30/09/2023
Alaabaa fi Irreecha|Alaabaa keenyaa fi kan jaraa
Ijoolleen keenya Oromiyaa keessatti irreecha irratti hirmaachuuf qophiitti jirtan of-eeggannoo cimsaa. Akkuma beekamu ayyana Masqalaa baranaa kana irratti warri leellistoota sirna Minilik alaabaa lummuxxii(gos-tokkee) kan urji ofirraa hin qabneen faayamanii ayyaanicha irratti hirmaatan Oromiyaa bakkoota garaa garaatti alaabichi irraa funaanamuun isaa miidiyaalee hawaasaa garaagaraa irratti tamsaasamee arginee jirra. Amma immoo Ayyaana irreechaa irrattis waan wal-fakkaataa fakkaatee garuu kan hammeenyummaa guddaa of-keessaa qabu ijoollee Oromoo Alaabaa Oromoo qabatan irratti raawwachuuf akeeka waan qaban fakkaatu.
Egaa anis sodaan qaba. Sodaan kiyyas ijoolleen keenya Alaabaa keenya qabattanii yoo Ayyaana Irreechaa kana irratti argamtan warri PP akka warra leellistoota sirna Minilik isinirraa sassaabanii qofa gadi isin lakkisuu dhiisuu danda’u. Oromootti baayyee garaa jabaatu. Balaa hamaa isinirraan geessisuu danda’u. Kanaaf yoo isiniif danda’ame Alaabaa Abbaa gadaatiin faayamaa deemaa. Wareegama garmalee hin baasinaa. Gaafa Abbaa Biyyaa* taane bilisummaadhaan Alaabaa keenya mirmirsaa deemna. Ammaaf Oromoonni guutuu Addunyaa keessa facaanee jirru nii mirmirsina.
Hubachiisa: Yaadakoo akka hin micciirre. Ani ilaalcha biraa of-keessaa qabaadhee utuu hin taane akka ilma Oromoo tokkootti, ijoollee Oromoo keessaa namni tokkollee sababa kanaatiin hidhamuun, reebamuun, dhiigaa dhangala’uun, akkasumas ajjeefamuun akka hin dhagahamne barbaadeeni. Kanuma!
Irreecha Gaarii!
Gadaa M Gaarii