Qafqaz Xəbər Agentliyi

13/12/2024

11/12/2024

Öz gözündə şalbanı görməyən Frankenşteyn başqasının gözündə tük axtarır – “Sabiqlər” rubrikasından

Frankenşteyn öz gözündə həm şalbanı görür, həm də tükü. Sadəcə özünü görməzliyə vurur.
Eh, vaxt var idi ki, buradakı sabiqlər ölkədə at oynadırdılar: maşınlar, cangüdənlər, gözəl-göyçək katibələrlə villalarda kef çəkir, adaxlıbazlıq və digər işlərlə məşğul olurdular.
Amma bu gün onlar törətdikləri cinayətlərə görə həbs olunub, uzun müddətə azadlıqdan məhrum ediliblər.

Onların bəzilərinin cinayət məsuliyyətinə cəlb olunmasında biz jurnalistlərin də az əməyi olmayıb. Obyektiv jurnalist araşdırmaları apararaq onların əməllərini ifşa edib ictimaiyyətə təqdim etmişik. Onlar haqqında mənfi ictimai rəy formalaşandan sonra cinayət məsuliyyətinə cəlb olunublar.

Demək olar ki, hər kəs bilir ki, bəndəniz 7-ci ildir ki, Penitensiar Xidmətin 9 saylı cəzaçəkmə müəssisəsində məhkumluq həyatı yaşayır. Buranın məhkum kontingenti digər müəssisələrin məhkumlarından xeyli fərqlidir. Çünki burada əsasən sabiq məmurlar cəza çəkir.

Bir vaxtlar ölkənin beyin mərkəzləri sayılan bu şəxslər indi burada yeyib-içib bekarçılıqdan qeybət edirlər. Mənim fikrimcə, onlar Rusiyanın həbsxanalarında cəza çəkib səhərdən axşama qədər Sibir meşələrində ağac kəsib yerbəyer etsəydilər, bəlkə də qeybət etməyə heyləri qalmazdı. Ancaq bizim cəzaçəkmə müəssisəmiz qocalar evinə bənzədiyi üçün buranın bəzi sabiqləri səfeh işlərlə məşğuldurlar.

Haqqımda qeybət edən sabiqlərdən birinə cavab vermək istədim. Sonra ehtiyat etdim. Bu yaxınlarda sui-qəsdə məruz qalmağımı bir çoxlarınız bilirsiniz. Ona görə də hələ ki, özümə “stop” dedim.

Cavab vermək istədiyim həmin sabiq xarici görünüşü ilə “Drakula” filmindəki Frankenşteynə bənzəyir. Neçə illər yüksək rütbəli məmur işlədiyi üçün 200 milyon avro sərvəti var. Bizim başqasının sərvətində gözümüz yoxdur. Kimin nəyi varsa, özünə qismət olsun. Amma söhbət cinayət yolu ilə əldə edilmiş varidatdan gedirsə, xalqın ağır maddi durumu dərhal göz önünə gəlir.

Burada da həmin məmur məhkum olmasına baxmayaraq, xalqın sərvətinin hesabına digər məhkumlardan ibarət mütəşəkkil qoşun saxlayır. “Mütəşəkkil” sözünə xüsusi diqqət yetirin. Niyə məhz mütəşəkkil? Çox güman ki, bu söz onun beyninə gənclik illərindən həkk olunub.

Gənc yaşlarında o mütəşəkkil qaydada mərhum eks-prezident Əbülfəz Elçibəylə risk edib görüşlər keçirərək onun qəlbini fəth etmişdi. Sonradan yüksək vəzifəli məmur olan bu şəxs indi burada hikkəsindən gözləri qan çəkərək cəza çəkir. Məhkum olmasına baxmayaraq, mənim haqqımda qeybət edərək məni burada “reket jurnalist” adlandırıb.

Lakin çox yanılır. Çünki vaxtilə ən böyük reket məmurlardan biri özü olub. İndi isə burada yığdıqlarını qaytarsa da, əfvə düşə bilmir və buna görə jurnalistləri günahlandırır. Reket nazirlə kirvə olaraq oğlunu həmin nazirlikdə işə düzəldib, ondan oğluna reketçiliyi yaxşı öyrətməsini xahiş edib ki, sabah atasının yarımçıq qalan işlərini davam etdirsin.

Mən isə nə nazir olmuşam, nə general. Vaxtilə təsadüfən Daxili İşlər Nazirliyinin zabiti olmuşam. Daha sonra kriminal xəbərlər üzrə jurnalist araşdırmaları apardığım üçün bu sabiqlərin arasına düşmüşəm. İndi isə düşündüm ki, ən yaxşısı, "Frankenşteynə" yazaraq ictimaiyyət vasitəsilə cavab verim.

Sabah o mənim üstümə mütəşəkkil qoşun göndərsə, mən də cavab olaraq bildirərəm ki, “axı vaxtında bu barədə balaca cızma-qara edərək ictimaiyyəti məlumatlandırmışdım”.

Mən bu sabiq "Frankenşteyni" qınamıram. O, neçə illər yüksək rütbəli məmur vəzifəsində işləyərək cəmiyyətə neqativ baxışla yanaşıb və indiyə qədər baş verənlərdən bir nəticə çıxarmayıb. Azadlıqda olduğu kimi, burada da mütəşəkkil qoşun saxlayır.

Onun kimi sabiq məmurların çirkin əməllərini ictimailəşdirdiyim üçün bu gün də reket məmurlar tərəfindən təhdid və şantaja məruz qalıram. Ölkənin əksər tənqidçi jurnalistləri şərlənərək reketçilikdə suçlanıb uzun müddətə azadlıqdan məhrum edilib. Halbuki bütün dünya ictimaiyyəti bilir ki, tənqidçi jurnalist reket ola bilməz.

Ey Frankenşteyn! Sən dəvə saxlaya, həmkarının ailəsini maşından düşürüb avtomobilini əllərindən ala bilərsən. Amma unutma ki, cəmiyyətdə elə yaşamalısan ki, öz keçmiş həmkarını həbsxanada görüb onun üstünə mütəşəkkil qoşun göndərməyəsən.

