Ethio 24

10/04/2020

በኢትዮጵያ ደረጃቸውን የጠበቁ የፊት ጭንብሎች በስፋት ለማምረት እየተሰራ ነው

የኮሮና ቫይረስን ለመከላከል የሚረዱ ደረጃቸውን የጠበቁ የፊት ጭንብሎች በአገር ውስጥ በስፋት ለማምረት እየተሰራ መሆኑን የጤና ሚኒስትሯ ዶክተር ሊያ ታደሰ ገለጹ።

በሥራቸው ባህሪ ከተለያዩ ሰዎች ጋር ቀጥተኛ ግንኙነት ያላቸው ሰዎች የፊት ጭንብልና ጓንት አዘውትረው እንዲጠቀሙ ሚኒስትሯ ምክረ ሃሳብ ለግሰዋል።

የጤና ሚኒስትሯ ዶክተር ሊያ ታደሰ ለኢዜአ እንደተናገሩት፤ ደረጃቸውን የጠበቀ የፊት ጭንብል በአገር ውስጥ እንዲመረት ከባለድርሻ አካላት ጋር በቅርበት እየተሰራ ነው።

10/04/2020

10/04/2020

በኢትዮጵያ የኮሮና ቫይረስ ወቅታዊ ሁኔታ፦

• አጠቃላይ የተከናወነ የላብራቶሪ ምርመራ - 3,232
• በ24 ሰዓት የተከናወነ ላብራቶሪ ምርመራ - 442
• ዛሬ በበሽታው መያዛቸው የተረጋገጠ - 9
• በቫይረሱ ተይዘው በለይቶ ህክምና ያሉ - 57
• በፅኑ ህክምና ላይ ያሉ - 1
• ያገገሙ - 4
• በበሽታው ህይወታቸው ያለፈ - 2
• ወደሀገራቸው የተመለሱ - 2
• እስካሁን በበሽታው የተያዙ - 65

10/04/2020

በኢትዮጵያ ተጨማሪ ዘጠኝ ሰዎች የኮሮና ቫይረስ ተገኘባቸው

በኢትዮጵያ ባለፉት 24 ሰዓታት የላቦራቶሪ ምርመራ ከተደረገላቸው 442 ሰዎች መካከል ዘጠኙ የኮሮና ቫይረስ እንደተገኘባቸው መረጋገጡን የጤና ሚኒስቴር አስታወቀ። ይህንንም ተከትሎ በኢትዮጵያ ቫይረሱ የተገኘባቸው ሰዎች ቁጥር ወደ 65 ከፍ ብሏል።

የጤና ሚኒስትሯ ዶክተር ሊያ ታደሰ ለኢትዮጵያ ዜና አገልግሎት እንደተናገሩት፤ ዛሬ ቫይረሱ እንዳለባቸው የተረጋገጠው ሁሉም ግለሰቦች የጉዞ ታሪክ አላቸው።

ከግለሰቦቹ መካከል ሰባቱ ኢትዮጵያዊያን ሲሆኑ፤ አንድ ኤርትራዊ ቀሪዋ ደግሞ የህንድ ዜግነት ያላት ናት።

አራቱ ኢትዮጵያዊያን ከዱባይ ወደ ኢትዮጵያ መጥተው በለይቶ ማቆያ ክትትል ሲያደርጉ የነበሩ መሆኑንም ሚኒስትሯ ተናግረዋል።

ሁለቱ የቱርክ፤ ሌላኛዋ ኢትዮጵያዊት ደግሞ የእንግሊዝ አገር የጉዞ ታሪክ ያላቸው ሲሆን፤ ሁሉም በለይቶ ማቆያ ውስጥ ክትትል ሲያደርጉ መቆየታቸውን አውስተዋል።

የ20 ዓመቷ ህንዳዊት የአሜሪካ እንዲሁም የ40 ዓመቱ ኤርትራዊ ደግሞ የዱባይ ጉዞ ታሪክ ያላት ናቸው።

በጽኑ ህሙማን ክፍል ከሚገኙት ሁለት ግለሰቦች መካከል አንዱ የጤና መሻሻል በማሳየቱ ከክፍሉ መውጣቱንም ዶክተር ሊያ ተናግረዋል።

እስካሁን ባለው ሂደትም በኢትዮጵያ ለሶስት ሺህ 232 ሰዎች የላቦራቶሪ ምርመራ መደረጉን ጠቁመው፤ ቫይረሱ ከተገኘባቸው ሰዎች መካከል 57ቱ የህክምና ክትትል እያደረጉ ይገኛሉ ብለዋል።

አራት ግለሰቦች ከበሽታው ያገገሙ ሲሆን፤ ሁለቱ በበሽታው ህይወታቸው ማለፉ ይታወሳል።

ሌላ ሁለት ግለሰቦች ደግሞ ወደ አገራቸው ተሸኝተዋል።

10/04/2020

ኢ/ር ታከለ ኡማና ዶ/ር ሊያ ታደሰ ከኮሮና ቫይረስ ህክምና ጋር በተያያዘ አገልግሎት እየሰጡ ያሉ ማገገሚያ ማእከላትን ጎበኙ

የአዲስ አበባ ከተማ አስተዳደር ም/ከንቲባ ኢ/ር ታከለ ከጤና ሚኒስትሯ ዶ/ር ሊያ ከበደ ጋር በመሆን በማገገሚያ ማእከላቱ አገልግሎት እየሰጡ ካሉ የጤና ባለሙያዎች ጋር ተወያይተዋል።

የኮሮና ቨይረስ ህክምና በሚሰጥበት ማእከላት በመሄድ የጤና ባለሙያዎቹን ያነጋገሩት ኢ/ር ታከለ፣ የጤና ባለሙያዎቹ ሙሉ ኑሮአቸውን በማእከላቱ በማድረግ እየሰጡ ላለው አገልግሎት ምስጋናቸውን አቅርበዋል።

የጤና ባለሙያዎቹ ወደ ውጪ ሳይወጡ ሙሉ ኑሮአቸውን በማእከላቱ በማድረጋቸው የተለያዩ አገልግሎቶችና ግብአቶች ችግር እየገጠማቸው መሆኑን አንስተዋል።

