كلام يجرح ويداوي

كلام يجرح ويداوي لا شي مستحيل عندما يكون الله بجانبك❤️ 𝒉𝒆'𝒔 𝒋𝒆𝒂𝒍𝒐𝒖𝒔 𝒐𝒇 𝒑𝒆𝒐𝒑𝒍𝒆 𝒂𝒏𝒅 𝒉𝒆'𝒔 𝒂𝒍𝒍

02/02/2025

#رسائلكــــــــم
سلام بنات انا مطلقة و عندي بنت درت دوسي تع سكنة بعد ماطلقت و عطاوني سكنة الحمد لله بعد 3 سنين ماما رفضت نروح نسكن وحدي فيها وليت حطيت فيها حوايجي لي جبتهم من عند طليقي و مرة ع مرة نروح نسيقها و نحل تواقي عندي عام و نص ملي ديتها المهم يا خواتاتي درك يما خرجتلي بخرجة قاتلي اعطي السكنة لخوك خويا قبل عطاوها سكنة باعها و دار مشروع خسر فيه و لدرك هو كاري عندو 20 سنة كاري قتلها لا هاذي سكنتي و سكنت بنتي قاتلي سخسرتيها في خوك باش كي تتزوجي تمديها للراجل قتلها الزواج ماشي في راسي واذا تزوجت محال نعطيه مستقبل بنتي قاتلي بنتك تتزوج و تروح لراجلها انا رفضت درك يالبنات راهي منوضتها عليا خواتاتي لبنات و خواتي الذكور راهم مدابزيني و مشنفين عليا و قاتلي متمديش سكنة لخوك تخرجي من الدار و تنساينا قتلها نعيطه يسكنها بصح تبقى باسمي باش يرتاح شوي من الكرية مع اني والله محتاجة بصح قلت ملعيش قاتلي لا تكتبيهالو باسمو رفضت و درك راهي تحاوز فيا من دار بابا و قاتلي تنساي بلي عندك امك و خواتك وش ندير تعيشو كرهت حياتي تدعي عليا ونهار كامل تبكي و تندب في وجهي علما عمري 30 سنة و خايفة على مستقبلي انا و بنتي

02/02/2025

#رسائلكــــــم
🔴 رسالـــة لبعض الأطباء الخواص هل يعقل أن تفرض على المريض لكي يأخذ موعد يحضر مع الفجر يسجل في قائمة و يبقى في الشارع حتى الساعة الثامنة أو اكثر !
ماتقدروش تخدمو بالرقمنة؟ و لا بالرونديفو المسبق ؟

01/02/2025

#رسائلكم
انا ارملة و عندي يتامى صغار نخدم عليهم نخدم طباخة في ريسطورون تاع راجل ختي مؤخرا صرا بينو و بين ختي مشاكل و فضت بالطلاق بيناتهم ختي رجعت لدارنا و انا معرفتش وش ندير اسك نبقى نخدم عندو عادي بعدما طلق مع ختي ولا لازم نحبس و نشوف خدمة
للعلم معنديش مدخول بخلاف الخدمة هاذي و هو يعطيني الشهرية 6 ملاين فالشهر

01/02/2025

#رسائلكــــــــم
كنت نطيب فالكسرة صونالي التيليفون لقيتو خطيبي هزيت عليه قالي اني قدام داركم ازربي ا خرجي اني مديك نتغداو شوا انا و ياك فالريسطورون ازربي مطوليش رحت نجري لبست قشي وخرجت انا غير ركبت فاللوطو و السيد قال اخخخخخخخ وشي هاذا ابن عمي قتلو خير وش قالي ريحة العرق فيك دايرة حالة وشي هاذا غميتيني قتلو اني كنت مع الطاجين وزيد نتا زرتيني قالي مي سيا كوسا بعد وجبد دوصوميل رماهالي قالي اشري صابون وستيك و قرعة ريحة مبقيتيش تخلي روحك كيما هك ديمارينا صدقوني كل زوج دقايق يقولي اوووف ريحة العرق سمشي شوي و يعاود اوووووف ريحة العرق وصلنا حبيت ندخل ناكل لداخل قالي لا ناكلو برا يزيدو يشمو ريحتك ثاني أقسم بالله يا الماكلة ماشفيت عليها و ماتمتعت بيها مالنشيع لي ديتو و ذرك ملي روحت مقدرت ندير ندير والو جامي في حياتي ديت النشيع كيم هذا راني فري مصدومة و منيش كيفاش ندير معاه