Ardı var…
Mahmud Rasimoğlu
17.11.2024

06/12/2024

Azadlığa çıxmaq üçün uşaqlarını ağlamağa məcbur edən MTN polkovnikinin acı hekayəsi

Serj Sarkisyanın fotosu ilə hekayəyə başlamağımın səbəbi bəhs etdiyim polkovnikin Ermənistanın keçmiş prezidenti Serj Sarkisyanla oxşarlığının, sanki, bir almanın iki yerə bölünməsinə bənzəməsidir.

MTN polkovnikinin əsl adını çəkməsəm də, onun murdar hərəkətlərinə görə məhkum yoldaşları onu “Aykanuş hacının oğlu” deyil, “Ayxanım hacının oğlu” kimi çağırırlar və belə də tanıyırlar.

Bu “Ayxanım hacının oğlu” vaxtilə MTN-də irəli çəkilmək üçün mərhum eks-nazir Namiq Abbasovla qohum olmuşdur. Daha sonra sələfi Eldar Mahmudovun dönəmində də xidmətini davam etdirmiş və hətta Gömrük Komitəsində qızıl-zinət əşyalarının monopoliyasını ələ keçirmişdir.

O, illər boyu zərgərlik fəaliyyəti ilə məşğul olan sahibkarlara MTN adı ilə təzyiqlər edərək onların evlərini, son qəpiklərini əllərindən almış, hətta bəzilərini dilənçi vəziyyətinə salmışdır. İtaət etməyənləri isə həbs etdirərək uzun müddət azadlıqdan məhrum etmişdir.

2015-ci ilin MTN hadisələrində “Ayxanım hacının oğlu” da həbs olunaraq 14 il müddətinə azadlıqdan məhrum edilmişdir.

O, Penitensiar Xidmətin 9 saylı Cəzaçəkmə Müəssisəsinin məhkumu olandan sonra öz aləmində dövlətə qarşı hiyləgər plan hazırlamışdır. Prezident Aparatında yüksək vəzifəli bir məmurun nəvələrinin oxuduğu məktəbə öz uşaqlarını yerləşdirməyə nail olmuşdur. Amma bununla kifayətlənməmiş, uşaqlarına telefonla zəng edərək ağlamağı öyrətmişdir.

Uşaqlarına belə demişdir: “Əgər Prezident Aparatındakı məmurun nəvələrini götürməyə gələnləri görsəniz, ağlamağa başlayın. Sizi soruşsalar ki, ‘Uşaqlar, niyə ağlayırsınız?’ deyin ki, ‘Bizim atamız MTN polkovniki olub, amma indi həbsdədir. Xahiş edirik, onun azadlığa çıxmasına kömək edin.’”

Təhlükəsizlik xidməti onun bu hiyləsindən xəbər tutaraq vaxtında qabaqlayıcı tədbirlər görmüş və bu planı boşa çıxarmışdır.

Vaxtilə sahibkarlara qan udduran, onları həbs etdirən bu polkovnikin ağlına belə gəlməzdi ki, bir gün özü həbs olunacaq və azadlığa çıxmaq üçün hətta öz uşaqlarından belə istifadə edəcək.

Onun canını yandıran əsas məsələ isə rəhbərlik etdiyi idarənin baş idarə rəisinin 2020-ci ildə əfv edilərək azadlığa çıxmasıdır. Halbuki o, hələ də həbsxanadadır və uşaqlarına ağlamağı öyrətməklə məşğuldur.

Əslində, MTN olayları baş verməsəydi də, Eldar Mahmudovun göstərişi ilə “Ayxanım hacının oğlu” törətdiyi cinayətlərə görə MTN tərəfindən həbs ediləcəkdi. Onun MTN adından sui-istifadə edərək öz biznes bazarını qurduğu barədə nazirə məlumat verilmişdi.

Eldar Mahmudovun tapşırığı ilə “Ayxanım hacının oğlu”nun üzərində əməliyyat planı hazırlanmış və iki MTN generalı bu əməliyyata rəhbərlik etmişdi. Lakin MTN olayları baş verdiyi üçün onun üzərində qurulan əməliyyatı digər hüquq-mühafizə orqanı həyata keçirmişdir.

Bir sözlə, ona qandal vurulması əsl MTN-çilərə qismət olmamışdır.

Cəzaçəkmə müəssisəsində məhkum yoldaşları onun Serj Sarkisyanla necə də oxşadığını deyirlər. “Ayxanım hacının oğlu” isə bununla fəxr etdiyini bildirir. Onun bu sözündən sonra məhkumlar yumruqla onun plastik əməliyyat olunan burnunu sındırmışlar. Üstəlik, deyiblər: “Kaş qulaqlarını da plastik əməliyyat etdirərdin, onları da sındırardıq!”

Beləliklə, məhkum MTN polkovnikinin acı hekayəsi burada sona çatır.

Mən isə artıq yeddi ildir ki, məhkumluq həyatı yaşayıram. Bəzən hətta bu vəziyyətimə sevinirəm. Fikirləşirəm ki, həbs olunmasaydım, burada murdar və mənfi xarakterli məhkumlarla rastlaşmaz, onların bu çirkin əməllərindən hekayələr yazmaq mənə nəsib olmazdı.

Yaxşısını bilən Allahdır!

Mahmud Rasimoğlu
07.11.2024.