የተነሱት ችግሮች በትብብር እንደሚፈቱ የገለፁት ኢ/ር ታከለ፣ የከተማ አስተዳደሩ የራሱን ድጋፍ እንደሚያደርግ ገልፀዋል።

የከተማ አስተዳደሩ ለጤና ባለሙያዎቹ የጄኔሬተር፣ የምግብ ግብአቶችንና ጊዜ ማሳለፊያ ቁሳቁሶች አበርክቷል።

10/04/2020

በባንኮክ መጠጥ ከመታገዱ በፊት ብዙዎች ለመሸመት ሩጫ ላይ ናቸው

በታይላንዷ መዲና ባንኮክ ከዛሬ ሚያዝያ 2፣ 2012 ዓ.ም ጀምሮ ለአስር ቀናት የሚቆይ የመጠጥ ሽያጭ እግድ ውሳኔ መተላለፉን ተከትሎ ብዙዎች ለመሸመት ሲሯሯጡ ታይተዋል።
ባለስልጣናቱ ይህንን ውሳኔ ለማስተላለፍ የተገደዱት ከሶስት ቀናት በኋላ ለሚከበረው የታይላንድ አዲስ አመትን አስመልከቶ የሚደረጉ ጭፈራዎችን ለመቀነስና በአሁኑ ሰአት የሚደረጉ ንክኪዎችን በማስወገድ የኮሮናቫይረስን ስርጭት ለመቀነስ ነው ብለዋል።
የእግዱም ውሳኔንም ተከትሎ በትላልቅ መደብሮች ላይ ረዣዥም ሰልፎች የታዩ ሲሆን፤ ብዙዎችም እግዱ ተፈፃሚ ከመሆኑ በፊት መጠጣቸውን ለመሸመት ሲሯሯጡ ነበር። ይህም ሁኔታ በብዙዎች ዘንድ ትችትን አስተናግዷል።

ምንጭ፦ቢቢሲ አማረኛ

10/04/2020

የአማራ ክልል ምክር ቤት የኮሮና ቫይረስ ስርጭትን ለመከላከል የሚውል የ500 ሺህ ብር ድጋፍ አደረገ

(ኤፍ ቢ ሲ) የአማራ ክልል ምክር ቤት የኮሮና ቫይረስ ስርጭትን ለመከላከል ለህክምና ባለሙያዎች ልብስ መግዣ የሚሆን የ500 ሺህ ብር ድጋፍ አደረገ።

የክልሉ ምክር ቤት አፈጉባዔ ወይዘሮ ወርቅሰሙ ማሞ ለህክምና ባለሙያዎች ልብስ ከባህር ዳር ዩኒቨርስቲ ለመግዛት የገንዘብ ድጋፉ መደረጉን ገልጸዋል።

ሀኪሞች የኮሮና ቫይረስ ለመከላከል በቀጥታ ከህሙማን እና ተጠርጣሪዎች ጋር የሚገናኙ እና ለህሙማን ምግብ የሚያቀርቡ እንደመሆናቸው ቅድሚያ ለእነርሱ በመስጠት ቁሳቀሱን ማሟላት ማስፈለጉን ነው የገለፁት።

ምክር ቤቱ ከክልል እስከ ቀበሌዎች ባለው መዋቅር ህብረተሠቡ ከኮሮና ቫይርስ ራሱን እንዲጠብቅ በተዳራጀና በተቀናጀ አግባብ የግንዛቤ ትምህርት እየሰጠ መሆኑን አፈጉባዔው አንስተዋል።

በቀጣይም የኮሮና ቫይረስ ስርጭትን ለመከላከል ምክር ቤቱ አሁን የጀመረውን ስራ በቅንጅት ከማህበረሰቡ ጋር አጠናክሮ ይሰራል ብለዋል።

በምክትል ርዕስ መስተዳድር ማዕርግ የክልሉ የማህበራዊ ክላስተር ዘርፍ አስተባባሪ ዶክተር ሙልነሽ አበበ ድጋፉን ከአፈጉባኤ ወርቅሰው ማሞ ተረክበዋል።
ችግር እየሆነ ያለው የጤና ባለሙያዎች የመከላከያ ጋዎንና ጭንብል እንደሆነ በማንሳት ምክር ቤቱ ላደረገው ድጋፍ አመስግነዋል።

በተጨማሪም የባህር ዳር ዩኒቨርሲቲ ቫይረሱን በመከላከሉ ከፊት ሆነው እየሰሩ ላሉት ሀኪሞች መከላከያ የሚሆን ጋውንና ጭንብል ማምረት በመቻሉም ምስጋናቸውን አቅርበዋል።

ምንጭ፦ኤፍ ቢ ሲ

10/04/2020

ቻይና በአለም የጤና ድርጅት ዋና ዳይሬክተር ላይ የተከፈተውን የዘረኝነት ጥቃት እንደምታወግዝ ገለጸች

ቻይና በአለም የጤና ድርጅት ዋና ዳይሬክተር ዶ/ር ቴድሮስ አድሃኖም ላይ የተከፈተውን ግለሰብ ላይ ያነጣጠረ የዘረኝነት ጥቃት አጥብቃ እንደምታወግዝ አስታወቀች።

በአለም ጤና ድርጅት ዋና ዳይሬክተር ዶ/ር ቴድሮስ አድሃኖም ላይ የተከፈተውን የዘረኝነት ጥቃት ዘመቻ ቻይና አጥብቃ እንደምታወግዝ የቻይና የውጭ ጉዳይ ሚኒስቴር ቃል አቀባይ ዣዎ ሊጂያን ተናግረዋል።

እንደ ቃል አቀባዩ ገለጻ ከታይዋን ይሄ ዘረኝነትን መሰረት ያደረገ የጥቃት ዘመቻ ላይ የተከፈተባቸውን ዘመቻ ፖለቲካዊ ለማድረግ የሚደረጉ ማናቸውንም ሙከራዎች ቻይና አጥብቃ ትቃወማለች ብለዋል።

በዶ/ር ቴድሮስ የአመራር ዘመን የአለም የጤና ድርጅት የሃገራትን የጤና ስርዓት የሚያሻሽሉ ስራዎችን በመተግበር፣ ከባድ አለም አቀፍ ወረርሽኞችን ለመከላከል ፈጣን ምላሽ በመስጠትና ለጤና ዘርፉ አለም አቀፍ ትብብሮችን ለማሳደግ እየሰሩ ስለመሆኑም ቃል አቀባዩ ገልጸዋል።

የዓለም ጤና ድርጅት ሳይንስንተከትሎ ኃላፊነቶቹን በሚገባ በመወጣት በዓለም አቀፉ ማህበረሰብ ዘንድ በሰፊው የታወቀ እንዲሁም ከፍተኛ አድናቆት ያተረፈበትን ፣ እና ሁልጊዜም ለሁኔታዎች የሚያሳየውን ያልተዛባ አቋምና ገለልተኝነት ቻይና እንደምትደግፍ በአጽንኦት ገልጸዋል፡፡

ቃል አቀባዩ ቻይና በዓለም አቀፉ ወረርሽኞችንየማጥፋት ትብብሮች ግንባር ቀደም ሚና መጫወቷን እንደምትቀጥል ገልጸው፤ የታይዋን ዲሞክራቲክ ፕሮግሬሲቭ ፓርቲ ባለስልጣናት ጉዳዩን ፖለቲካዊ መልክ እንዲይዝ ሊያደርጉት እንደቻሉ ገልጸዋል።

