həmkarlarına ünvanlamalı olduğu sualdır.
Orası aydındır ki, diktaturalar və avtoritar dövlət başçıları öz şəxsi və qeyri məhdud hakimiyyətlərini, bir çoxları isə həm də dövlətin sərvətlərini oğurlayıb, daha da varlanmaq imkanlarını qorumaq üçün birləşirlər, bir-birlərinə dəstək verirlər. Öz əbədi hakimiyyət arzularını gerçəkləşdirmək üçün insanları kütləvi şəkildə ölümə göndərir, ölkələrinin milli resurslarını öz ambisiyaları üçün göz qırpmadan xərcləyirlər. Ancaq dünyadakı demokratik qüvvələrin də daha effektiv və daha sürətli birləşməsi üçün səbəbləri ciddidir. Qaydalara əsaslanan beynəlxalq düzəni, bütün dünyada azadlığı, insan hüquqlarını, azad rəqabət imkanını, ümumbəşəri dəyərləri tiranlardan, diktaturalardan qorumaq, dünyanın yenidən cəngəllik qaydalarına aparılmasına imkan verməmək birləşmək üçün daha ciddi səbəblərdir.
Azərbaycanın hazırda İlham Əliyev rejiminə müxalifətdə olan demokratik qüvvələri Ukraynanın haqlı mübarizəsini tam olaraq dəstəkləyir. Biz onun da fərqindəyik ki, Ukraynaya qarşı apardığı işğalçı savaşla paralel olaraq Rusiya ən müxtəlif vasitələrdən istifadə etməklə daha bir strateji cəhətdən önəmli coğrafiya olan Cənubi Qafqazı da öz nəzarətinə keçirməyə çalışır. Rusiya bu məqsədlə Azərbaycanla Ermənistan arasında sülhün əldə olunmasına mane olmağa çalışır və Cənubi Qafqazın hər üç ölkəsində avtoritar, qeyri - demokratik qüvvələri dəstəkləyir. Kremldə haqlı olaraq belə hesab edirlər ki, harada bir qeyri - demokratik qüvvə varsa, həmin qüvvə Rusiya hakimiyyətinin real və ya potensial müttəfiqidir.
Azərbaycanın dövlət başçısı İlham Əliyevin işğalçı Putinlə imzaladığı müttəfiqlik haqda bəyannaməyə də bu kontekstdə yanaşmaq lazımdır. Saxta seçkilər vasitəsilə formalaşmış və öz repressiv hakimiyyətini qorumaq üçün 300 nəfərdən artıq ictimai - siyasi fəalı, jurnalisti həbs etdirmiş, ölkədə fundamental hüquq və azadlıqları, siyasi rəqabət aparmaq imkanını tam olaraq məhdudlaşdırmış Azərbaycan hakimiyyəti rəsmi olaraq işğalçı Rusiyanı dövlətimizə müttəfiq saysa da, xalqımızın böyük əksəriyyəti məhz Ukraynanı, azadlıq, demokratiya və ləyaqət uğrunda vuruşan Ukraynanı özünə müttəfiq sayır”.
Redaksiya təqdimatı: Əli Kərimli Azərbaycandakı ən böyük müxalifət partiyası olan AXCP-nin sədridir. AXCP Azərbaycanın Avropa İttifaqına inteqrasiyasını təbliğ edən əsas qüvvədir. Azərbaycan hakimiyyəti AXCP-yə qarşı repressiya aparır. 50 nəfərə qədər AXCP fəalı siyasi məhbus həyatı yaşayıb. Bu ilin avqustunda hakimiyyət Əli Kərimliyə qarşı qondarma cinayət işi başladıb. Əli Kərimlinin üzərində qurulmuş sifarişli məhkəmə Azərbaycanda COP 29 tədbiri keçiriləcək deyə dekabrın 2-nə qədər təxirə salınıb”.