06/11/2024

Azadlığa gedən yol Əliməmməd Nuriyevin “doğanağından” keçirmiş

Hörmətli oxucular,
Məsəl var deyərlər,”Örkən nə qədər uzun olsa da yenə də gəlib doğanaqdan keçər”.
Hər zaman atalarımızdan gələn bu cür deyimlərə hörmətlə yanaşmışam və çalışmışam ki, şüurlu həyatımda belə deyimlərin məntiqi mənasını dərk edərək deyilənlərə əməl edəm.
Bu yaxınlarda “Konstitusiya” Araşdırmalar Fondu (KAF) adı altında Azərbaycan Respublikasında Qeyri-Hökümət Təşkilatlarına Dövlət Dəstəyi Agentliyinin nümayəndəsi kimi Prezident yanında Əfv Komissiyasının üzvü Əliməmməd Nuriyev 30 oktyabr 2024-cü il tarixində saat 10:30-dan 18:00-dək 09 saylı cəzaçəkmə müəssisəsində saxlanılan bir qrup məhkumlara hüquqi yardım göstərmək məqsədilə qəbul keçirmişdir.
Fikirləşdim ki, qəbula yazılmaqdansa, qəbul edilənləri müşahidə etmək və qəbul edənlərin əsl niyyətini ifşa etmək ictimaiyyətimiz üçün daha maraqlı olar.
Apardığım müşahidələrdən gördüm ki, dünənə kimi Azərbaycan dövlətinin adından hökm edən, qərar qəbul edən, qanunçuluğun keşiyində dayanan, insan hüquq və azadlıqlarını müdafiəsini təmin edən şəxslər həbs edilərək məhkum olunduqdan sonra bu gün azadlıq hüquqlarının təminatı ilə bağlı Əliməmməd Nuriyevə müraciət etmək məcburiyyətində qalıblar.
Cənab Əliməmməd Nuriyev isə öz növbəsində “sabiqlər”i qəbul edərək böyük həvəslə, maraqla və aramla dinləyib dərdlərinə şərik olur, onlara “səbrli” olmağı tövsiyə edir və “köməklik” göstəriləcəyinə vəd verir.

Deyirlər ki, ümid insanları yaşadır və insanlarla son mənzilə kimi yoldaş olur.
Biz də ümid edək ki, cənab Əliməmməd Nuriyevin təmsil etdiyi “Konstitusiya” Araşdırmalar Fondu bu insanların ümidlərini doğrultmağa çalışacaqdır.
Bununla razılaşmaq istəsəm də ürəyimdəki şübhələr məni rahat buraxmadı və nəhayət uzun “çək-çevirdən” sonra cənab Əliməmməd Nuriyevlə birgə cəzaçəkmə müəssisəsinə gəlmiş, lakin şəxsiyyəti və missiyası mənə məlum olmayan cavan bir oğlanla həmsöhbət olmağa nail oldum. Soruşdum ki “nə kimi hüquqi yardım göstərmək imkanına maliksiniz?”
“Qardaş” dedi ki, “hüquqi yardım yox, hüquqi məsləhət veririk”.
Dedim ki, “09 saylı cəzaçəkmə müəssisəsində saxlanılan şəxslər xüsusi kontengentdir, əksəriyyəti dövlət hakimiyyəti orqanlarında müxtəlif vəzifələrdə çalışmış ali təhsilli hüquqşünaslardırlar. Bu kateqoriyadan olan şəxslərə siz hansı “hüquqi məsləhət” verə bilərsiniz?”

“Qardaş” dedi ki, “o baxır kimin nə problemi var”.
Dedim ki, “bayaqdan qəbul etdiyiniz şəxslərin (sabiqlərin) hamısının barəsində məhkəmə qərarı yox, siyası qərarlar qəbul edilmişdir. Elə biri mən özüm, hakimiyyət özbaşınalığının qurbanıyam. Mənə və digər qəbul etdiyiniz bu şəxslərə nə “məsləhət” verə bilərsiz?”
“Qardaş” cavab verdi ki, “qəbula yazıl, 50 adam qəbul etmişik”.
Dedim “mənim də adımı yaz qəbul olunanların siyahısına, olum 51-ci adam – İbadov Telman İbad oğlu”.

“Qardaş” bir söz demədən, pilləkənləri iri addımlarla yuxarı qalxaraq otağın qapısından içəri girdi.
Maraqlıdır, görəsən, “Konstitusiya” Araşdırmalar Fondu adı altında fəaliyyət göstərən bu “Dövlət Agentliyi” cəzaçəkmə müəssisələrində saxlanılan şəxslərin Azərbaycan Respublikasının Konstitusiyasının 25; 28; 29; 31; 38; 41; 57; 60; 63; 68; 71 və sair maddələrində təsbit olunmuş bərabərlik hüququnun, azadlıq hüququnun, mülkiyyət hüququnun, təhlükəsiz yaşamaq hüququnun, sosial təminat hüququnun, sağlamlığın qorunması hüququnun, müraciət etmək hüququnun müdafiəsi, eləcə də hüquq və azadlıqlarının inzibati və məhkəmə təminatı, təqsirsizlik prezumpsiyası, özbaşınalıqdan müdafiə, insan və vətəndaş hüquq və azadlıqlarının təminatı ilə bağlı bu günədək dövlət hakimiyyəti orqanları qarşısında hansı vəsatətlər qaldırıblar ki, özlərini “Konstitusiya” Araşdırmalar Fondu adlandırırlar?!

Axı Konstitusiyamızın nəyi araşdırılır və ya Konstitusiyamız niyə araşdırılır axı?!
Referendum yolu ilə qəbul edilmiş Azərbaycan Respublikasının Konstitusiyasında təsbit olunan hüquq və azadlıqların müdafiəsinə dövlət tərəfindən təminat verildiyi halda, “Konstitusiya” Araşdırmalar Fondu nəyi və necə araşdırır?!
Bu suallara cavab axtarışı ilə müəyyən etdim ki, sən demə şərti ad altında cəzaçəkmə müəssisələrində ayrı-ayrı şəxsləri qəbul edən bu “fond”un nümayəndələri “hüquqi yardım göstərmək” adı ilə monitorinq aparırlarmış.
Belə bir monitorinqin aparılmasında məqsəd ayrı-ayrı hüquqi və demokratik ölkələrin siyasi məhbuslarla bağlı ölkəmizə qarşı irəli sürdükləri iddiaların əsassız olmasını sübut etməkdən ibarətdir.