31/01/2025

#رسائل
لقيت سلسلة تاع ذهب تسوا بزاف طايحة في مقبرة و كان وقتها العيد قلت كانش واحدة من الزايرات طيحتها ايا رفدتها خبيتها قلت بلاك تبان مولاتها ووصيت العساس اذا سقسات واحدة عليها هاوين تلقاني... و بعد 8 سنين ماكانش لي بانت ايا قلت نلبسها في خطبة بنت سلفي لول البارح و كي جيت رقدت بيها توقف عليا مرا كبيرة في السن و نور ما شفتش كيما هو من قبل قعدت تقولي بنتي فلانة فلانة دار قدام الجامع.....امانة امانة اديلها الأمانة و بصبعها لرقبتي على السلسلة نضت قلتها لراجلي قالي هبلتي و لا كيفاش اسكتي لاتضحك عليك الناس...عيطت لخويا صاحبو امام سقسا على الجامع و اذا كاين مخلوقة بذاك الاسم و اللقب ايا لقاوها و جا خويا في دقيقتها داني ليها و حكيتلها طرطقت تبكي قالتلي هدي سلسلة يما دفنتها معاها خاطر حياتها كامل و هي تلم عليها و ما لبستهش الا قبل وفاتها مرة و كي قلتلها هاهي حبت ترجعلك قالتلي انا راني في ازمة لازم ندير عملية و ما لقيتش دراهم و دعيت يا ربي فرجها عليا و شفت يما تمسح على جبهتي تقولي ما تخافيش ما تخافيش رايحة نبعثلك امانة و تريحي ....و هاكي جيتي انتى و جبتيلي السلسلة و لا انا لا هي بقينا نبكو ما صدقناش كيفاش ربي قادر يفرجها ...بلاك ما تصدقوش و لا بصح هدي فعلا صراتلي البارح راجلي ما صدقنيش خويا و صاحبو الامام قالو تصرا كيما هك....سبحان الله .....حبيت نشاركها معاكم خلو يقينكم بالله كبير. #

30/01/2025

#رسائلكم
مرت سلفي لمبعرة عندها ربعين يوم من لي ولدت لبارح قاتلي ارواحي اخلفيني في داري راني ماشية للحمام باش تقابليلي ولدي و نروح أليز قولولي هو حرام كي نحكم بيبي عمره ربعين يوم ومازال لحد الان مادوشولوش ويظل يبكي ليل مع النهار و مايرقدش كامل غاضني كان يصرع بريحة الحماض مسكين حكمتو دخلتو حممتلو وكيستلو جسمو حتى راحولو كامل القشور اللي فيه رجع يهبل ورجع فيه ريحة الشامبو ودهنتو بالزيت مليح كسلتو عضامو لي ملي زاد شكيت ماتكسلو
المهم رقد من الظهر للعصر جات امو لقاتو راقد انا مشيت لداري مع المغرب عيطتلي تزعف و تبكي تقولي واش عملتيلو ماحبش ينوض قاتلي ارواحي ضركا كيما رقدتيه نوضيه ولا نشكي بيك 😢 قلتلهم الولد راقد مسكين بيه ريح من الدود لي فيه
عندو فتره مارقدش مليح قاتلي انتي كاش مادرتيلو صرعتيه داتو تجري للطبيب و فوتت عليه و قاللهم الولد راهو مليح مابيه والو راهو راقد عادي رفدت روحي و جيت لداري راهي غير تعيط ماحبيتش نهز عليها قولولي غلطت معاها كي دخلت روحي ولا هي لي غلطت معايا؟

#رسائلانا هيا لي قطعت البطاطا وخبيتها في صاشيات لرمضان باش في رمضان نقلي برك شوفو كيفاه صرالها 💔
30/01/2025

#رسائل
انا هيا لي قطعت البطاطا وخبيتها في صاشيات لرمضان باش في رمضان نقلي برك شوفو كيفاه صرالها 💔

29/01/2025

#رسائلكم
راجلي سلفتلو 200 مليون قلي ندير بروجي كان بطال تخيلو لبارح راح حر.ڨ و بعتلي مسج قلي راكي مطلقة ب 3 😔

