06/01/2025
Top Dokter di Merca ta pidi pa etiketa di advertencia di cancer riba Alcohol.
Den publicacion siman pasa e Top Dokter di Merca (Surgeon General – Ministerio di Salud) a pidi pa pone advertencia di riesgo riba bebidanan alcoholico, similar na e etiketa riba pakinan di sigaria. A tuma e decision aki despues di un investigacion nobo cu ta indica cu e bebidanan alcoholico ta conecta na 7 tipo di cancer.
E conseho di e Top docter mericano, Vivek Murthy, ta bisa cu e “mayoria di mericanonan no ta na altura di e riesgonan aki” cu ta conduci na alrededor di 100.000 caso di cancer y 20.000 morto anualmente na Merca.
Lo rekeri un acto di Congreso pa cambia e etiketnan di advertencia existente, cu no a wordo actualisa for di 1988.
Dokter Murthy tambe a boga pa reevalua e limitenan recomenda pa consumo di alcohol y impulsa esfuersonan di educacion pa loke ta trata bebida alcoholico y cancer.
E Ciruhano General, kende ta e vocero principal riba asuntonan di salud publico den e gobierno federal, a bisa cu alcohol tabata e di 3 causa mas comun di cancer despues di tabaco y obesidad. E ta di opinion cu si tin advertencia pa educa, por preveni mas caso.
“E vinculo directo entre consumo di alcohol y riesgo di cancer ta bon estableci pa por lo menos 7 tipo di cancer…sin importa e tipo di alcohol (por ehempel, cerbes, biña y spirits) cu ta wordo consumi,” dokter Murthy a bisa den un declaracion.
Esaki ta inclui aumento di riesgo di cancer di pecho (cerca hende muhe), garganta, higra, slokdarm, boca, caha di bos y tripa.
E rapport nobo ta recomenda cu dunadonan di cuido di salud mester encurasha screening di alcohol y referencianan di tratamento segun necesidad. Tambe mester haci mas esfuerso pa aumenta conscientisacion general.
E etiketanan di advertencia actualmente ta obliga pa indica cu hende muhe cu ta na estado no mester bebe alcohol pa motibo di riesgonan di defecto di nacemento. E mester indica tambe cu “consumo di bebida alcoholico ta afecta bo habilidad pa core auto of maneha mashinnan y por causa problemanan di salud.
Durante e ultimo dos decadanan, paisnan a introduci mas y mas etiketanan di advertencia pa informa consumidonan tocante e riesgonan di alcohol pa salud.
World Health Organization’s (WHO) Global Status Report pa Alcohol y Salud na 2018, a cita den e raport di Dokter Murthy, cu 47 pais miembro a obliga advertencia di salud y siguridad riba alcohol, un aumento di 31 na 2014.
Irlanda ta e prome pais na mundo pa obliga un advertencia cu ta conecta cualkier nivel di consumo di alcohol cu cancer. For di 2026, lo ta un rekisito legal pa tur boter di alcohol na Republica di Irlanda tin un etiket.
Sur Korea tambe ta rekeri advertencia specifico pa cancer riba alcohol.
Na Merca, solamente Congreso por cambia e etiketanan nobo di advertencia recomenda pa Dokter Murthy y no ta sigur cu e gobernacion nobo di Trump lo sostene e cambio.
Hopi pais tambe a revisa e limitenan recomenda pa consumo despues cu estudionan nobo a señala cu ningun cantidad di alcohol ta sigura pa bebe.
Canada a revisa aña pasa cu e recomendacion ta entre dos bebida pa dia of dos bebida pa siman.
Merca ta recomenda no mas cu dos bebida pa dia pa hende homber y un bebida pa hende muhe, mientras cu na UK ta sugeri no mas cu 14 “unidad” di alcohol – alrededor di seis glas di biña of 20 ons di cerbes – pa siman.
Aki na Aruba mester bin un campaña general grandi pa conscientisa no solamente adultonan pero tambe hobenan riba e resultadonan di e investigacion nobo cu ta indica cu Alcohol por causa 7 tipo di Cancer. Ta dificil pa na Aruba bay pone etiketa riba cada boter, pero si por pone posternan den lugarnan di benta y mantene e comunidad consciente cu informacion regular den media.
https://www.bbc.com/news/articles/cj90x3np0zpo
https://edition.cnn.com/2025/01/03/health/alcohol-cancer-surgeon-generals-advisory/index.html