Məhz bu məqsədlə cənab Əliməmməd Nuriyev “başının dəstəsi ilə” 09 saylı cəzaçəkmə müəssisəsinə gəlmiş və bilavasitə siyasi hakimiyyətin maraq dairəsində olan şəxslərlə görüş keçirmiş, buna dair müvafiq formada ərizə (qəbul) blanklarını tərtib etmiş, qəbul etdiyi şəxslərə isə “vədlər” verərək gəlişinin əsl niyyətini gizlətməyə çalışmışdır.
Sözsüz ki, azadlıq elə bir nemətdir ki, hər bir canlı varlığın ürəyi azadlıq eşqi ilə çırpınır.
Lakin azadlıq veriləndə deyil, alınanda şirin olur. Azadlığın alınması isə mübarizə yolundan keçir.
Əgər hər hansı bir şəxs öz təqsirsizliyinin və halal haqqının mübarizəsini aparmaqla öz azadlığına qovuşa bilmirsə, cənab Əliməmməd Nuriyevin timsalında neçə-neçə “hüquqi yardım” göstərmək və ya “hüquqi məsləhət” vermək niyyətində olan şəxslər belə insanlara azadlıq hüququnu hansı prinsiplər və ya şərtlər əsasında bəxş edə bilərlər?!

Qəbul edilmiş insanların ümidləri və yanaşma tərzləri mənə qənaətə gəlməyə əsas verdi ki, sanki azadlığa gedən yol cənab Əliməmməd Nuriyevin “doğanağından” keçirmiş.
Hər necə olursa, olsun, təki bu insanların ümidləri və cənab Əliməmməd Nuriyevin “səyləri” boşa çıxmasın. Amin!
Diqqətinizə görə təşəkkürümü bildirirəm.

Hörmətlə,
Hazrda 09 saylı cəzaçəkmə müəssisəsində sifarişli həbsdə saxlanılan, hüquq üzrə fəlsəfə doktoru Telman İbad oğlu İbadov 06/11/2024