29/01/2025

#رسائل
سلام لبنات حبيت أعطوني حل..من مدة زارتني وحدة من العائلة تاعي هي وراجلها.نسكن انا في سكن وضيفي كبير وفي بلاصة مليحة تاع تحواس من جات وهي تقول دار كبيرة ومشرهة فريجيدارك كبير..راهو عندك ماء سخون ديما تهنيتي ..وراجلك عاقل ومتهنية المهم حوايج ياسر المهم يالبنات من راحت بعدها بنهار تعاركت مع راجلي على حاجة تافهة مهدرش معايا 12اليوم و هاذي من تزوجنا 9 سنين جامي صرات وبعدها كلش خسرلي الفريجيدار شوفبان ماشينة لافي لباتور لعيون تكسرو وزيد مشكل راح باه يخدم شوفبان قلو ميتخدمش طيشو وي زيد فريجيدار خدمتو بمليون محبش يتصلح راهو فاسد ...داري وليت نقي متبانش عليها والله كرهت معرفتها عين والا حسد واش ندير لبنات مورالي طايح

29/01/2025

#رسالة 🥹
لبنات عندي 7 سنوات بلا ولاد وسكنت وحدي داري باردة ساكتة مقبرة مفيها حتى حياة ليوم صليت ودعيت ربي يرزقني جا راجلي لقاني نبكي عرفني بلي على لولاد. خزر فيا وقالي ديريني انا ولدك ولكان تحبي بنتك نورمال نقبل هه ضحكت ممبعد حضني قالي متبكيش يعيياو يجريو ويقلقوك ونهار تجي تشكيلي نعطيك بلمطرق سكت شوي ممبعد قالي نهار تجيبلي بنوتة نقلب دنيا نذبح ونسلخ ونفرح منرقدش تعرفو يالبنات كي زاد قالي هك وليت نبكي بصوت اصعب امتحان هو ضناية ادعيولي يرزقني ربي

28/01/2025

#رسالة😎
دوك نقولكم علاش حنا رجال نكرهو منكم بلخف 😌 :
تخيلو عندي مدامتي 😌 نسهر معاها للوحدة وأنا نعبرلها على مشاعري وكي نجي حنرقد متخلينييييش تزعف لازم نطلع نهار معاها ولا نتسما عندي وحدة اخرة 🐸 أمبعد صباح نوض بكري كاره حياتي رايح نخدم و هي راقدة 💦تقعد كل دقيقة تعيطلي وأنا خدام منقدرش نريبوندي تزيد تبعت ميساج شبيك حبيبي شكون داتك عليا 💩 منريبونديش نكون مديرونجي مع ناس نقول امبعد نريبوندي 🙏 نحط تيليفون سيليونس ونروح 12 وقت نفطر😋 نفطر و نولي نخدم تولي 5 نولي لدار عيان ندوش نربوزي شوي ومبعد نتعشا و نخرج نريح شوية مع صحابي نجي نرفد تلفون باه نعيطلها .. نضرب طلة فتيليفون 50 آبال و 20 ميساج
امبعد نقول نعيط ونسقسي عليها تبدا تطلق فجياحاتها و تقولي اممممممم و تتنهد نكرررره حياتي وتبدا تلوم وتعاود نكوبي عليها
خلاص نروح لدار ندخل فيس يخرجولي لي ستاتو تاع لحزن و جعلته أكثر مما أملك و خدعني وتحط طفلة مقطعة يدها و دايرة سيروم وصحاباتها يكومونتيو و يدعو عليا الله لا تربحو وليد لحرام يعطيلو ضربة 😑 ودعاوي شر غير هوما
شوية هكا يبداو يعيطوووليي أنا بنت خالتها 🐸💦 راهي فسبيطار 😱نقولها علاه 😰 تقولي كلات دوا تاع لفيران وحبت تموت و حبسنها دقيقة لخرة بففففف وهيا قاعدة قدامها نسمع فيها توَتوَت تقلها قوليلو هك وهك 😒 علاه يعني حسو بينا شوي مشي كل دقيقة لازم نڨصرو في تلفون شوياااا مش هكدا😒😒

