15/01/2025
| Ministerio Publico lo apela sentencia di hues den caso New York
December ultimo hues a dicta sentencia den e caso New York y a declara cuater periodista local culpabel di violacion di secresia y soborno. Ministerio Publico (OM) tabata pendiente pa tuma decision si ta bay apela e sentencia di hues y ayera a keda confirma cu OM lo apela e sentencia di tur cuater periodista involucra den e caso.
Ayera mainta e noticiero local, NoticiaCla, mediante un publicacion a indica cu OM a confirma cu lo apela e sentencia di tur cuater periodista, R.P.L, B.L.R.K, N.E.A.G y N.M.Q.C.d.A., cu a ser declara culpabel di e delitonan di violacion di secresia y soborno di un agente policial.
Despues di e sentencia di hues ambos partido tabatin un periodo di tempo stipula pa tuma decision si lo apela of no e sentencia cu hues a dicta dia 18 di december ultimo. OM a confirma cu di nan banda nan a tuma decision pa apela y segun e noticiero a indica e periodistanan tambe lo a apela nan sentencia.
Cu e caso awor bayendo apelacion esaki ta nifica cu e caso completo lo ser trata di nobo den un corte di apelacion y e biaha aki tres hues lo trata e caso. No ta sigur ainda ki tempo e caso lo ser trata den corte di apelacion, ta posibel cu esaki lo por sucede e aña aki ainda.
Caso New York ta relaciona na e caso di agente policial R. Vos, ken a keda acusa y sentencia pa su participacion.
E cuater periodista involucra den e caso ta acusa di, for di periodo di 1 di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar, y/of tuma y/of duna soborno y/of maluso di funcion y/of violacion di secreto di trabao.
Despues di sentencia inicial di hues den Corte di Prome Instancia, di e acusacionnan cu tabatin riba mesa, pa e acusacion di soborno tres di e sospechosonan a ser declara culpabel. Pa loke ta e acusacion di participacion den un organisacion criminal, tur cuater sospechoso a ser declara liber, pasobra corte ta haya cu no tin suficiente prueba cu nan a comete e acto ey. Y pa e acusacion di violacion di secresia oficial di un agente policial, tur cuater a ser declara culpabel.
Corte a determina cu durante un periodo di mas cu dos aña, e periodistanan aki tabatin acceso na e trafico di portofon di Cuerpo Policial di Aruba. Nan a haci e acceso aki posibel hunto cu e agente policial menciona, pa medio di un conexion digital cu nan a crea entre un portofon y e laptop di e periodistanan individual. Debi na e hecho cu hunto cu e agente policial nan a haci e acceso na e trafico di portofon posibel, mescos cu e agente policial aki, nan a viola secresia oficial.
Corte a determina cu den e mesun periodo, tres di e periodistanan a duna regalonan y a haci promesa na e agente policial, pues cu di e manera aki nan a soborn’e
E informacion policial cu ta distribui pa medio di portofon ta informacion confidencial, cu no ta destina na oyentenan no autorisa. Si e informacion aki yega na personanan robes na e momento robes, ta viola e privacidad di ciudadanonan y esaki por conduci na situacionnan peligroso of no desea. Pa e motibo aki, e informacion aki ta confidencial y disponibel solamente pa agentenan policial.
Pa loke ta e sentencia cu hues a dicta december ultimo, den e caso di periodistanan R.P.L y N.E.A.G, ambos a haya 240 ora di trabao comunitario y 12 luna di castigo di prizon condicional, cu un periodo di prueba di 3 aña. E abogado a splica cu esaki kiermen cu si nan haci nan mes culpabel di algo criminal den e 3 aña aki, nan por haya condena di 12 luna di prison.
Den caso di periodista B.L.R.K, el a haya castigo di 150 ora di trabao comunitario, tres luna di prison condicional cu un periodo di prueba di 3 aña tambe. Den caso di B.L.R.K, teniendo cuenta awor e ta residencia na Hulanda, su abogado a splica cu tin dealnan cu Reclassering na Hulanda cu na momento cu e castigo bira incondicional, e ora e por tuma contacto cu reclassering na Hulanda y e lo cay bao di nan guia.
Sospechoso N.M.Q.C.d.A. a haya e castigo mas pisa di tur. Door cu ta su di dos biaha envolvi den un caso similar, el a haya un castigo di 18 luna di prison di cual 12 ta condicional, locual kiermen cu e tin cu sinta minimo seis luna den prison, mirando cu e sucedido aki a pasa net dos luna prome cu su tempo di prueba relaciona cu e caso anterior a caba.
Un di e puntonan cu defensa a presenta ta cu periodistanan tin libertad di recopila noticia, y cu esaki ta inclui e informacion cu nan a haya pa medio di e portofon. Hues a splica den su sentencia cu e ta di acuerdo cu e argumento aki y a resalta cu e ta un derecho importante cu mester ser proteha y respeta.
Sin embargo, hues a subraya cu e no ta un derecho sin limite. El a splica cu ta ser limita pa derecho penal y pa normanan di cuido debido. Esaki ta significa cu periodistanan no mag di comete hechonan castigabel pa obtene informacion, y esaki ta precisamente loke a bay fout den e caso aki; e periodistanan a comete hechonan castigabel pa haya acceso na e informacion confidencial.
Mientras tanto, agente Vos a keda condena dia 8 di december 2023 cu 16 luna di prison, di cual 8 ta condicional, pa malversacion, violacion di secretonan di trabao, abuso di su funcion y soborno di parti di miembronan di prensa. Ademas el a wordo prohibi di eherce e trabao di polis pa e duracion di 3 aña. Ministerio Publico a bay den apelacion contra e sentencia aki.