30/10/2024

Ədaləti mühakimə edənlərə qarşı “ədalət mühakiməsi”nin ədalətsizliyi

Hörmətli oxucular,
Azərbaycan Respublikası Konstitusiyasının 25-ci maddəsinin I hissəsindən məlum olduğu kimi hamı qanun və məhkəmə qarşısında bərabər olmalıdır.
Bununla əlaqədar olaraq həmin maddənin V hissəsində birmənalı şəkildə qeyd olunur ki, hüquq və vəzifələrlə bağlı qərarlar qəbul edən dövlət orqanları və dövlət hakimiyyəti səlahiyyətlərinin daşıyıcıları ilə münasibətdə hər kəsin bərabər hüquuqlarını təmin etməlidirlər.
İlk baxışdan zəmanətverici hüquqi norma kimi görünən bu konstitusion hüquq normasının pərdəarxası prinsiplərinin əsasında isə tamamilə başqa bir reallığın dayandığı aşkar edilmişdir.
Belə ki, 2016-cı ildə Azərbaycan Respublikası Prezidentinin imzaladığı Sərəncama əsasən, az ağır cinayət törətmiş şəxslərlə bağlı mümkün qədər həbs qətimkan tədbbirlərinin seçilməməsi cinayət prosesini həyata keçirən orqanlara tövsiyə edilmiş və belə hallarda alternativ növlərin tətbiqi nəzərdə tutulmuşdur.
Ölkə başçısının bu Sərəncamından sonra cinayət prosesini həyata keçirən orqanlar əks mövqe seçərək az ağır cinayət törətmiş şəxsləri ağır və ya xüsusilə ağır cinayətlərin törədilməsində ittiham ettməklə barələrində həbs qətimkan tədbirinin seçilməsinə nail olmuşlar.
Statistik məlumatlar təhlil edildikdə (təbii ki, bu məlumatlar əsl həqiqəti özündə əks etdirirsə) müəyyən etmək mümkündür ki, 2017-ci ildən başlayaraq bu günə qədər cinayət törətmiş şəxslərin (və ya sifarişlə həbs edilən şəxslərin) böyük əksəriyyəti ağır və ya xüsusilə ağır cinayətlərin törədilməsində ittiham edilərək məhkum edilmiş şəxslərdir.
Cəzaçəkmə müəssisələrinin növünü müəyyən edən Azərbaycan Respublikası Cəzaların İcrası Məcəlləsinin 66-cı maddəsinin tələblərindən məlum olduğu kimi cəzaçəkmə müəssisələri məntəqə tipli, ciddi, xüsusi rejimli cəzaçəkmə müəssisələrinə, tərbiyə müəssisələri isə ümumi və möhkəm rejimli müəssisələrə bölünürlər.
Burada qeyd olunan ümumi rejimli cəzaçəkmə müəssisələri isə 2 hissəyə bölünmüş və az ağır cinayət törətmiş şəxslərlə ilk dəfə ağır cinayət törədərək cəzalarını ümumi rejimli cəzaçəkmə müəssisəsində çəkməyə məhkum edilmiş şəxslərin ayrılıqda saxlanılmaları nəzərdə tutulmuuşdur.
Bundan əlavə ilk dəfə və ya dəfələrlə ağır və ya xüsusilə ağır cinayət törətmiş şəxslər ciddi rejimli, xüsusi rejimli cəzaçəkmə müəssisələrində və həbsxanalarda saxlanılırlar.
Bu növ cəzaçəkmə müəssisələrində saxlanılan ağır və ya xüsusilə ağır cinayət törətmiş şəxslərin 2017-ci ildən əvvəl və sonra müqayisəli təhlili aparılmaqla müəyyən edilir ki, cinayət prosesini həyata keçirən orqanlar Azərbaycan Respublikası Prezidentinin məlum Sərəncamından sonra az ağır cinayət törətmiş şəxsləri və sifarişlə həbs olunan şəxsləri ağır və ya xüsusilə ağır cinayət törədilməsində ittiham edərək məhkum etmişlər.
Azərbaycan Respublikası Cinayət Məcəlləsinin 15-ci maddəsində təsbit olunan cinayətlərin təsnifatından görünür ki, qəsdən və ya ehtiyatsızlıqdan törədilməsinə görə nəzərdə tutulmuş azadlıqdan məhrum etmə cəzasının yuxarı həddi on iki ildən artıq olmayan əməllər ağır cinayət, qəsdən törədilməsinə görə isə on iki ildən artıq azadlıqdan məhrum etmə cəzası və ya daha ağır cəza nəzərdə tutulmuş əməllər xüsusilə ağır cinayətlər hesab olunur.
İstinad olunan bu maddi hüquq normasının tələblərindən göründüyü kimi ağır cinayətlərin sanksiya həddi on iki ilədək, xüsusilə ağır cinayətlərin sanksiya həddi isə on iki ildən artıq olaraq müəyyən edilmişdir.
Buna uyğun olaraq Azərbaycan Respublikası Cinayət Məcəlləsinin 75-ci maddəsinin 1-ci hissəsində (müddətin keçməsi ilə bağlı cinayət məsuliyyətindən azad etmə) qeyd olunur ki,az ağır cinayətin törədildiyi gündən yeddi il keçdikdə, ağır cinayətin törədildiyi gündən on iki il keçdikdə və xüsusilə ağır cinayətin törədildiyi gündən iyirmi il keçdikdə şəxs cinayət məsuliyyətinə cəlb edilə bilməz.
Məhz istinad olunan bu maddi hüquq normalarının tələblərinə münasib mövqe seçmiş cinayət prosesini həyata keçirən orqanlar ağır cinayətlərin törədilməsində ittiham etdikləri şəxsləri on ildən artıq bir müddətdə azadlıqdan məhrum etmə cəzalarına məhkum edirlər.
Xüsusən də sifarişli cinayət işlərinin istintaqı zamanı müstəntiq və prokurorlar yalançı şahidlərdən, zərərçəkmiş şəxslərdən və mülki iddiaçılardan məqsədyönlü şəkildə bilə-bilə yalan ifadələr almaqla hədəf seçdikləri “təqsirləndirilən şəxslər”i bu yolla on ildən artıq bir müddətdə azadlıqdan məhrum etmə cəzasına məhkum etməyə nail olurlar.
Burada maraqlı və məntiqli sual yaranır: “Niyə axı məhz on ildən artıq bir müddətdə bu şəxslər azadlıqdan məhrum edilirlər?”
Əsasən sifarişli cinayət işlərinin istintaqı zamanı ənənəvi hala çevrilmiş bu üsuldan istifadə edilməsi yalançı şahidlərin, saxta zərərçəkmiş şəxslərin, əsassız mülki iddiaçıların və xüsusilə də cinayət prosesini həyata keçirmiş prosessual şəxslərin (müstəntiq, prokuror, hakim) toxunulmazlığının (təhlükəsizliyinin) təmin olunması məqsədini daşıyır.
Belə ki, Azərbaycan Respublikası Cinayət Məcəlləsinin 32-ci fəslində yer alan ədalət mühakiməsi əleyhinə olan cinayətlərin sanksiya hədlərindən görünür ki, təqsiri olmayan şəxsi bilə-bilə ağır və ya xüsusilə ağır cinayətin törədilməsində ittiham edərək cinayət məsuliyyətinə cəlb edən müstəntiq və ya prokuror üç ildən yeddi ilədək müddətə azadlıqdan məhrum etmə cəzasına məhkum edilə bilər ki, bu cinayətin də törədilməsi az ağır cinayətlər kateqoriyasına aiddir.
Eynilə ağır və ya xüsusilə ağır cinayətin törədilməsi ilə bağlı cinayət işlərinin istintaqı zamanı təhqiqatçı, müstəntiq, prokuror və ya müdafiəçinin sübutları saxtalaşdırması beş ildən yeddi ilədək azadlıqdan məhrum etmə cəzasının tətbiqini nəzərdə tutur.
Habelə məhkəmədə və ya ibtidai istintaqda ağır və ya xüsusilə ağır cinayətlərin törədilməsi ilə bağlı cinayət işlərinin istintaqı zamanı yalan ifadə vermiş şahidlərin və zərərçəkmiş şəxslərin, eləcə də bilə-bilə rəy vermiş ekspertlərin törətdiyi bu əməllərə görə iki ildən altı ilədək azadlıqdan məhrum etmə cəzasının tətbiqi nəzərdə tutulmuşdur.
