Gəncə Media Mərkəzi haqqında
«Gənc Liderlər»Təhsil, Təlim və İnkişaf İçtimai Birliyi tərəfindən 2006-cı ildən yaradılan Gəncə Media Mərkəzi (GMM) artıq öz işini müstəqil bir KİV orqanı kimi qura bilib. ABŞ-ın Demokratiyaya Milli Dəstək Fondunun maliyyə yardımı ilə fəaliyyətə başlayan Mərkəz həmin ildə Gəncənin yeni saytını da yaratdı. “Ganca.Az” xəbər portalı tədricən böyük oxucu kütləsi qazanan
regionun ilk müstəqil web KİV-nə çevrildi. Sayt oxucuları gündəlik informasiyalarla təmin etməklə yanaşı, maraqlananları Gəncənin tarixi keçmişi, mədəni irsi və müasir həyatı barədə də ətraflı bilgilərlə təmin edir. Burada həmçinin şəhərin bir sıra qurumları, eləcə də istirahət və əyləncə obyektləri haqda da məlumatlandırıcı informasiyalar yer alıb. Gəncə Media Mərkəzi daim bölgədə fəaliyyət göstərən jurnalistlər üçün müxtəlif layihələr və onların peşəkarlığının artırılması üçün müxtəlif treninqlər həyata keçirir. GMM-nin Qərb bölgəsində çalışan jurnalistlər üçün resurs mərkəzi kimi də fəaliyyət göstərir. Burada jurnalistlər müxtəlif resurs bazalarından, həmçinin məlumat bazasından istifadə imkanı əldə ediblər. Bir sıra KİV-lərlə əlaqələr yaradan GMM, daim paytaxt oxucularını da bölgələrin durumu və burada baş verən olaylarla bağlı məlumatlandırmaq üçün bir sıra tanınmış mərkəzi qəzetlərlə əməkdaşlıq edir. Peşəkar jurnalist heyətinə malik Mərkəz televiziya və video məhsulların hazırlanması sahəsində də layihələr reallaşdırıb. Bunlardan biri kimi yerli “Kəpəz” televiziyası üçün hazırlanan insan haqlarına dair “Femida” proqramını qeyd etmək olar. Hazırda “Yeni Media” layihəsini reallaşdıran Mərkəz bir sıra proqram və reportajlarını öz web portalı olan “Ganca.Az”-da yayımlayır. Həmçinin GMM-də müxtəlif tədbirlərin keçirilməsi üçün bir sıra media təşkilatldarına və QHT-lərə konfrans zalından istifadə imkanları verir.
