18/10/2023
Irreecha fi Irreeffannaa
Waaqa fi Waaqeffannaa
Hora Finfinnee fi Abbaa Malkaa Hora Finfinnee..
Irreechi Hora Finfinnee ega addaan citee baroota heedduu lakkoofsisee booda bara 2011/2019 deebi'ee eegale. Akka hayyoonni argaa dhageettii waan kanaa qaban dubbatanitti, irreechi Hora Finfinnee kun waggoota 150 (jaarraa tokkoof walakkaa) oliif akka hin irteeffatamne dhoowwamee addaan citee ture jedha qorataan seenaa fi og barreessaa Taabor Waamii akka barreessetti.
Finfinneen handhuura Oromoon Tuulamaa itti walga’ee irreeffatuufi eebba Abbaa Muudaa itti argatu ture.
Suuraa Irreecha Hora Finfinnee bara 1903, Irreecha Hora Finfinnee kan akaakilee irraa dhaalee hanga guyyaa addaan cituutti eebbisee saaqaa ture Abbaa Muudaa Sarrawwaa Lumeeti jedhama.
Ilmaan warra Sarrawwaa Lumee kan amma lubbuun jiran akka jedhanitti, barri Oromoon Hora Finfinneetti irreeffataa ture sun, bara quufaa, bara jaalalaa, bara kabajaa, bara aadaafi safuu guddaadhaan jiraatan ture.
Akka horteen Sarrawwaa Lumee itti dabaluun ibsanittis, gosoonni Oromoo naannoo Hora Finfinnee turan, Oromoo Gullallee, Eekkaa, Gumbichuu, Galaan, Abbichuu; akkasumas, Karrayyuu fuudhaaf heerumaan dhufaniifi kanneen biroos turan.
Namoonni wal dhabbii fi wal abaarsa qaban, Malkaa Irreechaa Hora Finfinnee irreeffachuuf odoo hin dhaqiin, dursanii dhaqanii dhiifama waliif taasisu. Warri wal abaare waliif tufee aagii waliif baasa. dhibaafatanii, muuddatanii, walitti biifanii erga walitti araaramanii waliif qulqullaa’anii booda gara Malkaa Irreeffachaa deemu.
Namoonni waldhabdee qaban odoo waliif hin qulqullaa’iin gara Malkaa Hora Finfinnee yoo deeman oofkaltii hin argatan jedhanii amanu waan ta'eef dura dhakaa Araaraa deemanii waliif dhiisanii ega wal hiikanii booda gara malkaa Irreeffannaa deemu.
Akka Abaabileen Obbo Sarrawwaa Lumee Obbo Deessis Dabalee jedhanitti, Irreechi Hora Finfinnee kan addaan cite bara Abbaa Muudaa jedhamuutti.
