03/12/2024
Dost varmı, yoxsa doğrudanmı dost elə insanın cibidir?
2004-cü ildə, Ramil Səfərov ömürlük məhkum ediləndən az sonra idi.
20 Yanvar metrosunun çıxışında kaset-disk satılan yerdə bu mahnını uca səslə oxudurdular:
"Yəqin ki yolun məmləkətə sarıdır, qardaş,
Çatdır anama ki, hələ oğlun salamatdır..."
Həm Ramil Səfərova sevgimdən, həm də mahnının sözlərinin təsirindən yaxınlaşıb oxuyanın kim olduğunu soruşdum.
Kaset satan dedi ki, Xəyyam Əhmədlidir. Ona qədər bu adam haqqında məlumatım çox yox idi.
Heç sonradan da Xəyyamı çox izləməmişəm, yaradıcılığından xəbərim olmayıb.
Yaxınlarda Namiq Qaraçuxurlu Xəyyama görə video çəkib camaatdan pul istəyəndə məlum oldu ki, onun da oxuduğu bir neçə trend olmuş mahnının sözləri və musiqisi Xəyyama aiddir.
Məsələn, tək bir YouTube kanalında 10 milyon izlənmiş "Bir arzu tut" mahnısı və s.
Meyxanaçı Xəyyam təxminən bir ildir ki, xəstə idi. Mən bilən yardım kampaniyası da 4-5 aydır ki, davam edir. İki ay bundan öncə meyxanaçılardan birinin (Yaşar Qafanlı idi, deyəsən) canlı yayım açıb, "Heç olmasa hərə 1 manatdan göndərsin, 120 min adam hərəsi 1 dollar göndərsə, məbləğ düzələr" deyə müraciətini gördüm.
Orada barmağımı dişlədim ki, ayə, bütün günü toyxanalarda, hətta mavi ekranlardan bizə dostun müqəddəsliyinə, dost yolunda can verməyə hazır olmalı olduğumuza inandıran meyxanaçılar nə əcəb bu məbləği öz aralarında toplayıb Xəyyamı müalicə etdirmirlər?
Mən başqalarını yox, birinci növbədə Namiq Qaraçuxurluya olan "yaxşı oğlandır, meyxanaçıların içərisində səviyyəlisidir" düşüncəmi sorğulamağa başladım.
Sonra bir-bir meyxanaçılar çıxıb canlı yayım açdılar, hərəsindən bir manat yardım istədilər. Sonra Ramil Səfərov da gəlib Xəyyamla şəkil çəkdirib getdi.
Ən sonda isə Orxan Lökbatanlı çıxıb bütün meyxanaçıları danladı ki, "Bəs ayıbdır, etməyin, eləməyin, sürdüyünüz maşından utanın, çıxıb camaatdan pul dilənməyin".
Dava-qırğın düşdü. Baləli və Pərviz Orxanı ağ yuyub qara sərdilər ki, "Bəs, bizim maşınımızla nə işin var?"
Orxan nəyi səhv deyirdi axı? Ən azından paylaşdığı şəkillərlə, super elit həyatı ilə öyünən, Xəyyamın mahnıları ilə, studiyası ilə pul qazanan Namiq Qaraçuxurlu vaxtında dostunun yanında olmalı idi.
Ölüm anına qədər gözləməməli idi. Gözləməməli idi ki, qoy, xalq yığsın qalanını düzəldərik.
Bəlkə də xalq, sizə görə Xəyyama lazım olan məbləği göndərmədi. Çünkü dəfələrlə olub ki, adi, tanınmamış bir insan üçün belə Zaurun, Xoşqədəmin verilişində qısa müddətdə yarım milyon pul yığılıb.
Bu millət, hətta perpetuxunu belə yarı yolda qoymayıb. Baboşa ev tikmək üçün külli miqdarda yardım ediblər.
Bir dəfə tələbə vaxtlarında ülvi məhəbbətdən, ilk eşqdən yazan bir şairlə tanış olmuşdum. Onda onun qılıncının arxası da kəsən vaxtları idi. Sonradan öyrəndim ki, bu şair ülvi məhəbbəti ilə birgə çoxlu paralel məhəbbətlər də yaşayırmış.
Artıq elə bir yaşdayam ki, dostun aliliyindən, vətənpərvərlikdən, ananın müqəddəsliyindən və s. yazan yazarların, şairlərin, meyxanaçıların da bir çoxunun sadəcə şeir və yazı texnikasını bildiyi üçün belə yazdıqlarını anlayıram.
Kapitalizm dövrüdür. Özünüzə kapital toplayın, ailə üzvlərinizə dəstək olun ki, pul-para qazana bilsinlər, iş qursunlar.
Dostlar bir yerə qədərdir – vaxt keçirmək, dərd bölüşmək, yeyib-içmək, gəzmək üçün... Daha doğrusu dostlar yox, yoldaşlar.
Amma nadirən də olsa, dostluğun tərifinə layiq olanlar olur. O da ki, hər adamın qabağına çıxmır...
Bahadur Seyidov