እውነተኛው ዓላማቸው የተከሰተውን ወረርሽኝ ተመርኩዘው ከቻይና መገንጠል መሆኑን ያነሱት ቃል አቀባዩ ይሄ አይነቱን እንቅስቃሴ ቻይና በጥብቃ የምትቃወመውና በፍጹም ሊሳካ የማይችል ነው ማለታቸውን ቻይና ዴይሊ ዘግቧል።

ሩቅ ምስራቃዊት አገር ታይዋን የዓለም የጤና ድርጅት አባል አለመሆኗ ይታወሳል።

ምንጭ፦ኢዜአ

10/04/2020

የኒው ዮርክ ከተማ በቫይረሱ ክፉኛ ከተጠቁ ሀገራት ቀዳሚ ሆናለች

በአሜሪካ ካሉ ከተሞች ውስጥ ኒው ዮርክ የቫይረሱ ወረርሽኝ ማዕከል ሆናለች። ከተማዋ በአሜሪካ ብቻ አይደለም በኮሮናቫይረስ ተያዦች ቁጥር ከየትኞቹም አገራት በልጣ ቀዳሚ ሆናለች።
በቅርብ የወጣ መረጃ እንደሚያሳየው በትናንትናው ዕለት በቫይረሱ የተያዙ ተጨማሪ 10 ሺህ ሰዎች ከመገኘታቸው ጋር ተያይዞ ቁጥሩን 159, 937 አድርሶታል።
ይህም ቁጥር በስፔን ከተያዙት 153 ሺህና በጣልያን 143 ሺህ ሰዎች በላይ ሆኖ ቀዳሚ አድርጓታል።
የቫይረሱ መነሻ በሆነችው ቻይና በወረርሽኙ የተያዙ ሰዎች ቁጥር 82 ሺህ ሲሆን 3,300 ሰዎች ሞተዋል።
በአጠቃላይ በአሜሪካ በኮሮናቫይረስ የተያዙ ሰዎች ቁጥር 462 ሺህ ሲሆን 16,500 ሰዎችም ህይወታቸውን አጥተዋል።
በዓለም ላይ ያለውንም አሃዝ በምናይበት ወቅት 1.6 ሚሊዮን ሰዎች በቫይረሱ መያዛቸው የተረጋገጠ ሲሆን 95 ሺህ ሰዎች ደግሞ ሞተዋል።
ኒው ዮርክ በቫይረሱ ክፉኛ የተጠቁ አገራትን በቁጥር ብትቀድምም፤ የሟቾችን ቁጥር ግን 7 ሺህ ነው የተመዘገበው። በስፔን 15,500 ሰዎች ሞተዋል፤ ከፍተኛ የሟች ቁጥር በተመዘገበባት ጣልያንም የ18 ሺህ ሰዎች ህይወት ተቀጥፏል።

10/04/2020

ዘመን ባስ በአዲስ አበባ ነጻ የትራንስፖርት አገልግሎት መስጠት መጀመሩን አስታወቀ

በአዲስ አበባ ከተማ የትራንስፖርት መጨናነቅን ለመቅረፍ የቀረበውን ሀገራዊ ጥሪ ተከትሎ ዘመን ባስ አገር አቋራጭ የትራንስፖርት አገልግሎት ሰጭ ድርጅት ነጻ የትራንስፖርት አገልግሎት መስጠት መጀመሩን አስታውቋል።

ሀገራዊ ጥሪውን ተቀብለዉ ዘመን ባስ፣ የጎልደን ባስ፣ የሀበሻ ባስ እና የኛ ባስ አክሲዬን ማህበራት አውቶብሶቻቸውን በመመደብ አገልግሎት መስጠት ጀምረዋል።

ዘመን ባስ አገር አቋራጭ የትራንስፖርት አገልግሎት ሰጭ ድርጅት በአዲስ አበባ ነጻ የትራንስፖርት አገልግሎት መስጠት መጀመሩን አስታውቋል።

በኮሮና ቫይረስ ወረርሺኝ ምክንያት እርቀትን ጠብቆ ለመጓጓዝ የሚፈጠረውን የትራንስፖርት እጥረትና መጨናነቅ ለመቀነስ በማሰብ "ነፃ የከተማ ትራንስፖርት አገልግሎት ለአሳደገን ህዝብ" በሚል መሪ ቃል አገልግሎት እየሰጠ ይገኛል፡፡

✅ መነሻ መስቀል አደባባይ ስታድየም ዙሪያ።
✅ መዳረሻ ቦታዎች>
🚍 ጦር ሀይሎች፣አየርጤና
🚍 ሳር ቤት፣መካኒሳ፣ጀሞ፤ተመላሽ በሃና ማሪያም ቃሊቲ።ከቃሊቲ
ሳሪስአቦ፣ቦሌ፣ሜክሲኮ
🚍 መገናኛ፣ወሰን፣ካራ፣የካ አባዶ፤ተመላሽ በመገናኛ፤ቦሌ፤ሳሪስ ቃሊቲ። ከቃሊቲ
በሳሪስ፤እስታዲየም፤ሜክሲኮ
🚍 ሳሪስ፣ቃልቲ።ተመላሽ እስከ ሜክሲኮ
🚍 አራት ኪሎ፣ስድስት ኪሎ፣ሽሮ ሜዳ
🚍 ፒያሳ አዲሱ ገበያ።
🚍 አስኮ መንገድ መድኃኒዓለም እነዚህን ዋና ዋና መንገዶችን መነሻና መድረሻ በማድረግ ስምሪቱ እንደ አካባቢው ትራንስፖርት እጥረት የሚስተካከል ከ01/08/12 ዓ.ም ጀምሮ ላልተወሰኑ ቀናቶች በስራ መግቢያና መውጫ ሰዓት ነፃ የትራንስፖርት አገልግሎት እንደሚሰጠት አክሲዮን ማህበሩ መግለፁን የአዲስ አበባ ፕሬስ ሴክሬተሪ ጽህፈት ቤት ዘግቧል፡፡

ምንጭ፦ebc

10/04/2020

ዓለም የኮሮናቫይረስ ወረርሽኝን ለመዋጋት የምታደርገውን ጥረት የሚመራው የዓለም ጤና ድርጅት ዋና ዳይሬክተር ዶክተር ቴድሮስ አድኃኖም በግል ሳይቀር የተለያዩ ጫናዎች እየገጠሟቸው መሆኑን ከተናገሩ በኋላ የታይዋን ፕሬዝደንት ምላሽ ሰጡ።