28/01/2025

#رسائل
انا امراة مطلقة و عندي 32 سنة و عندي طفل عمرو عامين . ماطولتش في زواجي و عشت ايام صعيبة بصح الحمد لله كلش جاز لتيهيت بتربية وليدي و ماخرجت ولا تعرفت بكاش واحد و طليقي عاود تزوج في فترة صغيرة و ربي رزقو بطفل آخر . و هو حر .. انا مثقة و عندي تجربة في عمل في مجالات عديدة الحمد لله يا رب برك كيما قلتلكم ماخرجتش باش نخدم كبرت وليدي .. الاب ديالو مايجيش قريب كامل بصح يبعثلي النفقة تاعو ...
انا في الآونة الاخيرة هدرولي على تطبيق التعارف لهدف الزواج جربتو و كانو كاينين الي يتمسخرو و كاين الي جادين . من بينهم راجل عمرو 36 سنة متزوج و حاب التعدد و كاين الي مطلق مع طفلين و ماشي قابل وليدي .... المشكل العقلية بانتليي صغيرة و مزال ماشي ناضجين .و قررت نخرج من التطبيق حتى بعثلي هاذ الانسان هو اعزب ماقاليش السن ديالو بصح قابل بالطفل ديالي و وليد فاميليا و متربي و عندو السكن الخاص بيه وخدام الله ييارك ماخسرش معايا الهدرة و قالي كلش عليه و حسيت العوض فيه بعد ربي سبحانو و انا وليت مدعورة في الانسان لي كنت متزوجة بيه كان حاجة و بان حاجة اخرى .. و هاذ اليومين بعد شهر و شويا من تعارف شكيت في سن ديالو بسيف باش صارحني و انا قلت الحد 45 سنة بصح هو قالي 52 سنة يعني كبير عليا ب 20 سنة .. هي فالتصاور مايبانش و حتى في لاكام يبان قل علابيها ماشكيتش فيه و ديت موقف الي خبا عليا . و هو وك راه يحوس يخطبني و قالي ماكبت عليك في والو غير السن بصح انا خفت اذا يخبي عليا امر آخر و خفت فارق السن ثاني خفت كون نبدا نخدم و يبانلي انسان آخر و نندم .
اذا كاين كاش واحدة مرت لتجربة كيما هادي و وش تنصحوني . راح نقرا كامل التعليقات . و من فضلكم مانحبش تعليقات الجارحة .و كل واحد و همو . انا عييت و واحد ماعارف وش جوزت . شكرا

27/01/2025

#رسائلكم
انا الكنة الأولى سكنت مع عجوزتي 3سنين نطيبو في كوزينة وحدة وكي تزوج سلفي الصغير عجوزتي قالت لراجلي اقسم وحدك في الحوش المهم قسمنا زدنا على غرفتنا صالون وكوزين وحشاكم دوش وتوالات
المفيد عدت نطيب وحدي وبيت شيخي تطيبلهم سلفتي الجديدة خصني شوية ثوم رحت ليهم قلت نتسلف من عندهم حبة ثوم لخاطر ساكنين في حوش واحد المهم قلت لعجوزتي خالتي اعطيني حبة ثوم قالتلي روحي للكوزينة سلفتك راهي طيب في العشاء تعطيك قبل مانوصل للكوزينة طليت من التاقة تاع الكوزينة لي في الحوش على سلفتي لقيتها حشاكم تب... #ول في الكسرونة وفرغت الب.. #ول في العشاء يالبنات هربت نجري بلا ماتحسلي والله غاضوني سورتو شيخي مريض توكل فيهم الخما...ج
تعيشو لبنات حابة نكشفها بصح واش ندير قلبي وجعني حتى راجلي موالف ياكل عندهم وموالفين حتى انا يذوقوني
معناه الكل شبعنا من خما......جها انصحوني تعيشو
متلعبوهاش زعما مخلوعين رانا في وقت نسمعو العجب

27/01/2025

#ميساج
ياخياتي قلبي راه يتقطع اليوم بابا يحكي مع خويا قالو بابا راني متوحش اللحم خويا متزوج دارو وحدو أيا خويا قالو والله دك تعشيتو بيه بابا قالو راني من العيد مكليتوش خويا لا حشمة الاحياء قتلو تعشيت باللحم وجيت ستنيت يقلو نجيبلك والله مقالو بابا هبط راسو مسكين كان يخدم كي مرض طاح فراش صاي ميقدرش غاضني كي جاء خارج خويا قتلو كي قالك راني متوحشو علاه زدت شاهيتو وقتلو تعشيتو بدى يط.يح ويقلي الي فاتو وقتو ميطمع في وقت ناس قتلو راح قال مرتو جات قاتلي راكم طامعين فينا وقيل نشرولكم لحم هدا ما خصكم قالي غير كيما شرا لنسيبتو راح تزوج بنتها وسمع بابا لقيتو مغطي وجهو ويبكي قلبي نقطع خويا من نهار تزوج خلاص ولا براني علينا غاضني بابا تعب علينا معا تالي تجي مرت خويا تعا..يرنا هو ويها

