24/12/2022
Mwen tonbe
Mwen rele Marlin ,m soti nan lakou Maslen nan vil Jakmèl .Mwen se pitit Manmi Bout ,Klèmansya .Manman kite Jakmèl depi finn akouche ti frèm Oslen ,ki pa konnen papa l.
Depi lane 2000 nou antre Potoprens , Klèmansya fanm li gason. Lekòl, kay, manje bwè se te chay li , li pa janm plenyen . Manman m gen yon ti fraz fransè li toujou ap kleronen : On trouve le secret de la vie dans les etudes . Se nan sa li kwè ki fè nou pa janm pèdi yon jou lekòl pou lajan.
Men lavi pap di 'w , yon jou , yon vandredi sen li pral vann nan mache vyalè sou zòn Tigwav li fe aksidan li pèdi de pye l. Depi lè a trèz mare katòz ,nou pa gen rele nou pa gen reponn . M te nan reto , ti frèm nan te nan mayen de. Manmi Bout deside tounen jakmel nan lakou l. Konsa omwen na manje , lakay se lakay. Manman m vann Pistach griye bò lari a epi li lote tout sa li jwenn.
Mwen vinn fini ak lekòl mwen , pa gen mwayen pou m al potoprens , ni pou m al aprann yon metye . konsa mwen vinn ap cheche yon degaje. Nan pale ak moun , mwen rankontre yon zanmi ki ankouraje m enskri pou defile nan kanaval Jakmèl . Mwen ale , mwen pase konkou an . Se la mwen rankontre Riko ,bel gason , byen kanpe ki se moun Jakmèl men ki ap viv aletranje .
Riko pi gran pase m lontan , si li tap fè pitit bonè li te ka papa m . Li ofri m syèl la ak tè a , men mwen sak tap vire tounen nan tèt mwen se te al etidye . M di li rèv mwen , m di 'l sitiyasyon mwen,manmanm ak ti frè m . La menm li telman konprann mwen , li vle rankontre manman m .
Aprè rankont sa a , Riko fè'm konen kèlkeswa sa'm vle lap ban mwen li . Mwen chwazi al etidye enfimyè potoprens ,mwen monte ansanm ak ti frè m . Chak kou Rico sot nan yo mo li toujou renmen itilize , se nan kay la li vle rete , toujou ap mande m eske m vle marye ak li . Men mwen menm m te toujou wè nan Riko yon pwotektè , yon papa. Jantiyes li ak bon konprann li fè nou rive depase baryè papa pwotektè a , nou rive nan kouche ansanm . Mwen vinn ansent , manmanm di avan pitit fèt akouche maryaj .
Riko fè yon gwo fèt li envite tout zanmi nou epi li banm yon bag. Chak ane ki pase lòt ane se ap ane maryaj nou .Riko sanble pè marye kounya a . Pitit nou ap grandi epi m fini nan enfimyè , Riko pa vle tande pale ni pou nou al viv menm kote ak li ni pou li vinn viv menm kote ak nou . Pou mwen ta sanble gen yon rezon kache ki lakòz sa . Sa kòmanse mete nou nan diskisyon .Yon jou li antre sòt nan ,m di l avan nou kouche mwen vle konen poukisa li natiralize ameriken epi l pa chwazi fè nou al viv nan tou . Li reponn mwen : ou genlè bezwen rezidans pou al pran ti jenn gason lòt bò. Sa te vekse m anpil , aprè trèz ane nou gen ansanm se konsa li wè m . M di l tout sak te sou kè mwen , rimè kòm kwa li marye nan etazini, fanmi l li pa janm prezante m, elatriye . Konsa li souflete m , se te premye fwa .
Pèsòn pa gen dwa frape pèsòn nan yon relasyon , m te jire pap gen yon dezyè m fwa. Nan demen pandan li soti m kite kay la ak tout pitit mwen .Mwen ale kay yon zanmi. Apre set jou yon manda vinn jwenn mwen pou paret tribinal . Riko bezwen pou lajistis deside sou kiyès kap gade pitit la paske li pretann mwen pran pitit li m pa vle kite l we l.Mwen pwofite montre plent mwen te depoze pou li lè li te frape m nan . Li vit kouri mande yon atan alamyab . Pou lajistis se ti zen madanm ak mari ,leta pa mele, yo voye nou al antann nou. Nan apre demen li mande m pou nou rankontre lakay la . Mwen vini menm kite pitit fi nou Naika ak zanmi m nan . Riko mande m pou nou tounen ansan ,mwen di l m pap ba li chans pou li frape m yon lòt fwa .Se fini, Fini F I N I . Li di m mwen se pou li , si m pa pou li ,m pap pou pèsòn ankò . Pandan map reponn li mwen pa byen prive pèsòn , menm janm pa chwazi ak li jodi a ,mwen ka chwazi gen relasyon ak nenpòt moun , fwa sa repons li se kout kouto nan zantray mwen . Konsa tout rèv mwen tap defile , vizaj pitit mwen tap pase ,Manmi Bout kòd mare vant , mwen tonbe .Kilè yon lòt Martin ap tonbe
Bernard Victor...