የታይዋን ፕሬዝዳንት ሳይ ኢንግ-ዌን አገራቸው ከማንም በላይ መገለልን ስለምትረዳው ማንኛውንም አይነት ዘርን መሰረት ያደረገ ልዩነትን እንደምትቃወም ገልጸዋል።
በዓለም የጤና ድርጅትና በታይዋን መካከል ያለው ውጥረት አዲስ እንዳልሆነ የተነገረ ሲሆን፤ ዋነኛ ምክንያቱ ቻይና የግዛቴ አንድ አካል ናት የምትላት ታይዋን ለረጅም ጊዜ የድርጅቱ አባል ለመሆን ያቀረበችው ጥያቄ መልስ ባለማግኘቱ ነው።

የዓለም የጤና ድርጅት አባል መሆን የሚችሉት አገራት የተባበሩት መንግሥታት አባላት ብቻ ሲሆኑ፤ ታይዋን ግን በድርጅቱ ውስጥ እውቅና ስለሌላት አባል ለመሆን አልበቃችም።
በዚህም የዓለም ጤና ድርጅት በሚጠራቸው አስቸኳይ ስብሰባዎችና ማብራሪያዎች ላይ እንድትሳተፍ አትጋበዝም፤ ይህ ነው ለውጥረቱ ምክንያት እንደሆነ የተጠቀሰው።
የታይዋን ፕሬዝዳንት እንዳሉት "ለዓመታት ከዓለም አቀፍ ድርጅቶች ተገለን በመቆየታችን፤ መገለልንና መነጠልን ከማንም በተሻለ ሁኔታ እናውቀዋለን” ሲሉ በዶክተር ቴድሮስ ላይ ያጋጠመውን ጥቃት እንደማይደግፉት መናገራቸውን ሮይተርስ ዘግቧል።

10/04/2020

ሌላኛው ደግነት ከአዳማ አቶ ፀጋዬ ሁንዴና ወ/ሮ ኤልሳቤት አዱኛ

አቶ ፀጋዬ ሁንዴና ወ/ሮ ኤልሳቤት አዱኛ
በአዳማ ከተማ በሚገኘው የሳራ የንግድ ማዕከል ተከራይተው ለሚሰሩ ኢትዮጵያውን የሁለት (2) ወር ኪራይ ነፃ አድርገውላቸዋል።

10/04/2020

ጠቅላይ ሚኒስትር ቦሪስ ከጽኑ ሕሙማን ክፍል ወጥተዋል፤ ከሆስፒታል ግን አልወጡም

የእንግሊዙ ጠቅላይ ሚኒስትር ቦሪስ ጆንሰን ከሰዓታት በፊት ከጽኑ ሕሙማን ማገገሚያ ክፍል መውጣታቸው ተሰምቷል፡፡
አሁንም ግን መሀል ሎንዶን ከሚገኘው ከቅዱስ ቶማስ ሆስፒታል አልወጡም፡፡
ቦሪስ ጤናቸው እየተሸሻለ ነው፤ መንፈሳቸውም ተነቃቅቷል ብሏል የጠቅላይ ሚኒስትሩ ጽሕፈት ቤት ባወጣው መግለጫ፡፡

09/04/2020

ከኮሮና ሲሸሽ የነበረው እንግሊዛዊ በፖሊስ ተያዘ

በእንግሊዝ ደቡብ ምሥራቅ ለንደን፣ ሰሪይ በምትባል አካባቢ ፖሊስ በሰዓት 130 ኪ/ሜ ሲጋልብ የነበረ ግለሰብን በቁጥጥር ስር አውሎታል። ፖሊስ እንደሚለው ግለሰቡ ሞተሩን በዚህ አስፈሪ ፍጥነት ሲጋልብ የነበረው ኮሮናቫይረስ እንዳይዘው ስለሰጋ ነበር።

09/04/2020

ከአራት መቶ ሺ ሰዎች በላይ በቫይረሱ የተያዘባትና ክፉኛ በኮሮና እየተመታች ባለችው አሜሪካ 6.6 ሚሊዮን አሜሪካውያን ስራ አጥ ነን በሚል ለመንግሥት አመልክተዋል። በሚሊዮኖች የሚቆጠሩ ሰዎች በቫይረሱ ምክንያት ስራ አጥ መሆናቸው የአሜሪካ ኢኮኖሚን ሊያሽመደምደው እንደሚችል ማሳያ እንደሆነ በዘርፉ ያሉ ተንታኞች ይናገራሉ። አሜሪካ ቫይረሱን ለመቆጣጠር ብላ ያሳለፈቻችቸው የቤት መቀመጥና እንቅስቃሴ መገደብ ውሳኔዎች መዘዞችን አስከትለዋል።

ምንጭ፦ቢቢሲ

09/04/2020

ካሜሮናዊቷ እናት በኮሮናቫይረስ መያዟን ተከትሎ የወለደቻትን ልጅ አቅፋ መሳም አልቻለችም።

09/04/2020

የ75 ዓመቱ የኡጋንዳው ፕሬዝዳንት፣ ዩዌሪ ሙሴቬኒ በቢሯቸው ውስጥ ዱብ ዱብ ሲሉ የሚያሳይ ቪዲዮ ለቅቀዋል። ይህ ቪዲዩ በኮሮና ወረርሽኝ ወቅት ዜጎች በቤታቸው የአካል ብቃት እንቅስቃሴ እንዲያደርጉ ለማበረታታት ያለመ ነው ተብሏል።
ፕሬዝዳንቱ ሰውነታቸውን ካሟሟቁ በኋላም በአንድ ጊዜ 21 ፑሽ አፕ ሰርተዋል።

ምንጭ፦ቢቢሲ

09/04/2020

የብልጽግና ፓርቲ አመራሮች ለህዳሴው ግድብና ለኮቪድ 19 መከላከል ድጋፍ አደረጉ

የብልጽግና ፓርቲ አመራሮች ለህዳሴው ግድብና ለኮቪድ 19 መከላከል ድጋፍ አደረጉ።

ጠቅላይ ሚኒስትር ዶክተር ዐቢይ አህመድ በፌስ ቡክ ገጻቸው ላይ ”እውነትም እያንዳንዱ ድርጊት ተመጣጣኝ ምላሽን ያስከትላል፣ የብልጽግና ፓርቲ አመራሮችን ጨምሮ እኔንም በበጎ ድርጊታችሁ አስደንቃችሁናል” ብለዋል አመራሮቹን።

“በጎነትን እንደ ተቀበልን፣ በጎነትን እያደረግን ነው በ8100 ለሕዳሴው ግድብ እና 444 ደግሞ ኮቪድ-19ን መከላከያ ድጋፍ አድርገናል እስከ ፍጻሜው በአብሮነት እንጓዛለን” ሲሉ በፌስ ቡክ ገጻቸው ላይ ገልጸዋል፡፡

