15/12/2024
Das gesamte AHP-Team wünscht Ihnen einen schönen 2. Advent. ✨🕯
Passend dazu ein Weihnachtsgedicht von einer lieben AHP-Leserin! 🥰
Da Advent und die weihnachtliche Zeit ✨
De Weihnacht stehd scho boid vor da Tür, es is wieder so weid,
und gar schnell gehds uma, de adventliche Zeit.
Hammas guad gnutzt, de adventliche,
vom ganzn Jahr, so sogt ma, de staadeste Zeit?
Hamma zamgramt des Herz, ned grod des Haus?
Oda kemma mit lauter Eikaffalaffa mit da Zeit gar nimma aus ?
Mia moan, mia müss'n jedn Tag laffa und renna,
ma mecht ja möglich vui Gschenga zammbringa.
Dass des Herz zammgricht werdn soid für die heilige Nacht,
des werd meist übasegn, ma müaßt sich scho fragn,
wo soid si bei mir denn des "Christkindl" hilegn?
De Kamma im Herz drin, hand lang no ned gricht,
da werd's aba Zeit, dass ma a Machtwörtl spricht!
Ma muaß ausrama des Herz von Habsucht und Gier,
da Neid und de Eifersucht wohnan a no nebn ihr,
muaß einlassn ins Herz de Liab und de Freid,
de Nachsicht und a de Warmherzigkeit.
Da kimmt in da heilign Nacht des Christkind gern aa zu dia
und nimmt ei sein Blotz, dennst hergricht hast dafüa.
Dann is a Weihnacht, s' kunnd scheena ned sei,
ziagt Christkindl in der heiligen Nacht in deinem Herz dann ei.
Dann is aa ned dragisch, wenn untam Jahr oana kimmd,
di aa schubst und aufweckt, wie de Hirtn
und zu dia sagt "Kimm steh no glei auf und geh no grad mit,
mia zwoa gemma heid zu dem himmlischen Kind".
Dieses tolle Weihnachtsgedicht stammt von der lieben AHP-Leserin, Resi Schuhbäck aus Palling! ✨🥰