Azərbaycan Respublikası Cinayət Prosessual Məcəlləsinin 124-cü maddəsinin 2-ci hissəsindən məlumdur ki, zərərçəkmiş şəxslərin və şahidlərin ifadələri, o cümlədən ekspertlərin rəyi, istintaq və məhkəmə hərəkətlərinin protokolları cinayət prosesində sübutların mənbəyi kimi göstərilmişdir.
Belə olduğu halda cinayət işini öz icraatına qəbul edən müstəntiq və ya prokuror cinayət işinin istintaqı zamanı ağır və ya xüsusilə ağır cinayətin törədilməsində ittiham etdiyi təqsirləndirilən şəxsə qarşı bilə-bilə yalançı şahidlərin və zərərçəkmiş şəxslərin ifadələrindən, eləcə də ekspertlərin bilə-bilə verdikləri yalan rəylərdən mötəbər sübut kimi istifadə etməklə ağır və ya xüsusilə ağır cinayətin törədilməsində təqsirləndirilən şəxsi ittiham etməsinin əsasında hansı “ədalət prinsipi” dayanır?!
Necə ola bilər ki, sifarişli, saxta və məqsədyönlü şəkildə istintaq olunmuş cinayət işi üzrə ağır cinayətin törədilməsində təqsirləndirilən şəxs on iki ilədək, xüsusilə ağır cinayətin törədilməsində təqsirləndirilən şəxs isə iyirmi ilədək azadlıqdan məhrum etmə cəzasına məhkum edilmiş olsun, ağır və ya xüsusilə ağır cinayətlərin törədilməsində təqsirsiz olan belə şəxsləri şahid və zərərçəkmiş şəxslərin yalan ifadələri, eləcə də ekspertlərin yalan rəyləri əsasında sübutları saxtalaşdırmaq yolu ilə bilə-bilə cinayət məsuliyyətinə cəlb edən müstəntiq və ya prokuror isə qanun qarşısında yalnız az ağır cinayətin törədilməsi ilə məsuliyyət daşımış olsun?!
Eynilə bu əməllərin törədilməsində iştirakçılığa cəlb olunmuş yalançı şahidlərin, zərərçəkmiş şəxslərin və ekspertlərin də qanun qarşısında məsuliyyəti az ağır cinayətin törədilməsi ilə kifayətlənmiş olsun?!
Burada xüsusilə nəzərə alınmalıdır ki, təqsirsiz şəxsin ağır və ya xüsusilə ağır cinayətin törədilməsində ittiham edilərək cinayət məsuliyyətinə cəlb olunması ilə müstəntiq və ya prokuror insan həyatına birbaşa qəsd etməklə bilavasitə dövlət hakimiyyəti orqanlarının nüfuzuna mühüm (əhəmiyyətli) zərbə vurmuş olur.
Cinayət prosesini həyata keçirən orqanın bu dərəcədə ağır nəticələrə səbəb olan cinayətkar əməlinin qarşılığında belə əməllərin törədilməsinə baiskar olan şəxslərin az ağır cinayətlərin törədilməsi ilə məsuliyyət daşımalarının əsasında hər kəsin qanun və məhkəmə qarşısında bərabərlik və ədalət prinsiplərinin izləri görünürmü?!
Düşündürücü məqamlardan biri də odur ki, istər əmək fəaliyyətim dövründə, istərsə də hal-hazırda “cəza çəkdiyim” 7 (yeddi) ildən artıq bir müddətdə hər hansı bir təqsirsiz şəxsi bilə-bilə cinayət məsuliyyətinə cəlb edən müstəntiq və ya prokurorun bilə-bilə yalan ifadə vermiş şahid və ya zərərçəkmiş şəxsin, bilə-bilə yalan rəy vermiş ekspertin, xüsusilə də bilə-bilə ədalətsiz məhkəmə aktını çıxarmış hakimin Azərbaycan Respublikası Cinayət Məcəlləsinin 290-297-ci maddələri ilə ittiham edilərək heç olmasa az ağır cinayətin törədilməsi ilə məhkum olunmalarının da şahidi olmamışam.
Real vəziyyətə uyğun olaraq qənaətə gəlmək mümkündür ki, yalançı şahidlər, yalançı zərərçəkmiş şəxslər, bilə-bilə yalan rəy vermiş ekspertlər, təqsirsiz şəxsi cinayət məsuliyyətinə cəlb etmək niyyətində olan müstəntiq və prokurorlar, eləcə də ağır və ya xüsusilə ağır cinayətlərin törədilməsində təqsirləndirilən şəxsi (lakin təqsirsiz şəxsi) mühakimə edən hakimlər şəxsiyyət və dövlət əleyhinə törətdikləri bu cinayətlərin sabit cinayətkar birlik şəklində birgə həmiştirakçılarıdırlar.
Müşahidə olunan ənənəvi hallardan biri də odur ki, ağır və ya xüsusilə ağır cinayətin törədilməsində və ya sifarişlə istintaq olunan cinayət işlərində ittiham edilərək mühakimə olunan şəxslər on ildən artıq müddətə azadlıqdan məhrum etmə cəzasına məhkum edilərək Azərbaycan Respublikası Cinayət Məcəlləsinin 76-cı maddəsinin 3-cü hissəsinin tələblərinə müvafiq olaraq yalnız təyin olunmuş cəzanın ən azı üçdə iki hissəsini və ya ən azı dörddə üç hissəsini çəkdikdən sonra cəzanın çəkilməmiş hissəsindən vaxtından əvvəl şərti azad edilmək imkanı əldə edirlər.
Burada maraqlı və məntiqli sual yaranır: “Niyə məhz təyin olunmuş cəzanın ən azı üçdə iki hissəsini və ya dörddə üç hissəsini?”
Təxminən on il müddətinə azadlıqdan məhrum etmə cəzasının üçdə iki hissəsi altı il səkkiz ay, dörddə üç hissəsi isə yeddi il altı ay təşkil edir.
Yalnız bu müddət tamam olduqdan sonra (ən azı) şəxs vaxtından əvvəl şərti olaraq cəzasının qalan hissəsindən azad olmaq hüququna malik olur.
Bu hüququn reallaşdırılması üçün ən azı altı ay müddət tələb olunur ki, bu da şəxsin on illik cəzasının yeddi ildən artıq hissəsini çəzaçəkmə müəssisəsində çəkməsinə səbəb olur.
Bununla da yalançı şahidləri, yalançı zərərçəkmiş şəxsləri, bilə-bilə yalan rəy vermiş ekspertləri, təqsirsiz şəxsi bilə-bilə cinayət məsuliyyətinə cəlb etmiş müstəntiq və prokurorun ifşa edilərək cinayət məsuliyyətinə cəlb edilmələri ilə bağlı az ağır cinayətlərin törədilməsinə görə cinayət məsuliyyətinə cəlb etmə müddəti (yeddi il) artıq keçmiş olur.
Göründüyü kimi təqsirsiz olaraq ağır və ya xüsusilə ağır cinayətin törədilməsində təqsirləndirilən şəxs təqsiri sübuta yetirilməsə də yeddi ildən artıq müddətdə cəza çəkməyə məcbur edilməklə yeddi ildən sonra artıq öz təqsirsizliyini sübut etmiş olsa da buna görə nə yalançı şahid, nə yalançı zərərçəkmiş, nə də saxtakar müstəntiq və ya prokuror qanun qarşısında heç bir məsuliyyət daşımır.
Budur yaşadığımız ölkənin “hüquqi dövlət” prinspinin təməli?!
Budur hər kəsin qanun və məhkəmə qarşısında bərabərliyi?!
Budur ədalət və qanunçuluq prinsiplərinin əsasları?!
Qeyd olunan faktların mövcudluğunu təsdiq edən kifayət qədər mötəbər sübutların sizlərin müzakirəsinə təqdim olunması mümkündür.
Yetər ki, buna dözməyə səbriniz, iradəniz və qətiyyətiniz olsun
Mövzu ətrafında ardıcıl araşdırmalar davam etdiriləcəkdir.
Hörmətlə,
09 saylı çəzaçəkmə müəssisəsində sifarişli həbsdə saxlanılan hüquq üzrə fəlsəfə doktoru Telman İbad oğlu İbadov
15 avqust 2024-cü il