09/04/2020

በቅርቡ ከእስር የተፈቱት ሐጅ ሰይድ ያሲን ኮሮናን ለመከላከል ለሚደረገው ጥረት 1 ሚሊየን ብርና በጀሞ ፉሪ የሚገኘውን በ1,400 ካሬ ሜትር ላይ ያረፈውን ሕንጻቸውን አንዱን ወለል መንግስት ኮሮናን ለመከላከል ለሚደረገው ጥረት እንዲጠቀምበት እንዲሁም በአዲስ አበባ ለሚገኙ ህንፃዎቻቸው ተከራዮች በሙሉ የአንድ ወር ኪራይ እንዳይከፍሉ ምህረት አድርገውላቸዋል።

09/04/2020

የትግራይ ክልል ምክር ቤት ዛሬ ባካሄደው አስቸኳይ ጉባኤ የኮሮናቫይረስ ወረርሽኝን ለመከላከል ቀደም ሲል የደነገገውን የአስቸኳይ ጊዜ አዋጅ ለተጨማሪ ሶስት ወራት አራዝሟል።

09/04/2020

ጠ/ሚ ዐቢይ ከሱዳን የሉዐላዊ ምክር ቤት ሊቀመንበር ሌተና ጀነራል አብደል ፈታህ አብደልራህማን ቡርሃን ጋር ተወያዩ

ጠቅላይ ሚኒስትር ዶክተር ዐቢይ አህመድ ከሱዳን ሉአላዊ ምክር ቤት መሪ ሌተናል ጄነራል አብደል ፈታህ አብደልራህማን ቡርሃን ጋር በስልክ ተወያዩ።

በነበራቸው ቆይታም ለኮቪድ19 ቀውስ ተገቢውን ምላሽ ለመስጠት በሚቻልባቸው ሁኔታዎች ላይ በቅርበት ስለ መሥራት ዙሪያ መምከራቸውን ጠቅላይ ሚኒስትር ዶክተር ዐቢይ በፌስቡክ ገፃቸው አስታውቀዋል።

በተጨማሪም በዚህ ፈታኝ ወቅት የሁለቱን ሀገራት የኢኮኖሚ ትስስር ስለ ማጠናከር እና በሱዳን ላይ የተጣለውን ማዕቀብ የማስነሳትን ሥራ ስለ መከወን ዙሪያ መምከራቸውንም ገልፀዋል።

09/04/2020

AAT CITY CENTER የ1 ወር የቤት ነፃ አድርጓል!

አያት አደባባይ አካባቢ የሚገኘው AAT CITY CENTER ከ72 በላይ የንግድ ሱቆች ፣ 2 ባንኮች አሉት ፤ እናም በኮቪድ-19 ምክንያት ከየካቲት 25 ዓ/ም ጀምሮ ለሁሉም ተከራዮች (ባንኮቹንም ጨምሮ) የ1ወር የቤት ኪራይ ምህረት አድርጓል። ይህም ማለትም በድምሩ ከ850 ሺ ብር በላይ ይሆናል።

09/04/2020

የኢትዮጵያ መንግስት በኮሮና ቫይረስ ምክንያት ህይወቱ ያለፈ አስከሬን ወደ አገር ውስጥ እንዳይገባ ከልክሏል።

የኢትዮጵያ ሲቪል አቪዬሽን እንዳስታወቀው የኮሮና ቫይረስ መስፋፋትን ተከትሎ በውጭ አገራት በቫይረሱ ምክንያት ህይወቱ ያለፈ አስከሬን ወደ አገር ውስጥ እንዳይገባ ታግዷል።

ባለስልጣኑ ከዚህ ውሳኔ ላይ የደረሰው ከኢትዮጵይ ህብረተሰብ ጤና ኢንስቲትዩት ጋር ባደረገው ምክክር መሆኑን አስታውቋል።

ባለስልጣኑም ወደ በኢትዮጵያ አየር ክልል የመብረር ፈቃድ ላላቸው በድምሩ 14 አየር መንገዶች ከውጭ አገራት በኮሮና ቫይረስ ምክንያት ህይወቱ ያለፈ ሰው አስከሬን ወደ ኢትዮጵያ ይዘው እንዳይገቡ ማገዱን ለኢትዮ ኤፍ ኤም በላከው መግለጫ አስታውቋል።

ሉፍታንዛ፣ ተርኪሽ፣ ግብጽ፣ ኳታር ኤርትራ፣ኢምሬት፣ሩዋንዳ፣ኬንያ ጅቡቲ አየር መንገዶችን ጨምሮ በድመሩ 14 አየር መንገዶች አስከሬን ወደ ኢትዮጵያ እንዳያስገቡ ማገዱን ባለስልጣኑ አስታውቋል። እገዳው የኢትዮጵያ አየር መንገድንም እንደሚመለከት ባለስልጣኑ አስታውቋል።

09/04/2020

በኬንያ በኮቪድ-19 የተያዙ ሰዎች 184 ደረሱ!

በኬንያ ባለፉት 24 ሰዓት 308 የላብራቶሪ ምርመራ ተደርጎ 5 ተጨማሪ ሰዎች በኮሮና ቫይረስ መያዛቸው ተረጋግጧል። ከአምስቱ (5) ግለሰቦች መካከል ሶስቱ (3) የኬንያ ዜጎች ሲሆኑ ሁለቱ የውጭ ሀገር ዜጎች ናቸው።

09/04/2020

በጅቡቲ የመጀመሪያው ሞት ተመዘገበ!

በጅቡቲ በኮሮና ቫይረስ [ኮቪድ-19] የመጀመሪያው ሞት መመዝገቡ ተሰምቷል። በተጨማሪ ባለፉት 24 ሰዓት ውስጥ 293 የላብራቶሪ ምርመራ ተደርጎ አምስት (5) ሰዎች በኮሮና ቫይረስ መያዛቸው ተረጋግጧል። በሀገሪቱ ያሉ አጠቃላይ በኮሮና ቫይረስ [COVID-19] ተጠቂዎች አንድ መቶ አርባ (140) ደርሰዋል።

09/04/2020

በለይቶ ማቆያ የነበሩና ከቫይረሱ ነጻ መሆናቸው የተረጋገጠ 554 ግለሰቦች ከማኅበረሰቡ ጋር እንዲቀላቀሉ ተደረገ

በለይቶ ማቆያ ከ14 ቀናት ቆይታ በኋላ የተለቀቁት 554 ግለሰቦች በተደረገላቸው ምርመራ ከኮሮናቫይረስ ነጻ መሆናቸውም ተረጋግጧል።

ዶክተር ሊያ ታደሰ ዛሬ ለኢዜአ እንደገለጹት፤ የለይቶ ማቆያ የኮሮናቫይረስ በማኅበረሰቡ ውስጥ እንዳይስፋፋ ከሚያደርጉ የዓለም የጤና ድርጅት ምክረ ሃሳቦች ውስጥ አንዱ ነው።

በአገሪቱም የኮሮናቫይረስ ከተከሰተ በኋላ በጠቅላይ ሚኒስትሩ በተቀመጠው አቅጣጫ መሰረት ሁሉም ከውጭ የሚመጡት መንገደኞች በለይቶ ማቆያ እንድቀመጡ ተወስኗል ብለዋል።

