30/10/2024
Notisia di polis di djabièrnè 25 di òktober te ku djamars 29 di òktober 2024
Persekushon ta kondusí na kuater detenshon pa ladronisia
Den oranan di mardugá di djamars 29 di òktober, alrededor di 1 or di mardugá, un patruya a nota un situashon sospechoso riba Kaya Piedra Presioso. Un siklista tabata kore sin lus, i tras di e siklista tabata bini dos skuter ku riba ámbos dos persona. Niun di e personanan aki tabatin un hèlm bistí. Loke ku a hala atenshon di e agentenan tabata ku e siklista i e personanan riba e skuter tabata kompletamente na pretu bistí. Na momentu ku e siklista a mira polis, el a avisá e otronan riba e skuter na bos haltu. E promé skuter tabatin un plachi di number sospechoso i e di dos skuter no tabatin plachi di number.
Pa motibu di e echonan menshoná, e agentenan a disidí pa aktivá e señalnan óptiko di e vehíkulo polisial (zwaailicht) pa para e skuternan pa un kòntròl. Nan a neglishá e señal pa para i a hisa velosidat. E siklista a bira bai den un otro kaya, pero e skuternan a sigui kore. E patruya a sigui kore tras di e skuternan den diferente kaya durante kua vários biaha a duna e shofùrnan òrdu pa para. Finalmente e agentenan mester a hasi uso di ‘pepperspray’, pero esaki tampoko no a yuda pa para e shofùrnan i nan a sigui kore.
Alrededor di 1.10 or di mardugá, e agentenan a logra para ámbos skuter riba Kaya Amsterdam. A detené un hòmber di inisial B.A.U.C. di 21 aña di edat, un mucha hòmber di inisial F.C.M. di 16 aña di edat, un mucha hòmber di inisial I.M.L. di 16 aña di edat i un mucha hòmber di inisial R.R.M. di 17 aña di edat pa ladronisia, enkubrimentu, pa violashon di Lei di Identifikashon BES i pa no duna oido na òrdu di polis. ta investigando e kaso.
Detenshon pa manehá bou di influensia
Djaluna 28 di òktober, alrededor di 7 or di anochi, ‘meldkamer’ sentral a risibí notifikashon tokante un aksidente entre un outo i un skuter riba Kaminda di Lac. Shofùr di e skuter tabata heridá benta abou riba kaminda. Shofùr di e outo a deklará ku diripiente el a mira e skuter riba su banda di kaminda i no por a evitá un aksidente. Durante e kombersashon ku shofùr di e outo, por a konstatá ku e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné for di kua a resultá ku el a konsumí mas alkohòl ku ta permití ora ta manehá un vehíkulo. A detené e hòmber di inisial A.F.C. di 58 aña di edat i a hib’é warda di polis pa un análisis di rosea. A konfiská reibeweis di e sospechoso.
Kaso di tiramentu
Djadumingu 27 di òktober, ‘meldkamer’ sentral a risibí notifikashon tokante un insidente di tiramentu ku a tuma lugá na e pista di ‘drag’ situá na Onima. Un persona ku tabata sinta wak fever, diripiente a mira un hòmber ku kara tapa i arma di kandela den man a presentá na e sitio i seguidamente a lòs tiru den su direkshon. Mesora despues di e tiramentu, e sospechoso a hui riba un motosaikel. E persona no a resultá heridá. Investigashon den e kaso ta andando.
Polis ta pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.
Ladronisianan di skuter
Djadumingu 27 di òktober a drenta keho di ladronisia di dos skuter koló shinishi skur di e marka Kymco, modèl Agility ku plachi di number MF-1663 i MF-1637. E skuternan tabata stashoná na un establesimentu di hóreka na Kaminda di Lac i tabatin un lòk di stür i un di nan ku un lòk di kadena. Entre 11 or di anochi riba djasabra 26 di òktober i 2 or di mardugá riba djadumingu 27 di òktober, deskonosínan a bai ku e skuternan. Den oranan di mainta riba djadumingu 27 di òktober, ‘meldkamer’ sentral a risibí notifikashon ku a enkontrá un di e skuternan ku a hòrta, den un mondi kantu di kaya riba Kaminda Sorobon. Polis a konfiská e skuter pa mas investigashon. Ta investigando e kaso.
Djaweps 24 di òktober, entre 6 or di atardi i 2 or di atardi riba djabièrnè 25 di òktober, deskonosínan a bai ku un skuter koló shinishi skur di e marka Kymco, modèl Agility ku plachi di number MF-1677. E skuter tabata stashoná ku un lòk di stür banda di un establesimentu di hóreka na Kaya Jan N.E. Craane. Ta investigando e kaso.
Detenshonnan despues di aksidente i atrako
Den oranan di mardugá riba djadumingu 27 di òktober, ‘meldkamer’ sentral a risibí notifikashon tokante un atrako armá ku a tuma lugá riba Kaya C.E.B. Hellmund. Algun persona ku tabata den un golfkar, a maltratá i atraká e víktima ku un arma di kandela despues di un aksidente. E sospechosonan a saka e yabi di outo di e víktima, i a hui for di e sitio.
Ménos ku 10 minüt despues, polis a risibí notifikashon tokante un aksidente entre un pikòp i un skuter riba Kaminda di Lac. Na yegada di e patruya na e sitio, e agentenan a mira un golfkar ku vários okupante ku tabata kuadra ku e deklarashon di e víktima i a disidí pa kontrolá nan. Aki a t**a ku un arma di kandela despues di kua a detené un mucha hòmber di inisial D.A.E. di 17 aña di edat pa violashon di Lei di Arma di Kandela BES, maltrato i ladronisia ku violensia.
Pa loke ta trata e aksidente entre e pikòp i e skuter, alrededor di 3 or di mardugá, a detené e shofùr di e pikòp, un hòmber di inisial M.R.M. di 34 aña di edat, pa manehá bou di influensia di alkohòl. A hib’é warda di polis pa un análisis di rosea. A konfiská reibeweis di e sospechoso i a hiba e vehíkulo warda di polis. E dos personanan ku tabata riba e skuter a resultá heridá i ambulans transportá ámbos pa hòspital pa tratamentu médiko.
Ladronisia tayer di outo
Djadumingu 27 di òktober a drenta keho di ladronisia for di un outo ku tabata stashoná na un akomodashon turístiko situá na Bulevar Julio A. Abraham. Entre 12.40 or di mardugá i 2 or di mardugá riba e mesun dia, deskonosínan a bai ku e tayer di patras na banda robes di e outo. Ta investigando e kaso.
Ladronisianan na b**h
Djasabra 26 di òktober a drenta keho di ladronisia na Pink Beach, situá na E.E.G. Bulevar. Entre 2.15 or di atardi i 2.30 or di atardi, deskonosínan a bai ku un tas di lomba koló pretu i un tas pa wanta kos friu den dje miéntras e doñonan tabata snòrkel i landa. Den e tasnan tabatin entre otro, dos telefòn di e marka IPhone modèl 13, yabinan, karchinan i brelnan di solo. Ta investigando e kaso.
Awe Ta 29 Di Oktober 2024