23/10/2024

“ŞaurmaN1” qalmaqalının gerçəkləri: ölkə rəhbərliyindən ədalət istənilir

Azərbaycan ictimaiyyətində böyük rezonans doğuran “ŞaurmaN1” işinin yeni detalları üzə çıxıb. Obyektiv media araşdırmaları onu göstərir ki, əslində baş verənlərədə zərərçəkən qanunun tanıdığı qrup yox, həbs cəzası alan Aqil Babayevdir.

“ŞaurmaN1” necə dirçəldi, yaxud Natiq Sadıqovun Aqil Babayevə borclanması

“ŞaurmaN1” Bakı şəhərində Nizami 81 ünvanında Natiq Sadıqovun rəhbərliyi altında ilkin fəaliyyətə başlayıb. Atası Eldəniz Sadıqovun keçmişdə pivəxana kimi işlətdiyi məkanın profilini dəyişən N.Sadıqov bu işdə özünü doğrultmur. Həm atasının müalicəsi, həm də digər xərcləri üçün yaxın münasibətdə olduğu Aqil Babayevə pul üçün müraciət edən N.Sadıqovun Aqilə 800 min manata yaxın borcu yaranır. 2010-cu ildə N.Sadıqov Nizami 81 ünvanındakı obyekti sataraq borclarını ödəmək fikrinə düşür. Bu vaxt Aqil Babayev bir dost kimi ona borca görə narahat olmadığını, obyekti işlətməsini məsləhət görür. N.Sadıqovun dəfələrlə təkidli xahişindən sonra tərəflər arasında şifahi şəriklik anlaşması olur. 2011-ci ildən məhz Aqil Babayevin maddi dəstəyi və birbaşa işin üstündə durması nəticəsində “ŞaurmaN1” şəbəkəsi böyüyür, yeni filiallar açılır.

Natiq Sadıqovun xəyanəti: pul hərisliyindən sənəd saxtakarlığınadək

Gəlirlərin həddən artıq artdığını görən Natiq Sadıqov gizli şəkildə həm maliyyə, həm də digər məsələlərdə maxinasiyalara yol verir. Bununla bağlı hətta iclasların birində bütün bunlar açıq müzakirə olunur və Aqil Babayev Natiq Sadıqov və dəstəsinin oğurluqlarını ifşa edir. Görünür, bu, Natiq Sadıqova xoş gəlmir və Aqil Babayevlə aralarında münasibətlər 2018-ci ildən daha da kəskinləşməyə başlayır. Eyni zamanda Standartlaşdırma, Metrologiya və Patent üzrə Dövlət Komitəsi tərəfindən Ceyhun Məhərrəmova 4 mart 2010-cu il tarixli (reyestr nömrəsi 2010 0274) ŞAURMA №1 nömrəli əmtəə nişanına hüququnun təsbit edilmiş sertifikat, əmtəə nişanı saxta yolla Natiq Sadıqovun xalasıoğlu Teymur İmaməliyevin adına keçirilir. Belə ki, sənədi notarial qaydada təsdiq etmədən həqiqi mülkiyyətçi Ceyhun Məhərrəmovun ona hüquqların könüllü keçməsi haqqında imzası saxtalaşdırılır. Daha sonra İmaməliyev özünə yaxını Səbuhi Əliyevi şərik tapır və ona yenidən mülkiyyət şəhadətnaməsi verib. Bir müddət sonra Səbuhi Əliyev də notarius vasitəsilə həmin sənədi İmaməliyevin özünə yenidən rəsmiləşdirib. Saxta sənədi “yuyaraq” və bununla da əqli mülkiyyətin “qanuni” sahibinə çevrilib.

Aqil Babayevin evinə quldur basqını

Bütün bu proseslərin fonunda Natiq Sadıqovla Aqil Babayev arasında son telefon mesajlaşmasında N.Sadılqov A.Babayevə səhvlərini etiraf edib yalvararaq bağışlanmasını xahiş edir. İyun ayının 6-da olan bu yalvarışıdan iki gün sonra isə Xəzər rayonu, Buzovna qəsəbəsi, Badamlıq ərazisi, Musa Nağıyev küçəsində yerləşən bağ evində 25-30 nəfərdən ibarət cinayətkar qrup tərəfindən əvvəlcədən planlaşdırılmış şəkildə girov götürülərək, köməksiz vəziyyətə salınmış, döyülərək, işgəncələrə məruz qalmış və həmin şəxslər tərəfindən quldurluq yolu ilə 9 000 000 (doqquz milyon) manat pulu və digər əmlakları ələ keçirilmişdir. Əvvəlcə bağ evindəki pullarını və qiymətli əşyalarını götürərək soyğunçuluqla əldə etdiklərinin əslində elə onlara aid olduğunu bildiriblər. Bu əməlləri başının dəstəsi ilə icra edən Anar adlı şəxs isə Aqilin telefonundan həyat yoldaşına mesaj yazaraq Xətai rayonunda onun yaşadığı evə daxil olub, mənzilin 5-ci mərtəbəsindən bütün zinyət əşyalarını, 9 milyon pulu götürərək BMV GT markalı avtomobillə aparıblar. Baş vermiş soyğunçuluq faktı üzrə heç bir istintaq hərəkəti aparılmayıb, hüquq-mühafizə orqanları hadisə yerinə baxış belə keçirilməyib. Baş verənlərlə bağlı hüquq-mühafizə orqanlarına şikayət edən Aqil Babayev özü şərlənərək həbs olunub.