ይህም ውሳኔ በሠላም ሚኒስቴር አስተባበሪነት፣ ከጤና ሚኒስቴር፣ ከባህልና ቱሪዝም ሚኒስቴር፣ ከኢትዮጵያ አየር መንገድ እንዲሁም ከጸጥታ አካላት ጋር እየተሰራ መሆኑን ገልጸዋል።

በዚህም መሰረት ከተለያዩ አገራት ወደ ኢትዮጰያ የመጡ መንገደኞች በራሳቸው ወጪ በሆቴሎች ክትትል እየተደረገለቸው መሆኑን ገልጸዋል።

በሌላ በኩል በአስገዳጅ ሁኔታ ከተለያዩ አገራት ወደ አገራቸው የተመለሱ ኢትዮጵያዊያን በዩኑቨርሲቲዎችና በተለያዩ ትምህርት ቤቶች በመንግሥት ወጪ እንዲቆዩ መደረጋቸውን ተናግረዋል።

የአስገዳጅ የለይቶ ማቆያው ከተጀመረ እስካሁን ድረስ አስፈላጊ ምርመራ ተድርጎላቸው 14 ቀን የለይቶ ማቆያ ጊዜያቸውን የጨረሱ 554 ሰዎች ከለይቶ መቆያ መውጣታቸውን ጠቁመዋል።

የለይቶ ማቆያ ጊዜያቸውን የጨረሱት ግለሰቦች ወደ ማኅበረሰቡ ከተቀላቀሉ በኋላ ኅብረተሰቡ ከመድሎና ማግለል ነጻ በሆነ አኳኋን ሊቀበላቸው ይገባል ብለዋል።
ከዚህ ጎን ለጎንም በአሁኑ ወቅት 2 ሺህ 36 ሰዎች በለይቶ ማቆያ ውስጥ አስፈላጊው የጤና ክትትል በባለሙያዎች እየተደረገባቸው እንደሚገኙ ገልጸዋል።

በአገሪቱ የተጀመረው የ14 ቀናት የለይቶ ማቆያም የበሽታውን ስርጭት ለማቆጣጠር ከፍተኛ አስተዋጽዖ ማድረግ መቻሉን ሚኒስትሯ ተናግረዋል።

በአሁኑ ወቅት በአገሪቱ 56 ሰዎች በኮሮናቫይረስ የተያዙ ሲሆን ከእነዚህ ውስጥ ሁለቱ በጽኑ ህሙማን ክፍል የህክምና እርዳታ እየተደረገላቸው ይገኛል።

በዓለም አቀፍ ደረጃ በቫይረሱ የታዙ ሰዎች ቁጥር ከ1 ነጥብ 5 ሚሊዮን በላይ ሆኗል፤ በቫይረሱ የሞቱ ሰዎች ቁጥርም ከ89 ሺህ አልፏል።

ምንጭ፦ኢዜአ

09/04/2020

ታይዋን ዶክተር ቴድሮስ አድኃኖም ላቀረቡት ክስ ምላሽ ሰጠች

የታይዋን ውጭ ጉዳይ መስሪያ ቤት ዶክተር ቴድሮስ ትናንት የሰጡትን መግለጫ ተከትሎ የቀረበው ዘረኝነትን መሰረት ያደረገ ክስ መሰረተ ቢስ ነው ሲል ተቃወመ። የዓለም ጤና ድርጅት ዋና ዳይሬክተር ዶ/ር ቴድሮስ የግድያ ዛቻ እንደደረሰባቸውና ዘረኛና ጸያፍ ስድቦችን ሳይቀር እያስተናገዱ እንደሆነ ለዓለም ሚዲያ መናገራቸውን ተከትሎ ታይዋን ኃላፊው ይቅርታ ሊጠይቁኝ ይገባል ማለቷ ተዘግቧል።

09/04/2020

የአፍሪካ ሀገራት በዓለም አቀፉ የጤና ድርጅት አመራር ላይ የተከፈተውን የስም ማጥፋት ዘመቻ እያወገዙ ነው

በዓለም አቀፉ የጤና ድርጅት አመራር ላይ የተከፈተውን የስም ማጥፋት ዘመቻ እንደሚያወግዙ የአፍሪካ ህብረት ኮሚሽን ሊቀመንበር ሙሳ ፋኪ ማሃማት ገለፁ፡፡

የአፍሪካ ህብረት ለዓለም አቀፉ የጤና ድርጅት እና ለድርጅቱ ዋና ዳይሬክተር ዶ/ር ቴድሮስ አድሃኖም ሙሉ ድጋፍ አንደሚሰጡም ነው የገለፁት፡፡

በዚህ የቀውስ ወቅት ዋናው ትኩረት መሆን ያለበት የኮቪድ-19 ወረርሽኝን ለመቆጣጠር በጋራ መስራት ላይ ነው ብለዋል፡፡

የኬንያው ፕሬዝዳንት ኡሁሩ ኬንያታ በፅ/ቤታቸው ኦፊሴላዊ የትዊተር ገፅ በሰፈረ መልዕክት ለዓለም አቀፉ የጤና ድርጅት እና ለተቋሙ ዋና ዳይሬክተር ዶ/ር ቴድሮስ አድሃኖም ያላቸውን ድጋፍ ይፋ አድርገዋል፡፡

ፕሬዝዳንት ሣህለ ወርቅ ዘውዴ፣ እንዲሁም የሩዋንዳው ፕሬዝዳንት ፖል ካጋሜ በተመሳሳይ በዓለም አቀፉ የጤና ድርጅት አመራር በተለይም በዋና ዳይሬክተሩ ቴድሮስ አድሃኖም ላይ እየተካሄደ ያለውን የስም ማጥፋት ዘመቻ አውግዘዋል፡፡

09/04/2020

64 የቦትስዋና የምክር ቤት አባላት ለይቶ ማቆያ ሊገቡ ነው

የደቡብ አፍሪካዊቷ ሀገር 64 የምክር ቤት አባላት በሙሉ ለይቶ ማቆያ የሚገቡት ምርምራ ባደረገችላቸው ነርስ ላይ ከሁለት ሳምንት በኋላ ኮቪድ-19 መገኘቱን ተከትሎ ነው፡፡

ቦትስዋና እስካሁን 6 ዜጎቿ የኮቪድ-19 ተጠቂ ሲሆኑ አንድ ሞት መዝግባለች፡፡

09/04/2020

"ደግነት የሰው ልጅን የሚያረሰርስ መልካም በረከት ነው" -- ጠቅላይ ሚኒስትር አቢይ አህመድ

ጠቅላይ ሚኒስትር አቢይ አህመድ ደግነት የሰው ልጅን የሚያረሰርስ መልካም በረከት ነው ብለዋል፡፡

ኢትዮጵያውያን በዚህ የቁርጥ ቀን ለወንድሞቻቸው እና ለእህቶቻቸው ስለሚያሳዩት ደግነት የተሰማቸውን ደስታ ገልፀዋል፡፡

ጠቅላይ ሚኒስትሩ በፌስቡክ ገፃቸው ላይ ባሰፈሩት መልዕክት እንደገለጹት ኢትዮጵያውያን የሚያደርጉትን ደግነት እንዲቀጥሉ ጠይቀዋል።

ጠቅላይ ሚኒስትር አቢይ የጋራ አመራር መከራውን እንደሚያሻግርም ነው የገለፁት፡፡

09/04/2020

በኢትዮጵያ ተጨማሪ አንድ ሰው የኮሮናቫይረስ ተገኘበት

በኮቪድ-19 የተያዙ ሰዎች 56 ደረሱ!