26/01/2025

#رسائلكــــــــم
عرسي قريب وعندي قطة كنت نهدر مع خطيبي قتلو نجيبها معايا قالي نسقسي يما وكي سقساها عيطتلي قاتلي متجيبهاش معاك عيطت لخطيبي قتلو يماك قاتلي مجيبيش القطة قالي كما قالت يما قتلو يا نجيب معايا القطة يامنجيش زادت عيطتلي يماه قاتلي انساي تجيبيها عاودت عيطتلو قتلو يماك ماشي قابلة نجيب القطة اكريلي وحدي باش نجيب القطة معايا زادت عيطتلي قاتلي يا تسمحي فالقطة ولاوليدي يسمح فيك وهو قالي خيري يا انا يالقطة وانا خيرت القطة واش رايكم زعما غلطت شفتو من درك بدات يماه ديرلي المشا'كل تهنيت منهم ‼️

26/01/2025

#رسائل
انا ماما وبابا ميحبونيش وليوم تاكدت انا عمري 15وماما 34وليوم صبغت شعرها وعجبني لونو جا يهبل وزادت بلاكاته جاها يهبل قلتلها انا تاني نحوس نصبغ شعري مخلاتنيش ملغري صحبتي تقرا معايا تصبغو نورمال مرة داراتو حمر ومرة برتقالي وماما محبتش تخليني وحلفتلي وزيد بابا قبيل في الليل قتلو حابة ناكل شكولة قالي ني عيان دروك قالي غدوة الصباح نجيبلك ومنبعد نروح للخدمة قلت معليش بالاك عيان وحيرقد حتى دكا شفت ضو شمبرتهم مفتوح ويهدر ويضحك مع ماما يتسما مهوش عيان كون جا عيان راه راقد وهو غي يكذب عليا💔

26/01/2025

#رسائلكم
راجلي حلف فيا يط'لقني على جال والديا والسبة يجيو عندي بزاف سيرتو بابا يجي تقريبا صباح وعشية باسكوا متعلق بيا ياسر وانا الطفلة الوحيدة عندو وحشمت نقوللهم ماتجيوش عندي والبارح قالي كون نزيد نلقاهم هنا نحاوزهم يزوروك مرة على مرة مش كل يوم عندي وبصراحة راجلي عندو حق من جيهة بصح من جيهة خلاف هذوك والديا وش ندير معاهم باه ينقصو المجي عندي.

26/01/2025

#رسائلكم ...

درك انا مطلوب مني نحلف على المصحف ونشهد شهادة حق ولو شهدت شهادة حق للاسف سلفتى تطلق ويتخرب بيتها لاني انا وسلفتي الاخرى شفنا سلفتنا التانية مع واحد جارنا في وضع مر يب في شمبرتها وسلفتي ناضت تعيط كي شافت سلفتى هدي وانا هربت الراجل اللي كان معاها ومخليتش حتى حد يشوفه ودارو قعدة والمطلوب منى نشهد باللي شفته اذا هدرت تطيح الروح وديار بزاف تخرب ولو نسكت سلفتى هذه لي فض..حتهم تصرالها مشكله وتبان اتهمتها زور وهي لي تتخرب دارها منيش عارفه وش ندير في زوج يبكيو واحدة باه نسكت والتانيه باه نهدر واش ندير راني حايرة نهدر ول نسكت . راني خايفة من ربي

Adresse

Algiers
16

Site Web

Notifications

Soyez le premier à savoir et laissez-nous vous envoyer un courriel lorsque كلام يجرح ويداوي publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Vidéos

#ههههههههههههه #مادريات 🤣🤣

#بانطجيووو 😂🤣

#ههههه انت اللي بديت شيغي 😂😂😂😂

#اللهم_صل_وسلم_على_سيدنا_محمد

#هذي حشمت زعما 🤣🤣

🤣🤣🤣🤣

🔴فيديو البنت التي تعذب أمها شاهد كيفية المعاملة مع أمها داخل المنزل لا تبخلو علينا بجام ومتابعة لي صفحة #بارطجي #فيديو #متخليهش #يحبس #عنندك #أبوني_ياك_باطل_ولا_حنا_ما_نستاهلوش )

#نصيحةمن_ذهب

#الف مبروك يا سعدية 😂🤣🤣

#

##متداول_حالياً من طرقات الجزائر.

#هههههه

Raccourcis

Partager

Type