Aqil Babayevə qarşı məhkəmə ədalətsizliyi: “zərərçəkmişlərin” gerçək siması

Bakı Ağır Cinayətlər Məhkəməsində “Şaurma N 1″ restoranının şəriki Aqil Babayevə hökm oxunmasından bir il keçir. Ötən il oktyabrın 18-də hökmə əsasən, A.Babayev 12 il 6 ay müddətinə azadlıqdan məhrum edilib. “Zərərçəkmiş” qismində tanınan şəxlərin gülünc və məntiqsiz məhkəmə çıxışları da gündəmi zəbt etməyə davam etdiyindən, bu işin pərdəarxası məqamları ortaya çıxmağa başlayıb. Belə ki, məntiqə uymayan ən gülünc ifadəsi ilə seçilən “zərərçəkən” Anar Aslanov təhsilli hüquqşünas olduğu təqdirdə Aqil Babayevin evindən pullarının oğurlandığı gün “Aqil Babayevin evinə gecə saat 00:00-də santexnik kimi smestitel dəyişməsi üçün getdiyini”, “istintaqda verdiyi ifadəsində isə Aqil Babayevin guya ona 306 min borclu olduğu halda evindən 520 min manat pul götürdüyünü”, “Pakdad” restoran sahibi Babaşova 200 min dollar borclu olduğu təqdirdə isə guya Aqil Babayevə kasıb ailələr üçün bina tikdirməsinə görə külli miqdarda pul verdiyini” bildirib.

Natiq Sadıqov və dəstəsinin məhkəmə uydurmaları

Digər “zərərçəkən” Xəyal Mustafayev “Tələbə vaxtından 20 min manat zəkat verdiyini”, “zərərçəkən” Əli Quliyev kirayədə yaşaya-yaşaya 14 min 400 manat zəkat verdiyini və digər “zərərçəkənlər” də maddi durumları kifayət qədər yaxşı olmadıqlarına baxmayaraq zəkatı mütləq şəkildə verdiklərini məhkəməyə bildiriblər. Bundan əlavə, şikayətçilərin sözlərinə görə, Aqil Babayevin onları aldatması və inandırmasına səbəb kimi “zərərçəkən” Aydın Niftəliyev “Aqil Babayevin onu havaya qaldırmasını, tonqalın üzərində əyləşib qanadlar çıxarmasını”, “zərərçəkən” Polad Mustafayev “Ayı bölməsini, səmada möcüzələr göstərməsini”, “zərərçəkən” Azər İslamov “Səmada, qiblədə Aqil Babayevin üzünü görməsini”, “zərərçəkən” Ömər Qurbanov “Ağacların səcdə etməsini, Aqil Babayevin yanında Cəbrayıl mələyi görməsini”, “zərərçəkən” Natiq Sadıqov “Onu ovsunlamasını”, “zərərçəkən” Bəruz Kave “Aqil Babayevin onun yuxularına müdaxilə etməsini”, “zərərçəkən” Faiq Abdullayev “Cənnətdən bir neçə sot torpaq almasını”, “zərərçəkən” Elmar Orucov “Günahlarının pulnan sıfırlanmasını, evinin qara qüvvələrdən təmizlənməsi üçün 40 min manat verməsini”, “zərərçəkən” Fuad Məmmədov “Ərəblərin belə bilmədiyi suallara Aqil Babayevin cavab verə bilməsini” və s. göstərən dəlil və sübut olmadan onlardan hansısa uydurulmuş məbləğdə pul almalarını deyiblər.

Bütün bu ifadələrdən göründüyü kimi, Aqil Babayevin həbsdə saxlanılmasına əsaslı səbəb gətirə bilmədiklərinə görə “zərərçəkən” şəxslər hansısa qüvvələrin himayəsi ilə ona “möcüzəvi insan” möhürü vuraraq və məntiqsiz, ağıla sığmayan açıqlamalar verərək, məhkəməni və dövlət qurumlarını ələ salıb yormaqla məşğuldurlar. Bundan əlavə, həmin “zərərçəkmiş” şəxslər qəsdən planlı şəkildə məhkəmənin gedişinə də süni maneələr törədərək, təqsirləndirilən şəxsi və vəkillərini söyüş-təhqir edib, hücum taktikasında olaraq işin obyektiv araşdırılmasına mane olublar.

Hakim ədalətsizliyi

Bunu da qeyd etmək lazımdır ki, ittiham tərəfindən çıxış edən şahidlərindən biri Layiq Şıxəliyev Aqil Babayevdən şikayət edən öz qohumunun Emin Həsənovun yalanını dolayısı yolla üzə çıxarsa da və Aqil Babayevin dediklərini təsdiq etsə də, digər ittiham tərəfdən cıxış edən şahid və zərərçəkənlərin məhkəməyə məcburi gətirilmə qərarı ilə belə işə cəlb edilməsi mümkün olmayıb.

Lakin müdafiə tərəfi 4 şahidin dindirilməsi ilə bağlı vəsatət verməsinə baxmayaraq, hakim yalnız T.Dadaşovanın müdafiə tərəfinin təqdim etdiyi şahid qismində dindirməsini təmin edib. Belə ki, hakim Eldar İsmayılovun T.Dadaşovanın dindirilməsi zamanı həqiqətləri deyərək hər ay yığılan zəkatın paylanılmasını etiraf etməsi və beləliklə də Aqil Babayevin işi üzrə ittiham edildiyi CM-in 178.4 maddəsinin dispozisiyasının əlamətlərinin olmaması göz önündədirsə, “Aqil Babayevin hələ də həbsdə saxlanılmasında maraqlı şəxslərin hansı qanuna tabe olması” sualı yaranır.

Ölkə rəhbərliyinə müraciət

Aqil Babayevin həbs edilməsinin təşkil edilməsi üçün müvafiq dövlət orqanlarına yalan məlumatlarla çıxış edən şəxslərin əməllərinin araşdırılmasının təmin edilməsi və Aqil Babayevin pozulmuş hüquq və azadlıqlarının bərpası üçün onun yaxınları, ailə üzvləri və media rəhbərləri ölkə rəhbərliyinə müraciət edib.

Mövzunu davam etdirəcəyik…
cumhuriyyet.az