በኢትዮጵያ ባለፉት 24 ሰዓት 294 የላብራቶሪ ምርመራ ተደርጎ አንድ (1) ሰው በቫይረሱ መያዙ ተረገግጧል። አጠቃላይ በኢትዮጵያ በቫይረሱ የተያዙ ሰዎች ቁጥርም 56 ደርሷል።

የታማሚው ሁኔታ ፦

ዛሬ በቫይረሱ መያዙ የተረጋገጠው ግለሰብ የአርባ ሶስት (43) ዓመት ካናዳዊ በትውልድ ደግሞ ኢትዮጵያዊ ሲሆን ከካናዳ ወደ ዱባይ ከዛም ከዱባይ ወደ ኢትዮጵያ የመጣና በለይቶ ማቆያ ውስጥ ያለ ነው።

09/04/2020

የትግራይ ክልል ምክር ቤት አስቸኳይ ጉባኤውን እያካሄደ ነው

የትግራይ ክልል ምክር ቤት አስቸኳይ ጉባኤውን በዛሬው እለት በማካሄድ ላይ ይገኛል።

ምክር ቤቱ ስድስተኛ አስቸኳይ ጉባኤውን ከ8 የቪዲዮ ኮንፈረንስ ማካሔጃ አዳራሾች በቪዲዮ ኮንፍረንስ ነው በማካሄድ ላይ የሚገኘው።

በአስቸኳይ ጉባኤ የምክር ቤቱ አባላት በወቅታዊው የኮሮና ቫይረስ መከላከልና ሌሎች ጉዳዮች ላይ ተወያይተው ውሳኔ እንደሚያሳልፉ ይጠበቃል።

09/04/2020

የአስቸኳይ ጊዜ አዋጁ በኮማንድ ፖስት ሳይሆን በሚኒስትሮች ምክር ቤት እንደሚተዳደር መንግስት አስታወቀ

የአስቸኳይ ጊዜ አዋጁ በኮማንድ ፖስት ሳይሆን በሚኒስትሮች ምክር ቤት እንደሚተዳደር ጠቅላይ ዐቃቤ ሕግ አስታወቀ።

ህብረተሰቡ የአስቸኳይ ጊዜ አዋጁ አገርንና ህዝብን ለመጠበቅ ተብሎ የወጣ መሆኑን ተረድቶ ኃላፊነቱን እንዲወጣም ጥሪ ቀርቧል።

የኮሮናቫይረስ (ኮቪድ-19) ወረርሽኝን ለመከላከልና ለመቆጣጠር የወጣውን የአስቸኳይ ጊዜ አዋጅ በተመለከተ ጠቅላይ ዐቃቤ ሕግ አዳነች አቤቤ ዝርዝር ማብራሪያ ሰጥተዋል።

ምንጭ፦ኢዜአ

09/04/2020

2000 የሚሆኑ አረጋዊያንን ከጎዳና ላይ ለማንሣት በመቄዶንያ የአረጋዊያንና የአእምሮ ሕሙማን መርጃ ማእከል ጊዜያዊ ተገጣጣሚ ቤቶች ሊገነቡ ነው

መቄዶንያ የአረጋዊያንና የአእምሮ ሕሙማን መርጃ ማእከል ጊዜያዊ ተገጣጣሚ ቤቶችን የሚገነባው በቅርብ ጊዜ ከጎዳና ላይ ለሚነሡ 2000 ለሚሆኑ አረጋዊያን መጠለያ ነው።

ቤቶቹ የሚገነቡት በከተማ ልማት እና ኮንስትራክሽን ሚኒስቴር አስተባባሪነት ሲሆን፣ ከቅርብ ጊዜ ጀምሮ በዓለማችን እንዲሁም በአገራችን የተከሰተውን ኮሮናቫይረስ (COVID-19) የመከላከል ጥረት ለማገዝ መሆኑም ተገልጿል።

የመቄዶንያ የአረጋዊያንና የአእምሮ ሕሙማን መርጃ ማእከል ምክትል ሥራ አስኪያጅ ተወካይ አቶ አሰፋ ባልኤር፣ በማእከሉ ውስጥ ከ2500 በላይ አረጋዊያን እና የአእምሮ ሕሙማን እንደሚገኙ ጠቁመዋል።

ብዛት ያላቸው አረጋዊያንና የአእምሮ ሕሙማን በአንድ ቦታ ተሰባስበው መኖራቸው ለኮሮናቫይረስ ተጋላጭ የመሆን ዕድላቸውን ከፍ እንደሚያደርገው አቶ አሰፋ ገልጸዋል።

ችግሩን ለመቅረፍ በከተማ ልማት እና ኮንስትራክሽን ሚኒስቴር አስተባባሪነት የተለያዩ ኮንትራክተሮችንና ባለሀብቶችን በማሳተፍ ጊዜያዊ ተገጣጣሚ ቤቶችን ለመገንባት ቦታውን የመጥረግ ሥራ እየተከናወነ እንደሚገኝ ተናግረዋል።

የከተማ ልማት እና ኮንስትራክሽን ሚኒስቴር ለማእከሉ ተረጂዎች ከአንድ ሚሊዮን ብር በላይ የሚያወጡ ቁሳቁሶች ማበርከቱንም ጠቅሰዋል።

አክለውም፣ በማእከሉ የሚገኙ ተረጂዎች በማንኛውም እንቅስቃሴ የሰዎችን እርዳታ የሚጠይቁ በመሆናቸው እና እነዚህን ወገኖች በተንቀሳቃሽ ስልካችን 8161 ላይ በመደወል ok በማለት ልንደግፍ ይገባል ብለዋል።

ምንጭ:- etv

09/04/2020

የአፍሪካ ህብረት ለዓለም የጤና ድርጅት ያልተቆጠብ ድጋፍ እንደሚሰጥ አረጋገጠ

የኮቪድ-19 ወረርሽኝ የዘመኑ ትውልድ ትልቁ የጤና ፈተና ነው ያለው የአፍሪካ ሕብረት፤ ወረርሽኙን ለመቆጣጠር ከዓለም የጤና ድርጅት ጋር በትብበር መስራት ወሳኝ ነው ብሏል፡፡

