30/04/2023
سلام عليكم الشنوي بلاك يسمح مي دير في بالك جامي ولا راح ينسى كيما يقولو الشنوي ما يتبلعط يحييها و ما ينساش ، في سنة 2018 خمس سنوات للور صرا شغب و إعتداءات جبانة في ملعب حملاوي بين شوطي المباراة كاين تصاور كيما كاين فيديوهات الناس قاع شافت واش صرا المغرب العربي قاع سمع بينا نص كبير تقاس من شعبنا كاين لي دخل المشفى و الحمد لله سلامات و تصرا في الرجال ، آيا لحقنا للدار دخلنا لقينا ولاد بلادنا كيما تسموهم نتوما في عوض ما يتضامنو معانا و يواسيونا في هذي المحنة لقيناهم يستشفاو أمن أو لا تأمن يضحكو و كامل يستشفاو خاصة في وحد فيديو تاع خونا دار بوز كحل ، آيا هذاك وقت و هذيك بريودة الصعيبة لي جازت علينا واش لقينا لقينا هذا الجمهور لي فيه إلترا حاكمة قاع كورفا و بعثتلنا رسالة من الفيراج مفادها " كل التضامن مع جماهير المولودية " ، علاش يتضامنو معانا خاطرش هذو يحبونا بقلبهم و عشرتهم عشرت عمر و سنين من بكري جمهور ديال الرجاء و المولودية دم واحد مالغري راهي سخونة بزاف هذا لعوام في السياسة لاكن حبيتو ولا كرهتو هذا الجمهور بيناتهم غير حدود و يجي نهار لي يتلاقاو إن شاء الله غير في الخير ، المهم يجي ليوما واحد عقلو في مأخرة تاعو يقولي نتوما تشيتو للمراركة و كذا إيه ملخر هذو خاوتنا و أفهمها كيما تحب و نموتو على البراني يالي تستناونا في الفيراج باش تطعنونا في الظهر ياو نتوما قاع ضد المولودية و حنايا ضد الكل ، تحيا الجمهور ديال الرجاء و الجمهور ديال المولودية نبقاو خاوة إلى يوم يبعثون و لا عزاء للحاقدين و ربي يسهل على كل واحد 🇲🇦🇩🇿
