اللي راح من العمر راح وموحال ترجع أيامو
واللي طاح من العين طاح جبال الدنيا ما تعلي مقامو
#ناس #بكري
#العشرة #العشرة_عندها_ناسها
أولاد اليوم الله يهديهم
تهلاو في البراني ونساو والديهم
#ناس_بكري
ناس بكري قالوا ...
_ ثلاثة يضمنوا ثلاثة :
الصباط يضمن لك الحفا
والبرنوس يضمن لك الدفا
والكلمة مع الرجال تضمن الوفا
_ وثلاثة ينقصوا من ثلاثة :
الكيل ينقص من العُرمة
والعرا ينقص من الرمة
والكذب ينقص من الحُرمة .
#ناس_بكري
قالو ناس بكري ...
خسارة القمح في الدواب، وخسارة العسل في الكلاب، وخسارة الهدرة في لي ما يعرف جواب
#ناس_بكري
قالو ناس بكري ...
الوقت تبدل وتبدلت معاه السيرة، والإنسان غير يغفل يجبدو بيه الحصيرة.
#ناس_بكري
قالوا ناس بكري ...
اللي عندو سلطانة ما تغرو جواري
واللي عندها سلطان ما يغرها لعب الذراري
#ناس_بكري
ناس بكري قالوا ...
ناس تلقاها سلعة ذهب، وناس ذوق الحطب
ناس تتعاشر وتتحب، وناس رد بالك تعطيهم الجنب 👌
#ناس_بكري
ناس بكري قالوا ...
اللي باعك بالفول بيعو بقشورو ،
و اللي نكر خيرك ما تقيمو بدورو .
واللي نساك أنساه وما تخمم فيه ،
وخليه للعالي يتكفل بيه .
#ناس_بكري
قالو ناس بكري
خيار الرجال لي يصون العشرة و خيار النسا الحرة،المليح مليح على طول الزمان، ويقسم معاك الحلوة والمرة، ولا تمد للشمايت بظهرك ولا تغفل يخلوك بين الناس عرة، وافرح بصاحب الاصل واخطيك من هذي الزريعة المرة، لي تربى على القدر والنيف موحال يجي يوم و ينكر معاك العشرة، تروح ليام وتفوت ويبقى غير العيب مرسوم في البال ذكرى ...
#ناس_بكري
قالوا ناس بكري ...
قداه من تاج فوق راس مولاه عواج
ظنو رواحهم سبوعة وهوما غير نعاج
#ناس_بكري
قالوا ناس بكري ...
النّاس بالنّاس والنّاس بالله، كاين ناس تجي في حياتك كيما النعمة، وناس تجي وتخلّي غُمّة، ناس محلاهم كيما النسمة، وناس عمرك ما تشوف عليهم بسمة، كاين ناس كي تشوفهم تنسى وتغفر وناس كي تشوفهم تولّي تستغفر، ناس بكلمة يوصلوك للقمّة وناس بكلمة يحبطو الهمّة، ناس بسكاتها ذهب معيّر، وناس بسكاتها قلوب تحيّر.
#ناس_بكري