የኮሮና ቫይረስ ስርጭትን ለመከላከል የዓላማ አንድነት ይዞ በትብብር እና በቅንጅት መስራት አስፈላጊ መሆኑን ጠቁሟል፡፡

የወቅቱ የሕብረቱ ሊቀመንበርና የደቡብ አፍሪካ ፕሬዝዳንት ሲሪል ራማፎሳ የኮቪድ-19 ወረርሽኝን ለመቆጣጠር የዓለም የጤና ድርጅት ዋና ዳይሬክተር ዶ/ር ቴድሮስ አድሃኖም እየሰጡት ያለውን አመራር አድንቀዋል፡፡

ቫይረሱ የልተጠበቀ የዓለም የጤና ቀውስ ከመሆኑ በፊትም ጀምሮ ዶ/ር ቴድሮስ አድሃኖም እየሰጡት ያለው አመራር የሚደነቅ ነው ሲሉ ተናግረዋል፡፡

የሕብረቱ አባል ሀገራት እንዲሁም ዓለም አቀፉ ማህበረሰብ የቫይረሱን ስርጭት ለመቆጣጠር እያደረጉት ያለውን ድጋፍ በማጠናከር በትብብር እንዲሰሩም ጥሪ አቅርበዋል፡፡

የኮቪድ-19 ወረርሽኝን ለመቆጣጠር ቁልፉ መፍትሄ ዓለም አቀፍ ትብበርን በማጠናከር በቅንጅት መስራት መሆኑን ነው ፕሬዝዳንት ራማፎሳ ያሳሰቡት፡፡

ምንጭ፡- etv

09/04/2020

ዩናይትድ ኪንግደም የዱቄት እጥረት ገጥሟታል

በኮሮናቫይረስ ምክንያት በርካታ የዩናይትድ ኪንግደም ዜጎች ዳቦ ኩሽናቸው ውስጥ መጋገር መጀመራቸውን ተከትሎ የዳቦ ዱቄት ከገበያ እየጠፋ ነው። የዳቦ ዱቄት ገበያ ከዚህ በፊት ከነበረው በ90 በመቶ መጨመሩም ተዘግቧል። ዳቦ እንዴት መጋገር እችላለሁ? የሚሉ የዳቦ አሠራር ጥያቄዎች ጉግል ላይ መበራከታቸውም ተሰምቷል።

09/04/2020

በሚያዚያ መጨረሻ ጣሊያናውያን በነፃነት መንቀሳቀስ ይጀምራሉ

የጣሊያን ጠቅላይ ሚኒስትር ጁሴፔ ኮንቴ በያዝነው የፈረንጆቹ ወር መጨረሻ ጣልያን ቀስ በቀስ የእንቅስቃሴ ዕገዳውን ልታቀል ትችላለች እያሉ ነው። ከቢቢሲ ጋር ቆይታ ያደረጉት ኮንቴ ሳይንቲስቶች ካረጋገጡልን በያዝነው ወር መገባደጃ ግድም ሰዎች እንቅስቃሴ ማድረግ እንዲጀምሩ እናደርጋለን ብለዋል።

09/04/2020

በህንድ የሚማሩ ኢትዮጵያውያን ተማሪዎች የኮሮና ቫይረስ ስርጭትን ለመከላከል ከ250 ሺህ ብር በላይ ለገሱ

በህንድ የሚማሩ ኢትዮጵያውያን ተማሪዎች የኮሮና ቫይረስ ስርጭትን ለመከላከል ከ250 ሺህ ብር በላይ ለገሱ።

በሀገሪቱ የተለያዩ ዩኒቨርሲቲዎች የሚማሩ ከ1 ሺህ የሚበልጡ ተማሪዎች ናቸው በኢትዮጵያ የኮሮና ቫይረስ ስርጭትን ለመከላከል የሚውል የገንዘብ ድጋፍ ያደረጉት።

በህንድ የኢትዮጵያ ባለሙሉ ስልጣን አምባሳደር ዶክተር ትዝታ ሙሉጌታ እንደገለጹት፥ ኤምባሲው በኢሜል፣ በፌስቡክ፣ በተማሪ አደረጃጀት እንዲሁም በምስል የተቀነባበረ ዘዴ በመጠቀም ለተማሪዎቹ ስለወረርሽኙ አስከፊነትና ጥንቃቄ እያስገነዘበ ነው።

የቫይረሱ ስርጭት በቁጥጥር ስር እስከሚውል ድረስም ይህ ስራ እንደሚቀጥል አምባሳደር ትዝታ ተናግረዋል።

ተማሪዎቹ ላደረጉት የገንዘብ ድጋፍ በኤምባሲው ስም አምባሳደሯ ምስጋና አቅርበዋል።

09/04/2020

እስካሁን 1.5 ሚሊዮን ሰዎች በኮቪድ-19 ሲያዙ፤ 329 ሺህ ደግሞ ድነዋል
በሽታው ክፉኛ የጎዳቸው 88 ሺህ ሰዎች ደግሞ ህይወታቸውን ማጣታቸውን የጆንስ ሆፕኪንግስ ዩኒቨርስቲ የሚያሰባስበው መረጃ ያመለክታል።

09/04/2020

የዶክተር ቴድሮስ ምሬት

የዓለም ጤና ድርጅት ኃላፊ ዶ/ር ቴድሮስ አድኃኖም የግድያ ዛቻ እና የዘረኛ ንግግር ጥቃት እየተሰነዘረባቸው መሆኑን ተናገሩ።
ዶ/ር ቴድሮስ "የግድያ ዛቻ ደርሶብኛል፤ እኔ ግን ግድ አይሰጠኝም" ሲሉ የተቃጣባቸውን ጥቃት ጠንከር ባሉ ቃላቶች በሰጡት መግለጫ አጣጥለዋል።
"ከሁለትና ከሦስት ወር በላይ ዘረኛ ጥቃቶች ተሰንዝረውብኛል። ጥቁር፣ ባርያ ተብያለሁ። እውነቱን ለመናገር እኔ በጥቁርነቴ እኮራለሁ። የሚባለው ነገርም ግድ አይሰጠኝም" ሲሉም አክለዋል።
"በዘረኛ ንግግር በግል ጥቃት ሲደርስብኝ የበታችነት ስሜት ስለማይሰማኝ ምንም አይመስለኝም። ምክንያቱም እኔ ኩሩ ጥቁር ነኝ።" ኃላፊው በሰጡት መግለጫ ላለፉት ሦስት ወራት እሳቸው ላይ ያነጣጠሩ ዘለፋዎች እንደተሰሙ ገልጸዋል።

ምንጭ፦ቢቢሲ